LÍF OG FJÖR HJÁ KORPÚLFUM. Hann var þéttsetinn salurinn á félagsfundi Korpúlfa þegar Grafarvog.net bar að garði á félagsfundinn í Borgum eftir hádegi í dag og rífandi stemning. Sannast sagna voru fleiri mættir en ég átti von á. „Svona er þetta alltaf á öllum félagsfundum,“ sagði Theodór Blöndal, formaður Korpúlfa, sem tók á móti mér ásamt Birnu Róbertsdóttur, verkefnastjóra hjá Reykjavíkurborg sem er allt í öllu í Borgum. „Birna er Borgarstjórinn,“ bætti Theodór við.

STEMNING HJÁ KORPÚLFUM. Það var heldur betur stuð og stemning á félagsfundi Korpúlfa í Borgum eftir hádegi í dag þegar gamlar kempur í stuðhljómsveitinni Dansbandið stigu á stokk og tóku lagið. Þetta var síðasti almenni félagsfundurinn á vorönninni. Þéttsetinn salurinn tók að sjálfsögðu vel undir. Þarna stóðu menn í stafni sem kunna sitt fag og eru hoknir af reynslu af hefðbundnu spiliríi á dansleikjum. Ekki laust við að andi Ragga Bjarna og Ingimars Eydals svifi yfir vötnum; Hótels Sögu- og Sjallafjör. Hljómsveitina skipa Grímur Sigurðsson, Pálmar Ólafsson og Kristján Hermannsson og sannast sagna hafa þeir tengingu við Ragnar og Ingimar. Grímur spilaði bæði með hljómsveit Ragga Bjarna og Ingimars – raunar í þrettán ár fyrir norðan með Ingimar og því alvanur Sjallanum.

Tíðin að undanförnu hefur verið sérlega hagstæð fyrir gróðurinn og í Grafarvogshverfinu hefur hreinlega mátt sjá grasið vaxa síðustu daga. Birkið lætur helst ekki plata sig á vorin en það hefur tekið skrefið og tekið til við að springa út. Verkalýðsdagurinn handan við hornið og stundum er haft á orði þegar fólk flytur úr landi, t.d. vegna kreppu, að grasið þar sé grænna og þá átt við að tekjur og kjör séu þar betri. - JGH

Einar Bárðarson tónlistar- og markaðsmaður – og maðurinn á bak við Stóra plokkdaginn – segir að ruslið sem tínt sé upp á Stóra plokkdeginum megi allt eins rekja til fugla frekar en sóðaskapar fólks. Mörg sorpílát á staurum, svonefndar stauratunnur, séu ekki vargheldar og fuglinn rífi upp ruslið í leit að æti. „Þá má hvetja reykingafólk og nikótínneytendur til að ganga betur um - þeir eru einu alvöru sóðarnir ennþá en þeim fer sem betur fer fækkandi,“ segir Einar í stuttu spjalli við Grafarvog.net.

Sá rauði blaktir við hún í Hamrahverfinu. Áhugi á enska boltanum hér á landi er vissulega löngu kunnur og þau félög sem eiga flesta aðdáendur eru Liverpool, Manchester United, Arsenal, Manchester City, Chelsea og Tottenham - e n auðvitað eiga öll ensku liðin sér áhangendur hér heima. Liverpool tryggði sér enska titilinn um helgina með sigri á Tottenham og það urðu mikil læti í Bítlaborginni í kjölfarið. Þessi fáni hefur blaktað við hún í Hamrahverfinu í dag og notið sín í góða veðrinu. Þetta er tuttugasti Englandsmeistaratitill Liverpool. Til hamingju Púlarar.

Við sögðum frá því í gær að útlit væri fyrir að hitametið í apríl frá árinu 1928 myndi líklegast falla. Já, og það gerðist. Hitinn hélst yfir 10°C yfir daginn. Þetta er stórfrétt í heimi veðurmetanna, segir Einar Sveinbjörnsson sem setti inn færslu á FB í gærkvöldi eftir að hafa fylgst með málinu í gærdag. Hér kemur færsla Einars á FB frá því í gærkvöldi. HITAMET! 10 stigin náðust í Reykjavík í dag, 9. apríl. Taldi það ekki líklegt í fyrri skrifum. Meðalhiti átta athugana reyndist vera 10,0°C (kl.00, 03, 06, 09, 12, 15, 18 og 21). Dæguhitinn hefur aldrei náð 10 stigum í Reykjavík svo snemma ársins sem nú. Daglegar mælingar sem ég hef undir höndum eru frá 1901, en vissulega eru til slæðingur eldri mælinga úr Reykjavík. Munaði reyndar litlu 1928 þegar dægurhitinn reiknaðist 9,8°C hinn 3. apríl það ár. En það var víðar sem dægurhitinn náði 10 stigum vestanlands, m.a. í Stykkishólmi og eins í Húsafelli þar sem hann reyndist 10,9°C. Það samsvarar nokkurnveginn meðalhita í júlí! Og auðvitað er þetta stórfrétt og verður enn stærri í augum veðurmetaklúbbsins ef ekki finnst sambærilegur eða hærri hiti í Stykkishólmi, með sína löngu og merkilegu mælaröð, skrifar Einar Sveinbjörnsson veðurfræðingur á FB.

HITAMET Í APRÍL Í DAG? Einar Sveinbjörnsson veðurfræðingur segir að dagurinn í dag geti orðið dagur tíðinda í veðurmælingum í höfuðborginni og að gamalt hitamet í apríl falli haldist hitinn yfir 10°C út daginn. Einar heldur úti vefnum Blika.is. Hann fer yfir málið í færslu á FB og er hún svohljóðandi: HLÝTT Í GÆR - HLÝRRA Í DAG? „Leit á mælitölur úr Reykjavík. Í gær 8. apríl reyndist meðalhiti dagsins vera 9,2°C. Dægurhitinn hefur sárasjaldan farið yfir 10 stig í Reykajvík og aldrei (frá 1901) fyrir sumardaginn fyrsta. Sérlega milt var í morgun suðvestan- og vestanlands. Í Reykjavík stendur meðaltal mælinga það sem af er degi í 10,2°C. Ef hann helst á þessu róli út daginn teldist það talsverð tíðindi, því dægurhitinn í Reykjavík hefur aldrei náð 10 stigum svo snemma í apríl (og þar með á árinu). 3. apríl 1928 má finna töluna 9,8°C. Þá voru mælingar í Rvk. gerðar á Skólavörðustíg 3. Spáð er vætu í Reykjavík seinnipartinn í dag og við það ætti hitinn að lækka og því tel ég fremur ólíklegt þrátt fyrir allt að 10 stiga þröskuldinum verði náð að þessu sinni. Fyrir norðan og austan er líka efniviður í 20 stiga hámarkshita þar sem hann verður mestur. Líka það væru talsverð tíðindi ef út í það væri farið, þó svo að slíkur augnablikshiti hafi mælst stöku sinnum áður, en einkum þá austanlands í snarpri SV eða V-átt,“ skifar Einar Sveinbjörnsson veðufræðingur.

VERÖLD SEM VAR. Gamla myndin. Það er nú svolítið síðan að þessi mynd var tekin en mikið er gaman að rýna í hana. Það er Guðbjartur Walter H. Ólafsson sem birtir hana á Facebook. Þarna má sjá Húsgagnahöllina og háhýsi Íslenskra aðalverktaka. Prentsmiðjan Oddi er þar fyrir neðan. Fremst á myndinni til hægri er húnsæði Osta- og smjörsölunnar. Engin er byggðin í Grafarvogi og að sjálfsögðu engin Gullinbrú en hafist var handa við gerð hennar eftir kosningarnar 1982 þegar Davíð Oddsson vann kosningasigur meðal annars út á að byggja meðfram ströndinni og reisa nýtt 20 þúsund manna hverfi í Reykjavík, Grafarvog. Sjálfur giska ég á að myndin sé tekin í kringum 1973.

Þær eru oft skemmtilegar gömlu myndirnar sem birtasta á FB. Þessi vakti athygli mína. Bandarískir dátar að taka við kassa af Coca Cola við bækistöðvar sínar, Camp Curtis, við Sogavoginn. Það er Sverrir Þórólfsson sem setur inn myndina með orðunum: „Kaninn kom til landsins 1941 Coca Cola ári seinna sumarið 1942.“ Myndin er merkt Samuel Kadorian. Oftar en ekki verða talsverðar umræður í athugasemdakerfinu við birtingu þessara gömlu mynda og svo varð einnig í þetta skiptið. Hvar er jú þessi mynd tekin? Og þá er horft í bakgrunninn til að komast að niðurstöðu. Baldur J. Baldursson setti inn myndir og fann út að þetta væri við Sogavoginn. Það voru húsin við þakbrún braggans sem komu honum á sporið. Fróðlegt og skemmtilegt. Veröld sem var!

Forseti Íslands, Halla Tómasdóttir , segir frá því á FB-síðu sinni að þau hjón hafi fengið þann heiður að taka á móti fyrstu pörunum af mottumars-sokkunum þegar fulltrúar Krabbameinsfélagsins komu á Bessastaði ásamt hönnuðum sokkanna. „Innblástur var sóttur í smiðju listamannsins Prins Póló og eru sokkarnir hannaðir af Berglindi Häsler, ekkju Svavars Péturs og eiganda Havarí, í samstarfi við Björn Þór Björnsson (Bobby Breiðholt). Markmiðið er sem fyrr að að efla baráttuna gegn krabbameini í körlum, en þriðji hver karlmaður greinist með krabbamein einhvern tímann á lífsleiðinni. Í ár er áhersla Mottumars á tenginguna á milli lífsstíls og krabbameina. Endilega kynnið ykkur málið og frestum því ekki að huga að heilsunni. Því eins og Prinsinn sjálfur sagði: Nú er góður tími!,“ skrifar forseti Íslands, Halla Tómasdóttir.