Dró regnbogann að húni eftir atburði næturinnar við kirkjuna

Ólafur Sverrisson, verkfræðingur og fánaáhugamaður með meiru í Hamrahverfinu í Grafarvogi, dró regnbogafánann að húni í morgun eftir skemmdarverk næturinnar við Grafarvogskirkju. 

En málað var yfir regnbogafánann í kirkjutröppunum með íslensku fánalitunum.

Þessi atburður við kirkjuna hefur vakið sterk viðbrögð og hafa allir helstu fjölmiðlar landsins fjallað um það.

Fréttin hefur sömuleiðis verið á leifturflugi á samfélagsmiðlum í allan dag - þar sem sitt sýnist hverjum um þetta athæfi.

Ólafur Sverrisson í Grafarvogi á stærsta fánasafn á Íslandi í eigu einstaklings og flaggar nánast alla daga ársins þegar veður leyfir.

Að undanförnu hefur hann verið sérlega duglegur við að flagga fánum þeirra þjóða sem keppa á HM í fótbolta. - JGH