Mögnuð Unnur Ösp í Sölku á sviði Söguloftsins í Borgarnesi
Ef ekki sú besta, þá í hópi þeirra allra bestu. Það verð ég að segja um Unni Ösp Stefánsdóttur leikkonu.
Hún er afbragðsgóð í verkinu og einleiknum Salka – ástin og dauðinn sem sýnt er í Sögulofti Landnámssetursins í Borgarnesi en Grafarvogur.net brá sér út fyrir bæjarlækinn sl. sunnudag til að sjá þessa frábæru sýningu.
Verkið var frumsýnt í febrúar og hefur notið mikilla vinsælda og fara þær ekki dvínandi því uppselt var á báðar sýningarnar sl. sunnudag.
Unnur Ösp Stefánsdóttir leikur og skrifar leikgerðina upp úr einu frægasta verki Halldórs Laxness; Sölku Völku, og leysir það sérlega vel af hendi. Sýningin er byggð á fyrri hluta Sölku Völku, Þú vínviður hreini.
Tónlistaráhugi skáldsins kemur vel fram í sýningunni en hann hafði mikið dálæti á þýska tónskáldinu Jóhanni Sebastian Bach. Sagt er að Laxness hafi oft á tíðum skrifað með tónlist Bach lágstemmda á fóninum.
Unnur Ösp er ekki alveg óvön því að vera ein á sviði og bregða sér í mismunandi hlutverk. Hún lék meðal annars í einleiknum Saknaðarilmi en þá leikgerð vann hún upp úr verkum Elísabetar Jökulsdóttur.
Eiginmaður Unnar Aspar, Björn Thors, leikstýrir báðum einleikjunum.
Leiksigur.
- JGH
Söguloftið í Borgarnesi er líklegast minnsta leikhús landsins og nær leikurum komast áhorfendur ekki. Mynd: Hallgrímur Helgason.
Tæknibúnaður í Söguloftinu er ekki fyrirferðarmikill.
Það er þó einn og einn kastari í lofti.
Söguloftið er í risi gamals pakkhúss - einnar elstu byggingar í Borgarnesi.
Landnámssetrið í Borgarnesi fagnar 20 ára afmæli sínu á árinu. Veitingahúsið er vinstra megin og Söguloftið í risi gamla pakkhússins hægra megin.
