Sá enski vatt upp á sig en sá argentínski var á fullum blæstri. Var þetta fyrirboði?

Þegar við mynduðum HM-fánana hjá Ólafi Sverrissyni verkfræðingi í Hamrahverfinu í Grafarvogi fyrir leikinn í kvöld mátti sjá að einn snúningur var kominn á enska fánann - hann hafði undið upp á sig - meðan sá argentínski var á fullum blæstri.

Fyrir hina hjátrúarfullu gat vissulega eitthvað falist í þessu? Var þetta fyrirboði um það sem koma skyldi í leiknum? Sá enski ekki á fullum blæstri.

Það reyndist vera þegar líða tók á leikinn.

Enskir skoruðu fyrsta markið á 55 mínútu en gerðu þau mistök að ætla að hanga á þessu marki gegn mjög viljugum og kröftugum Argentínumönnum sem færðust allir í aukana og sóknirnar dundu á þeim ensku.

Þegar líða tók að lok leiksins fóru vandamál enskra í vörninni að vinda verulega upp á sig og baráttuglaðir Argentínumenn skoruðu á 85 mín. og aftur í uppbótartíma, á 92. mín.

Um þennan leik verður margt skrifað af hálfu spekinga.

Fyrir okkur áhugamenn um boltann vaknar sú spurning hvers vegna ensku kantmennirnir Eberechi Eze og Bukayo Saka voru ekki settir inn á fljótlega eftir að Englendingar skoruðu markið til að hressa upp á sóknarleik enskra.

Englendingar spila við Frakka nk. laugardag um bronsið og sjálfur úrslitaleikurinn verður svo á sunnudag í New York á milli Spánverja og Argentínumanna.

Þar mætast stálinn stinn og sérlega leiknir knattspyrnumenn.

Fánar þessara þjóða fara upp í Grafarvogi á sunnudaginn.

Veislunni er að ljúka. - JGH