Hann á ekki mikið eftir, blessaður! Hélt hann væri horfinn við fyrstu sýn

Þegar við vorum á ferð fyrir utan kjörstaðina í dag varð mér litið til Esjunnar og sýndist satt best að segja að skaflinn margfrægi í Gunnlaugsskarði væri horfinn.

Við nánari sýn og með aðstoð linsunnar í myndavélinni kom í ljós að svo var ekki.

En sýnist alveg að hverfa og eiga ekki mikið eftir. Í fyrra hvarf hann dagana 5. eða 6. ágúst. Sjá frétt.

Við á Grafarvogur.net höfum eins og fleiri borgarbúa áhuga á þessum skafli þar sem hann er eins konar loftslagsvísir, þ.e. segir okkur frá hitastiginu í höfuðborginni og veðurfari á hverju sumri.

Sá sem fylgdist lengst allra með skaflinum var Páll Bergþórsson, veðurfræðingur og fyrrum veðurstofustjóri.

William Shakspeare lætur Hamlet segja: To be, or not to be, that is the question. „Að vera, eða ekki vera, það er spurningin.“

Við segjum einfaldlega um skaflinn: Fer hann, eða fer hann ekki? Það er spurningin. - JGH