Hinn kunni knattspyrnumaður, Ívar Ingimarsson, sem fluttur er alfarið í Grafarvoginn, hefur verið ráðinn aðstoðarþjálfari meistaraflokks Fjölnis í knattspyrnu. Hann var atvinnumaður í knattspyrnu á Englandi frá 1999 til 2012 og spilaði með Brentford, Wolverhampton Wonderes, (Úlfunum), Brighton, Reading og Ipswish Town. Allt þekkt lið í boltanum. Lengst af spilaði hann með Reading eða frá 2003 til 2011 eða áður en hann lauk ferlinum með Ipswish. Ívar er hér í stuttu spjalli við okkur á Grafarvogi.net og við byrjum vissulega á að spyrja hann um leikina sem hann spilaði með Reading gegn Man. United á sínum tíma þegar Christiano Ronaldo lék með liðinu. „Ég var nú fyrst og fremst mjög feginn að vera ekki bakvörður í þeim leikjum sem ég spilaði gegn Roaldo þar sem hann var á kantinum,“ segir Ívar sem spilaði bæði sem miðvörður og bakvörður. „Ég man þó sérstaklega eftir því í einum leiknum sem við spiluðum gegn Man Utd. var mér falið að hafa sérstakar gætur á Ronaldo og dekka hann í hornspyrnum. Það gekk nú ekkert sérstaklega vel, því hann var næstum búinn að skora tvisvar í byrjun þess leiks. Þá var ákveðið að taka mig af Ronaldo og láta mig dekka Rio Ferdinand í staðinn. Það var svona svolítið eins og að fara úr öskunni í eldinn. En þetta gekk samt allt ágætlega á endanum og þetta voru allt hörkuleikir hjá Reading á móti Ronaldo og Man Utd.“
Hinn kunni knattspyrnumaður, Ívar Ingimarsson, sem fluttur er alfarið í Grafarvoginn, hefur verið ráðinn aðstoðarþjálfari meistaraflokks Fjölnis í knattspyrnu. Hann var atvinnumaður í knattspyrnu á Englandi frá 1999 til 2012 og spilaði með Brentford, Wolverhampton Wonderes, (Úlfunum), Brighton, Reading og Ipswish Town. Allt þekkt lið í boltanum. Lengst af spilaði hann með Reading eða frá 2003 til 2011 eða áður en hann lauk ferlinum með Ipswish. Ívar er hér í stuttu spjalli við okkur á Grafarvogi.net og við byrjum vissulega á að spyrja hann um leikina sem hann spilaði með Reading gegn Man. United á sínum tíma þegar Christiano Ronaldo lék með liðinu. „Ég var nú fyrst og fremst mjög feginn að vera ekki bakvörður í þeim leikjum sem ég spilaði gegn Roaldo þar sem hann var á kantinum,“ segir Ívar sem spilaði bæði sem miðvörður og bakvörður. „Ég man þó sérstaklega eftir því í einum leiknum sem við spiluðum gegn Man Utd. var mér falið að hafa sérstakar gætur á Ronaldo og dekka hann í hornspyrnum. Það gekk nú ekkert sérstaklega vel, því hann var næstum búinn að skora tvisvar í byrjun þess leiks. Þá var ákveðið að taka mig af Ronaldo og láta mig dekka Rio Ferdinand í staðinn. Það var svona svolítið eins og að fara úr öskunni í eldinn. En þetta gekk samt allt ágætlega á endanum og þetta voru allt hörkuleikir hjá Reading á móti Ronaldo og Man Utd.“
Helgi Árnason, skákfrömuður og formaður Skákdeildar Fjölnis, sótti í hinn góða frasa íslenska landsliðsins í handbolta á Ólympíuleikunum í Kína frá árinu 2008 þegar hann sagði skemmtilega frá því að skáksveit Fjölnis hefði lent í 2. sæti á fjölmennu Íslandsmóti barna-og unglingasveita sem fram fór í íþróttahúsinu Miðgarði í Garðarbæ um helgina: „ Gott silfur - gulli betra,“ skrifaði Helgi á sinn jákvæða og uppbyggilega hátt. Íslenska landsliðið í handbolta varð í öðru sæti á ÓL í Peking og þá varð þessi frasi til og rætt um silfurliðið og silfurdrengina sem raunverulega gulldrengi. Gerð var heimildarmynd um árangur liðsins og var hún frumsýnd 2009 og hét þá einmitt: Gott silfur - gulli betra. En hvað um það, börnin og unglingarnir í Fjölni eru snillingar í skákinni og lentu öðru sæti á mótinu sl. sunnudag; tóku gott og gljáfægt silfrið !
Hún verður hrikaleg keppnin í hinu árlega Árgangamóti Fjölnis í knattspyrnu sem fram fer í Egilshöll á morgun. Fyrstu leikirnir hefjast kl. 10:00 í fyrramálið. Alls mæta 19 lið karla og 7 lið kvenna - og verða alls spilaðir 57 leikir. Takk fyrir. Búið er að loka fyrir skráningu. Til að geta verið með verða menn að hafa æft eða spilað með Fjölni; haft tengingu við félagið. Núverandi meistaraflokksleikmenn Fjölnis og leikmenn í efstu tveimur deildum á Íslandi eru ekki með leikheimild.
Stemningin hjá þeim Fjölniskonum eftir sigurinn gegn Vestra var engu lík enda Íslandsmeistarar í 2. deild kvenna í knattspyrnu - og með glæsilegan bikar að launum. Áður en þær fengu bikarinn afhentan stigu þær eins konar stríðsdans og sungu af miklu krafti. Sá söngur hljómaðir vel. Enda syngja þær vel eins og sjá má á meðfylgjandi myndbandi. Áfram Fjölnir. - JGH
Jón Bjarni Guðmundsson, stjórnarmaður í BUR, Barna- og unglingaráði Fjölnis , stóð í ströngu við grillið á leiknum í gær við Vestra og rjúkandi réttirnir ruku út. Bikarinn fór á loft og Fjölniskonur Íslandsmeistarar í 2. deild kvenna í knattspyrnu. Vel gert. „Það voru um sjö til átta hundruð pylsur sem fóru ofan í krakkana fyrir leikinn en við vorum hér með mikla uppskeruhátíð. Ég geri ráð fyrir að grilla um 300 borgara,“ sagði Jón Bjarni. Hann var að gera allt klárt við grillið skömmu áður en blásið var til hálfleiks, sagðist vera að flambera borgarana og það væri góður hiti í grillinu, svona eins og ætti að vera í öllum góðum grillum. Barna- og unglingaráðið heldur utan um veitingarnar á vellinum og ágóðinn fer að sjálfsögðu í unglingastarf Fjölnis sem er með miklum blóma. Gott mál! Meðfylgjandi er stutt vídeó-viðtal okkar við Jón Bjarna. Skemmtilegur og hress maður. - JGH
Það var heldur betur stuð og stemning á leiknum við Vestra í dag og þær Fjölniskonur fengu dyggan stuðning frá áhorfendum sem mætu með bros á vör á völlinn í bongóblíðu. Allir í sólskinsskapi og Grafarvogsbúar svo sannarlega vel með á nótunum. Þessi vösku piltar slógu taktinn af ákafa allan leikinn og léku kjuðarnir í höndum þeirra. Gleðidagur í Grafarvogi í dag. Íslandsmeistaratitill í höfn og sigur í 2. deild kvenna og munu okkar konur spila í Lengjudeildinni á næsta ári. Enn og aftur: TIL HAMINGJU MEÐ TITILINN. - JGH
Hrafnhildur Árnadóttir, fyrirliði Fjölnis og nýkrýndur Íslandsmeistari í 2. deild kvenna í knattspyrnu var að vonum ánægð með titilinn og sagði að mikil liðsheild hefði landað honum. „Við erum allar miklar vinkonur í liðinu og höfum æft mjög vel,“ sagði hún glöð í sinni eftir leikinn. „Við höfum ekki spilað fyrir svo marga áhorfendur í langan tíma og það var mikil orka sem við fengum frá stuðningsmönnunum okkar í dag,“ bætti hún við. „Takk Grafarvogsbúar fyrir að mæta á völlinn og styðja okkur.“ Svo sannarlega hægt að taka undir þau orð. En við skulum sjá hér stutt sjónvarpsviðtal okkar við hana eftir leikinn og heyra hvað hún hafði að segja. Gjörið svo vel. -JGH
