Vigfúsarstofa verður formlega vígð fyrir minningartónleikana á fimmtudag og mun fjölskylda séra Vigfúsar Þórs Árnasonar og Elínar Pálsdóttur verða viðstödd vígsluna. Það er mikill sómi að þessu hjá Grafarvogskirkju. Mikill áhugi er á tónleikunum og hefur miðasala farið vel af stað en allur ágóði rennur í nýstofnaðan Hollvinasjóð Grafarvogskirkju. Vigfús og Elín voru afar samrýmd hjón og létust með aðeins sex mánaða millibili á síðasta ári. Vigfúsarstofa er á annarri hæð kirkjunnar þar sem Lions-menn höfðu áður aðstöðu og er öll hin vistlegasta. Þarna eru munir sem voru á skrifstofu Vigfúsar á heimili þeirra hjóna við Logafoldina; nefna má bækur, bókaskápa, skrautmuni, altari, myndir og fleira mætti upp telja. Segja má að heimaskrifstofa Vigfúsar hafi verið flutt um set í hverfinu. „Okkur þykir mjög vænt um Vigfúsarstofu og finnst ánægjulegt að hún verði formlega vígð fyrir tónleikana til heiðurs þeim hjónum,“ segir Arna Ýrr Sigurðardóttir, sóknarprestur í Grafarvogi. „Stofan er vistleg og andi Vigfúsar er með okkur; við finnum það vel. Stofan er talsvert notuð, t.d. fyrir fundi sóknarnefndar sem og aðra fundi. Það eru góðir og notalegir straumar sem leika hér um salarkynni,“ segir Arna Ýrr.

Það verður falleg stund söngva, tóna og minninga í kirkjunni okkar í Grafarvogi nk. fimmtudagskvöld, 24. september, þegar minningartónleikar um þau heiðurshjón séra Vigfús Þór Árnason og Elínu Pálsdóttur verða haldnir. Mikill áhugi er á þessum tónleikum og hefur miðasala farið vel af stað. Hægt er að kaupa miða í kirkjunni á opnunartíma sem og verða miðar seldir við innganginn fyrir tónleikana - verði þá einhverjir miðar eftir. Stórskotalið söngvara mætir og heiðrar minningu þeirra hjóna með söng sínum. Þetta eru þau Sigrún Hjálmtýsdóttir, (Diddú), Gissur Páll Gissurarson, Jóhann Friðgeir Valdimarsson og Matthías Matthíasson . Þau Diddú, Gissur Páll og Jóhann Friðrik hafa margoft komið fram í kirkjunni og yljað okkur með söng sínum. Diddú og Gissur Páll voru til dæmis einsöngvarar við útför Elínar sl. haust. Stjórnendur tónleikanna verða Guðný Einarsdóttir, Lára Bryndís Eggertsdóttir og Jónas Þórir Þórsson en þær Guðný og Lára eru organistar kirkjunnar. Höldum minningu þeirra hjóna í heiðri og gefum okkur tíma og mætum á tónleikana. Þetta verður mikil og falleg stund. - JGH

Grafarvogskirkja efnir til stórtónleika fimmtudaginn 24. september til minningar um þau heiðurshjón séra Vigfús Þór Árnason og Elínu Pálsdóttur en þau létust bæði á síðasta ári með aðeins sex mánaða millibili. Þjóðþekktir listamenn koma fram á tónleikunum, eða þau Diddú, Gissur Páll, Jóhann Friðgeir, Matti Matt, Kór Grafarvogskirkju, Vox Populi og Frímúrarakórinn. Það væri nú vel til fundið kæru Grafarvogsbúar að troðfylla kirkjuna í tilefni þessara minningartónleika en þau hjón byggðu upp söfnuðinn af mikilli eljusemi ásamt auðvitað mörgum öðrum. Séra Vigfús Þór lést á líknardeild Landspítalans 27. febrúar á síðasta ári og Elín aðeins um sex mánuðum síðar, eða 9. ágúst. Hún var þá nýbúin að koma sér fyrir í nýrri íbúð í Garðabænum. Allur ágóði af þessum tónleikunum rennur í orgelsjóð kirkjunnar en miðaverð er 5.500 kr. Undirritaður var í sóknarnefnd Grafarvogskirkju í um tíu ár og kynntist þeim hjónum vel. Vinna þeirra við að ryðja brautina og byggja upp söfnuðinn verður ætíð samofin sögu safnaðarins. Blessuð sé minning þeirra. - JGH

Séra Vigfús Þór Árnason, fyrsti sóknarprestur okkar Grafarvogsbúa, hefði orðið áttræður í dag, 6. apríl. Hann andaðist á Landspítalanum 27. febrúar á síðasta ári. Þau hjón Elín Pálsdóttir og séra Vigfús voru mjög samrýmd og byggðu upp söfnuðinnn í Grafarvogi af mikilli eljusemi. Séra Vigfús var sóknarprestur en í senn mikill framkvæmdamaður, fékk oft snjallar hugmyndir og kom þeim í verk. Sagan af krossinum við Grafarvogskirkju er gott dæmi þar um. Fljótlega eftir að söfnuðurinn fékk lóðina við Fjörgyn var það eitt af fyrstu verkum hans að fá aflagðan rafmagnsstaur sem var fyrir botni Grafarvogs og gera að krossi við Grafarvogskirkju. Það var Ingjaldur Eiðsson sóknarnefndarmaður sem tók að sér að laga rafmagnsstaurinn til og koma honum fyrir á kirkjulóðinni þar sem hann stendur enn. Fallegur og virðulegur kross. Við krossinn hafa oft á tíðum verið helgistundir og guðsþjónustur - þegar viðrað hefur til þess. Rafmagnsstaurinn hafði áður það verkefni að flytja birtu í lífið, einmitt eins og kristin trú snýst um. Þetta var snjöll og góð hugmynd hjá séra Vigfúsi. Blessuð sé minning hans og þeirra hjóna en Elín lést í ágúst sl., aðeins rúmu hálfu ári eftir að hún syrgði heittelskaðan eiginmann sinn. - JGH

Grafarvogur.net óskar lesendum sínum gleðilegra páska og áréttar þakklæti sitt fyrir frábærar viðtökur frá því vefurinn fór í loftið fyrir rúmi ári. Á föstudeginum langa minnast kristnir menn krossfestingar Jesú Krists en á páskadegi upprisu hans. Jesús var handtekinn og krossfestur á síðasta föstudegi fyrir páska en Gyðingar héldu páskahátíð löngu fyrir fæðingu frelsarans. Á vísindavef Háskóla Íslands segir : „Páskar Gyðinga eru svokölluð föst hátíð sem alltaf er haldin á sérstökum mánaðardegi samkvæmt tímatali Gyðinga. Kristnir menn minntust hins vegar upprisu Krists, það er páskadagsins, ætíð á sunnudegi og miðuðu hátíðina við fyrsta sunnudag eftir fyrsta fulla tungl eftir jafndægur á vori. Páskarnir urðu því svokölluð færanleg hátíð.“ Það verða víða veislur í dag þar sem fjölskyldur koma saman og páskalambið gamla góða prýðir væntanlega borðhaldið á flestum heimilum. - JGH