Snjókorn tóku að falla þetta kvöld í fyrra, 27. október, en svo kyngdi snjónum niður um nóttina og í dögun þess 28. október vissu borgarbúar vart hvaðan á sig stóð veðrið í fyllstu merkingu; afrakstur næturnnar var slíkur að það var allt á kafi. Borgarbúar byrjuðu að að birta myndir af fannferginu. Umferðin gekk mjög illa eins og jafnan þegar fyrstu snjóþyngslin verða á haustin. Það sýnir sig þá hversu margir bílar eru illa búnir og fyrir vikið til trafala í umferðinni við þær aðstæður. Við birtum í fyrra þessa stórskemmtilegu frétt og mynd sem Grafarvogsbúinn Sigurbergur Kristjánsson tók við Bónus af úrræðagóðum viðskiptavini sem skaust í Bónus í Spöngina á gönguskíðum. Það er ekki á hverjum degi sem Grafarvogsbúar mæta á skíðum í Bónus. En það gerðist þó þriðjudaginn 28. október í fyrra. Þann eftirminnilega dag. Afrakstur næturinnar verður heldur hóflegri að þess sinni. - JGH

Helgi Árnason, skákfrömuður og formaður Skákdeildar Fjölnis, sótti í hinn góða frasa íslenska landsliðsins í handbolta á Ólympíuleikunum í Kína frá árinu 2008 þegar hann sagði skemmtilega frá því að skáksveit Fjölnis hefði lent í 2. sæti á fjölmennu Íslandsmóti barna-og unglingasveita sem fram fór í íþróttahúsinu Miðgarði í Garðarbæ um helgina: „ Gott silfur - gulli betra,“ skrifaði Helgi á sinn jákvæða og uppbyggilega hátt. Íslenska landsliðið í handbolta varð í öðru sæti á ÓL í Peking og þá varð þessi frasi til og rætt um silfurliðið og silfurdrengina sem raunverulega gulldrengi. Gerð var heimildarmynd um árangur liðsins og var hún frumsýnd 2009 og hét þá einmitt: Gott silfur - gulli betra. En hvað um það, börnin og unglingarnir í Fjölni eru snillingar í skákinni og lentu öðru sæti á mótinu sl. sunnudag; tóku gott og gljáfægt silfrið !

Nýliðið sumar telst rigningasumar í höfuðborginni. Alls voru úrkomudagar 52 borginni frá byrjun júní til loka september. Þetta er vel yfir meðallagi. Morgunblaðið segir frá. Í fréttinni, sem Sigtryggur Sigtryggsson blaðamaður skrifar, segir: „Veðurstofusumarið er einum mánuði lengra en skilgreint sumar Alþjóðaveðurfræðistofnunarinnar sem telur ekki september með. Álykta má af nýbirtu tíðarfarsyfirliti Veðurstofunnar að þetta verði að teljast rigningasumar. Úrkoma í Reykjavík mældist 311,5 millimetrar (mm) mánuðina fjóra, sem er um 30% umfram meðalúrkomu áranna 1991-2020. Í Stykkishólmi mældist heildarúrkoma sumarsins 290,1 mm, sem er 50% umfram meðalúrkomu áranna 1991-2020. Á Akureyri mældist úrkoma þessa fjóra sumarmánuði 158,3 mm, sem er 5% umfram meðallag. Á Dalatanga mældist sumarúrkoman 557,8 mm, sem er 10% umfram meðalúrkomu áranna 1991-2020. Júlí var þó óvenju þurr bæði á Akureyri og á Dalatanga.“ Þá kemur fram í fréttinni að meðalhiti sumarsins í Reykjavík hafi verið 10,2 stig, eða 0,1 stigi undir meðallagi áranna 1991-2020. Meðalhiti sumarmánaðanna fjögurra er engu að síður í 41.-42. hlýjasta sæti á lista síðustu 156 ára.“ En hvað um það; rigningasumar að baki. - JGH

Áhugi Grafarvogsbúa á umferðinni um Höfðabakka og þeim breytingum sem þar var ráðist í á síðasta ári er eðlilega mikill enda Höfðabakkinn helsta umferðaræðin inn og út úr hverfinu. Eftir frétt okkar í gær um að núverandi meirihluti í borginni ætli að færa gatnamót Höfðabakka og Bæjarháls sem mest í fyrra horf fengum við þessa skemmtilegu mynd frá dyggum lesanda okkar. Hann var ánægður með skrif okkar um framkvæmdirnar við Höfðabakkann frá því þær hófust um mitt sumar í fyrra og ákvað að búa til mynd með aðstoð gervigreindarinnar - en það er núna mjög í tísku - og senda okkur. Myndin er af stóru og miklu skilti þar sem leiðin liggur um Höfðabakkann að Grafarvogi.net. Gaman að þessu. Gervigreindinin fer augljóslega létt með þetta hjá mörgum Grafarvogsbúanum, núverandi sem fyrrverandi. Við þökkum kærlega fyrir myndina. Hún fellur auðvitað undir hugtakið „fake news“ og er eina falsfréttin sem við höfum birt. En við getum auðvitað ekki annað en birt hana - segir það sig ekki sjálft? - JGH

Við gátum ekki stillt okkur um að leika okkur aðeins með fyrirsögnina þegar kemur að umfjöllun um loft og meira loft hjá okkur Grafarvogsbúum. En ýmsir hafa spurt sig að því hvar hægt sé að fá loft í dekkin á Olís-stöðinni við Gullinbrú eftir að Pikkolo skúrinn kom til sögunar og hin rótgróna loftpumpa sem þar var fékk að róa. Dælan eða rafmagnspumpan er núna á Glans-stöðinni og auðvelt að nálgast hana þar. Nóg er nú loftið þar á bæ og það leikur um loftslönguna og í dekkin - sem sum eru með slöngum. Stundum hafa þessar loftdælur á bensínstöðvum verið nefndar loftpressur. Við sem unnum á loftpressu um tíma í þá gömlu góðu eigum frekar erfitt með að tala um loftpressur á bensínstöðvum. Þær tilheyra frekar jarðvegsvinnu. Aðalatriðið er að dekkin blási út. Það gera þau núna með glans. - JGH