Betri samgöngur með 311 milljarða framkvæmdir í kortunum - þar af er Borgarlínan með 130 milljarða

Betri samgöngur ohf. og Samgöngusáttmálinn eru meira en bara Borgarlínan þótt halda mætti að svo væri ekki miðað við þær heitu umræður sem hafa verið um Borgarlínuna fyrir þessar kosningar.

Það fer jafnmikið til Stofnvega og Borgarlínunnar í samgöngusáttmálanum, en hvort verkefnið um sig er metið á um 130 milljarða kr., eða samtals 260 milljarða kr.

Sundabraut eða Sundagöng eru ekki inni í þessum áætluðu framkvæmdum Betri samgangna ohf. Hins vegar eru göng undir Miklubraut og stokkur undir Sæbraut inni í liðnum Stofnvegir.

Arnarnesvegurinn er stærsta verkefnið undir liðnum Stofnvegir Samgöngusáttmálans um þessar mundir, eins og sjá má á meðfylgjandi korti.

Eftir uppfærslu Samgöngusáttmálans er áætlað að fjárfesta í innviðum fyrir alla ferðamáta fyrir 311 milljarða króna í eftirfarandi hlutföllum:

Stofnvegir.....................130 makr. (42%)

Borgarlínan..................130 makr.  (42%)

Göngu- og hjólastígar..  40 makr.  (13%)

Umferðaröryggi............  10 makr.  ( 3%)

(Heimild: Sjá betur hér).

BORGARLÍNAN VINNI EKKI GEGN UMFERÐ BÍLA

Fyrir þessar kosningar hefur mesta umræðan verið um Borgarlínuna og sitt sýnist hverjum um umfang hennar og kostnað á hvern kílómetra. Við erum fámennt samfélag. Þeir sem vilja endurskoða umfang hennar og fyrirferð hafa bent á að hún taki of mikið til sín í umferðinni, þrengi víða að einkabílnum, og kosti sitt; eða 130 milljarða króna. Þá á alveg eftir að taka rekstrarkostnað hennar inn í dæmið.

Jafnframt er bent á að það eru bíleigendur sem þurfa að standa undir stærstum hluta fjármögnunar Samgöngusáttmálans með einum eða öðrum hætti. Eftir Borgarlínuna er áætlað að hlutfall þeirra sem noti almenningssamgöngur fari úr 4-6% núna í um 12%. Einkabíllinn verður því áfram helsti ferðamátinn þrátt fyrir Borgarlínuna.

„RÍFA UPP SAMGÖNGUSÁTTMÁLANN“

Í  heitri umræðu um breyttar áherslur Borgarlínunnar hefur það verið orðað þannig „að verið sé að rífa upp Samgöngusáttmálann“ þegar þær skoðanir hafa verið viðraðar að Bogarlínan þurfi að vinna meira með almennri bílaumferð en ekki gegn henni, eins og mörgum finnst núna, ekki síst í ljósi nafnsins Betri samgöngur ohf. Þýðir Borgarlínan t.d. bættar samgöngur fyrir bíleigendur eða eingöngu fyrir þá sem vilja taka Borgarlínuna eða hjóla í vinnuna?

Ljóst er hins vegar að stofnvegir Samgöngusáttmálans upp á 130 milljarða kr. bæta hag bíleigenda og liðka til fyrir bílaumferðinni.

Samkvæmt Samgöngusáttmálanum eiga Betri samgöngur ohf. að sjá um þróun og undirbúning uppbyggingar nýs borgarhluta á Keldnalandi. Allur fjárhagslegur ábati af því verkefni rennur til verkefna Samgöngusáttmálans.

BÍLEIGENDUR BORGA BRÚSANN

Þar er einnig kveðið á um að Betri samgöngur ohf. eigi að innheimta flýti- og umferðargjöld, verði það ákveðið með lögum. Stefnt er á að þessi gjaldtaka fyrir akstur á milli skilgreindra svæða  fjármagni um helming heildarfjárfestingar Samgöngusáttmálans. Tekjur af þeim verði að fullu nýttar í samgöngur á höfuðborgarsvæðinu í þágu þeirra sem þar búa og starfa.

Gjaldtaka í samgöngum er að breytast með breyttum orkugjöfum bifreiða og aukinni þekkingu á ytri kostnaði samgangna. Auk undirbúnings flýti- og umferðargjalda vinnur ríkið að heildstæðri endurskoðun á gjaldtöku af ökutækjum og umferð ásamt undirbúningi gjaldtöku til fjármögnunar á stökum samgönguinnviðum.

Í meðfylgjandi korti má sjá helstu framkvæmdir við stofnvegi Samgöngusáttmálans. - JGH