Hætta við fjölfarin gatnamót: Ökumenn hika ekki við að aka yfir á rauðu ljósi

26. febrúar 2025
Myndin hér að ofan var tekin kl. 8:25 í morgun. Sjá má hvar komið er grænt ljós á leiðinni út úr Hamrahverfinu en bíll í beygjunni úr austurátt á Fjallkonuvegi á leið í bæinn ekur yfir á hárauðu ljósi.

Sjá rautt en aka samt yfir. Það er fyllsta ástæða til að vekja athygli á ákveðinni hættu við fjölförnustu gatnamót í Grafarvogi – gatnamót Fjallkonuvegar og Gullinbrúar; gegnt Olís-stöðinni. Ökumenn, sem aka vestur Fjallkonuveginn og beyja til vinstri niður Gullinbrúna á leið sinni í bæinn, hika ekki við að aka yfir á rauðu ljósi. Og við erum ekki að tala um ljósrautt heldur er ekið yfir á hárauðu ljósi. 

Stórhættulegt í alla staði. Þetta hefur orðið til þess að þeir sem aka út úr Hamrahverfinu þurfa að bíða á grænu ljósi í dágóðan tíma eftir að umferðin á rauðu ljósi úr gagnstæðri átt á Fjallkonuveginum klárist í beygjunni yfir gatnamótin. 

Það hefur alltaf verið eitthvað um þetta í gegnum tíðina en hefur færst mjög í aukana á síðustu árum. Þetta er ekki aðeins hvimleiður siður ökumanna – heldur stórhættulegur. Virðum ljósin.