„Ótrúlegt en satt og ábyggilega einstakt: Verðaunin voru svo mörg, stór og smá, að allir þátttakendur fóru heim með verðlaun. Hagkaup, Domino´s, Boltamaðurinn og Bókabúð Grafarvogs gáfu öll verðlaunin,“ segir Helgi Árnason , formaður skákdeildar Fjölnis, um Sumarskákmót Fölnis sem haldið var í Rimaskóla í gær. Hátt í hundrað krakkar tóku þátt í mótinu og eins og Helgi segir þá fóru allir heim með verðlaun. Vel gert og ekkert nema frábært að fylgjast með hinum mikla skákáhuga barna og unglinga hér í Grafarvogi.
„Ótrúlegt en satt og ábyggilega einstakt: Verðaunin voru svo mörg, stór og smá, að allir þátttakendur fóru heim með verðlaun. Hagkaup, Domino´s, Boltamaðurinn og Bókabúð Grafarvogs gáfu öll verðlaunin,“ segir Helgi Árnason , formaður skákdeildar Fjölnis, um Sumarskákmót Fölnis sem haldið var í Rimaskóla í gær. Hátt í hundrað krakkar tóku þátt í mótinu og eins og Helgi segir þá fóru allir heim með verðlaun. Vel gert og ekkert nema frábært að fylgjast með hinum mikla skákáhuga barna og unglinga hér í Grafarvogi.
Hann var bæði hressilegur og líflegur fundur Íbúasamtaka Grafarvogs með fulltrúum framboðanna í Reykjavík í Skálanum í Gufunesi á dögunum, líkt og fram kom í frétt Grafarvogur.net af fundinum. Þar bar aðstöðu Fjölnis hins vegar ekki á góma þótt Stefán Pálsson, Vinstrinu, hefði á orði við lok fundarins að fundurinn þyrfti helst að vera klukkutíma lengri svo hægt væri að ræða um fleiri mál. „Dalhúsin eru okkar heimili og við viljum einfaldlega fá uppbyggingu þar í samræmi við þá þörf sem liggur fyrir. Við þurfum að hafa að minnsta kosti þrjá gervigrasvelli, yfirbyggða stúku og félagsaðstöðu eins og önnur félög,“ segir Birgir Birgisson , framkvæmdastjóri knattspyrnudeildar Fjölnis þegar Grafarvogur.net ræddi við hann um hvað væri brýnast. Birgir bætir því við að búið sé að flytja stóran hluta af starfseminni í Egilshöll en þar hafi félagið hvorki heimili né félagsaðstöðu. „Við eigum þar ekki velli nema hlutdeild í tímum inni í höllinni og útrunnið gervigras á útisvæði. Það hefur verið mikil fjölgun iðkenda undanfarna 18 mánuði hjá okkur og svo er komið að við getum tæplega annað eftirspurn vegna aðstöðuleysis. Gufunesið er að byggjast upp, Keldnalandið er í farvegi, nýtt hverfi að rísa við Korputún og þéttingaráform víðs vegar. Grafarvogshverfið stefnir í að tvöfaldast og aðstaðan er sprungin nú þegar,“ segir Birgir. „Úr þessu þarf að bæta.“
Karfan er svo sannarlega í mikilli sókn í Grafarvoginum undir styrkri stjórn köruboltadeildar Fjölnis. Nýjustu tíðin eru þau að Grafarvogurinn verður heimili NBA-körfuboltans í eina viku í ágúst í sumar. Frábært í alla staði. Um er að ræða hinar þekktu Elite Camp-æfingabúðir sem verða í Egilshöllinni dagana 5. til 9. ágúst nk. og eru fyrir aldurshópinn 7 til 17 ára en Fjölnir er með sérlega sterk lið í yngri flokkunum í körfunni. Eyþór Ívar Jónsson , forseti fyrirtækisins Akademias og stjórnarmaður í körfuboltadeild Fjölnis, segir í samtali við Grafarvogur.net að til standi að verða með alls kyns viðburði í Grafarvoginum í kringum þessar frægu æfingabúðir. Meðal annars er unnið að því að landa MasterClass í þjálfun og fara yfir það hvað við Íslendingar getum lært af þjálfurum í NBA-deildinni. Á meðal stórstjarna sem mæta í Grafarvoginn í sumar í tengslum við Elite Camp eru þeir Michael Cooper og Irving Thomas en þeir léku með hinu fornfræga félagi LA Lakers á árum áður. Sérlega ánægjuleg tíðindi og augljóslega unnið gróskumikið starf í körfunni í Grafarvogi. Áfram Grafarvogur og Fjölnir. - JGH
Dagur Ragnarsson , skákmaður Fjölnis 2025 og 2026, er nú orðinn efstur Íslendinga á Reykjavik Open 2026 í Hörpu. Þetta kemur fram hjá Helga Árnasyni, formanni skákdeildar Fjölnis, á FB-síðu hans fyrr í kvöld. „Dagur (2.376 Elo stig) er kominn með 6 vinninga af 8 mögulegum eftir að hafa lagt Kazakann og stórmeistarann Alisher Suleymenov (2.523 Elo stig) að velli í næstsíðustu umferð mótsins. Aldeilis vel gert hjá Degi. Andstæðingurinn Suleymenov Alisher er hvað þekktastur fyrir að hafa unnið Magnus Carlsen nýlega í eftirminnilegri skák. Koma svo Dagur í lokaumferð mótsins sem tefld verður á morgun, þriðjudag 31. mars,“ segir Helgi Árnason í FB-færslu sinni fyrr í kvöld. Svo sannarlega glæsilegur árangur hjá þessum öfluga skákmanni okkar Grafarvogsbúa. - JGH
Við Grafarvogsbúar getum svo sannarlega verið stoltir af þessari afreksdömu, Emilíu Emblu B. Berglindardóttur , skákkonu Fjölnis 2025, en hún vann í gær titilinn Stúlknameistari Reykjavíkur 2026. Til hamingju Emilía Embla og Skákdeild Fjölnis þar sem unnið er kraftmikið og einstakt starf undir handleiðslu Helga Árnasonar , fyrrum skólastjóra í Rimaskóla. Fram kemur á FB-síðu Skákdeildar Fjölnis að Emilía hafi teflt í opnum flokki á Stúlkna-og drengjameistaramóti Reykjavíkur og átti að venju góðan dag við taflborðið og uppskar bikara og titilinn Stúlknameistari Reykjavíkur 2026. Hún bætti 50 skákstigum við ELÓ-stigin sín. Ekkert annað en stórkostlegt og til hamingju aftur. - JGH
Þær voru magnaðar lokamínúturnar í Íslandsmóti skákfélaga sem haldið var í Rimaskóla um helgina. Um 400 skákmenn mættu í Grafarvoginn og tóku þátt í mótinu. Þegar upp var staðið munaði aðeins einu stigi á Eyjamönnum og Grafarvogsbúum, A-sveit Fjölnis, í Úrvalsdeildinni. Þessi tvö skáklið háðu afar spennandi keppni í síðustu umferð mótsins. Taflfélag Vestmannaeyja hlaut 16 stig gegn 15 Fjölnismanna. Minni gat munurinn ekki orðið og vannst sigurskákin á lokamínútunum í lokaumferðinni. Silfrið fór í Grafarvoginn, gullið til Eyja. Hvílík spenna og loftið rafmagnað. A-sveit Fjölnis er firnasterk og hampaði Íslandsmeistaratitli skákfélaga bæði árin 2024 og 2025. Hún átti því titil að verja fyrir þetta mót. Í Úrvalsdeildinni keppa sex bestu skáksveitir landsins. „Vestmanneyingar fögnuðu sínum fyrsta Íslandsmeistaratitli á 100 ára afmæli taflfélagsins og gátum við Fjölnismenn vel unnt þeim sigurinn í tilefni þessara tímamóta,“ segir Helgi Árnason , formaður Skákdeildar Fjölnis og liðsstjóri Fjölnismanna. Þetta var síðari hluti Íslandsmótsins og kepptu 400 skákmenn í fimm deildum. Þrátt fyrir sigur Eyjamanna á stigum þá hlaut A-sveit Fjölnis fleiri vinninga, en það eru stigin sem telja.
Til hamingju Héðinn Steingrímsson og Dagur Ragnarsson - og þið öll í skákdeild Fjölnis. En tveir skákmenn í Skákdeild Fjölnis, stórmeistarinn Héðinn Steingrímsson og alþjóðlegi skákmeistarinn Dagur Ragnarsson , eru í hópi 13 íslenskra skákmanna sem fá styrk úr afrekssjóði í skák 2006. Þeir eru svo sannarlega vel að þessu komnir. Glæsilegt! Við úthlutun var meðal annars horft til árangurs og virkni árið 2025 og áætlun um virkni í skák fyrir árið 2026. Héðinn fær 9 mánaða úthlutun en Dagur til 3. mánaða. Héðinn Steingrímsson hefur teflt með Skákdeild Fjölnis frá árinu 2007 og oftar en ekki á 1. borði. Dagur er uppalinn Fjölnismaður og var kjörinn skákkarl Fjölnis tvö síðustu ár, 2024 og 2025. Árið 2024 var hann einnig valinn Íþróttamaður Fjölnis. Þeir Héðinn og Dagur hafa báðir teflt í A-sveit Fjölnis, Íslandsmeistara skákfélaga 2024 og 2026. Þess má geta að Dagur hóf árið 2026 með öruggum sigri á Skákþingi Reykjavíkur, sem er nýlokið, og hlaut með sigrinum titilinn Skákmeistari Reykjavíkur 2026.
