grafarvogur-net

Hér er fyrirlestur minn á fundi Samtaka sparifjáreigenda

Fri, 01 May 2026 12:46:11 GMT

Hér er fyrirlestur minn sem ég hélt á morgunfundi Samtaka sparifjáreigenda vegna blaðs míns Fjármál og ávöxtun sem ég gef út í samvinnu við samtökin. Hér má nálgast blaðið í opnum og hér í heilsíðum.

Einn þeirra er vann deiliskipulagið í Gufunesi staðfestir frásögn eigenda Loftkastalans

Thu, 30 Apr 2026 16:38:26 GMT

Það er athyglisvert að einn þeirra sem vann að deiliskipulaginu í Gufunesi, Orri Steinarsson sem starfar í Hollandi, staðfestir frásögn þeirra hjóna Hilmars Páls Jóhannessonar og Ingu Lóu Guðjónsdóttur , eigenda Loftkastalans, sem keyptu lóðina að Gufunesvegi 34 í byrjun janúar 2018 þegar allt gekk út á að gera Gufunesið að miðpunkti kvikmyndaframleiðslu hérlendis. Orri býr og starfar í Hollandi.

Grafarvogur.net er með undirritað bréf frá Orra frá því 25. ágúst 2021 þar sem fram kemur að hann hafi unnið fyrir hönd fyrirtækisins JVANTSPIJKER & PARTNERS að deiliskipulagi á svæði Gufuness fyrir Reykjavíkurborg þegar deiliskipulagið var auglýst og seinna staðfest. Við birtum hér bréf Orra um málið.

Eigendur Loftkastalans keyptu Gufunesveg 34, þrjú gömul hús Áburðarverksmiðjunnar ásamt lóðarréttindum og byggingarétti í byrjun ársins 2018. Orri blandaðist inn í málið 2021.

Í bréfi Orra segir:

„Í kjölfar fyrstu verðlauna í hönnunarsamkeppi sem haldin var 2016 þá fékk jvantspijker & partners það hlutverk að vinna deiliskipulag fyrir fyrsta áfanga svæðisins, svokallað kvikmyndaþorp, sem gerir ráð fyrir blandaðri byggð með áherslu á skapandi iðnað og hagkvæmum íbúðum.

Skipulagið var unnið í samstarfi við breiðan hóp hagsmunaðila sem voru þegar komnir á svæðið, eða voru með lóðarsamninga/lóðarvilyrði hjá Reykjavíkurborg. Margir samráðsfundir með hagsmunaaðilum voru haldnir af hálfu verkkaupa.

Rekstrarforsendur Loftkastalans voru frá upphafi skýrar: Að geta rennt stórum hlutum hindrunarlaust á milli húsa. Hvað Loftkastalann varðar var vel upplýst af þeirra hálfu að til stóð að útbúa verkstæði á lóð þeirra m.a. fyrir framleiðslu á og flutning á stærri leikmyndum og byggingarefni.

Þá lét Loftkastalinn hanna stækkun á húsum sem fyrir voru og var ráðgert að svipuð gólfhæð yrði á öllum fasteignum lóðarinnar. Aðkoma að núverandi húsum átti að haldast óskert þar sem hægt verður aka inn í port af Hilmisbási, jafnramt sem aðkoma að bílakjallara var ráðgerð frá Þengilsbási við norðvestur-horn nýju byggingarinnar.

Einnig var mikilvægt að núverandi bílastæði og innkeyrslur yrðu nýtt áfram. Þessar teikningar voru m.a. notaðar í kynningarefni á deiliskipulagi svæðisins. Við gerð sniðmynda í deiliskipulagsuppdrætti var gert ráð fyrir að lóð Loftkastalans yrði nokkuð slétt í samræmi við framangreint.

Eitthvað hefur farið úrskeiðis því fyrirhugaðir hæðarkótar í landinu umhverfis lóð Loftkastalans eru ekki í samræmi við þessar rekstrarforsendur, né eru þeir í samræmi við þá samráðsfundi, né kynningar sem haldnar voru með Loftkastalanum.“

Og undir þetta ritar Orri Steinsson. - JGH

Verðlaunatillagan af Gufunesi þar sem gert var ráð fyrir öflugu kvikmyndaþorpi.

Yfirlýsing Orra Steinarssonar.

Esjan toppaði sig í morgun

Thu, 30 Apr 2026 16:19:52 GMT

Það er kominn tími til að vorið hristi veturinn alveg af sér og fari að blómstra. Snemma í morgun gerði slyddu og það varð til þess að það gránaði í Esjunni - svona niður í miðjar hlíðar.

Eigum við ekki bara að segja að Esjan hafi toppað sig í morgun þótt ekki hafi verið um alvarlegan ístopp að ræða.

Er ekki hægt að krefjast betra veðurs þótt það verði ekki gert í kröfugöngunni á morgun? - JGH

Það má alveg fara að hlýna svolítið.

Það gerði slyddu snemma í morgun og Esjutoppurinn varð hvítur.

Háir vextir hafa áhrif - fé streymir inn á reikninga bankanna

Thu, 30 Apr 2026 16:04:24 GMT

Jónar í hverri höfn, segir einhvers staðar. Það urðu mjög líflegar umræður á fundi Samtaka sparifjáreigenda á Reykjavik Natura hótelinu í morgun þar sem við nafnarnir, ég og Jón Guðni Ómarsson, bankastjóri Íslandsbanka höfðum framsögu.

Ég fór yfir helstu stærðir í efnhagslífnu þegar kemur að sparnaði einstaklinga en ljóst er að háir vextir hafa skilað góðri ávöxtun á innlánsreikningum bankanna á síðasta ári á sama tíma og daufara hefur verið yfir verðbréfamarkaðnum.

Ekki fer á milli mála að háir vextir hafa áhrif á sparnað og fé streymir núna inn á innlánsreikninga bankanna en fram kom á fundinum að ekki sé ólíkegt að það leiti fljótt út aftur um leið og vextir lækka eitthvað að ráði.

Líflegur og skemmtilegur fundur.

Hér má sjá erindi mitt. - JGH

Jón Guðni Ómarsson, bankastjóri Íslandsbanka, á fundinum í morgun.

Undirritaður á fundinum hjá Samtökum sparifjáreigenda í morgun.

Grafarvogurinn verður heimili NBA-körfunnar í ágúst. Alvöru þriggja siga karfa hjá Fjölni!

Wed, 29 Apr 2026 14:29:44 GMT

Karfan er svo sannarlega í mikilli sókn í Grafarvoginum undir styrkri stjórn köruboltadeildar Fjölnis. Nýjustu tíðin eru þau að Grafarvogurinn verður heimili NBA-körfuboltans í eina viku í ágúst í sumar. Frábært í alla staði.

Um er að ræða hinar þekktu Elite Camp-æfingabúðir sem verða í Egilshöllinni dagana 5. til 9. ágúst nk. og eru fyrir aldurshópinn 7 til 17 ára en Fjölnir er með sérlega sterk lið í yngri flokkunum í körfunni.

Eyþór Ívar Jónsson , forseti fyrirtækisins Akademias og stjórnarmaður í körfuboltadeild Fjölnis, segir í samtali við Grafarvogur.net að til standi að verða með alls kyns viðburði í Grafarvoginum í kringum þessar frægu æfingabúðir.

Meðal annars er unnið að því að landa MasterClass í þjálfun og fara yfir það hvað við Íslendingar getum lært af þjálfurum í NBA-deildinni.

Á meðal stórstjarna sem mæta í Grafarvoginn í sumar í tengslum við Elite Camp eru þeir Michael Cooper og Irving Thomas en þeir léku með hinu fornfræga félagi LA Lakers á árum áður.

Sérlega ánægjuleg tíðindi og augljóslega unnið gróskumikið starf í körfunni í Grafarvogi.

Áfram Grafarvogur og Fjölnir. - JGH

Elite Camp er alvöru þriggja stiga karfa hjá Fjölni. Það er mikil gróska í körfutboltanum í Grafarvogi.

Elite Camp-æfingabúðirnar verða í Egilshöll í ágúst og samhliða því verður Grafarvogurinn heimili NBA-körfunnar.

Eyþór Ívar Jónsson er stjórnarmaður í körfuboltadeild Fjölnis og einn þeirra sem mikið mæðir á í tengslum við Elite Camp í sumar hjá Fjölni.

Fyrirtækið Kukl mótmælti líka en hækkaði hluta lóðarinnar. „Augljóst að nýir hæðarkótar voru rangir. Þetta skipti mig minna máli“

Wed, 29 Apr 2026 11:28:08 GMT

Þorvarður Björgúlfsson, eigandi fyrirtækisins Kukl , skrifaði ásamt Ingu Lóu Guðjónsdóttur í Loftkastalanum harðort bréf til borgarfulltrúa hinn 23. júní 2020 um gatnagerðina í Gufunesi og að hæðarkótar við fyrirhugaða götulagningu - Jöfursbásinn - í nýja hverfinu væru rangir og að verkfræðistofan Verkís hefði ekki unnið „heimavinnuna sína“.

Þorvarður segir við Grafarvogur.net að hann hafi tekið þátt í að skrifa umræddan tölvupóst til borgarfulltrúanna árið 2020 með fulltrúum Loftkastalans og að hans mati fari ekkert á milli mála að lagt var upp með ranga hæðarpunkta við skipulag nýju byggðarinnar og að ekki hafi verið tekið tillit til þeirra bygginga sem voru á svæðinu fyrir og tilheyrðu gömlu Áburðarverksmiðjunni, eins og bygginga Loftkastalans og Kukls.

FÓR EKKERT Á MILLI MÁLA - ÞETTA BLASTI VIÐ

„Það fór ekkert á milli mála að hæðarkótarnir voru rangir. Hjá Kukli var nýja gatan 60 cm hærri en planið við húsið okkar,“ segir Þorvarður sem segist sem minnst vilja blanda sér inn í þá deilu sem staðið hefur árum saman á milli Loftkastalans og borgarinnar. Mestu skipti að hún leysist úr því sem komið er.

Bílaplanið við gömlu byggingu Kukls. Nýi vegurinn - hinn frægi Jöfursbás - vel fyrir ofan planið.

„Ég sá í hvað stefndi og hækkaði hluta lóðarinnar hjá mér fyrir framan nýju viðbygginguna sem ég byggði en náði að milda hallann niður að gamla húsinu og setja þar niðurföll sem hafa dugað hingað til. Þetta er leiðinlegur halli en ekkert sem skiptir mig máli. Þess utan var vegurinn fyrir framan hjá mér lækkaður aðeins þannig að þetta hefur bjargast hjá mér. Ég ákvað að láta þessa lausn duga því þessi hæðarmunur hafði miklu minni áhrif hjá mér en Hilmari og Ingu Lóu í Loftkastalanum. Þetta skipti mig minna máli þar sem lóð Kukls er meira á útjaðri svæðisins.“

Þorvarður segist ekki skilja að það ekki sé hægt að finna lausn á þessari deilu á milli Loftkastalans og borgarinnar. „Það er eiginlega glórulaust að þessi deila standi enn yfir eftir allan þennan tíma. Það verður að leysa hana. Nýja byggðin hér í Gufunesi fer ekkert og borgin verður einhvern veginn að koma til móts við þau Hilmar og Ingu Lóu.“ - JGH

„Það fór ekkert á milli mála að hæðarkótarnir voru rangir,“ segir Þorvarður. Hjá Kukli var nýja gatan - Jöfursbásinn - 60 cm hærri en planið fyrir framan gömlu byggingu Kukls sem tilheyrði áður Áburðarverksmiðjunni.

Kukl reisti glæsilega nýbyggingu við gamla hús Áburðarverksmiðjunnar og gat hækkað bílaplanið þar fyrir framan.

Við vesturenda nýbyggingar Kukls var hallinn mildaður niður að gömlu byggingunni.

Það reynir nú talsvert á þetta niðurfall fyrir framan gömlu byggingu Kukls - sem áður tilheyrði gömlu Áburðarverksmiðjunni.

„Þetta er valdníðsla og borgin heldur að hún geti keyrt okkur í kaf“

Tue, 28 Apr 2026 14:44:24 GMT

„Þessi deila okkar við borgina og embættismannakerfið einkennist af valdníðslu og brotum á skipulagsmálum og snýst um að það sé ódýrara fyrir borgina að þráast við og keyra okkur í kaf í stað þess að viðurkenna mistök,“ segja þau hjón Hilmar Páll Jóhannesson og Inga Lóa Guðjónsdóttir, eigendur Loftkastalans , um sjö ára stríð þeirra við borgina vegna lóðarinnar og húsanna við Gufunesveg 34 sem þau keyptu í janúar árið 2018 ásamt lóðaréttindum og byggingarrétti á samtals um 226 milljónir króna. Þau segjast ekki hafa getað nýtt byggingarréttinn vegna deilna við borgina um hæðarmælingar og segja að ný matsskýrsla dómkvadds matsmanns sýni að þau hafi haft rétt fyrir sér frá upphafi.

HALLAR AÐ ÞEIM OG YFIRBORÐSVATN RENNUR INN Á LÓÐINA

Þau segja að aðliggjandi lóðir séu með hærri hæðarpunkta og halli inn að þeirra lóð og fyrir vikið hafi mikill vatnsflaumur yfirborðsvatns oft á tíðum runnið inn á þeirra lóð og meðal annars inn í kjallarann hjá þeim. „Hér hafa oft verið stórir pollar sem við höfum þurft að takast á við vegna þess að yfirborðsvatn flæðir inn á lóðina,“ segja þau.

Að sögn Hilmars Páls hefur borgin rukkað þau fyrir byggingarréttinn þrátt fyrir að þau hafi ekki getað nýtt hann vegna þessarar deilu við borgina og hafi fyrir vikið orðið fyrir verulegu tjóni.

„Við greiðum borginni eðlilega ekki fyrir vöru sem við keyptum af henni en getum ekki notað vegna þess að hún breytti vörunni eftir afhendingu svo hún varð ónothæf fyrir okkur,“ segir Hilmar Páll.

„Hvernig má það annars vera að hæðarpunktar sem hafa verið hérna í sjötíu ár á svæðinu gilda skyndilega ekki lengur vegna nýrra vitlausra mælinga? Og hvernig getur borgin skipt lóðinni upp í tvær lóðir eftir að hún er búin að selja hana og afhenda sem eina lóð?“ bætir hann við.

Byggingarnar þrjár (tvær sambyggðar) við Gufunesveg 34. Þær tilheyrðu gömlu Áburðarverksmiðjunni og hafa haft sína hæðarpunkta í sjötíu ár.

NÝJAR MÆLINGAR ERU OKKUR Í HAG

Hilmar Páll segir ennfremur að það stefni augljóslega í dómsmál miðað við viðbrögð borgarinnar til þessa í þessari deilu. „Við erum komin með matsskýrslu frá dómkvöddum matsmanni þar sem öll hnit og hæðarkótar voru mældir og sýna að við höfum haft rétt fyrir okkur allan tímann varðandi hæðarpunkta hér á svæðinu og á lóðinni okkar – og að borginni urðu á alvarleg mistök sem hún þarf að viðurkenna að hafa gert. En það gerir hún ekki vegna þess að þá verður hún að greiða okkur skaðabætur.“

Að sögn Ingu Lóu staðfesta þessar nýjustu mælingar, sem fram koma í matsskýrslunni, að Reykjavíkurborg hafi haldið fram röngum mælingum um lóðina og svæðið og sent þau skjöl til Úrskuðarnefndar umhverfis- og skipulagsmála. Það sé alvarlegt – og að óhjákvæmilega komi orðið skjalafals upp í hugann við slík vinnubrögð þótt hún vilji ekki trúa neinu slíku.

„Borgin hefur nefnt GPS-mælingar sem voru teknar á sínum tíma. Við mótmæltum þeim enda byggja þær á röngu hæðarkerfi. Það má svo sem segja að búið sé að byggja hér heilt hverfi í Gufunesi á röngu hæðarkerfi, þannig lítum við á það,“ segir Inga Lóa.

HVAÐ HEFUR YKKUR VERIÐ BOÐIÐ?

– Ég sé í minnisblaði borgarlögmanns, Ebbu Schram, til Einars Þorsteinssonar borgarstjóra frá árinu 2024 að hún nefnir að þau sáttaboð sem borgin hafi boðið ykkur hafi gengið eins langt og mögulegt er. Hvað er það sem borgin hefur boðið ykkur?

„Þetta mikla sáttaboð sem hún nefnir er nú ekki betra en það að borgin ætlar að halla götunum hér í kring að okkur og við eigum að gangast við vitlausum hæðarmælingum borgarinnar þegar hún skipulagði nýtt vegakerfi, veitukerfi og nýja byggð hér í Gufunesi. Með öðrum orðum: Að við gefum eftir kröfu okkar um að hafa lóðina okkar alla í sömu hæð líkt og var þegar við keyptum hana. Það er það sem þau hafa boðið,“ segir Inga Lóa.

„Og ekki nóg með það – ef við samþykktum „þetta kostaboð þeirrra“ þá gætum við fengið aftur bílastæði, innkeyrslur og aðkomu að húsunum okkar sem borgin er búin að taka af okkur meðan á þessari deilu hefur staðið. Þetta er ekkert annað en kúgun, að okkar mati.“

Horft að húsi Loftkastalans við Seljaveg 34. Til stendur að reisa fjölbýlishús þar sem grái gámurinn og hvítu umbúðirnar liggja. Það er Skuggi sem byggir. Sú lóð verður hærri en lóð Loftkastalans og með einn hæðarpunkt en lóðirnar eru jafn stórar.

Þessi áform sín kynntu þau hjón til sögunnar í byrjun ársins 2018 þegar þau keyptu lóðina ásamt byggingarrétti. Til stóð að fara í framkvæmdir upp á um 1.500 milljónir kr.

ÞAÐ LÁ FYRIR FRÁ UPPHAFI HVAÐ VIÐ ÆTLUÐUM AÐ GERA

Hilmar Páll áréttar að borgin hafi breytt hæð á lóð Loftkastalans með framkæmdaleyfi gatna sem ekki komi fram í deiliskipulagi – og það eftir að þau keyptu lóðina og höfðu kynnt borginni fyrirætlanir sínar um stækkun og notkun hennar í byrjun ársins 2018 þegar þau keyptu hana.

„Á þeim tíma lá það alveg fyrir hvað við ætluðum að byggja og hvaða framkvæmdir við vorum með á prjónunum. Það hefur í raun legið fyrir frá upphafi.“

Hilmar Páll segir ennfremur: „Með deiliskipulaginu skipti borgin svo lóðinni upp í tvær lóðir og ætlaði okkur að notast við þrjá hæðarpunkta á þeim sem við fengum ekki uppgefna fyrr en seint á árinu 2024; hæðarpunkta sem koma í veg fyrir að við getum samnýtt nýja verkstæðið og það gamla.“

VIÐ VERÐUM LÆGST Í HVERFINU, Í ÁKVEÐINNI HOLU

Hilmar Páll bætir við að hann vilji benda á jafnræðisregluna í þessu máli. „Það eiga tvær blokkir eftir að rísa hérna við hliðina á okkur, sitt hvorum megin við okkur, og þær eru báðar með hærri hæðarpunkta en okkar lóð þannig að við verðum lægst í hverfinu. Verðum hér í ákveðinni holu.

Það sem meira er, þessar systurlóðir hér við hliðina, sem enn er ekki byrjað að byggja á, hafa einn hæðarkóta á öllum fletinum. En okkur hjónum, sem erum með hús fyrir á þessari lóð, hús sem hafa staðið hér í sjötíu ár, er gert að vera með þrjá hæðarkóta á lóð sem borgin skipti upp í tvær með deiliskipulagi eftir að við keyptum hana. Þau hjá borginni segja að annað sé ekki í stöðunni því lóðin okkar sé svo stór. En lóðirnar eru allar nánast jafnstórar.

Þetta er allt saman óskiljanlegt og auðvitað komið út fyrir öll velsæmismörk af hálfu borgarinnar. Það vita allir af þessum mistökum sem voru gerð hérna í Gufunesi.“

Hjónin Hilmar Páll Jóhannesson og Inga Lóa Guðjónsdóttir, eigendur Loftkastalans.

ÞREYTA OKKUR OG REYNA AÐ KEYRA Í KAF

„En borgin vill ekki viðurkenna nein mistök af sinni hálfu og lítur svo á að betra sé að þreyta okkur og keyra í kaf. En nýja matsskýrslan, sem staðfestir að við höfum haft rétt fyrir okkur allan tímann, fer áfram; það er klárt mál. Þetta endar sjálfsagt í dómsmáli ef borgin viðurkennir ekki mistök sín. Við gefumst ekki upp!“

– En hvaða lausn getið þið sætt ykkur við af hálfu borgarinnar? Það segir sig sjálft að vegir, veitukerfi og nýju blokkirnar verða ekki rifnar niður vegna lóðarinnar ykkar. Þessar nýju byggingarnar eru auðvitað komnar til að vera í núverandi mynd!

„Við viljum að borgin byrji á því að viðurkenna mistök og bæti okkur þau. Þegar við lögðum af stað með þetta verkefni okkar í byrjun ársins 2018 gerðum við ráð fyrir framkvæmdum upp á um 1.500 milljónir í formi nýs verkstæðis, íbúðarhúsa og því að koma gömlu húsunum uppgerðum inn í þennan klasa. Verðið hefur sjálfsagt tvöfaldast í dag. Við höfðum tilheyrandi lánalínur á sínum tíma fyrir þessum framkvæmdum.

Við buðum á sínum tíma að við gætum unnið með hæðarpunkta í nýbyggingunum, þ.e. verkstæðinu og fjölbýlishúsinu, upp á 8,50 – en þeir eru 8,40 í þeim gömlu – en því var hafnað. Við vorum sem sagt til í að vera með 10 cm halla frá gömlu byggingunum okkar að þeim nýju ef það yrði til þess að leysa málið. En við því var ekki gengist.

Við gefumst ekki upp þótt þessi deila sé búin að kosta okkur miklar fjárhæðir í fórnuðum tekjum og lögfræðikostnaði, auk þess álags sem felst í því að standa í svona baráttu við harðsnúið embættismannakerfi,“ segir Hilmar Páll Jóhannesson . - JGH

Hilmar Páll, einn þekktasti leikmyndahönnuður landsins, stendur hér á götunni Þengilsbási en mörk lóðar hans eru við grindverkið og gámana hægra megin.

Skiltið sem vekur athygli allra sem fara um Gufunesið. Það var sett upp fyrir rúmum tveimur árum og stríðið er því orðið að sjö ára stríði.

Nýju hæðarmælingarnar hafa valdið vatnsvandræðum hjá þeim hjónum.

Vatn rennur inn á lóðina.

Yfirborðsvatn er oft áberandi við Loftkastalann eftir miklar rigningar. Þau hjón segja að aðliggjandi lóðir halli að þeirra lóð.

Flóð í lagnakjallaranum hjá þeim eftir miklar rigningar.

Harðvítug deila hjóna við borgina í sjö ár vegna lóðar sem þau keyptu í Gufunesi árið 2018 í tengslum við kvikmyndaþorpið

Tue, 28 Apr 2026 11:15:52 GMT

Skiltið í Gufunesi vekur athygli! Hvað er eiginlega í gangi? Þegar betur er að gáð eru árin sjö en ekki fimm því hjónin Hilmar Páll Jóhannesson og Inga Lóa Guðjónsdóttir, eigendur Loftkastalans í Gufunesi, hafa staðið í harðvítugu stríði við Reykjavíkurborg í yfir sjö ár vegna lóðar – Gufunesvegar 34 – sem þau keyptu af borginni 16. janúar árið 2018 ásamt þremur húsum gömlu Áburðarverksmiðjunnar með lóðarréttindum og byggingarrétti fyrir 226 milljónir króna. Þessi kaup voru gerð áður en svæðið var deiliskipulagt og voru liður í uppbyggingu stórhuga hugmynda borgarinnar um kvikmyndaþorp í Gufunesi.

Deilan snýst um hæðarpunkta í Gufunesi og að borginni hafi orðið á í messunni þegar hún hækkaði og breytti hæðarpunktum með nýju byggðinni sem hafi gert lóð þeirra hjóna ónothæfa til frekari uppbyggingar og komið þannig í veg fyrir áætlanir þeirra sem þau kynntu borgaryfirvöldum í upphafi og eftir standi þau með mikinn skaða því þau geti ekki nýtt byggingarréttinn.

Lóðin og gömlu byggingarnar sem þau keyptu hafa staðið þarna með sína hæðarpunkta í yfir sjötíu ár, eða frá því verksmiðjan var byggð árið 1954. En svo gerðist það, það kom nýtt deiliskipulag; lóðinni þeirra var óvænt skipt í tvennt að þeim forspurðum og landslagið með lóðum í kringum hana var hækkað með nýjum hæðarpunktum. Sjö ára stríð þar sem borgin telur sig í fullum rétti gagnvart þeim hjónum.

SKILTIÐ SETT UPP Í SKYNDI VEGNA KOMU BORGARSTJÓRA

Það er þetta með skiltið. Það blasir við á einu húsa þeirra þegar ekið er um Gufunesið og á því stendur: „Hér hefur Reykjavíkurborg komið í veg fyrir uppbyggingu íbúða og verkstæðis í 5 ár.“ Spjaldið var sett upp í skyndi fyrir rúmum tveimur árum þegar vitneskja barst um að von væri á þáverandi borgarstjóra í Reykjavík, Degi B. Eggertssyni, í Gufunesið. Þetta er því orðið að sjö ára stríð svo vitnað sé í frægt stríð í Evrópu á átjándu öld.

Sjö ára stríð. Hjónin Hilmar Páll Jóhannesson og Inga Lóa Guðjónsdóttir, eigendur Loftkastalans í Gufunesi, hafa staðið í harðvítugu stríði við Reykjavíkurborg í yfir sjö ár en þau keyptu 16. janúar árið 2018 lóð ásamt þremur húsum gömlu Áburðarverksmiðjunnar með lóðarréttindum og byggingarrétti fyrir 226 milljónir króna. En það kom babb í bátinn þegar ný byggð var skipulögð.

MINNIR Á GRÆNA GÍMALDIÐ - BARÁTTA EINSTAKLINGA GEGN KERFINU

Í þessari deilu virðist borgin líta á að hin selda lóð til Lotkastalans sé einhvers konar þróunarlóð sem hægt sé að breyta eftir á. Engu að síður kemur fram að eigendur Loftkastalans kynntu fyrir borginni hugmyndir sínar og grófar teikningar af því sem til stæði að gera. Og eignaréttur þeirra er sterkur.

Lausn á þessari deildu virðist ekki í sjónmáli og fyrir okkur utanaðkomandi hefur hún á sér blæ og birtingarmynd baráttu einstaklinga gegn bákninu, borginni og embættismönnum hennar líkt og mörgum finnst einkenna deilu íbúa við borgina um „Græna gímaldið“ í Breiðholti þar sem málið velkist einhvern veginn áfram án lausnar af hálfu borgarinnar og engin niðurstaða fæst.

SEGJAST EKKI HAFA FENGIÐ ÞÁ EIGN SEM ÞAU KEYPTU

Þau Hilmar Páll og Inga Lóa halda því fram að þau hafi ekki fengið þá eign sem þau keyptu á sínum tíma við það að borgin hafi hækkað landslagið í Gufunesi fyrir ný fjölbýlishús og að vitlausir hæðarpunktar hafi verið notaðir þegar gefið var út framkvæmdaleyfi vegna gatnagerðar og lagningar veitukerfa fyrir nýja byggð í Gufunesi hinn 29. september árið 2019 – en sú byggð snýr að þeirra lóð í norðri að Þengilsbási.

Þau mótmæltu þessum hæðarpunktum með harðorðum bréfum þegar árið 2020 og kærðu framkvæmdaleyfið til Úrskurðarnefndar umhverfis- og auðlindamála en kröfu þeirra um ógildingu leyfisins var hafnað. Fóru þau í tvígang fram á endurupptöku málsins en þeim beiðnum var báðum synjað.

Nýju blokkir Spildu koma hér alveg upp að götunni Þengilsbási sem er við norðurenda lóðar þeirra hjóna. Til stendur að reisa stórt hús á planinu hér fyrir miðri mynd þannig að það verður göngustígur á milli þess og hús hjónanna.

NÝJAR VENDINGAR MEÐ NÝRRI MATSSKÝRSLU DÓMKVADDS MATSMANNS

Að þeirra sögn eru þó nýjar vendingar í málinu komnar fram því Loftkastalinn fékk á dögunum matsskýrslu óháðs dómkvadds matsmanns um hæðarpunkta á svæðinu sem virðist renna stoðum undir að þau hjón hafi haft rétt fyrir sér allan tímann varðandi hæðarpunktana.

Þau halda því raunar fram að hinn óháði matsmaður hafi gert sig vanhæfan með því að svara ekki öllum spurningum skýrslunnar og verið með fullyrðingar í svari sem stangist á við skipulagslög. Að auki segja þau að umræddur matsmaður hafi starfað sem ráðgjafi hjá Reykjavíkurborg á þessu tímabili sem deilan hefur staðið yfir og að allt stefni því í að málið fari áfram til yfirmatsnefndar. Þetta sé allt með ólíkindum.

ALLT Á FLOTI OG KLASINN EKKI Í SÖMU HÆÐ

Með kaupunum Loftkastalans á lóðinni og byggingunum þremur áformuðu Hilmar og Inga Lóa að stækka við sig og byggja nýtt verkstæði og fjölbýlishús sem þau segjast enn ekki getað byrjað á vegna afstöðu borgarinnar sem haldi sig við hæðarpunkta sem geri það að verkum að mikið yfirborðsvatn renni inn á lóðina. Nýju byggingarinnar í fyrirhuguðum klasa verði ekki í sömu hæð og gömlu húsin sem fylgdu lóðinni og því verði ekki hægt að samnýta verkstæðin. Borgin hafi í þessu stríði gert þeim erfitt fyrir og skert aðgengi þeirra og umferðarrétt að innkeyrsluhurðum og gönguhurðum á núverandi byggingum með bílastæðum, gangstéttum og göngugötu. Þá hafi borgin skipt seldri lóð upp í tvennt eftir á með nýju deiliskipulagi.

Þau segja ennfremur að eignarrétturinn sem fylgdi kaupum þeirra árið 2018 á lóðinni sé sterkur og skýr og honum verði ekki breytt eftir á með nýju deiliskipulagi.

Deilan snýst um skiptingu lóðarinnar eftir að þau keyptu hana og nýja hæðarpunkta á þeim hluta lóðarinnar þar sem byggingarrétturinn er fyrir hendi. Þar með segjast þau hjón ekki geta samnýtt verkstæði sem til stóð að byggja við gamla verkstæðið - ekið stórum vögnum þar á milli - og munar talsverðu miðað við rauða strikið á myndinni sem þau hafa málað.

HLUTI AF STÓRHUGA ÁÆTLUNUM UM KVIKMYNDAÞORP

Kaup þeirra hjóna á húsunum og lóðinni var hluti af miklum áætlunum borgarinnar árið 2018 um að breyta Gufunesi í lítið kvikmyndatökuþorp, nýjum miðpunkti í kvikmyndagerð á Íslandi. Hilmar Páll var á þessum tíma þekktur í leikmyndagerð og hafði unnið við alls kyns verkefni fyrir kvikmynda- og auglýsingagerð hér á landi um árabil.

Ekki er útlit fyrir að þessu sjö ára stríði sé að ljúka líkt og hinu fræga sjö ára stríði í Evrópu á átjándu öld sem lauk með friðarsamkomulagi í París. Til þess virðist of mikil harka í málinu af beggja hálfu.

Eitt er víst; nýjar götur og fjölbýlishúsin í Gufunesi verða ekki rifin vegna þessarar deilu. Þau eru komin til að vera og þeir hæðarpunktar sem nýja byggðin byggir á. En hvað er þá til ráða annað en að ná samkomulagi en til þess þarf borgin væntanlega að gefa eftir miðað við núverandi stöðu? – JGH

Svona var klasinn og hugmyndir þeirra hjóna kynntar fyrir borginni snemma árs 2018 eða fljótlega eftir að þau keyptu lóðina með húsum og byggingarrétti. Gert var ráð fyrir að sjötíu ára gamlir hæðarpunktar í Gufunesi myndu gilda og að lóðin yrði öll í sömu hæð.

Þessi deila snýst um hæðarpunkta í Gufunesi og hvort borginni hafi orðið á í messunni með þá. Mikil þrjóska er í málinu og hvorugur aðilinn gefur sig. Það er allt í hnút.

Eitt er víst; nýjar götur og nýju fjölbýlishúsin í Gufunesi verða ekki rifin vegna þessarar deilu. Þau eru komin til að vera sem og þeir hæðarpunktar sem nýja byggðin byggir á. En hvað er þá til ráða til að ná samkomulagi í sjö ára gamalli deilu?

Hluthafaspjall ritstjóranna: Stórfróðlegt viðtal við Jón Þorstein nýjan forstjóra Beru

Sat, 25 Apr 2026 10:46:42 GMT

Jón Þorsteinn Oddleifsson, forstjóri Beru, var viðmælandi okkar Sigurðar Más Jónssonar í nýjasta þætti Hluthafaspjalls ritstjóranna á efnisveitunni Brotkast.is.

Bera var nafn á móður Egils Skallagrímssonar og það varð fyrir valinu þegar nýtt skipulag var kynnt á starfsemi Ölgerðarinnar í endaðan febrúar sl.

Bera er núna móðurfélag samstæðunnar og skráð í Kauphöllina en undir fyrirtækið heyra núna fjögur félög og er Ölgerðin eitt þeirra.

Jón Þorsteinn segir að með nýju skipulagi sé verið að skerpa línur og fá skýrari sýn og markmið á hverja einingu fyrir sig. Undirfélög Beru eru Ölgerðin, Danól, Gæðabakstur og Kjarnavörur.

Þá tókum við Sigurður Már stöðuna í efnahagsmálum og spyrja sig hvort ríkisstjórnin hafi misst tökin og fókusinn á efnahagsmálin með því að leggja alla áherslu núna á ESB-viðræður.

Þá ræddum við ruglið í danska Berlingske um íslenskan sjávarútveg og að þúsundir íslenskra hluthafa í stærstu skráðu íslensku sjávarútvegsfyrirtækjunum séu einhverjir „rússneskir ólígarkar“ en ólígarkar eru jafnan kenndir við Rússland eftir að járntjaldið féll og notað um menn sem sölsuðu undir sig fyrirtæki í eigu almennings.

Íslens sjávarútvegsfyrirtæki byggja hins vegar á gömlum merg og hafa verið byggð upp eftir um 40 ára gömlum lögum og leikreglum stjórnvalda um kvótakerfið og þar sem virðisaukinn liggur mjög svo í fullnýtingu aflans og frábæru marðasstarfi fyrirtækjanna á erlendum vettvangi.

Öflugur þáttur að venju. - JGH

Hér má sjá þáttinn í heild sinni.

Hvorki meira né minna en 69. þáttur Hluthafaspjalls ritstjóranna á Brotkast.is

Bæklingur Samfylkingar borin út í Grafarvogi. Pétur á þremur myndum en engin Heiða!

Tue, 21 Apr 2026 21:51:06 GMT

ENGIN HEIÐA. Samfylkingin í Reykjavík dreifði nýjum bæklingi - fjórblöðungi - í Grafarvogi í kvöld og það fyrsta sem blasir við er að Heiðu Björg Hilmisdóttur , borgarstjóra Samfylkingarinnar í Reykjavík, er hvergi að finna í bæklingnum.

Hún skipar engu að síður 2. sæti listans í Reykjavík í komandi sveitarstjórnarkosningum og hefur verið foyrstukona flokksins í borginni og sveitarstjórnarmálum um langt skeið.

Þrjár myndir eru í bæklingnum og er Pétur Marteinsson, efsti maður listans, á þeim öllum.

Á forsíðunni er hann með Steinunni Gyðu- og Guðjónsdóttur sem skipar 3. sæti listans. Í opnunni stendur Regína Ásvaldsdóttir með honum en hún skipar 7. sæti listans. Á baksíðunni er svo mynd af Pétri einum. - JGH

Í miðopnu bæklingsins er mynd af Pétri með Regína Ásvaldsdóttir sem gegndi starfi bæjarstjóra í Mosfellsbæ síðasta kjörtímabil og skipar 7. sæti listans.

Á forsíðunni er Pétur með með Steinunni Gyðu- og Guðjónsdóttur sem skipar 3. sæti listans.

Laukar líta upp og plöntur taka við sér - vor í lofti og lífið fær annan brag

Mon, 20 Apr 2026 21:31:58 GMT

Það er svo sannarlega vor í lofti. Meðfylgjandi myndir voru teknar í góðviðrinu í Hamrahverfinu í morgun og óhætt að segja að vorið minni hressilega á sig þessa dagana.

Fyrir um tíu dögum var fremur kalt og snjór á höfuðborgarsvæðinu að morgni föstudagsins 10. apríl. En eins og hendi væri veifað tók að hlýna úti þá helgi og í byrjun síðustu viku fóru borgarbúar að ræða um að vorið væri að nálgast.

Sumardagurinn fyrsti verður nk. fimmtudag, 23. apríl og spáin er góð fyrir þann dag; stefnir í alvöru sumardag. - JGH

Svolítið einmana. Til auglitis við skínandi sól.

Gægist fram í trjárunnanum sem á svolítið í land.

Blessuð sólin elskar allt, allt með kossi vekur.

Laukar líta upp.

Byrjað að bruma.

Vor í lofti og vonandi ekkert hret úr þessu.

Ekki er allt sem sýnist! Við Austurver sl. laugardag

Sat, 18 Apr 2026 22:54:02 GMT

Þetta leit ekki vel út þegar ekið var inn á bílastæðið fyrir framan Austurver sl. laugardag. Og ég spurði mig strax að því hvernig gæti staðið á því að umferð væri leyfð inn á planið við þessar kringumstæður?

En ekki er allt sem sýnist!

Það var verið að taka upp kvikmynd þar sem m.a. sprengja springur í gamla Landsvirkjunarhúsinu. Þarna var sem sagt lögregla, slökkvilið og tökulið. - JGH

Lögregla, slökkvilið og tökulið.

„Sprengja“ í gamla Landsvirkjunarhúsinu.

Líklegast versti fjölfarnasti vegur landsins. Vegurinn að gylltu ströndinni í Gufunesi

Sat, 18 Apr 2026 22:33:17 GMT

Þessi fjölfarni vegur niður að gylltu ströndinni í Gufunesi er gjörsamlega óboðlegur. Ökumenn aka hann með því að sveigja bílum til og frá líkt og skíðamenn í góðri brekku.

Mikill fjöldi leggur jafnan leið sína að gylltu ströndinni á sumrin. Þegar Grafarvogur.net var þarna á ferð á föstudaginn var talsvert af fólki í einu af gufuböðunum sem þarna er boðið upp á og hópur á leið á sjóþotur.

Lítið mál að laga. - JGH

Fjölfarinn - en sennilega einn versti malbikaði vegur landsins.

Eik á einn fermetra fyrir hvern landsmann - virði eignanna yfir 170 milljarðar kr.

Sat, 18 Apr 2026 11:21:00 GMT

HLUTHAFASPJALL RITSTJÓRANNA.

Hér er nýjasti þáttur okkar Sigurðar Más Jónssonar í Hluthafaspjalli ritstjóranna sem sýndur er á efnisveitunni Brotkast.is en gestur okkar að þessu sinni er Hreiðar Már Hermannsson , forstjóri Eikar fasteignafélags, en félagið á yfir 380 þúsund fermetra í atvinnuhúsnæði sem gerir um einn fermetra á hvern landsmann.

Félagið hélt aðalfund sl. fimmtudag og þar bar meðal annars til tíðinda að fyrrum forsætisráðherra, Katrín Jakobsdóttir , var kjörinn í stjórn félagsins.

Eik leggur mikla áherslu á að kaupa traustar og góðar eignir til útleigu. Hluthafastefna félagsins gengur m.a. út á að arðgreiðslur sveiflist ekki með hagsveiflum hvers tíma heldur haldist sem stöðugastar. - JGH

Hlaðvarpsþátturinn Hluthafaspjall ritstjóranna. Frá vinstri: Sigurður Már Jónsson, Jón G. Hauksson og Hreiðar Már Hermannsson, forstjóri Eikar fasteignafélags.

Hér er þátturinn í heild sinni.

Enn er ekkert farið að hreinsa eftir brunann í skemmunni í Gufunesi í janúar

Fri, 17 Apr 2026 22:08:04 GMT

Það vekur athygli að enn bólar ekkert á hreinsunarstarfi í vöruskemmunni í Gufunesi sem varð eldi að bráð 12. janúar sl. og fór svo sannarlega ekki fram hjá Grafarvogsbúum.

Þegar við vorum þarna á ferð um helgina blasa við brunarústir og þannig hefur þetta verið allt frá því við vorum þarna á ferð í janúar fljótlega eftir brunann. Hvernig væri nú að eigandi skemmunnar, Reykjavíkurborg, taki sig til að láti hreinsa svæðið.

Gyllta ströndin í Gufunesi er þarna rétt við skemmuna og oft margt um manninn í gufuböðum sem eru þarna við ströndina - eða á leið að leigja sér sjóþotur.

Fyllsta ástæða til að vekja athygli á þessu. Hér má gera betur. - JGH

Föstudagurinn 17. apríl 2026.

Mánudagurinn 26. janúar 2026.

Mánudagurinn 26. janúar. Horft inn í gáminn fyrir utan geymsluna.

Föstudagurinn 17. apríl. Skúffurnar nánast i sömu stöðu og í janúar.

Föstudagurinn 17. apríl. Hvernig væri nú að taka til við að hreinsa?

Hvers vegna er hreinsunarstarf ekki hafið?

Skemman er rétt við gylltu ströndina í Gufunesi en fjöldi fólks leggur leið sína þangað. Viðey blasir við.

Eftir hverju er verið að bíða?

Myndavélar settar upp við bílastæðin við Egilshöll. Gjaldskylda fyrirhuguð. Gjaldfrjálst fyrstu 3 klst. og fyrstu 15 mín. næst húsinu

Fri, 17 Apr 2026 17:13:51 GMT

Fasteignafélagið Heimar, eigandi Egilshallarinnar, er núna að setja upp myndavélar við bílastæðin við Egilshöll til að stýra umferðinni betur á svæðinu og taka upp gjaldskyldu eftir ákveðnum reglum, t.d. verður gjaldfrjálst fyrstu þrjár klukkustundirnar á almennum stæðum.

Komið verður á bílastæðagjöldum með þeim hætti að innheimt verður fyrir stæðin næst húsinu, forgangsstæði, eftir fyrstu 15 mínúturnar. Þetta eru stæðin í boganum næst aðalinnganginum sem og forgangsstæði fyrir aftan húsið.

Þá verða fyrstu 3 klukkustundirnar inni á almennu bílastæðunum ókeypis en rukkað verður fyrir hvern klukkutíma eftir það um 450 krónur. Með öðrum orðum; fjórði tíminn er á 450 krónur.

Þetta þýðir að hægt er að skjótast í bíó og á íþróttaæfingar án þess borga.

Jarðvegsvinna í fullum gangi við innkeyrsluna að sunnanverðu inn á bílastæðin við Egilshöll og fyllt yfir tengingar í jörðu.

Miklar merkingar eru víða að sjá á bílastæðunum við Egilshöll og ljóst að talsverðar framkvæmdir verða þarna á næstunni við að koma upp myndavélum sem mynda alla bíla sem fara inn á stæðin við húsið. Sjá frétt frá Heimum hér.

Pétur Heimisson, samskiptastjóri Heima , sagði við Grafarvogur.net fyrr í dag að þetta væri gert til að stæðin nýtist betur hjá þeim sem ættu leið í Egilshöll.

Nokkur misnotkun hefur verið í gangi með stæðin og hefur flutningabílum, trukkum og jafnvel hjólhýsum verið lagt í stæði á svæðinu langtímum saman og þannig gert þeim sem eiga raunverulegt erindi í húsið erfiðara fyrir að finna stæði. Sem og hafa bílastæði verið notuð af bíleigendum utan af landi á leið í bæinn en fara ekki í Egilshöll.

„Nýja fyrirkomulagið á að koma í veg fyrir þetta og stýra umferðinni,“ segir Pétur.

Nokkuð hefur borið á því að starfsmenn Egilshallar leggi á stæðunum næst aðalinnganginum og blokkeri þannig stæðin fyrir þá sem þurfa að skjótast sem snöggvast inn í húsið. Núna er verið að bæta við stæðum fjær húsinu þar sem gert er ráð fyrir að starfsmenn leggi.

Gjaldið eftir fyrstu 15 mínúturnar næst húsinu á að auka hreyfanleika og bæta nýtinguna á bílastæðunum í boganum fyrir framan aðalinnganginn og á forgangsstæðunum fyrir aftan húsið . - JGH

Hér er búið að moka yfir kapla fyrir myndavélarnar við innkeyrsluna að sunnanverðu.

Tenglar fyrir myndavélarnar. Allt gengur þetta út á aðgangsstýringu og að stæðin verði raunverulega notuð af þeim sem eiga erindi í Egilshöll.

Appelsínugular merkingar blasa við á nokkrum stöðum á stæðinu. Hér verður sett upp myndavél. Í boganum beint fyrir framan aðalinnganginn ætti að vera auðveldara í framtíðinni að fá stæði fyrir þá sem ætla rétt sem snöggvast að skjótast inn í húsið.

Hér er búið að merkja - og skóflurnar fara á kreik á næstunni.

Sléttstraujað skal það vera fyrir kapla og jarðtengingar.

Það dylst engum að það er heilmikil vinna framundan við að setja upp myndavélar við Egilshöll sem eiga að stýra umferðinni betur inn á svæðið og inni á svæðinu. Forgangsstæðin næst húsinu og á bak við; gjaldskyld eftir 15 mín. Almenn stæði: Ókeypis fyrstu 3 klukkustundirnar en 450 kr. á klst. eftir það, þ.e. 4 klukkustundir eru á 450 kr.

Hvernig hugsar fólk fætt á árunum 1980 til 1997 um fjármál og sparnað í striti dagsins?

Thu, 09 Apr 2026 22:18:36 GMT

GREIN Í BLAÐINU FJÁRMÁL OG ÁVÖXTUN.

Við félagarnir í Hluthafaspjalli ritstjóranna settumst niður með þremur fulltrúum Y-kynslóðarinnar til að ræða m.a. um fjármál, eyðslu, sparnað, kulnun, íbúðarkaup, bíllausan lífsstíl, nísku og að neita sér um hlutina! Hvernig hugsar annars Y-kynslóðin, fólk fætt á árunum 1980 til 1997?

Texti og myndir: Jón G. Hauksson

VIÐ ERUM RISAEÐLUR

Við sögðumst vera risaeðlur og þær yrðu að taka okkur sem slíkum. Þannig hófst spjallið við þrjár eldhressar dömur af þúsaldarkynslóðinni, Y-kynslóðinni, um fjármál, sparnað, fjárfestingar og hvernig þessi kynslóð ræðir sín á milli um þessi mál. Nú, auðvitað læddust inn önnur mál og umræðan fór vítt og breitt um tíma, eins og gengur.

– Þið eruð engar risaeðlur að sjá, svöruðu þær strax, og hlógu dátt. Okkur leið betur með það.

Við tókum umræðuna á veitingahúsinu Snaps við Óðinstorg og gáfum okkur ágætan tíma yfir málsverði fyrir langt spjall. Þegar við vorum sest við borðið og ég horfði yfir veitingasalinn varð mér að orði: „Hér sýnist mér ekki vera January-February-Edrúary.“

Þær sögðu þá brandara af einum góðum sem misheyrði þetta illa með Edrúary - og heyrðist sagt „Edrúár“. „Það reyndi svolítið á kallinn það árið!“

Þetta fer vel af stað, hugsaði ég með mér. Létt yfir þessu.

UPPHAFIÐ AÐ ÞESSU SPJALLI

Upphafið að þessu spjalli var að við vinnslu þessa blaðs langaði mig að vita hvernig þrjár ungar konur af þúsaldarkynslóðinni, (millenníum-kynslóðinni, fólk fætt frá 1980 til 1997), og eru að nálgast fertugt ræða sín á milli um fjármál og ekki síður sparnað í amstri dagsins.

Það er vissulega þekkt meðal erlendra hagfræðinga að skilgreina kynslóðir og komast að því hvernig „þær hugsa“, hvernig kauphegðun þeirra sé, hvernig þær meta sparnað og fjárfestingar, í hvað þær eyða – og ekki síður hversu margir tilheyra hverri kynslóð. Allt er þetta gert í nafni hagrannsókna.

Kynslóðir ræða saman. Hvernig tæklar Y-kynslóðin fjármál, sparnað og nísku í striti dagsins? Það er nú það. Um það fjallar þetta athyglisverða samtal í tímaritinu Fjármál og ávöxun sem kom út í síðasta mánuði. HÉR ER BLAÐIÐ Á PDF-FORMI.

ÞRJÁR VINKONUR TIL Í SAMTALIÐ

Eftir smá leit frétti ég af þremur góðum vinkonum sem væru til í að ræða málin. Þetta voru þær Ásrún Magnúsdóttir, 37 ára danshöfundur, Kara Hergils Valdimarsdóttir , 38 ára menningarstjórnandi, og Berglind Pétursdóttir , 36 ára sjónvarps- og auglýsingakona; kunn sem Berglind Festival, rannsóknarblaðamaður í Vikunni með Gísla Marteini.

Áður en ég mætti til leiks hóaði ég í félaga minn í hlaðvarpsþættinum Hluthafaspjall ritstjóranna, Sigurð Má Jónsson, til að mæta og taka þátt í þessu með mér. Við erum af barnasprengjukynslóðinni miklu, (baby boom), sem er fólk fætt á árunum 1946 til 1964; stundum nefnd eftirstríðskynslóðin.

Sú kynslóð ólst upp þegar minna var til skiptanna; fátækt áberandi; barnmargar fjölskyldur; þjóðir heims að rífa sig upp í framleiðslu, hagvexti og viðskiptum eftir stríðið - og langflestar mæður unnu heima og sinntu börnum.

Y-KYNSLÓÐIN SÚ ÓHEPPNASTA?

Það hefur verið sagt um Y-kynslóðina að hún sé „óheppnasta kynslóðin“. Hún hefur orðið fyrir verulegum efnahagslegum truflunum frá því að hún fór út á vinnumarkaðinn, t.d. með netbólunni sem sprakk 2001; alþjóðlega bankahruninu 2008 og Covid-faraldrinum 2019. Hún hefur staðið frammi fyrir meira atvinnuleysi en kynslóðin sem kom á undan, þ.e. X-kynslóðin (1965-1980). Námslán Y-kynslóðarinnar taka sömuleiðis meira í þar sem hagvöxtur er hægari og efnahagslægðir tíðari.

En hvað um það – það var með þessar pælingar í farteskinu sem við mættum til leiks.

Það fór vel um okkur þarna við Óðinstorgið. Þægilegt andrúmsloft og talsvert af gestum.

VIÐ ERUM KALDASTRÍÐSMENN

Eftir ísbrjótinn með risaeðlurnar og karlinn sem lenti fyrir misskilningi í „edrúári“, sagði ég mjög frumlega – já, þið eruð af millenníum-kynslóðinni, ekki satt? Eins og þær vissu það ekki.

Þær: „Jú, við erum kynslóðin með skjáinn fyrir framan okkur allan sólarhringinn,“ svöruðu þær að bragði, hlæjandi. „Við erum líka kynslóðin sem höfum lifað tímabil friðar, þar til núna,“ bættu þær við.

Við: Ekki stóð á svarinu hjá okkur: Við erum kaldastríðsmenn. Þar sem óttinn var við vetnissprengjur og gjöreyðingarvopn; og hversu oft Sovétmenn og Bandaríkjamenn gætu tortímt hvorir öðrum.

(Ég hugsaði með mér; í hvaða átt stefna þessar umræður eiginlega; átti þetta ekki að vera skemmtilegt kvöld?).

En boltinn tók að rúlla og fjármálin komu til sögunnar.

Við: – Þið eruð miklar vinkonur; talið þið eitthvað um fjármál þegar þið hittist?

Þær: „Nei, ekki mikið í þeim skilningi. Við deilum frekar reynslusögum þegar við lendum í óvæntum útgjöldum eða okkur finnst eitthvað orðið dýrt. Við eigum allar íbúð og erum með börn þannig að við getum dottið í pex um matarkörfuna og afborganir. Tuðum kannski yfir því að hafa farið í Bónus og eytt yfir 30 þús. kr. en finnst við ekki hafa keypt neitt. Erum örugglega ekki einar um þetta.“

AÐ KAUPA SÉR LÁN

Við: – Þið eigið allar íbúð!? Hvað með vaxtaumræðuna?

Þær: „Jú, afborganirnar taka í og eru alltaf að þyngjast. Okkar kynslóð finnur fyrir því. Við vorum allar svo heppnar að kaupa okkar íbúðir fyrir þrítugt þannig að við náðum að komast inn á markaðinn – sem er mjög erfitt núna - og höfum að vissu marki notið þess líka að íbúðirnar hafa hækkað í verði og jafnvel meira en lánin þannig að það hefur orðið svolítil eignamyndun í íbúðunum.“

Þær: „Annars er þetta ef til vill öfugmæli að segjast eignast eða kaupa íbúð, það má alveg eins kalla þetta að kaupa sér lán.“

Við: – Kaupa sér lán! Vel orðað!

Við: – Hvað með muninn á verðtryggðum og óverðtryggðum lánum? Er það ekki eitthvað sem Y-kynslóðin hefur skoðun á?

Þær: „Jú, eflaust. Það sem er erfiðast við verðtryggðu lánin í verðbólgunni er hvað þau hækka og hækka og allir upplifa það þannig að það gangi lítið á þau þrátt fyrir síhækkandi afborganir. Vissulega hafa íbúðirnar hækkað sömuleiðis. En okkur finnst e-h veginn að launin hækki ekki alveg í sama takti og lánin. Óverðtryggð lán og engin verðbólga væri sjálfsagt best. En með þau lán er fólk líka að borga miklu meira í upphafi – og með börn í skóla og tómstundum – verður þetta eiginlega öllum ofviða í brauðstritinu; og varla á sig leggjandi. Það nennir því varla nokkur maður; þótt skuldirnar greiðist hraðar upp – og það sjáist vissulega á eftirstöðvunum.“

Við: – Hversu mikil áhrif hefur öll þessi umræða um háa stýrivexti og að illa gangi að lækka þá vegna verðbólgunnar?

Þær: „Hún er auðvitað svolítið niðurdrepandi þessi stýrivaxtaumræða og að illa gangi að ráða við verðbólguna. Það er talsverð óþolinmæði eftir vaxtalækkun og þegar lítið mjakast áfram í þá áttina hefur það sálræn áhrif; slær á bjartsýni, ýtir hugsanlega undir kvíða og þrengir að greiðslugetu margra.“

HJÁLP FRÁ FORELDRUM AÐ AUKAST

Við: – Það heyrist æ oftar að ykkar kynslóð fái hjálp frá foreldrum við fyrstu íbúðarkaup! Er það svo?

Þær: „Já, það er að verða mjög algengt með einum eða öðrum hætti.“

Við: – Hvernig þá?

Þær: „Sumir fá beina fjárhagsaðstoð, jafnvel gjöf, eða lán frá foreldrunum svo hægt sé að sýna eitthvert eigið fé í byrjun gagnvart bönkunum. Lán sem eru greidd til baka. Svo heyrum við að eitthvað sé um fyrirfram greiddan arf og sú leið sé eitthvað að aukast; allt er þetta til að komast inn á markaðinn – sem er svo erfitt. Við fengum allar smá aðstoð í upphafi frá foreldrum okkar.“

Þær: „Margir fá sömuleiðis að búa frítt heima í foreldrahúsum á háskólaárunum og þá í fríu fæði – og fá afnot af bílum foreldranna. Það sparast mikið að leigja ekki úti í bæ og safna miklum skuldum í námi; skuldir sem bíta í þegar fólk ætlar síðar að kaupa sína fyrstu íbúð þegar það er komið út á vinnumarkaðinn. Fólk er lengur í foreldrahúsum, þ.e. eftir að það er byrjað að vinna, og notar þá tímann til að leggja fyrir til íbúðarkaupa. Það er mikil hjálp í því.“

Við: – Þekkið þið eitthvað inn á innlánsreikninga bankanna og ávöxtunina sem þar er í boði?

Þær: „Ekki mikið, en þó. Við heyrum að ýmsir bundnir reikningar í bönkunum skili ágætri ávöxtun þrátt fyrir verðbólguna. Við erum að safna fyrir stelpuferð og ein okkar stofnaði svona læstan reikning sem hefur verið að skila allt að 8% ávöxtun.“

Hinar tvær: „Heyrðu, það er bara að muna að losa hann í tæka tíð.“ (Mikið hlegið).

Við getum líka fylgst með öllum þessum reikningum í blaðinu þínu; þar er fínt yfirlit yfir þá og nauðsynlegt. Annars talandi um innlánsreikninga þá færist það í aukana hjá okkar kynslóð að stofna verðtryggða framtíðarreikninga fyrir börnin þegar þau eru nýfædd þannig að allar peningalegar gjafir fara þar inn og eru látnar ávaxtast. Þetta eru víst ágætir reikningar.“

ÍSLANDSBANKAÚTBOÐIÐ - ÞÆR PRÓFUÐU

Við: – Hafið þið eitthvað fjárfest í hlutabréfum?

Þær: „Við fjárfestum allar í Íslandsbanka í útboðinu fyrir tæpu ári. Ekki mikið og ekki saman sem hópur en við prófuðum og þetta voru okkar fyrstu hlutabréfakaup á markaði.“

Við: – Hvað kom til?

Þær: „Bara einhver stemning í samfélaginu um að þetta væri lítil áhætta og gengi bréfanna væri hagstætt og á undirverði. Við fylgdumst ekkert með þessu til að byrja með. En svo þegar bréfin tóku að hækka þá litum við oftar á stöðuna. Við sögðum svona eftir á í léttum dúr, fyrst bréfin höfðu hækkað svona mikið, að við sæjum eftir því að hafa ekki tekið massa-yfirdrátt og keypt stærri hlut og verið alvöru fjárfestar!“

Við: – Það er auðvelt að vera vitur eftir á. En það má ekki gleyma því að það tryggir enginn eftir á í hlutabréfakaupum og það hafa menn fengið að reyna þegar bréf lækka og þeir verða fyrir tapi. Það er súrt og þá kárnar gamanið. Það er stundum sagt að það eigi aldrei að taka lán fyrir hlutabréfakaupum nema maður hafi efni á að tapa bréfunum. En sannast sagna var verðið í útboði ríkisins á bréfunum í bankanum þannig að þetta var svolítið borðleggjandi og líkurnar litlar á tapi – en hlutabréfakaupum fylgir alltaf áhætta, sögðum við hróðugir.

AÐ GREIÐA INN Á HÖFUÐSTÓLINN

Ef til vill var þetta of mikil speki, því þær sáu sér leik á borði og sneru óvænt taflinu við og spurðu okkur hvað við viðskiptablaðamennirnir gætum ráðlagt þeim í fjármálum og sparnaði!?

Við: – Já, þið meinið þegar stórt er spurt. Og svolítill spekingssvipur færðist yfir okkur og við byrjuðum með fyrirvara; eins konar neðanmálsgrein. - Það er hægt að veita ráð en endanleg ábyrgð og ákvörðun er þess sem leitar ráða. Þetta á sérstaklega við um hlutabréfakaup og fjárfestingar í verðbréfasjóðum, sögðum við hugsandi.

Jú, eitt gott ráð sem margir nefna er að greiða inn á höfuðstól íbúðalána annað slagið (eignamyndun) og lækka þannig skuldina og vaxtabyrðina síðar meir og „fá“ þannig í reynd hærri vexti á peninginn sem fer á innágreiðslu lánsins heldur en fæst með því að leggja hann í banka. Það er reyndar líka fínt að leggja reglulega inn á hlutdeildarsjóði (verðbréfasjóði) ef fólk vill taka meiri áhættu en dreifa samt áhættunni. Svo er það að fjárfesta beint í hlutabréfum. Nú, margir reikningar í bönkunum eru mjög áhugaverðir og ágætt að hafa þá læsta; bundna, svo ekki sé endalaust hægt að kroppa í þá. Þeir hafa verið að gefa ágæta nafnávöxtun undanfarin ár.

NOKKUR RÁÐ TIL AÐ SPARA

Þær: „En hvað með sparnaðinn – lumið þið á einhverjum trixum þar?“

Við: – Ætli það sé ekki bara þetta gamla, góða að geta neitað sér um neyslu; neitað sé um einn hlut í nútíð til að geta með vöxtum átt tvo slíka hluti í framtíðinni. Neitað sér um dýrar utanlandsferðir; dýrar merkjavörur eins og í fatnaði og bílum. Það kostar að glansa og vera snobbaður, eins og maðurinn sagði. Nú, það er dýrt að fara á veitingahús og reikningarnir þar geta orðið hærri en lagt var upp með í byrjun kvölds. Ef til vill er sniðugt að draga úr vinahittingi á veitingahúsum og drekka óáfengt þegar það á við, svo ekki þurfi að splæsa í dýran leigubíl heim. Sumir hugsa dæmið þannig að ef þeir neita sér um eitthvað fyrir 20 þús. kr. þá sé næsta ferð í Bónus upp á 20 þús. kr. „ókeypis“.

Svo kom einn fimmaura frá okkur um manninn sem sagði í miklu eyðslusjokki þegar hann leitaði leiða til að skera niður útgjöld: „Það er verst að ég reyki ekki tvo pakka á dag, þá gæti ég tekið þá eyðslu út.“

Við: – Nú, svo er það sparnaðurinn sem felst í því að láta aðra borga, t.d. vinnuveitandann. Fólk reynir þá að aka á bíl frá vinnuveitandanum og þótt það fái hlunnindatekjur, sem borgaðir eru skattar af, þá losnar viðkomandi við að kaupa bíl og taka dýrt bílalán og sparar þar með vexti og fjármagnskostnað. Nú, þetta með að láta aðra borga; sumt ungt fólk, sem er búið að kaupa sér íbúð, flytur aftur heim í foreldrahús, tímabundið, jafnvel með börn, og leigir þá íbúðina sína út á meðan. Semsé; heim aftur og láta foreldrana borga. Sérstök leið - og örugglega oft á tíðum erfið.

Við: – Nú, besta en erfiðasta leiðin í sparnaði – og sem margir nota með góðum árangri, er að leggja fyrst til hliðar, t.d. 150 þús. til 300 þús. kr. á mánuði, og setja inn á læstan reikning sem ekki er hægt að snerta og „lifa svo á afganginum“ eins og sagt er. Þá reynir auðvitað verulega á að geta neitað sér um hlutina og hert sultarólina. Það þarf að vera mikil samheldnina hjá hjónum með þessa leið því hún getur valdið pirringi. En hún er auðvitað andstæðan við að leyfa sér og njóta, en finna svo aldrei „afganginn“ eftir á til að leggja fyrir. Þetta með aðhaldssemina; það er mikilvægt að vera nískur á eigin kostnað, en ekki annarra, þeir eru óþolandi sem „gleyma alltaf veskinu heima“ þegar þarf að borga.

Og svo mundum við eftir þessu: Svo má auðvitað ekki gleyma því að afborganir af lánum eru sparnaður. Að vísu þvingaður og eftir á. Þá er frádrátturinn á launaseðlinum, sem fer í lífeyrissjóðina og séreignarsparnaðinn, helsti sparnaðurinn hjá flestum. Við hvetjum ykkur til að greiða í séreignarsparnað – og fá þannig aukasparnað á móti frá vinnuveitandanum. Þetta er mjög mikilvægur sparnaður og hefur nýst mörgum við íbúðakaup en séreignarsparnaðurinn rann skattfrjálst inn á íbúðalán til loka síðasta árs en gildir núna eingöngu við kaup á fyrstu íbúð. (ATH. Heimild til að ráðstafa séreignarsparnaði inn á lán eða vegna íbúðakaupa var til loka árs 2025 og hefur ekki verið framlengd. Annað sambærilegt úrræði fyrir fyrstu kaupendur er enn í gildi.)

Við: – Fyrst við erum að tala um sparnað og þið eruð með börn, við heyrum að tómstundir og íþróttir séu orðnar dýrar hjá barnafólki og taki verulega í. Hvað segið þið um það?

Þær: „Tómstundir eru orðnar mjög dýrar. Við skiljum ekki hvernig fólk fer að sem er með nokkur börn í íþróttum. Hver önn kostar kannski 110 þús. kr. Tónlistaskólarnir eru enn dýrari, sem og dans og fimleikar. Það er einhver frístundastyrkur en hann vegur engan veginn upp í þessi útgjöld. Þá kosta leikskólarnir sitt þegar fólk er með börn á þeim aldri. Á venjulegum tekjum er því ekki hægt að veita sér allt og hvað þá leggja fyrir á sama tíma.“

BÍLLAUS LÍFSSTÍLL EKKI SPENNANDI

Við: – Vel á minnst, þetta með bíllausa lífsstílinn, á ykkar kynslóð auðvelt með að tileinka sér hann þegar krafan er að skottast með börn og unglinga um allt?

Þær: „Það er mjög erfitt að vera án bíls, nánast útilokað nema hafa aðgang að bíl, t.d. hjá vinum eða ættingjum þegar mikið liggur við. Flestir nenna ekki bíllausum lífsstíl. Og það er nánast útilokað fyrir ungt fólk í úthverfunum sem er á fullu í vinnu að vera bíllaust. Líklegast þarf það að eiga tvo bíla frekar en einn. Enda sjáum við alla umræðuna um kröfur fólks um bílastæði. Íbúðir án bílastæða seljast varla.“

Ein þeirra, sem býr miðsvæðis í borginni, skaut þá inn í og sagðist lifa slíkum lífsstíl og ferðaðist um á hjóli og það væri ekki ógerlegt. „Það þarf bara ákveðið hugarfar og þá verður þetta mjög frelsandi og auðvelt.“

Við: – Það er mikið rætt um kulnun hjá ykkar kynslóð og að hlutfall veikindadaga sé að snarhækka! Hvað segið þið um það vandamál?

KULNUN OG SÍÞREYTA - VANLÍÐAN Í VINNU?

Þær: „Þetta er orðið miklu algengara í umræðunni; kulnun, kvíði, þreyta og jafnvel einhvers konar leiði. En við finnum ekki fyrir kulnun; sem betur fer.“

Við: – Getur verið að ástæðan sé sú að ungt fólk sé með of marga bolta á lofti, sé að vasast í of miklu á álagstímum seinni partinn; er sjálft í ræktinni, hitta vinina, með börnin í íþróttum, tónlist eða dansi; nú og svo taka samfélagsmiðlarnir mikinn tíma?

Þær: „Jú, eflaust. Allt sem þið teljið upp veldur örugglega stressi; að ætla sér um of. En við höldum að starfið og ánægja í vinnu hafi líka mikið að segja. Ef það er leiðinlegt í vinnunni, erfiður yfirmaður og lélegur vinnuandi leiðir það til vanlíðunar. Það gerir það líka ef fólk er einfaldlega ekki á réttri hillu í starfi. Svo hefur þetta áhrif á hjónabandið og sambandið verður erfiðara. Þetta hleður utan á sig. Það fylgir því líka mikil streita að eignast börn með skömmu millibili og vera á sama tíma í mikilli vinnu til að láta enda ná saman.“

Við: – Þið nefnið hjónabandið, það þarf að vera í lagi...Við komumst ekki lengra.

Þær: (Mikill hlátur). „Við höfum enga þolinmæði fyrir leiðinlegum karlmönnum, svo mikið er víst.“

Við: – Við svöruðum því strax til að við værum mjög ánægðir með þá þolinmæði sem þær hefðu sýnt okkur í þessu spjalli yfir borðhaldinu.

FJÁRMÁLAKVÍÐI EFTIR MIKLA EYÐSLU

Við: – En svona í blálokin barst talið að fjármálakvíða sem hefur raunar fylgt öllum kynslóðum, Y-kynslóðinni ekkert frekar en öðrum .

Þær: „Er ekki fjármálaöryggi eitthvað sem allir vilja og þrá? Þannig að eflaust veldur óvissa í fjármálum kvíða innst inni hjá öllum. Á okkar aldri gengur þetta jú út á að vera í ágætu og öruggu starfi. Við erum kynslóð með börn og þungar afborganir og það má enginn við því að missa út einhverja mánuði í tekjum án þess að allt fari úr böndum. Flestir eru í þessu frá mánuði til mánaðar og eiga fullt í fangi með að láta enda ná saman.“

Þær: „ Svo er það annars konar fjármálakvíði; sögðu þær, það er þegar fólk missir sig í eyðslu og sér eftir öllu saman. Þekkja það ekki allir? “

GULIR MIÐAR OG VISA RAÐ

Við: – Jú, jú, við þekkjum það. Við vorum uppi fyrir tíma kreditkortanna þegar sungið var um gulu miða Gleðibankans. Svo komu kortin og Visa-rað, eins og það hét á sínum tíma. Það þurfti víst að borga af því líka. Þeir í Spaugstofunni sálugu gerðu oft grín að umframkeyrslu um jólin og fjármálakvíða eftir hátíðarnar þegar allir í móralskasti tóku til við að spara; þeir Spaugstofumenn klipptu kortin sín í beinni – sögðum við hróðugir og töldum okkur góða.

Þegar þarna var komið áttuðum við okkur á því að við vorum aðeins farnir út af sporinu og ekki alveg á sömu blaðsíðu og þessar bráðskemmtilegu og þenkjandi dömur og því best að setja punktinn fyrir aftan þetta góða kvöld og fína spjall.

Spaugstofan og gulir miðar! Hvað kæmi eiginlega næst frá okkur? Að segja þeim að við myndum þjóðfundinn 1851?

Takk dömur, þetta var skemmtilegt! - JGH

Það var fróðlegt að fá innsýn í umræðu Y-kynslóðarinnar og gaman að spjalla við þessar þenkjandi dömur á veitingastaðnum Snaps við Óðinstorg. Frá vinstri: Kara Hergils Valdimarsdóttir , 38 ára menningarstjórnandi, undirritaður, Jón G. Hauksson , Ásrún Magnúsdóttir , 37 ára danshöfundur, Berglind Pétursdóttir , 36 ára sjónvarps- og auglýsingakona, kunn sem Berglind Festival, rannsóknarblaðamaður í Vikunni með Gísla Marteini, og Sigurður Már Jónsson , félagi minn í hlaðvarpinu Hluthafaspjall ritstjóranna.

Tímaritið Fjármál og ávöxtun kom út í síðasta mánuði og er gefið út af JGH-miðlum sem halda úti Grafarvogsvefnum Grafarvogur.net. HÉR ER HÆGT AÐ LESA BLAÐIÐ Á PDF-FORMI og h ér sem OPNUR.

Lóan komin í Geldinganesið. Kom óvenju snemma til landsins í ár, eða 7. mars

Wed, 08 Apr 2026 23:04:51 GMT

Það var ánægjuleg færsla sem Grafarvogsbúinn Björn Júlíus Grímsson setti inn á FB í gær um að hann hefði séð til lóu í Geldinganesi.

„Lóan er komin að kveða burt snjóinn, að kveða burt leiðindin, það getur hún,“ orti Páll Ólafsson.

Yfirleitt kemur lóan til landsins á bilinu 24. mars til 30. mars.

Í Morgunblaðinu segir að lóan hafi komið óvenju snemma í ár, eða 7. mars. sl. Segir ennfremurr að lóan hafi ekki komið til landsins svona snemma síðan árið 2012 þegar heyra mátti lóusöng óma um Eyrarbakka þann 5. mars það ár.

Vetrarstöðvar íslensku heiðlóunnar (Pluvialis apricaria) eru á Bretlandseyjum og á vesturströnd meginlands Evrópu, frá Jótlandi allt suður til Gíbraltar. Auk þess hefur merkt lóa endurheimst við strendur Marokkó, segir á Vísindavef Háskóla Íslands.

Talið er að lóan fljúgi á um 60 km hraða og það taki hana því um sólarhring að fljúga frá Skotlandi til Íslands sem eru um 1.100 km. - JGH

Lóan kom óvenju snemma til landsins í ár, eða 7. mars. Hún er komin í Geldinganesið blessunin.

Geldinganesið á páskadag. Farfuglarnir tínast til landsins hver af öðrum. Vonandi verður ekkert alvöru vorhret sem leikur fuglalífið grimmt í miðju varpi.

Snjóbræðsla í Grafarvogi á þremur sólarhringum - gengið hratt á skaflana

Wed, 08 Apr 2026 17:22:24 GMT

Það hefur gengið hratt á skaflana í hlýindum síðustu daga.

Þegar við vorum á ferð um Grafarvoginn eftir hádegi á sunnudag, páskadag, var sannarlega vetrarríki og gul viðvörun í kortunum fyrir annan í páskum.

Upphafsmyndin er tekin í Hamrahverfinu, Lokinhömrunum, með þriggja sólarhringa millibili. Búið að moka upp góðum skafli og útlit væri fyrir að ætti langt í land með að hverfa. Myndin í hringnum er tekin eftir hádegi í dag og skaflinn ekki svipur hjá sjón.

Þetta er fljótt að gerast þegar hlýindi bresta á; alvöru snjóbræðsla. - JGH

Kl. 14:35 á sunnudag, 5. apríl. Fyrir neðan verslunarmiðstöðina Torgið, Hverafold 1.

Kl. 15:39 í dag, 8. apríl. Fyrir neðan verslunarmiðstöðina Torgið, Hverafold 1.

Í Lokinhömrum. Horft niður Gerðhamrana eftir hádegi á sunnudag, páskadag, 5. apríl.

Í Lokinhömrum eftir hádegi í dag, miðvikudaginn 8. apríl.

Hér eru málshættirnir sem komu úr eggjunum í veislu páskadagsins. „Auðs aflar iðin hönd.“

Mon, 06 Apr 2026 15:39:02 GMT

Ef það er eitthvað eitt sem gerir páskaeggin spennandi - fyrir utan súkkulaðibragðið gamla góða - þá eru það málshættirnir. Í mörgum veislum á páskadag þar sem páskalambið setur svip sinn á matseðilinn hefur færst í vöxt að gestir fái smáegg og lítill gestaleikur í kjölfarið þar sem hver og einn les sinn málshátt.

Við vorum þrettán talsins í páskaboði okkar í Grafarvoginum á páskadag og þessir ágætu málshættir komu upp úr eggjunum og vöktu gleði og kátínu þegar þeir voru lesnir upp:

Jöfnum þykir best saman að búa.
Eigi veldur sá er varar annan.
Sá einn veit sem reynir.
Betur duga tveir fuglar til hreiðurs en einn.
Daunill eru digurmælin.
Vandratað er meðalhófið.
Auðs aflar iðin hönd.
Sá er sæll er sínu ann.
Kulnar eldur nema kyntur sé.
Þangað kemur kötturinn sem honum er klórað.
Enginn getur þjónað tveimur herrum.
Kólnar heitt ef köldu er á blásið.
Framkvæmd fylgir frami og gæfa.

Það var ánægjulegt að enginn fékk sama málsháttinn en það var í fyrsta sinn sem það gerist í páskaboði fjölskyldunnar. - JGH

Málshættir úr eggjunum eru auðvitað hluti af páskahátíðinni.

Stutt í borðhald, páskalamb og smáeggin. Guli liturinn er áberandi um páskana á öllum heimilum.

Sagan af krossinum - snjöll hugmynd séra Vigfúsar Þórs

Mon, 06 Apr 2026 13:24:36 GMT

Séra Vigfús Þór Árnason, fyrsti sóknarprestur okkar Grafarvogsbúa, hefði orðið áttræður í dag, 6. apríl. Hann andaðist á Landspítalanum 27. febrúar á síðasta ári.

Þau hjón Elín Pálsdóttir og séra Vigfús voru mjög samrýmd og byggðu upp söfnuðinnn í Grafarvogi af mikilli eljusemi.

Séra Vigfús var sóknarprestur en í senn mikill framkvæmdamaður, fékk oft snjallar hugmyndir og kom þeim í verk.

Sagan af krossinum við Grafarvogskirkju er gott dæmi þar um. Fljótlega eftir að söfnuðurinn fékk lóðina við Fjörgyn var það eitt af fyrstu verkum hans að fá aflagðan rafmagnsstaur sem var fyrir botni Grafarvogs og gera að krossi við Grafarvogskirkju.

Það var Ingjaldur Eiðsson sóknarnefndarmaður sem tók að sér að laga rafmagnsstaurinn til og koma honum fyrir á kirkjulóðinni þar sem hann stendur enn. Fallegur og virðulegur kross.

Við krossinn hafa oft á tíðum verið helgistundir og guðsþjónustur - þegar viðrað hefur til þess.

Rafmagnsstaurinn hafði áður það verkefni að flytja birtu í lífið, einmitt eins og kristin trú snýst um.

Þetta var snjöll og góð hugmynd hjá séra Vigfúsi.

Blessuð sé minning hans og þeirra hjóna en Elín lést í ágúst sl., aðeins rúmu hálfu ári eftir að hún syrgði heittelskaðan eiginmann sinn. - JGH

Krossinn sómir sér vel við hliðina á Grafarvogskirkju og vekur athygli allra sem ganga á göngustígnum fyrir neðan kirkjuna.

Séra Vigfús Þór með útimessu. Hann var í senn mikill framkvæmdamaður og kom hlutum í verk - líkt og þessi litla saga um það þegar hann gerði gamlan rafmagnsstaur að krossi á lóð kirkjunnar áður en hún var reist. Helgur reitur.

Kirkjan í byggingu og krossinn tákn um helgan stað. Vinna við byggingu kirkjunnar hófst árið 1991.

Úr bókinni Grafarvogssókn 25 ára. sem Sigmundur Ó. Steinarsson skráði. Hér er m.a. mynd af því þegar rafmagnsstaurinn var tekinn upp með krana og fluttur á lóð Grafarvogskirkju.

Frá vígsluveislunni í Grafarvogskirkju 18. júní árið 2000. Frá vinstri: Biskupshjónin frú Kristín Þórdís Guðjónsdóttir og herra Karl Sigurbjörnsson, biskup Íslands, og sóknarprestshjónin, frú Elín Pálsdóttir og séra Vigfús Þór Árnason.

Krossinn er bæði látlaus og virðulegur - og á sér góða sögu.

Gleðilega páska!

Sun, 05 Apr 2026 15:18:10 GMT

Grafarvogur.net óskar lesendum sínum gleðilegra páska og áréttar þakklæti sitt fyrir frábærar viðtökur frá því vefurinn fór í loftið fyrir rúmi ári.

Á föstudeginum langa minnast kristnir menn krossfestingar Jesú Krists en á páskadegi upprisu hans.

Jesús var handtekinn og krossfestur á síðasta föstudegi fyrir páska en Gyðingar héldu páskahátíð löngu fyrir fæðingu frelsarans.

Á vísindavef Háskóla Íslands segir : „Páskar Gyðinga eru svokölluð föst hátíð sem alltaf er haldin á sérstökum mánaðardegi samkvæmt tímatali Gyðinga.

Kristnir menn minntust hins vegar upprisu Krists, það er páskadagsins, ætíð á sunnudegi og miðuðu hátíðina við fyrsta sunnudag eftir fyrsta fulla tungl eftir jafndægur á vori. Páskarnir urðu því svokölluð færanleg hátíð.“

Það verða víða veislur í dag þar sem fjölskyldur koma saman og páskalambið gamla góða prýðir væntanlega borðhaldið á flestum heimilum. - JGH

Það verða að víða veislur í dag þar sem fjölskyldur koma saman og páskalambið gamla góða prýðir væntanlega borðhaldið á flestum heimilum.

Páskaeggin eru alls konar - það þarf ekki alltaf súkkulaði til.

Það gekk vel á birgðirnar af páskaeggjum í Bónus og Hagkaup

Sat, 04 Apr 2026 16:40:48 GMT

Það hafði gengið vel á birgðirnar af páskaeggjunum í Bónus og Hagkaup þegar við áttum þar leið um á laugardagskvöld.

Stæðurnar af páskaeggjum sem hafa sett svip sinn á þessar verslanir undanfarnar vikur svo til horfnar og bara komið dágott autt rými fyrir vikið.

Það er ekkert smá magn af páskaeggjum sem landinn brýtur og bragðar á. - JGH

Í Hagkaup á laugardagskvöld fyrir páskadag. Jú, jú, hægt að bjarga sér um nokkur egg en stæðurnar meira og minna horfnar.

Hagkaup á laugardagskvöld. Það er ekki mikill afgangur hér.

Nánast allt búið og önnur stæðan þess utan meira og minna tóm.

Ekki er allt sem sýnist - hér er holur veggur í síðustu stæðunni í Bónus.

Í Bónus í Grafarvogi hefur varla verið hægt að þverfóta fyrir stórum og miklum páskaeggjastæðum undanfarnar vikur. En nægt var olnbogarýmið um kvöldmatarleytið á laugardagskvöld fyrir páskadag.

Miðbæjarrölt og brölt á föstudeginum langa

Fri, 03 Apr 2026 17:57:49 GMT

Það var veðrið til þess að gera sér bæjarferð eftir hádegi í dag, föstudaginn langa, og rölta og brölta um miðbæinn. Ef til vill of mikið sagt að brölta því við hreyfðum okkur ekki mjög klunnalega. Maður bröltir hins vegar stundum á fætur.

Hvað um það, miðbærinn skartaði sínu fegursta í sólskininu og sólbráðin var áberandi á þessum þriðja degi apríl þar sem svolítið vetrarríki setur enn svip sinn á bæinn.

Við birtum hér smá syrpu af gönguferðinni. - JGH

Styttan af Kristjáni 9 með stjórnarskrána sem við Íslendingar fengum frá Danakonungi árið 1874 án þess að við Íslendingar kæmum að gerð hennar. Núna er mikil umræða um ESB og stjórnarskrá Íslands.

Hinn 1. febrúar 1904 fengu Íslendingar heimastjórn. Þingræði var fest í sessi og Stjórnarráð Íslands stofnað. Hannes Hafstein var fyrsti ráðherra Íslendinga. Ráðherrann.

Styttan af Hannesi Hafstein fyrir utan stjórnarráðið.

Hér var þjóðfundurinn 1851 haldinn. „Vér mótmælum allir.“

Mikið var nú ánægjulegt að Torfusamtökin hafi bjargað þessari húsaröð frá niðurrifi; Bernhöftstorfunni.

Torfan.

Að sjálfsögðu er Torfan græn.

Frá Torfunni að Tjörninni.

Tjörn og Tjarnargata.

Húsið við Fríkirkjuveg 11 var byggt árið 1908 af Thor Jensen.

Skrifstofa embættis forseta Íslands.

Hér er góður hljómur.

Mest myndaða bygging á Íslandi.

Þrenn listaverk. Hnitbjörg, hús Einars Jónssonar er auðvitað listaverk út af fyrir sig.

Svolítið gluggaveður. Auðvitað þurfti að klæða sig vel á bæjarröltinu. Helga Brynleifsdóttir, annar eigenda Grafarvogur.net.

Frakkaklæddur Kristján níundi með fyrstu stjórnarskrána.

Myndir frá Gethsemane garðinum í Jerúsalem þar sem Jesús var handtekinn

Fri, 03 Apr 2026 13:34:41 GMT

Föstudagurinn langi er mesti sorgardagur kirkjuársins og þennan dag minnast kristnir menn krossfestingar Jesú Krists. Í tilefni þess birti ég hér nokkrar myndir úr Gethsemane-garðinum í Jerúsalem - þar sem Jesús var handtekinn - en þessar myndir tók ég á ferðalagi í Ísrael snemma árs árið 2019 en úr þeirri ferð varð til heimildarmyndin Á biblíuslóðum sem sýnd var á sjónvarpsstöðinni Hringbraut um jólin það ár. Uppistaðan í þeirri mynd er viðtal við svila minn, Gunnlaug A. Jónsson, fyrrum prófessor í guðfræði, og myndir úr ferðinni sem var fimm daga fjölskylduferð þar sem við nutum leiðsagnar Gunnlaugs sem var í rannsóknarleyfi í borginni á þessum tíma.

Passíusálmar Hallgríms Péturssonar, sem eru um píslarsöguna, pínu og dauða Jesú Krists, hafa um árabil verið lesnir upp í nokkrum kirkjum landsins á þessum degi.

Eftir síðustu kvöldmáltíðina (að kvöldi skírdags) fóru Jesús og lærisveinar hans yfir Kidron-dalinn í aldingarðinn Gethsemane undir vesturhlíð Ólífufjallsins. Þetta er aldingarður af fornum ólífutrjám. En nafnið Gethsemane þýðir „ólífupressa“.

Jesús eyddi síðustu stundum lífs síns með postulunum í Gethsemane-garðinum. Þar upplifði hann angist sína og bjó sig undir það sem koma hlaut en hann vissi hvað var í vændum.

Trén í garðinum eru þeirrar gerðar að þau verða allt að tvö þúsund ára gömul. Við hlið aldingarðsins er afar falleg kirkja sem nefnd hefur verið ýmist Kirkja allra þjóða eða Kirkja angistarinnar með vísan til angistar Jesú.

Heimildir herma að Júdas hafi hengt sig í þessum garði fullur iðrunnar eftir að hafa svikið Jesú. - JGH

Nafnið Gethsemane þýðir „ólífupressa“. Í miðjum aldingarðinum var tæki sem notað var til að kreista ólífurnar þar til þær gáfu dýrmætu olíuna. Grunnur ólífupressunnar er risastór steinskál lengst til hægri á myndinni. Gífurlegur myllusteinn passar í þá skál.

Til eru frásagnir af því að Jesús og postularnir hafi oft lagt leið sína í Gethsemane-garðinn. Trén í garðinum eru þeirrar gerðar að þau verða allt að tvö þúsund ára gömul.

Í þessum garði eyddi Jesús síðustu stundum sínum og hér var hann handtekinn.

Gethsemane aldingarðurinn er undir vesturhlíð Ólífufjallsins.

Hér er horft í átt í Ólífufjallsins af efstu hæð Davíðssafnsins. Moskan með gyllta þakinu fyrir miðri mynd er Musterishæðin eða Al Aksa moskann sem er moska múslima innan gömlu borgarmúranna í Jerúsalem og undir stjórn múslima. Al Aksa þýðir „fjarlægur staður“ og vísar til landfræðilegrar staðsetningar langt frá Mekka. Iðulega er vísað til Al Aksa sem þriðja helgasta stað Íslam, á eftir Mekka og Medína.

Horft yfir Jerúsalem frá Ólífufjallinu en fjallið er kunnur útsýnisstaður ferðamanna.

Við hliðina á Gethsemane-garðinum er afar falleg kirkja sem ýmist er nefnd Kirkja allra þjóða eða Kirkja angistarinnar. Hér er altaristaflan í þeirri mögnuðu kirkju.

Heimildarmyndina Á biblíuslóðum gerði ég á árinu 2019 og sýndi á sjónvarpsstöðinni Hringbraut um jólin það ár. Í myndinni ræði ég við Gunnlaug A. Jónsson, fyrrum prófessor í guðfræði við HÍ, sem er svili minn og við fjölskyldan ferðuðumst með um landið á meðan á dvöl okkar stóð og ég sankaði að mér efni. Hér er horft yfir Jerúsalem frá vesturhlið Ólífufjallsins.

Gunnlaugur A. Jónsson, fyrrum prófessor i guðfræði við Háskóla Íslands, fyrir utan þekkta bóka- og gjafavöruverslun sem er gegnt Davíðssafninu í Jerúsalem.

Á efstu hæð Davíðssafnsins sem er innan gömlu borgarmúranna í Jerúsalem. Eðli málsins samkvæmt liggja ferðlög til Ísraels núna niðri en flugfélagið WOW flaug beint til borgarinnar um tíma.

Gethsemane-garðurinn.

Horft frá Masada-virkinu yfir Dauðahafið sem liggur að landamærum Jórdaníu.

Að kvöldi skírdags í Grafarvogi - fallegt sólarlag

Thu, 02 Apr 2026 21:02:03 GMT

Það var ekkert annað að gera en stöðva bílinn í kvöld og mynda þetta fallega sólarlag að kvöldi skírdags.

Helgir dagar eru núna í dymbilvikunni.

Pálmasunnudagur var sl. sunnudag en hann er haldinn til minningar um innreið Jesú í Jerúsalem.

Það var svo að kvöldi skírdags sem Jesús átti síðustu kvöldmáltíðina með lærisveinum sínum og hafa nokkrar sóknir þann sið að vera með heilaga kvöldmáltíð í kirkjum þetta kvöld.

Meðfylgjandi mynd var tekin kl. 20:12 í kvöld og horft yfir Sorpu og gömlu skrifstofubyggingu Áburðarverksmiðjunnar í Gufunesi að höfninni og að sólarlaginu við sjóndeildarhringinn. - JGH

Sólarlag við sjóndeildarhring.

Gylltir geislar baða sjóinn.

Sjómennskan beint í æð - kraftmikil og tignarleg sýn við Miðbakkann. Bláir Brimarar

Wed, 01 Apr 2026 15:36:20 GMT

Stundum er það svo að maður fær atvinnulífið beint í fangið - svo um munar. Þannig var það þegar farið var um Geirsgötuna eftir hádegi í gær. Þarna blasti sjómennskan og útvegurinn við í allri sinni dýrð.

Tignarleg og kraftmikil sýn á Miðbakkanum við Reykjavíkurhöfn; bláir Brimarar.

Brimarar? Jú, þessir fallegu togarar eru í flota Brims; Venus og Víkingur, og voru í höfn.

Vörumerki Brims eru fallegar hvítar öldur sem liðast um á bláum grunni.

Liturinn fer þessum skipum vel. Falleg fley; bláir Brimarar. - JGH

Miðbakkinn við Reykjavíkurhöfn. Sjómennskan beint í æð.

Falleg fley, Víkingur og Venus, og eru í eigu Brims.

Tignarleg og kraftmikil sýn; bláir Brimarar.

Þú tryggir ekki eftir á - Hermann Björnsson, forstjóri Sjóvá, gestur okkar í Hluthafaspjallinu

Wed, 01 Apr 2026 10:58:24 GMT

Hann er að venju stútfullur af efni nýjasti þáttur okkar félaganna Sigurðar Más Jónssonar í Hluthafaspjalli ritstjóranna sem sýndur er á efnisveitunni Brotkast.is og er hér að finna í opinni dagskrá . Við tókum þáttinn um sl. föstudag og fengum góðan gest til okkar, Hermann Björnsson, forstjóra Sjóvá.

Jafna byrjum við félagarnir bara tveir og förum yfir það helsta sem er að gerast í Kauphöllinni hverju sinni. Úrvalsvísitalan hefur gefið töluvert eftir undanfarnar vikur og kemur þar margt til; verðbólgan er að fara úr böndum, stýrivextir hafa verið hækkaðir og bjartsýni stjórnenda hefur minnkað með hækkunum skatta og ýmissa gjalda hjá opinberum fyrirtækjum. Við félagarnir ræddum sérstaklega Alvotech og stöðuna þar á bæ en Viðskiptablaðið er með mjög athyglisverða úttekt á fyrirtækinu og viðtal við Róbert Wessman, stjórnarformann þess.

Það muna margir eftir slagorði Sjóvá sem sló í gegn fyrir nokkru síðan - Þú tryggir ekki eftir á . Við ræðum m.a. þetta fína slagorð við Hermann en komið er mjög víða við í samtalinu við hann:

Hver er galdurinn á bak við áranguri fyrirtækisins í Íslensku ánægjuvoginni?
Slagorðið fræga - Þú tryggir ekki eftir á!
Hvernig er tjónauppgjörum háttað hjá fyrirtækinu?
Hvernig er að keppa við ríkis-tryggingafélag?
Hver er fjárfestingarstefna félagsins?
Sjóvá núna og fyrir 15 árum þegar Hermann varð forstjóri?
Tryggingasvik að verða tíðari.
Betri forvarnir í bílum - en tæknin í bílum kostar.
Færri tjón bíla en hvert tjórn mun dýrara?
Tengslin við viðskiptavinina.
Hversu vel eru Íslendingar tryggðir?
Erlendir ferðamenn á bílaleigubílum?
Er viðhaldslítið vegakerfi farið að segja til sín?
Hvað getum við lært af Dönum í tryggingum og bótamálum?

Líflegt spjall og mjög fróðlegt en Hermann mikill reynslubolti á tryggingasviðinu. - JGH

Létt að venju yfir mönnum í Hluthafasjalli ritstjóranna en gestur okkar Sigurðar Más að þessu sinni er Hermann Björnsson, forstjóri Sjóvá.

Mjög fjölbreytt dagskrá í kirkjunni - fermingar, heilög kvöldmáltíð, helgistund við krossinn og páskamessan kl. 8 að morgni páskadags

Wed, 01 Apr 2026 09:36:07 GMT

Það er vert að vekja athygli á mjög fjölbreyttri dagskrá í Grafarvogskirkju núna í dymbilvikunni og um páskana.

Má þar nefna fermingar, heilaga kvöldmáltíð, helgistund við krossinn og söng kórsins á lögum úr söngleiknum Jesus Christ Superstar. Hátíðarmessan verður svo kl. 8:00 að morgni á páskadag, eftir það páskamessa á Eir og Selmessa með upprisuívafi í Borgum kl. 13:00 á páskadag.

Fermingarmessurnar á morgun , skírdag, eru kl. 11:00 og 13:30 en sóknin okkar í Grafarvogi er sú stærsta á landinu og fjölmörg börn sem fermast í kirkjunni á ári hverju.

Annað kvöld verður svo heilög kvöldmáltíð í kirkjunni og hún hefst kl. 20:00.

Á föstudaginn langa verður helgistund við krossinn og þá mun kórinn syngja valda kafla úr söngleiknum Jesus Christ Superstar.

Páskamessan verður svo að venju kl. 8:00 að morgni en hún hefur jafnan verið vel sótt.

Helgir dagar framundan og starfið í okkar fallegu kirkju fjölbreytt og til fyrirmyndar. - JGH

Grafarvogssókn er stærsta sókn landsins og þau eru fjölmörg börnin í Grafarvogi sem krjúpa við altarið og fermast í ár - líkt og jafnan áður.

Séra Arna Ýrr Sigurðardóttir, sóknarprestur í Grafarvogi.

Til stendur að hækka sértæka bankaskatta um 6 milljarða - eða úr 18 í yfir 24 milljarða - en almenningur á 80% bankakerfisins

Tue, 31 Mar 2026 16:08:12 GMT

Daði Már Kristófersson fjármálaráðherra kynnti á dögunum nýja fjármálaáætlun sem gerir ráð fyrir að sértækur bankaskattur hækki um 6 milljarða á ári. Sértækir bankaskattar eru núna rúmir 18 milljarðar og fara því í 24 milljarða króna við þessa breytingu. Þetta eru skattar sem einvörðungu eru lagðir á bankana og eru því umfram það sem lagt er á önnur fyrirtæki í landinu.

Bankastjórar bæði Íslandsbanka og Arion banka, þeir J ón Guðni Ómarsson og Benedikt Gíslason , hafa báðir sagt þessa hækkun koma á óvart og að hún muni lenda bæði á hluthöfum bankanna og viðskiptavinum enda sé líklegt að vaxtamunur aukist á ný. ( Sjá grein Benedikts Gíslasonar. )

Viðtalið við Heiðrúnu Jónsdóttur í blaðinu Fjármál og ávöxtun. Sjá hér.

Í blaðinu Fjármál og ávöxtun , sem nýlega kom út, er viðtal við Heiðrúnu Jónsdóttur, framkvæmdastjóra Samtaka fjármálafyrirtækja , og þar kemur fram að 80% bankakerfisins sé í eigu almennings.

Lífeyrissjóðirnir eru stærstu eigendur Íslandsbanka, Arion banka og Kviku en hlutafjáreign einstaklinga í bönkunum hefur ennfremur aukist. Ríkið á yfir 98% í Landsbankanum og stefnir að því að eignast þessi 2% á næstunni.

Eigið fé bankanna fjögurra er 855 milljarðar kr. og heildareignir þeirra, efnahagsreikningurinn, er um 6.150 milljarðar króna.

Þess má geta að heildareignir lífeyrissjóðanna eru um 9.000 milljarðar kr.

Einstaklingar eiga 1.800 milljarða króna í innstæðum í bönkunum og yfir 700 milljarða króna í verðbréfum eða samtals um 2.500 milljarða króna í svonefndum frjálsum sparnaði. - JGH

Eigið fé bankanna er um 855 milljarðar króna. Það þarf mikla vinnu til að ná arðsemi af svo hárri fjárhæð.

Heiðrún segir að um 100 milljarðar hafi runnið til lífeyrissjóða, einstaklinga, lífeyrissjóða og ríkissjóðs á síðasta ári.

Daði Már Kristófersson fjármálaráðherra.

Dagur Ragnarsson Fjölni efstur Íslendinga á Reykjavik Open 2026 í Hörpu fyrir lokadaginn

Mon, 30 Mar 2026 22:10:28 GMT

Dagur Ragnarsson , skákmaður Fjölnis 2025 og 2026, er nú orðinn efstur Íslendinga á Reykjavik Open 2026 í Hörpu. Þetta kemur fram hjá Helga Árnasyni, formanni skákdeildar Fjölnis, á FB-síðu hans fyrr í kvöld.

„Dagur (2.376 Elo stig) er kominn með 6 vinninga af 8 mögulegum eftir að hafa lagt Kazakann og stórmeistarann Alisher Suleymenov (2.523 Elo stig) að velli í næstsíðustu umferð mótsins. Aldeilis vel gert hjá Degi.

Andstæðingurinn Suleymenov Alisher er hvað þekktastur fyrir að hafa unnið Magnus Carlsen nýlega í eftirminnilegri skák.

Koma svo Dagur í lokaumferð mótsins sem tefld verður á morgun, þriðjudag 31. mars,“ segir Helgi Árnason í FB-færslu sinni fyrr í kvöld.

Svo sannarlega glæsilegur árangur hjá þessum öfluga skákmanni okkar Grafarvogsbúa. - JGH

Dagur Ragnarsson, skákmaður Fjölnis 2025 og 2026. Hann er efstur Íslendinga á mótinu fyrir lokaumferðina.

Pálmasunnudagur í dag - innreið Jesú í Jerúsalem. Hvers vegna nefnist þessi vika dymbilvika?

Sun, 29 Mar 2026 13:51:23 GMT

Pálmasunnudagur er í dag og markar upphaf dymbilviku. Pálmasunndudagur er ævinlega sunnudagurinn á undan páskadegi og er haldinn til minningar um innreið Jesú í Jerúsalem. Víða á heimilum eru settar upp páskaskreytingar á pálmasunnudegi í tilefni af upphafi dymbilvikunnar og páskahátíðarinnar.

Pálmasunnudagur er haldinn til minningar um innreið Jesú í Jerúsalem. Sagt er frá þeim atburði í Jóhannesarguðspjalli 12;12-16: „Degi síðar frétti hinn mikli mannfjöldi, sem kominn var til hátíðarinnar, að Jesús væri að koma til Jerúsalem. Fólk tók þá pálmagreinar, fór út á móti honum og hrópaði: „Hósanna!

Blessaður sé sá sem kemur í nafni Drottins,

konungur Ísraels!“

Pálmasunnudagur miðast við páskadag en hann hefur allt frá árinu 325 borið upp á fyrsta sunnudegi eftir fyrsta fulla tungl eftir jafndægri á vori.

Dymbilvikan dregur nafn sitt af áhaldi er nefnist dymbill. Það var notað í kaþólskum sið til að hljóðið yrði drungalegra og sorglegra þegar hringt var til guðsþjónustu á þessum síðustu dögum föstunnar. - JGH

Í hugum flestra er páskaliturinn gulur. Litur páskanna er hins vegar hvítur, litur gleðinnar, en bjarti guli liturinn minnir á upprisusólina sem dansar á páskadagsmorgun.

„Til er helgisögn sem segir að eitt sinn hafi páskaliljurnar verið hvítar. En þegar sól reis á páskamorgni og Jesús var ekki í gröfinni, því að hann var upprisinn frá dauðum, þá var birta sólarinnar svo gullin af fögnuði að páskaliljurnar urðu gular,“ segir á Vísindavef Háskóla Íslands.

Hríðarveður undir kvöldmat og víða varð mjög illfært í Grafarvogi

Sat, 28 Mar 2026 14:35:11 GMT

Veðrið er fljótt að breytast. Eftir þokkalegt veður fyrri hluta dags í dag gerði síðdegis verulegt hríðarkóf og undir kvöldmat, þegar þessi mynd var tekin, var víða orði illfært í Grafarvogi.

Myndin er tekin við hin umtöluð gatnamót við Strandveg, Gufunesveg og Rimaflöt.

Rautt ljós þegar ekið var úr norðri og gatnamótin auð í óþarflega langan tíma eftir að tveir bílar úr suðri höfðu farið yfir þau, annar inn á Rimaflöt og hinn inn á Gufunesveginn.

Kvartað hefur verið yfir því að óþarflega miklar tafir verði við þessi gatnamót þar sem umferðin úr norðri og suðri eftir Strandveginum flýtur ekki yfir þau á sama tíma. - JGH

Tveir bílar úr suðri búnir að fara yfir gatnamótin við Strandveg, Gufunesveg og Rimaflöt í kófinu. Eftir það tók talsverð bið á rauðu þegar engin umferð var yfir gatnamótin.

Óþarflega löng bið á rauðu þegar tveir bílar úr suðri voru „löngu búnir“ að tæma gatanmótin. Sitt sýnis hverjum um þessi gatnamót og til hvaða úrræða eigi að grípa til að liðka til fyrir umferð um þau.

Mottumars og skeggkeppnin að baki. Björgvin Ingi og Olís-motturnar sigruðu

Fri, 27 Mar 2026 21:39:31 GMT

Mottumars er að baki og úrslit í skeggkeppninni voru tilkynnt fyrr í dag, föstudaginn 27. mars. Mottumars hefur fyrir löngu öðlast sinn fasta sess og það er jafnan ánægjulegt að sjá hvernig fyrirtækið Landsnet styður við bakið og kynnir þetta verkefni á áberandi hátt á húsakynnum sínum við Gylfaflöt.

Það var Björgvin Ingi Ólafsson sem var hlutskarpastur í skeggkeppni einstaklinga og Olís-motturnar sigruðu liðakeppnina en úrslitin voru kynnt fyrr í dag.

Hátt í 130 manns og 20 lið tóku þátt í Skeggkeppninni í ár og söfnuðust tæplega 5 milljónir króna.

Skeggkeppnin er fastur liður í Mottumars, árlegu árvekni- og fjáröflunarátaki Krabbameinsfélagsins, en þar geta einstaklingar og lið safnað safnað skeggi og áheitum til styrktar Krabbameinsfélagsins og lagt sitt af mörkum til að færri fái krabbamein, fleiri læknist, lifi lengi og líði betur. - JGH

Í einstaklingskeppninni varð Björgvin Ingi Ólafsson hlutskarpastur, fyrir miðju, Guðmundur Guðmundsson, til hægri, hreppti annað sætið og Ágúst Kristján Steinarsson það þriðja.

Hér eru alvöru mottur. Sigurvegarar í liðakeppninni voru Olís-motturnar, Torcargo snjallmottur urðu í öðru sæti og í því þriðja varð B-vakt Flugvallarþjónustu KEF.

Olís-motturnar sigruðu í liðakeppninni.

Það er alltaf jafn ánægjulegt að sjá hvernig fyrirtækið Landsnet kynnir og auglýsir mottumars á húsakynnum sínum við Gylfaflötina.

Kæru Grafarvogsbúar - hér er hægt að fletta blaðinu Fjármál og ávöxtun í fínni upplausn

Thu, 26 Mar 2026 18:56:44 GMT

Kæru Grafarvogsbúar. Gjörið svo vel! Frá útgáfu Grafarvogs.net. kemur þetta magnaða vaxtablað. Það er sneisafullt af margs konar fróðleik um fjármál og sparnað.

1) Hér er hægt að lesa blaðið í góðri upplausn. Opnur.

2) Hér er blaðið í heilsíðum.

Svo er hægt að hlusta á það þegar við félagarnir Sigurður Már Jónsson flettum blaðiðinu í hlaðvarpinu okkar Hluthafspjalli ritstjóranna og metum helstu niðurstöður í blaðinu. - JGH

3) Hér í vídeóinu ræði ég helstu niðurstöðurnar í Hluthafaspjalli ritstjóranna

Eins og í vegagerð úti á landi. Samgöngustjóri gaf í skyn að ljósin yrðu færð í fyrra horf

Wed, 25 Mar 2026 17:52:04 GMT

Umferðarmál hafa legið þungt á Grafarvogsbúum og ekki síst hefur sú breyting sem gerð var á umferðarljósunum á gatnamótum Strandvegar, Gufunesvegar og Rimaflatar valdið óánægju og umtal. Þar eru miklar tafir og virka ljósin eins og í vegagerð á sumrin úti á landi þar sem vinnu-umferðarljós eru sett upp og umferð úr gagnstæðri átt hleypt á víxl framhjá framkvæmdunum.

Breytingin sem borgin gerði við þessi umferðarljós var sú að umferð úr gagnstæðri átt rennur ekki samtímis yfir þau og fyrir vikið myndast oft teppur og gatnamótin gætu nýst miklu betur.

Þessi ljós fengu töluverða umfjöllun á íbúafundi Heiðu Bjargar Hilmisdóttur borgarstjóra í Grafarvoginum um miðjan febrúar sl.

SAMGÖNGUSTJÓRI STÉ Í PONTU

Þegar saumað var að borgarstjóra um þessi mál fékk hún Guðbjörgu Lilju Erlendsdóttir , verkfræðing og samgöngustjóra borgarinnar, upp í pontu til að fara yfir málin.

Samgöngustjóri sagðist vita af töfunum og óánægju Grafarvogsbúa með þessa breytingu á ljósunum og sagði meira að segja: „Nú, þessi breyting er greinilega ekki að virka.“

Ekki var hægt að skilja orð hennar öðru vísi en að þessi umferðarljós yrðu færð í fyrra horf en fundarmenn sögðu að þarna yrði að gera miklu meira og það strax, fara í alvöru framkvæmdir, gera beygjuvasa, jafnvel hringtorg; þ.e. allt til að liðka til fyrir umerðinni um þessi gatnamót.

Núna er einn og hálfur mánuður liðinn frá fundinum en ekkert bólar á breytingum og að ljósin séu komin í fyrra horf. - JGH

Fjölmenni var á íbúafundinum sem var haldinn á Bóksafni Grafarvogs. Hér er beðið eftir því að fundurinn hefjist.

Trausti Harðarson, íbúi í Grafarvogi, var einn margra á fundinum sem lét óánægju sína í ljós með umferðarljósin og lagði raunar til að samgöngustjóri myndi vinda sér í verkið sem fyrst eftir fundinn og láta breyta umferðarljósunum svo umferð verði greiðari um gatnamótin og þau afkasti meiri umferð á álagstímum. Samgöngustjóri gaf í skyn á fundinum að ljósin yrðu færð í fyrra horf.

Guðbjörg Lilja Erlendsdóttir, verkfræðingur og samgöngustjóri borgarinnar, sté í pontu á fundinum og fór yfir þær breytingar sem hefðu verið gerðar á umferðarljósunum við þessi gatnamót.

Ekki eins og Big Mac-vísitalan en það er komin Ein með öllu-vísitala á Bæjarins bestu

Tue, 24 Mar 2026 22:05:39 GMT

Hún er athyglisverð fréttin í Morgunblaði dagsins þar sem sagði frá verðhækkunum á pylsum hjá Bæjarins bestu frá nóvember 2020 og fylgdi línurit sem sýndi verð á einni með öllu á Bæjarins bestu. Komin Ein með öllu-vísitala á Mogga. Mjög skemmtileg frétt og minnir svolítið á fréttir af Big Mac-vísitölunni hjá tímaritinu The Economist þó ólíku sé saman að jafna.

EIN MEÐ ÖLLU: 880 KRÓNUR

„Í dag kostar pylsan á Bæjarins bestu 880 krónur og hefur hækkað um 19% á síðustu tveimur árum. Kók kostar 450 krónur og því er þjóðarrétturinn kominn upp í 1.330 krónur. Það er 200 krónum dýrara en fyrir tveimur árum,“ segir í frétt Moggans.

Á rúmum fimm árum hefur verðið hækkað um 76%. En til fróðleiks má geta að í 4% verðbólgu þá tvöfaldast verðlag (100%) á 18 árum.

TVÆR MEÐ ÖLLU OG KÓK: 1.690 KRÓNUR

Fram kemur í fréttinni að framkvæmdastjóri fyrirtækisins, Baldur Ingi Halldórsson , segi að launakostnaður hafi aukist fram úr hófi auk þess sem aðrar hækkanir bíti í. Hann bendi á að Bæjarins bestu bjóði upp á frábær tilboð og verðið sé umtalsvert lægra ef fólk nýtir sér þau. Þannig kosti tvær pylsur og kók 1.690 krónur og fjölskyldutilboð, sex pylsur og fjórir drykkir, 3.500 krónur.

„Stærsti þátturinn í þessu eru laun en hráefniskostnaður og opinber gjöld hafa líka hækkað. Heilbrigðiseftirlitið er til dæmis búið að þrefalda verð á stuttum tíma,“ segir Baldur Ingi.

Hin skemmtilega frétt Morgunblaðsins í dag þar sem fylgst er grannt með verðinu á Bæjarins bestu.

BIG MAC-VÍSITALAN

Fyrst við erum að nefna Big Mac-vísitöluna þá er rétt að rifja upp um hvers konar vísitölu þar er að ræða. Hún er gefin út af tímaritinu The Economist og er nýstárleg leið til að mæla hvort markaðsgengi gjaldmiðla mismunandi landa sé ofmetið eða vanmetið.

Hún gerir þetta með því að mæla hvern gjaldmiðil miðað við sameiginlegan staðal – Big Mac-hamborgarann sem McDonald's veitingastaðir um allan heim selja.

Tvisvar á ári breytir Economist meðalverði Big Mac í Bandaríkjadali á því gengi sem gildir á þeim tímapunkti. Þar sem Big Mac er fullkomlega stöðluð vara um allan heim er röksemdafærslan sú að hann ætti að hafa sama hlutfallslega verð í öllum löndum.

Mismunur á verði Big Mac, mælt í dollurum, endurspeglar því mismun á kaupmætti hvers gjaldmiðils og segir þannig til um kaupmátt innan hvers lands líka. - JGH

Það fór vel á því að Grafarvogsbúinn Pálína Guðjónsdóttir afhenti mér fyrsta eintakið

Tue, 24 Mar 2026 14:41:36 GMT

Það er alltaf stór stund og ánægjuleg að skjótast í prentsmiðjuna og ná í fyrstu eintökin af blöðum sem maður gefur út.

Og það fór sérlega vel á því að Grafarvogsbúinn Pálína Kristín Guðjónsdóttir í prentsmiðjunni hér í nágrenni okkar Grafarvogsbúa, Prentmeti Odda , afhenti mér fyrstu eintökin af blaðinu mínu Fjármál og ávöxtun sem hefur verið í dreifingu að undanförnu og fengið góðar viðtökur.

Þetta er blað sem ég gef út í samvinnu við Samtök sparifjáreigenda en þau kaupa ákveðinn fjölda eintaka af mér fyrir sína félagsmenn en annars er blaðið ókeypis og hægt að nálgast það hér:

Pálína er alin upp í Þykkvabænum og eins og svo margir aðrir sem flytjast til Reykjavíkur valdi hún að setjast að í Grafarvoginum. Sagði að hann væri sérstakur og hefði eitthvað mikið við sig og að tilfinningin væri sú að hverfið væri svolítið út af fyrir sig og það hentaði mörgum sem væru að flytjast til borgarinnar.

Þetta er svo sannarlega rétt en margir sem fæddir eru og uppaldir úti á landi hafa áður haft á orði að Grafarvogurinn hent þeim og að þar finni þeir sig vel. - JGH

Tímaritið Fjármál og ávöxtun 2026. Þetta er níunda árið sem ritið kemur út. Það gerir árlega könnun á ávöxtun allra innlánsreikninga og verðbréfasjóða á Íslandi. Sem og birtir það umfjöllun um Kauphöllina, fyrirtækin í henni, lífeyrissjóðina, stærð bankakerfisins og annan fróðleik um fjármál. Hér má sjá blaðið í heild sinni.

Grafarvogsbúarnir Jón G. Hauksson og Pálína Kristín Guðjónsdóttir við afhendingu fyrstu eintakanna í Prentmeti Odda. Gæðaprentun á blaðinu.

Rauðar tölur í Kauphöllinni en fiskurinn í hæstu hæðum - Ægir Páll gestur okkar Sigurðar Más

Mon, 23 Mar 2026 16:49:39 GMT

Það var fjörugt samtal við Ægi Pál Friðbertsson, forstjóra Ice Seafood, í nýjasta þætti okkar Sigurðar Más Jónssonar í hlaðvarpinu Hluthafaspjall ritstjóranna sem við tókum upp sl. föstudag og er sýndur á efnisveitunni Brotkast.is. Gestur okkar að þessu sinni var Ægir Páll Friðbertssson , forstjóri Ice Seafood. Þátturinn er hér öllum opinn og aðgengilegur:

SALA SÝNAR TIL SÍMANS ( 21:43 mín. )

Það var af ýmsu að taka í þættinum. Við tókum okkar spjall að venju í upphafi og ræddum Kauphöllina, tekjur fjölmiðlahluta Sýnar og söluna á visi.is , ja.is og útvarpsmiðlum Sýnar til Símans og veltum fyrir okkur verðinu. Við teljum að Síminn þurfi að fá jafnvel 500 milljóna króna hagnað á ári til að þessi kaup greiði sig upp á næstu tíu árum. Okkur finnst verðið, rúmir 5 milljarðar hátt - ekki síst í ljósi þess að núna er kaupendamarkaður í Kauphöllinni. Alvotech fékk sömuleiðis sína umfjöllun.

KRISTRÚN OG ESB ( 12:27 mín. -21:43 mín. )

Ég tók nokkurn snúning á Kristrúnu Frostadóttur forsætisráðherra og tel að hún hafi misst völdin til Þorgerðar Katrínar Gunnarsdóttur og Ingu Sælands og að hún sé algerlega undir hælnum á þeim. Að mínu mati er Kristrún of ung í þetta starf og það skal rifjað upp að hún hafði enga stjórnunarreynslu áður en hún settist í stól forsætisráðherra og það reynsluleysi hennar er orðið áberandi.

ÆGIR PÁLL FRIÐBERTSSON ( 25:54 mín. )

Þrátt fyrir að rauði liturinn hafi einkennt síðustu daga í Kauphöllinni þá eru góðu fréttirnar þær að verð á íslenskum fiski er í hæstum hæðum erlendis og þar vegur minna framboð úr Barentshafi, Smugunni, hvað mestu.

Stórskemmtilegt viðtal við Ægi Pál Friðbertsson, forstjóra Ice Seafood. - JGH

Ægir Páll Friðbertsson, forstjóri Ice Seafood, er hafsjór af fróðleik um íslenskan sjávarútveg og fer vel yfir stöðuna á erlendum mörkuðum um þessar mundir. Fiskurinn er í hæstu hæðum vegna minna framboðs erlendis frá, t.d. Barentshafi.

Kristrún Frostadóttir forsætisráðherra fékk sína umfjöllun í þættinum og þá sem stjórnandi og leiðtogi. Hún hafði enga stjórnunarreynslu áður en hún varð forsætisráðherra og það reynsluleysi er svo sannarlega farið að há henni og orðið áberandi í meira lagi. Hún sýnist ekkert hafa að gera í Þorgerði Katrínu Gunnarsdóttur og Ingu Sæland og vera undir hælnum á þeim.

Frísklegar umræður að venju í hlaðvarpsþætti okkar Sigurðar Más; Hluthafaspjalli ritstjóranna.

Vetrarríki í byrjun vors - rigning og hressilegur vindur undir lok vikunnar

Sun, 22 Mar 2026 20:00:32 GMT

Vorjafndægur var sl. föstudag og það verður að segjast eins og er að vorið byrjar með töluverðu vetrarríki um allt land. Það var svo sem ágætisveður á röltinu í dag en það hafa verið góðar og hressilegar hviður inn á milli.

Reyndar var búið að moka og salta hluta af göngustígum í Hamrahverfinu í dag - á sunnudegi - og var það hið besta mál. Það mættu vera kosningar oftar, hugsaði ég með mér þegar ég rölti sólbrædda göngustígana.

Ekki að það sé uppörvandi en vetur konungur verður áfram við völd áfram - þótt kjörtímabili hans ljúki jafnan á vorin. Hann sækir víst ekki völd sín til kjósenda á fjögurra ára fresti.

Hér á árum áður var oft snjór og vetrarríki fram í miðjan apríl.

En við erum orðin góðu vön - ekki satt? - JGH

Göngustígurinn - öðrum megin í Lokinhömrunum - mokaður og saltaður í sólbráðinni. Öðrum megin? Það var svo sem allt í lagi - þetta var nú einu sinni sunnudagur.

Á Strandvegi kl. 16:19 sl. föstudag. Vetur konungur sleppir ekki völdum sínum alveg strax. Það verður góð demba og rok þegar líður á vikuna.

Það var og! Hádegið á fimmtudag. Þetta heitir víst rigning og rok - ekki satt?

Óvænt útspil! Meirihlutinn leggur til að bílastæðum verði fjölgað við nýbyggingar. Vel í lagt, hálft stæði á íbúð

Sat, 21 Mar 2026 20:45:26 GMT

Frétt Vísis sl. fimmtudag vakti að vonum athygli. Meirihlutinn í borgarstjórn - sem hefur svo sannarlega hvatt til bíllauss lífsstíls og ekki sett bílastæði við nýbyggingar í forgang - kom með óvænt útspil í liðinni viku. Jú, að fjölga bílastæðum við nýbyggingar. Og það er vel í lagt hjá meirihlutanum í tillögunni - hálft stæði á íbúð! Takk fyrir.

Í frétt visir.is sagði: Bílastæðum við nýbyggingar í Reykjavík mun fjölga verði tillaga sem liggur fyrir umhverfis- og skipulagsráði borgarinnar samþykkt. Tillagan snýr að því að rýmka viðmið fyrir íbúðahúsnæði um allt að 0,5 bílastæði á íbúð og var til umræðu á fundi ráðsins í gær.“

Og svo kom þetta í fréttinni: „Ekki hefur verið tekin ákvörðun um hvort tillagan fái frekari framgang en verður væntanlega til frekari umræðu innan umhverfis- og skipulagsráðs á næstunni.

Svæðin sem þessi breytingartillaga nær til eru fyrir svæði 1 og 2 þegar kemur að fjölda bílastæða á íbúð. Svæði eitt nær yfir miðkjarna Reykjavíkur og svæði 2 nær yfir öll önnur svæði innan þéttbýlismarka sem ekki eru innan svæðis 1.“

Meðfylgjandi mynd fylgdi frétt Vísis og er tekin af Vilhelm Gunnarssyni ljósmyndara. - JGH

Kosningar í nánd og skyndilega hefur meirihlutinn fengið áhuga á að fjölga bílastæðum við nýbyggingar en fjöldi óseldra íbúða hefur hlaðist upp; meðal annars vegna fárra bílastæða við nýbyggingar. Og það er vel í lagt í tillögunni; hálft stæði á íbúð.

Vorjafndægur í dag í frekar hryssingslegu veðri - staðan er núna tólf-tólf

Fri, 20 Mar 2026 09:41:40 GMT

Það er vorjafndægur í dag og því má segja að staðan sé tólf klukkustundir í björtu gegn 12 rökkvuðum. Sólarupprás var kl. 7:28 í morgun og sólin sest kl. 19:43 í kvöld. Vorjafndægur er nákvæmlega kl. 14:43 í dag.

Birtan hefur snaraukist frá áramótum. 1. janúar var sólarupprás kl. 11:19 og sólsetur kl. 15:43. Í morgun var sólarupprás um fjórum klukkustundum fyrr, eða kl. 7:28.

Samkvæmt Íslenska almanakinu er jafndægur sú stund þegar sól er beint yfir miðbaug jarðar . Þetta gerist tvisvar á ári á vorjafndægri á tímabilinu 19.-21. mars og á haustjafndægri 21.-24. september.

Um þetta leyti er dagur og nótt álíka löng hvar sem er á jörðinni og af því er nafnið dregið. Breytileiki dagsetninganna stafar aðallega af hlaupárum.

ÁRSTÍÐASKIPTI

„Í mörgum fornum menningarsamfélögum var upphafsdagur ársins oft ýmist miðaður við vor- eða haustjafndægur sem og vetrar– eða sumarsólstöður enda marka þessi tímamót hvert fyrir sig ákveðin árstíðaskipti náttúrunnar svo eðlilegt var að miða við eitthvert þeirra.

Dæmi um notkun jafndægra sem árstíðaskipta hér á landi þá segir um vorið í Skáldskaparmálum Snorra-Eddu að það sé frá jafndægri að vori til Fardaga en þá taki við sumar til jafndægris á hausti.

Vorið nær því samkvæmt því frá 19. til 21 mars og fram að Fardögum sem voru á fimmtudegi í 7. viku sumars eða á bilinu 31. maí til 6. júní en þá hefst sumar sem endar á jafndægrum að hausti um 21.-24. september,“ segir í Íslenska almanakinu.

HÆNUFETIÐ SEM TEKUR Á STÖKK Í FEBRÚAR

1.janúar: Sólarupprás kl. 11:19 - sólsetur 15:43.

1.febrúar: Sólarupprás kl. 10:08 - sólsetur 17:15.

1.mars: Sólarupprás kl. 8:05 - sólsetur 18:46

20. mars: Sólarupprás kl. 7:28 - sólsetur 19:43.

Um þetta leyti er dagur og nótt álíka löng hvar sem er á jörðinni og af því er nafnið jafndægur dregið.

Mynd tekin fyrir rúmri viku, 11. mars kl. 19:52.

Ágæist skima. Annað sjónarhorn fyrir rúmri viku, 11. mars, kl. 19:52. Horft yfir Gufuneshverfið í átt að Akranesi og Akrafjalli.

Mynd tekin út um stofugluggann hjá mér í morgun kl. 8:05 þegar mikið kóf gekk yfir. Það er gul viðvörun yfir öllu landinu í dag.

Mánudagurinn 16. mars kl. 9:05 að morgni. Eitthvað annað en kl. 9:05 í byrjun janúar.

Fjallið með þúsund andlitin.

Hér má sjá stutta klippu þar sem Bolli Héðinsson varar við kaupaukum

Wed, 18 Mar 2026 15:46:18 GMT

Bolli Héðinsson, formaður Samtaka sparifjáreigenda og formaður bankaráðs Seðlabankans, var gestur okkar Sigurðar Más Jónssonar í hlaðvarpi okkar Hluthafaspjalli ritstjóranna á dögunum.

Við fengum hann í þáttinn vegna athyglisverðrar greinar sem hann skrifaði nýútkomið rit mitt, Fjármál og ávöxtun, þar sem hann varar við kaupaaukakerfum til lykilstjórnenda í fjármálafyrirtækjum sem og í skráðum fyrirtækjum.

Hann beinir orðum sínum sérstaklega til lífeyrissjóðanna sem eiga á milli 40 og 50% í mörgum skráðum fyrirtækjum á Íslandi og eru áberandi stórir í bönkunum.

Sjá má klippuna með Bolla hér:

Og hér má sjá allan þáttinn hjá okkur Sigurði Má en hann er jafnan að finna á efnisveitunni Brotkast.is - JGH

Bolli Héðinsson, formaður Samtaka sparifjáreigenda og formaður bankaráðs Seðlabankans, varar við kaupaukum til lykilstjórnenda og biður lífeyrissjóðina að hafa varann á sér í þeim efnum. Hér má sjá stutta klippu með Bolla.

Grein Bolla í ritinu Fjármál og ávöxtun þar sem hann varar við kaupaukum í fjármálageiranum og beinir spjótum sínum til lífeyrissjóðanna og biður þá að hafa varann á í þeim efnum. Hér má sjá allt blaðið.

Hulda Guðmunda hafði í nógu að snúast í gær í hlutverki páskakanínunnar

Mon, 16 Mar 2026 13:41:36 GMT

Grafarvogsbúinn Hulda Guðmunda Óskarsdóttir hafði í nógu að snúast í gær þegar hundruð Grafarvogsbúa og Árbæinga mættu í Gufunesið í árlega páskaeggjaleit sjálfstæðismanna í þessum hverfum. Hulda brá sér þar í hlutverk páskakanínunnar og stóð sig vel, glaðleg og glaðsinna og í miklu páskastuði þótt enn sé svolítið í páskana.

Þetta var ekki í fyrsta sinn sem hún bregður sér í þetta hlutverk á þessum skemmtilega viðburði.

Að sjálfsögðu var hún í miklu stuði þegar hún hitti þingkonuna og Grafarvogsbúann, Diljá Mist Einarsdóttur , sem mætti á svæðið með hundinn sinn hann Simba. Og hvuttinn sá er bangsalegur.

Hann tók svolítið í en í fang þeirra fór hann, blessaður karlinn, allt gert fyrir ljósmyndarann.

Simbi karlinn; algjör sómamaður en samt ekkert skyldur Simba sjómanni sem Haukur Mortens söng um. - JGH

Hér taka þær Hulda Guðmunda Óskarsdóttir og Diljá Mist Einarsdóttir Simba karlinn í fangið fyrir ljósmyndarann.

Jú, jú, Simbi var alveg til í að gjóa aðeins til ljósmyndarans...

...en samt ekki lengi.

Við Grafarvogsbúar getum verið stoltir af henni - til hamingju Emilía Embla Berglindardóttir

Mon, 16 Mar 2026 12:22:12 GMT

Við Grafarvogsbúar getum svo sannarlega verið stoltir af þessari afreksdömu, Emilíu Emblu B. Berglindardóttur , skákkonu Fjölnis 2025, en hún vann í gær titilinn Stúlknameistari Reykjavíkur 2026.

Til hamingju Emilía Embla og Skákdeild Fjölnis þar sem unnið er kraftmikið og einstakt starf undir handleiðslu Helga Árnasonar , fyrrum skólastjóra í Rimaskóla.

Fram kemur á FB-síðu Skákdeildar Fjölnis að Emilía hafi teflt í opnum flokki á Stúlkna-og drengjameistaramóti Reykjavíkur og átti að venju góðan dag við taflborðið og uppskar bikara og titilinn Stúlknameistari Reykjavíkur 2026.

Hún bætti 50 skákstigum við ELÓ-stigin sín.

Ekkert annað en stórkostlegt og til hamingju aftur. - JGH

Stúlknameistari Reykjavíkur 2026.

Mögnuð er hún að morgni mánudags - sem og aðra morgna

Mon, 16 Mar 2026 12:01:12 GMT

Hún er mögnuð Esjan á mánudagsmorgni - sem og aðra morgna. Mjög tilkomumikill kaldur skýjabólstur læddist yfir hana í morgun og faðmaði toppinn.

Blár himinninn hafði hlutverki að gegna og lét til sín taka sem leiktjald og eins konar „bakrödd“ í veðurtónum þessa fallega borgarfjalls.

Við skýjaglóparnir hrífumst jafnan þegar hún á í hlut og myndum hana ótt og títt í magnaðari sýn sterkra segulkrafta. - JGH

Aðdráttarafl. Sýn sem er eins konar segull.

Fallegt fjall norðan Alpa.

Það er smá spölur úr Grafarvoginum að Esjunni - þó ekki eftir þessum vegi sem liggur út í Geldinganes.

- Hvaða fjall er þetta? spurði maðurinn og benti á Esjuna. - Ég veit það ekki, en það er búið að vara þarna lengi, var svarað.

Mikið stuð í Gufunesi þegar leitað var að páskaeggjum, farið í húlakeppni og leikið sér í tækjunum

Sun, 15 Mar 2026 13:09:34 GMT

Það var líf og fjör í Gufunesi í morgun þegar sjálfstæðisfélögin í Grafarvogi og Árbænum buðu upp á páskaeggjaleit, húlakeppni, ratleik og kaffisopa. Útivera, smá stuð og sætindi á sunnudagsmorgni - það er í góðu lagi. Þarna iðaði allt af lífi og ungviðið skemmti sér svo sannarlega.

Páskakanínan faldi yfir eitt þúsund egg á nokkuð stóru svæði og er þess gætt að allir fái egg og enginn fari tómhentur heim.

Þegar Grafarvogur.net leit við var fjölmenni á svæðinu og frambjóðendur flokksins duglegir við að þjóna gestum.

Páskaeggjaleitin er haldin á hverju ári þannig að í sjálfu sér er hún ekki upphafið að kosningabaráttu flokksins - en auðvitað þjappar svona samvera fólki saman og skerpir á baráttuandanum á kosningaári.

En það er þó ekki tilgangurinn, þetta er fyrst og fremst gert til að skemmta krökkunum og ungviðinu og hafa gaman. Og það tókst svo sannarlega á leiksvæðinu við Gufunesbæinn í morgun.

Ánægjulegt hvað allir stöldruðu lengi við og hvað börnin nýttu sér svæðið til að leika sér. Góð útivera í leiðinni. - JGH

Hressir strákar sem sögðu að þarna væri egg á bak við fjalirnar. Það þurfti ísbrjót til að ná því.

Hér er hlegið dátt í vagninum.

Aðeins alvarlegri þegar þau stilltu sér upp.

Spennandi að fara í gegnum göngin.

Það þarf nú að prófa dæluna.

Það er bara heilmikið mál að halda á húlahringjunum.

Hér er klappað fyrir þessum snillingi.

Þessi komu úr Árbænum. Auður Jónsdóttir með dótturina Hörpu Hafþórsdóttur.

Líf og fjör og leikið sér.

Páskakanínan dreifði yfir 1 þúsund páskaeggjum í morgun. Það var Hulda Guðmunda Óskarsdóttir Grafarvogsbúi sem var í því hlutverki og hér er hún í miklu stuði með þingkonunni og Grafarvogsbúanum Diljá Mist Einarsdóttur. Þær eru hér með hvuttann hennar Diljár, hann Simba. Svolítið bangsalegur sá og þefaði ekki upp nein egg. Ekki nægilega sterkt lykt af þeim, sagði Simbi.

Efstu menn á lista sjálfstæðismanna létu sig að sjálfsögðu ekki vanta. Hér er Grafarvogsbúinn Sigrún Ásta Einarsdóttir með þeim Bjarna Guðjónssyni, í 2. sæti listans, og Hildi Björnsdóttur sem leiðir listann.

Hjónin Einar Friðriksson og Ragnhildur Alda María Vilhjálmsdóttir borgarfulltrúi með dótturina Ragnhildi Erlu Einarsdóttur.

Borgarfulltrúarnir Ragnhildur Alda María Vilhjálmsdóttir og Björn Gíslason, formaður Fylkis í Árbænum.

Þau sáu um kaffið og það var í nógu að snúast í uppáhellingunni. Þetta eru þau Guðrún Helga Theodórsdóttir, Árbænum, og Halldór Jón Theodórsson, frumbyggi í Grafarvogi. „Við erum ekki systkini en auðvitað flokkssystkini.“

Ekki bara páskaeggjaleit heldur góð útivera og skemmtun á sunnudagsmorgni í Grafarvogi.

Blöðrur í bláum lit - segir það sig ekki sjálft á þessum viðburði sjálfstæðismanna í Grafarvogi og Árbænum?

Mjög áhrifaríkt! Ungir sjálfstæðismenn stóðu heiðursvörð við útför Davíðs Oddssonar

Sat, 14 Mar 2026 17:26:41 GMT

Það var sérlega áhrifaríkt að sjá unga sjálfstæðismenn standa heiðursvörð með íslenska fánann við útför Davíðs Oddssonar sl. föstudag, 13. mars. Þeir fylgdust með útförinni á stórum skjá í kirkjunni og fylktu síðan liði, hver og einn með íslenska fánann, út á Eiríksgötuna til að standa þar heiðursvörð þegar ekið var með kistu Davíðs í Fossvogskirkjugarð. Vel gert og fylsta ástæða til að hrósa ungum sjálfstæðismönnum fyrir þennan virðingarvott við þennan áhrifamikla fyrrum leiðtoga flokksins sem gegndi á sarfsævi sinni stöðu borgarstjóra, forsætisráðherra, seðlabankastjóra og ritstjóra Morgunblaðsins. - JGH

Stóðu heiðursvörðinn við Eiríksgötuna; gegnt kirkjunni.

Fallegur dagur og ágætis veður þó oft sé hann napur á Skólavörðuholtinu.

Íslenski fáninn tignarlegur og áberandi.

Ungir sjálfstæðismenn fylgdust með útförinni á stórum skjá í kirkjunni.

Gengið fylktu liði úr kirkjunni að Eiríksgötu þar sem þau stilltu sér upp.

Vel gert og stórt hrós til ungra sjálfstæðismanna.

Heiðursvörður til að heiðra minningu Davíðs og votta honum virðingu sína. Ísland er land þitt, var spilað að athöfn lokinni í Hallgrímskirkju og átti það vel við.

Afbragðsgóð ræða séra Geirs Waage við útför Davíðs Oddssonar

Sat, 14 Mar 2026 16:53:29 GMT

Mörgum hefur orðið tíðrætt um afbragðsgóða ræðu séra Geirs Waage í minningarorðum hans við útför vinar síns Davíðs Oddssonar sl. föstudag frá Hallgrímskirkju. Kynni þeirra náðu allt aftur til menntaskólaáranna í MR.

Það var ekki aðeins ræðan sem hreif fólk heldur allt fas Geirs við útförina sem varð fyrir vikið allt í senn hátíðleg, virðuleg, höfðingleg, áhrifarík, falleg - en á sinn hátt látlaus.

Börn þeirra Geirs og Davíðs eru makar; þau Þorsteinn Davíðsson og Heiðrún Geirsdóttir. Þau eiga tvær dætur.

Ræða Geirs var nokkuð löng af minningarorðum að vera - og kom það í sjálfu sér ekki á óvart - en hún hélt athygli allra allan tímann fyrir það hversu innihaldsrík hún var, vel orðuð og flutt án allrar tilgerðar. (Sjá hér).

Stórt hrós til Geirs Waage. - JGH

Séra Geir Waage. Sjónvarpað var frá útförinni og var víða fylgst með henni á vinnustöðum og heimahúsum.

Útför Davíðs Oddssonar þótti í senn virðuleg, falleg og látlaus. Mörgum hefur orðið tíðrætt um hversu vel sr. Geir Waage fórst þetta úr hendi. (Mynd fengin á vef Vísis. Ljósm. Vilhelm)

Æsispennandi páskaeggjaleit við Gufunesbæ nk. sunnudag - yfir 1 þúsund egg í boði

Tue, 10 Mar 2026 16:58:54 GMT

Það verður heldur betur fjör við Gufunesbæinn í Grafarvogi nk. sunnudagsmorgun kl. 10:00 þegar æsispennandi páskaeggjaleit fer þar fram en um árlegan viðburð er að ræða af hálfu sjálfstæðismanna í Grafarvogi, Árbæ, Selási, Ártúni og Norðlingaholti.

Yfir 1 þúsund egg eru í boði og bíða þess að koma í leitirnar. Fyrir utan leitina að páskaeggjunum verður boðið upp á ratleik, húlakeppni og kaffi fyrir foreldra.

Eggjaleitin hefst kl. 10:00. Allir fá eitt súkkulaðiegg fyrir hvert fundið skrauteegg; hámark tvö egg á einstakling til að byrja með. Eggin verða falin nokkrum sinnum þannig að reynt er að tryggja að allir fái tækifæri til að fá egg.

Þessi páskaeggjaleit sjálfstæðismanna hefur notið mikilla vinsælda undanfarin ár og mikill fjöldi fólks mætt á svæðið til að taka þátt í stuði og smá sætindum í leiðinni.

Nú mæta allir í Gufunesbæin á sunnudagsmorgun ! - JGH

Þetta er ekki bara páskaeggjaleit heldur líka alvöru húlakeppni og ratleikur. Mynd frá keppninni í fyrra.

Páskaeggjaleit þar sem yfir 1 þúsund páskaegg eru í boði. Fjölmenni hefur jafnan verið á þessum skemmtilega árlega viðburði við Gufunesbæinn.

Nammi, namm. Smá stuð og sætindi.

Já, já, takk fyrir.

Páskakanínan verður á ferðinni í Gufunesi að vanda nk. sunnudagsmorgun og mun fela eggin á svæðinu.

Nú var það silfrið eftir tvö gullár - svakaleg keppni milli Eyjamanna og Grafarvogsbúa

Tue, 10 Mar 2026 16:04:02 GMT

Þær voru magnaðar lokamínúturnar í Íslandsmóti skákfélaga sem haldið var í Rimaskóla um helgina. Um 400 skákmenn mættu í Grafarvoginn og tóku þátt í mótinu. Þegar upp var staðið munaði aðeins einu stigi á Eyjamönnum og Grafarvogsbúum, A-sveit Fjölnis, í Úrvalsdeildinni. Þessi tvö skáklið háðu afar spennandi keppni í síðustu umferð mótsins. Taflfélag Vestmannaeyja hlaut 16 stig gegn 15 Fjölnismanna. Minni gat munurinn ekki orðið og vannst sigurskákin á lokamínútunum í lokaumferðinni. Silfrið fór í Grafarvoginn, gullið til Eyja. Hvílík spenna og loftið rafmagnað.

A-sveit Fjölnis er firnasterk og hampaði Íslandsmeistaratitli skákfélaga bæði árin 2024 og 2025. Hún átti því titil að verja fyrir þetta mót. Í Úrvalsdeildinni keppa sex bestu skáksveitir landsins.

„Vestmanneyingar fögnuðu sínum fyrsta Íslandsmeistaratitli á 100 ára afmæli taflfélagsins og gátum við Fjölnismenn vel unnt þeim sigurinn í tilefni þessara tímamóta,“ segir Helgi Árnason , formaður Skákdeildar Fjölnis og liðsstjóri Fjölnismanna.

Þetta var síðari hluti Íslandsmótsins og kepptu 400 skákmenn í fimm deildum. Þrátt fyrir sigur Eyjamanna á stigum þá hlaut A-sveit Fjölnis fleiri vinninga, en það eru stigin sem telja.

A-sveiti Fjölnis. Þetta er firnasterk sveit sem landaði Íslandsmeistaratitli skáksveita bæði árin 2024 og 2025 og átti því titil að verja.

B-SVEIT FJÖLNIS NÝLIÐI Í 1. DEILD

Í 1. deild var B-sveit Fjölnis nýliði og barðist við að halda sæti í deildinni. Það tókst naumlega, munaði einum vinningi sem dugði.

Skákdeild Fjölnis er eina skákfélagið sem sendir stúlknasveit á Íslandsmótið. Stelpurnar stóðu sig afar vel og unnu t.d. síðustu umferðina 5-1.

Að sögn Helga Árnasonar hentar Rimaskóli vel fyrir svo fjölmennt mót sem þetta enda hefur keppnin verið haldin í skólanum meira og minna öll árin frá 2007.

Fjáröflun Fjölniskrakka sá um veitingareksturinn ásamt foreldrum og þar var glæsilega að verki staðið og náðist ágóði sem dugir til að sækja alþjóðlegt skákmót í Svíþjóð í september.

„Við óskum Taflfélagi Vestmannaeyja til hamingju með Íslandsmeistaratitilinn á þessu aldarafmæli félagsins og þökkum öllum þátttakendum fyrir frábæra og fjölmenna skákhelgi hér í Grafarvogi,“ segir Helgi Árnason.

Eftirfarandi skákmenn skipuðu A-sveit Fjölnis: Litháísku landsliðsmennirnir Valery, Paulius, Titas og Tomas og Íslendingarnir Dagur Ragnarsson, Bragi Þorfinnsson, Sigurbjörn J Björnsson og Oliver Aron Jóhannesson. - JGH

Um 400 skákmenn hvaðanæva af landinu mættu í Grafarvoginn um nýliðna helgi.

Stúlknasveit Fjölnis. Skákdeild Fjölnis er eina skákfélagið sem sendir stúlknasveit á Íslandsmótið.

B-sveit Fjölnis hélt sæti sínu í 1. deild eftir harða keppni.

A-sveit Fjölnis fékk silfrið núna eftir tvö gullár 2024 og 2025. Helgi Árnason, formaður Skákdeildar Fjölnis og liðsstjóri, er lengst til vinstri en Jóhanna Björg Jóhannsdóttir, forseti Skáksambands Íslands, lengst til hægri.

Þegar fyrsti íbúinn í Grafarvogi gekk á fund Davíðs eftir „hamfarir“ Hitaveitunnar

Fri, 06 Mar 2026 15:07:13 GMT

Það eru víða sagðar sögur af Davíð Oddssyni þessa dagana. Ef einhver einn stjórnmálamaður er faðir Grafarvogs er það Davíð Oddsson og hefur hverfið stundum verið nefnt borg Davíðs.

Í kosningabaráttunni vorið 1982 var tekist á um það hvort byggja ætti meðfram ströndinni, við Grafarvoginn, eða á „sprungusvæðinu“ upp við Rauðavatn.

Davíð vildi fara meðfram ströndinni. Sjálfstæðisflokkurinn vann sigur og varð Davíð borgarstjóri í kjölfarið og tók við af Agli Skúla Ingibergssyni sem var borgarstjóri Alþýðuflokks, Alþýðubandalags og Framsóknarflokksins.

Nú, miklar framkvæmdir hófust í Grafarvogi þegar um sumarið 1982 og flutti fyrsta fjölskyldan inn 1984, það var fjölskylda hins kunna tónlistarmanns í Flowers og Brimkló, Arnars Sigurbjörnssonar og konu hans Sigrúnar Sverrisdóttur. Þau hjón hófust strax handa við að setja niður gróður í lóðina sem stendur við Logafold 126 og settu upp þennan fína trjárunna við fyrirhugaðan göngustíg sem átti að liggja meðfram lóðarmörkum þeirra. Engin var hitaveitan komin í hverfið þegar fjölskyldan flutti inn.

En svo gerðist það; verktakar á vegum Hitaveitunnar mættu og grófu þenna líka mikla skurð við göngustíginn þannig að hið fína limgerði hrundi allt ofan í skurðinn. Arnar var ekki par sáttur og kvartaði við verktakana sem svöruðu honum á móti hálfhlæjandi og með hæðnistón: Talaðu við Davíð!

Það varð úr og Arnar mætti á vikulegan fund borgarstjóra með íbúum á skrifstofu hans við Austurvöll. Það fór vel á með þeim Davíð og Arnari og bar sá síðarnefndi upp erindið; að fyrst Hitaveitan hefði fellt allt hekkið þá væri spurning hvort borgin gæti ekki komið til móts við hann og tekið þátt í því með honum að smíða girðingu við göngustíginn.

Davíð afgreiddi málið á nóinu: „Við borgum efnið.“

Smá spjall í kjölfarið og Arnar fór sáttur af fundinum. Og Davíð stóð við loforðið!

Þetta er ein af mörgum sögum um hvað Davíð Oddsson var snöggur að setja sig inn í mál, stór sem smá, og taka ákvarðanir. Þetta var að vísu smámál fyrir borgina, en það var afgreitt á nóinu en ekki hangið yfir því og farið með það í ráð og nefndir til að svæfa það. - JGH

Skemmtilegt hlaðvarp sem Gunnar gerði um Arnar föður sinn

Sun, 01 Mar 2026 22:01:36 GMT

Það var sérlega gaman að spjalla við Gunnar Hrafna Arnarsson sem ég hitti fyrir algjöra tilviljun á gönguleiðinni undir Gullinbrú þar sem hann var á leiðinni upp í Logafold frá heimili sínu við Langholtsveginn.

Eitt af því sem kom í ljós í spjalli okkar var að Gunnar gerði hlaðvarp um karl föður sinn og nefnist það Herbergið mitt. Sem hægt er að skoða hérna:

Gaman að þessu. - JGH

Gunnar Hrafn Arnarsson á hádegisgöngu sinni í dag með labradortíkina hana Sölku sem orðin er tólf ára.

Sígrænt setur svip sinn á stórkostlega gönguleið gegnt Bryggjuhverfinu

Sun, 01 Mar 2026 19:15:05 GMT

Sígrænt setur svo sannarlega svip sinn á svæðið við göngustíginn í Hamrahverfinu gegnt Bryggjuhverfinu. Það hlýnaði í hádegissólinni og úr varð einn af þessum dýrðardögum að vetri þar sem sléttstraujaður Grafarvogurinn sýndi sínar bestu hliðar hvert sem litið var.

Við Grafarvogsbúar erum svo sannarlega heppnir með okkar mögnuðu gönguleiðir í kringum voginn okkar fallega, svo ekki sé minnst á þegar hann er í glitrandi í sólskinsskapi eins og var í dag. - JGH

Sígrænt setur svip sinn á gönguleiðir við Grafarvoginn, gegnt Bryggjuhverfinu. Sólbráð og skuggi ljósmyndarans á göngustígnum.

Fegurð við fjöru.

Það glittir í grynningar á háfjöru í hádegi. Blautir steinarnir segja sína sögu.

Bryggjan í Bryggjuhverfinu - flotbryggja þar sem fley með fagrar árar bindast traustum böndum á sumrin. Háfjara í hádegi.

„Hver ríður svo geyst á Gullinbrúvu….“

Sun, 01 Mar 2026 15:22:11 GMT

Það var magnað að ganga um við Grafarvoginn í hádeginu í dag og vogurinn okkar fallegi upp á sitt besta; spegilsléttur í vetrardýrðinni. Göngubrúin undir Gullinbrúnni er heill heimur út af fyrir sig - og þar er oft mikið mannlíf. Bæði gangandi og hjólandi á ferð.

En rifjum upp hvernig nafnið Gullinbrú varð til.

Við birtum hér aftur texta sem Gísli Kristjánsson blaðamaður skrifaði fyrir Grafarvogur.net fyrir um ári síðan.

Gullinbrúva eða Gullinbrú?

„Nafnið varð til við borð þjóðskálds uppi í Gufunesi löngu áður en brú yfir Grafarvog komst á dagskrá. Nafnið beið ónotað í 160 ár og hefur líkast til svifið um háloftin. Svo var ákveðið að festa það við nýja brú með vegi yfir sjálfan Grafarvoginn. Þar er það enn.

Sagan er svona: Eitt sinn bjó þjóðskáldið Bjarni Thorarensen í Gufunesi. Árið 1823 gerði hann sér það til dundurs og hugarléttis að yrkja kvæðið ”Veturinn”.

Hann snaraði fram fjaðurpenna sínum og skrifaði hugfanginn: „Hver ríður svo geyst á Gullinbrúvu….“

Góð sviðsmynd, hugsaði skáldið með sér og vissi ekki að miklar og pólitískar deilur hófust um nafnið réttum 160 árum síðar. Og fleiri orð sem skáldið skreytti list sína með og átti nú að koma í daglega notkun.

Á Gullinbrúvu yfir í hið nýja hverfi

Þarna var komið nafnið á nýju brúna upp í Grafarvog þótt liðið væri langt á aðra öld frá veru skáldsins í Gufunesi. Af hverju ekki að fara á Gullinbrúvu yfir í hið nýja hverfi?

En, nei það gengur ekki. Ungt fólk skilur ekki svona skáldamál. Er ekki Gullinbrú nóg? Og svo varð.

Hugmyndin komin frá Þórhalli Vilmundarsyni

Hugmyndina að þessari endurnýtingu á orðum skáldsins átti Þórhallur Vilmundarson prófessor. Hann varpaði þessu fram í tillögu til borgarstjórnar í vetrarbyrjun 1983. Og fyrr en varði tóku síður dagblaðanna að loga í illdeilum um nafnið.

FJALLKONUVEGUR

En Þórhallur gekk enn lengra. Hann lagði til að enn fleiri nöfn af blöðum Bjarna skálds Thorarensen yrðu endurvakin í nýju hverfi. Fjallkonan fríð í kvæðinu „Eldgamla Ísafold“ ljáði Fjallkonuvegi nafn sitt, nýrri safnbraut sem hvert Grafarvogsbarn þekkir.

Og ófáir leggja nú leið sína til Fjörgynjar – en það er hin eina rétt mynd orðsins í eignarfalli! Og svo eru margar Foldir og fleira skemmtilegt og umdeilt.

Um eitt voru þó allir á einu máli í þessu nafnastríði og féllust að lokum í faðma: Þetta var harla nýstárlegt.

Góð endurvinnsla að sækja nöfnin til skálds, sem bjó einn vetur í Gufunesi, og orti um veturinn löngu áður en vetrarþjónusta og snjóruðningur á götum borgarinnar varð að deiluefni.“ - JGH

Gönguferð „heim“ í Logafold frá Langholtsvegi með hana Sölku - Gunnar í fjölskyldunni sem flutti fyrst í Grafarvoginn

Sun, 01 Mar 2026 14:44:12 GMT

Hann var einn af fjölmörgum sem fékk sér göngutúr í hádeginu á göngustígnum við Grafarvoginn. Ég tók hann tali þegar ég var að mynda undir brúnni, Gullinbrúnni sjálfri, en þar er oft mikil traffík þótt ekki sjáist hún frá veginum.

Gunnar Hrafn Arnarsson heitir maðurinn, býr við Langholtsveginn, en var á leiðinni „heim“ í Logafoldina með Labradorhundinn sinn, hana Sölku.

- „Heim,“ spurði ég. „Jú, ég er alinn upp í Grafarvoginum og er að trítla með hana Sölku í smá kaffi til pabba og mömmu sem búa í Logafoldinni.“

Gunnar Hrafn Arnarsson, fyrrum íbúi í Grafarvogi. Og meira en það; í fjölskyldunni sem flutti fyrst í Grafarvogshverfið árið 1984. Hann er sonur hjónanna Arnars Sigurbjörnssonar (Adda í Flowers) og Sigrúnar Sverrisdóttur.

- Auðvitað þurfti ég að fá meiri vitneskju um hann, þetta hefðbundna hverra manna hann væri.

Í ljós kom að hann er í fjölskyldunni sem flutti fyrst inn í nýja Grafarvogshverfið árið 1984; sonur Arnars Sigurbjörnssonar , Adda í hljómsveitinni Flowers, og Sigrúnar Sverrisdóttur. Sjá viðtal Grafarvogur.net við Arnar hér.

- Hvað ertu lengi frá Langholtsveginum í Logafoldina? „Yfirleitt svona í kringum þrjú korter. Ég bý nálægt Herkastalanum, húsi Hjálpræðishersins, alveg syðst við Langholtsveginn þannig að ég er fljótt kominn niður að Elliðavoginum og geng svo meðfram ströndinni og í gegnum Bryggjuhverfið.“

Salka er orðin 12 ára sem telst hár aldur hjá svona stórum hundum - sem Labradorinn er. „Jú, hún er farin að reskjast en fer þó enn nokkuð léttilega þessa leið upp í Logafoldina.“

- Er pabbi þinn eitthvað að þenja rafmagnsgítarinn ennþá í bílskúrnum í Logafoldinni? „Nei, en kassagítarinn er þeim mun meira á lofti í stofunni.“

Hressilegur Grafarvogsbúi, Gunnar, og frumbyggi í hverfinu.

Gaman að spjalla við hann. - JGH

Gunnar Hrafn Arnarsson með hana Sölku sem er orðin tólf ára en trítlar en nokkuð léttilega frá Langholtsveginum upp í Logafold.

Hljómsveitin Flowers, 1967 til 1969, var súpergrúppa á sínum tíma. Frá vinstri: Karl Sighvatsson, Jónas R. Jónsson, Sigurjón Sighvatsson, Gunnar Jökull Hákonarson og Arnar Sigurbjörnsson.

Höfnin fögur frá Hamrahverfi séð

Tue, 17 Feb 2026 21:47:23 GMT

Höfnin er fögur frá Hamrahverfi séð. Þær eru fáar gönguleiðirnar á höfuðborgarsvæðinu sem eru jafn tilkomumiklar og sú sem liggur meðfram ströndinni í Hamrahverfinu í Grafarvogi. Það var sérlega vel til fundið hjá borginni að leggja fyrir nokkrum árum hinn mjög svo öfluga göngustíg meðfram Gufuneshöfðanum alveg niður við sjávarmál. Borgarljós og bakki hafnar blasa við nánast í seilingarfjarlægð með stórborgarbrag, hinum megin.

Í kaldri kvöldgöngunni var næðingur og svolítill Kári í lofti. Hressandi með meiru, ekki síst eftir heiðarlegt saltkjötsát og baunaða súpu með bitum í. Sprengidagur að kveldi kominn og ber hann það nafn með sanni. - JGH

Hafnarbakki hinum megin.

Bryggjuhverfið ljósum baðað.

Hinum megin og hérna megin.

Allt fyrir ástina. Grafarvogur.net á ferð í borg heilags Valentínusar; borg þeirra ástföngnu

Sat, 14 Feb 2026 16:07:40 GMT

Þegar Grafarvogur.net var á ferð um Ítalíu sl. sumar og kom til borgarinnar Terní, fyrir norðan Róm, kom auðvitað ekkert annað til greina en að gista á Hótel Valentínó. Þetta er borgin sem kennd er við heilagan Valentínus, verndara ástfanginna, og þann sem ber ábyrgð á Valentínusardeginum þótt nokkuð sé um liðið frá því hann var uppi.

Heilagur Valentínus (San Valentino) fæddist árið 225 e. Kr. í borginni Interamna Naharsvar , sem nú heitir Terní, og var þar biskup. Hann var þekktur fyrir guðrækni sína og góðvild og var einlægur talsmaður kærleikans.

Á þessum tíma ríkti Claudíus II keisari í Róm, en hann hafði bannað ungum mönnum að kvænast þar sem hann taldi að einhleypir menn væru betri hermenn.

Valentínus virti þetta boð að vettugi og gaf saman pör í laumi. Þegar upp komst var hann handtekinn og færður til Rómar í fangelsi.

Rauði liturinn er áberandi við margar götur í Terní.

Í fangelsinu er sagt að Valentínus hafi læknað blinda dóttur fangavarðarins. Áður en hann var tekinn af lífi, þann 14. febrúar árið 269 e. Kr. skrifaði hann henni kveðjubréf og undirritaði það: „Frá þínum Valentínusi“ (From your Valentine).

Þaðan er komin sú hefð að senda Valentínusarkort.

Terníbúar eru stoltir af sínum dýrlingi og er borgin oft kölluð borg ástarinnar, nú eða borg þeirra ástföngnu. ( La Città degli Innamorati ). Jarðneskar leifar dýrlingsins eru varðveittar í kirkjunni Basilica di San Valentino í Terní.

Á hverju ári, allan febrúarmánuð, heldur borgin hátíð þar sem þúsundir para koma saman til að endurnýja heit sín í kirkjunni.

Þetta er lítil og þægileg borg með um 100 þúsund íbúa fyrir norðan Róm og vel þess virði að sækja hana heim. - JGH

Hér gengum við fram á brúðkaupsveislu eitt kvöldið.

Terní er fyrir norðan Róm, í héraðinu Umbría. Frekar lítil og þægileg borg með rúmlega 100 þúsund íbúa.

Ítalía. Mjó stræti - miklir skuggar.

Hér tjá menn sig með höndunum.

Sumir eru ástfagnir af mat. Ástin bæði liggur og hangir í loftinu.

Dómkirkjan í Terní.

Já, já, það er allt í lagi að tylla sér við ísbarinn og fá sér smá vatnssopa.

Það segir sig sjálft að við gistum á þessu hóteli.

Er maður nokkuð staddur á Ítalíu?

Í skugga trjánna í garðinum fyrir neðan dómkirkjuna.

Það þarf líka að hugsa um ferfætlingana í hitanum.

Torgið í Terní. Fáir á ferð í hita hádegisins.

Þarna blasir fortíðin við. Valentínus fæddist árið 225 e. Kr. og var líflátinn 14. febrúar 269 e. Kr.

Litadýrð i borg ástarinnar.

Og ég sem hélt að ég fengi kjötbollur i brúnni sósu að hætti mömmu.

Fornir - þó ekki frá tímum rómversku keisaranna.

Terní; borg Valentínusar; borg þeirra ástföngnu.

Straumur fólks í opið hús hjá Rafmennt við Stórhöfðann. Skólinn fagnar 50 ára afmæli

Sat, 14 Feb 2026 14:10:02 GMT

Það er víða straumur þegar kemur að rafmagni sem við getum engan veginn verið án. Nú er opið hús hjá Rafmennt við Stórhöfða 27 og verður til kl. 15:00 í dag en ungt fólk getur lært rafiðnaðarfögin og kvikmyndun við skólann.

Hátíðin hófst kl. 11:00 í morgun og það hefur verið ágætis straumur fólks til að kynna sér verkefni skólans og hvað hann hafi upp á að bjóða - og auðvitað prófa af eigin raun að tengja.

Þarna er sem sagt stuð og rafmagnað andrúmsloft - svo við leikum okkur aðeins með málið - en skólinn fagnar 50 ára afmæli á þessu ári.

Er ekki kominn tími til að tengja? - segir í þekktu lagi.

Kristján Þórður Snæbjarnarson, Grafarvogsbúi, þingmaður Samfylkingarinnar og fyrrverandi formaður Rafiðnaðarsambands Íslands og Þór Pálsson, framkvæmdastjóri Rafmenntar.

Rafmennt býður upp á kennslu í kvikmyndun.

Um sögu Rafmenntar segir þetta á heimasíðu þeirra:

„Rafiðnaðarmenn hafa byggt upp og rekið umfangsmikið endurmenntunarkerfi frá árinu 1975. Endurmenntunarnefndir rafiðna og rafeindavirkja stofnuðu Rafiðnaðarskólann 20. september 1985. Lengst af báru nefndirnar ábyrgð á fræðslustarfinu. Árið 1993 var formlega stofnað til skólanefndar Rafiðnaðarskólans sem bar þá ábyrgð á starfseminni. Árið 2004 var rekstri skólans breytt í hlutafélag "Rafiðnaðarskólinn ehf" þar sem hluthafar voru tveir, RSÍ og SART, hvor um sig með 50% hlut.

Rafiðnaðarskólinn var fyrst til húsa í Skipholti (á tveimur stöðum), síðan í Skeifunni 11b frá 23. október 1989 til 15. desember 2009, fyrst í stað aðeins á 3. hæðinni en svo bættist 2. hæðin við.

Þann 15. desember 2009 flutti Rafiðnaðarskólinn á Stórhöfða 27 á 3. hæðina. Fyrsta hæðin bættist við haustið 2010 sem var innréttuð sérstaklega með þessa starfsemi í huga.

Fræðsluskrifstofa rafiðnaðarins var stofnuð árið 1996 til að halda utan um umsýslu með sveinsprófum og námssamningum ásamt því að vera leiðandi í endurskoðun á grunnnámi rafiðnaðarmanna. Skrifstofan sá einnig um að kynna nám í rafiðnaði fyrir ungu fólki og aðstoða það með frítt námsefni. Á vefnum rafbok.is er allt námsefni sem notað er til kennslu í rafiðngreinum í framhaldsskólum aðgengilegt nemendum þeim að kostnaðarlausu.

Á vordögum 2018 ákváðu stjórnir Rafiðnaðarskólans og Fræðsluskrifstofu rafiðnaðarins að sameina þessi tvö félög í eitt undir merki RAFMENNTAR fræðsluseturs rafiðnaðarins og færa þannig öll verkefni sem snúa að menntamálum rafiðnaðarmanna, frá upphafi náms til loka meistaraskóla og síðan þeirrar endurmenntunar sem félagsmenn þurfa stöðugt að vera að nýta sér, í eitt félag.

Breytingunum er ætlað að efla þjónustu við félagsmenn og nýta betur það fjármagn sem kemur inn í menntasjóð til að auka fjölbreytileika nýrra námskeiða og kynningu á nýrri tækni.

Rafmennt er í jafnri eign RSÍ (Rafiðnaðarsamband Íslands) og SART (Samtök rafverktaka).“ - JGH

Straumur og stuð.

Fortíð og framtíð. Fimmtíu ára saga að baki og framtíðin er sömuleiðis rafmögnuð.

Flaggað í Hamrahverfi. Vitið þið hvaða fáni þetta er?

Fri, 13 Feb 2026 17:14:36 GMT

Grafarvogsbúinn Ólafur Sverrisson , nágranni minn í Grafarvogi og stundum nefndur fánakarlinn í Hamrahverfi, dró þennan fána að húni í morgun. Ég staldraði auðvitað við þegar ég átti leið fram hjá og virti þennan sérstaka fána fyrir mér - kannaðist nú ekki við hann.

Hvaða þjóðfáni er þetta?

Ekki gat ég fundið út úr því og hringdi í Ólaf.

„ Þetta er japanski flotafáninn, “ sagði hann að bragði.

- Það er von að ég fyndi hann ekki, svaraði ég. - Hvernig rataði hann í þínar hendur?

„Ég hef eignast marga fána með því að kunningjar mínir eru á ferð og kippa fánum með sér heim. Þessi er þannig til kominn að vinkona mín var Japan að hitta son sinn, sem býr þar, og hafði mig í huga þegar hún keypti hann.“

Skemmtilegt.

- Ég ætla að hafa þetta sem einhvers konar föstudagsgetraun að þessu sinni - svaraði ég; og sú varð raunin. - JGH

Fallegt verður og nánast logn í Hamrahverfinu eftir hádegi í dag - og ekki besta veðrið til að mynda blaktandi fána.

Ríkið hefur bíleigendur að féþúfu - skattar 115 milljarðar; til Vegagerðarinnar 55 milljarðar

Thu, 12 Feb 2026 10:33:56 GMT

Grafarvogsbúinn Þórir Garðarsson skrifar fróðlega grein í Morgunblaðið í morgun þar sem glöggt kemur fram að ríkið hefur bíleigendur að féþúfu - og er það svo sem ekkert nýtt; skiptir þá ekki máli hvaða flokkar hafa verið við völd. Það er hamast á bílgreininni í sköttum.

Í grein Þóris kemur fram að bílgreinin í heild sinni greiðir yfir 115 milljarða í skatta með einum eða öðrum hætti á meðan það sem fer til Vegagerðarinnar nemur um 55 milljörðum kr., þar af um 34 milljarðar í beinar framkvæmdir á vegakerfinu.

Þórir segir í grein sinni: „Umhverfis- og eldsneytistengdir skattar, þar með talið kílómetragjald, kolefnisgjöld og virðisaukaskattur af eldsneyti, nema samanlagt umtalsverðum fjárhæðum, áætlað um eða yfir 100 milljörðum króna. Við bætast svo vörugjöld af innflutningi og sölu bifreiða, sem má áætla á bilinu 10-15 milljarða króna á árinu plús vsk. Heildartekjur ríkissjóðs af bifreiðatengdri starfsemi eru því að jafnaði a.m.k. tvöfalt hærri en kostnaður við vegakerfið.

Einkabílar eru um 86% allra ökutækja í umferð og standa því undir stærstum hluta þessara tekna.“

Fróðlegt. - JGH

Grein Grafarvogsbúans Þóris Garðarssonar í Morgunblaðinu í morgun.

Þessa mynd tók ég þegar ég ók heim af íbúafundinum með borgarstjóra á bókasafninu sl. mánudag. Er hér í biðröð við gatnamótin umdeildu; Strandveg, Rimaflöt og Gufunesveg. Löng röð fyrir aftan mig.

Hitafundur með Heiðu borgarstjóra. Grafarvogsbúum þóttu svör Heiðu heldur rýr

Tue, 10 Feb 2026 16:58:32 GMT

Heiða Björg Hilmisdóttir borgarstjóri hélt fund síðdegis með Grafarvogsbúum á bókasafninu í Grafarvogi og sannast sagna átti borgarstjóri nokkuð í vök að verjast og þótti fundarmönnum oft á tíðum svör Heiðu ansi rýr. Mesta hitamálið í Grafarvogi til nokkurra ára, þétting byggðar, hefur að mestu verið frestað af núverandi meirihluta, þ.e. af flokkunum fimm sem mynda núverandi meirihluta. Þó stendur til að byggja við Starengi og Hverafold og hefur þeim svæðum verið úthlutað. Varðandi þétttingu talaði Heiða nánast eins og hún hefði ekki komið nálægt þeim málum - heldur fyrrum borgarstjóri - en sagði þó afdráttarlaust að þétting byggðar í Grafarvogi væri ekki á vakt þessa meirihluta heldur myndi sá næsti, sem yrði myndaður eftir kosningar í vor, verða með það mál á sinni könnu og taka afstöðu til mótmæla Grafarvogsbúa.

Fundarmenn voru mjög vantrúaðir á þetta svar hennar og töldu að meirihlutinn, sem tók við 21. febrúar sl., hefði af hræðslu vegna komandi kosninga ákveðið að bíða með það til að styggja ekki kjósendur en væru til alls líklegir eftir kosningar komist þeir að.

HEIÐA LÉT BÍÐA EFTIR SÉR - LENTURÐU Í UMFERÐARTÖFUM?

Heiða lét bíða eftir sér og klukkan var orðin átta mínútur yfir fimm þegar hún mætti til leiks - of sein. Auðvitað var hún spurð að því hvort hún hefði tafist í umferðinni við gatnamót Strandvegar og Rimaflatar. Hún svaraði því neitandi - og þá hló salurinn dátt. Tónninn á fundinum var sleginn. Mátti skilja á orðum Heiðu að hún hefði farið aðra leið.

SIGRÚN ÁSTA MEÐ MEÐ ÖFLUGA SPURNINGU

Sigrún Ásta EinarsdóttIr, sem hefur látið mjög að sér kveða gegn þéttingu byggðar í Grafarvogi, reið á vaðið á fundinum af krafti með fyrstu spurningunna og spurði Sigrúnu um Aðalskipulagið og sagði Sigrún Ásta að íbúar í Grafarvogi hefðu sent inn 1.386 athugasemdir og mótmælt kröftuglega þéttingu 340 íbúða sl vor. Engu að síður hefði borgarráð samþykkt sama dag og umsagnarfresturinn rann út, þ.e. 15. maí sl., Húsnæðisætlun Reykjavíkurborgar 2025 til 2034 þar sem talað væri um 523 íbúðir á þéttingarreitum í Grafarvogi

Heiða þverneitaði að þetta væri rétt hjá Sigrún Ástu og varð kurr í salnum. „ Þetta er víst rétt ,“ fékk borgarstjóri að heyra það ákveðið frá fundarmönnum.

Sigrún Ásta gaf sig ekki og spurði af ákveðni hvar þessar 183 umfram-íbúðir ættu að vera í Grafarvogi, skv. Húsnæðisáætluninni og áréttaði svo spurningu sína: Munt þú beita þér fyrir að Húsnæðisáætlunin verði leiðrétt fyrst þetta eru ekki réttar tölur?

Heiða svaraði henni ekki og bað um næstu spurningu.

Klukkan að verða fimm og beðið eftir Heiðu - en hún kom átta mínútum of seint á fundinn.

Hið sanna í málinu er hins vegar að Sigrún Ásta hafði rétt fyrir sér og það fer ekkert á milli mála að í Húsnæðisáætlun Reykjavíkurborgar , sem samþykkt var 15. maí sl. er gert ráð fyrir 523 nýjum íbúðum í Grafarvogi.

Það má glöggt sjá hér í áætluninni á bls. 62 sem og á næstu mynd. Þar fer ekkert á milli mála varðandi áætlaðan fjölda íbúða til úthlutunar í Grafarvogi.

Raunar má spyrja sig hvort þessar 183 íbúðir eigi að vera í Gufunesi en hafa Grafarvogsbúar jafnan rætt um að verði tæplega 700 íbúða byggð en ekki 489 eins og segir í Húsnæðisáætlun borgarinnar 2025 til 2034..

Heiða þverneitaði að þetta væri rétt hjá Sigrún Ástu og varð kurr í salnum. „ Þetta er víst rétt ,“ fékk borgarstjóri að heyra það ákveðið frá fundarmönnum um íbúðirnar 523.

ÞIÐ VERÐIÐ AÐ EIGA FLEIRI BÖRN Í GRAFARVOGI

Næsta spurning var um skólamál og fékk Heiða spurningu um það hvers vegna 1. til 10. bekkur væri ekki í hverjum skóla innan hverfis. Bent var á að nokkrir skólar væru ekki fullsetnir - og var Hamraskóli nefndur sérstaklega í því tilfelli.

Steinn Jóhannsson , sviðsstjóri skóla- og frístundasviðs Reykjavíkurborgar, kom Heiðu til aðstoðar og sté sté í pontu og fór yfir skólamálin og sagði þau í Grafarvogi.

Einn ungur fundargestur sagði þá að þegar hann liti yfir salinn og sæi aldur fundarmanna á fundinum að það skýrði talsvert fyrir sér hvers vegna einhverjir skólar væru ekki fullsetnir.

„ Þið verðið að eiga fleiri börn í Grafarvogi ,“ sagði þá Heiða svona í hálfkæringi þegar hún lokaði málinu og bað um næstu spurningu.

GUFUNESIÐ - OG GATNAMÓT STRANDVEGAR OG RIMAFLATAR

Þá var komið að umferðarmálunum í Grafarvogi og voru fundarmenn mjög undrandi á því hvernig borgin hefði farið í að byggja heilt hverfi í Gufunesi án nokkurrra innviða - og hvað þá að sinna ekki gatnamótum Strandvegar og Rimaflatar og fara í alvöru framkvæmdir þar.

Nýleg beygjuljós þar sem stöðvar umferð bíla í gagnstæða átt og hefur gert allt vitlaust í Grafarvogi vegna algerrrar teppu á miðjum virkum degi - líka og var í dag - en Grafarvogur.net er búinn að fjalla mikið um þessi gatnamót. „ Þið hafið hunsað þetta hverfi og umferðmannvirkjum þangað og það bitnar á öllum Grafarvoginum,“ áréttaði fundargesturinn en komst ekki lengra áleiðis.

Heiða virist alls ekki vera mikið inni í þessum umtöluðu gatnamótum og kallaði Guðbjörgu Lilju Erlendsdóttir , verkfræðing og samgöngustjóra, borgarinnar til liðs við sig.

„ Ég veit af þessari röð í morgun og þessum töfum ,“ sagði hún - og þá kölluðu fundarmenn óþolinmóðir inn í að svona væri þetta alla daga og væri galið eftir breytingarnar. „Það var gerð uppfærsla á ljósunum fyrir helgi og það er enn verið að vinna í þeim. Það væri verið að breyta umferðarljósastillingunni og setja upp beygjuljós þar sem komið hefði ábending héðan úr hverfinu.“

Hún bætti svo við þegar fundargestir sóttu að henni.„Nú, þessi breyting er greinilega ekki að virka.“ Hún ræddi síðan gönguljósin á þessum gatnamótum sem hefðu líka fegnið vissan forgang og tefðu umferðina. Þetta er verk í vinnslu og eins og gjarnan er þurfum við að finna út úr þessu og við tökum mark á öllum ábendingum sem berast og þetta er hluti af þeirri vinnu og nú heyri ég að þetta gangi ekki nægilega vel.“

Tausti Harðarson, íbúi í Grafarvogi, kvaddi sér hljóðs og sagði að sér fyndist mikið metnaðarleysi í umferðarmálunum og sagði að í ljósi þess að yfir 18 þúsund íbúar byggju í Grafarvogi og samgöngustjóri viðurkenndi að breytingin á umferðarljósunum við gatnamót Strandvegar og Rimaflatar væru klúður að þá vildi hann að samgöngustjóri bretti upp ermarnar og gripi inn í: „Ég myndi vilja sjá hana vinna í alla nótt við að laga umferðarljósin. Málið er að við erum mjög óánægð með það hvernig þið komið fram við okkur í umferðarmálum.“

Trausti var ekki hættur og ræddi um fyrirhugaða stækkun Spangarinnar og að ofan á hana kæmu þrjár hæðir. „Nú, þegar eru öll bílastæði farin. Ef þetta gengur í gegn þá fer enginn lengur í Spöngina að versla. Það er ljóst.“

Hann spurði svo: Ætlið þið að setja þetta í gegn? Ætlið þið að girða þetta hverfi af hér?

„Já, girða þetta af,“ svaraði Heiða.„Við skrifuðum undir viljayfirlýsingu um daginn varðandi Spöngina og þessar framkvæmdir en þá á eftir að skipuleggja þetta - og þið munið taka þátt í því. Ég held að það yrði gott fyrir þennan kjarna hér að fá hér stækkun og fleira fólka á svæðið og meiri þjónustu. Ég vona að þetta muni opna hverfið en ekki girða það af - og gera það meira aðlaðandi.“

Fundargestur greip fram í og gerði athugasemdir við þetta hjá Heiðu og sagði að miðað við þær teikningar sem væru komnar að þá eru þið að taka helling af bílastæðum í burtu.

„Ég hef ekki séð neinar teikningar, þetta er allt í vinnslu,“ svaraði Heiða.

Fundarmaðurinn greip þá framm í og sagði: „Þið eruð alltaf að tala um samráð, við erum að tala um fullt af hlutum sem þið hafið lofað að yrði í samráði við okkur, eins og í umferðarmálum, þéttingu byggðar. Það hefur ekki verið neitt samráð við okkur. Þannig að er þetta ekki bara einhver fagurgali stjórnmálanna að ræða sífellt um samráð sem er ekki neitt.“

Heiða svaraði þá um Spöngina: „Það er ekki búið að skipuleggja þetta. Það er búið að skrifa undir þessa viljayfirlýsingu og ég vona að það sem kemur út úr þessu vverðandi spennandi og gott.“

- Fer breytingin á Spönginni í grenndarkynningu? - var spurt.

Ólöf Örvarsdóttir, sviðsstjóri umhverfis- og skipulagssviðs , kom þá Heiðu til aðstoðar varðandi umræðuna um Spöngina og sté í pontu. „Það er fasteignafélagið Reitir sem eiga Spöngina og hafa hug á því að bæta við og komu til máls um það við borgina og skrifað undir viljayfirlýsingu. Það sem við gerum svo er að vinna upp skipulagslýsingu að breytingu að ósk þeirra. Þessi skipulagslýsing fer í samráðsgátt. Svo hefst deiliskipulagið sem fer líka í samráðsgátt. Þetta verður ekki grenndarkynning heldur auglýst og hagaðilum sem búa næst Spönginni verður sent bréf. Þannig að þetta er bara fyrsta skrefið. Þetta er tillaga komin frá Reitum sem eru lóða- og fasteignaeigendur og okkur ber að taka til stjórnsýslulegrar meðferðar.“

Fundargestur reis þá upp og sagði: Ef það koma tvær til þrjár hæðir ofan á Spöngina - hafið þið ekkert lært af Græna gímaldinu sem þið byggðuð í Breiðholti. Ég bý í blokk við Spöngina og við komum til með að missa allt sólarljós við þær tillögur sem hafa verið kynntar. Mér líst ekkert á þetta.“

Þá svaraði Ólöf: „Það er ekki rétt í þessu tilviki, það liggja ekki fyrir neinar tillögur. Reitir eru með ósk um að byggja upp og svo gerum við skipulagslýsingu þar sem fram koma allar forsendur og síðan fer þetta í lögbundið samráð. Ég lofa þér því að þetta mun ekki fara fram hjá þér.“

- Það er búið að teikna þessar tillögur Reita! - greip þá fundargesturinn inn í.

„Ég get ekki ábyrgst það sem Reitir gera. Auðvitað skoða Reitir eins og önnur fasteignaþróunarfélög gera,“ bætti Ólöf við.

„Verður þetta samt ekki allt á forsendum þeirra,“ svaraði þá fyrirspyrjandi.

Samgöngustjóri gaf í skyn að ljósin við Strandveg og Rimaflöt yrðu færð í fyrra horf

Tue, 10 Feb 2026 16:26:46 GMT

Umferðarmálin eru eitt af heitustu málunum í Grafarvogi og hafa verið það um langt skeið. Allir þekkja framkvæmdirnar við Höfðabakkann en ef það eru einhver gatnamót og umferðarljós sem Grafarvogsbúar eru núna „sturlaðir yfir“ eru það gatnamótin við Strandveg, Rimaflöt og Gufunesveg en þar var umferðarljósunum breytt um helgina og hafi verið tafir fyrir á álagstímum þá eru þarna langar biðraðir ökutækja og tafir um hábjartan daginn.

Að sjálfsögðu var komið inn á þessi mál með Heiðu Björg borgarstjóra á fundinum á bókasafninu í gær - og það fór ekki fram hjá neinum hver hugur fundarmanna var til þessara umrferðarljósa.

Einn fundarmaður spurði mjög undrandi hvernig stæði á því að borgin hefði farið í að byggja heilt hverfi í Gufunesi án nokkurrra innviða, þarna væri strætó í formi leigubílaþjónusta obbann af deginum og óskiljanlegt væri að umrædd gatnamót, Strandvegar og Rimaflatar, hefðu ekki farið í alvöru framkvæmd fyrir löngu síðan.

Grafarvogur.net hefur fjallað oft um þessi gatnamót og breytinguna á umferðarljósunum með beygjuljósum sem tefja og eru að gera alla vitlausa . „ Þið hafið hunsað Gufunesið og þessi gatnamót og það bitnar á öllum Grafarvoginum,“ áréttaði þá fundargesturinn.

Umrædd gatnamót Strandvegar, Rimaflatar og Gufunesvegar - gatnamót sem hafa gert Grafarvogsbúa brjálaða í umferðinni að undanförnu en ljósunum var breytt um helgina og við það varð hefðbundinn hægagangur enn hægari - og varla hægt að tala um aðra gangtegund en fetið í þeim efnum. (Mynd frá síðasta sumri, augljóslega).

Heiða Björg fékk Guðbjörgu Lilju Erlendsdóttir , verkfræðing og samgöngustjóra borgarinnar , til liðs við sig til að koma í pontu og fara yfir þetta.

„ Ég veit af þessari röð í morgun og þessum töfum ,“ sagði hún - og þá kölluðu fundarmenn óþolinmóðir inn í að svona væri þetta alla daga á álagstímum en væri galið eftir breytingarnar og tafir allan daginn.

„Það var gerð uppfærsla á ljósunum fyrir helgi og það er enn verið að vinna í þeim. Það er verið að breyta umferðarljósastillingunni til að auka öryggið og setja upp beygjuljós,“ sagði Guðbjörg Lilja og bætti við að komið hefði ábending um það úr hverfinu að bílar sem væru að beygja niður í Gufunesið biðu þar og tefðu umferfðina. Þess vegna hefði verið farið í þessar framkvæmdir.

Hún bætti svo við þegar fundargestir sóttu að henni: „ Nú, þessi breyting er greinilega ekki að virka. “

Hún ræddi síðan gönguljósin á þessum gatnamótum sem hefðu einnig fengið vissan forgang og tefðu eðlilega fyrir umferð bíla. „ Þetta er verk í vinnslu og eins og gjarnan er þurfum við að finna út úr þessu og við tökum mark á öllum ábendingum sem berast og þessi umræða hér er hluti af þeirri vinnu og nú heyri ég að þetta gangi ekki nægilega vel. “

Þá sagði Guðbjörg Lilja varðandi framkvæmdir við Höfðabakkann að þá væri slæmt að ekki hefði tekist að ljúka þeim fyrir veturinn og bætti við að ný umferðarljós við gatnamót Höfðabakka-Bíldshöfða kæmust ekki í gagni fyrr en í sumar en þar þyrfti að grafa talsvert og leggja nýjar lagnir. - JGH

Heiða borgarstjóri fékk Guðbjörgu Lilju Erlendsdóttir , verkfræðing og samgöngustjóra borgarinnar, til að fara betur yfir samgöngumál og umferðarmannvirki í Grafarvoginum og umrædd ljós við Strandveg, Rimaflöt og Gufunesveg urðu fljótt mál, málanna. „Nú, þessi breyting er greinilega ekki að virka,“ sagði Guðbjörg Lilja um uppfærsluna á ljósunum við þessi gatnamót.

Trausti vildi að samgöngustjóri ynni alla nóttina við að breyta ljósunum við Rimaflöt - og ætlið þið að girða Spöngina af?

Tue, 10 Feb 2026 16:25:23 GMT

VERÐUR SPÖNGIN GERÐ AÐ VIRKI? Tausti Harðarson, íbúi í Grafarvogi , kvaddi sér hljóðs á fundinum með Heiðu Björg borgarstjóra í bókasafninu í Spönginni í gær og sagði að sér fyndist mikið metnaðarleysi einkenna umferðarmál í Grafarvogi og sagði að yfir 18 þúsund íbúar byggju í Grafarvogi og fyrst samgöngustjóri viðurkenndi að breytingin á umferðarljósunum við gatnamót Strandvegar og Rimaflatar væru klúður þá vildi hann að samgöngustjóri bretti upp ermarnar og færi þegar í málið.

„ Ég myndi vilja sjá hana vinna í alla nótt við að laga umferðarljósin. Málið er að við erum mjög óánægð með það hvernig þið komið fram við okkur í umferðarmálum, “ sagði Trausti mjög ákveðinn og uppskar mikið lófaklapp.

ÆTLIÐ ÞIÐ AÐ GIRÐA SPÖNGINA AF?

Trausti var ekki hættur - síður en svo - og ræddi um fyrirhugaða stækkun Spangarinnar, sem hefði mælst illa fyrir, en um risaframkvæmd og þarna yrði þétting byggðar með íbúðarhúsnæði í allt að fimm hæða blokkum og þetta yrði klasi sem ætti efir að teygja sig og taka af stóran hluta bílastæða við Borgarholtsskóla.

„ Við þetta fer stór hluti bílastæða á svæðinu,“ sagði Trausti ákveðinn . „Ef þetta gengur í gegn hjá ykkur þá fer enginn lengur í Spöngina að versla. Það er ljóst; það fer enginn í verslunarmiðstöð þar sem sárafá bílastæði eru .“

Hann spurði svo: „ Ætlið þið virkilega að leyfa þessu að fara í gegn? Ætlið þið að girða Spöngina af hér? Þetta hljómaði raunar hjá honum eins og til stæði að byggja stórt virki á svæðinu - slíkar eru framkvæmdirnar. ( Sjá teikningar og tengil hér ).

„ Ja, girða þetta af , er það nú ekki of mikið sagt? “ svaraði Heiða og sagði svo: „ Við skrifuðum undir viljayfirlýsingu um daginn varðandi Spöngina við Reiti og þessar framkvæmdir á ennþá eftir að skipuleggja - og þið munið taka þátt í því. Ég held að það yrði gott fyrir þennan verslunarkjarna að fá hér stækkun og fleira fólk á svæðið og meiri þjónustu. Ég vona að þetta muni opna hverfið en ekki girða það af - og gera það meira aðlaðandi .“

Spöngin. Þéttingu byggðar laumað inn hjá Reitum í Spönginni. Reitir gera ráð fyrir að byggðar verði 140-170 íbúðir í 2-5 hæða blokkum á svæðinu. Reitir stefna að því að nýtt byggingarmagn verði 17.200 fermetrar, þar af 12.500 fermetrar af íbúðarrými.

Fundargestur greip fram í og gerði athugasemdir við þetta hjá Heiðu og sagði að miðað við þær teikningar sem væru komnar þá eru þið að taka helling af bílastæðum í burtu.

„ Ég hef ekki séð neinar teikningar, þær eru ekki til, þetta er allt í vinnslu ,“ svaraði Heiða.

Fundarmaðurinn greip þá fram í og sagði: „ Þið eruð alltaf að tala um samráð, við erum að tala um fullt af hlutum sem þið hafið lofað að yrði í samráði við okkur, eins og í umferðarmálum, þéttingu byggðar og svo þetta mál hér með Spöngina. Það hefur ekki verið neitt samráð við okkur. Þannig að er þetta ekki bara einhver fagurgali stjórnmálanna - sífellt verið að ræða um samráð sem er svo ekki neitt? “

Heiða svaraði þá og áréttaði frekar um Spöngina: „ Það er ekki búið að skipuleggja þetta. Það er búið að skrifa undir þessa viljayfirlýsingu og ég vona að það sem kemur út úr þessu verði spennandi og gott. “

- Fer breytingin á Spönginni þá í grenndarkynningu? - var spurt.

Ólöf Örvarsdóttir, sviðsstjori umhverfis- og skipulagssviðs, stendur hér við hlið Steins Jóhannssonar, sviðsstjóra skóla- og frístundasviðs Reykjavíkurborgar og Þorsteins Gunnarssonar borgarritara á fundinum í gær.

Ólöf Örvarsdóttir, sviðsstjóri umhverfis- og skipulagssviðs , kom þá Heiðu borgarstjóra til aðstoðar varðandi umræðuna um Spöngina og sté í pontu.

„ Það er fasteignafélagið Reitir sem eiga Spöngina og hafa hug á því að bæta við hana og komu til máls um það við borgina og skrifað var undir viljayfirlýsingu; uppbyggingarsamkomulag. Það sem við gerum svo er að vinna og gera skipulagslýsingu að breytingu að ósk þeirra. Þessi skipulagslýsing fer í samráðsgátt. Svo hefst deiliskipulagið sem fer líka í samráðsgátt. Þetta verður ekki grenndarkynning heldur auglýst og hagaðilum sem búa næst Spönginni verður sent bréf. Þannig að þetta er bara fyrsta skrefið. Þetta er tillaga komin frá Reitum sem eru lóða- og fasteignaeigendur á svæðinu og okkur ber að taka ósk þeirra til stjórnsýslulegrar meðferðar .“

HAFIÐ ÞIÐ EKKERT LÆRT AF GRÆNA GÍMALDINU?

Fundargestur reis þá upp og sagði: „ Hafið þið ekkert lært af Græna gímaldinu sem þið byggðuð í Breiðholti. Ég bý í blokk við Spöngina og við komum til með að missa allt sólarljós við þær tillögur sem hafa verið kynntar. Mér líst ekkert á þetta .“

Þá svaraði Ólöf : „ Það er ekki rétt í þessu tilviki, það liggja ekki fyrir neinar endarlegar tillögur. Reitir eru með ósk um að byggja upp og svo gerum við skipulagslýsingu þar sem fram koma allar forsendur og síðan fer þetta í lögbundið samráð. Ég lofa þér því að þetta mun ekki fara fram hjá þér .“

- Það er búið að teikna þessar tillögur Reita! - greip þá fundargesturinn inn í „ og kynna þær með teikningum. “

„ Ég get ekki ábyrgst það sem Reitir gera. Auðvitað skoða Reitir tækifæri eins og öll önnur fasteignaþróunarfélög gera ,“ bætti Ólöf við.

„ Verður þetta samt ekki allt á forsendum þeirra ,“ svaraði þá fyrirspyrjandi.

Þetta var kjarninn í umræðunni um Spöngina á fundinum og stækkun hennar. - JGH

Trausti Harðarson, íbúi í Grafarvogi, hér fyrir miðri mynd lét svo sannarlega til sín taka á fundinum og hjólaði í borgarstjóra varðandi stækkun Reita á Spönginni og það uppbyggingarsamkomulag sem borgin hefði gert við Reiti og Heiða hefði sjálf undiritað.

Hér má sjá aðra afstöðumynd af hugmyndum Reita að stækkuninni í Spönginni. Svæði merkt 5 er húsnæði Hagkaupa, nr. 6 þar sem bókasafnið er - og nr. 1 er þar sem Bónus er núna. Takið eftir byggingunum lengst til hægri sem teygja sig inn á lóð Borgarholtsskóla og eru við beygjuna fyrir neðan skólann.

Guðni Aðalsteinsson, forstjóri Reita, og Heiða Björg Hilmisdóttir borgarstjóri við undirritun samkomulagsin. Auk uppbyggingar við Spöngina samþykkti borgarráð samkomulag við Reiti er varðar Suðurlandsbraut 56 (Metróreit) og Nauthólsveg 50–52 (Loftleiðareit).

„Þið verðið að eiga fleiri börn í Grafarvogi“

Tue, 10 Feb 2026 13:49:30 GMT

Skólamálin bara á góma á fundi borgarstjóra í bókasafninu í Spönginni í gær.

Þannig fékk Heiða Björg spurningu um það hvers vegna 1. til 10. bekkur væri ekki í öllum skólum innan allra hverfa í Grafarvogi. Bent var á að nokkrir skólar væru ekki fullsetnir - og var Hamraskóli nefndur sérstaklega í því tilfelli.

Það hefur verið hluti af rökum borgaryfirvalda fyrir þéttingu byggðar að innviðir, eins og skólar og leikskólar, séu ekki fullnýttir.

Heiða Björg borgarstjóri fékk Stein Jóhannsson , sviðsstjóra skóla- og frístundasviðs Reykjavíkurborgar , til að aðstoða sig og fór hann yfir skólamálin í Grafarvogi og í stuttu máli sagði hann að þau væru í góðu lagi - þrátt fyrir að einhverjir skólar væru ekki með bekki upp í tíunda bekk.

Einn ungur fundargestur bað þá um orðið og sagði að þegar hann liti yfir salinn og sæi aldur fundarmanna skýrði það talsvert fyrir sér hvers vegna allir skólar í Grafarvogi væru ekki fullsetnir.

Fundarmenn höfðu svo sem gaman af þessum ummælum þótt þeir segðu á móti að þeir væru ekki á sama máli og borgaryfirvöld varðandi innviðina.

„ Þið verðið að eiga fleiri börn í Grafarvogi ,“ sagði Heiða í léttum dúr og með bros á vör þegar hún lokaði þessu máli og bað um næstu spurningu. - JGH

Steinn Jóhannsson, sviðsstjóri skóla- og frístundasviðs Reykjavíkurborgar, fór stuttlega yfir skólamálin í Grafarvogi þegar þau báru á góma á fundinum.

Sigrún Ásta sló Heiðu út af laginu með 523 nýju íbúðunum. Salurinn: „Þetta er víst rétt.“

Tue, 10 Feb 2026 11:39:07 GMT

Mesta hitamálið í Grafarvogi til nokkurra ára hefur verið þétting byggðar í Grafarvogi sem núverandi meirihluti í borginni hefur að mestu sett á ís, fyrir utan lóðirnar við Hverafold og Starengi. Þess vegna kom það á óvart hversu mikið borgarstjóri var sleginn út af laginu með fyrstu spurningu fundarins sem Sigrún Ásta Einarsdóttir bar fram. Ætla hefði mátt að borgarstjóri væri sérstaklega vel undirbúinn varðandi spurningu um þéttingu byggðar í hverfinu.

Sigrún Ásta hefur látið mjög að sér kveða gegn þéttingu byggðar í Grafarvogi og verið öflug og skelegg á fundum um málið.

Hún hóf spurningu sína á því að rifja upp að íbúar í Grafarvogi hefðu sent inn 1.386 athugasemdir og mótmælt kröftuglega þéttingu 340 íbúða sl. vor. ( Sjá kort og frétt Grafarvogur.net hér til upprifjunar )

Hún sagði síðan að þegar umsagnarfresturinn hefði runnið út, þ.e. 15. maí sl., hefði borgarráð engu að síður samþykkt þennan sama dag Húsnæðisætlun Reykjavíkurborgar 2025 til 2034 þar sem talað væri um 523 íbúðir á þéttingarreitum í Grafarvogi.

Heiða þverneitaði að þetta væri rétt hjá Sigrún Ástu og varð kurr í salnum. „ Þetta er víst rétt ,“ fékk borgarstjóri að heyra mjög ákveðið frá fundarmönnum.

SIGRÚN ÁSTA GAF SIG EKKI

Sigrún Ásta gaf sig ekki og spurði Heiðu Björg af ákveðni hvar þessar 183 umfram-íbúðir við fyrrnefndar 340 íbúðir ættu að vera í Grafarvogi, skv. Húsnæðisáætluninni , og fylgdi svo eftir með þessari spurningu: „ Munt þú beita þér fyrir að Húsnæðisáætlunin verði leiðrétt fyrst þetta eru ekki réttar tölur?“

Heiða svaraði henni ekki og bað um næstu spurningu.

En hvað er rétt og rangt í þessu?

Það fer ekkert á milli mála að í Húsnæðisáætlun Reykjavíkurborgar , sem samþykkt var 15. maí sl. og Heiða , þá orðin borgarstjóri (21. feb. 2025) og skrifaði undir, er gert ráð fyrir 523 nýjum íbúðum í Grafarvogi.

Það má glöggt sjá hér í Húsnæðisáætluninni á bls. 62. Þar fer ekki á milli mála varðandi áætlaðan fjölda íbúða til úthlutunar í Grafarvogi. - JGH

Skýrt og skorinort: 523 íbúðir. Úr Húsnæðisáætlun Reykjavíkurborgar sem samþykkt var 15. maí í fyrra eða sama dag og umsagnarfresturinn rann út varðandi 340 nýjar íbúðir í Grafarvogi og Grafarvogsbúar mótmæltu kröfuglega.

Heiða Björg Hilmisdóttir borgarstjóri við upphaf fundarins í gær. Hún virtist slegin út af laginu í byrjun fundarins við spurningu Sigrúnar Ástu.

Klukkan rúmlega fimm og beðið eftir borgarstjóra. „Tafðistu í umferðinni,“ var hún spurð um og hún neitaði því. Þá skellihló salurinn.

Lykilbyggingarsvæði borgarinnar næstu tíu árin, skv. Húsnæðisáætluninni.

Núverandi meirihluti setti þéttingu byggðar í Grafarvogi á ís - og sagði Heiða Björg á fundinum í gær að það væri næsta meirihluta að ákveða þéttingu byggðar í hverfinu.

Við Hverafold 7, fyrir neðan Torgið. Það er búið að úthluta þessari lóð.

Starengi. Búið að úthluta þessari lóð. Þarna verður byggt alveg ofan í hringtorgið við golfvöllinn.

Liggurinn munurinn á 340 íbúðunum og þeim 523 sem Sigrún Ásta nefndi við borgarstjóra í stórfelldum íbúðakjarna fasteignaþróunarfélagsins Reita í Spönginni? Þar gera Reitir ráð fyrir að byggja allt að 170 íbúðir í nokkrum blokkum, eins og sjá má á þessari mynd.

Hitafundur með Heiðu borgarstjóra. Fundarmönnum fannst mörg svörin ansi rýr

Tue, 10 Feb 2026 00:18:56 GMT

Heiða Björg Hilmisdóttir borgarstjóri hélt fund síðdegis með Grafarvogsbúum á bókasafninu í Spönginni og sannast sagna átti borgarstjóri nokkuð í vök að verjast og þótti fundarmönnum oft á tíðum svör Heiðu ansi rýr. Við segjum betur frá fundinum á morgun en fundurinn var liður í fundaröðinni Samtal borgarstjóra við borgarbúa.

Heiða Björg lét bíða eftir sér og klukkan var orðin átta mínútur yfir fimm þegar hún mætti til leiks - of sein. Auðvitað var hún spurð að því hvort hún hefði tafist í umferðinni við gatnamót Strandvegar og Rimaflatar.

Hún svaraði því neitandi - og þá hló salurinn dátt. Tónninn á fundinum var sleginn. Mátti skilja á orðum Heiðu að hún hefði farið aðra leið.

ÞÉTTINGIN MÁL NÆSTA MEIRIHLUTA - SEGIR HEIÐA

Helstu tíðindi fundarins voru þau að þéttingu byggðar í Grafarvogi hefur að mestu verið slegið á frest af núverandi meirihluta - og var salurinn alls ekki sannfærður um að búið væri að slá þéttinguna af.

Umferðarmálin fengu mikla umfjöllun - og ekki síst gatnamótin við Strandveg og Rimaflöt sem flestir Grafarvogsbúar eru bálreiðir yfir. Samgöngustjóri borgarinnar gaf í skyn að breytingin á ljósunum hafi verið mistök og að þau verði færð í fyrra horf.

Þá mátti skilja á Heiðu að vel komi til greina að litlu strætisvagnarnir gangi inn í Gufuneshverfið en borgin var gagnrýnd harðlega fyrir að fara í uppbyggingu á því hverfi án nokkurra innviða þar. Það hlyti að vera hægt að fjölga bílastæðum í Gufunesi.

SPÖNGIN - HAFIÐ ÞIÐ EKKERT LÆRT AF GRÆNA GÍMALDINU?

Þá urðu töluverðar umræður um Spöngina - sem fasteignafélagið Reitir eiga - og stórfellda stækkun hennar. Framkvæmdunum var líkt við virki og voru fundarmenn alls ekki sáttir við þessa stækkun og hve mikið bílastæðum fækkar á svæðinu.

Hver verslar í verslunarmiðstöð sem er með fá bílastæði? - spurðu menn. Þá hafa íbúar áhyggjur af sólarleysi og skuggamyndun og ræða um Spöngina sem nýtt gímald!

Hafið þið ekkert lært af Græna gímaldinu í Breiðholti? - var hrópað!

Einn sagði: „ Þið komið hingað í hverfið og talið á þann hátt sem enginn venjulegur maður skilur.“ Og bætti við: „ Manni finnst eins og þegar þið í ráðhúsinu mætið hingað upp eftir að þá sé það eins og innrás. Hvað er annars allt þetta fólk í ráðhúsinu að gera? “

TALIÐ UM SAMRÁÐ EN HLUSITÐ EKKI

Svo kom þetta: „ Þið talið um ramráð og samtal - en hlustið aldrei á okkur .“

Svo þetta: „ Hvað er þetta með borgarlínuna og Gufunes. Þú sagðir í viðtali að borgarlínan myndi bjarga samgöngumálunum í Gufunesi en geturðu sagt íbúum þar hvenær hún kemur .“

Meira um einstök mál á morgun og frekari útskýringar Heiðu og borgarstarfsmanna. - JGH

Algjört rugl. Ljósin skapa stórhættu. Fólk brjálað og ekur núna eftir gangbrautinni

Mon, 09 Feb 2026 14:38:40 GMT

Það fer ekki á milli mála að breytingin á umferðarljósunum við Strandveg og Rimaflöt fer illa í ökumenn og skapa núna stórhættu í umferðinni - í stað þess að auka öryggið. Ökumenn fara hver af öðrum yfir grasbalann við Strandveg og aka eftir gangbrautinni í norðurátt - sem og yfir á Gylfaflöt.

Ökumaður sem var á leið í norðurátt hafði samband við Grafarvogur.net kl. 14:15 og sagðist hafa beðið í óratíma áður en hann komst að ljósunum við Gullinbrú og Hallsveg - og að umferðin hefði vart mjakast þótt það væri grænt ljós.

Hann sagði að þetta væri engu lagi líkt og hvað þá á þessum tíma dags, upp úr klukkan tvö að degi til. Þá sagði hann að ökumenn fjögurra bíla hefðu misst þolinmæðina í biðröðinni og ekið yfir grasbalann og eftir gangbrautinni - og það skapaði að sjálfsögðu stórhættu.

„Þetta var nú í rugli fyrir en þessi breyting á ljósunum við Strandveg og Rimaflöt er algjört rugl. Hverjir ráða þessu eiginlega?,“ bætti hann við bálreiður í biðröðinni. - JGH

Umferðarljósunum var breytt í gærdag og Grafarvogsbúar eru að upplifa bið sem aldrei fyrr. (Mynd úr safni.)

Grafarvogur.net hefur margoft skrifað um umferðarljósin og gatnamótin við Strandveg og Rimaflöt. Breytingunni var skellt á í gær. Nú eru umferðin farin að fljóta yfir grasbala og eftir gangbrautinni við Strandveg - og söuleiðis yfir á Gylfaflötina. (Mynd úr safni).

Umferðarteppan var nú nógu mikil fyrir en núna hafa ökumenn misst þolinmæðina. All í rugli klukkan tvö eftir hádegi á virkum degi. (Mynd úr safni frá sl. sumri).

Til hamingju Grafarvogsbúar - Fjölnir vann báða bikarana í körfunni. „Sturluð mæting!“

Sun, 08 Feb 2026 20:43:26 GMT

Til hamingju Grafarvogsbúar! Fjölnir tók báða bikarana í körfunni í Smáranum í dag og eru því bikarmeistarar í tveimur yngri flokkum í , 9. flokki (strákar 14 ára) og 11. flokki (strákar 16 ára).

Ekkert nema stórkostlegt! Það sem meira var; þeir fengu svo sannarlega góða hvatningu. Grafarvogsbúar flykktust í Smárann og studdu við bakið á strákunum með þessum frábæra árangri.

Fyrri leikurinn, í 9. flokki, hófst í hádeginu og kepptu Fjölnispiltar við ÍA, Skagamenn, og sigruðu nokkuð örugglega 78-66.

Seinni leikurinn hjá 11. flokki hófst kl. 16:45 og þar lögðu Fjölnismenn gott lið KR-inga með tveimur stigum; 79-77.

Meðfylgjandi myndir eru fengnar hjá Arnari B. Sigurðssyni.

Þegar Grafarvogur.net hafði samband við hann eftir leikina sagði hann að þetta hefðu verið frábærir leikir hjá Fjölnismönnum og þeir væru þakklátir: „Það var sturluð góð mæting úr Grafarvoginum á leikina og fyrir það viljum við þakka,“ segir Arnar.

Stórkostlegur árangur og ljóst að það er gríðarlega gott starf unnið í körfunni í Grafarvogi.

Grafarvogur.net óskar strákunum til hamingju með bikarmeistaratitlana tvo.

Strákar, þið eru vel að þessu komnir og eruð frábærir. Takk fyrir að koma með bikarana í hverfið okkar góða, Grafarvoginn. - JGH

Bikarmeistarar 2026. Enginn smá fögnuður, eðlilega, hjá strákunum í 11. flokki (16 ára) eftir nauman sigur á KR-ingum í úrslitaleiknum.

Bikarmeistarar 2026! Þeir stigu nánast trylltan dans strákarnir í 9. flokki (14 ára) eftir sigurinn á ÍA, Skagamönnum.

Hverjir eru bestir? 9. flokkur. Fjölnismenn fagna og lyfta bikarnum í mikilli sigurvímu.

Grafarvogsbúar geta fagnað. Tveir bikarar í Grafarvoginn. Fjölnismenn, 9. og 11. flokkur, unnu báða úrslitaleikina í Smáranum í dag og fengu mikla hvatningu frá mörgum Grafarvogsbúum sem lögðu leið sína í Smárann í dag til að hvetja þessar hetjur.

Lögreglan og sérsveit lögreglunnar með mikla aðgerð í Grafarvogi eftir hádegi

Sun, 08 Feb 2026 17:47:10 GMT

Lögreglan og Sérsveit ríkislögreglustjóra voru með mikla aðgerð í Grafarvoginum eftir hádegi í dag. Það var fyrir algera tilviljun að Grafarvogur.net ætti leið um Borgaveginn þegar aðgerðin stóð yfir og yrði vitni að henni.

Þegar Grafarvogur.net hafði samband við lögregluna til að fá upplýsingar um hvað þarna hefði verið um að ræða - og hvort aðgerðin tengdist leit lögreglunnar að meintum árásarmanni sem grunaður er um að hafa stungið annan mann fyrir utan skemmtistað í miðbæ Reykjavíkur í nótt - varðist lögreglan allra upplýsinga og neitaði að tjá sig að svo stöddu um hvað þarna hefði verið um að ræða. Mbl.is var með frétt um málið í morgun.

Í frétt mbl.is núna síðdegis segir að maðurinn hafi verið handtekinn á þriðja tímanum í dag í íbúðarhúsnæði.

Grafarvogur.net getur hins vegar ekki, vegna viðbragða lögreglunnar þegar leitað var til hennar í dag, staðfest að um þetta sama mál sé að ræða og að árásarmaðurinn hafi verið handtekinn í Grafarvogi eftir hádegi. - JGH

Frétt Morgunblaðsins núna síðdegis.

Frétt mbl.is í morgun. Sérsveitin var mætt í Grafarvoginn eftir hádegi í dag og tók þar þátt í aðgerðum lögreglunnar.

Frá aðgerð lögreglunnar í Grafarvogi eftir hádegi í dag. Svarti bíllinn yst til vinstri á myndinni er bifreið Sérsveitar ríkislögreglustjóra.

Nú fjölmennum við í Smárann og hvetjum Fjölni í körfunni. Alvöru tvíhöfði hjá Fjölni á morgun!

Sat, 07 Feb 2026 20:13:28 GMT

Það er heldur betur stór dagur á morgun hjá Fjölni í körfunni og sýnir okkur hvað gróskumikið starf er unnið hjá körfuboltadeild félagsins. Fjölnir á tvö lið í úrslitum VÍS-bikarsins í yngri flokkunum en keppt verður á morgun í Smáranum til úrslita.

Núna er lag fyrir Grafarvogsbúa að fjölmenna í Smárann í Kópavoginum og hvetja strákana t il sigurs. Þetta er alvöru tvíhöfði á morgun, eins og Fjölnismenn segja sjálfir um keppnina á morgun.

„Við hvetjum alla okkar stuðningsmenn til að mæta á völlinn og styðja strákana okkar til sigurs! Áfram Fjölnir!,“ segir Arnar B. Sigurðsson Fjölnismaður.

Fyrri leikurinn hefst kl. 12:00 í 9. flokk drengja en þar keppir Fjölnir við ÍA frá Akranesi.

Seinni leikurinn hefst kl. 16:45 í 11. flokki en þar keppir Fjölnir við KR.

Þetta verða magnaðir leikir og það verður auðvitað meiri möguleiki á að bikararnir komi í Grafarvoginn á morgun ef stákarnir eiga sitt lið í stúkunni sem hvetur þá til dáða. - JGH

9. flokkur. Kl. 12:00 í Smáranum á morgun.

11. flokkur. Kl. 16:45 í Smáranum á morgun.

Hvað ætlar borgin að gera við húsnæði Ársólar? Hvernig verða leikskólamálin leyst?

Sat, 07 Feb 2026 18:53:47 GMT

Grafarvogur.net gerði sér ferð að leikskólanum Ársól í Húsahverfi í dag en margir íbúar velta því fyrir sér hvað verði gert við þetta húsnæðí sem er í eigu Reykjavíkurborgar. Einkafyrirtækið Skólar ehf. hefur rekið þarna leikskóla fyrir 54 börn á aldrinum níu mánaða til þriggja ára í húsnæðínu. Mygla fannst í því á síðasta ári og var starfsemi skólans þá flutt tímabundið annað. Borgin rifti svo leigusamningnum við Skóla ehf. hinn 1. janúar sl. á þeim forsendum að húsnæðið henti ekki lengur undir starfsemina og metur borgina það svo að það sé of illa farið og ónothæft. Engu að síður hefur verið ráðist í talverðar framkvæmdir við húsið og parket og fleiri innanstokksmunir rifnir úr húsnum og settir í gám fyrir utan sem er opinn með öllu draslinu í.

Vísir var með frétt um það um miðjan janúar sl. að samkvæmt bréfi sem stjórnarformaður Skóla ehf sendi foreldrum barna á leikskólanum sagði Reykjavíkurborg upp leigusamningi vegna leikskólans sem er við Völundarhús 1 í byrjun janúar með sex mánaða fyrirvara. Þá sagði mbl.is frá því í byrjun apríl á síðasta ári að vandræði væru í skólanum vegna myglu og starfsfólk treysti sér ekki til að mæta til vinnu.

Fram kom í frétt Vísis í janúar sl. að foreldrar barna á leikskólanum hefðu miklar áhyggjur og væru í hálfgerðu áfalli enda ekki alveg ljóst hvernig leikskólamálin verða leyst - enda ekki hlaupið að því að fá nýtt leikskólapláss. Mikil ánægja hefur ríkt með starfsemi Skóla ehf. í Ársól.

Starfsemi leikskólans hefur verið rekin í öðru húsnæði í hverfinu undanfarna mánuði. Það húsnæði, við Húsaskóla, mun hins vegar ekki heldur standa leikskólanum til boða frá og með 30. júní næstkomandi.

Þegar Grafarvogur.net var þarna á ferð í dag vakti stór gámur fyrir utan leikskólann athygli en hann var fullur af parketi, timbri og öðrum innanstokksmunum úr skólanum. Borgin hefur augljóslega ráðist í töluverða vinnu til að rífa innan úr húsunum til að fjarlægja mygluna.

Gámurinn er opinn og mætti borgin láta fjarlægja hann fyrr en seinna - svona líka í ljósi þess hvers eðlis innvolsið er. - JGH

Mikil ánægja hefur verið með starfsemi leikskólans sem Skólar ehf. hafa rekið. Leikskólanum var lokað á síðasta ári vegna myglu og fengu börnin inni tímabundið í húsnæði við Húsaskóla sem ekki verður á lausu frá og miðju sumri.

Að sögn íbúa sem Grafarvogur.net ræddi við hefur enginn sést þarna í nokkrar vikur og umgengnin, þ.e. draslið á lóðinni, vekur athygli.

Umgengnin sem vekur athygli. Þessi gámur er fyrir utan leikskólann og borgin hefur augljóslega lagt vinnu í fjarlægja parket og ýmsa innanstokksmuni úr skólanum vegna myglunnar. Þennan gám mætti nú fjarlægja fyrr en seinna - ekki síst í ljósi þess hvers eðlis innvolsið er.

Þessa mynd fékk Grafarvogur.net senda frá íbúa í hverfinu sem segir að nokkuð sé um liðið síðan einhver sást þarna við vinnu. En hvað með þennan frágang á þakinu?

Þessa mynd fengum við sömuleiðis frá íbúa sem prílaði upp á þakið til að sjá hvernig umhorfs væri þar. Auðvitað þarf að klára svona verk þegar menn eru byrjaðir á því á annað borð. Svona frágangur er ekki til fyrirmyndar.

Hvernig væri nú að koma þessum gámi í burt við fyrsta tækifæri!?

Hliðinu hefur verið endanlega lokað fyrir þau 54 börn sem voru í ungbarnaleikskólanum. Þetta er nokkuð stór leikskóli. Fimm álmur og gott útisvæði.

Tveir skáksnillingar í Fjölni fá styrk úr afrekssjóði! Glæsilegt og til hamingju

Fri, 06 Feb 2026 17:13:19 GMT

Til hamingju Héðinn Steingrímsson og Dagur Ragnarsson - og þið öll í skákdeild Fjölnis. En tveir skákmenn í Skákdeild Fjölnis, stórmeistarinn Héðinn Steingrímsson og alþjóðlegi skákmeistarinn Dagur Ragnarsson , eru í hópi 13 íslenskra skákmanna sem fá styrk úr afrekssjóði í skák 2006. Þeir eru svo sannarlega vel að þessu komnir. Glæsilegt!

Við úthlutun var meðal annars horft til árangurs og virkni árið 2025 og áætlun um virkni í skák fyrir árið 2026. Héðinn fær 9 mánaða úthlutun en Dagur til 3. mánaða.

Héðinn Steingrímsson hefur teflt með Skákdeild Fjölnis frá árinu 2007 og oftar en ekki á 1. borði.

Dagur er uppalinn Fjölnismaður og var kjörinn skákkarl Fjölnis tvö síðustu ár, 2024 og 2025. Árið 2024 var hann einnig valinn Íþróttamaður Fjölnis.

Þeir Héðinn og Dagur hafa báðir teflt í A-sveit Fjölnis, Íslandsmeistara skákfélaga 2024 og 2026.

Þess má geta að Dagur hóf árið 2026 með öruggum sigri á Skákþingi Reykjavíkur, sem er nýlokið, og hlaut með sigrinum titilinn Skákmeistari Reykjavíkur 2026.

Héðinn Steingrímsson hefur teflt með Skákdeild Fjölnis frá árinu 2007 og oftar en ekki á 1. borði.

Dagur Ragnarsson er uppalinn Fjölnismaður og var kjörinn skákkarl Fjölnis tvö síðustu ár, 2024 og 2025. Árið 2024 var hann einnig valinn Íþróttamaður Fjölnis.

Ekki er öll vitleysan eins. Hver stelur veðurstöð í Geldinganesi?

Wed, 04 Feb 2026 11:27:01 GMT

Ekki er öll vitleysan eins. Hver stelur veðurstöð í Geldinganesi? Hlynur Sigurgíslason í Kæjaklúbbnum á Geldinganeseiði skrifar inn á FB-síðu klúbbsins að veðurstöðin á Geldinganesi sé horfin af vedur.is.

„Ég hafði samband við veðurstofuna til að vita hvort hún hefði verið lögð niður og kemur þá í ljós að henni hefur verið stolið!,“ skrifar Hlynur.

Og Hlynur bætir við: „Góðu fréttirnar eru þær að það á að setja upp nýja stöð, en það er þó ekki fremst á forgangslistanum. Vonandi gerist það sem fyrst því þessi veðurstöð er mikilvægt öryggistæki fyrir kayakklúbbinn.“

Frá Geldinganeseiði þar sem vegur liggur út í Geldinganes en þetta er vinsæl gönguleið. Einhverjir sem áttu leið um stálu hins vegar veðurstöðinni í Geldinganesi.

Eru alltaf jólin? Eru engin tímamörk á jólaskrautinu?

Tue, 03 Feb 2026 22:16:01 GMT

„Það eru ekki alltaf jólin,“ sagði íþróttamaðurinn forðum eftir að hafa tapað illa í kappleik eftir ágæta sigurgöngu.

En það er þetta með jólaskrautið. Hvenær á að taka það niður og kveðja hátíðina? Sitt sýnist hverjum. Altént hefur sá tími lengst til muna sem jólaseríur prýða hús og híbýli frá því sem áður var þegar flestir tóku seríurnar niður eftir þrettándann; eða fljótlega eftir hann.

Margir setja jólaseríurnar upp um miðjan nóvember og hafa þær svo fram í miðjan febrúar, eða í þrjá mánuði. Jólaskraut einn fjórða af árinu! Það er talsvert. „Kannski eru jú alltaf jólin,“ eftir allt saman.

Hér er alls ekki hvatt til þess í því reglugerðarsamfélagi sem við búum í að njörva niður og fastsetja e-h tíma sem jólaseríur eiga að skína og lýsa upp í skammdeginu.

Það verður hver að hafa þetta eins og hann vill.

En það er svosem allt í lagi að pæla í því hvort það séu engin tímamörk á jólaskrautinu. - JGH

Smekklegt og fínt - og minnir svo sannarlega á jólin. Er einhver eðlismunur á því að vera með marglitar perur eða hvítar þegar kemur að því að vera með jólaseríur langt fram í febrúar? Að það sé í lagi að hafa kveikt á þeim hvítu lengur.

Einlitar hvítar. Finnst fólki að einlitar ljósar perur sé jólaskraut sem geti varað lengur inn í febrúar? Það er nú það, allt er þetta smekksatriði.

Þetta fallega tré á hæðinni við Borgaveg og Melaveg er sett upp í lok nóvember af Reykjavíkurborg - og skreytingin gerir það að jólatré í hugum flestra. Það skartar sínu fegursta komið fram í febrúar.

Sama tré og horft til suðurs með höfnina m.a. í baksýn.

Jólalegt í febrúar. Marglita jólasería.

Fuglalíf við voginn. Þeir flutu hratt í útstreyminu í veðurblíðunni í morgun

Mon, 02 Feb 2026 21:45:17 GMT

Veðurblíðan í vetur styttir veturinn og gerir allt miklu léttara. Eini hvellurinn til þessa kom í lok október - og þá líka svo um munaði.

Það er ekki oft sem gengið er um á miðjum þorranum, dag eftir dag í 6 til 7 stiga hita, og nánast í sumarblíðu.

Það var útstreymi úr Grafarvoginum þegar Grafarvogur.net var á ferðinni í morgun og gaman að sjá sjófuglana fljóta með í útflæðinu fyrir framan Bryggjuhverfið.

Það eru fáir staðir á höfuðborgarsvæðinu - ef nokkrir - sem slá út gönguferðir á göngustígunum meðfram ströndinni í Grafarvoginum.

Nálægð við náttúruna, voginn og sundin blá er engu lík og afgerandi. - JGH

Æðarfugl og endur á útflæðinu í morgun fyrir framan Bryggjuhverfið.

Blikar og kollur.

Holufyllt í Hamrahverfi - langur listi í viðgerðum á götum borgarinnar

Mon, 02 Feb 2026 20:23:32 GMT

Hin einmuna veðurblíða kemur að góðum nótum varðandi viðgerðir á götum borgarinnar því víða eru þær illa farnar og stórar holur hafa myndast í malbikið. Ein nokkuð stór og erfið var í Hlaðhömrum og var fyllt í morgun og síðan sléttstraujuð af þeim hjá Malbikunarstöðinni Höfða.

„Listinn er langur og við förum víða til að laga og holufylla,“ sagði Stefán Veigarsson, vinnuvélastjóri og gröfustjóri. „Það er átak í gangi. Við byrjuðum niðri í Sundagörðum í morgun og löguðum ansi stóra holu þar í malbikinu og síðan lá leiðin hingað upp eftir í Grafarvoginn. Það er af nógu að taka og það bætist sífellt á listann.“

Bíddu við - Stefán en það stendur Benni Palli á gröfunni? „Já, ég er að leysa kappann af í dag.“ - JGH

Hlaðhamrar í Grafaravogi í morgun. Átak í gangi hjá borginni við holufyllingar. Listinn er langur og það bætist sífellt á hann.

Stefán Vagnsson, vinnuvélastjóri og gröfumaður. „Byrjuðum í Sundagörðum í morgun og færðum okkur svo hingað upp eftir í Grafarvoginn.“

Stórvirk vinnuvél en handaflið er aldrei langt undan í gatnaviðgerðum. Jonas heitir hann þessi og er frá Litháen og talaði ágæta íslensku. „Ég er að læra íslensku og reyna að ná málinu.“

Þetta er hún Lína langsokkur, býr í Foldunum, og er af Havanakyni

Mon, 02 Feb 2026 17:24:29 GMT

Göngustígurinn í Hamrahverfinu í Grafarvogi meðfram sjónum er með þeim bestu í bænum. Þar rakst Grafarvogur.net á hana Línu í veðurblíðunni í morgun. Hún býr í Foldahverfinu og er stundum kölluð Lína langsokkur. Hún var þar í gönguferð með eigendum sínum, þeim Guðrúnu Birgisdóttur og Chuck Mack.

Lína er 2ja ára og sérlega fallegur hundur. Hún er ættuð frá Kúbu, af svonefndu Havanakyni. „Hún er ofboðslega þægileg,“ segir Guðrún. „Ég átti tvo Cavalíer-hunda áður en Lína tekur þeim fram, finnst mér. Hún fer ekki úr hárum sem er algjör lúxus við Havanakynið og þá eru þeir einstaklega barngóðir. Og þótt þeir séu svona litlir eru þeir mjög duglegir og fara í fjallgöngur með eigendum sínum ef því er að skipta. Þeir eru áberandi hraustir og harðir af sér.“

Þau G uðrún og Chuck Mack búa í Funafold og segja að fyrir vikið sé hún stundum nefnd Lína Funafold af barnabörnunum þótt Lína langsokkur sé mun algengara og skemmtilegra „Hún elskar börn og er ólm í að leika við barnabörnin. Hún vill helst kúra undir sæng með þeim þegar ég er að passa þau og hafa það kósý.“

Guðrún vann um árabil í Háskóla Íslands - en var blaðamaður á árum áður og vann meðal annars á Vikunni undir ritstjórn Sigurðar Hreiðars.

Chuck Mack er bandarískur og þekktur hönnuður; hannaði m.a. Gírafastólinn svonefnda sem er hluti af Chuck Mack Design.

Þau hafa búið í Grafarvogi í um aldarfjórðung. Gaman að rekast á þau í morgun. - JGH

Lína með eigendum sínum í morgungöngunni, Guðrúnu Birgisdóttur og Chuck Mack hönnuði.

Lína er barngóð og algjör töffari. Vill helst kúra undir sæng með barnabörnunum og hafa það kósý.

Ljósadýrð í fánalitum í Grafarvogi - íslenska liðið frábært en Danir einfaldlega bestir

Sun, 01 Feb 2026 20:59:17 GMT

Það er alltaf ákveðin stemning í því þegar einstaklingar og fyrirtæki taka upp á því að bjóða litadýrð í íslensku fánlitunum til stuðnings íslenska landsliðinu. Þannig var þetta við Smárarima í dag sem og á byggingu Landsnets við Gylfaflöt.

Þetta var stór dagur hjá íslenska liðinu sem spilaði við Króta um bronsið en því miður hafðist það ekki vegna afleitrar byrjunar íslenska liðsins þar sem dauðafærum var klúðrað. Í svona leikjum þarf allt að ganga upp og hvert smáatriði skiptir máli.

Íslenska liðið er frábært með marga framúrskarandi leikmenn en Danir eru einfaldlega bestir í handbolta.

En við eigum talvsert inni, eins og sagt er. - JGH

Húsnæði Landsnets við Gylfaflöt. Íslensku fánalitirnar í mikilli litadýrða.

Þetta er öflugt - ljósasjóið við bílskúrshurðina góðu við Smárarima 3 í dag, sem vakti mikla athygli á aðventunni fyrir framúrskarandi jólaskreytingar, var með íslenski fánann „blaktandi“ í dag.

Atvinnulífið byrjað að spila varnarleik - góðir gestir í Hluthafaspjalli ritstjóranna

Sat, 31 Jan 2026 22:16:08 GMT

HLUTHAFASPJALLIÐ. Það var stuð í stúdíóinu hjá okkur félögunum Sigurði Má í Hluthafaspjalli ritstjóranna á Brotkast.is sl. föstudag og góðir gestir - að venju - sem mættu til okkar.

Þetta voru þau Hermann Guðmundsson , forstjóra Kemi, Snædís Ögn Flosadóttir , forstöðumaður á mörkuðum hjá Arion banka og Guðrún Högnadóttir , framkvæmdastjóra FranklinCovey á Íslandi.

Svo við notum íþróttamál þá fer ekki á milli mála að atvinnulífið er byrjað að spila varnarleik og þess sjást víða merki. Fjármálastjórarnir hafa nú oftar orðið á fundum innan fyrirtækja.

Hér er stutt klippa með nokkrum brotum frá öllum í þættinum. Allur þátturinn fer síðan í loftið í opinni dagskrá síðdedegis á morgun, mánudag, og hægt að horfa á hann á Spotify og Youtube. - JGH

Ritstjóri Grafarvogur.net á meðal fjórtán sem fengu gullmerki Blaðamannafélagsins

Fri, 30 Jan 2026 21:26:59 GMT

Það var ánægjulegt fyrir mig sem ritstjóra og útgeganda Grafarvogur.net að vera heiðraður með gullmerki Blaðamannafélags Íslands ásamt fjórtán öðrum fyrir að hafa starfað í faginu í yfir 40 ár og helgað blaðamennskunni ævistarfið. Þarna vorum við þrír sem höldum úti fréttamiðlum og eru hvort tveggja í senn ritstjórar og útgefendur.

Á opnunarmyndinni hér að ofan er ég með félaga mínum í hlaðvarpinu Hluthafaspjall ritstjóranna, Sigurði Má Jónssyni , en svo skemmtilega vildi til að hann var einnig sæmdur gullmerki félagsins. Við unnum saman um tíma á DV fyrir um fjörutíu árum.

Eftir að hafa útskrifast sem viðskiptafræðingur af hagfræðibraut frá Háskóla Íslands vorið 1980 vann ég í eitt ár sem aðstoðarmaður Konráðs Guðmundssonar , hótelsstjóra á Hótel Sögu. En eitthvað var það við ritvélina sem togaði í mig og ég hóf störf snemma árs á DV árið 1982, eða fyrir 44 árum, aðeins nokkrum mánuðum eftir að síðdegisblöðin tvö, Vísir og Dagblaðið, voru sameinuð í Síðumúlanum forðum.

Þarna voru raunar fleiri gamlir vinnufélagar frá DV-árunum í Síðumúlanum forðum sem fengu gullmerki félagsins; eða þeir Þorsteinn Joð og Arnar Páll Hauksson . Nokkuð síðan ég hef hitt þá.

Skapti Hallgrímsson , eigandi og ritstjóri Akureyri.net var sömuleiðis í heiðurshópnum en við kynntumst vel þegar ég var óvænt beðinn um að fara norður sumarið 1985 og taka við DV á Akureyri en þar var ég í tvö ár. DV og Mogginn voru þá bæði með blaðamenn og skrifstofur á Akureyri og var töluverð keppni á milli blaðanna í bænum. Við stofnuðum Norðurlandsdeild blaðamannafélagsins á þessum árum ásamt blaðamönnum á Degi og fleirum á svæðinu. „Og lögðum deildina líka niður,“ heyrðist í horni þegar ég færði þetta í tal í hófinu síðdegis.

Páll Ketilsson , ritstjóri og útgefandi Víkufrétta var sömuleiðis í hópnum en við vorum báðir með sjónvarpsþætti um árabil á ÍNN og Hringbraut. - Jón G. Hauksson

Með Skapta Hallgrímssyni, til hægri, ritstjóra og útgefanda Akureyri.net en við kynntumst vel fyrir fjörutíu árum þegar undirritaður var beðinn um að fara norður og taka við DV á Akureyri en Skapti var þar fyrir Moggann.

Með Páli Ketilssyni, ritstjóra og útgefanda Víkurfrétta í Keflavík en við vorum báðir með sjónvarpsþætti á ÍNN og Hringbraut um árabil.

Með félaga mínum í hlaðvarpinu Hluthafaspjall ritstjóranna, Sigurði Má Jónssyni, en við fjöllum vikulega um viðskipti, efnahagslífið og helstu tíðindi skráðra fyrirtækja í Kauphöllinni.

Jökullinn gaf tóninn í dag fyrir leikinn við Dani: „Sól slær silfri á voga, sjáðu jökulinn loga“

Fri, 30 Jan 2026 18:35:46 GMT

Spennan er heldur betur að magnast í handboltanum á EM í Danmörku. Það er leikdagur og við Íslendingar etjum kappi við Dani kl. 19:20 og eigum við ekki að segja að við höfum betur - að minnsta kosti var Snæfellsjökull fagur að sjá þegar Grafarvogur.net myndaði hann um fjögurleytið í dag frá Hallsteinsgarði og einhvern veginn gaf þessi tignarlega sjón af þessari náttúruperlu Snæfellinga tóninn og von fyrir leikinn.

Sundin blá blasa hér við - nánast spegilsléttur sjór - og ég er ekki frá því að það bliki á hafið.

Við kyrjum svo eftir leik: „ Sól slær silfri á voga, ég sé jökulinn loga .“

Það verður erfitt að leggja Danina en það er allt hægt. ÁFRAM ÍSLAND.

Svo er hér allur textinn við lagið Ég er kominn heim en það er m.a. á plötunni Er völlur grær með Óðni Valdimarssyni.

ÉG ER KOMINN HEIM

Er völlur grær og vetur flýr
og vermir sólin grund,
kem ég heim og hitti þig,
verð hjá þér alla stund.

Við byggjum saman bæ í sveit
sem brosir móti sól,
þar ungu lífi landið mitt,
mun ljá og veita skjól.

Sól slær silfri á voga,
sjáðu jökulinn loga.
Allt er bjart fyrir okkur tveim
því ég er kominn heim.

Að ferðalokum finn ég þig
sem mér fagnar höndum tveim.
Ég er kominn heim,
já ég er kominn heim.

ÁFRAM ÍSLAND! - JGH

Fallegur er hann. Horft yfir sundin blá frá Hallsteinsgarði yfir til Snæfellsnes. „Sjáðu jökulinn loga.“

Gömlu ljósin ennþá við Höfðabakka og Bíldshöfða - ljósin tímastillt við Höfðabakkann

Thu, 29 Jan 2026 11:58:22 GMT

Búið er að skipta út gamla ljósabúnaðinum við fern gatnamót af fimm við Höfðabakkann, skv. svari Reykjavíkurborgar við fyrirspurn Grafarvogur.net . Enn á eftir að skipta út gömlu umferðarljósunum við gatnamót Bíldshöfða og Höfðabakka.

Þá kemur fram í svarinu til okkar að nýju umferðarljósin við Höfðabakkann sem eru komin í gagnið séu tímastillt - og það séu mismunandi stillingar á ljósunum yfir sólarhringinn.

„ Eins og er eru nokkrar mismunandi stillingar í gangi eftir tíma dags. Verið er að safna upplýsingum um flæðið eins og það er núna og er stillingum breytt þegar og ef þörf er talin á ,“ segir í svari borgarinnar til Grafarvogs.net.

Framkvæmdirnar við Höfðabakkann hófust sl. sumar og hafa svo sannarlega ekki farið framhjá Grafarvogsbúum - enda hafa þær dregist verulega á langinn og ennþá er verið að ganga frá helsta jarðraskinu.

Grafarvogur.net er sá fjölmiðill landsins sem hefur fjallað langmest um framkvæmdirnar við Höfðabakkann frá því þær byrjuðu um mitt sumar. Upphaflega stóð til að skipta út aðeins út gömlu umferðarljósunum en í framhaldinu var tekin ákvörðun um að lengja og breikka umferðareyjarnar til að auka öryggi gagandi og hjólandi - þótt flæðið sýni að umferð bíla sé algerlega yfirgnæfandi við þessa miklu umferðargötu.

Sem sagt: Verkið hefur gengið út á að setja upp nýjan ljós- og stýribúnað og að auki skynjara við gatnamótin - og er hann kominn í gagnið við Bæjarháls, Höfðabakkabrú, Dvergshöfð og Stórhöfða.

Ljósin eru hins vegar ennþá tímastillt, þ.e. fyrirfram ákveðnar mínútur á hvert ljós - og eru mismunandi stillingar í gangi innan sólarhringsins, sem tekur væntanlega mið af skynjurunum. - JGH

Háir staurar með nýjum ljósbúnaði og skynjurum - sem mæla flæðið - setja svip sinn á öll gatnamótin við Höfðabakkann þar sem framkvæmdirnar hafa staðið yfir í margar mánuði. Ljósin eru hins vegar tímastillt og ákveðnar mínútur á hvert ljós - en engu að síður eru mismunandi stillingar á ljósunum innan sólarhringsins.

Gráu kassarnir við gatnamótin geyma hugbúnaðinn og taka við upplýsingum frá skynjurum til að mæla flæðið. Tímastillingar eru engu að síður ennþá við öll gatnamótin þó þær séu mismunandi innan dagsins og sólarhringsins.

Þetta eru skynjararnir sem hafa verið settir upp.

Enn á eftir að skipta út gömlu umferðarljósunum við gatnamót Bíldshöfða og Höfðabakka.

Hulunni svift af búnaðinum - allt grænt í norður meðan allt rautt í suður

Thu, 29 Jan 2026 10:10:08 GMT

Plastið er enn á en núna hefur hulunni verið svift af nýju umferðarljósunum við gatnamót Standvegar, Rimaflatar og Gufunesvegar. Eins og við sögðum frá fyrr í vikunni eru nýju beygjuljósin til að auka öryggið en munu óhjákvæmilega hægja aðeins umferðinni á mesta annatímanum. Það verður meiri bið á rauðu.

Samkvæmt upplýsingum frá Reykjavíkurborg til Grafarvogur.net þá verður umferðarljósastýringunni breytt á þá leið að þeir bílar sem aka í norður eftir Strandvegi fá allir grænt á sama tíma; þ.e. beygjuljósin til vinstri í Gufunesið, áfram norður Strandveginn og svo þeir sem beygja til hægri inn á Rimaflöt. Umferðin á móti, úr norðri, stöðvast öll á meðan á rauðu ljósi.

Þeir sem aka Strandveginn úr norðri á suðurleið fá sömuleiðis allir grænt á sama tíma; þ.e. beygja til vinstri inn á Rimaflöt, áfram í suðurátt og svo þeir sem beygja til hægri inn á Gufunesveginn. Umferðin á móti, úr suðri, stöðvast öll á meðan á rauðu ljósi.

Síðan eru það þeir sem aka frá Rimaflötinni og Gufunesvegi fá áfram grænt ljós samtímis - eins og verið hefur - og umferðin úr bæði suðri og norðri eftir Strandveginum bíður á meðan á rauðu ljósi.

Umferðin eftir Strandveginum úr suðri og norðri mun því ekki renna samtímis yfir gatnamótin, líkt og áður. - JGH

Það verður ekki grænt ljós samtímis fyrir umferðina eftir Strandvegi sem kemur úr gagnstæðri átt. Þegar grænt verður í suðurátt (eins og á myndinni) verður framvegis allt rautt hinum megin, þ.e. fyrir þá sem eru á norðurleið eftir Strandveginum. Svo og öfugt.

Svona hefur þetta verið; grænt samtímis fyrir þá sem aka í gagnstæða átt eftir Strandvegi, þ.e. í norður og suður. Þetta breytist núna.

Hér var strætóskýli sett upp alveg við gatnamótin. Ástæðan núna fyrir uppsetningu beygjuljósanna er að þeir sem eru á leiðinni hér til vinstri niður í Gufunes þurfa oft að bíða sem fremstu ökutækin og koma þá í veg fyrir að umferðin norður Strandveginn komist almennilega framhjá. Með öðrum orðum, það vantar pláss þarna til hægri við rauða ljósið - svo fyrra fyrirkomulag gæti gengið.

Leikdagur í dag og vonandi verður orka í liðinu. Tristan er „Nobbari“ og sjónvarpsstjarna Orku

Wed, 28 Jan 2026 08:20:11 GMT

SKEMMTILEGT INNLIT. Það er leikdagur í dag og vinnist leikurinn á móti Slóvenum í handbolta spilum við um verðlaunasæti á Evrópumótinu. Það er óhætt að segja að íslenska þjóðin sitji sem límd fyrir framan kassann og horfi á leikina.

Eitt þeirra fyrirtækja sem auglýsa í kringum mótið - og er með sérlegar frumlegar auglýsingar - er Orka við Stórhöfða sem er með sjálfan Grafarvoginn í bakgarðinum hjá sér.

Leikarinn í auglýsingum Orkunnar heitir Tristan Theodórsson , ættaður frá Norðfirði, („Nobbari“) og hann hefur svo sannarlega vakið athygli og slegið í gegn í auglýsingunum. Til dæmis fjallaði Morgunblaðið sérstaklega um hann skömmu fyrir sl. jól undir fyrirsögninni Óvænt stjarna í bílrúðuauglýsingum. Þegar kemur að handboltanum veifar hann íslenska fánanum og hrópar: Áfram Orka.

Grafarvogur.net leit við hjá Orkunni þegar Ísland lék við Sviss í gær í mjög svo spennuþrungnum leik sem endaði með jafntefli. Það var rólegt í afgreiðslunni, eðlilega, allir að horfa á leikinn; líka viðskiptavinirnir.

Friðrik Hreinsson verslunarstjóri var sallarólegur í afgreiðslunni þegar inn var komið - þótt spenna væri í lofti á skjánum í afgreiðslunni. „Við vonum bara að þeir hafi nægilega orku í leiknum og klári þetta. En þetta sýnist svolítið erfitt hjá okkar mönnum,“ segir hann brosandi.

Friðrik Hreinsson, verslunarstjóri Orku við Stórhöfðann. Auðvitað var stór sjónvarpsskjár í afgreiðslunni (raunar tveir) fyrir þá viðskiptavini sem líta inn meðan á leikjum stendur.

„Það er auðvitað mjög gaman að fylgjast með íslenska liðinu, strákunum okkar, og auðvitað stendur þjóðin á bak við þá í blíðu sem stríðu,“ bætir hann við.

Orka er þekkt fyrir að skipta um og selja bílrúður en fyrirtækið er einnig fyrirferðarmikið í sölu á lakki á bíla. Þeir eru margir brúsarnir sem blasa við á rekkunum í afgreiðslunni.

Friðrik hefur unnið um árabil hjá Orku og verið verslunarstjóri frá árinu 2003, eða frá því hann byrjaði hjá fyrirtækinu.

TRISTAN SLÆR Í GEGN

Um auglýsingarnar, segir hann að það hafi verið skemmtileg tilviljun hvernig Tristan kom inn í þessar auglýsingar. Hann hafi verið starfsmaður Orku um tíma en verið í leiklistinni og Kvikmyndaskólanum samhliða og sú hugmynd hafi kviknaði á covid-tímabilinu að hann byggi til auglýsingu sem færi á vef fyrirtækisins og youtube.

„Hann sló í gegn. Þar með var boltinn farinn að rúlla og ekki aftur snúið. Tristan hefur gert tugi auglýsinga fyrir okkur þótt nokkuð sé um liðið síðan hann hætti að vinna hjá fyrirtækinu, enda sumarstarfsmaður.“

Það eru þrjátíu sekúndur eftir af leiknum við Sviss og allt á suðupunkti.

„Er þetta ekki tapað?,“ segir viðskiptavinur sem lítur óvænt inn. „Nei, nei, við erum manni yfir, eigum boltann - og getum unnið,“ stynjum við Friðrik samhljóma upp við blessaðan kúnnann - sem auðvitað fór beint að skjánum til að horfa á lokasóknina. Sú sókn fór eins og hún fór.

Friðrik Hreinsson verslunarstjóri stillir sér hér upp við hlið stjörnu fyrirtækisins í bílarúðaauglýsingum Orkunnar - Tristani Theodórssyni.

Friðrik segir að Orka selji allt fyrir útlit bílsins; þó fyrst og fremst bílrúður og lakk.

„Við seljum og skiptum um rúður - og eigum allar tegundir bílrúða, sama hvar þær eru í bílnum. En við erum einnig mjög stórir í lakkinu og seljum allt sem viðkemur sprautun og réttingum og þar eru sprautu- og réttingarverkstæðin eðilega okkar stærstu viðskptavinir. Nú, svo er það maðurinn á götunni, einstaklingar sem koma hingað til að versla og það er mjög drjúgt.“

Um 25 starfsmenn vinna hjá Orku og auðvitað er mikill áhugi á handbolta hjá fyrirtækinu - eins og hjá þjóðinni.

- Heldurðu að við vinnum Slóvena?

„Verðum við ekki að vona það. Það væri frábær árangur að komast í undaúrslitin. Þetta eru orkumiklir strákar og þeir hljóta að taka þetta,“ segir Friðrik sallarólegur sem fyrr. - JGH

Auglýsingar Orku vekja svo sannarlega athygli og það er Tristan Theodórsson, fyrrum starfsmaður fyrirtækisins, sem leikur þar aðalhlutverkið,

Leik lokið á móti Sviss en trúin á undanúrslitin þó ekki að baki. Þeir félagar í afgreiðslunni hjá Orku; Guðmundur Finnbjarnason og Friðrik Hreinsson verslunarstjóri.

Sinubruninn í Úlfarsárdal - mikið eldhaf og tólf slökkviliðsmenn á vettvangi

Tue, 27 Jan 2026 22:32:49 GMT

Það var verulegt eldhaf í sinubrunanun í Úlfarsárdal í kvöld þegar mest var og sást eldurinn víða að.

Tólf slökkviliðsmenn börðust við eldinn og náðu að slökkva hann á tiltölulega skömmum tíma. Þetta er býsna stórt svæði sem brann en það er skiki afmarkaður af Lambhagavegi og Mímisbrunni.

Hér má sjá frétt mbl.is af sinubrunanum og myndskeið sem tekið var á vettvangi.

Það logaði glatt í sinunni enda gróðurinn óvenjulega þurr á þessum árstíma eftir gott tíðarfar að undanförnu - og raunar gott veður það sem af er vetri.

Upphafsmyndina hér að ofan tók Ingveldur Jóna Gunnarsdóttir. - JGH

Frá vettvangi í kvöld. Horft til suðurs að Grafarholti. Lambhagagróðurhúsin eru fyrir miðri mynd.

Eldhafið var býsna mikið þegar mest var. Ljósmynd: Ingveldur Jóna Gunnarsdóttir.

Skikinn sem brann er fyrir miðri mynd og afmarkast af Lambhagavegi og Mímisbrunni, fyrir sunnan hann.

Útlit fyrir að hægist enn á umferðinni um gatnamót Strandvegar og Rimaflatar

Tue, 27 Jan 2026 18:20:29 GMT

Verið er að setja upp beygjuljós við gatnamót Strandvegar, Rimaflatar og Gufunesvegar - einhver fjölförnustu gatnamótin í Grafarvogi en þarna eru oft miklar umferðartafir á annatímum og svakalegur hægagangur í umferðinni.

Ekki hefur Grafarvogur.net upplýsingar um árekstrartíðni við þessi gatnamót en því verður ekki á móti mælt að beygjuljós auka væntanlega öryggið þarna þarna þegar umferðin er hvað mest.

Grafarvogur.net hefur hins vegar bent á að gera verið eitthvað róttækt til að liðka til fyrir umferð við þessi gatnamót vegna hins mikla umferðarþunga. En taki menn eftir því að í tillögum meirihlutans í borginni um þéttingu byggðar frá því sl. vor var hins vegar gert ráð fyrir að þrengja meira að þessum gatnamótum þannig að erfiðara yrði um vik að ráðast í umfangsmiklar betrumbætur með öflugum umferðarmannvirkjum.

Enn á íbúum í Gufunesi eftir að fjölga til muna og ekki minnkar það álagið á þessi gatnamót. - JGH

Hún er oft erfið umferðin við þessi gatnamót. Enn mun hægjast á umferðinni þarna þegar beygjuljósum verður bætt við til að auka á öryggið við að taka vinstri-beygjuna af Strandveginum úr suðri niður í Gufunesið - og vinstri beygjuna inn á Rimaflötina úr norðri.

Þarna getur verið hröð umferð úr norðri (hvíti jeppinn) sem eykur hættuna á að beygja hér til vinstri niður í Gufuneshverfið.

Grafarvogur.net hefur nokkrum sinnum bent á að mikilvægt sé að liðka til fyrir umferðinni við þessi gatnamót með róttækum betrumbótum og öflugum umferðarmannvirkjum. Stefna borgarinnar hefur hins vegar verið að þrengja að gatnamótunum og viti menn að fyrir ofan rauða umferðarljósið (norðan við það) átti að troða niður einbýlishúsi m.v. þéttingartillögur frá því sl. vor - og til hægri, fyrir ofan bensínstöðina og Gullnesti, átti að byggja raðahús nánast ofan í Rimaflötinni. Á meðan er erfiðara um vik að liðka til með nýjum umferðarmannvirkjum og greiða úr umferð við þessi gatnamót.

Eitthvað virðist enn í land með snjalltæknina í öllum ljósunum við Höfðabakkann

Tue, 27 Jan 2026 17:15:20 GMT

Erfiðlega gengur að fá upplýsingar um nákvæma stöðu mála varðandi snjall-ljósin við fimm gatnamót Höfðabakkans en framkvæmdir hafa staðið yfir frá því um mitt sumar - og hafa Grafarvogsbúar svo sannarlega fylgst með gangi mála og hvernig miðað hefur áfram.

Ennþá virðist eitthvað í land með að ljósin „tali fullkomlega saman“ og að snjalltæknin hafi tekið brekkuna alveg yfir.

Það er verktakafyrirtækið Krafla sem hefur haft yfirumsjón með framkvæmdunum og sjá hefur mátt menn á þeirra vegum nýta sér góðviðrið undanfarna daga við lokafrágang, sníða og skera steina í kringum umferðarljósin.

Þetta mjakast en ekki mikið meira. - JGH

Annarri akreininni í beygjunni af Stórhöfða niður á Gullinbrúna var lokað á háannatímanum í dag vegna framkvæmda.

Hluthafaspjall ritstjóranna framvegis í loftið í opinni dagskrá síðdegis á mánudögum

Sun, 25 Jan 2026 23:22:48 GMT

Það eru nokkur tíðindi að hlaðvarpsþátturinn okkar Sigurðar Más Jónssonar á Brotkast.is, Hluthafaspjall ritstjóranna , verður framvegis sýndur í opinni dagskrá síðdegis á mánudögum.

Við tökum þáttinn jafnan upp í hádeginu á föstudögum. Nýjasti þátturinn sem tekinn var upp sl. föstudag þar sem við fengum þá Heiðar Guðjónsson , fjárfesti og nýkjörinn formann stjórnar Íslandsbanka, og Grím Sæmundsen, forstjóra Bláa lónsins frá upphafi og frumkvöðulinn að fyrirtækinu, fór einmitt í loftið sl. mánudag og hægt að nálgast hann á Youtube og Spotify - og auðvitað á efnisveitunni Brotkast.is.

Þess má geta að Grímur mun láta af störfum sem forstjóri Bláa lónsins um miðjan mars og setjast í stjórn fyrirtækisins.

Þetta var öflugur þáttur og hægt er að nálgast hann hér í heild sinni . Gjörið svol vel Grafarvogsbúar sem aðrir landsmenn!

Að venju byrjar þátturinn á spjalli okkar Sigurðar Más þar sem við tölum hispurslaust um það sem efst er á baugi í viðskiptalífinu og þá ekki hvað síst hjá skráðum fyrirtækjum í Kauphöllinni.

Ræddum sl. föstudag m.a. um verðbólguna, lækkandi gengi Íslandsbanka eftir stjórnarkjörið, verðhækkanir hins opinbera og Veitna - og auðvitað fórum við nokkrum orðum um Grænland en Amaroq rauf 100 milljarða virðismúrinn sl. fimmtudag. Þá komu kaup Símans á Öryggismiðstöðinni til tals en síðarnefnda fyrirtækið hefur miklar tekjur af hælisleitendum.

Mestu munaði þó um hve við fengum góða gesti til okkar - að venju. Að þessu sinni Heiðar Guðjónsson, fjárfesti og nýkjörinn formann stjórnar Íslandsbanka, og Grím Sæmundsen, forstjóra Bláa lónsins frá upphafi og frumkvöðulinn að fyrirtæki, en hann lætur af störfum sem forstjóri um miðjan mars og sest í stjórn fyrirtækisins.

Þá er ætlunin að setja inn fleiri stuttar klippur úr þætttinum á FB, Instagram, Youtube og Tiktok. - JGH

Heiðar Guðjónsson í stúdíóinu með okkur félögum.

Grímur Sæmundsen, forstjóri, frumkvöðull og stofnandi Bláa lónsins.

Við birtum talsvert af glærum í hverjum þætti. Hér er hluti þeirra sem við brugðum á skjáinn í þættinum.

Upphaf Þorra í miklum hlýindum - bóndadagurinn í dag og víða blótað í kvöld

Fri, 23 Jan 2026 09:58:47 GMT

Bóndadagurinn er í dag og það verða víða blóm á borðum í tilefni dagsins. Bóndadagurinn markar upphaf Þorra en síðasti dagur þorra, þ.e. daginn áður en Góan byrjar, nefnist þorraþræll. Ljóðið Þorraþræll hefst á hinu þeirri þekktu setningu: Nú er frost á Fróni. Þorrinn byrjar núna í miklum hlýindum en óvenjuhlýtt hefur verið síðustu daga.

Í tilefni Þorrans verða víða þorrablót í kvöld. Raunar eru þau orðin svo vinsæl hjá íþróttafélögunum að nokkur þeirra byrjuðu á herlegheitunum um síðustu helgi en þá var t.d. stærsta þorrablót landsins, Grafarvogsblótið haldið í Egilshöll, líkt og við sögðum frá um síðustu helgi.

Um fyrsta dag Þorra segir í bréfi Jóns Halldórssonar í Hítardal (f.1665) til Árna Magnússonar frá árinu 1728, að sú hefð sé meðal almennings að húsmóðirin færi út kvöldið áður og bjóði þorrann velkomin, og inn í bæ, eins og um tignan gest væri að ræða.

Saga þorrablótanna er rakin til stúdenta í Kaupmannahöfn í kringum 1870, eða fyrir um 155 árum, sem komu saman í árlegri veislu með þennan forna og rammíslenska mat (geymsluaðferð) á borðum.

Það var svo veitingastaðurinn Naustið sem tók upp á því að efna til þorrablóta árið 1958 . - JGH

Blöðrur og íslenski fáninn á lofti og sungið hástöfum Gerum okkar besta í Kirkjuselinu í gær fyrir leikinn við Ungverja

Wed, 21 Jan 2026 10:11:31 GMT

Íslenska landsliðið í handknattleik fékk heldur betur hvatningu í samveru eldri borgara í Kirkjuselinu í Spöng í gærdag fyrir leikinn við Ungverja - sem vannst svo um kvöldið í miklum spennuleik.

Eftir helgistund og fyrirlestur, sem ég hélt um fjölmiðla og vefinn minn Grafaravogur.net , var brugðið á leik með blöðrur í fánalitunum og íslenska fánanun veifað óspart á sama tíma og sungið var Gerum okkar, gerum okkar besta, gamt lag handboltalandsliðsins eftir Valgeir Guðjónsson.

Svona til að æfa jafnvægislistina líka - samhliða því að hvetja íslenska landsliðið - var ákveðið að halda öllum blöðrum eins lengi á lofti og kostur væri.

Enginn blaðra sprakk - ekki frekar en landsliðið sem hélt vel út í leiknum og hafði mikla orku gegn Ungverjunum.

Skemmtilegt. - JGH

Íslenska landsliðið í handknattleik fékk góðan stuðning í Kirkjuselinu við Spöng í gærdag.

Áfram Ísland. Mikil stemning í samveru eldri borgara og vel til fundið hjá prestunum að koma með blöðrur og íslenska fánann og spila lag Valgeirs Guðjónssonar Gerum okkar besta til að bæta í gleðina.

Allir vel peppaðir fyrir leiknum.

Boltaleikur framundan og blöðrur á lofti.

Snillingurinn Lára Bryndís Eggertsdóttir organisti og píanóleikari með meiru hafði í nógu að snúast við að gera blöðrurnar klárar fyrir mannskapinn.

Ég flutti smá fyrirlestur um fjölmiðla og fréttamiðilinn minn Grafarvogur.net í þessari samveru eldri borgara í gær. Miðað við handahreyfingar var þetta ef til vill meira í ætt við prédikun.

Ánægjulegt að fá tækifæri til segja nokkur orð um fjölmiðla og kynna Grafarvogur.net í samveru eldri borgara í Kirkjuselinu í gær.

Ég hitti þarna gamla skólasystur mína úr menntó, Guðlaugu Ólöfu Ólafsdóttur. Svolítið síðan frá útskrift - aðeins fimmtíu ár.

Ævintýri níu glæsilegra Center-hótela í miðbænum byrjaði með því að pabbi hans þurfti að gista í Reykjavík

Tue, 20 Jan 2026 08:39:54 GMT

Hann er Grafarvogsbúi og hefur búið í Grafarvogi í fjörutíu ár. Flutti í Logafoldina fyrir fjörutíu árum, 1986. Heitir Kristófer Oliversson og kvæntur Svanfríði Jónsdóttur. Þau hjón eru einhverjir helstu hótelhaldarar landsins því þau eiga og reka Center-hótelkeðjuna í miðbæ Reykjavíkur. Alls níu hótel, hvert öðru glæsilegra, og á hótelkeðjan átta þeirra fasteigna sem hótelin eru rekin í.

Kristófer er forstjóri Center-hótelanna en hefur ennfremur verið formaður Fyrirtækja í hótel- og gistiþjónustu um árabil.

Við félagarnir Sigurður M. Jónsson fengum hann í hlaðvarpið okkar, Hluthafaspjall ritstjóranna , sl. föstudag en það er að finna á efnisveitunni Brotkast.is. Grafarvogur.net sýnir hér viðtalið við hann í heild sinni.

Í viðtalinu spyrjum við Kristófer m.a. að því hvernig hótelævintýri þeirra hjóna hafi byrjað árið 1994. Hann vann þá við ráðgjöf hjá PwC og eiginkonan, Svanfríður Jónsdóttir skurðhjúkrunarfræðingur vann á Landspítalanum. En svo gerðist það að faðir hans, sem bjó uppi á Akranesi, en þar er Kristófer fæddur og alinn upp, fór á eftirlaun og seldi húsið sitt á Skaganum og úr varð að hann gisti í stuttan tíma á gistihúsinu á horni Flókagötu og Snorrabrautar á meðan hann leitaði sér að íbúð í Reykjavík.

Og, boltinn fór að rúlla - að hætti Skagamanna og Grafarvogsbúa. - JGH

Grafarvogsbúinn og athafnamaðurinn, Kristófer Oliversson, eigandi og forstjóri Center-hótelanna í miðbæ Reykjavíkur, í stúdíóinu með okkur Sigurði Má Jónssyni í Hluthafaspjalli ritstjóranna á Brotkast.is sl. föstudag.

Fleiri myndir frá Guðrúnu Ólafsdóttur íbúa í Grafarvogi - m.a. töfrar frá Seyðisfirði

Tue, 20 Jan 2026 07:57:36 GMT

Guðrún Ólafsdóttir, íbúi í Grafarvogi - sem sendi okkur frábærar myndir af hinum sterku rauðu norðurljósum eftir kvöldmat í gærkvöldi og sem við birtum við góðar undirtektir lesenda - setti inn fleiri myndir af ljósasjóinu inn á samfélagsmiðlana undir miðnætti og meðal annars myndir sem hún fékk sendar frá Seyðisfirði.

Undur og stórmerki á himnum - svo sannarlega.

Hvílíkir galdrar með rauða litnum sem kom ógnarsterkur inn og við flest höfðum ekki séð áður í sjónarspili ljósa norðursins - og munum þó tímanna tvenna í þeim efnum.

Norðurljósin með sínum rauðleita blæ sáust víða um Norður-Evrópu í gærkvöld, til dæmis í Noregi og Hollandi.

Rauði liturinn var vegna kórónugoss að sögn Sævars Helga Bragasonar stjörnufræðings í samtali við Vísi - sem hann einnig er þekktur sem Stjörnu-Sævar. Sjá ennfremur FB-færslu hans í gærkvöldi.

„ Horfðu til himins ,“ segir í textanum. Hjá því var ekki komist í gærkvöldi. Töfrar náttúrunnar í himinhvolfinu á svona kvöldum eru engu líkir. - JGH

Frá Seyðisfirði í gærkvöldi. Magnþrungið. (Mynd frá Guðrúnu Ólafsdóttur)

Rauði liturinn í norðurljósunum vakti undrun allra. Í Grafarvogi í gærkvöldi. (Ljósmynd Guðrún Ólafsdóttir)

Ja, hérna, hvílíkir segulmagnaðir kraftar. Seyðisfjörður í gærkvöldi. (Mynd frá Guðrúnu Ólafsdóttur)

Í Gufuneskirkjugarði í gærkvöldi. (Ljósmynd Guðrún Ólafsdóttir)

Horft yfir Reykjanesskagann í gærkvöldi frá Skerjafirði. Rauð norðurljós. (Ljósmynd Helga B. Bjarnadóttir á FB)

Norðurljósin dansa dátt fyrir okkur Grafarvogsbúa þetta mánudagskvöld

Mon, 19 Jan 2026 21:03:14 GMT

Grafarvogur.net fór austur fyrir Elliðaárnar niður í bæ undir kvöldmat og þetta ljósasjó blasti við í Grafarvoginum, Hamrahverfinu , þegar heim var komið.

Við segjum ljósasjó en Nóbelsskáldið talaði um „show“ sem sjó þannig að sjómaður var ekki bara hefðbundinn sjómaður.

Myndir í þessari frétt eru frá Guðrúnu Ólafsdóttur, Grafarvogsbúa. Stórkostlegar myndir hjá henni sem hún sendi okkur.

Takk Guðrún fyrir þessar einstöku myndir af segulmögnuðu undri náttúrunnar í gærkvöldi.. - JGH

Frábær mynd sem Grafarvogsbúinn Guðrún Ólafsdóttir tók í kvöld. (Ljósmynd: Guðrún Ólafsdóttir)

Það er ekki oft sem rauði liturinn er svona sterkur og tekur vel á móti þeim græna. Þetta er alvöru ljósasjó í Grafarvoginum í kvöld. (Ljósmynd: Guðrún Ólafsdóttir)

Það er bara einn stórmeistari litanna - náttúran sjálf. (Ljósmynd Guðrún Ólafsdóttir)

Mótmæla bálstofu í Gufuneskirkjugarði - fróðleg grein frá þremur íbúum

Mon, 19 Jan 2026 12:31:57 GMT

Þrír Grafarvogsbúar skrifuðu mjög svo málefnalega grein í Vísi á dögunum þar sem þeir mótmæla áformum um bálstofu á Hallsholti í Gufuneskirkjugarði sem sögð eru byggja á deiliskipulagi frá árinu 2000. Þetta eru þau Þorsteinn Jóhannsson, íbúi í Vallarhúsum 59, Arnar Össur Harðarson, íbúi í Veghúsum 17 og Hlín Gísladóttir, íbúi í Fífurima 20

Í greininni segir meðal annars: „Samkvæmt nýlegum tillögum mun byggð færast nær kirkjugarðinum. Í þeim tillögum er m.a. gert ráð fyrir íbúðabyggð á milli Hallsvegar og Gagnvegar. Hús sem byggð verða á því svæði gætu orðið í um 95 metra fjarlægð frá reykháfi væntanlegrar bálstofu. Einnig er stefnt að uppbyggingu íbúðabyggðar austan Víkurvegar. Það verður því í raun sama hver vindáttin er, útblástur frá bálstofunni mun ávallt berast yfir íbúðabyggð, skóla eða leikskóla.

Við vekjum sérstaka athygli á því að í um 350 m fjarlægð frá fyrirhugaðri staðsetningu, í stefnu ríkjandi vindáttar, er leikskólinn Fífuborg.

Við teljum staðsetningu bálstofu í Gufuneskirkjugarði vera tímaskekkju. Það er ekkert sem krefst þess að bálstofa sé í kirkjugarði eða í eða við kirkju. Bálstofan mun þjóna öllu landinu og því má gera ráð fyrir því að stór hluti af duftkerjum verði jarðsett í öðrum kirkjugörðum.

Bálstofa/líkbrennsla er atvinnurekstur sem getur haft í för með sér mengun en líkbrennslur eru starfsleyfisskyldar hjá heilbrigðisnefnd, sbr. 64. tl. IV. viðauka laga nr. 7/1998 um hollustuhætti og mengunarvarnir.

Mengandi starfsemi, líkt og hér um ræðir, á ekki heima í nágrenni við íbúðabyggð, leikskóla, skóla, íþróttasvæði og sundlaug, eins og verður, ef bálstofan verður reist í Gufuneskirkjugarði.“

Er Gufuneskirkjugarður réttur staður fyrir nýja bálstofu? Sitt sýnist hverjum, eins og gengur.

Þá segja þau í grein sinni að Kirkjugarðarnir hafi vitnað til bálstofunnar í Vestfold í Noregi sem megunarlausrar líkbrennslu og gera athugasemdir við þær fullyrðingar.

„Búnaður fyrirhugaðrar bálstofu í Gufuneskirkjugarði verður sambærilegur við þann búnað sem notaður er í Vestfold og það var einmitt horft til þeirrar bálstofu þegar val á búnaði var ákveðið.

Rekstur bálstofunnar í Vestfold hófst árið 2010. Í eftirlitsskýrslu heilbrigðiseftirlitsins í Vestfold frá því í nóvember 2022 kemur fram að kröfur í starfsleyfi um hitastig í eftirbrennsluhólfi og kröfur um bæði útblásturshraða og útblásturshitastig í reykháfi hafi ekki verið uppfylltar.“

Fróðleg grein og málefnaleg. - JGH

Sjá má grein þremenninganna í Vísi í heild sinni hér.

Sjá skýrslu kirkjugarðsráðs hér :

Ballið að byrja - stærsta þorrablót landsins hjá Fjölni í Egilshöll. 25 rétta veisla

Sat, 17 Jan 2026 19:27:04 GMT

Það er allt að verða klárt fyrir stærsta þorrablót landsins þetta árið - þorrablót Grafarvogs sem Fjölnismenn halda í Egilshöllinni.

Þegar Grafarvogur.net leit inn í salinn til að kanna gang mála upp úr klukkan átján áðan voru veislustjórar að æfa á fullu, búið að dekka upp á sérlega glæsilegan hátt, fjöldi öryggisvarða á staðnum og barþjónar tilbúnir með blöndunartækin; góða hristara.

Það stefnir í megastuð í Höllinni í kvöld, hinni einu sönnu Egilshöll okkar Grafarvogsbúa.

Það er Múlakaffi sem sér um kræsingarnar og eðli málsins samkvæmt var einn og einn diskur kominn í hús enda gert ráð fyrir vel yfir þúsund manna veislu. Það verður ekki gengið í gegnum súrt og sætt í kvöld heldur verður þarna boðið upp á gott stuð með súrmeti; 25 rétta veislu með nýmeti handa þeim sem eru ekki alveg klárir í sterkustu bitana.

Sameiginlegt þorrablót HK og Breiðabliks hefur til þessa verið stærsta þorrablót landsins en núna halda félögin sitt hvort blótið og þar með skýst Þorrablót Grafarvogs á toppinn.

Ballið er að byrja! Hér sé stuð! Góða skemmtun. - JGH

Veislustjóranir æfa hér á fullu á nítjánda tímanum í kvöld. Siggi Gunn ekur hér með Sölku Sól á matarvagni syngjandi glaða. Þau í æfingagöllum enda var þetta jú æfing. Betri klæðnaðurinn bíður kvöldsins.

Veisluborðið svignar; 25 rétta veisla, takk fyrir. Þorrablót Grafarvogs er jú alvöru skemmtun.

Einn og einn diskur kominn í hús enda stærsta þorrablót landsins þetta árið.

Dansgólfið bíður að að borðhaldi loknu.

Þorrablót Grafarvogs, góða kvöldið.

Fallegt er hangikjötið í þessari 25 rétta veislu.

Glösin komin á sinn stað - það verður sæmilegt uppvask eftir þetta partý.

Þessir veislustjórar sjá um að það verður hlegið, sungið, trallað og tjúttað af krafti í kvöld.

Hringborðin ýta undir hringborðsumræður.

Kvöldsónata í kyrrðinni í Grafarvogi - borgarljós og Bryggjuhverfi

Fri, 16 Jan 2026 21:36:31 GMT

Veðrið er hið klassíska umræðuefni - og ekki bara hér á landi. Það hefur verið einmuna tíð á höfuðborgarsvæðinu í vetur og snjólétt - sem betur fer - fyrir utan auðvitað hvellinn í lok október.

Þetta var sýnin út um gluggan á skrifstofu Grafarvogs.net í kyrrðinni sl. föstudagskvöld.

Borgarljósin urðu að eins konar vel samdri sónötu sem dansaði um á litríku nótnablaði; fallegri kvöldsóntu. - JGH

Ljósadýrð - horft yfir Bryggjuhverfið og Ártúnshöfðann úr Hamrahverfinu.

Kveiktu á perunni! Hér hafa menn kveikt á fleiri en einni peru.

Ljósin í bænum - speglast í spegilsléttum Elliðavoginum í kvöldkyrðinni.

Borgarljós og Bryggjuhverfi.

Horft upp að höfðanum með Stórhöfða fremstan í flokki. Bogabyggingin við Höfðabakka 9 - stórhýsið sem Íslenskir aðalverktakar byggðu á sínum tíma - skagar upp úr til vinstri á myndinni.

Takk fyrir komuna! Hressir stákar úr Kópavogi kynntu Takk-appið í Bónus í Spönginni

Fri, 16 Jan 2026 20:56:22 GMT

Þessir hressu piltar voru í stuði í Bónus í Grafarvogi og fullir þakklætis þegar viðskiptavinir sóttu verslunina heim í dag en framan á þeim stóð skýrum stöfum Takk. Það er svo sem á hverjum degi sem tekið er á móti manni með einu stóru takki og hvort maður hafi kynnt sér takk, nýtt app frá Högum sem heldur utan um nýtt vildarkerfi Haga.

Það var sl. miðvikudag sem Hagar kynntu vildarkerfið og settu appið í loftið. Það er einfalt og skilvirkt í notkun og mun bæta kjör, þjónustu og upplifun viðskiptavina Haga. Meðlimir í Takk-appinu fá aðgengi að sérstökum kjörum og fríðindum hjá Bónus, Hagkaup og Eldum rétt.

Appið veitir viðskiptavinum einnig aðgang að fleiri áhugaverðum tilboðum hjá samstarfsaðilum eins og Glans, Grill 66 og Lemon auk þess sem það veitir aðgengi að fjölbreyttum viðburðum, skemmtilegum leikjum og frekari þjónustu, skv. kynningu Haga.

Kurteisi kostar ekkert og það kostar heldur ekkert að þakka fyrir sig og segja takk - ekki satt? - JGH

Hressir strákar úr Kópavogi sem kynntu Takk-vildarkerfið í Bónus í Spönginni. Auðvitað var þeim þakkað fyrir að koma í Grafarvog með einu orði; takk.

Mikil samheldni þrátt fyrir harðar orrustur við taflborðið!

Fri, 16 Jan 2026 20:38:26 GMT

Það er allt komið á fullt í skákinni hjá Fjölni eftir jólahald og mættu 50 krakkar spenntir á fyrstu æfinguna. Mikil samheldni er hjá krökkunum þrátt fyrir að þeir takist á við taflborðið og heyi þar hverja orrustuna af annarri á hvítu reitunum og svörtu - og þar sem kóngar eru felldir eða gefast upp.

Í frétt frá skákdeildinni segir að teflt hafi verið var á tveimur stöðum og auk Helga Árnasonar stýrðu æfingunni ungmennin Sóley Kría, Ingi Hrafn, Emilía Embla og Emilía sem stóðu sig frábærlega og ná vel til krakkanna.

Strákarnir deildu efstu sætunum í fjölmennari flokknum en í yngri hópnum var það skákdrottningin Elsa María sem skaut öllum sínum andstæðingum ref fyrir rass. Ósigrandi í dag. Victor í 1. bekk, Martin og Jana komu næst að vinningum.

Arthur í Borgaskóla kom „heitur“ á skákæfinguna og reyndist sigurvegari dagsins með 5 vinninga af 5 mögulegum.

Aðrir verðlaunahafar. Anh, Ómar Jón, Kristófer Jökull, Helgi Tómas, Alexander Kári, ELMA, Patrekur, Sævar Svan og Erlendur.

PEDRO - hetja dagsins var valinn Bjartur sem hefur reynst afar hjálplegur við uppröðun og frágang hverrar æfingar og bætt árangur sinn mikið í skáklistinni.

Næsta æfing 22. jan. næsta fimmtudag og það verður ekki minna fjör þá - eða nammiát eftir orrusturnar.

Myndir eftir Helga Árnason. - JGH

Skákin er list herfræðinnar. Yngri hópurinn að byrja nýja skák. Elsa María sigurvegarinn í bleikum bol.

Skákin er list einbeitingarinnar. Hugsað stíft á öllum borðum.

Stórskemmtileg mynd Helga Árnasonar. Nóg af nammipokum á borðum og hér bíða menn spenntir eftir verðlaunaafhendingu og happdrættinu.

900 metra langt þrætuepli. Tenging Hallsvegar við Vesturlandsveg eykur umferð í Grafarvoginn um 15 þús. bíla á dag

Thu, 15 Jan 2026 22:53:24 GMT

Hún var athyglisverð greinin sem Friðjón Friðjónsson , borgarfulltrúi Sjálfstæðisflokksins, skrifaði í skoðanadálk Vísi í gær og ekki ólíklegt að þeir 900 metrar sem hann ræðir um verði að deilumáli - jafnvel meðal íbúa Grafarvogs; þótt flestir íbúar Grafarvogs hafi lýst verulegum áhyggjum af því að umferð um Hallsveg muni margfaldast við þessa framkvæmd en gert er ráð fyrir að um 12 til 15 þúsund bílar á dag munu bætast við umferðina inn í Grafarvoginn úr Grafarholti og Úlfarsárdal við framkvæmdina.

Greinin ber yfirskriftina: „ 900 metrar sem geta breytt Grafarvogi “ og segir Friðjón frá því að sjálfstæðismenn í borgarstjórn hafi lagt fram tillögu í borgarstjórn á dögunum um að sleppt verði að tengja Hallsveg við Vesturlandsveg eins og aðalskipulag Reykjavíkur til 2040 gerir ráð fyrir. Hann segir að ætla megi að tengingin stórauki umferð bíla inn í Grafarvog um Hallsveginn að Sundabrautinni (eða göngunum) - og að það muni kljúfa hverfið í sundur.

Núverandi meirihluti vinsri flokkanna í borgarstjórn vísaði tillögunni frá.

Þetta er fróðleg og málefnaleg grein sem vert er að lesa og um framkvæmd sem snertir okkur Grafarvogsbúa og mun hafa veruleg áhrif á hverfið okkar. Við birtum hér tengil á greinina í Vísi jafnframt sem við birtum hana í heild sinni.

Þessi 150 metra malarspotti heitir jú víst líka Hallsvegur. Gert er ráð fyrir að gera meira úr honum og tengja hann við Vesturlandsveginn - sem mun hafa verulega áhrif á núverandi umferð í Grafarvogi.

HÉR KEMUR GREIN FRIÐJÓNS UM AÐ KLJÚFA EKKI GRAFARVOGINN MEÐ TENGINGUNNI

„Í gildandi aðalskipulagi Reykjavíkur til 2040 er gert ráð fyrir að Hallsvegur verði framlengdur frá Grafarvogi að Vesturlandsvegi og skilgreindur sem tveggja akreina gata milli Vesturlandsvegar og Sundabrautar. Í aðalskipulaginu er þetta orðað skýrt: „Hallsvegur verður tveggja akreina gata frá Vesturlandsvegi að Sundabraut.“

Þessi setning skiptir máli vegna þess að hún sýnir að hér er stefnumótandi ákvörðun sem getur orðið að veruleika með stuttum fyrirvara, ef næstu skref í skipulagi verða tekin.

Allir þeir sem kunnugir eru staðháttum vita að Hallsvegur, sem liggur milli Folda og Húsahverfa annars vegar og Rimahverfis og Gufuneskirkjugarðs hinsvegar, liggur ekki upp á Vesturlandsveg. Þrátt fyrir að gert hafi verið ráð fyrir þeirri tengingu í aðalskipulagi Reykjavíkur í áraraðir. Enn á eftir að deiliskipuleggja þennan 900 metra bút sem vantar upp á, tenginguna sem myndi hleypa mikilli umferð beint inn í hverfið.

Tillaga Sjálfstæðisflokksins: Grafarvogur verði ekki klofinn í tvennt

Sjálfstæðisflokkurinn í borgarstjórn lagði til á síðasta borgarstjórnarfundi að þessi tenging yrði felld út úr aðalskipulagi og þannig yrði íbúum Grafarvogs gert ljóst að hverfið verði ekki klofið í tvennt. Engu breytir hvort Sundabraut verði í göngum eða á brú, Hallsvegur má ekki verða fljót umferðar sem klýfur Grafarvog.“

Á malarspottanum horft til vesturs eftir Hallsvegi. Flestir utanaðkomandi vita eflaust betur hvar Hallsvegurinn er þegar þeir heyra að hann er gatan við innkeyrsluna í Grafarvogskirkjugarð.

SUNDABRAUT OG NÝ TENGING: UMFERÐIN GÆTI MARGFALDAST

„Í umræðum um fyrirhugaða Sundabraut hafa íbúar Grafarvogs lýst verulegum áhyggjum af því að umferð um Hallsveg muni margfaldast. Í forathugun að samgöngugreiningu sem unnin var fyrir Reykjavíkurborg fyrir hið nýja Hallahverfi í Úlfarsárdal er gert ráð fyrir því að allt að 12 þúsund bílar á dag muni í framtíðinni nýta vegspottan, þessa 900 metra sem eiga að liggja frá Vesturlandsvegi að gatnamótum Víkurvegar og Hallsvegar. Svo eiga þessir bílar að hríslast um Grafarvoginn og helmingur þeirra mun hverfa þar til að kemur að hinum enda Hallsvegar, við Strandveg. Þá fjölgar þeim aftur, verða 15 þúsund og tengjast Sundabraut. Það má sjá á myndinni hér að neðan.“

Á þessari mynd er gert ráð fyrir stóraukinni umferð, 12 til 15 þúsund bílum, inn í Grafarvoginn að Sundabrautinni eða Sundagöngum, hvort heldur sem verður.

HALLLSVEGUR Á EKKI AÐ VERA STOFNVEGUR

„Það er ekki nauðsynlegt að tengja Grafarvog við Vesturlandsveg með þessum hætti. Núverandi umferðartölur sýna að Hallsvegur er þegar töluvert nýttur innan hverfisins. Áætlanir og gögn benda til þess að þúsundir bíla aka um veginn daglega. Í umræðum um tillögu okkar borgarfulltrúar Sjálfstæðisflokksins kom fram að um 6.000 bílar aka daglega á kaflanum milli Langarima og Strandvegar, og um 4.000 bílar á sólarhring fara Hallsveg að Víkurvegi .

Talningar sem finna má á Borgarvefsjá undirstrika að Hallsvegur þjónar nú þegar mikilvægu hlutverki fyrir Grafarvog, en er ekki hannaður sem stofnæð fyrir gegnumstreymi umferðar utan úr hverfinu.

Áhrifin snúa ekki aðeins að umferðarþunga heldur einnig að öryggi og lífsgæðum. Hallsvegur liggur í nánum tengslum við skóla- og íþróttasvæði og er í raun hluti af daglegum ferðavenjum barna og fjölskyldna. Íbúar hafa bent á að börn fari yfir Hallsveg til að komast í skóla og að Grafarvogslaug og íþróttasvæði Fjölnis liggi sunnan hans, með umferð barna yfir götuna vegna sund- og íþróttastarfs. Þetta er kjarni málsins: aukin bílaumferð mun grafa undan umferðaröryggi barna og ungmenna, skerða hverfisgæði og auka hljóðmengun.

ÓSAMRÆMI VIÐ MARKMIÐ AÐALSKIPULAGS 2040

Þetta er jafnframt spurning um samræmi við markmið aðalskipulags Reykjavíkur 2040. Aðalskipulagið leggur áherslu á mannvænleg borgarrými, lýðheilsu og vistvænar samgöngur. Þar er stefnt að því að draga úr bílaumferð, styðja við göngu, hjólreiðar og almenningssamgöngur, og verja gróin hverfi gegn óþarfa gegnumstreymisumferð. Í því ljósi er erfitt að réttlæta að halda inni tengingu sem líkleg er til að auka gegnumstreymi umferðar um íbúahverfi.

TILLÖGUNNI VÍSAÐ FRÁ, ÓVISSAN LIFIR

Þess vegna lagði Sjálfstæðisflokkurinn fram tillögu í borgarstjórn um að fella framlengingu Hallsvegar að Vesturlandsvegi út úr aðalskipulaginu. Tillögunni var vísað frá af meirihluta vinstri flokkanna, sem voru vonbrigði. Meirihlutanum fannst ótímabært að sýna Grafarvogsbúum að Grafarvogurinn verður ekki klofinn. Með þeirri ákvörðun er verið að halda inni áformum sem geta haft veruleg áhrif á Grafarvog. Afstaða meirihlutans, Samfylkingarinnar, Pírata, Sósíalista, Flokks fólksins og Vinstri grænna eykur óvissu og viðheldur skipulagsstefnu sem gengur gegn hagsmunum íbúa Grafarvogs.“

Höfundur er borgarfulltrúi Sjálfstæðisflokksins.

Aðeins tvær akgreinar. Hér þarf eitthvað að gera ef Hallsvegur á að verða stofnbraut í Grafarvogi en núverandi vegur er ekki hannaður sem stofnæð fyrir gegnumstreymi umferðar utan úr hverfinu.

Laga bryggjuna - verðlaunatillaga af „fríríki frumkvöðla“ í Gufunesi frá 2016 rifjuð upp

Wed, 14 Jan 2026 10:08:42 GMT

Við sögðum frá því á dögunum að sjálfstæðismenn hefðu lagt það til í umhverfisráði að laga þyrfti gömlu bryggjuna í Gufunesi, sem þjónaði á sínum tíma Áburðarverksmiðjunni í áratugi, enda væri hún illa farin og hættuleg á köflum.

Bryggjan þjónar hins vegar hundruð dorgveiðimanna sem leggja leið sín út á hana til að stunda bryggjuveiði - ekki síst í kvöldsólinni á fallegum sumarkvöldum - og það þrátt fyrir að hún sé afgirt og bannað sé að fara út á hana. Auðvelt að smokra sér framhjá stálgrindverkinu.

Í ljósi þessa er athyglisvert fyrir Grafarvogsbúa að skoða verðlaunatillöguna frá 2016 þar sem arkitektar fóru á flug með glæsilega hafnaraðstöðu og litlar ferjur sem gengju úr Gufunesi yfir í gömlu höfnina í miðbænum.

Svona leit verðlaunatillagan út árið 2016 og gekk út á „fríríki frumkvöðla“. Síðan hefur margt breyst og meiri áhersla verið lögð á íbúðabyggð en þessi tillaga sýnist gera ráða fyrir.

„FRÍKRÍKI FRUMKVÖÐLA“

Við birtum hér brot úr frétt á visir.is þegar sagt var frá tillögunni: Verðlaunatillaga í hugmyndasamkeppni um framtíðarskipulag Gufunessvæðisins gerir ráð fyrir að svæðið verði einskonar „ fríríki frumkvöðla. “

Arkitektastofan jvantspijker + Felixx hreppti fyrstu verðlaun og í tillögu stofunnar segir að Gufunes eigi að verða eins konar ventill fyrir ungt fólk sem kýs grósku og borgarbrag í stað úthverfa. Í Gufunesi verður blönduð byggð fyrir íbúðir, smærri atvinnurekstur, skapandi iðnað, menningu, menntun, sýningar- og atburði, ferðamannaiðnað og sjálfbærar samgöngur að því er fram kemur á vef Reykjavíkurborgar.“

Gamla Gufunesbryggjan var í eigu Faxaflóhafna en Reykjavíkurborg keypti hana um mitt ár 2015.

Gufunesbryggjan er gróðursæl og ljóst að flikka þarf verulega upp á hana áður en sýn arkitektana á hana frá 2016 getur orðið að veruleika. Sjá má glitta í efsta hlutann á grárri geymslu fyrir aftan skúturnar en það var hún sem varð eldsvoðanum að bráð fyrr í vikunni.

Þess má geta að fyrirtæki Baltasar Kormáks, RVK-studios, keypti um mitt ár 2016 fjórar fasteignir sem áður tilheyrðu Áburðarverksmiðjunni í Gufunes í þeim tilgangi að reisa kvikmyndaver á Gufunesi.

Í samningi borgarinnar við Baltasar fékk hann vilyrði fyrir 19.200 fermetra svæði austan við byggingarnar - en þar hefur fyrirtæki sem hann kemur að, Spilda ehf. , staðið að byggingu 700 íbúða við Jöfursbás 5 og 7 fyrir tugi milljarða að markaðsvirði og setja þær svip sinn á núverandi íbúðabyggð í Gufunesi - en þess má geta að íbúðirnar við Jöfursbás 5 eru enn í smíðum. - JGH

Óseldar íbúðir hrannast upp; dýr yfirbygging borgarinnar - og er halli ríkissjóðs vanmetinn?

Tue, 13 Jan 2026 11:32:44 GMT

Konráð S. Guðjónsson, hagfræðingur hjá IFS greiningu , hefur gefið út mjög athyglisvert rit þar sem hann fer yfir og greinir efnahagsmálin.

Konráð var gestur okkar Sigurðar Más Jónssonar í nýjasta þætti hlapvarps okkar, Hluthafaspjalli ritstjóranna , og fór yfir ýmislegt sem hann greinir í riti sínu.

Hann ræðir ræðir m.a. um að óseldar íbúðir hrannast upp á höfuðborgarsvæðinu; að skristofukostnaður borgarinnar á hvern íbúa er langtum meiri en hjá öðrum sveitarfélögum; hvort hallinn á nýsamþykktum fjárlögum ríkisstjórnarinnar sé stórlega vanmetinn og síðast en ekki síst hvort atvinnuleysi sé að aukast og störfum að fækka.

Þá veltir hann því upp hvort hlutdeildarlán á íbúðamarkaði vinni gegn tilgangi sínum og hækki verð íbúða þannig að það verði enn erfiðara fyrir ungt fólk að kaupa sína fyrstu íbúð. -

Fyrir utan grafíkina fylgja hér tvær stuttar klippur af spjalli okkar við Konráð. - JGH

Hvað er að? Stjórnunarkostnaður borgarinnar miklu meiri en hjá öðrum sveitarfélögum

Tue, 13 Jan 2026 10:23:32 GMT

Ekki verður annað séð en að Reykjavíkurborg sé illa rekin því stjórnunarkostnaður borgarinnar á hvern íbúa – skrifstofa sveitarfélagsins - er úr öllum takti í samanburði við önnur sveitarfélög á landinu og miklu hærri.

Konráð S. Guðjónsson , hagfræðingur hjá IFS greiningu, hefur gert úttekt á þessu og var gestur okkar Sigurðar Más Jónssonar í nýjasta þætti Hluthafaspjalls ritstjóranna þar sem hann ræðir þennan kostnað.

Hann segir að stjórnunarkostnaður borgarinnar á hvern íbúa - rekstrarkostnaður skrifstofunnar - ætti að vera lægstur allra sveitarfélaga því borgin ætti að njóta hagkvæmni stórrekstrar.

En hvað er eiginlega að?

Er yfirbyggingin við stjórnun borgarinnar svona alltof mikil? Það ber ekki á öðru. Þessar upplýsingar koma beint frá Sambandi íslenskra sveitarfélaga.

Hér má sjá stutta klippu þar sem hann ræðir þessi mál við okkur, félaganna. - JGH

Þegar Grafarvogurinn nötraði við kröftuga sprengingu fyrir tuttugu og fimm árum

Mon, 12 Jan 2026 21:31:33 GMT

Stórbruninn í Gufunesi núna síðdegis þar sem allt tiltækt lið slökkviliðsins í Reykjavík var kallað út leiðir hugann að því að þetta er ekki í fyrsta sinn sem öllu slökkviliðinu og slökkvibílum er stefnt á svæðið.

Margir gamlir Grafarvogsbúar muna eftir sprengingunni miklu sem varð að morgni í Áburðarverksmiðjunni í Gufunesi fyrir tuttugu og fimm árum; 1. okt. 2001. Sú sprening varð til það allri efnaframleiðslu, eins og ammoníakfrmleiðslunni, var hætt í verksmiðjunni.

Þegar Morgunblaðinu er flett um þennan atburð kemur fram að sprengingin varð klukkan sjö að morgni. Engan sakaði. En spreningin var svo öflug að hús í Grafarvogi nötruðu.

Sprengingin varð til þess að varpa ljósi á hvað það færi illa saman að vera með íbúðahverfi ofan í svæði verksmiðjunnar og varð til að flýta brottflutningi verksmiðjunnar.

Og þar með hvarf líka hinn frægi guli reykur sem lagði oft á tíðum frá verksmiðjunni.

Hér má sjá frásögn Morgunblaðsins af sprengingunni fyrir tuttugu og fimm árum. - JGH

Frásögn Morgunblaðsins eftir sprenginguna miklu 1. október 2001 í Áburðarverksmiðjunni. Grafarvogurinn nötraði.

Áburðarverksmiðjan var fyrsta stóriðjan á Íslandi. Núna er þar þekkt kvikmyndaver sem er vísir að nýrri stóriðju; kvikmyndaframleiðslu á Íslandi.

Alveg frá því að íbúðabyggðin í Grafarvogi var komin á skrið í kringum 1986 höfðu íbúar í Grafarvogi áhyggjur af Áburðarverksmiðjunni og sprenihættunni þar. Þetta er fyrirsögn í DV í apríl 1990.

Stórbruninn í Gufunesi - hafa náð tökum á eldinum sem breiðist ekki út

Mon, 12 Jan 2026 20:33:42 GMT

Brynjar Friðriksson , sviðsstjóri aðgerðasviðs hjá slökkviliðinu á höfuðborgarsvæðinu, segir í samtali við Morgunblaðið á mbl.is að búið sé að ná tökum á eldinum sem logar í skemmu í Gufunesi og engin hætta stafi af því að eldurinn breiðist út.

„Eftir að við settum vatn á eldinn hefur þetta gengið vel. Við erum búin að fella mesta eldinn. Við eigum hellings vinnu eftir, þetta er það stórt hús,“ segir Brynjar við mbl.is.

Hann bætir við að finna þurfi leið til að komast inn í húsnæðið en að það verði líklega ekki gert fyrr en á morgun - og að unnið verði utan frá að mestu leyti í kvöld. (Myndir: Eyþór Árnason). - JGH

Miklar umferðartafir enda bruninn í Gufunesi á miklum annatíma um klukkan fimm

Mon, 12 Jan 2026 19:57:31 GMT

Eðli málsins urðu gífurlegar umferðartafir í Grafarvoginum vegna stórbrunans í Gufunesi enda gaust eldurinn upp um fimmleytið þegar umferðin er í hámarki.

Hér má sjá bílaröðina á Strandvegi. Allt stopp. Bílarnir eru á leið í suðurátt en mikil umferð er t.d. úr verslunarmiðstöðinni Spönginni á þessum tíma dags. - JGH

Svartur reykurinn gaus upp og lagðist yfir Hamrahverfið í norðvestan áttinni

Mon, 12 Jan 2026 19:40:51 GMT

Reykurinn frá stórbrunanum í Gufunesi sást um allt höfuðborgarsvæðið og það vakti strax athygli allra hve svartur hann væri. Upphafsmyndin hér er tekin kl. 17:10 en eldsins varð fyrst var um kl. 17:03 þegar hringt var á slökkvilið.

Þessi mynd er tekin í Hamrahverfinu og er horft upp Hlaðhamrana upp að fjölbýlishúsunum Rauðhömrum.

Svartur reykurinn leggst yfir hverfið. - JGH

Í Lokinhömrum á leið upp á hæðina við enda Leiðhamra til að horfa yfir svæðið.

Horft yfir Gufunesið af hæðinni við enda Leiðhamra. Svartur er hann mökkurinn svo sannarlega.

Myndir af vettvangi í Gufunesi - teknar af Sigurði Levy

Mon, 12 Jan 2026 18:32:41 GMT

Einn þeirra sem náði myndum af stórbrunanum í Gufunesi var Sigurður E. Levy. Hann tók nokkrar myndir ofan af hæðinni efst í Leirhömrum en fór síðan nær vettvangi, en lögreglan stöðvaði eðlilega alla umferð að hinni logandi skemmu.

Við birtum hér nokkrar myndir sem Sigurður tók og sendi Grafarvogi.net. - JGH

Eldurinn er í skemmu Reykjavíkurborgar gegnt gömlu Áburðarverksmiðjunni en þar er núna þekkt kvikmyndaver, Reykjavik Studios, í eigu Baltasar Kormáks.

Þykkur mökkurinn sást víða á höfuðborgarsvæðinu.

Allt tiltækt lið slökkviliðsins í Reykjavík á staðanum og lögreglan stöðvaði eðlilega alla umferð að hinni logandi skemmu.

Stórbruni í Gufunesi - eldur í stórri skemmu í eigu borgarinnar. Sjá þrjú myndskeið

Mon, 12 Jan 2026 18:05:25 GMT

Stórbruni er núna í Gufunesi og er eldurinn í stórri skemmu gegnt gömlu Áburðarverksmiðjunni þar sem núna er stórt kvikmyndaver í eigu Baltasar Kormáks. Svartur reykur stígur upp frá eldinum og sást hann víða um höfuðborgarsvæðið skömmu eftir að eldurinn kviknaði.

Allt tiltækt lið slökkviliðisins er á staðnum. Í fyrstu héldu margir Grafarvogsbúar að kviknað hefði í hjá Sorpu en svo er ekki - heldur í geymslum á svæðinu.

Eldurinn gaus upp skömmu eftir klukkan sautján og fór ekki á milli mála hjá okkur íbúum í Hamrahverfinu að mikið eldhaf væri í gangi í Gufunesi.

Meðfylgjandi myndir tók ég uppi á hæðinni við Leiðhamra. - JGH

Bandaríkin - hrikalegar skuldir en ört vaxandi hagvöxtur. Laun hækka og framleiðni eykst

Sun, 11 Jan 2026 13:20:35 GMT

BANDARÍKIN. Skuldir, hagvöxtur, verðbólga, Dow Jones og vinnumarkaðurinn í Bandaríkjunum. Við Sigurður Már fengum Þorstein Þorgeirsson hagfræðing til okkar í nýjasta þátt Hluthafaspjalls ritstjóranna á Brotkast.is og umræðuefnið var staða efnahagsmála í Bandaríkjunum.

Þetta er á margan hátt mjög sérstök staða. Skuldir eru hrikalegar, hagvöxtur er mikill en verðbólga á sama tíma undir kontról, hlutabréfamarkaðurinn í hæstu hæðum og atvinnuleysi í krignum 4% en vinnumarkaðurinn vestanhafs er mjög hreyfanlegur og fólk hikar ekki við að flytja um Bandaríkin þver og endilöng fái það sæmilega vinnu.

Hvað um það - hér má sjá stutta klippu úr viðtali okkar Sigurðar Más við Þorstein. - JGH

Lagt til að laga hina stórhættulegu Gufunesbryggju - kominn tími til

Thu, 08 Jan 2026 15:04:24 GMT

Eitt af því sem vakti athygli - þegar Grafarvogur.net fjallaði sl. sumar um útivistarperluna og hið blómlega útilíf við gylltu ströndina fyrir neðan gömlu Áburðarverksmiðjuna og dorgveiði á gömlu bryggjuni - var hvað bryggjan er orðin hættuleg. Sjá fréttina hér um Gylltu ströndina í Gufunesi.

Raunar er það svo að það er bannað að fara út á bryggjuna og „öflugt“ hlið blasir við sem meinar fólki aðgang - en auðvelt er að smokra sér framhjá því með einbeittum vilja.

Þess vegna er ánægjulegt að sjálfstæðismenn hafi lagt fram tillögu á fundi umhverfis- og skipulagsráðs Reykjavíkur, 3. des. sl., um úrbætur til að auka öryggi þeirra fjölmörgu sem fara út á bryggjuna til að veiða.

Tillagan hljóðar svona: „ Lagt er til að ráðist verði í lagfæringar á Gufunesbryggju í því skyni að auka öryggi þeirra, sem um hana fara. Bryggjan er hættuleg á köflum, m.a. þarf að laga timburgólf hennar og fylla í holur og göt, sem skapa augljósa hættu. Jafnframt þarf að koma fyrir bjarghringi yst á bryggjunni .“

Á fundi ráðsins, 10. desember, var tillögunni vísað til meðferðar umhverfis- og skipulagssviðs borgarinnar.

Vel til fundið og löngu kominn tími til að bæta úr öryggi fólks á bryggjunni. - JGH

Bryggjuveiði á gömlu bryggjunnni í Gufunesi - við gömlu Áburðarverksmiðjuna.

Þétt er setið á sumrin og dorgað.

Víða þarf að holufylla.

Gróður hefur breitt úr sér á trébryggjunni og fyrir vikið sjást hætturnar síður.

Mogginn með þrettándann í Gufunesi á forsíðu - sjá ljóð eftir lækni um álfabrennu

Wed, 07 Jan 2026 14:50:52 GMT

Hún er stórglæsileg myndin af þrettándabrennunni í Gufunesi á forsíðu Morgunblaðsins í morgun en hinn kunni ljósmyndari Árni Sæberg t ók myndina. Fjölmenni var við brennuna en býsna kalt var úti og vindurinn herti á kælingunni. Þetta var eina brennan í gær á þrettándanum í Reykjavík en í fyrra voru þær tvær; í Gufunesi í Grafarvogi og við Ægissíðuna.

Mikil umferð var á svæðinu þegar Grafarvogur.net fór þarna um í gær og verulegar umferðatafir á Gullinbrú og Strandvegi.

Fjöldi fólks lagði bílum sínum við Hallsveginn og gekk að brennunni sem var á Hamraflötum, vestanmegin við gamla Gufunesbæinn.

Gífurleg umferð var á svæðinu og náði umferðarhnúturinn upp að gatnamótunum við Olís við Gullinbrú - enda straumurinn í Grafarvoginn að þessu sinni þar sem þetta var eina brennan á höfuðborgarsvæðinu.

Þótt engir álfar hafa verið á þrettándabrennunni í gær langar mig til gamans að birta tvö fyrstu erindi ljóðsins Álfabrenna úr ljóðabók tengdaföður mín heitins, Brynleifs H. Steingrímssonar , en bókin kom út árið 1993 og nefnist Í ljósi dags.

Brynleifur var læknir og þess má geta að annar læknir, Guðmundur Bjarnason , myndskreytti bókina með skemmtilegum teikningum. Ánægjuleg samvinna tveggja lækna.

ÁLFABRENNA

Stari ég og stari blint,

stari í þig, bál.

Geta augu ei öðru sinnt,

þú ert mín eigin sál.

Lifir eins og löngun mín,

líka glatt og frítt,

frá þér ljós og leikur skín

um leiksvið bjart og hlýtt.

Stari ég og stari inn

í sterkan loga þinn.

Þú deyfir mig og dregur fast

sem dauðans augnakast.

Ég verð álfur, ungur, barn,

eigra um þitt hjarn,

legg svo upp í langa ferð,

að leiksopp þínum verð.

Brynleifur H. Steingrímsson læknir. Ljóðið var ort um áramótin 1969-1970. - JGH

Hér má sjá hóp erlendra ferðamanna sem vippuðu sér út út hópferðabíl við Strandaveginn og niður að brennunni.

Við upphaf brennunnar. Margt um manninn og bílum ekið að Skemmtigarðinum til að fylgjast með bálkestinum - ansi napurt úti.

Jólin kvödd með bombum, blysljósum og tertum í Hamrahverfinu í Grafarvogi í gærkvöldi.

Gufunesbrennan á forsíðu Morgunblaðsins í dag. Mynd eftir Árna Sæberg.

Ljóðið Álfabrenna eftir Brynleif H. Steingrímsson er í ljóðabókinni Í ljósi dags sem kom út fyrir jólin 1993.

Guðlaugur Þór ekki fram í borginni - Hildur sjálfkjörin í efsta sæti D-listans

Tue, 06 Jan 2026 18:03:06 GMT

Grafarvogsbúinn Guðlaugur Þór Þórðarson , þingmaður Sjálfstæðisflokksins, hefur ákveðið að bjóða sig ekki fram í forvali Sjálfstæðisflokksins í Reykjavík en nokkrar vangaveltur hafa verið um það um tíma hvort hann færi fram í höfuðborginni og skellti sér í borgarmálefnin. Sjá frétt mbl.is hér.

Hildur er því sjálfkjörin leiðtogi flokksins í kosningunum í vor. Guðlaugur Þór segir í viðtali við mbl.is að hann styðji Hildi Björnsdóttur í að leiða listann. Sjá frétt.

Fram kemur hjá honum að það hafi ekki hafa verið auðveld ákvörðun að fara ekki fram í borginni. Aðalatriðið í sínum huga sé þó að meirihlutinn í borginni fari frá og að nýr taki við. Til þess þurfi sjálfstæðismenn að standa saman.

„Við eigum að reyna að lágmarka flokkadrætti, sem hafa verið okkur fjötur um fót. Mitt mat var það að þetta væri það besta í stöðunni núna,“ segir Guðlaugur Þór í samtali við mbl.is en Sjálfstæðisflokkurinn er á mikilli siglingu í borginni, samkvæmt könnunum.

Meðfylgjandi mynd af Guðlaugi Þór fylgir frétt Morgunblaðsins og er tekin af Eyþóri Árnasyni ljósmyndara blaðsins. - JGH

Grafarvogsbúinn Guðlaugur Þór Þórðarson íhugaði það af fullri alvöru að taka slaginn í borginni en ákvað að gera það ekki eftir að hafa farið vel yfir málið.

Hildur Björnsdóttir leiðir lista Sjálfstæðisflokksins í borgarstjórnarkosningunum í vor.

Þá eru það dósirnar á morgun eftir jólahátíðina. Fjölniskrakkar ganga í hús og safna flöskum

Tue, 06 Jan 2026 17:13:26 GMT

Eftir þrettándann er það ekki bara að taka niður jólaskrautið, henda gamla, lifandi jólatrénu og koma heimilinu í fyrra horf heldur þarf líka að huga að tómum flöskunum og dósunum sem hafa safnast saman yfir hátíðarnar.

Við getum sagt að morgundagurinn, miðvikudagurinn 7. janúar, sé dósadagur í Grafarvogi. Þá ætla Fjölniskrakkar að ganga í hús og safna flöskum í fjáröflunarskyni.

Með dósasöfnun Fjölnis birtum við hér mynd tómri dós af jóladrykki Íslendinga til margra áratuga, blöndunni af malti og appelsíni. Þær verða eflaust fyrirferðarmiklar í söfnun Fjölniskrakka á morgun. - JGH

Dósa- og flöskudagur í Grafarvogi á morgun, miðvikudag. Fjölniskrakkar munu ganga í hús og safna.

Þessar dósir verða sjálfsagt fyrirferðarmiklar í söfnuninni á morgun enda um jóladrykk Íslendinga að ræða til margra áratuga.

Hvað á að gera við gamla jólatréð á morgun? Sorpa eða Fjölnir?

Tue, 06 Jan 2026 16:09:25 GMT

Hvað á að gera við gamla, lifandi jólatréð á morgun þegar flestir taka niður jólaskrautið og mörg heimili færast í fyrra horf. Ekki dugir að setja trén út fyrir lóðamörk því Reykjavíkurborg fer ekki um til að tína þau upp og koma þeim í Sorpu.

Hægt er að skjótast með trén á endurvinnslustöðvar Sorpu , endurgjaldslaust.

Þá er vert að vekja athygli á þjónustu handboltadeildar Fjölnis sem tekur að sér að ná í tréð fyrir 4 þús. kr. og þannig er hægt að slá tvær flugur í einu höggi; farga trénu og styrkja Fjölni í leiðinni.

En umfram allt - ekki henda gamla jólatrénu út fyrir girðingu og halda að „einhver annar“ eigi að hirða það upp og koma því á „haugana“ - „öskuhaugana“ eins og þeir voru kallaðir í gamla daga og áður en Sorpa kom til sögunnar með sitt fína nafn.

Símatími skrifstofu Fjölnis er mánudaga til fimmtudaga frá 10:00 til 11:30. Síminn er 578-2700. Netfangið hjá Fjölni er skrifstofa@fjolnir.is - JGH

Þrettándinn er í dag og við kveðjum jólahátíðina. En hvað á að gera við gamla jólatréð? Koma því í Sorpu eða hafa samband við handboltadeild Fjölnis sem kemur og sækir tréð gegn gjaldi. Með þessu er hægt að losna við tréð og styrkja íþróttafólkið okkar í leiðinni.

Komið á hreint - þrettándabrenna verður í Gufunesi kl. 18:00 á morgun

Mon, 05 Jan 2026 14:57:15 GMT

Loksins komið á hreint. Fjölmargir hafa sent fyrirspurnir til okkar á Grafarvogur.net til að spyrjast fyrir um hvort þrettándabrenna verði ekki örugglega í Gufunesi á morgun - en engar upplýsingar hefur verið að finna um þrettándabrennur á vef Reykjavíkurborgar. Ákvörðun var tekin um málið í morgun.

Við fórum í málið og niðurstaðan er sú að það verður þrettándabrenna í Grafarvogi - við Gufunesbæinn - á morgun kl. 18:00.

Svo virðist sem þetta sé eina þrettándabrennan í höfuðborginni þetta árið en Grafarvogur.net hefur ekki fengið staðfest að um fleiri brennur sé að ræða. Í fyrra voru tvær þrettándabrennur; við Ægisssíðu og í Gufunesi.

Þetta mál er búið að vera mikið á reiki og fyrstu upplýsingar okkar voru að það yrðu engar þrettándabrennur í borginni en það mun hafa verið tekin ákvörðun í morgun um að hafa brennuna í Gufunesi.

Gibson Surathep var brennustjóri á gamlársbrennunni í Gufunesi en sú brenna heppnaðist mjög vel og veðurguðirnir með höfuðborgarbúum í liði. - JGH

Bálkösturinn verður á sama stað og venjulega, eða handan við gamla Gufunesbæinn - vestanmegin, í átt að Skemmtigarðinum.

Gibson Surathep var brennustjóri fyrir hönd borgarinnar á gamlársbrennunni í Gufunesi.

Máninn fullur fer um geiminn

Sat, 03 Jan 2026 19:55:54 GMT

Það var fullt tungl í dag og margir sem hafa birt fallegar myndir af tunglinu á samfélagsmiðlum. Í ljóðinu segir jú „máninn fullur fer um geiminn, fagrar langar nætur“.

Hér blasti hann við fyrir ofan Esjuna síðdegis í dag og varpaði sínu mánaskini á Kollafjörðinn - eða sundin blá, eins og við nefnum hann í daglegu tali. - JGH

Frá hæðinni við Borgaveg-Móaveg kl. 16:36 í dag. Máninn í norðaustri.

Frá hæðinni við Borgaveg-Móaveg kl. 16:08. Máninn að skríða upp yfir Esjunni í norðaustri.

Frá Korpuvellinum - Thorsvellinum - kl. 16:23. Máninn í norðaustri.

Frá Geldinganeseiði kl. 16:43. Máninn í norðaustri.

Frá Hamrahverfinu kl. 21:30. Máninn núna í austri.

Sólarlagið í Grafarvogi á þriðja degi ársins

Sat, 03 Jan 2026 19:32:28 GMT

Það er við svona aðstæður sem myndir segja meira en mörg orð. Sólarlagið í Grafarvogi á þriðja degi ársins.

Þetta jólatré blasir við mörgum Grafarvogsbúum í önn dagsins. Það stendur á hæðinni á milli Borgavegs og Melavegs - rétt við hringtorgið.

Á þessum þrönga reit hefur borgin kynnt áform um að þétta byggð og byggja - hvernig svo sem lyktir þess máls verða. - JGH

Horft upp á Ártúnshöfðann úr Hamrahverfinu í Grafarvogi. Miklar framkvæmdir í hinu nýja hverfi. Kranarnir vakna væntanlega til lífsins eftir helgi þegar þeir fara að snúast á nýjan leik eftir gott frí - líkt og hjól atvinnulífsins.

Í Grafarvogi, 3. janúar 2025, kl.16:39.

Þetta jólatré blasir við mörgum Grafarvogsbúum í önn dagsins. Það stendur á hæðinni á milli Borgavegs og Melavegs - rétt við hringtorgið við Borgaveginn.

Hér er allt í röð og reglu

Sat, 03 Jan 2026 19:08:50 GMT

Hér er synt og svamlað í röð við Geldinganesið í dag og sundin blá fá yfir sig gulan blæ í ljósaskiptunum. Þessar endur halda sínu striki og eru á sinni eigin Sundabraut.

Í bakgrunni blasir borgareyjan fallega við - sjálf Viðey.

Hvers vegna Viðey? Jú, nafnið er dregið af skógi eða kjarri sem einkenndi eyjuna allt fram á 12. öld.

Núna er tekist á um Sundabraut eða Sundagöng - eitt er víst; sundin blá munu örugglega breyta um ásjónu við tröllvaxna Sundabraut. - JGH

Stari ég á stráin. Við Geldinganeseiði í dag.

Hér er allt í röð og reglu - og synt á eigin Sundabraut.

Iðaði í skinninu að vaða lengra í ljósaskiptunum

Sat, 03 Jan 2026 18:46:33 GMT

Hann var spenntur þessi seppi þar sem hann óð út í ískaldan sjóinn við Geldinganeseiði í rjómablíðu ljósaskiptanna í dag. Fuglalífið iðaði í kringum hann og hann iðaði sjálfur í skinninu að vaða lengra.

Árið 2025 kvaddi með fallegum dögum og tuttugu og sex heilsar svo sannarlega á sömu nótum.

Ískalt í dag, mínust átta - en lognið dempar mínusgráðurnar. - JGH

„Uss, þetta er svolítið kalt.“

„Hvað ætli mér sé óhætt að vaða langt út í.“

Síðasti fáni ársins hjá Ólafi Sverrissyni - fánakarlinum í Hamrahverfi

Wed, 31 Dec 2025 15:31:42 GMT

Ein af mest lesnu fréttum ársins á Grafarvogur.net var um áhugamál Ólafs Sverrissonar , verkfræðings hjá Landsvirkjun, en hann safnar fánum og flaggar eins oft og viðrar til þess. „Ég reyni að flagga sem fyrst á morgnanna,“ segir Ólafur kampakátur þegar við hittum hann í hádeginu í dag, gamlársdag, og forvitnuðumst um hvaða fána hann hefði dregið að húni á þessum fallega degi, gamlársdegi 2025.

„Það var í covid, þegar ég þurfi að vinna heima eins og fleiri, sem ég byrjaði að flagga reglulega hér heima en ég hef hins vegar haft það sem áhugamál að safna fánum í um tuttugu ár,“ segir Ólafur.

„Ég var með stöng uppi í bústað en svo fékk konan stöng í afmælisgjöf þegar hún varð fimmtug. Fánasafnið var alltaf uppi í bústað en svo kom covid og til að koma sér á fætur á morgnanna þá ákvað ég að vera búinn að flagga klukkan níu þannig að ég flutti fánasafnið heim.“

Eðli málsins flaggar hann sjaldnar á veturna en sumrin en í „sumartíðinni“ að undanförnu hefur hann verið duglegur að draga hina ýmsu fána að húni.

Ólafur á 217 fána og þar af 120 þjóðfánar. Hann varð sextugur á árinu og segir markmiðið að eignast alla þjóðfána heimsins fyrir sjötugsafmælið - en þjóðfánar heimsins eru eitthvað rúmlega tvö hundruð talsins.

Nokkrir þjóðfánar bættust í safnið á þessu ári meðal annars frá Máritíu. „Vinir mínir fóru til Máritíus á árinu og komu heim með fána þaðan, það var ótrúlega skemmtilegt.“

(Máritíus er eyríki á Indlandshafi, um 900 km austur af Madagaskar.)

Hægt er að fullyrða að enginn á jafn marga fána á Íslandi og Ólafur Sverrisson í Hamrahverfinu í Grafarvogi.

Og síðasti fáni ársins hjá honum var auðvitað; Happy new year. Gleðilegt ár.

Skemmtilegt áhugamál hjá Ólafi og fánarnir vekja jafnan athygli í Hamrahverfinu. - JGH

Gamlársdagur og þjóðin kveður árið 2025 og fagnar 2026. Gleðilegt nýar.

Ólafur Sverrisson verkfræðingur er stundum kallaður fánakarlinn í Hamrahverfinu. Hann á stærsta fánasafn á Íslandi; 217 fána, þar af 120 þjóðfána.

Gleðilegt nýtt ár.

Bálkösturinn í Gufunesi hefur hlaðist hratt upp og verður kveikt í honum kl. 20:30 í kvöld. Allt tilbúið, segir Gibson brennustjóri

Wed, 31 Dec 2025 14:50:40 GMT

Það verða tíu brennur í Reykjavík þetta gamlárskvöld - og að sjálfsögðu er ein þeirra hér í Grafarvogi; í Gufunesi. Það hefur hlaðist hressilega í brennuna síðustu daga og það er allt tilbúið fyrir kvöldið en kveikt verður á brennunni kl. 20:30 í kvöld.

Brennustjóri fyrir hönd borgarinnar að þessu sinni er Gibson Surathep og segist hann eiga von á talsverðum fjölda Grafarvogsbúa á brennuna í kvöld. Það sé útlit fyrir gott veður.

„Efnið í brennuna er frá okkur hjá borginni, efni sem við höfum geymt og svo höfum við fengið frá Sorpu líka - nú og einnig hafa íbúar hér í Grafarvogi komið með efni og lagt okkur lið,“ segir Gibson.

Brennan er svipuð að stærð og undanfarin ár.

Gibson annaðist brennuna við Ægissíðu í fyrra en tók við brennunni í Gufunesi þetta árið. Sá raunar um þrettánda-brennuna í Gufunesi í upphafi árs.

Brennan er handan við hinn ágæta turn í Gufunesi og hægt er að leggja bílum við gamla Gufunesbæinn og ganga smá spöl en einnig er hægt að koma frá Skemmtigarðinum en þar blasir brennan við. Einnig koma margir íbúar gangandi enda fínt að fá sér smá göngutúr í góða veðrinu.

Og munið; Gibson leggur eld að bálkestinum í Gufunesi kl. 20:30 í kvöld. - JGH

Brennan hefur hlaðist hratt upp síðustu daga.

Brennan er vestan megin við þennan turn í Gufunesi - í áttina að Skemmtigarðinum.

Allt tilbúið fyrir kvöldið, segir Gibson, brennustjóri brennunnar í Gufunesi. Kveikt verður í bálkestinum kl. 20:30 í kvöld.

Fljúgandi góð flugeldasala hjá Landsbjörgu - útlit fyrir gott „skotveður“ í kvöld

Wed, 31 Dec 2025 14:02:20 GMT

Það var mikill erill í flugeldasölunni hjá Hjálparsveit skáta og Landsbjörgu í Spönginni í hádeginu í dag, gamlársdag, þegar Grafarvogur.net var þar á ferð. Góð sala og hjálparsveitirnar finna fyrir góðum stuðningi Grafarvogsbúa. Útlit er fyrir gott veður í kvöld til að skjóta upp flugeldum og þeysa tertunum í gang - sannkallað „skotveður“.

„Það er búið að vera mjög góða sala,“ segja þau Ísabella Ingadóttir og Daníel Hafþór Ómarsson , verslunarstjórar í flugeldasölunni í Spönginni. Þau hafa haldið utan um söluna í þessum litla söluskála síðustu fjögur árin.

Þau segja að salan sé svipað og undanfarin ár. „Það kom góður kraftur í söluna sl. sunnudag, 28. des., og síðan hefur hefur verið góður gangur í þessu og 30. des. er ávallt mikill söludagur og svo ekki síst sjálfur gamlársdagur - þá er ávallt mikil stemning í sölunni og augljós tilhlökkun og spenna fyrir kvöldinu.“

Raketturnar rjúka út og terturnar sömuleiðis - en þær eru af öllum stærðum og gerðum; sem og er verð þeirra mjög mismunandi. „Þá selst fjölskyldupakkinn mjög vel en hann inniheldur flugelda, tertur, blys og ýmist smádót.“

Þau segjast þakka Grafarvogsbúum fyrir stuðninginn; flugeldasalan sé helsta fjáröflunarleiðin og stuðningurinn sé ómetanlegur.

Svo er bara að ganga hægt um gleðinnar dyr í kvöld og fara varlega við skotpallana. - JGH

Flugeldasala Hjálparsveita skáta og Landsbjargar í Spönginni. Myndin tekin í hádeginu í dag, gamlársdag, og útlit fyrir gott veður í kvöld - sannkallað „skotveður“.

Ísabella Ingadóttir og Daníel Hafþór Ómarsson, verslunarstjórar flugeldasölu Hjálparsveita skáta og Landsbjargar í Spönginni.

Finnur fyrir auknum titringi innan Viðreisnar með samstarfið í ríkisstjórninni

Tue, 30 Dec 2025 21:51:15 GMT

ÁRAMÓTASPJALL RITSTJÓRANNA. Andrea Sigurðardóttir, blaðamaður á Morgunblaðinu sem fjallar ekki síst um stjórnmál, segir í Áramótaspjalli okkar Sigurðar Más að dregið hafi úr bjartsýni forstjóra á efnahagsumhverfið vegna aukinna útgjalda ríkisins og skattahækkana stjórnarinnar til að minnka fjárlagahallann.

Hún segir að fólk hafi auknar áhyggjur af að stefna ríkisstjórnarinnar leiði til samdráttar.

Hún segist finna fyrir auknum titringi innan Viðreisnar vegna skattahækkana stjórnarinnar og versnandi viðhorfum atvinnulífsins til stjórnarinnar.

Hún segir að það hafi komið sér á óvart að ríkisstjórnin hafi lifað þetta ár eftir allan vandræðagang Flokks fólksins.

Sjá má allt viðtalið við Andreu í meðfylgjandi klippu. - JGH

Andrea Sigurðardóttir, blaðamaður á Morgunblaðinu.

Alvotech betri kostur núna en fyrir þremur árum - einsaklingum haldið frá beinni aðild að markaði skuldabréfa

Tue, 30 Dec 2025 21:40:11 GMT

ÁRAMÓTASPJALL RITSTJÓRANNA. Snorri Jakobsson, eigandi Jakobsson Capital , segir í Áramótaspjalli okkar Sigurðar Más að Alvotech sé núna betri fjárfestingarkostur en fyrir þremur árum þar sem það sé lengra á veg komið og tekjumódelið liggi betur fyrir.

Mikil lækkun á gengi bréfa í Alvotech gefi sömuleiðis viss kauptækifæri.

Hann segir að eftir nýlegan vaxtadóm hjá bönkunum muni þrýstingur á skuldabréfaútgáfu bankanna aukast verulega. Hann segir ennfremur að útgefin skuldabréf fyrirtækja séu vænn kostur fyrir einstaklinga en því miður sé sá makaður meira og minna lokaður fyrir almenning nema í gegnum sjóði. Í raun sé verið að halda almenningi frá góðum fjárfestingarkosti.

Hann heldur því sömuleiðis fram að um 60% af íslenska hagkerfinu sé fjármagnað með skammtímalánum, þ.e. langtímaeignir séu fjármagnaðar með skammtíma lánum sem sé engan veginn viðunandi og skapi ákveðnar hættur.

Sjá má allt viðtalið við Snorra í meðfylgjandi klippu. - JGH

Snorri Jakobsson, eigandi Jakobsson Capital.

Var á móti því að skylduiðgjald í lífeyrissjóði hækkaði úr 12,0% í 15,5% á sínum tíma

Tue, 30 Dec 2025 21:30:40 GMT

ÁRAMÓTASPJALL RITSTJÓRANNA. Gunnar Baldvinsson, forstjóri Almenna lífeyrissjóðsins , segir í Áramótaspjalli okkar Sigurðar Más að vissulega séu lífeyrissjóðirnir stórir í Kauphöllinni – eiga nálægt 40% hlut í heildina í skráðum fyrirtækjum - en þrátt fyrir það séu þeir ekki of fyrirferðamiklir, að hans mati.

Sparnaður fólks í gegnum lífeyrissjóðina er núna orðinn 19,5% af launum með viðbótarlífeyrissparnaðinum.

Hann segist hafa vissar áhyggjur af talsverði einsleitni innlendra eigna lífeyrissjóðanna og því hafi Almenni lagt meiri áherslu á erlendar fjárfestingar þar sem hægt sé að hreyfa sig á markaðnum án þess að það hafi áhrif á verðið.

Gunnar segist ennfremur hafa verið eini einstaklingurinn sem skrifaði gegn því að skylduiðgjald í lífeyrissjóði yrði hækkað á sínum tíma úr 12,0% í 15,5% því þar með yrði meginsparnaður flestra orðin skyldusparnaður í gegnum lífeyrissjóðina og veikti með því annan sparnað einstaklinga.

Sjá allt viðtalið við Gunnar hér í meðfylgjandi klippu. - JGH

Gunnar Baldvinsson, forstjóri Almenna lífeyrissjóðsins.

Einstaklingar eiga 1.800 milljarða innstæður í bönkunum - 90 milljarðar fóru í Íslandsbanka

Tue, 30 Dec 2025 21:16:21 GMT

ÁRAMÓTASPJALL RITSTJÓRANNA. Magnús Harðarson, forstjóri Nasdaq Iceland , Kauphallarinnar, segir í Áramótaspjalli okkar Sigurðar Más að ákveðin ládeyða, hafi einkennt hlutabréfamarkaðinn á Íslandi á síðasta ári en verði vaxtalækkun á næsta ári megi gera ráð fyrir að úrvalsvísitalan taki við sér.

JBT-Marel var skráð í upphafi árs en aðrar nýskráningar urðu ekki þar sem markaðsaðstæður voru fremur erfiðar. Nokkur fyrirtæki hafa sýnt áhuga á skráningu og bíða betri tíma á markaðnum – bíða á kantinum.

Það sem reis hæst á árinu, að mati Magnúsar, var hinn mikili áhugi almennings á hlutabréfum í tengslum við útboðið á Íslandsbanka en 31 þúsund einstaklingar tóku þátt í því útboði – og þar af 18 þúsund nýir.

Einstaklingar eiga um 1.800 milljarða króna í innistæðureikningum bankanna þannig að hluturinn sem var seldur í Íslandsbanka – og nam um 90 milljörðum – er rétt um 5% af peningaeign þeirra.

Sjá allt viðtalið við Magnús í meðfylgjandi klippu. - JGH

Magnús Harðarson, forstjóri Nasdaq Iceland.

Virði Alvotech rýrnaði um 300 milljarða á síðasta ári - fór úr 500 niður í 200 milljarða

Tue, 30 Dec 2025 21:01:50 GMT

ÁRAMÓTASPJALL RITSTJÓRANNA. Eggert Þór Aðalsteinsson , hlutabréfagreinandi hjá Kviku, mætti í Áramótaspjall ritstjóranna til okkar Sigurðar Más Jónssonar og sagði að miklar væntingar hafi verið í upphafi árs um minnkandi verðbólgu og nokkra vaxtalækkun í kjölfarið en sú hafi ekki orðið raunin og þetta hafi haft veruleg áhrif á hlutabréfamarkaðinn og ýtt undir innlánsreikninga bankanna.

Af einstökum félögum í Kauphöllinni staldri flestir við hrun á gengi bréfa í Alvotech en markaðsvirði félagsins hafi lækkað úr rúmum 500 milljörðum króna í um 200 milljarða og það hafi litað flest hlutabréfasöfn á árinu. Árið 2026 verði stórt ár fyrir félagið og vonandi verði það þá komið með 5 líftæknilyf í sölu vestanhafs í lok næsta árs.

Þá ræðir hann stöðu bankanna og stjórnarformannskjörið innan Íslandsbanka. Hann segir ennfremur að mikið eigið fé bankanna geri þá ekki eins arðsama og bankanna á Norðurlöndunum þrátt fyrir að íslensku bankarnir séu með hvað bestu ávöxtunina hérlendis á þessu ári.

Sjá allt viðtalið hér í meðfylgjandi klippu. - JGH

Eggert Þór Aðalsteinsson, hlutabréfagreinandi hjá Kviku.

Þessi golfari lætur ekki dagatalið trufla sig við áhugamálið

Fri, 26 Dec 2025 13:53:31 GMT

Jólagolf. Grafarvogsbúinn Sigurbergur Kristjánsson tók þessa frábæru mynd á morgungöngu sinni á þessum öðrum degi jóla. Kylfingur á Korpunni - svolítil nepja, en hvað er það þegar hvíta kúlan á í hlut. Aldrei vont veður, segja kylfingar - bara klæða sig vel.

Fyrirsögnina á Sigurbergur en hann sendi myndina til mín með þessum orðum: „ Þessi golfari lætur ekki dagatalið trufla sig við áhugamálið. “

Verður ekki betur orðað.

Bestu þakkir fyrir myndina.

Gleðilegan annan í jólum, kæru Grafarvogsbúar. - JGH

Í morgun, annan í jólum á Korpu. Frábær mynd með mikla kontrasta þar sem svarthvíta hetjan okkar, Esjan sjálf, leikur stórt hlutverk í bakgrunni.

Einstakt svar. Björn Bjarnason spurði vitvélina um sálminn Heims um ból

Thu, 25 Dec 2025 14:34:41 GMT

Björn Bjarnason fékk einstakt svar þegar hann spurði vitvélina, spjallmennið ChatGPT, hvernig hún skyldi sálminn Heims um ból eftir Sveinbjörn Egilsson . Sjá bjorn.is. En hér kemur svarið:

„Heims um ból má skilja sem kyrrláta yfirlýsingu um frið sem sprettur ekki af valdi heldur nærveru . Sálmurinn byggir ekki á dramatískri frásögn heldur stilltri vídd: heimurinn allur er undir — heims um ból — og jólanóttin verður almenn mannleg reynsla, ekki einangraður sögulegur viðburður.

Kjarninn liggur í þeirri inkarnatorísku hugsun að Guð komi ekki til mannsins með yfirburðum, heldur stígi inn í mannlegt líf í veikleika barnsins . Merkingin er því ekki knúin áfram af kraftaverkum eða sigurmyndum, heldur af því að hið guðlega velur sér form hins smáa og hversdagslega. Friðurinn sem boðaður er er ekki fyrirskipun, heldur boð í hljótt og án þrýstings.

Þessi nálgun mótar tón sálmsins. Hann vill ekki sannfæra með orðræðu, heldur minna á nærveru : að Guð sé kominn inn í mannlegan veruleika og hafi þar með gert hann að vettvangi ábyrgðar. Friðurinn er því siðferðilegt kall sem áheyrandinn verður sjálfur að svara.

Formið styður þessa merkingu. Textinn er reglulegur, hófstilltur og laus við skraut, sem gerir hann sameiginlegan fremur en persónulegan. Hann lifir í endurtekningu safnaðarins, ekki í sérstöðu ljóðskálds. Þar með verður sálmurinn ekki aðeins boðskapur um jólin, heldur æfing í að taka á móti nærveru .

Í heild er Heims um ból sálmur sem treystir kyrrðinni: hann sýnir jólahátíðina sem þá stund þegar hið guðlega gengur inn í heim mannsins – ekki til að yfirtaka hann, heldur til að vera þar.“ - JGH

Sveinbjörn Egilsson samdi textann við sálminn Heims um ból. (Lagið er eftir Franz Gruber.)

Gleðilegu jól kæru Grafarvogsbúar og bestu þakkir fyrir frábærar viðtökur

Wed, 24 Dec 2025 17:47:58 GMT

Gleðileg jól, kæru Grafarvogsbúar og bestu þakkir fyrir þær frábæru viðtökur sem fréttavefurinn okkar, Grafarvogur.net, hefur fengið.

Meðfylgjandi myndir voru teknar í aftansöngnum í Kirkjuselinu í Spönginni áðan en hann hófst kl. 17:00.

Sóknarpresturinn okkar, séra Arna Ýrr Sigurðardóttir , þjónaði fyrir altari og kórinn Vox Populi leiddi söng undir stjórn Láru Bryndísar Eggertsdóttur organista.

Einsöngur: Marína Ósk Þórólfsdóttir.

Gleðileg jól. - JGH

Í aftansöngnum í Kirkjuselinu í Spöng kl. 17:00 og hátíðleikinn og kyrðin allt um lykjandi.

Séra Arna Ýrr Sigurðardóttir sóknarprestur þjónaði í aftansöngnum í Kirkjuselinu kl. 17.

Vox Populi leiddi sönginn í Kirkjuselinu síðdegis í dag; aðfangadag.

Vel kæst skötuveisla Fjölnismanna í Gufunesi - nýr veislusalur í startholunum

Mon, 22 Dec 2025 22:07:47 GMT

Sterk var hún en málningin flagnaði samt ekki af veggjum í Gufunesinu í kvöld í vel kæstri skötuveislu hjá Knattspyrnudeild Fjölnis þar sem margir litu við og fengu sér skötu eða saltfisk - og auðvitað var allt meðlæti fyrsta flokks. Kartöflur, rófustappa og hamsar, svo eitthvað sé nefnt. Nammi, namm - að minnsta kosti hjá þeim sem mættu í skötuveisluna.

Það var Knattspyrnudeild Fjölnis sem stóð að veislunni en þeir sem sáu um matseldina hafa mikla og góða reynslu í eldhúsinu. Þetta voru þeir Benedikt Jónsson, Þórir Jóhannsson og Karl Emil Pálmason . Reynsluboltar, snaggaralegir og skemmtilegir kokkar.

Það sem meira er; þeir stefna á að opna nýjan veitingastað, SKÁLANN, upp úr miðjum janúar í þessu ágæta húsnæði í Gufunesi þar sem áður var lengi vel mötuneyti gömlu Áburðarverksmiðjunnar.

„Ég hef aldrei eldað eins sterka skötu,“ segir einn þremenninganna, Benedikt Jónsson. En þeir félagar ætla að opna nýjan matsal sem verður mötuneyti í hádeginu en líka hægt að leigja salinn fyrir veislur, bæði með og án veitinga. Góð búbót það fyrir Grafarvogsbúa.

HÆGT AÐ PANTA SALINN FYRIR VEISLUR

„Við verðum hér með mötuneyti í hádeginu alla daga fyrir gesti og gangandi - og þá fjölmörgu sem vinna hér í nágrenninu - og svo verður hægt að panta salinn fyrir veislur; leigja hann bæði með eða án veitinga. Hér er mjög góð aðstaða, stórt og fínt eldhús - og næg bílastæði.

Fjölnismenn höfðu samband við okkur og við vorum á báðum áttum enda ekki alveg tilbúnir. En það var ákveðið að kýla á þetta. Fjölnismenn komu með hráefnið til okkar í dag, vel kæsta skötu, kveikt var undir pottunum, flikkað upp á salinn til bráðabirgða og allt sett í gang. Fyrstu gestirnir mættu klukkan átján og þetta hefur heppnast mjög vel. Allir ánægðir og í jólaskapi. Fyrsta veislan, fyrsta „giggið“ hjá okkur en samt allt ekki tilbúið - er þetta ekki bara íslenska leiðin sem hefur gagnast oft svo vel?,“ segja þessir hressu kokkar.

Séð yfir hluta salarins og rammíslensk hátíðarfæða á borðum; kæst skata.

ALDREI ELDAÐ EINS STERKA SKÖTU

Þeir stefna á að opna nýja veitingastaðinn, Skálann , upp úr miðjum janúar, eins og fyrr segir. Stenst það? Mjög líklega. En Þórir Jóhannsson vill hins vegar orða það aðeins öðruvísi. „Það eru svo sem komnar dagsetningar hjá okkur en ég segi bara: Við opnum þegar við erum tilbúnir.“

En hvað með skötuna? „Þeir komu með hana Fjölnismenn í dag og ég hef aldrei eldað eins sterka skötu,“ segir Benedikt Jónsson.

Svo sannarlega stemning í vel kæstri skötuveislu Fjölnismanna í Gufunesi í kvöld í stórgóðum matsal. Það tekur einhverja daga að ræsta út - en hvað er það þegar fullorðinsmatur er borinn fram; alvöru skata. - JGH

Vel mætt og létt yfir mannskapnum í skötuveislu Fjölnismanna í Gufunesi í kvöld - og í góðum veislusal sem tekinn verður formlega í gagnið upp úr miðjum janúar næstkomandi.

Reynsluboltar þegar kemur að matseld. Frá vinstri; Karl Emil Pálsson, Benedikt Jónsson og Þórir Jóhannsson.

Þessir öflugu Fjölnismenn stóðu vaktina við innganginn þegar okkur bar að garði. Ingvi Þór Marínósson, starfsmaður Fjölnis, og Þorgeir Örn Tryggvason.

Vel kæst, eftirsótt, beint á diskinn og allir gátu fengið sér eins og þeir gátu í sig látið. Hér hefur gengið á birgðirnar.

Hluthafaspjall ritstjóranna - hér má sjá allt viðtalið við Sylvíu Kristínu Ólafsdóttur, forstjóra Nova

Fri, 19 Dec 2025 15:54:23 GMT

Hér má sjá viðtalið við Sylvíu Kristínu Ólafsdóttur , forstjóra Nova, í heild sinni í Hluthafaspjalli ritstjóranna , hlaðvarpsþætti okkar Sigurðar Más Jónssonar . Sylvía tók við starfi forstjóra Nova í byrjun október.

Viðtalið við Sylvíu Kristínu Ólafsdóttur, forstjóra Nova, hér í heild sinni.

Hluthafaspjall ritstjóranna - Guðmundur, forstjóri Brims, og Sylvia, forstjóri Nova

Fri, 19 Dec 2025 15:47:20 GMT

Það var gestkvæmt hjá okkur gömlu brýnunum í þættinum sem við tókum upp í hádeginu í gær og sýndur er á efnisveitunni Brotkast.is Guðmundur Kristjánsson , forstjóri Brims, Sylvía Kristín Ólafsdóttir , forstjóri Nova, og Helgi Vífill Júlíusson , hlutabréfagreinandi hjá Reitun (IFS) mættu í þáttinn.

Á meðal þess sem rætt var um:

Veiðigjöldin en Guðmundur Kristjánsson líkir formúlunni við útreikning þeirra við rússneska rúllettu.

Nýjan makrílsamning Íslendinga þar sem kvótinn okkar fer úr 16,5% í 10,5%.

Þjóðarskútuna - þar sem þær stöllur eru í brúnni en vélstjórarnir og vélin sem knýr skipið áfram er atvinnulífið - segir Guðmundur Kristjánsson.

Kaupin á Lýsi og hvaða tækifæri Brim sér í þeim kaupum.

Stórgóðan þriðja ársfjórðung hjá Brim þar sem makrílveiðar spiluðu stórt hlutverk.

Þrætuna um veiðigjöldin sl. vor sem hækkuðu um 5 milljarða þegar upp var staðið - en kostuðu sitt þar sem fjárfestingar í kringum sjávarútveginn stöðvuðust nánast og fjöldinn allur af fyrirtækjum sem þjónusta sjávarútveginn hafi orðið fyrir miklum tekjumissi.

Loforð fyrir kosningar um að hækka ekki skatta heldur taka til í ríkisfjármálunum en gera svo hið gagnstæða - þ.e. segja eitt fyrir kosningar en gera svo annað.

Líklegar breytingar á fjarskiptafyrirtækinu Nova á næstu tveimur árum.

Muninn á að vera í framlínu flugfélags eða fjarskiptafyrirtækis.

10.

Hvaða kúltúrþýðingu hefur diskókúlan og skautasvellið fyrir Nova? Hvað hugsun í stjórnun býr þarna að baki?

11.

Ölgerðin verður Bera í Kauphöllinni. Út af hvað gengur þessi nafnabreyting á Ölgerðinni.

12.

Skiptihlutföllin í sameiningaviðræðum Íslandsbanka og Skaga miðað við núverandi markaðsvirði fyrirtækjanna er 87-13, bankanum í vil, markaðsvirði hans er 258 milljarðar kr. en Skaga 38 milljarða kr. Hvernig getur staðið á því að gengi Íslandsbanka - sem núna er komið í 144 - fer sífellt hækkandi en gengi Skaga hefur lækkað frá uppsveiflunni í byrjun des.

13.

Gengi JBT-Marels hefur hækkað að undanförnu og greinir Helgi Vífill stöðuna hjá fyrirtækinu um þessar mundir.

14.

Gengi Alvotechs sem hefur lækkað hressilega á árinu en fjárfestar eru hins vegar bjartsýnir á að fleiri lyfjaleyfi fáist á næsta ári.

15.

„Lognið“ í Hrútafirðinum - og alast upp í vesturbænum.

Þetta og auðvitað margt fleira í hressilegu Hluthafaspjalli ritstjóranna. - JGH

Hér ræði ég við Sylvíu Kristínu Ólafsdóttur, forstjóra Nova.

Helgi Vífill Júlíusson, hlutabréfagreinandi hjá hjá Reitun (IFS).

Snillingarnir í Rimaskóla - hvíllík frammistaða á jólaskákmóti grunnskóla Reykjavíkur

Tue, 16 Dec 2025 21:37:05 GMT

Krakkarnir í Rimaskóla stóðu sig heldur betur vel á jólaskákmóti grunnskólanna sem var á vegum íþrótta- og tómstundaráðs Reykjavíkur sl. sunnudag, 14. desember. Skáksveitir skólans lentu allar í efstu sætum og unnu til verðlauna - enda breiddin mikil og enga veika hlekki að finna.

Rimaskóli vann örugglega báða flokkana á barnaskólastigi og voru líka með sterkustu B-sveitirnar. Á unglingastigi varð skólinn í öðru sæti á eftir Réttarholtsskóla en þessir tveir skólar voru með áberandi bestu sveitirnar.

Hver skáksveit er skipuð 4 nemendum auk varamanna. Teflt er í þremur aldursflokkum og sendi Rimaskóli tvær skáksveitir í hvern flokk. Það er auðvitað frábær árangur að taka báða flokkana á barnaskólastigi og heyja harða baráttu við Réttarholtsskóla um efsta sætið í unglingaflokki.

Skákkennari Rimaskóla er Björn Ívar Karlsson, skólastjóri Skákskóla Íslands , en umsjónarmaður með skákstarfi skólans er Helgi Árnason , fyrrverandi skólastjóri skólans og formaður Skákdeildar Fjölnis.

Til hamingju Rimaskóli og þið sem teflið fyrir hönd skólans - og eruð okkur í Grafarvogi til svo mikils sóma. Áfram þið. Takk, takk. - JGH

SA-sveit gegn B-sveit í unglingaflokki. Einungis stelpur komast í skáksveitir Rimaskóla á unglingastigi. A-sveit gegn B-sveit. Úrslit 2-2. F.v. Emilía Embla B. Berglindardóttir, Sigrún Tara Sigurðardóttir, Emilía Sigurðardóttir, Tara Líf Ingadóttir, Unnur Ólafsdóttir, Elma Karen Ingimarsdóttir, Silja Rún Jónsdóttir og Elsa Margrét Aðalgeirsdóttir.

A-sveit Rimaskóla í flokki 4.- 7. bekkjar: F.v. Helgi Tómas Jónsson liðsstjóri, Ómar Jón Kjartansson 7. bekk, Anh Hai Tran 7. bekk, Tristan Fannar Jónsson, 7 bekk, (með bikarinn), Alexander Kári Haukdal Bergsson 5. bekk og Þóra Kristín Jónsdóttir 5. bekk.

B-sveit Rimaskóla í flokki 4. til 7. bekkjar. Besta B-sveitin. F.v. Margrét Einarsdóttir, Jakob Jóhann Sigríðarson, Óskar Daníel Aldan Óskarsson, Benedikt Hafsteinsson og Anna Kristín Hauksdóttir

A-sveit Rimaskóla í flokki 1. til 3 bekkjar ásamt ungum liðsstjóra. F.v. Patrekur Einarsson, Helgi Tómas Jónsson liðsstjóri , Mikael Már Atlason, Kristófer Jökull Sigurðsson og Sævar Svan Valdimarsson.

Forysta frá 1. umferð hjá A-sveit Rimaskóla í flokki 1. - 3. bekkjar. F.v. Sævar Svan Valdimarsson, Mikael Már Atlason, Patrekur Einarsson og Kristófer Jökull Sigurðsson.

B-sveit Rimaskóla í flokki 1. til 3. bekkjar. F.v. Khang Minh Tran, Tómas Breki Jónsson, Adam Elí Óskarsson, Elsa María Bachadóttir og Ásta Sóllilja Marteinsdóttir.

Allt ljóslaust - umferðarljósin óvirk á gatnamótum Gullinbrúar og Fjallkonuvegar

Tue, 16 Dec 2025 20:40:19 GMT

Það hefur verið vandi að aka um ein umferðarþyngstu gatnamótin í Grafarvogi í kvöld, gatnamót Gullinbrúar og Fjallkonuvegar. Umferðarljósin eru óvirk.

Þegar Grafarvogur.net var þar á ferð um áttaleytið í kvöld var þó mesta furða hvað umferðin gekk vel fyrir sig - enda kvöltmatartíminn ekki háannatími við gatnamótin.

Við birtum nokkrar myndir frá gatnamótunum og ljósljósu götuvitunum. - JGH

Nú er illt í efni - ljósljósir götuvitar við Gullinbrú í kvöld.

Biðskyldumerki blasa við - Gullinbrúin á réttinn. Fara þarf varlega þegar tekin er vinstri beygja inn í Hamrahverfið. Sem og vinstri beygjan af Fjallkonuvegi niður Gullinbrúna.

Verulegt hættuástand en mesta furða hvað umferðin gekk vel fyrir sig.

Skær eru ljósin á bílunum - en vitarnir eru óvirkir.

Hvað á þessi stjarna sameiginlegt með lagi Flowers?

Mon, 15 Dec 2025 17:22:32 GMT

Gluggaskrautið fær svolítið annan blæ þegar það gægist út um gluggann og mátar sig við svarthvítu snjómugguna. Höfuðborgarbúar fengu óvænta snjómuggu upp úr hádegi í gær, sunnudaginn 14. mars, og úti varð flughált á augabragði. Veröldin varð svarthvít.

Allt hefur þetta sinn sjarma. Jólasnjór á þriðja sunnudegi á aðventu. Kyrrðin, maður minn, hún er fyrir öllu; vetrarstillan.

En hvað er verið að blanda Flowers í málið?

Hljómsveitin Flowers flutti lagið Glugginn á áttunda áratug síðustu aldar við miklar vinsældir. Enn má heyra það á öldum ljósvakans. „ Ég sit og gægist oft út um gluggann. “ Lagið er eftir Rúnar Gunnarsson en textinn eftir Þorstein Eggertsson . Sjá má textann að fullu hér.

Og örlítið meira: strákarnir í Flowers voru jú líka stjörnur. - JGH

Í Gluggalagi Flowers er talað um laglega unglinga og góðlega gamlingja. En þau þessi láta sig það litlu varða enda aldurslaus.

Afreksfólk. Emilía Embla og Dagur skákmenn Fjölnis annað árið í röð. Til hamingju!

Mon, 15 Dec 2025 16:33:48 GMT

Þau eru svo sannarlega afreksfólk í íþróttum Annað árið í röð voru þau Emilía Embla og Dagur valin skákmennn Fjölnis 2025.

Á glæsilegri uppskeruhátíð Fjölnis í Keiluhöllinni á dögunum var tilkynnt um val á afreks-íþróttafólki félagsins í öllum deildum.

Skákdeildin valdi Emilíu Emblu B. Berglindardóttur skákkonu Fjölnis 2025 og Dag Ragnarsson skákkarl Fjölnis 2025. Til hamingju, þið eruð miklar fyrirmyndir í hinu framúrskarandi skákstarfi Fjölnis.

Dagur er einn af lykilmönnum í hinni sigursælu Íslandsmeistarasveit Fjölnis sem sigraði á Íslandsmóti skákfélaga í vor með fullu húsi vinninga. Dagur tefldi með landsliði Íslands á EM landsliða í skák sem fram fór í Georgíu í október sl.

Emilía Embla er Íslandsmeistari stúlkna í flokki U14 og einnig stúlknameistari Reykjavíkur, annað árið í röð. Hún er í skáksveit Rimaskóla sem vann Íslandsmót barnaskólasveita og náði 3. sæti á NM barnaskólasveita í Finnlandi nú í haust.

Skákdeild Fjölnis óskar þeim Emilíu Emblu og Degi hjartanlega til hamingju með heiðurinn. ( Ljósm: Gunnar Jónatansson ). - JGH

Emilía Embla B. Berglindardóttir er Íslandsmeistari stúlkna í flokki U14 og einnig stúlknameistari Reykjavíkur, annað árið í röð. (Ljósm. Gunnar Jónatansson).

Svakaleg hálka - aldrei of varlega farið

Sun, 14 Dec 2025 17:07:48 GMT

Það hefur verið flughált í Grafarvogi núna síðdegis og þá er auðvelt að misreikna aðstæður. Ekið hafði verið á þessi umferðarljós á hinum umferðarþungu gatnamótum Gullinbrúar og Hallsvegar eftir hádegi í dag þegar Grafarvogur.net átti þar leið um.

Það er aldrei of varlega farið í umferðinni - og hvað þá í mikilli hálku. - JGH

Mikil hálka á götum í Grafarvogi síðdegis og óhöppin gera sjaldan boð á undan sér.

Snjómugga eftir hádegi og það varð flughált á skömmum tíma.

Tveir Grafarvogsbúar með skemmtilegt tónlistarmynd sem hægt er að hlusta á hér á vefnum. Söngkona Berglind Magnúsdóttir

Sat, 13 Dec 2025 16:08:00 GMT

Grafarvogsbúarnir Björgvin Þór Valdimarsson og Roar Aagestad koma að nýju og skemmtilegu tónlistarmyndbandi sem heitir Jólagjöfin í ár . Lag og texti er eftir Björgvin Þór en Roar gerði myndbandið. Flytjendur eru Berglind Magnúsdóttir söngkona ásamt félögum úr Karlakór Reykjavíkur, Karlakór Selfoss og Lúðrasveit Þorlákshafnar.

Þegar myndbandið var unnið varð niðurstaðan að taka það upp í nýja miðbænum á Selfossi en þar er afskaplega jólalegt um að litast og þar má finna fallegar gjafavöruverslanir - og verður bara að segjast eins og að það var vel til fundið að velja þann stað þótt Grafarvogurinn okkar sé auðvitað þar sem hjartað slær.

HIN FULLKOMNA JÓLAGJÖF

Texti lagsins fjallar um jólagjafakaup okkar Íslendinga og leitinni að hinni fullkomnu jólagjöf. Því fylgir að fólk fer mikið á netið og fylgist með auglýsingum því alltaf er eitthvað nýtt að koma á markaðinn og þó að við eigum nánast allt þá þurfum við alltaf að bæta einhverju nýju við. Allt þetta skapar eftirvæntingu og gleði og spennan eykst með hverjum deginum.

Þetta er skemmtilegt lag eftir Björgvin og hægt að hlusta á það hér.

Þeir sem vilja nálgast það á Spotify þá er það hér.

Til hamingju með nýja jólalagið, félagar Björgvin Þór og Roar . - JGH

Þegar myndbandið var unnið varð niðurstaðan að taka það upp í nýja miðbænum á Selfossi þótt hjörtu okkar Grafarvogsbúa slái auðvitað við voginn fallega.

Söngkonan Berglind Magnúsdóttir flytur lagið ásamt tveimur karlakórum og lúðrasveit - og gerir þetta listavel.

Hluthafaspjall ritstjóranna - Heiðrún Jónsdóttir gestur okkar að þessu sinni

Sat, 13 Dec 2025 15:23:08 GMT

Það var ánægjulegt að fá Heiðrúnu Jónsdóttur , framkvæmdastjóra Samtaka fyrirtækja í fjármálaþjónustu , til okkar Sigurðar Más Jónssonar í Hluthafaspjall ritstjóranna en þátturinn var tekinn upp í hádeginu í gær og er sýndur á efnisveitunni Brotkast.is. Heiðrún mætti í seinni hlutann hjá okkur.

Þegar við hófum samtalið við hana rifjaði ég upp að hún hefði verið í viðtali í Frjálsri verslun árið 1999 þegar hún varð önnur tveggja sem fyrstar kvenna settust í framkvæmdastjórn fyrrum stórveldisins við Eyjafjörðinn, KEA.

Það var skemmtileg upprifjun - sem og auðvitað allt samtalið við hana þar sem farið var inn á sparnað Íslendinga, stærð bankanna (stórir fiskar í lítilli tjörn), sértæku bankaskattana, fjármálalæsi unglinga, arðsemi bankanna, eigið fé þeirra, minni rekstrarkostnað - og nýlega ráðstefnu um hvernig megi efla íslenska hlutabréfamarkaðinn og hvort Daði Már ætti ekki að taka upp gamla, góða skattaafsláttinn fyrir einstaklinga við kaup á hlutabréfum.

Heiðrún er flestum hnútum kunnug í viðskiptalífinu og hefur setið í stjórnum fjölda fyrirtækja ásamt því að sinna lögmannsstörfum. - JGH

Heiðrún Jónsdóttir, framkvæmdastjóri Samtaka fyrirtækja í fjármálaþjónustu.

Besta jólaskreytingin? Hér er heldur betur farið alla leið í Hamrahverfinu

Fri, 12 Dec 2025 10:19:39 GMT

Fréttin okkar um að Smárarimi 3 væri líklegast besta skreytta húsið í Grafarvoginum fyrir þessi jól fékk verðskuldaða athygli og mikla lesningu á vefnum. Í kjölfarið komu fjölmargar ábendingar um einbýlishús í Hamrahverfinu væri síst síðra og varla væri hægt að horfa fram hjá því þegar rætt væri um best skreytta húsið í Grafarvoginum.

Við gerðum okkur ferð og viti menn; við Salthamra 1 er sannkölluð jóladýrð. Eins konar jólaland. Og það er hverju orði sannara að þar sé farið alla leið og ekkert til sparað við að setja upp jólaseríur. Glæsilegt.

Þetta er hornhús við Salthamra og Lokinhamra og þessi skreyting fer ekki fram hjá neinum - ekki svo sem frekar en við Smárarima 3.

Mjög ólíkar skrreytingar en e infaldlega vel gert í báðum tilvikum! - JGH

Salthamrar 1 í Hamrahverfinu. Sjón er sögu ríkari - stórglæsileg skreyting.

Ekki bara farið alla leið í skreytingunni heldur líka allan hringinn í kringum húsið.

Það blés á seríurnar í rokinu í gærkvöldi.

Rauðar, hvítar eða marglita jólaseríur? Það er nú það. Fjölbreytileikinn gefur góðan tón

Wed, 10 Dec 2025 23:35:25 GMT

Ljósin í bænum, var nafn á hljómsveit hér í denn þar sem sungið var um að fara í ljós þrisvar í viku. Núna þykja sólbekkirnir hættulegir en jólaljósin gleðja svo sannarlega og það er víða vel skreytt í Grafarvoginum.

Hann var svo sem ekki víðfeðmur rúnturinn í kvöld. Skottast í Spöngina eftir lítilræði en úr varð litrík heimferð þar sem jólaseríur og jólaskreytingar utandyra á húsum fönguðu hugann um stund.

Tók nokkrar myndir þar sem rauðar, hvítar og marglitar séríur komu við sögu. - JGH

Stílhreint. Hvítt og rautt. Eitthvað við þetta.

Hring eftir hring. Góðir snúningar á þessu tré. Hvítt og stílhreint.

Sveinninn rauði ekki upp við vegg heldur varpað upp á vegg hjá vel skreyttu Landsneti. Nóg rafmagn þar.

Vel skreytt. Þessar seríur hjá Landsneti blasa við okkur og eru í alfaraleið í Grafarvoginum í kringum jólin. Grænt og rautt - eru það ekki þekktir jólalitir?

Bæði vel skært og skreytt við fyrirtækið Krumma sem selur leiktæki - og er við hliðina á Landsneti.

Samræmi. Þetta smekklega fjölbýlishús við Sóleyjarima tekur sig vel út. Þyrfti kannski að setja seríur á allar svalir til að taka þetta alla leið.

Jólakransinn. Svo er það jólakransinn á útidyrahurðum. Hér er marglita séría við þakkant og rauð sería á litla trénu - sem svo aftur rímar ágætlega við kransinn.

Jólaskreytingar utanhúss - þetta er líklegast besta skreytta húsið í Grafarvoginum

Wed, 10 Dec 2025 22:40:54 GMT

Það er ánægjulegt hvað Grafarvogsbúar hafa tekið vel við sér með jólaskreytingar og seríurnar setja svo sannarlega svip sinn á hverfið. Víða er þetta mjög vel gert en mér er til efs að margir toppi jólaljósadýrð íbúanna við Smárarima 3.

Þurfti að skottast upp í Spöng og ná í lítilræði. Á leiðinni til baka blasti dýrðin við mér þegar ég kom að hringtorginu við Borgaveginn við Rimahverfið. Það var ekki annað í boði en beygja niður Smárarimann og skoða betur.

Þetta er alvöru og tekið alla leið. Glæsilegt. Glugginn nánast sýningargluggi og með mikið aðdráttarafl. - JGH

Smárarimi 3 í Grafarvogi. Glugginn er einfaldlega eitt stykki sýningargluggi. Þar hanga flaxandi strimlar sem skipta litum og mynda hjörtu. Ekki séð þetta áður. Vel gert.

Litadýrðin og ljósasýningin blasir við frá hringtorginu við Borgaveg niður í Rimahverfi. Á leið úr Spönginni og ekki annað í boði en beygja niður að Smárarimanum og skoða þessa skreytingu betur.

Þetta er alvöru og tekið alla leið.

Meiri sala á bókum en í fyrra, segir Pétur Viðarsson bóksali í Torginu

Wed, 10 Dec 2025 13:41:07 GMT

Pétur Viðarsson, bóksali í Bókabúðinni í verslunarmiðstöðinni Torginu í Grafarvogi, segir að sala á bókum sé meiri en undanfarin ár og að veruleg aukning sé í sölu á barnabókum.

Hann hefur staðið vaktina í litlu bókabúðinni sinni af mikilli eljusemi frá árinu 1994 eða í rúm þrjátíu ár og þjónustað Grafarvogsbúa.

Af einstökum höfundum segir hann að Arnaldur, Yrsa og Ólafur Jóhann seljist best og að sér sýnist bók Ólafs, Kvöldsónatan , hafi vinninginn, ef einhver er. Einar Kárason komi þarna stutt á eftir.

Bók Arnalds Indriðasonar heitir Tál , Yrsu Sigurðardóttur Syndafall og Einars Kárasonar, Sjá dagar koma.

„ Ef til vill segja einhverjir að þetta sé hefðbundið, Arnaldur og Yrsa við toppinn enn eitt árið. Að vísu seldist bókin hans Geirs Haarde vel hjá mér í fyrra, raunar mjög vel,“ segir Pétur.

Hann segir ennfremur að það sé mjög ánægjulegt hvað barnabækur seljast vel þetta árið - og hversu mikið er spurt um þær. „Ævar vísindamaður hefur vinninginn í barnabókunum, líkt og undanfarin ár,“ segir Pétur. „Gunni Helga selst líka alltaf vel.“

Bókabúðin í Torginu er opin frá 11 til 18 alla virka daga. „Núna bætum við laugardögunum við og erum með fjóra síðustu laugardagana fyrir jól opna - og svo síðasta sunnudaginn fyrir jól líka. Aðventan er skemmtilegur tími og ánægjulegt að bókin á alltaf sína traustu fylgjendur þegar kemur að jólunum.“

Rétt aðeins í lokin - þú er þekktur sem mikill stuðningsmaður Úlfanna í enska boltanum. „Uss, núna er staðan erfið hjá okkur þar. Búnir að selja mjög marga góða leikmenn á undanförnum árum. En vonandi birtir til hjá okkur á næstunni og við náum að halda okkur uppi.“ - JGH

Við nefndum Pétur Viðarsson brosmilda bóksalann þegar við tókum hús á honum í apríl sl. Engar ýkjur þar, hann hefur gaman af að þjónusta Grafarvogsbúa í litlu bókabúðinni sinni þar sem hann hefur staðið vaktina í yfir þrjátíu ár.

Þessi kallar eru sívinsælir; Pilkington jólasveinarnir, segir Pétur. Þeir fara ofan í margan pakkann en margir safna þessum sveinum.

Hluthafaspjall ritstjóranna - hversu mikið fé hefur ríkið farið á mis við vegna sölunnar á Íslandsbanka?

Sat, 06 Dec 2025 14:56:18 GMT

Þær urðu heldur betur fjörugar umræður hjá okkur félögunum Sigurði Má Jónssyni í nýjasta þætti Hluthafaspjalls ritstjóranna sem tekinn var upp í hádeginu í gær og hægt er að nálgast í heild sinni á Brotkast.is. Þetta var tímamótaþáttur; númer 50 frá því í fyrrahaust – og erum við ánægðir með þann mikla fjölda gesta sem hafa komið til okkar í þáttinn frá því við byrjuðum.

Á meðal þess sem við ræddum í gær.

Fór ríkið á mis við 25 milljarða? Gengi bréfa í Íslandsbanka hefur rokið upp að undanförnu og er komið upp í 142 kr. Hlutur ríkisins sem seldur var í vor er núna 115 milljarða virði en var seldur á um 90 milljarða.

Þrátt fyrir að bréf í Alvotech hafi hækkað að undanförnu, og gengi þeirra sé komið í 674, þá má minna á að gengið var um 1.900 snemma á árinu.

Það er ánægjulegt fyrir Róbert Wessman að kaupum Lotus í Taívan á öllum rekstri Alvogen US sé formlega lokið. Róbert er stjórnarformaður Lotus en sameinað fyrirtæki er eitt af tuttugu stærstu samheitalyfjafyrirtækjum heims.

RÚV og Eurovision. Hvers vegna ekki að spyrja þjóðina? Ísraelum verður ekki vísað úr keppninni en fyrr í haust setti meirihluti stjórnar RÚV fyrirvara um þátttöku Íslands vegna þessa máls og lét Samband sjónvarpsstöðva Evrópu vita af þeim fyrirvara. Hver ákveður þátttöku okkar? Stjórn RÚV eða ráðherra? Ísland er mikil Eurovision-þjóð. Hvers vegna er þjóðin ekki spurð? Hvar eru könnunarfyrirtækin núna?

Er virkilega svo komið í lok ársins 2025 að Logi Már Einarsson menntaráðherra hafi framtíð fjölmiðla á Íslandi í höndum sér? Núna bíða einkreknir fjölmiðlar eftir molum frá honum í formi fjölmiðlastyrkja. Þetta minnir á sjávarútvegsfyrirtæki á árum áður þegar forráðamenn þeirra biðu í röðum á skrifstofu forsætisráðherra til að geta reddað rekstrinum frá mánuði til mánaðar.

Kvartað var yfir fyrirferð RÚV á fjölmiðlamarkaðnum fyrir nokkrum árum - og var krafan þá að ríkið minnkaði umfang sitt. Nei, nei, - þess í stað var hlutur ríkisins aukinn með því að moka molum í einkarekna fjölmiðla sem núna eru orðnir háðir ríkinu í fjárframlögum.

Það vekur athygli að tekjur Sýnar á þriðja ársfjórðungi voru minni núna en í fyrra – þrátt fyrir að enski boltinn hafi átt að stórauka tekjurnar. Tap fyrir tekjuskatt á þessum ársfjórðungi var sömuleiðis mun meira núna en í fyrra.

Umframeftirspurn var í stórglæsilegu hlutafjárútboði Dranga sem rekur Samkaup, Orkuna og Lyfjaval. Félagið er metið á 24 millljarða eftir útboðið. Skel á 61% í Dröngum.

Jólasalan er núna í fullum gangi. Gengi bréfa í Festi og Högum hefur hækkað talsvert á árinu; eða um 19% í Festi (markaðsv. 119 makr.) og um 15% í Högum (makaðsv. 127 makr.)

Þetta og talsvert meira í þessum fimmtugasta þætti okkar. Myndataka gleymdist þannig að við fórum í safnið.

Hókus Pókus í Bónus í Spönginni; heill rekki farinn og meira rými - hvað varð um vörurnar?

Thu, 04 Dec 2025 21:10:11 GMT

Það eru svolitlir töfrar í Bónus í Spönginni og ekki allt sem sýnist - heill rekki gufaður upp þegar inn í verslunina er komið og allt annað að ganga inn í hana - stóraukið rými við megin innganginn. Hókus pókus - hvað varð um eiginlega um vörurnar?

Þetta eru fínar breytingar og svarið við spurningunni er að búið er að taka gangana sem lágu þvert á rekkana í burtu og núna eru rekkarnir því mun lengri en áður án þess að það komi niður á rýminu við kælana.

Framkvæmdirnar hófust í gær - og þá héldu ýmsir að vöruskortur væri yfirvofandi því við blöstu tómar hillur; og það á aðventunni. En svo var ekki, það var verið að taka rekkana í burtu. Ný ásjóna búðarinnar blasti svo við viðskiptavinum í morgun.

Brauðið blasir enn við fyrst í flæði - hægra megin - þegar komið er inn í versluna en einn rekki farinn og allt annað að athafna sig.

Lengri rekkar og gangurinn farinn sem lá þvert á þá. Hann tók greinilega meira pláss en maður hélt og á honum voru oft ansi mikil þrengsli. Breyting til bóta.

Það var ljóst í gær að eitthvað bjó að baki tómum hillum annað en vöruskortur. Jú, það var verið að fækka um einn rekka í búðinni og lengja hina til að koma vörunum fyrir.

Gangurinn þvert á rekkana þegar inn í búðina var komið hefur augljóslega tekið meira rými en maður gerði sér grein fyrir. Nú er hann horfinn og búið að lengja og strekkja á hinum til að koma vörunum fyrir.

Stórkostlegir jólatónleikar Raddbandafélags Reykjavíkur - fengu gríska gyðju; Nínu Basdras, í lið með sér í nokkrum lögum

Thu, 04 Dec 2025 17:44:26 GMT

Það er alltaf eitthvað sterkt og kröfugt við góða karlakóra. Raddbandafélag Reykjavíkur er einn af mörgum mjög svo öflugum kórum landsins og hann blómstraði enn einu sinni á árlegum jólatónleikum sem voru haldnir sl. þriðjudagskvöld í Áskirkju. Grafarvogsbúar eiga að minnsta kosti einn fulltrúa í hópnum; Jónas Örn Helgason, en hann er sonur Helga Árnasonar, fyrrum skólastjóra í Rimaskóla og Aðalbjargar Jónasdóttur.

Kórinn hefur tekið þátt í kórakeppnum erlendis með góðum árangri og unnið til verðlauna.

Á jólatónleikunum að þessu sinni fengu hinir líflegu og litríku kórfélagar góðan liðsauka en það var gríska söngkonan Nína Basdras en hún er grísk lýrísk sópransöngkona.

Stjórnandi kórsins er Egill Gunnarsson.

Grafarvogur.net var á jólatónleikunum í Áskirkju og naut hverrar mínútu. Stemningin var einstök. Raddir jóla - sem var yfirskrift tónleikanna - hljómuðu í allri sinni dýrð.

Þess má geta að þeir kórfélagar voru myndaðir fyrir utan gamla hegningarhúsið við Skólavörðustíg við gerð söngskrárinnar sem dreift var á tónleikunum og að sjálfsögðu var Nína Basdras með þeim. - JGH

Kórfélagar í Raddbandafélagi Reykjavíkur voru myndaðir fyrir utan gamla hegningarhúsið við Skólavörðustíg við gerð söngskrárinnar sem dreift var á tónleikunum og að sjálfsögðu var gríska gyðjan Nína Basdras með þeim.

Húmor í þessu og vel fagnað í lokin.

Fullt tungl í kvöld - hvað er fullt tungl og hversu lengi værir þú að „aka“ til tungslins? Apollo 11 var fjóra daga til tungslins

Thu, 04 Dec 2025 14:51:54 GMT

Það verður fullt tungl í kvöld kl. 23:14 í kvöld, samkvæmt Almanaki Háskóla Íslands. Magnús Ásgeirsson Grafarvogsbúi birtir myndir af tunglinu á FB-síðu sinni í dag og látum við myndir hans fylgja með þessari frétt.

En hvað er fullt tungl? Það er þegar daghlið tunglsins snýr að okkur. Raunar snýr alltaf sama hlið tuglsins að okkur því það snýst einu sinni um sjálft sig á sama tíma og það snýst einn hring umhverfis Jörðina.

„Þegar tunglið snýst í kringum Jörðina sjáum við misstóran hluta af upplýsta helmingnum. Hve stóran ræðast af því hvernig sólin, Jörðin og tunglið raðast upp. Þegar tunglið er milli Jarðar og sólar snýr næturhlið þess að okkur. Þá er sagt að tunglið sé nýtt. Nýtt tungl sést aldrei á himninum, “ segir á vefnum https://www.geimurinn.is/solkerfid/tunglid/

„Með hverju kvöldinu sem líður eftir nýtt tungl sést sífellt meiri hluti af upplýsta helmingi tunglsins. Þá er tunglið vaxandi.

Tveimur vikum eftir nýtt tungl er Jörðin milli tunglsins og sólarinnar. Þá snýr daghlið tunglsins að okkur og við blasir fullt tungl á himninum . F ullt tungl er á lofti alla nótina, alveg frá því að sólin sest og þar til hún rís aftur.

Eftir fullt tungl fer tunglið minnkandi. Tveimur vikum eftir fullt tungl er tunglið aftur nýtt.

Tunglið er næstum fjórar vikur eða einn mánuð að ferðast í kringum Jörðina. Tunglið er með öðrum orðum nýtt eða fullt á fjögurra vikna fresti.“

Á þessari mynd Magnúsar Ásgeirssonar virðist stutt til tunglsins.

En hvað er langt til tungslins? Að meðaltali er tunglið í 384.400 km fjarlægð frá Jörðinni. Braut tunglsins um Jörðina er sporöskjulaga svo fjarlægðin er breytileg eða frá um 363.000 km upp í 405.000 km.

Apollo-tunglfararnir voru um það bil fjóra daga að ferðast til tunglsins. Það tekur ljósið eina sekúndu að ná til tungslins.

Á vefnum geimurinn.is/solkerfid/tunglid/ er þeirri spurningu sömuleiðis varpað fram hvað menn væru lengi að „aka“ til tungslins.

„Segjum sem svo að við ækjum á 90 km hraða á klukkustund og að fjarlægðin til tunglsins sé 384.000 km. Deilum fjarlægðinni með hraðanum og fáum út 4.267 klukkustundir. Deilum svo þeirri tölu með 24 (fjöldi klukkustunda í sólarhring) til að finna dagafjöldann og fáum út 177 daga.“

Svo er bara að fara út með myndavélina í kvöld. Það verður heiðskírt, skv. spánni, og tunglið mun blasa við í allri sinni dýrð. - JGH

Ef þú „ækir“ á 90 km hraða til tungslins þá tæki það þig 177 daga að komast á leiðarenda. Apollo-tunglfararnir voru fjóra daga á leiðinni.

Öflugar konur! Soroptimistaklúbburinn hefur styrkt góð málefni í Grafarvogi um milljónir

Thu, 04 Dec 2025 13:52:08 GMT

Það er ekki ofsögum sagt að Soroptimistaklúbbur Grafarvogs vinni öflugt starf í þágu samfélagsins hérna í Grafarvogi. Á undanförnum árum hefur klúbburinn stutt við fjölmörg málefni innan hverfsins sem og utan þess - lögðu meðal annars til 1,5 milljónir króna í landssöfnun Soproptimistaklúbba til styrktar Kvennaathvarfinu. Á upphafsmyndinni sjást starfsmenn Stuðla taka við alls kyns íþróttavörum frá klúbbnum - vörur sem svo sannarlega koma sér vel þar á bæ.

„Klúbburinn var stofnaður árið 1994 af hópi kvenna sem vildu láta gott af sér leiða í þágu samfélagsins hér í Grafarvogi,“ segir Theódóra Ólafsdóttir , varaformaður klúbbsins og formaður fjáröflunarnefndar.

Hún hvetur konur í Grafarvogi eindregið til að til að koma til liðs við þær og ganga í klúbbinn. „Það er mikil samstaða í klúbbnum og fyrir utan að koma að ákveðnum verkefnum þá njótum við þess auðvitað að vera saman og gera okkur dagamun. Við fórum til dæmis fyrr í haust í heimboð til þeirra Bergþórs Pálssonar og Alberts Eiríkssonar - sem var alveg frábær stund.“

Handagangur í öskjunni. Hér eru þær systur í Soroptimistaklúbbnum að festa miða á kerrur í Hagkaup í Spöng í verkefninu Þekktu ljósin.

Að sögn Theódóru er listinn orðinn langur varðandi styrki til ýmissa málefna í Grafarvogi - og útilokað að tína allt til - en fyrir utan hið blólmlega framlag þeirra í landssöfnuninni fyrir Kvennaathvarfið upp á 1,5 milljónir króna má meðal annars nefna eftirfarandi:

* Jólamatarkörfur til einstæðinga í samstarfi við kirkjuna.
* Bókagjafir til formanna nemendaráða við útskriftir úr grunnskólum Grafarvogs.
* Hjúkrunarheimilið Eir : sérhannað borð undir augnsmásjá og tæki til að mæla augnþrýsting hjá rúmliggjandi einstaklingum.
* Hjúkrunarheimilið Eir : Tvær loftdýnur og tvær rafmagnssessur.
* Gjafir til kvennasambýlis í Vættaborgum – teppi, grill og skjólveggur.
* Magnari fyrir heimili kvenna með Alzheimer.
* Gjafir til sambýlis á Gylfaflöt – róla og sófar/sófasett.
* Fjárhagsaðstoð til bágstaddra í Grafarvogi.

„Við erum hluti af alþjóðlegum samtökum kvenna sem hafa það að markmiði að efla jákvæða heimsmynd þar sem samstaða og styrkur kvenna nýtist til að skapa framfarir. Samtökin vinna að bættri stöðu kvenna, mannréttindum fyrir alla, jafnrétti, framförum og friði – með alþjóðlega vináttu og gagnkvæman skilning að leiðarljósi,“ segir Theódóra.

Og bætir við: „Það er mjög góður andi í klúbbnum og ég hvet konur hér í Grafarvogi eindregið til að ganga í klúbbinn og vera með okkur.“ - JGH

Heimboð til Bergþórs og Alberts. Hluti af félagsstarfinu er auðvitað að skemmta sér saman og gera sér dagamun. Hér er hluti klúbbsins í heimsókn hjá þeim sæl- og fagurkerum Bergþóri Pálssyni og Alberti Eiríkssyni fyrr í haust.

Soroptimistasystur að sjá um vöfflukaffi á prjónadegi.

Vinningshafar í golfmóti klúbbsins.

Styrkur til Stuðla. Fulltrúar Soroptimistaklúbbs Grafarvogs afhentu Stuðlum fjölbreyttar íþróttavörur til notkunar í þágu ungmenna í þjónustu þeirra. Meðal þess sem afhent var voru fótboltar, borðtennisbúnaður og körfuboltabúnaður. Frá vinstri: Sigríður Sveinsdóttir, formaður klúbbsins og Sigurbjörg Hjörleifsdóttir, verkefnastjóri klúbbsins. Starfsemenn Stuðla sem tóku á móti gjöfunum. Frá vinstri: Dagný Gunnarsdóttir, Árni Guðmundsson, Ellert Björgvin Schram og Erla Margrét Hermannsdóttir.

Sólin lágt á lofti og blindar ökumenn - aukin árekstrarhætta. Sólgleraugu nauðsynleg

Tue, 02 Dec 2025 15:50:05 GMT

Það er fyllsta ástæða til að vara ökumenn við þessa dagana þegar sólin er svona lágt á lofti og blindar ökumenn í umferðinni.

Þannig var mjög erfitt að aka upp Höfðabakkann í dag þar sem sterk sólin vafðist fyrir ökumönnum.

Það er alkunna að þegar sólin er svona lágt á lofti að oftar en ekki má sjá þess getið í árekstrarskýrslum lögreglunnar að ökumenn hafi blindast af sólinni.

Sólgleraugu eru nauðsynleg við þessar aðstæður. Förum varlega.

Að vísu mætti bæta lýsinguna við Höfðabakkann þegar rökkvar og dimma tekur. Það vantar þarna nýjar perur í einhverja ljósastaurana. - JGH

Jæja, loksins eitthvað að gerast - snjallljósin jafnvel í gagnið í lok næstu viku. Sumir nýju stauranna virðast skakkir

Tue, 02 Dec 2025 15:13:46 GMT

Það hefur komist töluverð hreyfing á hlutina við Höfðabakkann eftir að Grafarvogur.net flutti fréttir fyrir helgi af ótrúlegu sleifarlagi og gaufi í framkvæmdum - og birti því til stuðnings fjölda mynda.

Þegar við vorum þarna á ferð í dag var talsverður gangur í verkinu við að setja upp ný ljós og sögðu karlarnir á staðnum að ekki næðist að skipta út ljósunum í þessari viku en mjög líklega yrði það í lok þeirrar næstu. Þarna lágu ný ljós og kaplar í sandinum - og menn að verki. Loksins. Það veit vissulega á gott að eitthvað sé að frétta. Framkvæmdir hófust um mitt sumar.

Þarna voru menn frá verktakafyrirtækinu Rafafli sem stóðu vaktina í ljósamálunum við Höfðabakkann í dag en það er fyrirtækið Krafla sem annast heildarframkvæmdirnar. Verkfræðistofan VSÓ hefur eftirlit með verkinu.

Það voru Kröflumenn sem reistu nýju staurana - og þegar ég hafði á orði að sumir þeirra virtust halla - væru skakkir - var því ekki mótmælt.

Enginn þeirra nálgast þó skakka turninn í Písa hvað varðar hallanda. - JGH

Jæja, loksins eitthvað að frétta. Smá hreyfing komin á verkið.

Í hádeginu í dag. Gömlu tímastilltu klukkuljósunum jafnvel skipt út í næstu viku - og þá taka snjalljósin við.

Fullveldisdagurinn 1918 í skugga Spænsku veikinnar - athyglisverð færsla Magnúsar Ásgeirssonar

Mon, 01 Dec 2025 21:40:26 GMT

Grafarvogsbúinn Magnús Ásgeirsson er með athyglisverða færslu á FB-síðu sinni í dag þegar hann fer í fáeinum orðum um fullveldisdag okkar Íslendinga, 1. desember, sem er í dag. Hann bendir á að fullveldisdagurinn 1918 hafi verið haldinn í skugga Spænsku veikinnar og þennan vetur hafi verið óvenju kalt - enda oftar en ekki talað um „ frostaveturinn mikla árið 1918 “.

Hér kemur færsla Magnúsar: „Fullveldisdagurinn 1. desember, dagur sem aldrei má gleymast, það fer frekar lítið fyrir honum þessi árin og hátíðleikinn hefur fjarað út með árunum, nú er þetta eins og hver annar virkur dagur, sem hann er þó í raun ekki, heldur mikilvægur dagur í Íslandssögunni.

Á þessum degi tóku Sambandslögin gildi, en þar kom m.a. fram að Ísland væri fullvalda og frjálst ríki. Íslenski fáninn var dreginn að húni í fyrsta skipti sem fullgildur þjóðfáni þennan dag.

Dagurinn mun hafa verið heldur hráslagalegur. Engin hátíðarhöld voru þennan dag vegna spænsku veikinnar. Veturinn þá var harður, mikill frostavetur, Kötlugos hófst 12. október og stóð til 4. nóvember.

Spænska veikin blossaði upp á haustdögum 1918 og létust hundruð manna.Lýsingar eru skelfilegar, en framganga læknisins sem annaðist margan sjúklinginn var einstök og sagt er að hann hafi ekki unnt sér mikillar hvíldar; Maggi Júlíusson læknir á þeim tíma var áhugamaður um búskap og reisi sér býli í útjaðri Reykjavíkur.

Klambra skýrði hann býlið, eftir fæðingarbæ sínum Klömbrum í Vestur Hópi í Húnavatnssýslu. Klambratún dregur nafn sitt af bænum.

Þetta er aðeins brot af sögu þessa merka dags, 1. desember, sem er fánadagur.“ - JGH

Magnús Ásgeirsson um 1. desember 1918. „Dagurinn mun hafa verið heldur hráslagalegur. Engin hátíðarhöld voru þennan dag vegna spænsku veikinnar.“

Íslenski fáninn var dreginn að húni í fyrsta skipti sem fullgildur þjóðfáni þennan dag.

Kjarvalsstaðir eru við Klambratún. „Maggi Júlíusson læknir á þeim tíma var áhugamaður um búskap og reisti sér býli í útjaðri Reykjavíkur. Klambra skýrði hann býlið, eftir fæðingarbæ sínum Klömbrum í Vestur-Hópi í Húnavatnssýslu. Klambratún dregur nafn sitt af bænum.“

Grafarvogsbúar - við getum verið stolt af þessum stúlkum. Íslandsmeistarar í skák!

Mon, 01 Dec 2025 19:57:57 GMT

Til hamingju! Grafarvogsbúar við getum verið stolt af þessum Fjölnisstúlkum en þær eru Íslandsmeistarar í skák. Unnu sína flokka á Íslandsmóti barna- og unglinga þetta árið. Vel gert.

Þetta eru þær Þóra Kristín Jónsdóttir sem vann í flokki 10 ára og yngri og Emilía Embla B. Berglindardóttir sem sigraði í 14 ára og yngri.

Þetta eru magnaðar stúlkur og Grafarvogur.net óskar þeim svo sannarlga til hamingju með árangurinn. Þær halda merki Fjölnis og Grafarvogs hátt á lofti. - JGH

Þóra Kristín Jónsdóttir nemandi í 5. bekk Rimaskóla.

Emilía Embla B. Berglindardóttirnemandi í 8. bekk Rimaskóla.

Mikil spenna fyrir Þorrablóti Grafarvogs í Egilshöllinni - brekkusöngur og Bandamenn

Mon, 01 Dec 2025 19:22:20 GMT

Þorrablót Grafarvogs verður haldið í fimmtánda sinn í Egilshöll 17. janúar nk. Blótið hefur vaxið í að verða eitt af þeim allra stærstu enda fer vel um það og gesti í Egilshöllinni. Slíkar eru kræsingarnar á þessu blóti að þar stendur enginn svangur upp frá borði.

Í ár verður ekkert slegið af; frábærir skemmtikraftar og dýrindis matur frá Múlakaffi, bæði glæsilegt þorrahlaðborð og að sjálfsögðu fjölbreyttar kræsingar fyrir þá sem kjósa hefðbundinn veislumat, eitthvað fyrir alla! Veislustjórar verða Salka Sól og Unnsteinn Manuel sem eru af góðu kunn og munu sprella með gestum og hver veit nema þau taki lagið.

Það verður brekkusöngur, Kristmundur Axel mætir að sjálfsögðu, Herra Hnetusmör og Daníel Ágúst og svo keyrir hljómsveitin Bandmenn dansinn áfram inn í nóttina eins og henni einni er lagið.

Seld eru heil 12 mannaborð en einnig er hægt að komast á svokölluð safnborð ef um smærri hópa, pör eða einstaklinga er að ræða.

Salan hefur gengið vel enda er þessi hátíð ein allra stærsta fjáröflun Fjölnis sem einnig mun standa fyrir happdrættismiðasölu á þorrablótinu og er fjöldi glæsilegra vinninga í boði.

Grafaravogsbúar eru hvattir til að skella sér á blótið, skemmta sér konunglega og styrkja í leiðinni okkar frábæra íþróttafélag; Fjölni. - JGH

Egilshöllin heldur vel utan um blótið sem er með stærri skemmtunum hérlendis.

Þorrablót Grafarvogs - þar gleðin er við völd.

Hljóðneminn verður tilbúinn fyrir veislustjórana; Sölku Sól og Unnstein Manuel.

Múlakaffi sér um kræsingarnar; rúbgbrauð, síld, kjamma, hangikjöt, rófustöppu, síld og áfram mætti telja - og svo verður þarna „hefðbundinn veislumatur“ fyrir þá sem eru ekki klárir í þorrakræsingarnar.

Auðvitað eru allir í stuði - það segir sig sjálft.

Brekkusöngurinn hljómar betur eftir nokkur staup.

Íbúar í Gufunesi ósáttir við ummæli borgarstjóra í viðtalinu á Sýn - „komst upp með að gefa villandi upplýsingar“

Sun, 30 Nov 2025 13:01:43 GMT

Símon Þorkell Símonarson, íbúi í Jöfursbási 11, segir að hann og fjöldi íbúa í Gufunesi séu mjög ósáttir við ummæli borgarstjóra í viðtali á Sýn fyrr í vikunni um ferðir strætó í Gufunesið og hafi mátt skilja á Heiðu Björg Hilmisdóttur borgarstjóra að strætisvagnar gangi þrisvar á morgnanna í Gufunesið og þrisvar síðdegis. Sem og að það væri þægilegt fyrir íbúana að ná leið 6 úr Spöng rétt fyrir ofan byggðina en svo sé ekki. Þá finnst honum að borgarstjóri hafi gert lítið úr fyrstu kaupendum íbúða í Gufunesi með því viðhorfi að það væri eðlilegt að þeir hefðu fá bílastæði þar sem íbúðirnar hefðu verið svo ódýrar.

„Okkur finnst að borgarstjóri hafi komist upp með það í viðtalinu á Sýn að gera lítið úr umkvörtunum okkar vegna lélegra samgangna og gefa villandi upplýsingar. Málið er að það ganga engir strætisvagnar í Gufunesið; það er mergur málsins - og leið 6 úr Spönginni stoppar ekki hér fyrir ofan, eins og borgarstjóri hélt fram í viðtalinu,“ segir Símon.

ENGIR VAGNAR - ENNÞÁ PÖNTUNARÞJÓNUSTA LEIGUBÍLA

Hann bætir við: „Það er einfaldlega rangt að hér gangi strætisvagnar þrisvar á morgnana og þrisvar síðdegis. Hið rétta er að það koma leigubílar, skv. tímatöflu þrisvar á morgnanna og þrisvar síðdegis, og fara upp í Spöng. Þar á milli þarf að panta leigubíl með 30 mínútna fyrirvara upp í Spöng - og því miður koma þeir ekki alltaf á réttum tíma og þá missir fólk af vagninum í Spönginni. Það er sem sé ennþá pöntunarþjónusta leigubíla fyrir hverfið.

Varðandi morgnana þá komast að hámarki sex í stærstu leigubílana - og ef sjö manns bíða - þá þarf að skilja einn eftir. Og þar við situr. Það kemur enginn leigubíll strax í kjölfarið til að ná í þennan eina. Raunar koma hingað stundum fjögurra manna leigubílar á morgnanna. Annað - ef þú ætlar að tvinna saman hjólaferð og strætó þá segir það sig sjálft að þú ferð ekki með reiðhjól upp í leigubíl,“ segir Símon.

Litlu vagnarnir. „Hvers vegna í ósköpunum eru þessir litlu vagnar ekki látnir bæta smá spotta við sig frá Gufunesbænum og aka hingað í Gufunesið? Hér eru tvö strætisvagnaskilti - en engir vagnar. Annað eins aka þessir litlu vagnar hér um í Grafarvoginum á daginn, oft meira og minna tómir.“

LÍTIÐ MÁL FYRIR LITLU VAGNANA AÐ BÆTA VIÐ SIG SMÁ SPOTTA

Að sögn Símonar er krafa íbúa í Gufunesi einföld: „Við viljum að litlu strætisvagnarnir bæti aðeins við sig í akstri og leggi leið sína hingað, skv. áætlun í Gufunesið en gangi ekki bara upp að Gufunesbænum. Hvers vegna í ósköpunum eru þeir ekki látnir bæta þessum smá spotta við sig á Gufunesveginum og aka hingað í Gufunesið? Það eru hér tvö strætisvagnaskilti - en engir vagnar. Annað eins aka þessir litlu vagnar hér um í Grafarvoginum á daginn, oft meira og minna tómir.“

Þetta er eini göngustígurinn úr hverfinu í Gufunesi. Tröppurnar eru sárasjaldan saltaðar, að sögn Símonar.

STÓRHÆTTULEGAR TRÖPPUR - LÉLEGAR HÁLKUVARNIR

Þá segist Símon ósáttur við hve borgin sinni illa hálkuvörnum á þeim eina göngustíg sem liggi frá hverfinu - sem að hluta til er með fjölmörgum tröppum. „Okkur finnst sem þessi stígur mæti alltaf afgangi í snjóruðningi - og þá ferst það yfirleitt fyrir að salta tröppurnar hérna sem eru fyrir vikið stórhættulegar í hálku. Hér hafa orðið hálkuslys í tröppunum vegna þess að þeim er illa sinnt.“

Spilda ehf. (Baltasar Kormákur og fl.) er með 700 íbúðir við Jöfursbás 5 og 7 - en hluti þeirra er með bílastæði í bílakjöllurum undir húsunum.

MEÐ SPILDU EHF. BREYTTI BORGIN UM STEFNU HÉR VARÐANDI BÍLLAUSAN LÍFSSTÍL

Sem fyrr segir er Símon íbúi í Jöfursbási 11 - sem er þyrping fjölbýlishúsa sem fyrst var reist í Gufunesi. Það var Þorpið vistfélag sem fékk lóðina og var lögð á það áhersla að íbúðirnar yrðu ódýrar og um bíllausan lífsstíl yrði að ræða. Að minnsta kosti bíl-litlan lífsstíl því fyrstu drög gerðu ráð fyrir þrjátíu bílastæðum fyrir þessar 137 íbúðir og var þeim síðan fjölgað í sextíu.

Fyrstu íbúarnir fluttu inn árið 2021 en sama ár tók félagið Spilda ehf. ( Baltasar Kormákur og fl. ) fyrstu skóflustunguna, ásamt þáverandi borgarstjóra, Degi B. Eggertssyni, að lóðum undir nokkur fjölbýlishús með 700 íbúðum við Jöfursbás 5 og 7 en nokkur þeirra eru enn í byggingu. Hluti þessara íbúða er með bílastæði í bílakjallara - og þá eru einnig stæði fyrir utan blokkirnar. „Borgin breytti algjörlega um stefnu varðandi bíllausan lífsstíl hér á svæðinu þegar kom að Spildu ,“ segir Símon.

„FINNST BORGARSTJÓRI GERA LÍTIÐ ÚR OKKUR“

„Í fyrrnefndu viðtali á Sýn upplifðum við það þannig að borgarstjóri væri að gera lítið úr okkur sem fyrstu kaupendum íbúða hér á svæðinu þegar hún sagði að það væri eðlilegt að við hefðum fá bílastæði þar sem íbúðirnar okkar hefðu verið svo ódýrar. Annað hvort er borgin hér með bíllausan lífsstíl hjá öllum íbúum í Gufunesi en ekki bara hjá sumum. Hvernig getur það líka gengið upp að boða bíllausan lífsstíl í upphafi en hafa svo engar eðlilegar strætósamgöngur hingað? Við viljum sitja við sama borð og önnur hverfi.“

„ÞETTA LAGAST MEÐ BORGARLÍNUNNI. JÁ, JÁ.“

Að sögn Símonar voru þau rök færð fyrir því í upphafi að engir strætisvagnar kæmu í Gufunesið því svo fáir byggju þar. Síðastliðið vor hafi þau rök verið nefnd að leiðakerfið myndi lagast þegar borgarlínan kæmi. „Já, já, þetta lagast með borgarlínunni - hvort og hvenær svo sem hún kemur.“

Íbúar við Jöfursbás 11 hafa sömuleiðis haldið því fram að við kynningu á íbúðum þeirra hafi verið sagt að þeir þyrftu í sjálfu sér ekki að hafa áhyggjur af bílastæðum því fengju þeir sér bíl yrði nóg af bílastæðum annars staðar í götunni við Jöfursbása.

„Það hefur engan veginn gengið upp enda vantar tilfinnanlega bílastæði fyrir alla byggðina hérna - og okkur finnst mjög auðvelt að kippa því í lag og búa til ný stæði hérna. Nægt er rýmið hérna á borgarlandinu, að okkar mati.“

Gufunesbærinn. Núna sýnist aukinn áhugi hjá borgarfulltrúum minnihlutans að leggja göngustíg frá Gufunesi að Gufunesbænum og sömuleiðis tengja þann stíg við Hamrahverfið.

ÁHUGI Á GÖNGUSTÍG BEINT AÐ GUFUNESBÆNUM

Loks segir Símon að það vanti göngustíga beint úr Gufunesi í Gufunesbæinn og sömuleiðis vanti meiri tengingu við Hamrahverfið með göngustígum. „Ef við ætlum að ganga að Gufunesbænum þurfum við fyrst að ganga hér upp í Rimahverfið og koma niður hjá Gullnesti. Sumir hafa gengið eftir Gufunesveginum en það segir sig sjálft að það er stórhættulegt. Það er þörf á úrbótum og ég heyri það á nokkrum borgarfulltrúum minnihlutans í borginni að áhugi sé á að bæta úr og gera stíg héðan að Gufunesbænum.“

Hann segir að stóra málið núna sé hins vegar að bæta strætósamgöngur með því að láta strætisvagna ganga í Gufunes skv. áætlun – eins og í önnur hverfi – og fjölga bílastæðum því í Gufunesi búi margt ungt fólk með börn og vilji hafa þann kost að eiga bíl til að sinna erindum sínum.

GUFUNESIÐ ER EKKI BÍLLAUS LÍFSSTÍLL

„Gufunesið er ekki bíllaus lífsstíll þó lagt hafi verið upp með það í upphafi. Það hefur borgin sjálf staðfest með úthlutunum á lóðum fyrir um 700 íbúðir til Spildu - en hluti þeirra er með bílastæði í bílakjöllurum og svo eru einnig stæði fyrir utan húsin,“ segir Símon Þorkell Símonarson, að lokum. - JGH

Lagt ólöglega uppi á gangstétt í Gufunesi. Íbúarnir segja lögreglu og stöðumælaverði koma reglulega til að sekta bíleigendur fyrir að leggja uppi á gangstéttum. Eftir klukkan átta á kvöldin er nánast útilokað að fá stæði - líka á malarstæðinu sem er lengst til hægri á myndinni.

Símoni Þorkeli Símonarsyni og fleiri íbúum í Gufunesi finnst að borgarstjóri hafi komist upp með að gefa villandi upplýsingar um ferðir strætó í Gufunesið og gert lítið úr umkvörtunum íbúa. Engir vagnar komi í hverfið og ennþá sé pöntunarþjónusta leigubíla. Þá finnst honum að borgarstjóri hafi gert lítið úr þeim sem keyptu fyrstu íbúðirnar í Gufnesi með því að segja að eðlilega fylgdu fá bílastæði íbúðunum þar sem þær hefðu verið svo ódýrar.

Þétting byggðar. Hér er verið að troða niður nýju fjölbýlishúsi við Jöfursbás 9 með 27 íbúðum alveg ofan í Jöfursbás 11. Ekki hafði verið gert ráð fyrir þessu húsi í upphafi. Engin bílastæði fylgja þessum nýju íbúðum og því eykst bílastæðavandinn enn meira þegar íbúar hafa flutt þarna inn.

Um 900 íbúðir verða í Gufunesi þegar framkvæmdum lýkur. Hann er ekki bíllaus lífsstíllinn í Gufunesi - síður en svo. „Annað hvort er borgin hér með bíllausan lífsstíl hjá öllum íbúum í Gufunesi en ekki bara hjá sumum,“ segir Símon Þorkell.

Fjölbýlishús Spildu ehf. við Jöfursbás 7. Að þessu tugmilljarða verkefni Spildu ehf. í Gufunesi kemur meðal annars Baltasar Kormákur kvikmyndagerðarmaður.

Merki Strætó við Jöfursbás 11. Fallegur gulur vagn á skiltinu. Málið er hins vegar að það koma engir vagnar í hverfið heldur er ennþá pöntunarþjónusta leigubíla.

Í sumar auglýsti Strætó aukna þjónustu á leið 25 í Gufunesið. Hún fólst í því að frá og með 1. júlí yrði leiðin með 30 mínútna tíðni á virkum dögum í stað um 60-120 mínútna tíðni. Í praxís þýðir þetta að leigubíll kemur fyrstu þrjár ferðirnar á morgnanna skv. þessari tímatöflu og þrisvar síðdegis. Annars gildir það að hringja í Strætó með 30 mínútna fyrirvara og panta leigubíl - sem ekur þá viðkomandi upp í Spöng.

Rými fyrir bílastæði. Íbúar benda m.a. á þetta svæði við Jöfursbás 11 til að fjölga bílastæðum. Þess má svo geta að Sundabrautin verður lögð þarna rétt hjá verði af henni fremur en göngum.

Gufunesið. Fyrstu íbúðirnar voru auglýstar sem bíllaus lífsstíll en það breyttist fljótt þegar Spildu ehf. var úthlutaðar lóðir fyrir 700 íbúðir. Í þyrpingunni lengst til hægri á myndinni, Jöfursbási 11, sem Þorpið vistfélag byggði, eru 137 íbúðir og var upphaflega gert ráð fyrir 30 stæðum en þeim var svo fjölgað í 60. Þ.e. 0,44 stæði á íbúð.

„Stóra málið núna er að bæta strætósamgöngur með því að láta strætisvagna ganga í Gufunes skv. áætlun – og sitja við sama borð og önnur hverfi – og fjölga bílastæðum því hér býr ungt fólk með börn og vill hafa þann kost að eiga bíl til að sinna erindum sínum.“

Fyrsti sunnudagur í aðventu á morgun - mikið um að vera í Grafarvogskirkju á aðventunni

Sat, 29 Nov 2025 16:28:25 GMT

Fyrsti sunnudagur í aðventu er á morgun og á mörgum heimilum er hann haldinn hátíðlegur og víða hefð fyrir því að fjölskyldur komi saman til að hefja undirbúning jóla; svo sem að baka smákökur, skera laufabrauð, skreyta, setja upp jólakransinn og kveikja á fyrsta kertinu af fjórum í kransinum - nú eða hvað eina sem gert er á þessum degi til hátíðarbrigða.

Að sjálfsögðu verður mikið um að vera í Grafarvogskirkju á aðventunni og hægt að nálgast aðventudagskrána á heimasíðu kirkjunnar.

FYRSTI SUNNUDAGUR Í AÐVENTU Í GRAFARVOGSKIRKJU

Dagskráin á morgun í kirkjunni, fyrsta sunnudag í aðventu, hefst með guðsþjónustu í Grafarvogskirkju kl. 11:00 þar sem b örn úr Tónlistarskóla Grafarvogs koma fram. Sr. Arna Ýrr Sigurðardóttir sóknarprestur þjónar. Sunnudagaskóli er á sama tíma á neðri hæð kirkjunnar.

Selmessa verður í hinu fallega Kirkjuseli í Spöng kl. 13:00 þar sem sr. Aldís Rut Gísladóttir þjónar.

AÐVENTUHÁTÍÐIN VERÐUR KLUKKAN ÁTJÁN Á MORGUN

Loks verður glæsileg aðventuhátíð í Grafarvogskirkju kl. 18:00 á morgun þar sem allir k órar kirkjunnar syngja. Organistar eru Lára Bryndís Eggertsdóttir og Guðný Einarsdóttir . Sigmundur Ernir Rúnarsson alþingismaður flytur hugvekju. - JGH

Séra Arna Ýrr Sigurðardóttir, sóknarprestur í Grafarvogi. Það verður mikið um að vera í Grafarvogskirkju á morgun, fyrsta sunnudag í aðventu. Dagskráin hefst með guðþjónustu í kirkjunni kl. 11 þar sem sr. Arna Ýrr þjónar. Selmessa verður í Kirkjuselinu í Spöng kl. 13:00 þar sem sr. Aldís Rut Gísladóttir þjónar. Þá verður tilkomumikil aðventuhátíð kl. 18 í kirkjunni þar sem Sigmundur Ernir Rúnarsson þingmaður flytur hugvekju.

Sigmundur Ernir Rúnarsson alþingismaður flytur hugvekju á aðventuhátíðinni í Grafarvogskirkju sem hefst klukkan átján á morgun. Allir kórar kirkjunnar syngja.

Fyrsti sunnudagur í aðventu er víða nýttur til að tína til jólaskrautið og setja aðventuljósin út í glugga.

Kransinn á sínum stað á útidyrahurðinni.

Að venju er hún glæsileg aðventudagskráin til jóla í Grafarvogskirkju.

1. sd í aðventu- 30.nóv.

Guðsþjónusta í Grafarvogskirkju kl. 11:00. Börn úr Tónlistarskóla Grafarvogs koma fram.

Selmessa í Kirkjuselinu kl. 13:00
Aðventuhátíð kl. 18:00
Ræðumaður er Sigmundur Ernir Rúnarsson, alþingismaður.

Fimmtud. 4. des
Jólasálmar og Bjór
Ölhúsinu Grafarvogi kl. 17:00

2. sd í aðventu- 7.des
Guðsþjónusta í Grafarvogskirkju kl. 11:00.Börn úr Tónlistarskóla Grafarvogs koma fram.
Selmessa í Kirkjuselinu kl. 13:00

Þriðjudagur 9. des
Jólavinakvöld í Grafarvogskirkju kl. 19:00

Laugardagur 13. des
Jólatónleikar kl. 17:00
Kórar kirkjunnar koma fram

3. sd í aðventu- 14. des
Jólaball í Grafarvogskirkju kl. 11:00
Jólasveinar koma í heimsókn – dansað í kringum jólatréð
Selmessa í Kirkjuselinu kl. 13:00
Börn úr Tónlistarskóla Grafarvogs koma fram.

4. sd í aðventu- 21.des
Guðsþjónusta í Grafarvogskirkju kl. 11:00
Selmessa í Kirkjuselinu kl. 13:00 – Óskasálmar jólanna

Gaufað við framkvæmdir við Höfðabakkann - enn eru klukkuljós en ekki snjallljós

Thu, 27 Nov 2025 17:40:10 GMT

Það fer ekki fram hjá neinum íbúum í Grafarvogi hve mikill hægagangur er á framkvæmdunum við Höfðabakkann. Þegar við vorum þarna á ferð í dag voru þrír menn með meitla og hamra að vinna við verkið af hálfu fyrirtækisins Kröflu sem annast þessar framkvæmdir - sem hófust um mitt sumar.

Fram kemur á Borgarvefsjánni að verkfræðistofan VSÓ annist eftirlit með verkinu en hinir raunverulegu eftirlistaðilar eru auðvitað þúsundir íbúa í Grafarvogi sem aka þarna um daglega og eru langflestir á þeirri skoðun að gaufað sé við verkið - og hafi verið svo frá upphafi.

Verkið gengur út á að setja upp snjallljós við fimm gatnamót Höfðabakka en fréttir af verkinu hafa gengið að mestu út á að verið sé að þrengja að allri umferð með því að lengja og breikka umferðareyjar til að auka öryggi gangandi og hjólandi. Finnst mörgum sem það sé á kostnað öryggis þeirra sem fara um akandi, þ.e. að hættan á árekstrum og bílslysum aukist; svo ekki sé nú rætt um umferðaröngþveitið sem búið er að skapa við gatnamót Höfðabakka og Bæjarháls. Sem auðvitað nær ekki nokkurri átt.

Það er svo sem annað mál - eða önnur Ella, eins og sagt er - en hitt blasir við að hraði framkvæmda er hægur og að mati flestra Grafarvogsbúa er þetta ekkert annað en gauf. - JGH

Hér lokuðu starfsmenn hægri akreininni niður Höfðabakkann í dag þar sem verið var að vinna með slaghamri og meitli í kringum ein götuljósin. Sjálfsagt að huga að öryggi þeirra sem vinna við verkið - en einhvern veginn vinnst verkið mjög hægt.

Það blasir við öllum að verkið gengur hægt og nánast alls staðar virðist langt í land með að ganga frá.

Er boðlegt að vera svona lengi með verk sem er við eina helstu umferðargötu á höfuðborgarsvæðinu; Höfðabakkann?

Hér er ekki unnið dag og nótt við að klára áður en snjóþyngstu mánuðirnar ganga í garð.

Nýju, háu staurarnir eru fyrir snjallljósin. Ennþá er ekkert að gerast varðandi þau. Staurarnir fyrir klukkuljósin eru að vísu komnir upp úr jörðinni en þarna eru ennþá tímastillt klukkuljós og miðað við framkvæmdahraða virðist langt í land með að „ljósin tali saman“, þ.e. snjallljósin.

Gangstéttin meðfram Höfðabakkanum, gegnt veitingahúsinu Silla kokki. Hér er henni einfaldlega lokað fyrir gangandi með þvergirðingu. Eykur auðvitað hættuna á að fólk smokri sér framhjá með því að fara út á veginn.

Þarna má sjá tvo menn af þremur sem voru að vinna við frágang í kringum ljósin við gatnamót Dvergshöfða og Höfðabakka. Vel á minnst; ef þarna verða beygjuljós; hvers vegna er þá ekki beygjuinnskotið við umferðareyjuna lengt til muna svo þeir sem beygja þarna stöðvi ekki flæði umferðarinnar niður Höfðabakkann og í Grafarvoginn á meðan.

Þessir þrír unnu við verkið í dag þegar við áttum leið um til að kanna gang framkvæmdanna. Grafarvogsbúum finnst vanta að borgin bretti upp ermarnar og setji kraft í verkið - hvað þá þegar snjóþyngstu mánuðir vetrarins eru að renna upp. Byrjað var á þessum framkvæmdum um mitt sumar.

Viðgerð Veitna við Víkurveg - gatinu lokað í dag. Þetta hefur ekki tekið neinn smá tíma

Thu, 27 Nov 2025 15:12:31 GMT

Frétt okkar um daginn um ótrúlegan seinagang í viðgerð Veitna við Víkurveg hafði svo sannarlega áhrif. Veitur sendu fljótlega frá sér yfirlýsingu um að farið yrði í verkið.

Og viti menn; þegar við vorum þarna á ferð eftir hádegi í dag var búið að loka gatinu; steypa í það. Næsta skref er svo að moka yfir og fjarlægja steinsteyptar hindranir - sem náð hafa út í götu mánuðum saman - og hafa svo sannarlega sett svip sinn á gatnamót Víkurvegar og Vesturlandsvegar.

Það voru smiðir frá fyrirtækinu Langeldi sem sáu um að ganga frá gatinu fræga og steypa í það í dag. -JGH

Það var fyrirtækið Langeldur ehf. í Mosfellsbæ sem annaðist framkvæmdirnar fyrir Veitur og lokuðu gatinu í dag. Næsta skref verður að moka yfir og ganga almennilega frá þessu .

Loksins, loksins. Búið að loka þessu gati. Þessar framkvæmdir hafa ekki tekið neinn smá tíma.

Við Víkurveg og Vesturlandsveg. Þarna hafa verið steyptar hindranir vegna viðgerða svo vikum skiptir. Eftir frétt okkar um seinagang fóru Veitur af stað og steypt var í gatið í dag. Það verður svo gengið frá þessu á næstu dögum.

Ólga í Gufunesi. Íbúar segja lögreglu og stöðumælaverði fara reglulega í hverfið og sekta íbúa fyrir að leggja ólöglega

Sat, 22 Nov 2025 20:24:55 GMT

Það er óhætt að segja að pósturinn frá íbúa í Gufunesi sem settur var inn á FB-vefinn Íbúar í Grafarvogi hafi vakið athygli. Fyrirsögn hans var SKILABOÐ TIL REYKJAVÍKURBORGAR og er hann stílaður sérstaklega á borgarfulltrúana Dóru Björt Guðjónsdóttur og Heiðu Björg Hilmisdóttur borgarstjóra. Sá sem sendir póstinn nýtir sér nafnleysi.

Kvartað er yfir fáum bílastæðum og bent á að nægilegt rými sé til að bæta við stæðum og leysa vandann. Óvenjumargar færslur eru í athugasemdakerfinu við póstinn og tónninn í þeim á einn veg gagnvart meirihlutanum í borginni - og að Gufunesið sé dæmi um „ bíllausan lífsstíl “ sem gangi ekki upp.

„GETIÐ KOMIÐ OG NÆLT YKKUR Í FLJÓTAN 700.000 KALL“

Íbúar, sem Grafarvogur.net hefur rætt við, segja að lögregla og stöðumælaverðir fari reglulega í hverfið og sekti eigendur bíla sem sjái ekki annan kost en að leggja ólöglega uppi á gangstéttum - og sé stæðið ekki afmarkað sem bílastæði þá sé það skilgreint sem gangstétt og þar með kemur sekt fyrir að leggja þar.

Sektin við að leggja ólöglega er 10 þús. krónur og segir meðal annars í fyrrnefndum skilaboðum til þeirra Dóru og Heiðu: „ Síðast þegar ég taldi voru þetta um það bil 70 bílar sem voru lagðir ólöglega í Jöfursbás kl. 11 um kvöld þegar malarplanið við hliðinni á básunum var líka orðið troðfullt. Er planið að halda þessu óbreyttu þannig þið getið komið og nælt ykkur í fljótan 700.000 kall þegar ykkur hentar ?“

Fjölbýlishús Spildu (félags Baltasar Kormáks og fl.) eru með bílakjöllurum - og bílastæði fyrir hverja íbúð en Spilda er með 700 íbúðir á svæðinu. (Mynd tekin sl. sumar).

ÍBÚÐIR SPILDU EHF. (BALTASAR KORMÁKUR OG FL.) MEÐ BÍLAKJALLARA

Það vekur líka athygli að bílastæðakjallarar eru undir þeim fjölbýlishúsum sem félagið Spilda ehf. reisir - en Baltasar Kormákur kvikmyndagerðarmaður kemur m.a. að því verkefni. Um er að ræða 700 íbúðir á vegum Spildu ehf. og í lýsingum á verkinu segir að bílastæði fylgi hverri íbúð. Það var árið 2021 sem Baltasar, Dagur B. Eggertsson og fleiri tóku fyrstu skóflustunguna að íbúðum Spildu ehf.

Fyrir utan Jöfursbás 11. Bílum lagt þar ólöglega á gangstétt. (Mynd tekin sl. sumar).

ÞORPIÐ BYGGÐI 137 ÍBÚÐIR VIÐ JÖFURSBÁS 11 - 60 BÍLASTÆÐI

Bílastæðavandinn blasir einn verst við íbúum í fjölbýlishúsunum við Jöfusrbás 11 sem Þorpið vistfélag byggði en um er að ræða 137 íbúðir og hófust framkvæmdir árið 2020 og fluttu fyrstu íbúar inn árið 2021. Þessar íbúðir voru auglýstar sem „ bíllaus lífsstíll “ og í upphafi fylgdu aðeins 30 stæði þessum 137 íbúðum - eða 0,25 stæði á íbúð. Þeim var síðan fjölgað í 60 eftir beiðni íbúanna eða um 0,44 stæði á íbúð.

LÉLEGAR ALMENNINGSSAMGÖNGUR Í GUFUNES

Þessar íbúðir voru auglýstar á sínum tíma sem ódýrar íbúðir fyrir ungt fólk og að almenningssamgöngur yrðu góðar í Gufunesið. Íbúar telja að borgin hafi svikið þetta með góðar samgöngur - og raunar hefur mátt sjá í færslum á Íbúar í Grafarvogi að strætó gangi ekki að Jöfursbási 11 og að íbúar getið farið í leigubíl á vegum strætó á ákveðnum tímum dags upp að Spöng.

Svo virðist sem langflestir íbúa í hinum 137 íbúðum við Jöfursbás 11 séu komnir á eigin bíla þar sem þeir hafa gefist upp á samgönguleysinu. Það má líka spyrja sig að því hvort ungt fólk með börn þurfi ekki frekar tvo bíla en einn til að mæta hefðbundnum snúningum barnafólks. Í það minnsta rogast enginn með vörur úr Spönginni niður í Gufunes; um 20 mínútna gang, með börn með sér í hvernig veðri sem er.

Vissulega er sú spurning réttmæt hvort íbúar við Jöfursbás 11 - sem Þorpið vistfélag byggði og voru fyrstu íbúðirnar á svæðinu - hafi ekki vitað að hverju þeir gengju þegar þeir keyptu íbúðir auglýstar og tengdar við „ bíllausan lífsstíl “. Á móti kemur að íbúarnir voru í góðri trú um góðar samgöngur borgarinnar í Gufunesið sem þeir segja að hafi brugðist.

GESTIR Í GUFUNESI SITJA LÍKA Í SÚPUNNI

Varðandi ferðir lögreglu seint á kvöldin í Gufunesið þá eru það ekki aðeins íbúarnir sem sitja í súpunni finni þeir sér stæði uppi á gangstétt heldur líka gestir sem heimsækja íbúana á svæðinu - og þá ekki bara við Jöfursbás 11 heldur líka Jöfursbás 5 og 7 sem Spilda ehf . (Baltasar og fl.) er með - þ.e. þær 700 íbúðir.

Alls verða í kringum 900 íbúðir í Gufunesi þegar framkvæmdum við þær síðustu verða kláraðar - og eru þá íbúðir við Jöfursbás 9 taldar með. -JGH

Við Jöfursbás 11. Íbúarnir segja að nægilegt rými sé fyrir fleiri bílastæði. Sjá má gangstéttina (tröppurnar) sem þeir íbúar, sem fara leiðir sínar fótgangandi, nota - en þeir eru víst ekki margir. Kvartað hefur verið yfir því að borgin moki ekki tröppurnar þegar snjóar.

Mynd tekin fyrir utan Jöfursbás 7 og horft inn götuna. Algeng sjón. Lagt upp á gangstétt. Sjá má smáhýsin sem borgin kom fyrir við enda götunnar. Og til hægri við þau er malarstæði sem fyllist yfirleitt á nokkrum mínútum í lok vinnudags þegar íbúar koma heim.

Jöfursbás 11 er lengst til hægri á myndinni og Þorpið byggði. Alls 137 íbúðir. Í upphafi var gert ráð fyrir 30 bílastæðum en þeim var svo fjölgað í 60. Eða 0,44 stæði á íbúð. Borgaryfirvöld töluðu um bíllausan lífsstíl og að almenningssamgöngur yrðu góðar. Íbúar telja að borgin hafi svikið það loforð illilega.

Úr frétt RÚV þegar Dagur B. Eggertsson, Baltasar Kormákur og fl. tóku fyrstu skóflustunguna að 700 íbúðum Spildu. Bílastæði í bílakjöllurum fylgir þeim íbúðum og því ekki gert ráð fyrir bíllausum líffstíl þar á bæ.

Fyrir utan Jöfursbás 11. Þetta eru ekki afmörkuð bílastæði og því er verið að leggja ólöglega upp á gangstétt.

Jöfursbás 11 til vinstri sem Þorpið byggði og voru fyrstu íbúðirnar sem voru reistar í Gufunesi. Byrjað á þeim árið 2020 og fyrstu íbúarnir fluttu inn 2021. Þeir fengu svo þessa byggingu til hægri upp að sér í sumar. Komst raunar í fréttirnar um að þétt væri byggt og stutt væri á milli íbúða.

Þessar íbúðir eru á vegum Spildu ehf. (Félags Baltasar og fl.)

Íbúðabyggðin í Gufunesi. Spilda er með fjölbýlishúsin Jöfursbás 5 og 7. Þorpið byggði fjölbýlishúsin við Jöfursbás 11.

Færslan sem íbúi í Gufunesi setti inn á FB-síðuna Íbúar í Grafarvogi og hefur vakið mikla athygli. Fjölmargar fróðlegar athugasemdir fylgdu í kjölfarið. Það er mikið bílastæðavandamál í Gufunesi og að sögn íbúa hefur bæði lögregla og stöðumælaverðir lagt leið sína í Gufunesið og sektað íbúa sem leggja uppi á gangstétt. Sektin er 10 þús. kr.

Mörgum finnst léleg nýting á strætó og að oftar en ekki megi sjá þá tóma. Væri ekki ráð að þeir færu reglulega niður í Jöfursbása í Gufunesi. Þessir eru litlir og hentugir og færu létt með Jöfursbásana.

Slökkvistöðin í Gufunesi- sem er ekki slökkvistöð - býður öllum í kaffi á morgun

Fri, 21 Nov 2025 16:02:53 GMT

Það verður nú svolítið forvitnilegt að fara í Gufunesið á morgun og fá sér kaffisopa. Slökkvistöðin, sem nóta bene er ekki einhver slökkvistöð á vegum Slökkviliðs höfuðborgarsvæðisins, býður í opið hús á morgun, laugardaginn 22. nóvember, frá kl. 12–16.

En hvað er þá Slökkvistöðin? Jú, hún er sjálfstætt sýningar- og viðburðarými fyrir arkitekta og áhugafólk um arkitektúr og rýmislist, til húsa í slökkvistöð fyrrum Áburðarverksmiðju ríkisins í Gufunesi.

„Við verðum í vinnustofunni í Gufnesi, í gömlu Áburðarverksmiðjunni, að vinna og dytta að, en viljum gjarnan að fólk komi, þiggi kaffi eða te, ræði við okkur um starfsemina og láti sér líða vel,“ segir Óskar Örn Arnórsson arkitekt.

„Sérstaklega erum við spennt að fá fólk úr Gufunesi og Grafarvogi — okkur langar að kynna nágrönnum okkar starfsemina. Og auðvitað eru allir velkomnir.“

Óskar Örn segir ennfremur að það verði opið hús í öðrum rýmum hússins og hægt að ganga um og kynna sér starfsemi listhússins að Gufunesvegi 40. - JGH

Slökkvistöðin er sjálfstætt sýningar- og viðburðarými fyrir arkitekta og áhugafólk um arkitektúr og rýmislist, til húsa í slökkvistöð fyrrum Áburðarverksmiðju ríkisins.

Slökkvistöðin er ekki hefðbundin slökkvistöð á vegum Slökkviliðsins, heldur listhús arkitekta, og býður upp á kaffisopa á morgun, laugardag. Það verður heitt á könnunni, tíu dropar en engin buna, eins og einhverjir kynnu að halda miðað við nafnið á sýningarsalnum.

Hluthafaspjall ritstjóranna - Þórður Pálsson í heimsókn: Vaxandi líkur á harðri lendingu

Fri, 21 Nov 2025 13:50:55 GMT

Þórður Pálsson , fjárfestingastjóri Sjóvár, mætti að þessu sinni í Hlutahafaspjall ritstjóranna , hlaðvarp okkar Sigurðar Más Jónssonar á efnisveitunni Brotkast.is Hér má sjá viðtalið.

Sigurður Már ræddi við hann og fóru þeir m.a. yfir ástand og horfur í íslenska hagkerfinu en Þórður telur vaxandi líkur á harðri lendingu í hagkerfinu. Það fari þó eftir því hvernig hlutirnir eru skilgreindir.

Um leið er ástæða til þess að hafa áhyggjur af þróun á vinnumarkaði og hvort að kjarasamningar verði raunsæir í ljósi stöðunnar.

Þórður vann um árabil í Danmörku og þekkir danska vinnumarkaðinn vel og segir að Íslendingar ættu að horfa til Danmerkur þegar kemur að vinnumarkaðsmódelum. - JGH

Sagan af litla útibúinu. Hvað varð um húsið? Sómir sér núna vel sem heimili í Árborg

Fri, 21 Nov 2025 10:40:11 GMT

Við höldum áfram með söguna okkar af litla Landsbankaútibúinu sem stóð eitt sinn á Olís-lóðinni við Gullinbrú þar sem hin glæsilega Glans-stöð stendur núna.

Margir hafa spurt sig að því hvað hafi orðið um húsið. Núverandi eigandi hússins hafði samband við Grafarvog.net eftir að hafa lesið fréttir um það hjá okkur líkt og fjöldinn allur sem fór inn á þessa frétt okkar á vefnum.

Svona hljóðaði pósturinn:

„Góðan dag.

Sé að þú ert að skrifa um gamla Landsbankaútibúið sem stóð við Olís við Gullinbrú. Ég bý semsagt í þessu húsi núna með syni mínum. Keypti það af smið í Hveragerði og flutti á lóð í Tjarnabyggð í Árborg.

Þetta er ágætasta hús, opið og bjart miðað við stærð. Ef þig langar að loka sögunni er það í lagi mín vegna. Þarf samt ekkert að vera nafngreind.

Læt fylgja með mynd af húsinu. Það stendur á tæplega hektara lóð, ég er búin að gróðursetja mörghundruð tré og aðrar plöntur, þar á meðal afklippur af ösp sem komu úr garði sem liggur að bílastæðinu við planið sem húsið stóð áður á í Grafarvoginum. Það var dálítið skemmtileg tilviljun. Bestu kveðjur.“

-----

AFSKURÐUR AF ÖSPUM ÚR GRAFARVOGI SEM FÓRU Í ÁRBORG

Þá má geta þess að Rakel Rós Ólafsdóttir, íbúi í Grafarvogi , setti inn skemmtilegan texta í athugasemdakerfi FB við frétt okkar um Glans-stöðina:

„Ég bý í húsinu næst þvottastöðinni (og mér til mikillar ánægju og léttis truflar hún ekkert, hvorki skyggir á útsýni né mengun af nokkru tagi (hvorki hljóð, lykt né sjónmengun).

En talandi um litla Landsbankahúsið sem var þarna (þá líka næst mínu húsi) þá langar mig að deila stuttri sögu: Það eru 60 aspir í garðinum, við lóðamörk, þær voru mjög háar þegar við fluttum inn, við söguðum þær niður í ákveðna hæð og bjuggum til grindverk (tilraun sem heppnaðist mjög vel að okkar mati).

NÚ DAFNA ASPIRNAR OG HÚSIÐ AFTUR „SAMAN“

Að sjálfsögðu féllu til margar stórar nýtilegar greinar til að planta aftur annarsstaðar á hentugri stað, við auglýstum í gefins hóp og komu þónokkrir og tóku greinar, þ.á.m. kona sem kom og fyllti kerru til að planta í stórt land þar sem hún bjó, þangað hafði hún flutt hús til að búa í, tilbúið hús sem hún hafði keypt.

Kemur í ljós að þetta hús er Landsbankahúsið, og nú dafna aspirnar og húsið aftur „saman“ bara á allt öðrum stað. Ég hef farið í bíltúr að skoða þetta og fannst gaman að sjá.

Mér fannst þetta skemmtileg tilviljun og skemmtileg lítil saga til að deila úr hversdagsleikanum.“ - JGH

Bankinn orðinn að heimili í Árborg. Litla Landsbankaútibúið sem eitt sinn stóð á Olis-planinu við Gullinbrú í kvöldsólinni í Árborg þar sem það er orðið að heimili í Tjarnarbyggð. Skemmtileg saga. (Mynd send af núverandi eiganda sem keypti húsið og flutti það í Tjarnarbyggðina).

Ótrúlegur seinagangur í viðgerð Veitna við Víkurveg. Hvað á þetta eiginlega að standa lengi yfir?

Fri, 21 Nov 2025 09:36:26 GMT

Það hefur ekki farið fram hjá Grafarvogsbúum hvað það hefur tekið Orkuveituna (Veitur) langan tíma að gera við heitavatnslögnina við Víkurveg. Þar eru enn stöplar og girðingar til varnar svæðinu - eðlilega - en hins vegar virðist engin vinna vera á svæðinu. Er ekki hægt að hespa svona framkvæmdum af þegar byrjað er á þeim?

Magnús Ásgeirsson Grafarvogsbúi skaust á svæðið fyrir Grafarvog.net og tók myndir á vettvangi í vikunni en þónokkrir hafa sent vefnum fyrirspurn vegna þessara framkvæmda og hvenær þeim ljúki eiginlega. Það væri nú ekki úr vegi að Orkuveitan svaraði þeirri spurningu.

Svona lítur þetta út viku eftir viku - og ekkert að gerast. Það sjást ekki menn á staðanum. Gertur Orkuveitan ekki hespað svona framkvæmdum af? (Mynd Magnús Ásgeirsson).

Grafarvogsbúum er það enn í fersku minni þegar þessi heitavatnslögn bilaði í endaðan ágúst og skrúfað var fyrir allt heitt vatn inn í hverfið - það sagði sig sjálft. Allir sýndu því skilning og Grafarvogur.net sýndi myndir af dugnaðarforkum að gera við langt fram eftir kvöldi. Í haust þurfti svo aftur að skrúfa fyrir nokkur hverfi í Grafarvogi vegna viðgerða..

Eftir stendur spurningin hjá mörgum - og ekki aðeins Grafarvogsbúum - hvort Orkuveitan hafi sýnt sinnuleysi í viðhaldi á lögnum og hvort himinháar, árlegar arðgreiðslur fyrirtækisins til Reykjavíkurborgar, bitni á fjárfestingum í viðhaldi. Er hin óbeina skattheimta farin að bitna á eðlilegu viðhaldi á lögnum? - JGH

Skiltið sýnir mann að gera við. Gott og vel. En þarna hafa ekki sést menn að vinnu í óratíma og íbúar spyrja sig hvort þetta séu eðlileg vinnubrögð hjá Orkuveitunni. (Mynd Magnús Ásgeirsson).

Það þurfti snör handtök þegar heitavatnslaust varð í Grafarvogi föstudaginn 29. ágúst sl. og vatn komst aftur á um nóttina.

Bilunin var alvarleg og það þurfti nýjar lagnir. Grenjandi rigning þennan dag í borginni og unnið að viðgerð við frekar erfiðar aðstæður.

Myndband á vettvangi föstudagskvöldið 20. ágúst. Viðgerð vegna alvarlegrar bilunar.

Stóra ljósaperumálið við Gullinbrú - málinu frestað í umhverfisráði borgarinnar

Thu, 20 Nov 2025 14:47:01 GMT

Kjartan Magússon, borgarfulltrúi Sjálfstæðisflokksins, setur inn athyglisverða frétt inn á Facebook um stóra ljósaperumálið við Gullinbrú og tillögu sjálfstæðismanna um viðgerð og peruskipti á fimm ljósastaurum.

Vissulega er ákveðin kerskni og kaldhæðni í því hjá fulltrúum Sjálfstæðisflokksins að flytja þessa tillögu um það á fundi umhverfis- og skipulagsráðs Reykjavíkur í gær, 19. nóvember, um að ráðist verði í viðgerð/peruskipti á fimm ljósastaurum við sunnanverða Gullinbrú.

Það var gott að nota þennan vettvang til að vekja athygli á sinnuleysinu.

En viti menn; djókið í þessu er nú samt að afgreiðslu tillögunnar var frestað til næsta fundar ráðsins.

Ekki er öll vitleysan eins.

Óborganlegt. - JGH

Svo sem kaldhæðni. En ekki er öll vitleysan samt eins. Afgreiðslu tillögu um viðgerð - og að skipta út fimm ónýtum perum í ljósastaurum við Gullinbrú var frestað í umhverfis- og skipulagsráði Reykjavíkurborgar.

Litla bankaútibúið við Gullinbrú - bæði bankarán og eldur í gámi við bygginguna

Thu, 20 Nov 2025 14:01:57 GMT

Frétt okkar í gær um að eitt sinn hefði verið lítið útibú Landsbankans á þeim stað á Olís-lóðinni þar sem nýja Glans-þvottastöð Olís er núna, fékk mikla athygli og þónokkir reyndust mjög forvitnir um þessa byggingu. Og þarna var ekki bara banki heldur mun lögreglan hafa haft aðstöðu þarna um tíma.

Ekki hefur okkur tekist að fá góða mynd af útibúinu en þegar leitað er í fréttasafni blaðanna um þetta litla útibú má sjá að þar var framið bankarán í maí árið 2004 - eða fyrir tuttugu og einu ári. Sá sem framdi glæpinn kom inn í bankann vopnaður öxi snemma morguns og hótaði starfsfólkinu. Hann var handtekinn síðar um daginn.

Þá finnst frétt um það frá árinu 2013 að kveikt hafi verið í ruslagámi sem var upp við bygginguna og læstist eldurinn í hlið hússins og olli nokkrum skemmdum. Landsbankinn var þá horfinn með starfsemi sína þarna - en hann sameinaði útibúin á Höfðabakka og Grafarvogi í eitt, stórt og glæsilegt í Grafarholti árið 2009.

Þetta var þá - veröld sem var. Litla bankaútibúið á Olís-lóðinni átti sér sína sögu - eins og kannski öll bankaútibú. -JGH

Þessi mynd fylgdi frétt Vísis um íkveikjuna í ruslagámi við bygginguna árið 2013 en Landsbankinn hafði flutt starfsemina í Grafarholtið nokkrum árum áður - eða árið 2009 - þegar útibúin við Höfðabakka og Grafarvog voru sameinuð. (Mynd Vísis/ Daníel).

Glans hjá Olís fær góðar viðtökur. Þarna var eitt sinn banki með bílalúgu

Wed, 19 Nov 2025 14:53:20 GMT

Ef það er einhver bygging sem Grafarvogsbúar fylgdust með að reist væri frá grunni á þessu ári var það þvottastöðin Glans hjá Olís við Gullinbrú. Enda stöðin svo sannarlega í „alfaraleið“ Grafarvogsbúa. Stöðin var opnuð seinni partinn í september og hefur fengið góðar viðtökur. Um miðjan mars spurðu flestir sig hvað væri eiginlega um að vera þarna. Á daginn kom að verið var að reisa nýja þvottastöð Olís, eina af þremur sem þá var í byggingu. Tvær munu bætast við á næstunni.

Glans er skemmtilegt nafn - það vilja allir glansa og aka um á glansandi bílum. Vetrarmánuðir eru yfirleitt annasamir á bílaþvottastöðvum.

Áskriftarleiðin kostar 6.490 kr. á mánuði og felst í því ótakmarkaður þvottur á bílnum - tengt viðkomandi bílnúmeri. Býsna hagstætt tilboð en Glans-þvottur einn og sér kostar 3.490 kr. Þetta verð er vel samkeppnisfært við nærliggjandi þvottastöðvar.

Fram kemur á heimasíðu Olís að Glans-stöðvarnar afkasti 18 bílum á klukkustund sem geri biðina styttri en hjá sambærilegum stöðvum. Þá segir að stöðvarnar noti upphitað vatn sem stytti þvottatímann, minnki þörf fyrir þvottaefni og nái betur til svæða sem annars séu erfið í þvotti.

Stöðin afkastar 18 bílum á klukkustund og notað er upphitað vatn við þvottinn. Áskriftarleiðin kostar 6.490 kr. á mánuði og felst í því ótakmarkaður þvottur á bílnum - tengt viðkomandi bílnúmeri. Býsna hagstætt tilboð því vetrarmánuðir með sínu slabbi og salti kalla oft á tíðari þvott á bílum.

Margir Grafarvogsbúar minnast þess að eitt sinn var lítill banki á lóðinni þar sem Glans er núna. Þetta var útibú Landsbankans og líklega minnsta útibú landsins - með um fjóra starfsmenn. Um mánaðamót voru langar biðraðir út á Olís-planið og allir með stóran bunka af reikningum undir hendinni.

Í þessum banka var boðið upp á bílalúgu og var hægt að afhenda bunkann til gjaldkerans og bíða á meðan hann rúllaði reikningunum í gegn. Þetta var veröld sem var. Tæknin hefur leyst bunkana og biðraðirnar af hólmi.

En hvað um það - bílar glansa við Gullinbrú og stöðin afkastar 18 bílum á klukkustund sem gerir um þrjár mínútur á bíl. Það er snaggaralegt. - JGH

Grafarvogur.net birti þessa mynd 20. mars sl. með frétt af byggingarframkvæmdum stöðvarinnar. Þetta voru nánast framkvæmdir í beinni útsendingu því stöðin er svo sannarlega í „alfaraleið“ okkar Grafarvogsbúa.

Verið að slá upp grunninum. Á þessum stað var eitt sinn lítil banki, eitt minnsta útibú Landsbankans. Um mánaðamót voru yfirleitt langar raðir þar sem Grafaravogsbúar biðu með reikningabunkann. Þetta var þá - veröld sem var.

Aðalsteinn með skemmtilegar skopmyndir. „Nýjustu fréttir af „Stjórnarheimilinu““

Wed, 19 Nov 2025 12:42:18 GMT

Aðalsteinn Jörgensen, bridgespilari með meiru, hefur vakið athygli fyrir bráðskemmtilegar skopmyndir sem hann birtir jafnan á FB-síðu sinni. Fyrr í dag birti hann meðfylgjandi mynd með textanum „Nýjust fréttir af „Stjórnarheimilinu““.

Við látum hér tvær aðrar góðar fylgja með. - JGH

Aðalsteinn: Getur það verið að Þórður Snær sé að þagga niður umræðu?“

Aðalsteinn: „Planið er að virka...“ segir Þórður Snær Júlíusson í málgagni sínu „Kjarnyrt“. Kannski smá „orðasalat“ hjá honum!

Ókeypis blóðsykurmælingar Lions - til að kanna hvort fólk sé með sykursýki 2

Tue, 18 Nov 2025 15:26:19 GMT

Það er fyllsta ástæað til að vekja athygli á ókeypis blóðsykurmælingum Lions-klúbbanna tveggja í Grafarvogi í anddyri Húsgagnahallarinnar að Bíldshöfða 20 nk.laugardag frá frá klukkan 11 til 16.

Þetta verkefni er árlegt en það var Lionsklúbburinn Fjörgyn sem byrjaði á því árið 2012 en árið 2017 varð þetta samstarfsverkefni klúbbanna tveggja í Grafarvogi, Fjörgynjar og Foldar . Mælingarnar lágu niðri á covid-árunum.

Að sögn Guðmundar Helga Gunnarssonar hjá Lions-klúbbnum Fjörgyn þá hefur fjöldi fólks nýtt sér þessar ókeypis blóðsykurmælingar hjá klúbbunum og hvetur hann alla til að mæta og láta mæla blóðsykurinn - en gildi hans gefur til kynna hvort viðkomandi leynist með sykursýki 2.

„Á þessum árum hafa klúbbfélagar mælt blóðsykur í 5.455 einstaklingum sem skiptist þannig að 3.198 konur hafa fengið mælingu og 2.257 karlar. Þetta verkefni er mjög góð og öflug kynning fyrir Lions-hreyfinguna og veitir það okkur mikla ánægju að fá að taka þátt í þessu verkefni,“ segir Guðmundur.

Félagar í Lions-klúbbunum tveimur í Grafarvogi hafa mælt blóðsykur hjá 5.455 einstaklingum og bjóða þetta árið upp á ókeypis mælingar í Húsgagnahöllinni á Bíldshöfða nk. laugardag á milli kl. 11 og 16.

Guðmundur bætir því við að nóvembermánuður sé tengdur vitund um sykursýki og varna gegn þeim sjúkdómi.

„Sykursýkisvarnir eru eitt af höfuðverkefnum Lions um allan heim en alþjóðlegi sykursýkisdagurinn er 14. nóvember ár hvert. Hér á landi munu Lionsklúbbar um allt land bjóða upp á blóðsykurmælingar í nóvember á sínum heimasvæðum,“ segir Guðmundur. - JGH

Öflugar Foldakonur við blóðsykurmælingar í anddyri Húsgagnahallarinnar en Lionsklúbburinn Fjörgyn (Karlaklúbburinn) hóf þetta verkefni árið 2012 og frá árinu 2017 hefur þetta verið samstarfsverkefni beggja Lionsklúbbanna í Grafarvogi.

Fjölnismenn í harðri baráttu við KR-inga í skákinni

Tue, 18 Nov 2025 12:10:30 GMT

Fjölnismenn eiga í harðri baráttu við KR-inga í Úrvalsdeildinni á Íslandsmóti skákfélaga eftir fyrri umferð mótsins sem fram fór í Rimaskóla um síðustu helgi, dagana 13. til 16. nóvember. A-sveit Fjölnis er í öðru sæti og tveimur vinningum á eftir KR og því ljóst að úrslitin munu ekki ráðast fyrr en í blálokin en seinni umferðin fer fram dagana 5. til 8 mars á næsta ári. Fjölnir hefur unnið þetta mót undanfarin tvö ár; 2024 og 2025.

Á bilinu 300 - 400 skákmenn og skákkonur kepptu fyrir taflfélögin sín í 5 deildum. Skákdeild Fjölnis hefur hýst mótið af miklum metnaði undantekningalítið frá árinu 2007 í Rimaskóla eða Egilshöll.

Skákdeild Fjölnis átti 4 skáksveitir af þeim 54 sem skráðar voru til leiks og 38 Fjölnismenn tefldu 1 - 5 skákir fyrir félagið.

Ofursterk A-sveit Fjölnis skipuð frískum íslenskum og erlendum skákmönnum.

Í 1. deild teflir B-sveit Fjölnis og er sveitin nýliði þar. B-sveitin mun berjast fyrir því að halda sæti sínu í deildinni.

C og D-sveitir Fjölnis tefla í 4. deild. Þær eru skipaðar okkar ungu og efnilegu skákkrökkum, drengir í annarri sveitinni og stúlkur í hinni. Þessar skáksveitir eru báðar nokkuð óvænt í efri hluta 4. deildar. Alls tefla 24 skáksveitir í 4. deild.

Hin rómaða veitingasala í Rimaskóla er til fjáröflunar fyrir efnilega skákkrakka Fjölnis. Þar er safnað fyrir utanlandsferð og þátttöku í áhugaverðu skákmóti erlendis.

Skákdeild Fjölnis hefur unnið Íslandsmeistaratitilinn sl. tvö ár og gefur lítið eftir í vetur. Áfram Fjölnir. -JGH

Fjölnisstelpur á fljúgandi siglingu í 4. deild.

Uppaldir Fjölnis-skákmenn og allir innan við tvítugt.

B-sveitin er að tefla í 1. deild í fyrsta sinn. Stefnan er á að halda sér í deildinni.

Fjöldi Grafarvogsbúa fagnaði 25 ára vígsluafmæli Grafarvogskirkju í hátíðarguðsþjónustunni í gær

Mon, 17 Nov 2025 11:57:06 GMT

Skemmtileg mynd frá hátíðarguðsþjónustinni í gær þegar fjöldi Grafarvogsbúa fagnaði 25 ára vígsluafmæli kirkjunnar. Litla hnátan á myndinni vildi geta séð almennilega á altarið og hvað þar færi fram. Ungur nemur gamall temur.

Forsetahjónin, frú Halla Tómasdóttir og Björn Skúlason, voru heiðursgestir í guðsþjónustunni.

Kirkjan skartaði sínu fegursta á þessum hátíðardegi í sögu Grafarvogssóknar. Messan var tekin upp af RÚV og verður flutt í útvarpinu 14. des. nk.

Á eftir voru veitingar; einstakt kirkjukaffi að hætti Grafarvogskirkju.

Við látum hér nokkrar myndir sem birtar eru á heimasíðu Grafarvogskirkju fylgja með.

Hátíðleg stund og kórarnir stóðu sannarlega fyrir sínu; kór Grafarvogskirkju og Vox Populi. Organistar voru Lára Bryndís Eggertsdóttir og Guðný Einarsdóttir.

Fjöldi Grafarvogsbúa sótti hátíðarguðsþjónustuna og þáði veitingar eftir messuna. Veitingar að hætti Grafarvogskirkju.

Forsetahjónin voru heiðursgestir í hátíðarguðsþjónustuinni þar sem vígðir þjónar kirkjunnar þjónuðu fyrir altari en prédikunina flutti séra Arna Ýrr Sigurðardóttir sóknarprestur. Frá vinstri séra Aldís Rut Gíslasdóttir, Anna Guðrún Sigurvinsdóttir, formaður sóknarnefndar, Ólafur Sverrisson, ritari sóknarnefndar, forsetahjónin Björn Skúlason og frú Halla Tómasdóttir, séra Sigurður Grétar Helgason, Kristín Kristjánsdóttir djákni og séra Arna Ýrr Sigurðardóttir sóknarprestur.

Magnús Ásgeirsson var formaður á aðal byggingartíma kirkjunnar - þetta var alveg svakaleg vinna

Tue, 11 Nov 2025 23:11:02 GMT

Magnús Ásgeirsson viðskiptafræðingur var formaður sóknarnefndar Grafarvogssóknar á aðalbyggingartíma kirkjunnar - eða á árunum 1991 til 1995. Sóknin fékk lóð fyrir kirkjuna við götuna Fjörgyn og árið 1991 hófust framkvæmdir og kirkjan varð fokheld árið 1995. Þetta var ung sókn og margir sem lögðu hönd á plóginn við bygginguna í sjálfboðaliðsstarfi á þessum árum. „Þetta var svakaleg vinna, en þetta tókst,“ segir Magnús. Það var svo Bjarni Grímsson sem tók við af honum sem formaður árið 1995 og undir hans stjórn var kirkjan kláruð og vígð 18. júní 2000.

Við báðum Magnús að skrifa stuttan texta og rifja upp gamla tíma við byggingu kirkjunnar í tilefni af 25 ára vígsluafmælinu í hátíðarguðsþjónustunni nk. sunnudag um leið og við birtum einstakar myndir úr safni hans frá byggingartímanum. Hér kemur texti Magnúsar:

LEIFTRANDI FORYSTA SÉRA VIGFÚSAR OG ELÍNAR

„ Vígsludagurinn árið 2000 er sterkur í minningunni. Leiftrandi forysta sóknarprestsins séra Vigfúsar Þórs Árnasonar og eiginkonu hans, Elínar Pálsdóttur, frá fyrsta degi endurspeglaði öflugt safnaðarstarf lærðra sem leikra. Enda komu til starfa með honum prestar þar sem krafturinn, gleðin og næmni fyrir trúnni, kærleik og umhyggju fyrir starfinu kom skýrt fram. Við starfi sóknarprestsins þegar hann lét af störfum, tók svo Guðrún Karls Helgudóttir, biskup Íslands og nú er séra Arna Ýrr Sigurðardóttir sóknarprestur.

Vorið 1992 þar sem pylsur voru grillaðar í lok barnastarfsins þá önnina. Ingjaldur Eiðsson, einn af máttarstólpunum í sókninni á byggingartímanum, stóð sína plikt við grillið. Með honum eru hjónin séra Vigfús Þór Árnason og Elín Pálsdóttir.

KROSSINN Á LÓÐINNI - AFLAGÐUR RAFMAGNSSTAUR

„Vigfús Þór sagði oft að starfið væri eitt og húsið annað, en öflugt kirkju- og safnaðarstarf þarf aðstöðu. Fyrst var starfið í Félagsmiðstöðinni Fjörgyn í Foldaskóla. Fljótlega fékk söfnuðurinn lóð við götuna Fjörgyn og eitt af fyrstu verkum Vigfúsar Þórs var að fá aflagðan rafmagnsstaur, sem var fyrir botni Grafarvogs.

Ingjaldur Eiðsson sóknarnefndarmaður tók að sér að laga rafmagnsstaurinn til og koma honum fyrir á kirkjulóðinni þar sem hann stendur enn. Hlutföllin í rafmagnsstaurnum þegar búið var að saga hann til voru eins og í krossi.

Við krossinn voru helgistundir og guðsþjónustur. Frábær hugmynd, en rafmagnsstaurinn hafði áður það verkefni að flytja birtu í lífið, einmitt eins og kristin trú snýst um.“

Ingjaldur Eiðsson sóknarnefndarmaður sagaði hinn aflagða rafmagnsstaur og kom honum fyrir á kirkjulóðinni þar sem hann stendur enn. Hlutföllin í rafmagnsstaurnum, þegar búið var að saga hann til, voru eins og í krossi. Frábær hugmynd.

FRAMKVÆMDIR HÓFUST ÁRIÐ 1991

„Vinna við byggingu kirkjunnar hófst 1991 og á tveimur árum tókst að steypa hana upp og gera fokhelda. Byggingartíminn var skammur og oft á brattann að sækja í verkefninu, en með öflugri forystu tókst að gera húsið fokhelt árið 1993.

Vígsludagurinn árið 2000 var mikil hátíðarstund, bjartur, fagur og ógleymanlegur. Í byggingunni er að finna táknmyndir kristinnar trúar gegnum aldirnar, enda lögðu arkitektarnir Hilmar Björnsson og Finnur Björgvinsson sig sérstaklega fram að leiða þær fram.

Í hönnun, verkfræðivinnu, byggingarvinnu og fjármögnun byggingarinnar þurfti að klífa brattar brekkur, en þetta tókst undir sterkri forystu. Það var fagnaðarstund þegar kirkjusalur á neðri hæð var vígður 12. desember 1993, þá var starfsemin komin undir þak á einum stað.

Kirkjan í dag býður fjölbreytta möguleika á kirkju- og safnaðarstarfi, sem Grafarvogsbúar nýta sér en einnig margir aðrir þegar tækifæri gefst. Öflug forysta skiptir miklu máli. - Magnús Ásgeirsson .“ - JGH

Glaðst á góðum degi og framkvæmdir við kirkjubygginguna í fullum gangi.

Framkvæmdir við byggingu kirkjunnar hófust árið 1991. Hér er verið að steypa plötuna fyrir aðalsal kirkjunnar.

Það var fagnaðarstund þegar kirkjusalur á neðri hæð var vígður 12. desember 1993, þá var starfsemin komin undir þak á einum stað - en sóknin hafði haft afnot af Fjörgyn í Foldaskóla fyrir kirkjustarfið.

Hús og hverfi eru fyrir fólk, en ekki einföld leið stjórnvalda til að handstýra fólki

Tue, 11 Nov 2025 19:46:27 GMT

Hinn kunni arkitekt Magnús Skúlason fer hörðum orðum um þéttingarstefnu borgarinnar í aðsendri grein í Morgunblaðinu sl. föstudag. Yfirskrift greinarinnar er Borgarlína í skugga eigin metnaðar og segir Magnús meðal annars að hús og hverfi séu fyrir fólk, en ekki einföld leið stjórnvalda til að handstýra fólki.

„Þegar skipulag borgarinnar er mótað út frá einstrengingslegum hugmyndafræðilegum markmiðum án þess að gaumur sé gefinn að raunverulegum þörfum íbúa er betur heima setið en af stað farið. Hús og hverfi eru fyrir fólk, en ekki einföld leið stjórnvalda til að handstýra fólki og þörfum þess,“ segir Magnús í grein sinni.

Hann vill bæta núverandi stætósamgöngur og hætta við borgarlínuna sem hann telur óhagkvæma: „Það er orðið löngu tímabært að staldra við og hugsa þessi mál upp á nýtt. Nærtækari og hagkvæmari leið við að ná hinu göfuga markmiði um breyttan ferðamáta væri t.d. að bæta þegar í stað núverandi almenningssamgöngur verulega, með fleiri sérakreinum fyrir strætó, betri þjónustu og ódýrari fargjöldum, ekki síst fyrir börn, ungmenni og eldri borgara.“

Hús og hverfi eru fyrir fólk, en ekki einföld leið stjórnvalda til að handstýra fólki,“ segi Magnús og vill hverfa frá borgarlínunni og þeirri stefnu að hverfin miðist við hana en liðka þess í stað til fyrir núverandi strætósamgöngum til að bæta almenningssamgöngur.

Hér má lesa grein Magnúsar Morgunblaðinu í heild sinni:

„Reykjavíkurborg hefur á síðustu árum lagt mikla áherslu á þéttingu byggðar, einkum meðfram fyrirhugaðri borgarlínu. Hugmyndin er í sjálfu sér göfug, að skapa vistvæna og sjálfbæra borg, en útkoman því miður óvistvæn og jafnvel heilsuspillandi.

Nú þegar rísa hverfi þar sem háar þéttbyggðar blokkir varpa skugga yfir nærliggjandi svæði. Sólarljós og birta, sem er fólki af holdi og blóði sálræn og líkamleg nauðsyn, nær ekki til jarðar. Á norðurslóðum hefur slíkt umhverfi neikvæð áhrif á líðan fólks og skaðar jafnvel geðheilsu, sérstaklega yfir dimmustu mánuðina.

Ekki bætir „byggingarlistin“ úr skák, þar sem blikkklædd hús, í einsleitum stíl, mynda kuldalegt gróðurlítið umhverfi. Slíkur arkitektúr býður ekki upp á mannlíf milli húsa. Þetta er ekki byggð sem fólk vill lifa og hrærast í og kann það að eiga sinn þátt í því að skýra hvers vegna margar nýjar íbúðir seljast treglega þrátt fyrir mikinn skort á húsnæði.

Þegar skipulag borgarinnar er mótað út frá einstrengingslegum hugmyndafræðilegum markmiðum án þess að gaumur sé gefinn að raunverulegum þörfum íbúa er betur heima setið en af stað farið. Hús og hverfi eru fyrir fólk, en ekki einföld leið stjórnvalda til að handstýra fólki og þörfum þess.

Það er orðið löngu tímabært að staldra við og hugsa þessi mál upp á nýtt. Nærtækari og hagkvæmari leið við að ná hinu göfuga markmiði um breyttan ferðamáta væri t.d. að bæta þegar í stað núverandi almenningssamgöngur verulega, með fleiri sérakreinum fyrir strætó, betri þjónustu og ódýrari fargjöldum, ekki síst fyrir börn, ungmenni og eldri borgara. Þá ætti þegar í stað að hætta að skipuleggja og reisa háreist skuggahverfi með mannvirkjum sem ekkert tillit taka til hnattstöðu landsins eða veðurfars.

Þetta væri raunhæfara, manneskjulegra og vistvænna skref í átt að borg fyrir fólk.“

Þess má geta að þeir Magnús og Páll Jakob Líndal, doktor í umhverfissálfræði, vöktu mikla athygli sl. vetur þegar þeir stigu fram á sjónarsviðið og gagnrýndu þéttingarstefnu borgarinnar við hönnun hverfa og bygginga. Sjá frétt Visis hér. - JGH

Magnús Skúlason arkitekt og Páll Jakob Líndal, doktor í umhverfissálfræði, vöktu mikla athygli sl. vetur þegar þeir stigu fram á sjónarsviðið og gagnrýndu þéttingarstefnu borgarinnar við hönnun hverfa og bygginga. (Mynd: Visir/Stefán).

Arkitektinn: Í Grafarvogskirkju má finna öll helstu tákn kirkjubygginga í gegnum aldirnar

Tue, 11 Nov 2025 09:21:23 GMT

Hilmar Þór Björnsson, annar arkitekanna að Grafarvogskirkju, skrifar grein á FB-síðu sína um þau atriði sem þeir Finnur Björgvinsson arkitekt höfðu í huga þegar kirkjan var teiknuð. Hann segir að í Grafarvogskirkju megi finna öll helstu tákn kirkjubygginga í gegnum aldirnar. Hátíðarmessa verður næstkomandi sunnudag í kirkjunni þar sem 25 ára vígsluafmælis hennar verður fagnað.

Hilmar segir meðal annars þetta um táknin í grein sinni: „Í kirkjunni má finna öll helstu tákn kirkjubygginga í gegnum aldirnar. Þar má nefna að kirkjan er þrískipa, sem tákna heilaga þrenningu og hliðarskipin eru fjögur hvoru megin eins og Guðspjallamennirnir og alls átta sem tákna sjö daga sköpunarinnar og nýtt upphaf.

Og ekki má gleyma „Via Sacra“ sem er hinn heilagi vegur frá fæðingu til eilífðarinnar sem er eftir miðskipi kirkjunnar sem endar með hring við altarið sem táknar eilífðina.“

„Við arkitektarinnar vildum laða fram andlegt hús,“ segir Hilmar Þór og um stærð kirkjunnar segir hann: „Heildarstærð kirkjunnar er um 2.890 fermetrar og aðalrýmið er á tveimur hæðum, 1.000 fermetrar hvor hæð. Þetta er mjög stór bygging og langstærsta Guðshús á landinu. Til samanburðar er Hallgrímskirkja 1.680 fermetrar.“

Hér má svo lesa grein Hilmars í heild sinni:

„Um næstu helgi verður þess minnst að aldarfjórðungur er liðinn frá vígslu Grafarvogskirkju. Grafarvogskirkja var vígð árið 2000 eða þegar 1000 ár voru liðin frá kristnitökunni á Alþingi. Það eru liðin 36 ár síðan samkeppni meðal arkitekta var haldinn um kirkjubyggingu i Grafarvogi og drög að kirkjubyggingunni voru lögð fram.

Við arkitektarnir sem unnum samkeppnina settum okkur vel inn i táknmál kirkjunnar og lásum bækur á borð við „Gengið i Guðshús“ og „Táknmál kirkjunnar“ og ekki bara það heldur fengum við til ráðgjafar afar færa presta sem gerðu okkur grein fyrir að í upphafi var orðið og orðið var hjá Guði.

ARKITEKTARNIR LEITUÐU RÁÐA HJÁ PRESTUM

Þetta voru þeir Karl Sigurbjörnsson síðar biskup og Pálmi Mattiasson sóknarprestur. Sóknarprestur Grafarvogskirkja Grafarvogi var Vigfús Þór Árnason sem sýndi verki okkar einstakan skilning og gekk fram af miklum dugnaði varandi framhaldið.

Í kirkjunni má finna öll helstu tákn kirkjubygginga í gegnum aldirnar. Þar má nefna að kirkjan er þrískipa, sem tákna heilaga þrenningu og hliðarskipin eru fjögur hvoru megin eins og Guðspjallamennirnir og alls átta sem tákna sjö daga sköpunarinnar og nýtt upphaf. Og ekki má gleyma „Via Sacra“ sem er hinn heilagi vegur frá fæðingu til eilífðarinnar sem er eftir miðskipi kirkjunnar sem endar með hring við altarið sem táknar eilífðina.

STEINN ÁBERANDI Í HÖNNUN HÚSSINS

Steinn er áberandi í hönnun hússins enda er það klætt steini bæði að utan og innan og vísa steinarnir í ritningargreinina „Látið sjálfir uppbyggjast sem lifandi steinar í andlegt hús...“ (Fyrra Pétursbréf 2:5).

Við arkitektarnir vildum laða fram andlegt hús.

Steinninn er i eðli sínu þungur og táknar söfnuðinn og efnið meðan hliðarskipin eru létt og tákna andann. Margt fleira sem varðar táknmál kirkubygginga sem ekki verður tíundað.

Heildarstærð kirkjunnar er um 2.890 m² og aðalrýmið er á tveimur hæðum, 1.000 m² hvor hæð. Þetta er mjög stór bygging og langstærsta Guðshús á landinu. Til samanburðar er Hallgrímskirkja 1.680 m2.

Nú eru 36 ár síðan hugmynd okkar Finns Björvinssonar var drengin með blýanti á blað. Engin tölva, bara hugur og hönd.

Hjálagt er myndband sem ég tók í dag ásamt stiklu sem ég fann á netinu af fermingarbörnum.“ - JGH

Hilmar Þór Björnsson arkitekt. „Nú eru 36 ár síðan hugmynd okkar Finns Björvinssonar var drengin með blýanti á blað. Engin tölva, bara hugur og hönd.“

Hver stórstjarnan af annarri á tónleikum Lions í Grafarvogskirkju nk. fimmtudagskvöld. Miðasala gengur vel

Sun, 09 Nov 2025 16:40:45 GMT

Það verður hver stórstjarnan af annarri á stórtónleikum Lions í Grafarvogskirkju næstkomandi fimmtudagskvöld en þessir tónleikar eru árlegt verkefni hjá Lionsklúbbnum Fjörgyn í Grafarvogi og mun þetta vera 21. árið í röð sem þeir eru haldnir. Allur ágóði af tónleikunum rennur til styrktar BUGL og Líknarsjóði Fjörgynjar og styðja listamennirnir verkefnið með vinnu sinni. Vel gert.

Þór Steinarsson hjá Lionsklúbbnum Fjörgyn segir að miðasala gangi vel og betur en í fyrra og hvetur hann Grafarvogsbúa til að tryggja sér miða og eiga ánægjulega kvöldstund í kirkjunni.

Listamennirnir sem koma fram eru:

Baggalútur.

Dísella Lárusdóttir.

Emmsjé Gauti. (Gauti Þór Másson).

Gissur Páll Gissurarson.

Greta Salóme Stefánsdóttir.

Guðrún Gunnarsdóttir.

Guðrún Árný Karlsdóttir.

KK. (Kristján Kristjánsson).

Þór Breiðfjörð.

Undirleikari verður Lára Bryndís Eggertsdóttir. Kynnir verður Felix Bergsson. Miðaverð er 7.500 krónur. - JGH

Guðrún Gunnarsdóttir.

Dísella Lárusdóttir.

Emmsjé Gauti.

Gréta Salome Stefánsdóttir.

Kristján Kristjánsson, KK.

Þór Breiðfjörð.

Baggalútur.

Felix Bergsson verður kynnir á tónleikunum.

Gissur Páll Gissurarson.

...og síðast en ekki síst; Guðrún Árný Karlsdóttir.

Forseti Íslands heiðursgestur á 25 ára vígsluafmæli Grafarvogskirkju sunnudaginn 16. nóv.

Fri, 07 Nov 2025 16:56:45 GMT

Það verður mikið um að vera í Grafarvogskirkju í sérstakri hátíðarguðsþjónustu sunnudaginn 16. nóv. klukkan 11 að morgni, þegar haldið verður upp á glæsilegt 25 ára vígsluafmæli Grafarvogskirkju. Heiðursgestur verður forseti Íslands, frú Halla Tómasdóttir.

Grafarvogskirkja er sérlega glæsileg bygging og það voru margir sem lögðu hönd á plóginn í sjálfboðaliðsstarfi þegar hún var vígð 18. júní árið 2000.

25 ára vígsluafmælið um næstu helgi verður hið veglegasta. Vígðir þjónar, kórar og tónlistarfólk kirkjunnar taka þátt í hátíðarguðsþjónustunni.

Léttar veitingar verða í boði sóknarnefndar og eru Grafarvogsbúar svo sannarlega hvattir til að mæta í þessa glæsilegu hátíðarguðsþjónustu og fagna merkum áfanga í sögu sóknarinnar. - JGH

Hún verður glæsileg hátíðarguðsþjónustan um næstu helgi, sunnudaginn 16. nóv., þegar haldið verður upp á 25 ára vígsluafmæli Grafarvogskirkju. Gerum þetta veglegt og mætum öll til að fagna merkum áfanga.

Heiðursgestur í hátíðarguðsþjónustunni um næstu helgi verður forseti Íslands, frú Halla Tómasdóttir.

Magnús Harðarson gestur Hluthafaspjalls ritstjóranna: Áhugavert að fá Landsbankann í skráningu

Fri, 07 Nov 2025 14:12:19 GMT

Magnús Harðarson , forstjóri Nasdaq Iceland, Kauphallarinnar, mætti að þessu sinni í Hlutahafaspjall ritstjóranna , hlaðvarp okkar Sigurðar Más Jónssonar á efnisveitunni Brotkast.is Hér má sjá brot úr viðtalinu.

Sigurður Már ræddi við hann og kom fram hjá Magnúsi að mikil tækifæri séu í skráningu ýmissa stærri fyrirtækja í eigu ríkisins og tiltekur þar sérstaklega Landsbankann og Landsvirkjun.

Nú þegar flest fjármálafyrirtæki landsins eru skráð í kauphöllina er margt sem bendir til þess að það geti verið heppilegt að spegla rekstur Landsbankans við rekstur annarra fjármálafyrirtækja í kauphöllinni. - JGH

Tær snilld - hringt í opinbera stofnun

Tue, 04 Nov 2025 13:11:55 GMT

Ólafur Hauksson almannatengill lýsir því snilldarlega á FB-síðu sinni í dag hvernig það sé að hringja í opinbera stofnun.

Hringt í opinbera stofnun:

„Góðan dag, þú hefur náð sambandi við Aðalskrifstofu.

Athugið að símatalið er tekið upp til að tryggja gæði og áreiðanleika, en láttu þig ekki dreyma um að biðja okkur um að finna upptökuna ef á reynir.

Ef erindið er að tilkynna eldsvoða, hringdu þá í 112.

Ef erindið er að biðja um liðskiptiaðgerð, hringdu þá í 1700.

Ef erindið er að tala við starfsmann, þá er hann að vinna heima í dag.

Við vekjum athygli á því að allar upplýsingar um starfsemi okkar er að finna á vefsíðu stofnunarinnar, nema auðvitað símanúmerið.

Til að senda tölvupóst á tiltekinn starfsmann er netfangið stofnun@stofnun.is og sér millistjórnandi í þjónustuveri um að finna út hver af 288 starfsfmönnum okkar eigi að fá póstinn. Vegna annríkis og styttingar vinnuvikunnar eru tölvupóstar sendir á þriðjudegi ekki lesnir fyrr en á mánudegi í næstu viku þar á eftir.

Af persónuverndarástæðum eru engar upplýsingar á vefsíðunni um starfsmennina.

Vegna styttingar vinnuvikunnar er afgreiðslan opin frá 10.30 til 12.00. Þar sem starfsmenn í afgreiðslu eru að vinna heima þessa vikuna er afgreiðslan lokuð.

Af persónuverndarástæðum getum við ekki gefið upp hvar Aðalskrifstofan er til húsa.

Þér yrði nú gefið samband við þjónustufulltrúa ef hann væri ekki að vinna heima.

Veldu einn til að slíta samtalinu.

Eigðu góðan dag.“

Þetta er ekkert nema tær snilld.

Grátbroslegt. Skemmtilegt að lesa en grátlegt að þetta skuli vera svona. - JGH

Ólafur Hauksson almannatengill lýsir því af tærri snilld hvernig það sé að hringja í opinbera stofnun.

Rauður mánudagur í Kauphöllinni

Mon, 03 Nov 2025 13:51:39 GMT

HLUTHAFASPJALL ritstjóranna. Hluthafar í fyrirtækjum eru ekki beint upplitsdjarfir þennan mánudagsmorgun því hægt er nánast að tala um „svartan mánudag“ eða öllu heldur rauðan í Kauphöllinni.

Alvotech hefur fallið um 20% í morgun og stafar það af því að fyrirtækið fær ekki að svo stöddu markaðsleyfi í Bandaríkjunum fyrir líftæknilyfið AVT05 sem er hliðstæðulyf við Simponi. Þeim fjölgar stöðugt sem telja að erlendir hlutabréfamarkaðir séu of hátt skráðir en á mörkuðum í Evrópu voru ekki miklar breytingar í morgun.

Líklegasta skýringin á rauðu tölunum í morgun er væntanlega að fyrirhugaðar skattahækkanir ríkisstjórnarinnar séu farnar að hafa áhrif; bjartsýni stjórnenda í fyrirtækjum hefur til dæmis hríðfallið og þá er óvissan í kringum útlán bankanna og stöðuna á fasteignamarkaðnum farin að stigmagnast. Þá má geta þess að hagvaxtartölur frá fjórða ársfjórðungi 2023 hafa ekki verið til að hrópa húrra fyrir.

Fréttin hefur verið uppfærð frá því hún birtist fyrst því gengi bréfa í Alcotech féll um 28% í gær, mánudag og hefur lækkað um 4% í dag, þriðjudag. - JGH

Rauðar tölur í Kauphöllinni þennan mánudagsmorguninn; 3. nóvember.

Úrvalsvísitalan hefur lækkað um 3%.

Engin ókyrrð í kauphöllinni í Frankfurt í morgun.

Ekki heldur í London.

Falleg stund. Látinna ástvina minnst í allra heilagra messu í Grafarvogskirkju

Mon, 03 Nov 2025 09:52:22 GMT

Hún var falleg og góð stundin í gær í Grafarvogskirkju þegar látinna ástvina var minnst í allra heilagra messu. Messan var mjög vel sótt.

Allra heilagra messu er gert mjög hátt undir höfði víða í Evrópu um þessa helgi. Á Spáni flykkjast til dæmis fjölskyldur í kirkjugarða - prúðbúnar - til að vitja leiði ástvina og heiðra minningu þeirra.

Í Grafarvogskirkju voru nöfn allra sóknarbarna, sem hafa látist frá síðastliðinni allra heilagra messu, lesin og tendruð ljós til minningar um þau.

Að venju var veislukaffi að lokinni messu og það var ekki af verri sortinni og naut líknarsjóður kirkjunnar góðs af. Það kemur sér vel þegar jólin nálgast og fólk leitar til kirkjunnar um aðstoð. - JGH

Þau stóðu vaktina í Grafaravogskirkju í gær. Frá vinstri: Kristín Kristjánsdóttir djákni, séra Arna Ýrr Sigurðardóttir sóknarprestur, séra Aldís Rut Gísladóttir og séra Sigurður Grétar Helgason.

Stórglæsilegt veislukaffi var að lokinni messu og naut líknarsjóður kirkjunnar góðs af. Það kemur sér vel þegar jólin nálgast og fólk leitar til kirkjunnar um aðstoð.

Frá allra heilagra messunni í Grafarvogskirkju í gær. Allra heilagra messu er gert mjög hátt undir höfði víða í Evrópu um þessa helgi þar sem látinna ástvina er minnst; leiði þeirra vitjuð og minning þeirra heiðruð.

Stenst þetta? Ekkert að gerast í snjómokstri í Grafarvogi í morgun skv. Borgarvefsjáinni

Thu, 30 Oct 2025 10:49:30 GMT

Það er forvitnilegt að skoða Borgarvefsjána varðandi vetrarþjónustu í Grafarvogi í morgun. Það virðist ekkert hafa verið mokað frá klukkan 8:30 til 10:30 í morgun. Stenst þetta?

Grafarvogsbúar - fylgist endilega með mokstri gatna og stíga í Grafarvogi á Borgarvefsjánni; vetrarþjónustu. Getið ætíð farið inn á hana hérna. - JGH

Getur þetta staðist? Er búið að moka allar götur í Grafarvogi? Enginn mokstur í Grafarvogi á bilinu 8:30 til 10:30 í morgun, skv. Borgarvefsjánni.

Hvað er búið að moka margar götur í Grafarvogi? Hvað segir borgarvefsjáin?

Wed, 29 Oct 2025 18:57:40 GMT

Hvað er búið að moka margar götur og stíga í Grafarvogi? Það er spurning sem margir Grafarvogsbúar velta núna fyrir sér. Til er athyglisverður vefur, borgarvefsjáin þar sem ku vera hægt að skoða þetta. Sjá hér.

Grafarvogsbúinn og ritstjórinn, Jónas Ragnarsson , benti Grafarvogi.net á að hægt væri að fylgjast með mokstri gatna og stíga á þessum vef. Hann setti samt ákveðið spurningamerki við útkomuna.

Við fyrstu sýn virðist hún ekki fullnægjandi eða ekki uppfærð nægilega því lítið virðist hafa verið mokað þegar hún er skoðuð - nema ef til vill göngustígar. Snjómokstur gatna er það sem greiðir fyrir umferð fólks til og frá vinnu og skiptir auðvitað gríðarlegur máli.

Kæru Grafarvogsbúar - skoðið borgarvefinn endilega og metið stöðuna í snjómokstrinum.

Moksturinn í íbúðahverfum gengur eflaust hægt eins og flestum finnst hafa verið undanfarin ár.

(Fréttin hefur verið uppfærð). - JGH

Borgarvefsj áin vetrarþjónusta á að segja okkur hvernig staðan er á sjónmokstri hverju sinni í Reykjavík. Kortið sýnir moksturinn frá 11:30 í gær til klukkan 22:30. Eitthvað virðist þurfa að uppfæra hana betur - nema fár götur hafi verið mokaðar í íbúðahverfunum í Grafarvogi.

Grafarvogsbúinn Örn Leós Stefánsson skrifar á FB í dag og birtir þessa mynd: „Týnd snjóruðningstæki. Lýst er eftir snjóruðningstækjum í Grafarvogi. Fóru að heiman í vor og hafa ekki sést síðan. Ef einhver hefur orðið var við þessi tæki þá endilega vísið þeim heim á ný!!“

„Spurning hvort ég nenni að moka bílinn út!“

Wed, 29 Oct 2025 11:40:05 GMT

Höfuðborgarbúar bíða núna spenntir eftir því að sjá hvernig borgin standi sig í að moka götur í íbúðahverfum en oft hefur hún verið gagnrýnd fyrir sleifarlag í þeim efnum.

Margir setja skemmtileg innleg á FB-síður sínar af fannferginu.

Vigdís Fjóla Stefánsdóttir , erfðafræðingur og blaðamaður, er vön pennanum og skrifar skemmtilega: „Hún er falleg þessi ævintýraveröld sem snjórinn skapar...en spurning hvort ég nenni að moka bílinn út! “

Hún er örugglega ekki ein um að hugsa svona þessa dagana.

Meðfylgjandi myndir eru frá henni komnar. - JGH

Þetta er svo sem rómó en aðeins of mikið á þessum árstíma. „Nú mega jólin koma“ - er það ekki einhver góður frasi á FB á aðventunni?

Vigdís Stefánsdóttir: „S purning hvort ég nenni að moka bílinn út! “

Það reynir víða á trjágreinarnar núna. Margar bogna - en brotna líka.

Fannfergi án fordæma - 100 ára gamalt októbermet slegið. Mokað í íbúðahverfum

Wed, 29 Oct 2025 11:00:12 GMT

Fannfergið á auðvitað hug allra í höfuðborginni þessa dagana og ljóst að íbúar bíða spenntir eftir að mokstur gangi fljótt og vel í íbúðahverfum í dag. Samkvæmt Morgunblaðinu í morgun virðist búið að ryðja stofnbrautir og áherslan í dag og á morgun verður á íbúðahverfin. Sjá frétt mbl.is um að þetta gangi þokkalega en hægt .

Morgunblaðið segir einnig frá því í dag í mjög athyglisverðri frétt á forsíðu blaðsins í morgun segir að fannfergið núna sé án fordæma í október og að yfir 100 ára gamalt októbermet hafi verið slegið.

Við birtum hér grafíska mynd úr Morgunblaðinu sem sýnir þetta vel. Sem og skjáskot af forsíðunni.

Öflug grafík í alla staði og forsíðan sterk. (Forsíðumynd Mbl. Eyþór). - JGH

Forsíðufrétt Morgunblaðsins í morgun um að snjókoman núna sé án fordæma í október og að októbermet hafi verið slegið.

Vel unnin frétt í Mogga dagsins og þessi fína grafík í blaðinu segir allt sem segja þarf. 100 ára gamalt októbermet slegið.

Þessi Grafarvogsbúi skaust í Bónus á gönguskíðum - rétti ferðamátinn í fannferginu

Tue, 28 Oct 2025 18:38:28 GMT

Þetta er búið að vera erfiður dagur í umferðinni og það sem hefur ef til vill vakið hvað mesta athygli er hvað strætisvagnar og sendibílar hafa verið lítt tilbúnir í vetrarfærðina. Það er gömul saga og ný að bilar á sumardekkjum þvælast mest fyrir í snjókomunni.

Grafarvogur.net fékk hins vegar þessa stórskemmtilegu mynd senda í dag frá Grafarvogsbúanum Sigurbergi Kristjánssyni en myndina tók hann við Bónus í fannferginu í dag þegar hann tölti þangað eftir einhverju smotteríi.

Þar rakst hann á þennan snjalla Grafarvogsbúa sem var með réttu græjurnar og mætti í Bónus á þessum fínu gönguskíðum. Að sjálfsögðu var smellt af mynd.

Skemmtilegt. - JGH

Þessi Grafarvogsbúi mætti í Bónus í Spöng í dag á gönguskíðum. Svo sannarlega rétti ferðamátinn í svona færð. (Mynd: Sigurbergur Kristjánsson)

Snjókorn falla - afrakstur næturinnar. Gul viðvörun í kortunum

Tue, 28 Oct 2025 10:06:19 GMT

Höfuðborgarbúar hafa verið duglegir í morgun að birta myndir af „afrakstri næturinnar“ en óvenjumikil snjókoma er á höfuðborgarsvæðinu og miðað við mörg undanfarin ár virðast þessi miklu snjóþyngli fyrr á ferðinni að þessu sinni.

Grafarvogsbúinn Guðrún Ólafsdóttir birtir mynd á FB-síðu sinni undir hinni skemmtilegu fyrirsögn: „Jæja“. Það þarf í raun ekki fleiri orð um þetta.

Gamall bekkjarbróðir minn úr menntaskóla, Árbæingurinn Gunnbjörn Marínósson , birti myndina hér að ofan með fyrirsögninni „Afrakstur næturinnar“.

Margrét Guðmundsdóttir , fyrrum forstjóri Icepharma, birtir sömuleiðis nokkrar myndir.á netinu með orðunum „Vetrarríki“ .

Morgunblaðið segir í frétt líkur á talsverðri ofankomu suðvestantil á landinu síðdegis með versnandi færð. Nokkur óvissa er þó í spám, bæði varðandi úrkomumagn og úrkomutegund. - JGH

„Jæja“ - skemmtileg fyrirsögn hjá Grafarvogsbúanum Guðrúnu Ólafsdóttur.

„Vetrarríki“ segir Margrét Guðmundsdóttir, fyrrum forstjóri Icepharma, á FB-síðu sinni í morgun.

„Afrakstur næturinnar“ segir Árbæingurinn Gunnbjörn Marínósson á FB-síðu sinni í morgun.

Tolf ungmenni frá skákdeild Fjölnis keppa á alþjóðlega Amsterdam Chess Open

Fri, 24 Oct 2025 08:49:59 GMT

Mikið er ánægjulegt hversu öflugt starf er unnið hjá Skákdeild Fjölnis undir styrkri forystu Helga Árnasonar, fyrrum skólastjóra í Rimaskóla.

Tólf ungir snillingar úr Fjölni héldu utan í gær til að taka þátt í hinu alþjóðlega og fjölmenna skákmóti Amsterdam Chess Open og verður teflt um helgina af fullum krafti. Keppnin hófst í morgun.

Fararstjóri er Helgi Árnason, formaður skákdeildar Fjölnis, og með hópnum eru foreldrar, eða tíu mömmur, eins og Helgi orðaði það í samtali við Grafarvog.is - JGH

Hópurinn sem hélt utan til Amsterdam í gær til að taka þátt í hinu öfluga, alþjóðlega og fjölmenna skákmóti Amsterdam Chess Open um helgina. Keppnin hófst í morgun. Áfram Fjölnir.

Þið eruð Grafarvogi til sóma. Gangi ykkur allt í haginn um helgin á þessu sterka móti þar sem eru 650 þátttakendur. Þetta er í þriðja sinn sem mótið er haldið.

Er froða á erlendum mörkuðum? Umræða um verðfall meira áberandi en áður

Thu, 23 Oct 2025 15:52:43 GMT

HLUTHAFASPJALL RITSJÓRANNA. Við félagarnir tókum upp öflugan þátt í gær í Hluthafaspjalli ritstjóranna sem hægt er að nálgast á efnisveitunni Brotkast.is . Sífellt fleiri sérfræðingar telja að verð hlutabréfa á erlendum mörkuðum sé orðið allt of hátt og spár um verðlækkun eru orðnar meira áberandi. Þetta og margt fleira fórum við Sigurður Már Jónsson yfir í þættinum. Meðal annars þetta:

Hið hrikalega áfall hjá Norðuráli á Grundartanga. Stóriðjan með 40% af útflutningstekjum þjóðarinnar og útflutningstekjur Norðuráls eru um 150 milljarðar á ári. Áætlað tekjutap á mánuði er ógnvekjandi tala eða um 5,4 milljarðar króna. Orkufyrirtækin og Eimskip tapa miklum tekjum.

Icelandair. Gengi bréfa lækkar þrátt fyrir að félagið sé núna með 69% af flugframboði um Keflavíkurflugvöll.

Gengi bréfa í Eimskip hefur lækkað um 19% frá 8. okt. sl. og félagið finnur heldur betur fyrir áfallinu hjá Norðuráli.

Við höfum í eitt ár rætt um það hvernig Jón Ásgeir Jóhannesson hefur búið til nýjan risa á matvörumarkaðnum; Dranga. Svo virðist sem honum hafi tekist að auka verðmæti hinnar nýju einingar um 25% frá því í sumar. Félagið stefnir á markað.

Símafyrirtækin. Enn hallar undan fæti hjá Sýn. Afkomuviðvörun. Dramatískar aðgerðir mun líklegri nú en áður. Mikill munur á markaðsvirði símafyrirtækjanna.

Fasteignamarkaður. Lítið að gerast og fjöldi nýbyggðra íbúða óseldur.

Bankar eru byrjaðir að draga úr útlánum.

Bílgreinin horfir fram á hrun í bílasölu á næsta ári vegna stóhækkaðs vörugjalds á bíla. Virðist sem fyrrum eigendur Öskju hafi selt á réttum tíma.

Ferðaþjónustan er núna á nálum vegna hugmynda ríkisstjórnarinnar um að bæta við sköttum á hana. Verð bílaleigubíla á eftir að hækka og mun færri farþegaskip koma til landsins með tilheyrandi tekjutapi.

10. Kvennafrídagurinn fyrir 50 árum. Miklar framfarir og sífellt fleiri konur veljast núna í stjórnunarstöður í fyrirtækjum. Fögnum fimmtíu árunum og tölum um framfarirnar frekar en eitthvert bakslag í jafnréttismálum.

11.

Sundabrautin og hvað það er sem Grafarvogsbúar óttast helst - sem er að umferð frá austurhluta borgarinnar stóraukist inn í Grafarvoginn til að komast inn á Sundabrautina.

Þetta og talsvert meira í hressilegu spjalli okkar.

Virði símafyrirtækjanna - Síminn sex sinnum verðmeiri en Sýn

Thu, 23 Oct 2025 15:38:07 GMT

HLUTHAFASPJALL RITSTJÓRANNA. Það er athyglisvert að skoða virði símafyrirtækjanna og fórum við félagarnir Sigurður Már Jónsson yfir þau mál í nýjasta þætti Hluthafaspjalls ritstjóranna sem tekinn var upp í gær og er á efnisveitunni Brotkast.is.

Síminn er sex sinnum verðmeiri en Sýn, metinn á 32 milljarða meðan markaðsvirði Sýnar er tæpir 5 milljarðar. „Litla“ símafyrirtækið á markaðnum, Nova, hefur hækkað talsvert á árinu og er virði þess um 17 milljarðar kr.

Sýn hefur gefið út afkomuviðvörun fyrir þriðja ársfjórðung. Á meðal þess sem við ræðum um er hvort Sýn hafi mistekist að ná áskrifendum til sín með því að yfirbjóða Símann varðandi enska boltann. Drastískar aðgerðir á Sýn eru miklu líklegri en áður.

Fyrstu 9 mánuði ársins var hagnaður Símans tæpur 1 milljarður kr. og Nova rúmur hálfur milljarður.

Níu mánaða uppgjör Sýnar liggur ekki fyrir en tap var á Sýn upp á rúman hálfan milljarð fyrstu sex mánuðina - og afkomuviðvörun gefin út vegna þriðja ársfjórðungs, sem fyrr segir. - JGH

Hefur Sýn mistekist að fjölga viðskiptavinum sínum og auka hagnað sinn með kaupunum á enska boltanum?

Áhyggjur Grafarvogsbúa á fundinum: Mun Sundabraut auka umferð um Grafarvoginn?

Wed, 22 Oct 2025 22:31:14 GMT

Það fer ekki á milli mála að Grafarvogsbúar eru áhugasamir um Sundabrautina og vel var mætt á kynningarfundinn í Egilshöll síðdegis í dag þótt hvert sæti hafi ekki verið skipað.

Grafarvogsbúar hafa einn helst áhyggjur af því að Sundabrautin muni auka umferð um Grafarvoginn - verði umferðarhvetjandi um hverfið og að umferðin úr austurhluta borgarinnar liggi um Grafarvcginn til að komast inn á Sundabrautina. Fram hefur komið í könnun Vegagerðarinnar að 76% eru hlynnt Sundabrautinni og 21% Grafarvogsbúa segja ætla að nota hana daglega.

Sigrún Ásta Einarsdóttir , íbúi í Grafarvogi, sem hefur látið til sín taka gegn þéttingu byggðar í Grafarvoginum, var á fundinum og tók meðfylgjandi myndir fyrir vefinn.

„Ég er fylgjandi Sundabraut en í þessari útfærslu eru þessar 12 mínútur sem sparast í umferð frá Kjalarnesi ansi dýru verði keyptar fyrir Grafarvogsbúa finnst mér.“

Hún segir að það hafi verið sláandi hversu takmörkuð svör fengust á fundinum við áhyggjum Grafarvogsbúa um aukna umferð um hverfið og bætir við: „Að mínu mati er augljóst vanmat í greiningu Vegagerðarinnar á aukinni umferð inn í Grafarvoginn vegna Sundabrautar.“

Sundabrautin merkt hér með rauðri línu.

Þá segir Ásta ennfremur að í sífellu sé verið að tala um „mótvægisaðgerðir“ en hvergi sagt um hvers konar mótvægisaðgerðir verði að ræða.

„Það er líka sláandi að greiningarnar gera ráð fyrir að 10% íbúa austurborgarinnar muni ferðist með borgarlínu þegar 4% borgarbúa taka strætó í dag. Þetta eru mjög bjartsýnar spár um borgarlínuna en í upphafi var sagt að öll líkön byggðu á „worst case scenario“ - verstu sviðsmyndinni.“

Þá segir hún að í líkönum sé gert ráð fyrir mikilli minnkun umferðar á Gullinbrú því Grafarvogsbúar eru jú víst allir að fara á Sundabraut. „Ég efast stórlega að þetta með Gullinbrú gangi eftir. Og hvað með þá sem koma að austan og eru á leið norður? Hvað með flutningabílana sem fara frá Hálsum t.d. Ölgerðinni og eru að fara vestur eða norður? Eða þungaflutningana í gegnum hverfið til að fara með úrgang í framtíðar Hringrásargarð á Álfsnesi?,“ segir Sigrún. - JGH

Í könnun Maskínu, sem kynnt var á fundinum í Egilshöll, segjast 21% Grafarvogsbúa ætla að nota Sundabraut daglega.

Þessi glæra sýnir Sundabrautin fer hressilega nálægt fjölbýlishúsunum í Gufunesi og liggur fyrir neðan Hallsteinsgarð. Hringtorg verður byggt við Borgaveginn og Strandveginn.

Í líkönum er gert ráð fyrir að 10% allra íbúa í austurhluta borgarinnar muni nota borgarlínuna. En núna nota aðeins 4% Reykvíkinga strætó.

Fundurinn var vel sóttur og áhugi Grafarvogsbúa á málefnum Sundabrautar mikill. Þótt ekki hafi fremstu lúxussætin verið fullnýtt.

Þessi glæra sýnir að 76% landsmanna eru hlynnt lagningu Sundabrautar, skv. könnun Maskínu. En er víst að þeir séu hlynntir núverandi útfærslu?

Mikill áhugi á fundinum um Sundabraut í dag. Fundurinn fluttur í Egilshöll

Wed, 22 Oct 2025 15:18:57 GMT

Mikill áhugi er á fundinum um Sundabraut sem verður í dag kl. 17:30 í Egilshöll og er jafnvel búist við allt að fimm hundruð manns mæti á fundinn. Þetta er þriðji fundurinn í röð sem Vegagerðin og Reykjavíkurborg halda til að kynna Sundabrautina. Vaxandi áhugi virðist hjá mörgum að fá öflug Sundagöng í staðinn fyrir Sundabraut.

Á fundunum verða fulltrúar Vegagerðarinnar, Reykjavíkurborgar og verkfræðistofunnar EFLU sem er ráðgjafi í Sundabrautarverkefninu. Fundirnir verða teknir upp og upptökurnar gerðar aðgengilegar á vef Vegagerðarinnar og Reykjavíkur.

Gert er ráð fyrir að fundurinn taki einn og hálfan tíma og standi yfir til klukkn sjö; nítján.

Væntanlega fá fundargestir að spyrja krefjandi spurninga á fundinum. - JGH

Sundabrautin verður kynnt á fundi í Egilshöll kl.17:30 í dag. Búist er við metaðsókn og að hátt í fimm hundruð manns mæti.

Hann er 90 ára Grafarholtsbúi og enn virkur í vinnu - og röddin er þekkt úr auglýsingu

Tue, 21 Oct 2025 07:38:24 GMT

Þeir eru ekki margir sem eru á nítugasta og fyrsta aldursári og eru ennþá virkir í vinnu. Grafarholtsbúinn Kolbeinn Pétursson er hins vegar einn af þeim og er í eigin rekstri eins og hann hefur verið samfellt í 55 ár. Hann hefur eðlilega minnkað við sig frá því erillinn var meiri á árum áður. Hann er þekkt rödd úr auglýsingu. Eða hver þekkir ekki röddina í Uniconta-auglýsingunni: „Ertu nokkuð fastur í fortíðinni?“

Núna er hann umboðsmaður fyrir þýska fyrirtækið Shomburg GMBH & Co sem framleiðir heimsfræg múrkerfi til vatnsþéttingar á húsum og mannvirkjum, ásamt hefðbundnum múrvörum, en Byko sér um innflutning og dreifingu.

Grafarvogur.net tók hús á Kolbeini á dögunum í Grafarholtinu. Skemmtilegur og hress maður sem ber aldurinn vel. Eiginkona hans er Kristín S. Ásgeirsdóttir sjúkraliði.

Kolbeinn er með umboð fyrir þýskar múrvörur sem seldar eru í Byko.

FRUMBYGGJAR Í GRAFARHOLTI

Þau hjón eru frumbyggjar í Grafarholti. Þau seldu árið 2001 stórt einbýlishús við Ljárskóga í Breiðholti og fluttust í fjölbýli við Kristnibrautina; rétt fyrir neðan rauðu hitaveitutankana. „Hér líður okkur mjög vel,“ segir Kolbeinn með áherslu.

„Við erum líka svo lánsöm að Kristnibrautin var á sínum tíma ákveðið tilraunaverkefni hjá borginni en gatan er upphituð og því að mestu laus við snjóþyngsli og hálku á veturna - og þá eru nærliggjandi göngustígar sömuleiðis upphitaðir.“

„ERTU NOKKUÐ FASTUR Í FORTÍÐINNI?“

Kolbeinn er sem fyrr segir þekkt rödd í útvarpi en hann var fenginn til að lesa inn á auglýsingu fyrir Uniconta sem er bókhaldskerfi og þar er slagorðið: Ertu nokkuð fastur í fortíðinni? Enda er það svo að þegar hann tekur til máls innan um ókunnuga fær hann oft spurninguna: „ Bíddu við, er þetta ekki Uniconta-röddin? “

Hann segir að lesturinn inn á auglýsinguna hafi borið skemmtilega að. „Ég var kominn með Uniconta-bókhaldskerfið og búinn að stilla því upp í tölvunni þegar síminn hringi. Maður frá auglýsingadeild RÚV var á línunni og spurði hvort ég væri til í að tala inn á útvarpsauglýsingu sem til stæði að búa til. Hvaða auglýsingu? spurði ég. Uniconta, svaraði hann. Ég hélt það nú; ég væri sjálfur með þetta kerfi.

Kolbeinn er með umboð fyrir REMISIL-SI frá Shomburg í Þýskalandi og segir það frábært efni á steyptar tröppur, hellur í innkeyrslum, svo og bílskýlis- og bílskúrsgólf. Efnið herði yfirborðið og gerir það vatnsfælið.

Í FYRIRTÆKJAREKSTRI Í 55 ÁR

Kolbeinn er þýskmenntaður rafmagnstæknifræðingur og stofnaði árið 1970 fyrirtækið Háberg sem var í Skeifunni og rak það um árabil. Þetta var sérverslun með rafbúnað og varahluti fyrir bíla. Fyrirtækið varð vinsælt meðal fagmanna jafnt sem bíleigenda.

Hann seldi Háberg árið 1995 en hélt áfram með nýtt fyrirtæki, K. Pétursson ehf., sem meðal annars þjónaði augnlækningadeild Landspítalans. Fyrirtækið rekur hann enn, en nú nær engöngu sem umboðsmaður, sem fyrr segir.

VINNAN HELDUR MÉR VIRKUM

Kominn á nítugasta og fyrsta aldursár og spurður hvort hann ætli að hætta að vinna – nei, alls ekki, svarar hann að bragði.

„Ég er þannig gerður að ég verð að brasa eitthvað, hafa eitthvað fyrir stafni, það heldur mér bæði ungum og virkum. Áhugi og gleði í vinnu skiptir öllu máli. Ég þarf til dæmis að þýða talsvert úr þýsku vegna múrvaranna og það er góð leikfimi fyrir hugann.“

SKJÓLSÆLT Á GÖNGUSTÍGUNUM VIÐ GOLFVÖLLINN

Kolbeinn segir að það sé mjög gott að búa í Grafarholti og þau hjón geri nokkuð af því að ganga um svæðið – og þá sérstaklega á göngustígum við golfvöllinn í Grafarholti. Þar sé bæði skjólsælt og fallegt útsýni og svo sé gaman að sjá kylfingana spreyta sig. Sjálfur á hann ágætan feril að baki í golfi.

„Raunar er það svo að ég fer núorðið oftar í sund en út á golfvöll. Sundið er alveg frábær hreyfing, heldur manni hressum og er mikil blessun fyrir liðamótin,“ segir þessi eldhressi Grafarholtsbúi að lokum. - JGH

Hér má sjá AQUAFIN-RB400 sem notað er til vatnsþéttingar á steyptum þökum, t.d. bílskúrsþökum. Það þolir og þéttir 2mm+ sprunguhreyfingar.

Á heimili sínu í Grafarholti. Á nítugasta og fyrsta aldursári - og ekkert að hætta að vinna? „Nei, alls ekki. Ég þarf að hafa eitthvað fyrir stafni og vinnan heldur mér virkum,“ segir Kolbeinn.

Nokkrar umræður um gömlu sementssílóin varðandi Borgarhöfðann

Mon, 20 Oct 2025 14:41:13 GMT

Sementsturnarnir tveir. Nokkrar umræður hafa orðið um gömlu sementssílóin, turnana tvo, við Sævarhöfðann eftir að við birtum fréttina um Borgarhöfðann.

Þessir turnar hafa ekki verið glæstir grannar fyrir íbúa Bryggjuhverfisins undanfarin ár, hrörlegir og umgengnin í kringum þá borginni til skammar. Það er með öllu óskiljanlegt að eigendum hjólhýsanna hafi verið fundinn þessi staður.

Umræðan og tölvupóstarnir til mín hafa hins vegar snúist um að gömlu sílóin verði þarna áfram í nýja hverfi Borgarhöfðans og hvernig þeir muni gera sig þarna áfram. Eitt sinn var rætt um að þarna gæti orðið veitingastaður ofan á turnunum og allt mjög rómó þar á góðum og fallegum kvöldum við sundin blá - útsýnisstaður.

Það getur vel verið að þeir verði til sóma þegar þar að kemur - eftir dágóð ár - þeir verða að minnsta kosti áberandi eins og sjá má á meðfylgjandi tölvumynd af svæðinu.

Grænt og þétt. Mikil glansmynd af Borgarhöfða. Þarna blasa þeir við gömlu sementsturnarnir tveir á miðri mynd. Þeir hafa hins vegar ekki verið til prýði fyrir íbúa í Bryggjuhverfinu sem aka þarna framhjá daglega.

Þá hefur sömuleiðis verið bent á að hamarinn sé ansi brattur fyrir neðan fjölbýlishúsin við Eirhöfðann en á tölvugerðu myndinni hefur hann eiginlega verið jafnaður út. Þá verður ekki annað séð en að Sorpa við Sævarhöfðann hverfi fyrir fjölbýlishúsum.

Flestir spyrja sig hins vegar að því hvernig umferð bíla til og frá hverfinu verði háttað - og sjá ekki annað en að Höfðabakkinn, Bíldshöfðinn, Ártúnsbrekkan, Miklabrautin og Sæbrautin fái dágóðan skammt til viðbótar og eru þessar götur þó þegar sprungnar á álagstímum. - JGH

Frá því í sumar. Umgengnin í kringum sementsturnana hafa verið borginni til skammar. Það er með öllu óskiljanlegt að eigendum hjólhýsanna hafi verið fundinn þessi staður.

Horfið. Á fallegu haustkvöldi í september sl. Hið niðurnídda hjólhýsi sem betur fer horfið. Hefði samt mátt kippa dýnunni með þegar hjólhýsið var fjarlægt.

Tankar Malbikunarstöðvarinnar voru rifnir niður í sumar og svæðið fyrir neðan nýju fjölbýlishúsin við Eirhöfða senn rýmt og lagað. Bent hefur veirð á að bakkinn - hamarinn fyrir neðan Eirhöfðann - sé mun brattari en tölvumyndin af Borgarhöfðanum gerir ráð fyrir. Það má hins vegar auðveldlega bæta úr því.

Borgarhöfðinn verður engin smá byggð. 20 þús. íbúar - 8 þús. heimili. Turnarnir tveir eru lengst til vinstri á þessari mynd.

Grafarholtið á síðustu öld: Færeyingurinn sagði: Hann hallar um trjá millimetra

Sun, 19 Oct 2025 14:30:57 GMT

Sigurður Hreiðar, 87 ára Grafarholtsbúi og fyrrverandi ritstjóri Vikunnar, er líklega sá núlifandi Íslendingur sem Grafarholtið, Keldnalandið, Úlfarsárdalinn og Blikastaðalandið hvað best. Þetta er æskuslóðir hans. Hann setur annað slagið inn mjög skemmtilegar minningar og myndir inn á FB og þessa setti hann inn fyrr í dag:

„Einhvern tíma á fimmta áratug liðinnar aldarr var skipt um glugga í kjallarastofunni í Grafarholti. Minnir að þar hafi frændi okkar Sigurður Eyvindsson verið að verki. Þegar hann hafði stillt karminn af svo sem honum þóknaðist kom til skjalanna Færeyingur sem um þær mundir var á bænum, stillti sér upp frammi á hlaði og sagði svo: Hann hallar um trjá millimetra.

Þetta þótti viðstöddum sérstakt nokkuð svo verkið var mælt upp aftur af ítrustu nákvæmni. Og rétt reyndist: Gluggakarmurinn hallaðist um trjá millimetra. Upp á færeysku.“

Stórskemmtileg mynd og saga sem Sigurður Hreiðar setti inn á FB fyrr í dag. Myndin er líklegast frá fimmta tug síðustu aldar (stríðsárunum) og sér úr Grafarholtinu yfir Keldnalandið að hluta og Grafarvoginn. Herskip liggur á Elliðavoginum fyrir utan Hamrahverfið; Gufuneshöfðann. Glöggt má sjá veginn í Gufunesið en hann var í notkun þar til Gullinbrú var byggð með Grafarvogshverfinu.

Sigurður Hreiðar, 87 ára Grafarholtsbúi og fyrrum ritstjóri, er sá núlifandi Íslendingur sem þekkir Grafarholtið, Úlfarsárdalinn og Keldnalandið hvað best. Þetta eru æskuslóðir hans.

Þessa æskumynd notar Sigurður á FB-síðu sinni.

Grænt og þétt. Hvernig verður með umferðina til og frá Borgarhöfða?

Sat, 18 Oct 2025 14:39:09 GMT

Margir Grafarvogsbúar velta því fyrir sér hvernig umferðin verði til og frá Borgarhöfða, hinu nýja risavaxna hverfi á Ártúnshöfðanum - og kannski ekki síst hvernig umferðin þaðan tengist væntanlegri Sundabraut - nú eða Sundagöngum verði þau fyrir valinu. Ennfremur liggur fyrir að umferð um Höfðabakkann mun stóraukast með þessu nýja 20 þús. manna hverfi.

Ekki er að sjá neinar tengingar við Sundabraut í því skipulagi sem hefur verið kynnt á slóðinni Borgarhöfði.is og er ástæðan sögð sú að ekki er búið að ákveða hvor leiðin verður fyrir valinu; brú eða göng. Verði brúin niðurstaðan verður hún ógnarstór og mun svo sannarlega setja svip sinn á umhverfið við sundin blá. Auðvitað hefði mátt setja þær hugmyndir sem liggja fyrir um brúna þarna inn á hina glæsilegu teikningu á vefnum sem fyrirtækið Onno vann um Borgarhöfðann og kynnti fyrir rúmri viku.

Í stórhuga áformum um Borgarhöfðann er gert ráð fyrir 20 þús. manna hverfi og 8 þús heimilum. Ekki liggur alveg ljóst fyrir hversu mörg bílastæði verða fyrir þessi 8 þús. heimili. Enn er ekki búið að skipuleggja nema um 40% af hverfinu.

Þó kemur fram að á fyrsta uppbyggingarsvæði Borgarhöfðans, skipulagssvæði 1 , verða allt að 1.570 íbúðir og um 2.020 bílastæði. Þar af verða 1.175 samnýtt leigustæði neðanjarðar og um 200 samnýtt á yfirborði. Eða um 1,3 stæði á íbúð.

Þá segir að undir íbúðahúsum verði almennt sérmerkt bílastæði ætluð íbúum en í vissum húsum með blandaða nýtingu verða opin bílastæðahús. Ekki fer á milli mála að mjög er lagt upp úr að íbúar noti Borgarlínuna - sem sögð verður komin árið 2031. Þá er rætt um bæði bíllausan og „ bílléttan lífsstíl“.

Skipulagssvæði 1 er fyrsta uppbyggingarsvæði Borgarhöfðans.

Varðandi stofnbrautir segir að hvort sem leiðinni sé heitið í vinnuna eða út á land sé fljótlegt að komast til allra átta frá Borgarhöfða. Vesturlandsvegur og Reykjanesbraut séu í nokkurra mínútna fjarlægð.

Þannig að fyrir liggur að hin daglega umferð til og frá hverfinu mun fara um Vesturlandsveginn (Ártunsbrekku) - Miklubraut og Bíldshöfðann til og frá Sæbrautinni.

Þá liggur fyrir að umferð til og frá hverfinu mun liggja um Höfðabakkann og Stórhöfðann en búið er að þrengja að umferð bíla við þau gatnamót líkt og margbúið er að minnast á.

Niðurstaðan er því sú að rætt er um stofnbrautir og götur sem eru þegar kolsprungnar. - JGH

GRÆNT OG ÞÉTT. Í samþykkt meirihlutan fyrir hverfinu segir að „grófu iðnaðarsvæði sé umbreytt í grænt og þétt íbúðahverfi við lykilstöðvar borgarlínu.“

Enn er ekki búið að tengja snjallljósin

Sat, 18 Oct 2025 12:51:40 GMT

Enn er ekki búið að tengja snjalljósin við fimm gatnamót Höfðabakkans og hafa þessar umdeildu framkvæmdir staðið yfir frá því um mitt sumar. Tilgangur nýju snjallljósanna á að vera að greiða fyrir umferð og sjá til þess að ökumenn bíði ekki að óþörfu við ljós á gatnamótum þegar engin umferð er um þau - en það gerist oft á heðfbundnum stillanlegum umferðarljósum sem eru stillt eftir klukku.

Nokkurrar óþreyju gætir hjá íbúum í Grafarvogi þar sem núverandi ljós „tala á engan hátt saman“ svo verulega hefur dregið úr flæði umferðar niður Höfðabakkann og í Grafarvoginn. Þannig geta menn lent á rauðu bæði við Dvergshöfðann og Stórhöfðann. Ljósin eru stillt eftir klukku; tímastillt.

Háir staurar setja svip sinn á nýju snjallljósins sem eiga að minnka tafatíma í umferðinni. Enn er ekki búið að tengja nýju snjallljósin.

Helsti kostur snjalllumferðarljósa mun vera sá að þau breyta sér og stilla sig af til að lágmarka tafatíma við gatnamót.

Snjalltæknin fylgist með umferðinni allan sólarhringinn og alla daga, telur nákvæmlega hvers konar umferð er í gangi, hvers konar farartæki fara um gatnamótin, hvort heldur bílar eða hjólandi, ennfremur fjölda gangandi vegfarenda og safnar þannig saman miklu ítarlegri upplýsingum en þegar eru fyrir hendi. - JGH

Þessir gráu kassar við gatnamótin við Höfðabakkann líta sakleysislega út en í þeim „fer allt fram“ þegar kemur að snjalltækninni við umferðarljós.

16. okt: Heitavatnslaust í Hamrahverfi, Foldahverfi og Húsahverfi

Wed, 15 Oct 2025 13:38:48 GMT

Hún var veruleg bilunin á heitavatnslögninni inn í Grafarvoginn í endaðan ágúst þar sem allt Grafarvogshverfið varð heitavatnslaust. Á morgun verður gert við bilun í kerfinu og verða þrjú hverfi í Grafarvogi heitavatnslaus - og tilkynntu Veitur í síðustu viku að til þessarar lagfæringar kæmi á morgun.

Hverfin sem verða heitavatnslaus á morgun frá klukkan átta í fyrramálið til átta annað kvöld (8-20) eru Hamrahverfi, Foldahverfi og Húsahverfi. Sjá nánar á heimasíðu Veitna www.veitur.is

Í tilkynningu frá Veitum segir: „T il að lágmarka hættu á slysum eða tjóni þegar heita vatnið kemst á aftur er mælt með að skrúfa fyrir alla heitavatnskrana. Húseigendur eru hvattir til að yfirfara innanhússkerfi sín og tryggja að allt sé í lagi áður en vatnsflæðið hefst að nýju.“

Hún reyndist alvarleg bilunin í endaðan ágúst þegar allt Grafarvogshverfið varð heitavatnslaust. Nú tilkynna Veitur að vegna bilunar í kerfinu verði heitavatnslaust í Hamrahverfi, Foldahverfi og Húsahverfi á morgun.

Vandir menn, vönduð vinna. Það þurfti snör handtök í endaðan ágúst þegar alvarleg bilun

varð á heitavatnslögninni inn í Grafarvog. Núna er önnur bilun í gangi í kerfinu sem

gert verður við á morgun.

Harka að færast í málið - Sundabraut eða Sundagöng? Allir láta sig þetta mál varða

Tue, 14 Oct 2025 11:04:01 GMT

Það er augljóst að nokkur harka er að færast í umræðurnar um hvort byggja eigi Sundabraut eða Sundagöng - og sitt sýnist hverjum. Sundabrúin kæmi upp við Holtaveg (við stórmarkaðinn Holtagarða) og þar inn á Sæbrautina en Sundagöng kæmu upp á fleiri stöðum og dreifði umferðinni betur. Upphaflega taldi Vegagerðin að hagkvæmasti kostur fyrir Sundabrúna væri að hún kæmi inn í Vogana - en sá kostur varð að engu með byggingu Vogahverfisins.

Ekki fer á milli mála að risavaxin Sundabrú mun breyta ásýndinni við sundin blá og hafa veruleg áhrif á umhverfið í Grafarvogi. Hin nýbyggðu fjölbýlishús í Gufunesi fá brautina nánast í fangið og Hamrahverfið fær brúna við hliðina á sér, samkvæmt tillögum Vegagerðarinnar.

GÖNG TIL VINSTRI. BRÚ TIL HÆGRI. Á myndinni til vinstri sést hvernig Sundagöng myndu tengjast inn á Sæbraut. Myndin til hægri sýnir hvernig fyrirhuguð Sundabrú kemur inn á Holtaveg.

Vart fer á milli mála að nokkrar deilur verða um það hvorn kostinn eigi að velja. Þegar hefur Gauti Kristmannsson, varaformaður Íbúasamtaka Laugardals, lýst óánægju með Sundabrautina og hinn mikla umferðarþunga sem fyrirsjáanlega verður á svæðinu liggi brúin yfir Kleppsvík og komi upp við Holtaveginn. (Umferðarflæði mun stóraukast um Holtaveg, Sæbraut, Langholtsveg og Laugarásveg.) Sæbrautin virðist þegar sprungin á miklum annatímum og líklegt að umferðin finni sér nýjan farveg í gegnum íbúðahverfin á þessu svæði.

Vegagerðin virðist hins vegar vera sannfærð um kosti brúar umfram göng - og telur að brú henti Grafarvogsbúum frekar og metur stöðuna svona:

„Við mat á mismunandi útfærslum Sundabrautar kemur fram að brúarlausnin býður upp á skilvirkari tengingar fyrir íbúa Grafarvogs en jarðgangakosturinn. Sundabrúin gerir ráð fyrir styttri og beinni tengingum við hverfið og býður þannig upp á fleiri aðkomuleiðir að Sundabrautinni. Með þessu styttist ferðatími Grafarvogsbúa og dregur úr umferð innan hverfisins, samanborið við jarðgangakostinn.

Þá mun brúarlausnin létta meira á umferð um Gullinbrú en jarðgöng myndu gera, samkvæmt greiningum, og þar af leiðandi fremur létta á umferð á Höfðabakka en jarðgöng.“

HALLSVEGUR EKKI BREIKKAÐUR

Þá segir að ekki sé gert ráð fyrir að breikka Hallsveg í tengslum við Sundabrú þar sem ekki sé fyrirséð að umferð úr öðrum hverfum leiti í gegnum Grafarvog til að komast yfir brúna. Þvert á móti sé gert ráð fyrir að tilfærsla umferðar Grafarvogsbúa yfir á Sundabraut skapi aukið rými á Gullinbrú, Höfðabakka og í Ártúnsbrekku fyrir aðra umferð.

„Að lokum býður brúarlausnin upp á þann mikilvæga framtíðarmöguleika að þróa Hallsveg sem samgönguás með fjölbreyttum ferðamátum, þar á meðal almenningssamgöngum, hjólastígum og gangstígum. Slík þróun eykur valmöguleika íbúa Grafarvogs til að ferðast á hagkvæman og sjálfbæran hátt til vinnu og tómstunda, í takt við stefnu höfuðborgarsvæðisins um fjölbreyttar og vistvænar samgöngur,“ segir Vegagerðin. - JGH

Svona gæti Sundabrautin litið út séð frá Hamrahverfinu - en brúin mun breyta umhverfinu við sundin blá á afgerandi hátt.

Víða þrengt að umferð bíla - Ólafur gagnrýnir þrenginguna í Lækjargötu

Tue, 14 Oct 2025 09:29:23 GMT

„Það er yfirklór að þrengja gatnamótin,“ segir Grafarvogsbúinn og einn helsti umferðarsérfræðingur landsins, Ólafur Kr. Guðmundsson, í samtali við Morgunblaðið í morgun um miklar þrengingar bílaumferðar í Lækjargötu vegna banaslys sem þar varð fyrir nokkrum árum. Um er að ræða gatnamót Lækjargötu og Vonarstrætis - sem og gatnamót Læjargötu og Skólabrúar.

Ólafur gerði nýlega yfirgripsmikla úttekt fyrir Grafarvog.net um slysatíðni við fimm gatnamót við Höfðabakkann og vakti sú úttekt hans mikla athygli. Þrengingar og stækkun umferðareyja við Höfðbakkann eru til að auka öryggi gangandi og hjólandi.

Um þrengingarnar í Lækjargötu segir Ólafur við Morgunblaðið að sérstakar aðstæður hafi verið við gatnamótin á þeim tíma sem slysið varð vegna byggingar hótels á horni Lækjargötu og Vonarstrætis og þess að ökumenn voru báðir undir áhrifum lyfja.

„Að nota þetta slys sem ástæðu þess að þrengja gatnamótin er yfirklór og útúrsnúningur því hönnun gatnamótanna var ekki ástæðan fyrir slysinu. Ökumaðurinn sem lést var undir áhrifum örvandi vímuefna, virti ekki biðskyldu og keyrði í veg fyrir vinnuvélina sem keyrði með gafflana uppi fram úr strætisvagni sem byrgði sýn að Vonarstræti. Gafflar vinnuvélarinnar voru ekki í réttri hæð og því er þetta slys fyrst og fremst vegna þess að báðir ökumenn voru ekki í ástandi til að vera í umferðinni og ekkert við hönnun gatnamótanna sem hefði getað komið í veg fyrir slysið.“

Meðfylgjandi mynd er úr frétt Morgunblaðsins. - JGH

Hvítu strikin sýna hvar búið er að fækka akreinum. Takið eftir að búið er að afnema vinstri akreinin sem notuð var sem beygjuakrein vinstri beyu að Skólabrú. Ljósmynd Morgunblaðsins: Eggert.

Ólafur Kr. Guðmundsson, Grafarvogsbúi og einn helsti umferðarsérfræðingur landsins. „Verið er að þrengja að umferð bíla um alla borg.“

Stórtónleikar í Grafarvogskirkju 13. nóv. til styrktar BUGL og Líknarsjóði Fjörgynjar

Mon, 13 Oct 2025 12:42:27 GMT

Lionsklúbburinn Fjörgyn í Grafarvogi á bæði heiður og hrós skilið fyrir árlega tónleika sína í Grafarvogskirkju til styrktar BUGL og Líknarsjóði Fjörgynjar. Fjöldinn allur af tónlistarfólki hefur gefið vinnu sína og lagt þessum tónleikum lið í gegnum tíðina til styrktar góðu málefni og fyrir það ber að þakka.

Að þessu sinni verða þessir glæsilegu tónleikar 13. nóvember nk. í Grafarvogskirkju og ekki er að efa að tónleikarnir verða vel sóttir. Þetta er í 21. sinn sem Lionsklúbburinn Fjörgyn heldur þessa tónleika.

Það er svo sannarlega stórskotalið tónlistarmanna sem koma fram að þessu sinni og styrkja verkefnið.

Þeir eru:

Baggalútur,

Gissur Páll Gissurarson,

Guðrún Gunnarsdóttir,

KK,

Þór Breiðfjörð,

Emmsjé Gauti,

Greta Salóme Stefánsdóttir,

Guðrún Árný Karlsdóttir,

Páll Rósinkranz.

Undirleikari: Lára Bryndís Eggertsdóttir.

Stórkostlegt tónlistarkvöld í vændum og veisla fyrir alla sem unna góðri tónlist. - JGH

Blessuð sé minning Ragnars Bjarnasonar en hann var ötull stuðningsmaður þessara tónleika og lagði þeim svo sannarlega lið með söng sínum. Tónleikarnir að þessu sinni eru þeir 21. í röðinni og er þetta verkefni Lionsklúbbnum Fjörgyn til mikils sóma.

Enn magnast klúðrið - borgarráð veitti ekki leyfi til að taka beygjuvasana af

Sat, 11 Oct 2025 19:13:51 GMT

Enn magnast klúðrið þegar horft er til mjög svo umdeildra framkvæmda borgarinnar við gatnamót Höfðabakka og Bæjarháls.

Í forstíðufrétt Morgunblaðsins í morgun (laugardag) segir að eingöngu hafi verið veitt leyfi til að skipta um umferðarljós en ekki hafi verið veitt leyfi fyrir öðrum framkvæmdum, til dæmis að taka mikilvæga beygjuvasa í burtu.

Í fréttinni segir ennfremur að framkvæmdirnar hafi hvorki verið samþykktar í borgarráði né hafi verið samþykkt að veita fjármuni til verkefnisins. Þá kemur fram að fulltrúar Sjálfstæðisflokksins í borgarráði hafa óskað skýringa á því hvers vegna ekki var óskað nauðsynlegra heimilda áður en ráðist var í útboð verksins.

„Ég hef óskað eftir áliti borgarlögmanns á því hvort það sé ekki rétt sem ég tel, að skort hafi fjárheimildir til að fjarlægja þessi hægribeygjuframhjáhlaup á gatnamótunum. Það er ekkert í beiðninni sem kom til borgarráðs sem ber þess merki að fara hafi átt í þessa framkvæmd ,“ segir Hildur Björnsdóttir, oddviti Sjálfstæðisflokksins í borgarstjórn, í samtali við Morgunblaðið.

Hún segir að aðeins hafi verið gefin fjárheimild fyrir endurnýjun umferðarljósastýringa, en ekki breytingunni sem gerð var á gatnamótunum. - JGH

Bíleigendum hefur ekki verið skemmt yfir framkvæmdum borgarinnar við Höfðabakkann og þeim stórauknu umferðartöfum sem þær hafa leitt af sér. Núna er komið á daginn að aðeins var veitt leyfi til að skipta um umferðarljós - en hvorki veitt leyfi né fjármagn til annarra framkvæmda.

„Ég er að ræða um allt önnur göng en Vegagerðin kynnir,“ segir Guðlaugur Þór

Fri, 10 Oct 2025 15:01:25 GMT

„Vegagerðin er ekki að tala um það sem ég er að tala um,“ segir Guðlaugur Þór Þórðarson þingmaður Sjálfstæðisflokksins í samtali við Morgunblaðið í morgun. En þar er hann inntur eftir viðhorfum gagnvart sjónarmiðum Vegagerðarinnar um brú fremur en göng við gerð nýrrar Sundabrautar sem tíunduð eru í umhverfismatsskýrslu sem væntanleg er frá Skipulagsstofnun.

„Göngin sem Vegagerðin er að tala um fara niður á sama stað og koma upp á sama stað en þarna er bara verið að tala um göng frá Gunnunesi að Skarfabakka,“ segir þingmaðurinn og segir um allt aðra framkvæmd að ræða. „Þeir [Vegagerðin] láta í þessu eins og þær áskoranir sem augljóslega eru uppi séu bara ekki til og eru ekkert að tala um sömu göng,“ segir Guðlaugur Þór í viðtalinu.

Ekki fer á milli mála að stóraukinn áhugi er á meðal Grafarvogsbúa að fá Sundagöng fremur en Sundabraut - enda allar líkur á að slík brú stórauki umferð um Grafarvoginn og raski þess utan mjög umhverfinu við sundin blá sem er annálað fyrrir fegurð.

Ekki verður heldur með góðu móti séð hvernig hugmynd um Sundabraut eða Sundagöng - sem liggja eingöngu að Vogahverfinu geti staðist - en umferðarþungi um Vogahverfið og Sæbrautina er þegar komin að þolmörkum.

Grafarvogur.net birti sl. vor mynd frá Guðlaugi um hugmyndir hans varðandi Sundagöng sem lægju frá Kollafirði og kæmu upp á ýmsum stöðum. .

Við endurbirtum hér þessa mynd frá Guðlaugi.

Hugmynd Guðlaugs Þór af Sundagöngum - allt annarri útfærslu og hugmynd en Vegagerðin er með í huga. Stóraukinn áhugi sýnist núna hjá Grafarvogsbúum að fá Sundagöng fremur en Sundabraut.

Guðlaugur Þór segir ennfremur í viðtalinu við Morgunblaðið að einhver verði að svara því hvernig Sæbrautin, sem beri ekki þá umferð sem nú fer um hana, geti borið meiri umferð.

„Það eru margir gallar við að setja tvær hraðbrautir gegnum eitt hverfi,“ segir hann, „þú verður að hleypa Mosfellingum, fólki í Úlfarsárdal og fólki í Grafarholti í Sundatenginguna og þú gerir það ekki öðruvísi en að gera það sem sagt er að ekki verði gert – að tvöfalda Hallsveginn eða leggja aðra umferðaræð í gegnum Grafarvoginn.“

Hann bætir því við að sú umferðaræð muni þvera Geldinganes sem rýri mjög verðgildi þess og lífsgæði þeirra sem þar eigi að búa.

„Þetta svæði er á stærð við Seltjarnarnes og ég held að allir átti sig á því að Seltirningar yrðu ekkert rosalega ánægðir með að fá hraðbraut í gegn hjá sér. Þegar Vegagerðin er að segja að hún vilji ekki göng er hún að tala um allt önnur göng, hún er bara að tala um þverunina frá Gufunesi yfir í Sundahöfn.“ - JGH .

Hugmyndir Guðlaugs Þórs um ný Sundagöng eru allt aðrar en þau göng sem Vegagerðin er með í huga.

Dóra Björt kaupir parhús í Grafarvogi - og með bílskúr og stóru bílaplani

Fri, 10 Oct 2025 09:30:40 GMT

Hugsanlega er Dóra Björt Guðjónsdóttir, borgarfulltrúi og oddviti Pírata, að mildast varðandi hinn bíllausa lífsstíl sem hún hefur barist svo fyrir. Smartland Morgunblaðsins sagði frá því í vikunni að hún hefði keypt glæsilegt parhús í Grafarvogi og því fylgdi góður bílskúr og fyrir utan húsið væri stórt bílaplan.

Er ekki bara fyllsta ástæða til að bjóða Dóru Björt velkomna í Grafarvoginn og vonandi öðlast hún meiri skilning á mikilvægi bílsins fyrir fjölskyldufólk í önn dagsins? Ólafur Egilsson leikari hefur nefnt bílinn „úlpu Íslendingsins“ .

Hér má sjá svar mitt í Vísi hinn 3. júní í sumar við grein Dóru Bjartar á sama vettvangi þar sem hún fjallaði um mikilvægi þéttingu byggðar í Grafarvogi.

Núverandi meirihluti í borgarstjórn hefur lagt mikla áherslu á bíllausan lífsstíl og er með áform um að Keldnalandið verði fyrir aðra en bíleigendur.

Í hugmyndum meirihlutans er gert ráð fyrir 12 þúsund íbúum, 5.880 heimilum og 2.230 bílastæðum. En nóta bene; bílastæðin verða ekki fyrir utan heimilin heldur þurfa þeir íbúar sem eiga bíl að samnýta 8 bílastæðahús í Keldnalandinu og ganga þaðan til síns heima. (Sjá hér frétt Grafarvogur.net)

Ennfremur er gert ráð fyrir að takmarka umferð bíla um götur Keldnalandshverfisins sem mest. Þá er gert ráð fyrir að 6 þús. manns vinni í hverfinu en fáir vita hins vegar hvar þeir eiga að leggja bílum sínum.

Keldnalandið gengur allt út á borgarlínuna - og sala á lóðum þar eiga að fjármagna hana að hluta.

Hinn þekkti arkitekt, Hilmar Þór Björnsson, skrifaði nýlega á Facebook þar sem hann orðaði það svo að skipulagið í Keldnalandi væri einhvers konar „case study“ (námsverkefni í skóla) þar sem leitað væri að fullkomnun en án alls raunveruleika. - JGH

Hér má sjá svar mitt við grein Dóru í Vísi fyrr í sumar, eða 3. júní sl.

Hluthafaspjallið í teikningu Aðalsteins Jörgensen

Thu, 09 Oct 2025 16:08:46 GMT

HLUTHAFASPJALL ritstjóranna. Hún er skemmtileg teikningin sem Aðalsteinn Jörgensen bridgesnillingur gaf félaga mínum í Hluthafaspjalli ritstjóranna, Sigurður Má Jónssyni , í afmælisgjöf. Að sjálfsögðu notuðum við þessa mynd þegar við sögðum frá nýjasta þætti okkar á samfélagsmiðlunum. Í seinni hluta þáttarins kom góður gestur í heimsókn, Helgi Vífil Júlíusso n, hlutabréfagreinandi hjá IFS/Reitun.

Á meðal þess sem við Siguður Már ræddum um var þetta:

1. Verður hausthækkunin í Kauphöllinni að þessu sinni?

2. Amaroq fær byr í seglinn og félagið er að verða lykill að námagreftri á Grænlandi.

3. Verð á gulli er komið yfir 4 þús. dollara únsan.

4. Óbreyttir stýriextir; 7,5% í 4,2% verðbólgu.

5. Neikvæður hagvöxtur sl. 4 ársfjórðunga af síðustu 7 ársfjórðungum.

6. Ætti frekar að tala um kulnun atvinnulífsins fremur en kólnun því bjartsýni stjórnenda innan atvinnulífsins hefur hrunið frá því ríkisstjórnin tók við?

7. Gengi hlutabréfa Íslandsbanka og Skaga hefur ekkert breyst þótt viðræður um samruna standi yfir.

8. Seðlabanki og Fjármálaráðuneyti hafa ekki gengið í sömu átt að undanförnu en nú er gefið í skyn að leiðir liggi frekar saman. Er það vegna óbreyttra stýrivaxta og aukinnar skattheimtu ríkisstjórnarinnar - og það á meðan nánast enginn hagvöxtur hefur verið frá síðasta ársfjórðungi 2023? Það ríkir stagflation (stöðnun en á sama tíma verðbólga).

9. Oculus er að snarhækka með auknum líkum á milljarða dollara tekjum. Jafnframt aukast líkur á að stórir sjóðir og fjárfestar sýni fyrirtækinu áhuga - meðal annars með yfirtöku.

10. Bandaríski markaðurinn í hæstu hæðum og það vekur athygli að verð á gulli og hlutabréfum eru á sama tíma að toppa. Sífellt fleiri farnir að tala um froðu og að verðfall geti orðið á næstunni. Eru gervigreindin og nýleg vaxtalækkun ofmetin?

11. Það var skrítið að reglugerð Eyjólfs Ármannssonar innviðarráðherra eftir fall Play væri afturvirk.

12. Umræður um tap lífeyrissjóða vegna Play eru að því leyti sérstakar að gengi bréfa í félaginu var löngu fallið og sjóðirnar búnir að afskrifa hluti sína í félaginu.

Svo var auðvitað gaman að félagi minn og vinur, Sigurður Már, fengi þessa stórskemmtilegu teikningu í afmælisgjöf þar sem hlaðvarpið okkar kemur ánægjulega við sögu. - JGH

Borgarfulltrúar ekki upplýstir um lykilgögn varðandi Höfðabakkann

Mon, 06 Oct 2025 10:28:59 GMT

Það er vert að vekja athygli á því að borgarfulltrúar voru ekki upplýstir um lykilgögn varðandi framkvæmdir við fimm gatnamót við Höfðabakkann - en Grafarvogur.net hefur verið í fremstu röð fjölmiðla við að upplýsa Grafarvogsbúa um þessar framkvæmdir.

Á meðal lykilgagna - sem leynt var fyrir borgarfulltrúunum - er greiningarskýrsla verkfræðistofunnar Cowi (áður Mannvit) en í henni kemur fram að sú leið sem valin var við gatnamót Höfðabakka og Bæjarháls myndi lengja biðraðir og ferðatíma.

Augljóslega er verið að þrengja að umferð bíla með þessum framkvæmdum en umferð gangandi og hjólandi eru í engu hlutfalli við hinn mikla þunga bílaumferðar á svæðinu. Höfðabakkinn er aðalumferðaræðin inn í Grafarvog.

Í Morgbunblaðinu sl. laugardag var frétt um svar Samgöngustofu við spurningu blaðsins varðandi slys við Höfðabakkann. Þess má geta að Ólafur Guðmundsson , Grafarvogsbúi og einn helsti umferðarsérfræðingur landsins, vann fyrir rúmum tíu dögum mikla úttekt fyrir Grafarvog.net um fjölda slysa við Höfðabakkann - og voru slys á gangandi og hjólandi sérstaklega skoðuð. Sjá þá stórfróðlegu úttekt hér.

Í frétt Morgunblaðsins segir að framkvæmdirnar við hin fimm gatnamót við Höfðabakka hafi verið teknar fyrir og samþykktar á fundi umhverfis- og skipulagsráðs 26. mars 2025 og voru lykilgögn ekki lögð fyrir ráðið, eins og skýrsla Cowi.

Frétt Morgunblaðsins sl. laugardag um framkvæmdirnar við fimm gatnamót við Höfðabakkann.

Morgunblaðið ræðir við Kjartan Magnússon , borgarfulltrúa Sjálfstæðisflokksins, vegna fréttarinnar um slysatölur og þetta hafði hann að segja:

„Þetta sýnir hvað það var mikið óþurftarverk að loka þessum beygjuakreinum, vegna þess að það var ekkert beinlínis sem kallaði á að þeim yrði lokað.“

Hann bætir við að það sé sjálfsagt að gera gatnamótin öruggari fyrir þá fáu sem þar fara gangandi yfir og það sé hægt án þess að loka beygjuakreinum.

Hann gagnrýnir líka stjórnendur Reykjavíkurborgar fyrir að hafa ekki kynnt borgarfulltrúum skýrslu Cowi sem unnin var fyrir borgina fyrr en eftir að framkvæmdir hófust. - JGH

Kjartan Magnússon, borgarfulltrúi Sjálfstæðisflokksins, hefur verið ötull við að gagnrýna framkvæmdirnar við Höfðabakka - sérstaklega gatnamótin við Höfðabakka og Bæjarháls.

Ragnar bjó í Grafarvogi áður en hverfið var byggt - hann kom að „bombu ársins“ 1992

Sun, 05 Oct 2025 12:32:19 GMT

Ragnar Tómasson lögfræðingur sem lést sl. sunnudag, 28. september, 86 ára að aldri, var frumbyggi í Grafarvogi og bjó hér áður en borgin skipulagði hverfið. Grafaravogur var þá í rauninni bara sveit í nágrenni höfuðstaðarins. Heimili Ragnars í Grafarvogi nefndist Dofri og var lengi skráð við Vesturlandsveg - eða þar til árið 1997 að byggingarfulltrúi borgarinnar samþykkti að húseignin yrði skráð sem Dofri við Leiðhamra.

Grafarvogur.net vottar fjölskyldu Ragnars samúð sína en eiginkona Ragnars, Dagný Ólafía Gísladóttir, lést árið 2016.

Ragnar var um árabil einn af kunnustu lögmönnum innan viðskiptalífsins og kom að sölu og samruna ýmissa fyrirtækja.

Sú sala sem hann kom að og vakti eflaust mesta athygli var árið 1992 þegar Hakaupsfjölskyldan keypti öllum að óvörum helminginn í Bónus af þeim feðgum, Jóhannesi Jónssyni og Jóni Ásgeiri Jóhannessyni. En um þá sölu skrifaði undirritaður meðal annars fréttaskýringu í Frjálsa verslun á sínum tíma þar sem aðdragandi kaupanna var rakinn.

Fréttaskýring Frjálsrar verslunar um það þegar Ragnar kom að kaupum Hagkaupsfjölskyldunnar á helmingshlut í Bónusi árið 1992 en gífurleg samkeppni var á milli fyrirtækjanna og komu kaupin flatt upp á alla.

Halda má því fram að þessi kaup Hagkaupsfjölskyldunnar í Bónus fyrir tilstuðlan Ragnars hafi markað dýpri spor og haft meiri áhrif í verslunarsögu Íslendinga en menn grunaði 1992 því sex árum síðar, eða í júní árið 1998, féll enn stærri bomba þegar Bónusfeðgar keyptu Hagkaup af Hagkaupsfjöldunni með aðstoð Kaupþings og Fjárfestingarbanka atvinnulífsins. Úr varð fyrirtækið Baugur sem skráð var á íslenskan hlutabrérfamarkað.

Ekki er vitað til að Ragnar hafi komið að þeirri hugmynd en vissulega var komið á samstarf þarna á milli sex árum áður.

Í þessum óvæntu kaupum á Hagkaupum var Kaupþing með 37,5% hlut, Fjárfestingarbanki atvinnulífsins 37,5% og Gaumur, félag Bónusfeðga, 25%.

Þessi viðskipti urðu upphafið að sögu Baugs Group.

Þá skal þess getið að Ragnar var mjög þekktur hestamaður og áhugamaður um hesta - og þekkti Þorgeir Jónsson, eða Geira í Gufunesi, bónda, hestamann og þá miklu þjóðsagnarpersónu þess tíma, mjög vel.

Útför Ragnars fer fram frá Grafarvogskirkju fimmtudaginn 16. október klukkan 13. - JGH

Ragnar Tómasson, f. 30. jan. 1939, d. 28. sept. 2025. Svo sannarlega frumbyggi í Grafarvoginum og með allra þekktustu lögmönnum innan viðskiptalífsins um árabil.

Stórfróðleg umfjöllun um Amaroq og viðtal vð Eld forstjóra félagsins í Hluthafaspjallinu

Thu, 02 Oct 2025 16:23:38 GMT

HLUTHAFASPJALL ritstjóranna. Eldur Ólafsson, forstjóri og stofnandi Amaroq, mætti í Hluthafaspjall ritstjóranna, hlaðvarps okkar Sigurðar Más Jónssonar, að þessu sinni.

Námuvinnslufyrirtækið Amaroq hefur nú verið þrjú ár í kauphöllinni og er án efa eitt af mest spennandi og um leið óvenjulegustu félögum kauphallarinnar. Jarðfræðingurinn Eldur fer í þættinum yfir upphaf félagsins og hvað varð til þess að hann fór inn í Grænland en áður átti hann áhugaverðan feril þar sem hann kom að jarðhitauppbyggingu í Kína.

Eldur segir í viðtalinu við Sigurð Má að gríðarleg tækifæri á Grænlandi og ef rétt sé haldið á spilum sé þar að finna eitt stærsta tækifæri íslensks viðskiptalífs. Á Grænlandi séu að skapast mörg tækifæri til að taka þátt í þeirri miklu uppbyggingu sem er framundan þar.

Landið er nú í hringiðu alþjóðlegrar athygli en náttúruauðlindir landsins eru miklar og ónýttar. Eldur fer yfir rekstur og framtíðarsýn félagsins en hann segir það vel fjármagnað og með traustan hluthafahóp. Námugröftur á Grænlandi kallar á mikla innviðauppbyggingu þar í landi og Amaroq er í einstakri stöðu til að stýra því. - JGH

Klúður við gatnamót Víkurvegar og Þúsaldar - auðvelt að laga til að liðka til fyrir umferðinni

Mon, 29 Sep 2025 17:24:49 GMT

Það er ekki bara við Höfðabakkann sem augljóst klúður blasir við í umferðinni og mannvirkjum. Þannig má gera miklu betur við gatnamót Víkurvegar og Þúsaldar í Grafarholti.

Það hefur lengi vakið athygli hvað miklar tafir eru þegar ekið er niður Víkurveginn og beygt til hægri inn Þúsöldina. Þannig teppa tveir bílar sem bíða við ljósin - og ætla áfram inn Reynisveginn - alla umferð í Þúsöldina þar sem beygjuvasinn er svo nálægt gatnamótunum.

Þetta væri auðvelt að laga með því að lengja beygjuvasann eða koma með útskot fyrir hægri beygjuna mun ofar við Víkurveginn - færa þá gangbrautina aðeins til hægri.

Þannig má til dæmis sjá að ökumenn eru byrjaðir að aka yfir kantinn til að komast upp í Þúsöldina - og þá með tilheyrandi brölti og jafnvel skemmdum á bílum sínum.

Þetta sést á meðfylgjandi myndum sem dyggur lesandi vefmiðilsins sendi Grafarvogi.net vegna þessa máls.

Víða er hægt að liðka til fyrir umferð bíla án mikils tilkostnaðar - og hér er augljóst dæmi um það. - JGH

Hér má sjá hvernig óþreyjufullir ökumenn á leið inn Þúsöldina í Grafarholti aka yfir kantinn þar sem ekki þarf nema tvo bíla til - sem bíða við ljósin og eru á leiðinni inn Reynisveg - til að teppa alla umferð í Þúsöldina.

Þessi loftmynd sýnir stöðuna vel - ökumenn aka yfir kantinn þar sem ekki þarf nema tvo bíla til - sem bíða við ljósin á leið inn Reynisveg - til að teppa alla umferð inn í Þúsöldina.

Ólafur fer hér yfir sögu slysa við Höfðabakkann sl. 10 ár - ekkert réttlætir þrengingarnar

Thu, 25 Sep 2025 21:50:00 GMT

Ólafur Guðmundsson, Grafarvogsbúi og einn helsti umferðarsérfræðingur landsins , fer hér yfir sögu slysa við Höfðabakkann síðastliðin tíu ár fyrir Grafarvog.net. Hann segir ekkert slys á hjólandi og gangandi vegfarendum réttlæta þær þrengingar sem borgin hafi farið í við Höfðabakkann heldur muni þrengingarnar frekar fjölga slysagildrum en að fækka þeim.

Myndirnar sýna glöggt hvað miklu fleiri slys verða í árekstrum bíla en óhöppum í tengslum við óvarða vegfarendur, þ.e. hjólandi og gangandi.

„Mesta slysahættan er auðvitað ef reglur eru ekki virtar og farið er yfir á rauðu. Það er hins vegar ekki mannvirkjunum að kenna,“ segir Ólafur.

Ekkert þessara slysa á gangandi og hjólandi má rekja til þeirra umferðareyja sem nú hafa verið stækkaðar eða þeirra beygjuvasa sem hafa verið lagðir af. - JGH

Hér er fyrsta yfirlitsmyndin. Grænt = slys með ltilum meiðslum. Gult = slys með miklum meiðslum. Eins og sjá má eru langflest slysin í árekstrum bíla. Dálkurinn til hægri sýnir ÓVARÐA - meiðsli á hjólandi og gangandi vegfarendum við öll gatnamót Höfðabakkans sl. tíu ár.

Við byrjum svo hér að neðan með MYND 2 sem er við gatnamót Höfðabakka og Stórhöfða en þar hafa miklar þrengingar dregið verulega úr sjónsviði þeirra sem aka niður Höfðabakkann og beygja til vinstri inn Stórhöfðann.

------------------------

MYND 2. HÖFÐABAKKI-STÓRHÖFÐI

MYND 2. HÖFÐABAKKI- STÓRHÖFÐI sl. tíu ár. ÓVARÐIR. EKKERT SLYS á gangandi og hjólandi vegfarendum - sem betur fer. Öll slysin eru hins vegar bílslys við gatnamótin en engu að síður hefur borgin ákveðið að þrengja verulega að umferðinni við þessi gatnamót, stækka umferðareyjar og þrengja sjónsvið bílstjóra verulega við þessi einhver fjölförnustu gatnamót landsins.

---------------------------

MYND 3.

MYND 3. HÖFÐABAKKI-DVERGSHÖFÐI. ÓVARÐIR. ÞRJÚ SLYS.

1) Grænn punktur. (Lítil meiðsl). Ekið á fótgangandi á gangbraut. Ekki lögleg gangbraut; þ.e. sebrabraut.

2) Gulur punktur. (Alvarlegt slys.) Ekið á fótgangandi á gangbraut - á ljósum. (Annar hvor fór yfir á rauðu).

3) Grænn punktur. (Lítil meiðsl). Hópferðabifreið ók á fótgangandi stúlku við stætóstoppistöð.

---------------------

MYND 4.

MYND 4. HÖFÐABAKKI-BÍLDSHÖFÐI. ÓVARÐIR. TVÖ SLYS. Ekki alvarleg meiðsl.

1) Græni punkturinn til vinstri. Ekið á fótgangandi á gangbraut á ljósi. (Annar hvor fór yfir á rauðu).

2) Græni punkturinn til hægri. Ekið á gangandi sem var á leið þvert yfir akbraut.

-------

MYND 5.

MYND 5. HÖFÐBAKKABRÚ-VESTURLANDSVEGUR. ÓVARÐIR. TVÖ SLYS. Ekki alvarleg meiðsl.

1) Græni punkturinn (lítil meiðsl) til vinstri. Ekið á hjólreiðamann á gangbraut á ljósum. (Annar hvor fór yfir á rauðu).

2) Græni punkturinn (lítil meiðsl) til hægri inni á bílaplani. Ekið á fótg. á bílaplaninu og því utan akbrautar.

----

MYND 6.

MYND 6. HÖFÐABAKKI-BÆJARHÁLS. ÓVARÐIR. ÞRJÚ SLYS.

1) Guli punkturinn (Alvarlegt slys). Lengst til vinstri. Ekið á hjólreiðamann á akbraut; ath. ekki gangbraut og ekki við gatnamótin.

2) Grænn punktur. (Lítil meiðsl). Ekið á hjólreiðamann á gangbraut - á ljósum. (Annar hvor fór yfir á rauðu).

3) Grænn punktur. (Lítil meiðsl). Fall af reiðhjóli. Bíll ekki valdur að slysinu.

Þessir tveir grænu punktar liggja nokkurn veginn saman á myndinni.

Flest slysin við Höfðabakkann í árekstrum bíla - þrengingarnar munu fjölga árekstrum

Thu, 25 Sep 2025 21:36:51 GMT

Ólafur Guðmundsson, Grafarvogsbúi og einn þekktasti umferðarsérfræðingur landsins , segir í samtali við Grafarvog.net eitt slys í umferðinni sé einu slysi of mikið. „Við viljum ekki sjá nein meiðsli á fólki - hvort sem fólk er í bílum, á hjóli eða gangandi,“ segir hann og telur að mjög svo umtalaðar þrengingar við Höfðabakkann, sem ætlað er að minnka slysahættu gangandi og hjólandi, hafi því miður þveröfug áhrif og fjölgi árekstrum bíla en þar hefur slysahættan verið talsverð.

Þess utan sé umferð hjólandi og gangandi ekki í neinu hlutfalli við þá gífurlegu umferð bíla sem fer um Höfðabakkann og áherslan ætti því að vera að liðka til fyrir umferð bíla og auka öryggið þar.

„Meiðsli á fólki í umferðarslysum við Höfðabakkann síðustu tíu árin eru langflest vegna árekstra bíla,“ segir Ólafur og bætir við að

engin slys hafi orðið á óvörðum vegfarendum , þ.e. hjólandi og gangandi, við gatnamót Höfðabakka og Stórhöfða, eða við Bæjarháls og Höfðabakkabrú, sem réttlæti þessar þrengingar.

FRÓÐLEGT VIÐTAL VIÐ ÓLAF Í BÍTINU

„Það hefur - sem betur fer - ekki orðið eitt einasta slys á gangandi eða hjólandi í beygjuvösum sem verið er að leggja af og skapa núna þetta mikla umferðaröngþveiti sem íbúar í Garfarvogi, Breiðholti og ekki síst Árbæ hafa orðið vitni að,“ segir Ólafur.

„Mesta slysahættan er auðvitað ef reglur eru ekki virtar og farið er yfir á rauðu. Það er hins vegar ekki mannvirkjunum að kenna.“

Mjög fróðlegt viðtal var við Ólaf í Bítinu á Bylgjunni í morgun vegna framkvæmdanna við Höfðabakkann. Hægt er að hlusta á það hér .

Grafarvogur.net hefur fjallað um þessar framkvæmdir undanfarnar vikur og málið er orðið sjóðandi heitt hjá öllum fjölmiðlum og var t.d. mjög athyglisverð mynd af gatnamótum Höfðabakka og Bæjarháls á forsíðu Morgunblaðsins í morgun.

Höfðabakkamálið er orðið sjóðandi heitt hjá fjölmiðlum. Hér er forsíðumynd Moggans í morgun.

Ólafur segir ennfremur að í ljósi alls þessa sé það öfugsnúið að koma núna með þrengingar sem auka slysahættuna þar sem hún er mest fyrir.

„Markmiðið er auðvitað að líta á málið í heild,“ segir Ólafur. „Við viljum ekki sjá nein meiðsli á fólki - hvort sem fólk er í bílum, á hjóli eða gangandi. Það er nú þannig að hjólandi og gangandi líta oft svo á þeir eigi meiri rétt í umferðinni - en svo er ekki; þeir eru ekki rétthærri en þeir sem aka um á bílum eða eru í hópferðabílum - nema auðvitað við löglegar gangbrautir; svonefndar sebrabrautir en þær eru ekki í beygjuvösunum,“ segir Ólafur. - JGH

Hin margumtöluðu gatnamót Höfðabakka og Bæjarháls.

Kaup Brims á Lýsi - meira en væn skeið af lýsi

Thu, 25 Sep 2025 16:36:10 GMT

HLUTHAFASPJALL ritstjóranna. Ein eftirtektaverðustu fyrirtækjakaup ársins áttu sér stað þegar Brim hf. keypti allt hlutafé Lýsis hf. fyrir samtals 30 milljarða króna.

Við félagarnir Sigurður Már Jónsson förum yfir þessi kaup í nýjasta þætti Hluthafaspjalls ritstjóranna, hlaðvarpsþætti okkar á Brotkast.is

Við förum yfir kaupin, aðdragandann, sögu félagsins og hvaða áhrif hækkun veiðileyfagjalda hefur á söluna.

Kaupverðið mun skiptast jafnt í reiðufé og hlutabréf í Brim hf. Frá heildarverðmæti hlutafjár dragast vaxtaberandi skuldir Lýsis hf. sem námu rúmum 5,2 milljörðum króna þann 30. júní 2025.

Fréttir voru af því að um skeið hefðu menn skoðað möguleika á að skrá Lýsi í Kauphöllina en að endingu lagði Brim fram tilboð sem ekki var hafnað.

Erlendir aðilar höfðu áhuga en það er fagnaðarefni að félagið verði áfram í íslenskri eigu. Um leið styrkist hluthafahópur Brims og kaupin styrkja hráefnisstöðu Lýsis og færa Brim lengra upp virðiskeðju sjávarafurða. - JGH

Hér má sjá klippu af spjalli okkar Sigurðar Más Jónssonar um kaup Brims á Lýsi.

Grafarvogur.net í sjónvarpsfréttum Sýnar vegna Höfðabakkans

Sat, 20 Sep 2025 19:35:10 GMT

Grafarvogur.net var í fréttum Sýnar í gærkvöldi, föstudagskvöldið 19. sept., vegna umfjöllunar um þrengingarnar við Höfðabakkann. Bjarki Sigurðsson, fréttamaður Sýnar, tók málið fyrir og ræddi við undirritaðan sem ritstjóra og útgefanda Grafarvogs.net sem og íbúa í Grafarvogi. En einnig er umfjöllun um málið á Vísi.net

Hér má sjá fréttina á Vísi - sem og viðtalið á Sýn. - JGH

Horfðu til himins!

Sat, 20 Sep 2025 16:04:00 GMT

Horfðu til himins er eitt þekktasta lag hljómsveitarinnar Nýdönsk. Horfðu til himins og berðu höfðuð hátt, kyrja þeir félagar af krafti.

Fallegur var hann himinninn í kvöldkyrrðinni í gærkvöldi og fyllsta ástæða til að líta upp til hans og njóta dásemdarinnar.

Nokkrar myndir frá því í gærkvöldi þar sem horft var til heimsins og á hinn tæra bláa lit himinhvolfsins. - JGH

Þetta sérstaka skýjafar læddist yfir Grafarvoginn í gærkvöldi og hafði yfir sér bláan tón.

Hann var tær hinn blái litur himinhvolfsins í gærkvöldi.

Horfðu til himins og berðu höfuðið hátt.

Kyrrðarstund að kveldi.

Þekktur arkitekt: Er skipulagið í Keldnalandi leit að fullkomnun en án veruleika?

Thu, 18 Sep 2025 11:59:28 GMT

Hinn þekkti arkitekt, Hilmar Þór Björnsson , skrifar athyglisverða grein á FB í gær um Keldnalandið og þá niðurstöðu sem fékkst úr samkeppni á skipulagi landsins ( sjá hér ) og birt var haustið 2023. Yfirskrift greinarinnar er hvort Keldnalandið sé „case study“ (þ.e. verkefni í kennslu) og hvort skipulagið sé leit að fullkomnun en án þess veruleika sem við Íslendingar búum við.

Miklar umræður urðu í gær eftir að sagt var frá því að í skipulagi Keldnalands væri þjarmað að einkabílnum til að vegur Borgarlínunnar yrði meiri. Gert væri ráð fyrir um 12 þúsund íbúum, 5.880 heimilum - en aðeins 2.230 bílastæðum . Stæðin verða þess utan ekki fyrir utan heimilin heldur í 8 samnýttum bílastæðahúsum. Stæði fyrir fatlaða verða leyfð fyrir utan íbúðir.

Hér kemur færsla Hilmars Þórs:

„Nú eru rétt tvö ár síðan niðurstaða fékkst úr samkeppni um skipulag á Keldnalandi. Fólk var almennt ánægt með niðurstöðuna og sérstaklega ásýnd skipulagsins.

Húsin voru, eins og í eldri hverfum Reykjavíkur, á vissan hátt ósamstæð, þau voru af mismunandi gerðum og hæðum. Það voru mismunandi þök á húsunum og efnisáferð með mismunandi hætti. Nokkurn vegin eins og við þekkjum í gömlu Reykjavík innan Hringbrautar.

Um var að ræða randbyggð en með öðrum hætti en á Valssvæðinu sem er með lokuðum innigörðum og skuggalegum götum.

Þarna var lagt upp með „mjúka borg“ (Soft City) í anda Jan Gehl, Gordon Cullen og David Sim . Þvert á hörðu borgina sem við þekkjum af þéttingarsvæðum á Hlíðarenda, Heklureit eða Vesturvin , svo dæmi sé tekið. Húsin voru grunn og með stuttum húsalengdum og ýmsum smáatriðum sem er forsenda fyrir góðu göngu umhverfi.

Þetta var góður grunnur til þess að vinna áfram og tengja núverandi veruleika.

„CASE STUDY“

Nú eru liðin tvö ár og ástandið i húsnæðismálum annað og verra en það var þegar úrslit samkeppninnar lá fyrir og skipulagið er enn í vinnslu og jafnvel fjarlægst veruleikanUm og tímalínan lengst verulega.

Ljóst er að skipulagið lítur til langrar og óvissrar framtíðar þegar horft er til samgangna. Þarna er gert ráð fyrir að eigöngu 32% noti einkabíl sem lagt er i bílastæðahúsum. Þetta samsvarar því að eitt bílastæðahús sé fyrir allt Hagahverfið. Þarna verða um sex þúsund atvinnutækifæri og 5.800 íbúðir sem aðeins 2.230 bifreiðastæði eiga að þjóna.

Og það verður allt að sjö mínútna gangur að bílastæðum hverfisins að heimilum fólks sem ibúar þurfa að ganga með innkaupapokana og barn á handleggnum. Svo maður nefni ekki hreyfihamlaða, aldraða eða pizzusendla.

Maður spyr sig hvort nú sé rétti tímin til þess að raungera þessa framtíðarsýn. Er þessi tillaga ekki of snemmt komin fram? Hentar hún þvi þjóðfélagi sem við kjósum okkur flest árið 2025? Hættum við að heimsækja aldrað ættingja? Hættum við að spila golf eða fara á skíði? Verða sunnudagsbíltúrar aflagðir og göngutúrar i Heiðmörk? Og hvað með sumarbústaðaferðir þar sem oft þarf mikinn farangur.

Og forsenda skipulagsins er að Borgarlínan verði komin i fullan rekstur áður en fólk flytur inn. Líklega er áratugur þar til Borgarlínan, verði komin i rekstur. Getum við beðið eftir því? Minnt er á að sala Keldnalandsins átti að fjármagna Borgarlínuna að mestu.

Þegar ég horfi á Keldnaskipulagið nú eftir tveggja ára vinnslu finnst mér það bera einkenni „Case Study“ eða skóla/kennsluefnis. Þarna er leitað að hinu fullkomna skipulagi en litið framhjá þeim veruleika sem blasir við þar sem strax þarf íbúðir sem fólk hefur efni á að kaupa.“ - JGH

VERULEIKAFIRRING. Keldnalandið. 12 þúsund íbúar. 5.880 heimili . 2.230 samnýtt bílastæði í 8 bílastæðahúsum. Engin stæði fyrir utan heimili. Umferð bíla lokuð á ýmsum götum í hverfinu. Bíleigendur þurfa að finna út hvort það séu laus stæði í bílastæðahúsunum. Verulegur gangur frá bílastæðahúsunum að heimilum - sem og að þremur stoppustöðvum borgarlínunnar sem allt skipulag hverfins virðist ganga út á.

Þrengingar gatnamóta við Höfðabakka - forvarnir eða stóraukin slysahætta?

Thu, 18 Sep 2025 10:56:54 GMT

Þrengingar gatnamóta við Höfðabakka standa yfir þessa dagana - og sitt sýnist hverjum. Eru þetta forvarnir fyrir gangandi vegfarendur eða stóraukin slysahætta vegna þeirrar miklu bílaumferðar um þessa aðalæð inn í Grafarvoginn?

Þegar Grafarvogur.net var þarna á ferð í gær að skoða aðstæður kom mest á óvart hve miklar þrengingarnar eru en lauslega slegið á þetta nema þær um 80-100 cm í beygjuakreinunum við gatnamót Höfðabakka og Stórhöfða.

Rökin fyrir þessum þrengingum á kostnað bílaumferðarinnar er að auka öryggi gangandi vegfarenda og hjólreiðarmanna. En hversu mikið eykst öryggi þeirra við þetta? Hversu réttlætanlegt er að stórauka hættuna á árekstrum bíla við gatnamótin með því að færa eyjuna verulega fram og þrengja beygjuakreinina svo mikið og það þrengir sjónsvið ökumanna mjög sem ætla að beygja af Höfðabakkanum og inn á Stórhöfðann?

Einnig er verið að þrengja gatnamótin fyrir ofan, við Höfðabakka og Dvergshöfða, með svipuðum hætti og í sama tilgangi. Þá finnst mörgum sem ljósin séu ekki lengur samstillt á Höfðabakkanum niður í Grafarvog. - JGH

Hér sést vel hve þrenging beygjuakreinarinnar við gatnamót Höfðabakka og Stórhöfða er mikil. Forvarnir eða er verið að búa til stóraukna slysahættu vegna gífurlegrar bílaumferðar við þessi gatnamót?

Eyjan er ekki aðeins breikkuð verulega heldur skagar hún núna verulega fram í gatnamótin þannig að sjónsvið ökumanna sem eru að beygja af Höfðabakka inn á Stórhöfða skerðist verulega.

Við gatnamót Höfðabakka og Dvergshöfða. Umferðareyja bæði breikkuð lítillega og skagar núna meira inn í beygjuakrein þeirra sem koma frá Dvergshöfða og beygja inn á Höfðabakkann. Sem og auðvitað þerra sem beygja til vinstri inn Dvergshöfðann.

Hér er sömuleiðis búið að framlengja eyjuna umtalsvert.

Framkvæmdirnar við Höfðabakkann þessa dagana vekja mikla athygli Grafarvogsbúa sem spyrja sig hvort verið sé að auka slysahættuna við þessi gatnamót í stað þess draga úr henni.

Svo virðist sem umferðarljósin séu ekki lengur samstillt niður í Grafarvog og að bæði þurfi að bíða á rauðu ljósi við Dvergshöfðann og svo aftur nokkrum sekúndum síðar við Stórhöfðann. Niðurstaða; miklu minna flæði umferðarinnar frá því sem var áður.

Ganga þeir í sitt hvora áttina?

Wed, 17 Sep 2025 12:37:55 GMT

HLUTHAFASPJALL ritstjóranna. Það er jafnan komið víða við í hlaðvarpi okkar Sigurðar Más Jónssonar á Brotkast.is - Hluthafaspjalli ritstjóranna . Í nýjasta þætinum ræðum við um fjárlagafrumvarpið og hvernig báknið heldur áfram að þenjast út.

Fjárlagafrumvarpið gerir ráð fyrir 123 milljarða aukningu ríkisútgjalda á næsta ári - sem og að hækka eigi skatta á fólk og fyrirtæki um 28 milljarða . Vandamálið sem blasir við í efnahagslífinu er að við búum við verðbólgu og háa vexti á sama tíma og það er enginn hagvöxtur. (Stagflation=Stöðnun/verðbólga á sama tíma).

Á síðustu sjö ársfjórðungum frá fjórða ársfjórðungi 2023 hefur hagvöxtur verið neikvæður í fimm skipti.

Helsta markmið ríkisstjórnarflokkanna í síðustu kosningum var að ná niður verðbólgunni ( nota sleggjuna til þess ) og þar með ná niður vöxtum. Ef það er ennþá helsta markmiðið þá virðast Seðlabankinn og fjármálaráðuneytið ganga í sitt hvora áttina.

Seðlabankinn (peningastefnan) er á bremsunni með háa vexti til að ná niður verðbólgu á meðan ríkisstjórnin (fjárlagastefnan, ríkisfjármálin) er á bensíngjöfinni með stórauknum ríkisútgjöldum og fjárlagahalla sem auka á þensluna. - JGH

Hér má sjá örlítið brot af spjalli okkar félaganna um frumvarpið: https://www.youtube.com/watch?v=FFlFKPpkebw

Á síðustu sjö ársfjórðungum frá fjórða ársfjórðungi 2023 hefur hagvöxtur verið neikvæður í fimm skipti. Við búum við stöðnun og verðbólgu á sama tíma.

Örlítið brot af samtali okkar um fjárlagafrumvarpið og hvernig báknið blæs áfram út.

Engin leyfð bílastæði við íbúðir í Keldnalandi - íbúar eiga að nota átta samnýtt bílastæðahús

Wed, 17 Sep 2025 10:33:13 GMT

Mjög athyglisverð frétt er í Morgunblaðinu í dag um skipulag Keldnalands og hvernig þjarmað er að einkabílnum til að vegur Borgarlínunnar verði meiri. Gert er ráð fyrir um 12 þúsund íbúum í 5.880 íbúðum í Keldnalandi - en aðeins 2.230 bílastæðum. Þau verða að vísu ekki fyrir utan heimilin heldur í 8 samnýttum bílastæðahúsum. Stæði fyrir fatlaða verða leyfð fyrir utan íbúðir.

Þeir sem eiga bíla þurfa að síðan að finna út úr því í hvaða bílastæðahúsum eru laus stæði því húsin eru samnýtt af öllum í hverfinu. Samkvæmt skipulaginu mun um 62% heimila í hverfinu ekki geta átt bíl. Þá er gert ráð fyrir að um sex þúsund manns starfi innan Keldnalands.

Grafarvogur.net hefur margoft bent á varðandi mjög svo umdeilda þéttingu byggðar í Grafarvogi - sem íbúar hafa mótmælt kröftuglega - að gert er ráð fyrir um 20 þúsund manna byggð í Keldnalandi, á Ártúnsholti og við stækkun Bryggjuhverfisins. Þess utan eru mikil íbúðabyggð fyrirhuguð í landi Blikastaða sem er í Mosfellssveit.

Útilokað er annað en að umferð vegna þessara nýju hverfa stórauki umferð um Grafarvoginn.

En lítum hér betur á hina athyglisverðu frétt í Morgunblaðinu í morgun sem Andrés Magnússon blaðamaður skrifar.

„Minni vafi er um hvernig teppa skal bílaumferð. Hafa á „aðgengi að einkabílnum í meiri fjarlægð“ frá heimilum en tíðkast annars staðar og notast við „úrræði sem hægja á umferðinni.“

Frétt Morgunblaðsins í morgun: „Samkvæmt drögum að samgönguskipulagi fyrir nýtt blandað hverfi í Keldnalandi í Reykjavíkurborg er aðeins gert ráð fyrir 2.230 samnýttum stæðum í 12.000 manna hverfi. Þannig er gert er ráð fyrir að í hverfinu verði 5,4 íbúar á hvern fólksbíl, en á landsvísu eru 1,6 íbúar á hvern bíl.

SKAPA „SJÁLFBÆRT SAMGÖNGUKERFI“

Markmið skipulagsins eru sögð þau að skapa „sjálfbært samgöngukerfi“. Það á að gera með því að ýta undir notkun borgarlínu, reiðhjóla og tveggja jafnfljótra, stuðla að „einföldu hversdagslífi“, en letja fólk til bílferða. Borgarlínan á að ganga í gegnum mitt hverfið, en sú lota á ekki að koma fyrr en 2036 meðan hverfið ætti að öðru leyti að geta verið tilbúið um eða upp úr 2030.

Minni vafi er um hvernig teppa skal bílaumferð. Hafa á „aðgengi að einkabílnum í meiri fjarlægð“ frá heimilum en tíðkast annars staðar og notast við „úrræði sem hægja á umferðinni“ . Eða koma í veg fyrir hana, því að í drögunum segir að unnt sé „ að tryggja árangursríka nýtingu á gatnasvæðinu með umferðarreglum sem banna akstur vélknúinna ökutækja “.

VERKTÖKUM SKYLT AÐ KAUPA BÍLASTÆÐI Í SÉRSTÖKUM BÍLASTÆÐAHÚSUM

Ekki verða leyfð bílastæði við íbúðarhús nema fyrir fatlað fólk. Verktökum verður hins vegar skylt að kaupa bílastæði í sérstökum „samgönguhúsum“ (bílastæðahúsum) hverfisins og selja bílastæðaréttinn sérstaklega til þeirra íbúa, sem það kjósa. Það er vel að merkja réttur til þess að leggja, ekki aðgangur að tilteknu stæði.

Stæði í samgönguhúsunum átta skulu öll samnýtt, svo að íbúar ganga ekki að stæðum vísum, en geta hins vegar þurft að ganga nokkurn spöl eftir því hvar laust stæði er að finna.

Bílaeign er að jafnaði meiri í úthverfunum, enda líklegra að íbúar þar þurfi að sækja vinnu eða þjónustu um lengri veg. Þar gætir vetrarveðra einnig í meiri mæli en í grónari hverfum.

ÞJARMAÐ AÐ EINKABÍLNUM

Markmiðið með samgönguhúsunum er hins vegar skýrt í drögunum: „Stærsti hvatinn fyrir því að hafa bílastæði miðlæg í umræddum samgönguhúsum er að gera aðrar samgönguleiðir enn eftirsóknarverðari í samanburði og til að ýta undir samnýtingu á þjónustu. Þessi lausn leiðir til þess að íbúar þurfa að ganga lengri vegalengd í bílastæðahúsin en ef bílarnir væru á einkabílastæðum.

Þetta hefur áhrif á það í huga fólks hversu þægilegur og eftirsóknarverður einkabíllinn er samanborið við aðra ferðamáta ,“ segir að lokum í fréttinni. - JGH

Gert er ráð fyrir 5.880 íbúðum í Keldnalandi - en aðeins 2.230 bílastæðum sem verða ekki fyrir utan heimilin heldur í 8 samnýttum bílastæðahúsum. Þrjár borgarlínustöðvar verða í hverfinu en hún á að vera komin 2036 á meðan hverfið sjálft verður væntanlega uppbyggt í kringum 2030.

Gekk glimrandi vel - Rimaskóli hreppti bronsið á Norðlandamótinu í skák

Tue, 16 Sep 2025 15:31:15 GMT

„Þetta gekk alveg glimrandi vel og krakkarnir komu vel undirbúin til leiks, sýndu baráttu og þolinmæði, yfirvegaða taflmennsku og vandaða tækni,“ segir Helgi Árnason , fararstjóri skáksveitar Rimaskóla sem tefldi á Norðurlandamóti barnaskólasveita í Helsinki í Finnlandi um nýliðna helgi, dagana 12. - 14. september.

Skáksveit Rimaskóla endaði í 3ja sæti mótsins og unnu bronsverðlaunin sem gladdi mjög eftir jafna baráttu.

Norski Slemdal-skólinn hafði nokkra yfirburði á mótinu en skólarnir 2. - 5. sæti börðust um hin tvö verðlaunasætin.

Í skáksveit Rimaskóla á mótinu voru þau Tristan Fannar Jónsson, Emilía Embla B. Berglindardóttir, Sigrún Tara Sigurðardóttir, Emilía Sigurðardóttir og Tara Líf Ingadóttir.

Að sögn Helga Árnasonar var ferðin í alla staði vel heppnuð og ánægjuleg og vel staðið að mótinu. Teflt var í húsnæði finnska skáksambandsins og sýnt beint frá öllum skákum mótsins. Gist var á glænýju hóteli Sokos -Tripla sem er í einhverri stærstu verslunarmiðstöð Norðurlandanna.

Þetta var í 17. skipti sem Rimaskóli vinnur sér inn þátttöku á Norðurlandamóti grunn- og barnaskólasveita. Skólinn hefur unnið í sex skipti, tvívegis endað í öðru sæti og fimm sinnum hreppt bronsverðlauin. - JGH

Mikil spenna og bronsið í höfn.

Gist var á glænýju hóteli Sokos -Tripla í Helsinki í Finnlandi en hótelið er í einhverri stærstu verslunarmiðstöð Norðurlandanna.

Hópurinn. Helgi Árnason, fararstjóri og formaður skákdeildar Fjölnis, Tristan Fannar Jónsson, Tara Líf Ingadóttir, Emilía Sigurðardóttir, Sigrún Tara Sigurðardóttir, Emilía Embla B. Berglindardóttir og þjálfari krakkanna, Björn Ívar Karlsson, skákkennari Rimaskóla.

Stórskemmtileg auglýsing Karlakórs Grafarvogs

Tue, 16 Sep 2025 12:07:25 GMT

Hún er stórskemmtileg heilsíðuauglýsing KarlakórS Grafarvogs í Morgunblaðinu í morgun undir fyrirsögninni Söngmenn óskast.

Karlmenn, strákar, herramenn, gumar, gæjar, séntilmenn, peyjar, piltar og sérstaklega söngmenn óskast, segir í auglýsingunni.

Grípandi auglýsing og eflaust margir sem stilla núna raddböndin og kanna stöðu þeirra. Kórinn hefur oftar en ekki sungið við hin ýmsu tækifæri í Grafarvogskirkju á undanförnum árum.

Nú er lag fyrir þá sem hafa gaman af því að syngja.

Í auglýsingunni segir að þeir sem sækja um þurfi aðeins að uppfylla eitt skilyrði; að hafa gaman af því að syngja. Ægingar eru á mánudagskvöldum í Grafarvogskirkju kl. 19:30.

Nú er lag fyrir þá sem hafa áhuga og eflaust ýmsir nýliðar í kórnum sem eiga eftir að bresta í söng á næstunni. - JGH

Gervigreindin á fullu í sjávarútveginum - nánast „vísindaskáldskapur“ á sýningunni

Fri, 12 Sep 2025 13:14:25 GMT

HLUTHAFASPJALL ritstjóranna. Við félagarnir Sigurður Már Jónsson ræðum nýliðna Sjávarútvegssýningu í Laugardalshöll (10. til 12. sept.) í nýjasta hlaðvarpi okkar á Brotkast.is - Hluthafaspjalli ritstjóranna .

Mjög góð aðsókn var á sýninguna og má segja að þangað hafi allir mætt sem láta sjávarútveginn sig einhverju varða.

Fulltrúi Hluthafaspjallsins, Sigurður Már, mætti á vettvang og heillaðist af sýningunni og þeirri miklu gerjun sem er í gangi í sjávarútveginum og hvernig tækniframfarir og gervigreind spila meiri rullu og í sumum básum var nánast eins og að ganga um í „vísindaskáldsögu“.

Fram kemur í spjalli okkar að það stefnir í gott ár í sjávarútvegi vegna einstakra markaðsaðstæðna. Það selst allt sem íslenskur sjávarútvegur framleiðir. Góð makrílveiði var einnig til mikilla bóta og ef loðnan gefur sig þetta árið þá munu menn verða sáttir. Svo kemur hækkun veiðigjalda til framkvæmda um næstu áramót en þau eru þegar farin að smita út frá sér í samdrætti hjá þjónustufyrirtækjum við atvinnugreinina.

Það er merkilegt að fylgjast með hinni einstöku þróun í íslenskum sjávarútvegi sem birtist í sýningu sem þessari. Nokkur fyrirtæki eru að þróa byltingarkennda gervigreind í nýjum tækjabúnað - meðal annars á sviði hafrannsókna. - JGH

Hér má sjá örlítið brot úr spjalli okkar félaganna um sýninguna. https://www.youtube.com/watch?v=90vFUQPIk3Y

Sýningin var mjög vel sótt og látið vel af henni.

Miklar tækniframfarir eru í sjávarútveginum.

Það er ævinlega mikil stemning á sjávarútvegssýningum.

Þetta er að verða svolítið „science fiction“ - eins og í vísindaskáldsögu.

Örlítið brot um spjall okkar félaganna um nýliðna sjávarútvegssýningu.

Magnaður áhugi á skákinni og fjöldi nýrra barna á skákæfingum hjá Fjölni

Fri, 12 Sep 2025 09:33:55 GMT

Hann er magnaður áhugi barna og unglinga á skákinni í Grafarvogi enda starfið í skákdeild Fjölnis sérlega gott. Á æfinginni í gær var setið við öll borð en þá mættu tæplega 60 krakkar á skákæfinguna. Það sem meira var; fjöldi nýrra barna mætti á fyrstu æfingu vetrarins í síðustu viku og þau mættu svo öll aftur í gær, sæl og ánægð. Mjög svo ánægjulegt.

Að sögn Helga Árnasonar , formanns skákdeildar Fjölnis, hjálpar það mjög við að stýra æfingunum að foreldrar fylgja þeim yngstu á æfingarnar.

Hann segir að tveir yngstu hóparnir hafi fyllst strax í síðustu viku og að „opni flokkurinn“ sé að venju fjölmennastur með 32 þátttakendur.

Sex efstu stelpurnar og sex efstu strákarnir unnu til verðlauna og það voru nákvæmlega þau tólf efstu; Emilía S., Ómar Jón, Rökkvi, Anh, Sigrún Tara, Helgi Tómas, Tara Líf, Alexander Kári, Elsa Margrét, Alexander Leó, Elma Karen og Karen Birta.

Strákaflokkur á bókasafninu á æfingu gærdagsins.

Á bókasafni var keppnin afar jöfn og allir að vinna alla. Bekkjarbræðurnir úr 3ja bekk Rimaskóla, þeir Sævar Svan, Mikael Már og Tómas Breki urðu efstir.

Í byrjendahópi voru það Rimaskólastelpurnar Alexandra, Ásta Sóllilja og Anna Kristín sem náðu bestum árangri.

Eins og sjá má af nöfnum verðlaunahafa þá er Jafnréttisstefna Reykjavíkurborga allsráðandi á æfingum Skákdeildar Fjölnis. Skák er skemmtileg bæði fyrir stráka og stelpur.

Skákæfingarnar eru á fimmtudögum og næsta æfing verður því næsta fimmtudag 18. sept. - JGH

Ungar og stórefnilegar skákkonur.

Teflt við hvert einasta borð.

Fjörlegt í útgáfuhófi Ásthildar og Bjarna Þórs vegna nýju bókarinnar í ritröðinni um Bínu

Thu, 11 Sep 2025 18:10:40 GMT

Það var heldur betur fjör í útgáfuhófi Grafarvogsbúans og eins helsta talmeinafræðings landsins, Ásthildar B. Snorradóttur , og Bjarna Þórs Bjarnasonar , myndlistarmanns af Akranesi, í tilefni af nýrri bók í ritröðinni um Bínu. Nýja bókin heitir Bína fer í sveit. Ásthildur er höfundur bókarinnar og Bjarni Þór myndskreytir hana. Útgáfuhófið fjörlega var á veitingastaðnum Mílanó í byrjun vikunnar.

Ásthildur býr í Hamrahverfinu í Grafarvogi og var langt viðtal við hana í Grafarvogur.net fyrir nokkrum vikum þegar fyrstu eintökin af bókinni Bína fer í sveit komu úr prentun. Sjá viðtalið hér.

Fjölmargir leik- og grunnskólakennarar mættu í útgáfuhófið á Mílanó og var bókinni ákaflega vel tekið. Þær voru ófáar eiginhandaráritanirnar sem Ásthildur skifaði í seldar bækur á staðnum.

Þarna var líf og fjör; sungið og leikið - og það var Bjarni Þór sem greip í gítarinn og sá um undirspil. Bjarni Þór hefur myndskreytt allar bækurnar um Bínu.

Þau Ásthildur og Bjarni Þór munu meira að segja hafa samið lag og texta sem sungið var í teitinu. - JGH

Það var líf og fjör í útgáfuhófinu; sungið og leikið.

Hin hliðin af kvartetinum. Frá vinstri: Þórdís Ólafsdóttir, Fríða Ólafsdóttir, Bjarni Þór Bjarnason og Ásthildur B. Snorradóttir.

Fjölmenni var í útgáfuhófinu.

Bjarni Þór Bjarnason, myndlistarmaður af Akranesi, er snillingur sem hefur myndskreytt allar bækurnar um Bínu. Hann er með sýningu í Mílanó út vikuna.

Bína lét sig ekki vanta í útgáfuteiti Ásthildar og Bjarna Þórs á kaffihúsinu Mílanó.

Guðbjörg Guðjónsdóttir og Bjartey Sigurðardóttir ásamt höfundi.

Hjónin Bjarni þór Bjarnason óg Ásta Salbjörg.

Fjölskylda Ásthildar var að sjálfsögðu mætt í hófið.

Bjarni Þór Bjarnason er með sýningu í kaffihúsinu Mílanó út vikuna og sýnir meðal annars allar myndirnar úr bókinni Bína fer í sveit.

Slökkviliðinu hefur verið send ábending um stóraukna hættu á sinubruna í Grafarvogi

Wed, 10 Sep 2025 20:15:13 GMT

Ýmsir Grafarvogsbúar hafa núna vaxandi áhyggjur af sinubruna vegna stefnu borgarinnar um að láta gras vaxa „viljandi villt“ í stórauknum mæli og hafa þessar áhyggjur meðal annars komið fram í athugasemdakerfum á FB.

Grafarvogur.net hefur heimildir fyrir því að Slökkviliði höfuðborgarsvæðisins hafi núna verið send formleg ábending um að sinubrunahætta sé raunveruleg.

Fram hefur komið í samtölum Grafarvogs.net við Grafarvogsbúa að íbúar við Sóleyjatún hafi orðið vitni að sinubruna á gamlárskvöld þegar flugeldar hafa kveikt í óslægðri sinu - en hús með timburklæðningum standa í aðeins 3 metra fjarlægð frá túninu. Óslegið grasið, sem verður að sinuflákum, sé því ekki lengur tilfinningamál heldur öryggismál í hugum íbúanna.

Grafarvogsbúar hafa áhyggjur af stóraukinni hættu af sinubrunum vegna stefnu borgarinnar um minnkandi slátt og að láta gras vaxa villt. Slökkviliðinu hefur nú verið send ábending um málið.

Það vakti mikla athygli þegar íbúar við Sóleyjatún tóku sig til sl. sumar og slógu svæðið fyrir norðan Rimaskóla og fyrir sunnan fjarskiptastöð Isavia. Þetta er þekkt og vinsælt útivistarsvæði í hverfinu.

Fram kom í samtali íbúa við Soleyjatún við Grafarvog.net sl. sumar að þeir hefðu áhyggjur af því að svæðið væri látið grotna viljandi niður til að réttlæta fyrirhuguð áform um þéttingu byggðar á þessu svæði. Hjalti Jóhannes Guðmundsson , skrifstofustjóri borgarlands, mótmælti því í fjölmiðlum og sagði að til hefði staðið að slá túnið við Sóleyjarima síðsumars.

Það hefur hins vegar ekki verið gert og ekki stendur til að slá túnið við Sóleyarima þar sem slætti er lokið af hálfu borgarinnar í Grafarvogi.

Í skriflegu svari Hjalta Jóhannesar til Grafarvogs.net í byrjun síðustu viku staðfesti hann að slætti væri lokið í Grafarvogi og að slegið hefði verið þrisvar í sumar á þeim svæðum sem til stóð að slá.

Þá kom fram hjá Hjalta að fáir íbúar hefðu mótmælt tilraunverkefninu „Viljandi villt“ sem kemur raunar á óvart miðað við hve margir Grafarvogsbúar virðast ósáttir við þessa stefnu og finnst hún tákn um metnaðarleysi, druslugang og almenna vanhirðu í borginni. - JGH

Slökkviliðsmaður berst við sinubruna í Laugarnesinu. Vaxandi uggs gætir nú á meðal Grafarvogsbúar af sinuflókum víða í hverfinu vegna stefnu borgarinnar um minni slátt og minni umhirðu, þ.e. tilraunaverkefnið „Viljandi villt.“

Íbúar við Sóleyjarima mótmæltu sinnuleysi borgarinnar í slætti með því að slá sjálfir hið þekkta tún og stóra útivistarsvæði fyrir neðan fjarskipastöð Isavia í Rimahverfinu. Borgin ætlaði að slá síðsumars en ekkert hefur orðið úr því.

Raunveruleg eldhætta. Mörgum íbúum í Grafarvogi finnst hverfið ekki aðeins hafa verið illa hirt heldur séu víða að myndast sinuflákar sem sé stórhættulegur eldsmatur.

„Viljandi villt“. Ekki lengur tilfinningamál - að mati sumra íbúa - heldur hreint og klárt öryggismál vegna stóraukinnar hættu á að eldur berist í sinuna og sinueldar breiðist út í vetur og þegar líður á næsta vor.

Fjórar stúlkur í skáksveit Rimaskóla sem er á leið til Helsinki á Norðurlandamótið í skák

Wed, 10 Sep 2025 18:39:09 GMT

Fjórar stúlkur eru á meðal fimm keppenda í skáksveit Rimaskóla sem er á leiðinni til Helsinki í Finnlandi til að keppa á Norðurlandamóti barnaskólasveita í skák. Skáksveitin er Íslandsmeistari barnaskólasveita 2025 og hefur Rimaskóli unnið Norðurlandamótið í sex skipti, oftar en nokkur annar skóli á Norðulöndunum.

Þetta verður spennandi mót og óskar Grafarvogur.net okkar fólki úr Grafarvoginum alls hins besta á mótinu.

Skáksveit Rimaskóla skipa þau Tristan Fannar Jónsson, Emilía Embla B. Berglindardóttir, Sigrún Tara Sigurðardóttir, Emilía Sigurðardóttir og Tara Líf Ingadóttir .

Fjórar stúlkur eru í skáksveitinni og er það einsdæmi. Þjálfari krakkanna er Björn Ívar Karlsson, skákkennari skólans, en fararstjóri er Helgi Árnason, formaður Skákdeildar Fjölnis.

Þetta mun vera í 17. skipti sem skáksveit Rimaskóla vinnur sér þátttökurétt á Norðurlandamót barna-og grunnskólasveita.

Hópurinn flýgur til Finnlands á föstudagsmorgun 12. sept. Mótið verður haldið dagana 12. - 14. september í Helsinki, höfuðborg Finnlands.

Forseti Skáksambands Íslands, Jóhanna Björg Jóhannsdótti r, er hér með hinni öflugu skáksveit á meðfylgjandi mynd ásamt Helga Árnasyni fararstjóra. - JGH

ÖFLUG SKÁKSVEIT. Jóhanna Björg Jóhannsdóttir, forseti Skáksambands Íslands, og Helgi Árnason, formaður Skákdeildar Fjölnis og fararstjóri í ferðinni, með hinni öflugu skáksveit Rimaskóla. Talið frá vinstri: Jóhanna Björg, Sigrún Tara Sigurðardóttir, Emilía Embla B. Berglindardóttir, Tristan Fannar Jónsson og Helgi. Á myndina vantar Töru Líf Ingadóttur.

Hvers vegna var þetta rými ekki nýtt fyrir beygjuakrein inn í Ártúnsholtið?

Thu, 04 Sep 2025 23:26:52 GMT

Það vekur furðu allra að önnur beygjuakreinin af tveimur af Höfðabakkanum inn á Bæjarhálsinn hafi verið aflögð. Það sem meira er; núna er græna beygjuljósið inn á Bæjarhálsinn svo stutt að aðeins fjórir til fimm bílar komast þarna yfir í hvert skipti.

Fyrir vikið er þarna núna fullkomið „skipulagt kaos“ og orðið mjög erfitt á annatímum að aka upp afleggjarann til hægri við Höfðabakkabrúna á leið í Árbæinn.

Það hefði verið leikur einn að hafa beygjuakreinarnar inn á Bæjarhálsinn áfram tvær með því að búa til fjórðu akreinina, sérstaka beygjuakrein inn í Ártúnsholtið og nýta þetta rými sem við sjáum á myndinni - og sem nú hefur verið fyllt upp af mold og möl.

Hvers vegna í ósköpunum var það ekki nýtt sem beygjuakrein inn í Ártúnsholtið og nóta bene; höfð þarna áfram biðskylda? Það er svo augljóslega verið að búa til tafir.

Á Höfðabakkabrúnni sjálfri - þarna rétt fyrir neðan - er einmitt akreinin lengst til hægri beygjuakrein niður í bæ og hefur gefist vel. Að vísu er hún með ljós en það breytir því ekki að þessi akrein eykur mjög á flæðið í umferðinni yfir brúna. - JGH

Akreinin þarna lengst til hægri - beygjuakrein niður í bæ - hefur gefist mjög vel. Hvers vegna var ekki sami háttur hafður á við gatnamótin rétt fyrir ofan, þ.e. við Höfðabakkann og Bæjarhálsinn? Sérstök beygjuakrein inn í Ártúnsholtið.

Þessi beygjuakrein á Bíldshöfðanum inn á Höfðabakkann hefur svo sannarlega sannað gildi sitt. Þarna er biðskylda þótt umferðarþunginn sé miklu meira en á leiðinni inn í Ártúnsholtið frá Bæjarhálsinum.

Þarna stendur gamla biðskylduskiltið á leiðinni í Ártúnsholtið.

Göngustígurinn þarna meðfram er talsvert frá því rými sem hægt hefði verið að nýta fyrir sérstaka beygjuakrein inn í Ártúnsholtið.

Og hann beið og beið , segir ein af karakterum hans Ladda. Beðið og beðið við þessi gatnamót í rigningunni í dag. Röðin til hægri er á leiðinni inn á Bæjarhálsinn í Árbænum. Núna komast aðeins fjórir til fimm bílar í einu þar sem græna ljósið er svo stutt. Áður voru tvær beygjuakreinar og fjöldi bíla sem komst yfir í hvert sinn.

Slætti lokið í Grafarvogi. Borgin: Fáir íbúar mótmæltu tilrauninni „Viljandi villt“

Thu, 04 Sep 2025 13:25:02 GMT

Slætti er lokið í Grafarvoginum. Það var slegið þrisvar sinnum í sumar. Sláttuvélarnar og rokkarnir þögnuðu um miðjan ágúst. Ennþá er hins vegar ágæt spretta og finnst ýmsum að sláttuvélunum hafi verið lagt fullsnemma.

Grafarvogur.net hafði samband við Hjalta Jóhannes Guðmundsson , skrifstofustjóra borgarlands, sem staðfesti að slætti væri lokið í Grafarvogi og að slegið hefði verið þrisvar í sumar á þeim svæðum sem til stóð að slá.

Mjög skiptar skoðanir eru á meðal íbúa Grafarvogs á tilraunaverkefninu „Viljandi villt“ þar sem grasivaxnar hljóðmanar og brekkur hafa viljandi ekki verið slegnar heldur grasið látið vaxa villt. Mörgum finnst þetta fráleitt og ósnyrtilegt, sérstaklega þegar njólinn tekur yfir, á meðan aðrir lofa þessa stefnu.

„Viljandi villt.“ Hljóðmönin við Strandveg gegnt Gylfaflötinni. Þetta er einhver fjölfarnasta gatan í Grafarvogi og þessi hljóðmön er hluti af tilraunaverkefninu „Viljandi villt“ sem mjög skiptar skoðanir eru á meðal Grafarvogsbúa.

Um það hvort komið væri mat á árangurinn af tilraunaverkefninu „Viljandi villt“ sagði Hjalti að ekki hefði borist mikið af ábendingum vegna þessa verkefnis af hálfu íbúa í Grafarvogi nema þá vegna svæðis norðan við Rimaskóla - og að þær kvartanir hefðu borist frá um 5 eða 6 aðilum.

Þess má geta að íbúar við Sóleyjarima mótmæltu kröftuglega þegar þeir risu upp í sumar og slógu umrætt svæði sjálfir sem Hjalti ræðir um en Grafarvogur.net fjallaði um málið og komst sú frétt í stóru miðlana og varð Hjalti þá fyrir svörum hjá Vísi .

Raunar finnst Grafarvogsbúum áberandi að þau svæði, sem borgin áformar að þétta byggð á, hafa lítið sem ekkert verið hirt í sumar og þar hafi stefnunni „Vaxandi villt“ verið beitt á mjög svo kerfisbundinn hátt.

Mótmælt í verki. Sennilega er ekki hægt að mótmæla á kröftugri hátt en íbúar í Sóleyarima gerði í sumar og Grafaravogur.net fjallaði um. Að öðru leyti lítur borgin svo á að íbúar í Grafarvogi hafi ekki komið með ábendingar vegna verkefnisins „Villjandi villt“.

Fyrr í sumar spurði Grafarvogur.net Hjalta að því hvernig það mætti vera að hringtorgin við Víkurveg, skammt frá Egilshöll, væru ennþá ófrágengin og ósnyrt en um tvö ár eru síðan framkvæmdum við þau lauk - og hvort ekki mætti aðeins snyrta óræktina þarna þar til farið yrði að laga þau endanlega.

Hjalti svaraði því þá til að hönnun hefði dregist á langin en hann ætlaði að ýta á eftir því að torgin yrðu snyrt á næstu vikum. Núna er komið fram í september og enn er ekkert að frétta með þessi hringtorg.

Áttu von á því að eitthvað verði snyrt við hringtorgið við Víkuveg-Borgaveg?

„ Það er verið að ljúka hönnun. Það munu hefjast framkvæmdir vonandi sem fyrst sem miða að því að fegra torgið , “ segir í skriflegu svari Hjalta við fyrirspurn Grafarvogs.net. - JGH

Gullinbrú. Leiðin yfir Gullinbrú og upp að Höfðabakkanum hefur verið slegin í sumar og er hin snyrtilegasta. Þar hefur verkefninu „Viljandi villt“ ekki verið beitt.

Við Hallsveg. Hér hefur verið slegið í kringum trén en að öðru leyti er svæðið óhirt og stefnan „Viljandi villt“ látin ráða ríkjum.

Við Lokinhamra. Þetta ryðgaða strætróskýli við Lokinhamra er ekki beint bæjarprýði og umhverfis það er stefnan „Viljandi villt“ látin ráða ríkjum.

Njólinn kominn í poka. Hluti af afrakstrinum þegar íbúar við Sóleyjarima mótmæltu harðlega stefnunni „Viljandi villt“ í sumar og slógu sjálfir þekkt tún fyrir norðan Rimaskóla. Mótmæli sem svo sannarlega var tekið eftir.

Strætóskýlið við Lokinhamra. Gegnt því er snyrtilega slegið á einkalóðum en borgin sló ræmuna meðfram gangstéttinni þrisvar sinnum í sumar. Garðlist sá um verkið.

Sprettan. Allt er vænt sem vel er grænt, segir einhvers staðar. Grasbalar meðfram akreinum eru víða orðnir ansi loðnir því sprettan hefur verið veruleg í því góða tíðarfari sem hefur verið undanfarnar vikur.

Þrenna við Lokinhamra. Snyrtilega slegin einkalóð. Grasbali við akreinina sem borgin sló síðast um miðjan ágúst. Yst er svo villtur gróðurinn samkvæmt stefnunni „Viljandi villt“ en í áratugi hefur borgi slegið hljóðmönina og hefur hún verið fagurgræn á að líta.

Flöskuhálsinn á gatnamótunum í Hálsana í Árbænum - 9 mínútur að fara 300 metra kafla

Wed, 03 Sep 2025 17:19:38 GMT

Grafarvogur.net gerði smá tilraun um þrjúleytið í dag og kannaði hversu lengi það tæki að aka um þrjú hundruð metra kafla frá Höfðabakkabrúnni upp Höfðabakkann og taka vinstri beygju inn á Bæjarhálsinn í Árbænum. Aðeins fjórir til fimm bílar komust yfir í hvert skipti á ljósunum til vinstri inn á Bæjarhálsinn.

Og tíminn! Viti menn; það tók mig um 9 mínútur að fara þessa stuttu leið. Það var allt stíflað. Samt ekki kominn háannatími.

Bílar sem komu frá Ártúnsbrekkunni og beygðu til hægri við Höfðabakkabrúna á leið sinni í Árbæinn eða Breiðholtið áttu nánast engan séns að komast inn á Höfðabakkann.

Þess utan þveruðu bílar í röðinni upp Höfðabakkann fyrir bíla sem komu frá Ártúnsbrekkunni og beygt var til vinstri niður í Grafarvoginn.

Gatnamótin við Höfðabakann og Bæjarhálsins hafa oft verið erfið á annatímum en ekki verður annað séð en þær breytingar sem þarna hafa verið gerðar tefji umferðina frá því sem áður var og stækki á flöskuhálsinn.

Það er í raun algjörlega óskiljanlegt að ekki séu áfram tvær beygjuakreinar í Árbæinn og að fjórðu akreininni við gatnamótin hafi ekki verið bætt við - þ.e. akrein sem hefði verið til hægri inn á Ártúnsholtið. Svona svipuð akrein og sú sem er yst til hægri á brúnni sjálfri - þ.e. akreininin sem liggur niður í bæ. Þarna virðist rými til þess. - JGH

Klukkan 15:06. Þessi sendibíll frá Veitum komst hvorki lönd né strönd á grænu ljósi og þveraði fyrir bíla sem komu upp Ártúnsbrekkuna og beygðu til vinstri á brúnni niður í Grafarvoginn. Bílstjóri sendibílsins brá því á það ráð að færa sig í skyndi yfir á vinstri akreinina þegar komið var gult ljós og hann hafði ekkert hreyfst allan biðtímann. Það gerði ég líka - og var snöggur að því.

Klukkan 15:08. Hér hefur bílstjóri sendibílsins ákveðið að troða bílnum inn í röðina á hægri akreinina.

Algjör ringulreið á þessum þrjú hundruð metra kafla á Höfðabakkanum frá brúnni að gatnamótum Höfðabakka og Bæjarhálsins. Klukkan rúmlega þrjú að degi til en mesta umferðin er þarna þó um fjögurleytið. Segja má að þessi leið sé vart farandi frá kl. 15 til 17:30 á daginn.

Enn standa þarna yfir framkvæmdir og akreinarnar aðeins tvær. Þarna er algjör tappi og fyrirsjáanlegt að breytingarnar þarna munu auka á umferðartafir frá því sem var fyrir framkvæmdirnar.

Hér er búið að setja upp steypta umferðareyju sem leynir svolítið á sér og kanturinn gæti reynst bílstjórum erfiður í snjókomu og vondri færð á veturna.

Hetjur kvöldsins - spurning hvort þeim takist að tengja fyrir miðnætti?

Fri, 29 Aug 2025 21:00:32 GMT

Framkvæmdir við lögnina sem bilaði sl. nótt voru á fullu þegar Grafarvogur.net leit á svæðið á áttunda tímanum í kvöld. Verið var að skipta um heitavatnsrör.

Þetta er kvöld suðumanna og annarra hetja.

Að sögn starfsmanna á staðnum voru allar líkur á að þetta hefðist fyrir miðnætti en Veitur gáfu út fréttatilkynningu skömmu fyrir kvöldmat að ólíklegt væri að hægt yrði að hleypa vatni á Grafarvoginn fyrr en nálægt miðnætti í kvöld.

Í rauninni er um tvær bilanir að ræða og virðist einfaldlega að tími sé kominn á rörin og skipta þurfi um ný. Vantar viðhald. Viðgerð var lokið við aðra bilunina.

Ausandi rigning - veðrið mætti vera betra fyrir svona viðgerð, sögðu suðumenn.

Það verður víða farið í sturtu á morgun í Grafarvoginum. - JGH

Suðumenn frá fyrirtækinu Stál og suðu hafa verið á fullum dampi í allan dag. Harðjaxlar.

Hér er ekki slegið slöku við. Stefnt að því að klára verkið fyrir miðnætti.

Þetta er erfitt - alvarleg bilun. Rörin sem gáfu sig virðast einfaldlega komin á tíma. Spurning vaknar um viðhaldsleysi hjá Veitum.

Skammt á milli þessara tveggja bilana. Viðgerð á austari biluninni var lokið fyrr í dag.

Fjölmenni við útför Elínar Pálsdóttur í Grafarvogskirkju í dag

Fri, 29 Aug 2025 16:47:51 GMT

Mikið fjölmenni var við útför Elínar Pálsdóttur, eiginkonu Vigfúsar Þórs, frá Grafarvogskirkju í dag. Athöfnin var einstaklega falleg og látlaus og í anda Elínar sjálfrar.

Ég átti þess kost að kynnast Elínu þegar ég sat í sóknarnefnd Grafarvogskirkju í um tíu ára skeið. Hér fór einstök sómakona sem nú hefur kvatt; þægileg, látlaus, viðræðugóð og kom miklu í verk - og það mjög áreynslulaust.

Hún var fyrsti formaður Safnaðarfélagsins og lagði sig alla fram við að byggja sóknina upp ásamt eiginmanni sínum, séra Vigfúsi Þór. Samfélagið hér í Grafarvogi á þeim hjónum mikið að þakka.

Prestar voru Guðrún Karls Helgudóttir , biskup Íslands, og séra Sigurður Arnarson , sóknarprestur í Kópavogskirkju, en hann starfaði hér á fyrstu árum safnaðarins. Sigurður flutti minningarorðin sem einkenndust af því hversu vel hann þekkti Elínu.

Blessuð sé minning Elínar Pálsdóttur. - JGH

Líkmenn voru fjölskyldumeðlimir og vinir. Um bálför verður að ræða. Kista Elínar var lögð fyrir framan anddyri kirkjunnar þar sem kirkjugestir gátu kvatt Elínu í hinsta sinn.

Mikið fjölmenni var í kirkjunni. Samfélagið hér í Grafarvogi á henni - og þeim hjónum - mikið að þakka.

Einsöngvarar voru þau Gissur Páll Gissurarson og Sigrún Hjálmtýsdóttir (Diddú) - og sungu eftirminnilega vel. Tónlistarveisla af bestu gerð.

Hvert sæti var þétt skipað í kirkjunni enda Elín vinamörg.

Veitingar voru í safnaðarsal kirkjunnar að athöfn lokinni. Hafi einhver ein manneskja bakað og galdrað fram gómsætt gúmmulaði í safnaðarheimilinu við guðsþjónustur og aðra viðburði á vegum kirkjunnar var það Elín Pálsdóttir.

Þær stóðu heiðursvörð við útför Elínar í dag.

Séra Sigurður Arnarson, sóknarprestur í Kópavogi, flutti minningarorð um Elínu og einkenndist minningin af því hversu vel hann þekkti hana.

Kista Elínar borin út úr kirkjunni.

Elín Pálsdóttir. Fædd 16. júní 1948 - dáin 9. ágúst 2025. Blessuð sé minning hennar.

Prestar voru Guðrún Karls Helgudóttir, biskup Íslands, og séra Sigurður Arnarson, sóknarprestur í Kópavogskirkju.

Látlaus en engu að síður tignarleg athöfn.

Heitavatnslaust í Grafarvogi - Veitur segja bilunina á erfiðum stað

Fri, 29 Aug 2025 10:17:58 GMT

NÝJUSTU FRÉTTIR. Veitur hafa sent frá sér tilkynningu um að viðgerð sé hafin á lögninni sem flytur heitt vatn í allan Grafarvog. Það má þó gera ráð fyrir heitavatnsleysi fram eftir degi.

Bilunin er sögð á erfiðum stað í tilkynningu Veitna.

Magnús Ásgeirsson Grafarvogsbúi tók þessar myndir í morgun en bilunin er við Vesturlandsveginn - niður af Húsahverfi - gegnt Landsbankanum og Húsasmiðjunni. - JGH

Bilunin er við Vesturlandsveginn og sögð á erfiðum stað.

Útför Elínar Pálsdóttur verður frá Grafaravogskirkju í dag kl. 13:00

Fri, 29 Aug 2025 08:40:06 GMT

Útför Elínar Pálsdóttur, eiginkonu Vigfúsar Þórs Árnasonar, verður frá Grafarvogskirkju í dag kl. 13:00. Fjöldi minningargreina eru um Elínu í Morgunblaðinu í morgun.

Elín var ein styrkasta stoð safnaðarfélagsins í Grafarvogssókn allt frá því það var stofnað.

Grafarvogur.net vottar börnum og fjölskyldu Elínar innilegrar samúðar.

Meðfylgjandi opnunarmynd er fengin úr bókinni Grafarvogssókn 25 ára sem kom út árið 2014 á 25 ára afmæli sóknarinnar. Þar var mjög fróðlegt viðtal við Elínu.

Á myndinni er hún með dætrum sínum Björgu og Þórunni Huldu, frú Agnesi M. Sigurðardóttur, þáverandi biskupi Íslands, og eiginmanninum Vigfúsi Þór en hún var svo sannarlega stoð hans og stytta alla tíð í starfi hans sem sóknarprests Grafarvogskirkju.

Blessuð sé minning Elínar Pálsdóttur. - JGH

Þessa hugljúfu mynd af þeim hjónum birti fjölskyldan á samfélagsmiðlunum þegar hún tilkynnti andlát Elínar fyrr í mánuðinum.

Heitavatnslaust í öllum Grafarvogi - bilun í nótt

Fri, 29 Aug 2025 07:42:37 GMT

HEITAVATNSLAUST. Vegna viðgerðar á lögn sem bilaði í nótt er heitavatnslaust í öllum Grafarvogi.

Fólki er bent á að hafa skrúfað fyrir alla heitavatnskrana til að draga úr hættu á slysi eða tjóni þegar vatnið kemst á að nýju. Húseigendum er bent á að huga að innanhússkerfum. (Sjá frétt frá Orkuveitunni).

Við biðjumst velvirðingar á þeim óþægindum sem þetta kann að valda.

Við munum uppfæra á hér hvernig gengur. Ekki er hægt að segja hversu lengi lokunin varir.

Þrengingarnar farnar á brúnni

Wed, 27 Aug 2025 10:56:16 GMT

Hinar miklu þrengingar sem settar voru upp á Höfðabakkabrú á mánudag í síðustu viku hafa verið fjarlægðar og staurinn fyrir hinu nýju umferðarljós kominn upp.

Mikil óánægja hefur verið á meðal Grafarvogsbúa með hvað mikill seinagangur var á þessu verki - en lítið sem ekkert var unnið á miðeyjunni í síðustu viku eftir að þrengingarnar voru settar upp - þótt tekið hafi verið til hendinni um helgina og á mánudag.

Þrengingarnar ullu miklum umferðartöfum. - JGH

Þungaflutningar - eða þannig sko?

Tue, 26 Aug 2025 16:11:43 GMT

Ég staldraði við þessa tvo ofurtrukka á bílastæðinu við Gullnesti á dögunum. Auðvitað var allt saman kyrfilega bundið og trukkarnir tóku sitt svæði á stæðinu.

Þetta eru miklir þungaflutningar, hugsaði ég með mér - og þó, þegar betur var að gáð.

Farmurinn sennilega með þeim léttari sem þessir hafa flutt. - JGH

Seðlabankinn haggast ekki með stýrivextina - launaskrið hjá hinu opinbera

Tue, 26 Aug 2025 15:55:03 GMT

HLUTHAFASPJALLIÐ. Í nýjasta hlaðvarpsþætti okkar Sigurðar Más Jónssonar, Hluthafaspjalli ritstjóranna , ræðum við launaskrið hjá hinu opinbera sem aftur togar upp launin á almennum vinnumarkaði.

Það er erfitt að takast á við verðbólguna þegar laun hækka ár frá ári á vinnumarkaðnum því laun eru það stór hluti af kökunni.

Kakan, þjóðartekjur, skiptast í neyslu og fjárfestingu. Þú borðar annað hvort kökuna eða geymir hana. Hlutfallið er líklegast um 70% neysla á móti 30% fjárfestingu um þessar mundir. Þegar laun eru þetta 50, 60 og 70% af kökunni og hækka án þess að innstæða sé fyrir hækkuninni þá bólgnar kakan óhjákvæmilega.

Þegar húsnæðisverð hækkar vegna þess að framboð af nýjum lóðum og íbúðum er of lítið - þar sem of mikið er lagt upp úr þéttingarstefnu - þá þurfa launþegar sem ætla að kaupa sér íbúð hærri laun til að takast á við kaupverðið - og lánin.

Við Sigurður ræðum launaskrið hins opinbera en sleggja Kristrúnar þarf sjálfsagt að takast á við það vandamál til að ná árangri sem og slá niður óþarfa óarðbær verkefni hjá hinu opinbera.

Til þess þarf þunga sleggju. En er sú sleggja of þung fyrir Kristrúnu? - JGH

Í nýjasta þættinum ræðum við launaskriðið hjá hinu opinbera.

Stílistar á Höfðabakkabrúnni - loksins einhver kraftur að færast í framkvæmdir

Mon, 25 Aug 2025 16:49:54 GMT

STÍLISTAR! Ég lenti á eftir þessum á Höfðabakkabrúnni í hádeginu og játa að ég hélt fyrst að um ofsjónir væri að ræða. En svo reyndist ekki vera. „Stóra skiltið“ ók af stað. Húmor í þessu - stílistar á ferð.

Framkvæmdir á brúnni malla áfram og búið er að steypa framlengingu á kantinum á miðeyjunni þar sem ný umferðarljós verða sett. Það var gert um helgina - og svo var unnið við gröft á eyjunni í morgun.

Núna er nákvæmlega vika síðan verulegar þrengingar voru settar við brúna og akreinum lokað vegna framkvæmdanna og hafa þær skapað mikið umferðaröngþveiti - og það líklegast að óþörfu.

Í rauninni komst ekki alvöru kraftur í verkið fyrr en um helgina og í morgun. - JGH

Nýtt og hreyfanlegt skilti? Nei, ekki reyndist svo vera. Núna er vika síðan að þrengingar voru settar upp. En það var fyrst um helgina og í morgun sem eitthvað var að frétta og kraftur færðist í verkið.

Demantshringur á 18 milljónir króna í Costco

Mon, 25 Aug 2025 16:09:49 GMT

NOKKUÐ ÓVÆNT! Fór með frúnni í Costco fyrir hádegi og eftir að hafa skoðað sokkapar á útsölu gekk ég með stóru innkaupakerruna að glerskáp sem vakti athygli mína. Þar blasti þessi demantshringur við á 18 milljónir króna.

Frekar óvænt og jafnvel súrrealískt að ramba á þennan hring þarna með innkaupakerruna.

Þarna voru líka eyrnalokkar og hálsfestar á spottprís. - JGH

Þessi hálsfesti fæst á 1,3 milljónir króna.

Þessi tvenna fæst á rúmar 2 milljónir.

Eyrnalokkar á um 1,7 milljónir.

Sagan á bak við Tekjublaðið - þegar reynt var að stöðva útgáfu Tekjublaðsins?

Mon, 25 Aug 2025 11:01:15 GMT

Í meðfylgjandi klippu úr nýjasta hlaðvarpsþætti okkar félaganna, Hluthafaspjalli ritstjóranna, fer ég lauslega yfir sögu Tekjublaðsins og staldra sérstaklega við það þegar reynt var að koma í veg fyrir að Frjáls verslun birti kerfisbundið tekjur einstaklinga unnar upp úr álagningarskrám. Ég var ritstjóri blaðsins í 25 ár og upphaflega var „tekjublaðið“ blaðauki í einni af haustútgáfu Frjálsrar verslunar.

Forsíðan árið 2001.

Það hefur oft gengið á ýmsu við útgáfu Tekjublaðs Frjálsrar verslunar og aðilar úti í bæ reynt að koma í veg fyrir að blaðið birti svo kerfisbundið upplýsingar upp úr álagningarskránum.

Gaukur Jörundsson, þáverandi umboðsmaður Alþingis, lagðist meira að segja yfir málið á sínum tíma eftir umkvartanir nokkurra þekktra manna í viðskiptalífinu og komst að þeirri niðurstöðu að lögin um að leggja fram álagningarskrárnar almenningi til sýnis þýddu að ekki væri hægt að banna fjölmiðlum að flytja fréttir úr skránum. (Ég vissi aldrei hverjir þeir væru en Viðskiptaráð var í forsvari fyrir þá.)

Fjármálaráðuneytið gaf meira að segja út reglugerð um að það væri bannað að reikna upp úr álagningarskrám. Bannað að reikna varð ein helsta frétt þess dags. Þá reyndu Heimdellingar eitt árið að stöðva útgáfu blaðsins með því að hindra aðgengi starfsmanna Frjálsrar verslunar að skránum - en óvænt var ég búinn að semja við Skattinn að við fengjum að vera í aukaherbergi við skráninguna.

Viðskiptablaðið hafði til margra ára horn í síðu Frjálsrar verslunar fyrri að gefa út upplýsingar um tekjur fólks. En svo keypti útgáfa Viðskiptablaðsins Frjálsa verslun og þá heyrðist annað hljóð í horni. Þess má geta að Sigurður Már Jónsson var um tíma ritstjóri Viðskiptablaðsins.

En er rétt að gefa út þessar upplýsingar?

Það er nú það. Það eru a.m.k. tvær hliðar á öllum málum. Við félagarnir förum hér yfir sögu Tekjublaðsins í þessari klippu Hluthafaspjallsins. - JGH

Kóngar, drottningar, biskupar, riddarar og peð fara á stjá - skákin byrjar aftur 4. september

Sun, 24 Aug 2025 16:08:33 GMT

SKÁK OG MÁT! Skákáhugi ungmenna í Grafarvogi er löngu þekktur og rómaður. Núna þegar skólabjallan glymur eftir gott sumarfrí þá fara líka drottningar, kóngar, biskupar, riddarar og peð á stjá aftur á skákæfingum Fjölnis.

Fyrsta skákæfing vetrarins hjá Fjölni verður fimmtudaginn 4. september næstkomandi.

Æfingarnar verða að venju alla fimmtudaga í Rimaskóla frá kl. 16:30 - 18:15. Gengið er inn um íþróttahúsið.

Þetta eru líflegar æfingar með skákmóti, skákþjálfun fyrir byrjendur, skúffuköku og verðlaunahátíð í lok hverrar æfingar.

Að sögn Helga Árnasonar , formanns skákdeildar Fjölnis, er tilhlökkun í lofti og hann á von á góðri þátttöku í vetur. Æfingarnar séu ókeypis en æskilegt sé að þátttakendur kunni eitthvað fyrir sér í undirstöðuatriðum skáklistarinnar; eins og mannganginn og ef til vill aðeins meira.

Það er óhætt að taka undir að skákin sé skemmtileg hjá skákdeild Fjölnis. Skemmtunin byrjar um leið og ýtt verður á skákklukkurnar 4. sept og stendur svo fram í maí á næsta ári.

Þetta er lofsvert framtak hjá Fjölni. - JGH

Skákáhugi ungmenna í Grafarvogi er rómaður. Drottningar, kóngar, biskupar, riddarar og peð fara aftur á stjá í Rimaskóla þegar skákæfingar Fjölnis hefjast fimmtudaginn 4. sept. næstkomandi.

Á hvítum reitum og svörtum. Það er jafnan líf og fjör á skákæfingum Fjölnis. Skákin heillar og er góð hugarleikfimi.

Ljósin munu tala saman

Sat, 23 Aug 2025 10:17:15 GMT

SAMTENGING! Það gengur mikið á í umferðinni á Höfðabakkabrúnni þessa dagana vegna framkvæmda sem miðast fyrst og fremst að því að setja upp ný og tæknivæddari umferðarljós - sem og að auka öryggi gangandi vegfarenda og hjólareiðamanna á nokkrum gatnamótum við Höfðabakkann - meðal annars brúnni.

Þegar Grafarvogur.net leitaði upplýsinga hjá eftirlitsaðila um þessar framkvæmdir - og birst hafa að undanförnu - kom fram að um nýjustu tækni er að ræða í ljósbúnaðinum og lögð er áhersla á að samtengja ljósastýringuna á öllum gatnamótum Höfðbakkans.

Með öðrum orðum: Ljósin eiga að tala saman.

Vonandi mun þær samræður ganga vel. - JGH

Hnútar og rembihnútar við gatnamótin um Bæjarhálsinn

Fri, 22 Aug 2025 09:23:17 GMT

BÆJARHÁLSAHNÚTURINN. Gatnamótin við Höfðabakka og Bæjarhálsinn hafa um langt skeið verið eins konar martröð bíleigenda sem þar hafa átt leið um frá klukkan tvö til fimm á daginn. Allt í hnút og oft í rembihnút.

Núna er verið að þrengja enn að umferðinni við þessi gatnamót - og máttu þau þó ekki við því. Verið er að taka tvær beygjuakreinar af inn í Árbæinn þegar ekið er upp Höfðabakkann að Bæjarhálsi og ein höfð í staðinn.

Svolítil hliðrun til hægri á akreinunum fyrir vikið þegar ekið er upp Höfðabakkann að Bæjarhálsi. Þarna verða þrjár akeinar. 1) Sú lengst til vinstri í Árbæinn. 2) Sú í miðjunni í Breiðholtið. 3) Sú sem er lengst til hægri liggur inn á Ártúnsholtið og þar er í raun verið að búa til nýja akrein.

En taki menn eftir því að akreinin lengst til hægri sem liggja mun í Ártúnsholtið verður ekki með biðskyldu heldur LJÓSUM.

Sama verður upp á teningnum um hægribeygjuna frá Bæjarhálsi niður að Höfðabakka. Þar verður ekki lengur beygja með biðskyldu heldur LJÓSUM.

Hafi verið hnútar og rembihnútar í umferðinni þarna um langt skeið þá verða þarna enn meiri tafir á þessum tíma dags með þessum breytingum. Líklega verður umferðarhnúturinn núna kallaður Bæjarhálsarembihnúturinn.

Þarna er verið að breikka miðeyjuna á Höfðabakka og setja ný og fullkomnari umferðarljós. - JGH

Þær voru tvær en verða ein. Verið er að taka eina beygjuakrein af frá Höfðabakka inn í Ábæinn og breikka miðeyjuna - sem og að setja upp ný og fullkomnari umferðarljós.

Miðeyjan breikkuð til að auka öryggi gangandi vegfarenda og hjólreiðarmanna - sem og setja upp ný og fullkomnari umferðarljós.

Veröld sem var. Nú verður akreinunum hliðrað til hægri.

Hægribeygjan inn í Ártúnsholtið gerð krappari og með ljósum. Beygjan var þægilegri áður og með biðskyldu til að greiða fyrir umferðinni. Rætt er víst um „beygjuvasa“ hvaðan sem það orð er komið.

Sama hér. Hægribeygjan af Bæjarhálsi niður á Höfðabakka var áður með biðskyldu en núna hefur hún verið gerð krappari og með ljósum.

Þrengingar settar upp í byrjun vikunnar en fyrst í dag verður tekið til hendinni

Fri, 22 Aug 2025 08:29:43 GMT

ÓÞARFA ÞRENGINGAR! Það hefur vakið athygli allra Grafarvogsbúa sem átt hafa leið um Höfðabakkabrúna í vikunni að þrengingar voru settar þar upp í byrjun vikunnar en síðan hefur ekkert verið að frétta - ekki sést til neinna við verkið.

Tafir munu hafa orðið á afhendingu kantsteina og mun verða settur gangur í verkið í dag og um helgina.

En auðvitað spyrja Grafarvogsbúar sig að því hvers vegna þrengingarnar voru ekki teknar niður stax og það lá fyrir að ekki væri hægt að vinna við þessa miðeyju á brúnni í vikunni - en framkvæmdirnar snúast um að framlengja eyjuna lítillega og setja upp ný og fullkomin umferðarljós.

Þarna var búinn til óþarfa umferðarhnútur í vikunni.

Eins má spyrja sig að því hvers vegna byjað sé á þessum framkvæmdum eftir sumarfrí þegar samfélagið fer á fullan snúning aftur og umferðin stóreykst að sama skapi? - JGH

Leiðin í Grafarvoginn af Vesturlandsvegi upp á Höfðabakkabrúna. Hér var sett upp þrenging í byrjun vikunnar sem hefur skapað svakalegar tafir í umferðinni. Hvers vegna voru þessar þrengingar ekki teknar strax niður fyrst ekki var hægt væri að byrja á verkinu af fullum krafti.

Áfram verða tvær beygjuakreinar til vinstri yfir á Vesturlandsveginn

Thu, 21 Aug 2025 16:43:22 GMT

HÖFÐABAKKABRÚIN. Framkvæmdirnar á Höfðabakkabrúnni hafa fengið hár Grafarvogsbúa til að rísa undanfarna daga - en nóta bene; ekki af hrifningu heldur af áhyggjum um að verið sé að þrengja enn frekar að bílaumferðinni á þessum hvað fjölförnustu gatnamótum borgarinnar.

Eftir þeim upplýsingum sem Grafarvogur.net hefur aflað sér hjá eftirlitsaðila verksins þá verða tvær beygjuakreinar áfram á Höfðabakkabrúnni til vinstri niður í beygjuvasa að Vesturlandsvegi (en þar verða tvær akreinar að einni eins og verið hefur til þessa) - en mesti óttinn hefur um hvort verið sé að „taka Bæjarhálsinn á þetta“ á brúnni.

ÁFRAM TVÆR BEYGJUAKREINAR

Þannig að þegar ekið er frá Gullinbrú upp Höfðabakkann og á Höfðabakkabrúna verður þetta að óbreytt - þrjár akreinar. 1) Lengst til vinstri; beygjuakrein til vinstri á Vesturlandsveginn. 2) Miðakreinin verður bæði beygjuakrein til vinstri á Vesturlandsveginn sem og áfram upp í Breiðholt. 3) Sú sem er lengst til hægri verður eingöngu fyrir hægribeygjuna niður í bæ.

Miðeyjan sem nú er afmörkuð - og myndin er af hér að framan - verður framlengd lítillega fyrir ný umferðarljós sem koma þar syðst á hana - og breikkuð eitthvað lítillega rétt í kringum nýju ljósin.

HÆGAGANGUR. Svæðið var afmarkað í byrjun vikunnar en lítið sem ekkert hefur verið unnið þarna síðan og tálmanir eingöngu til að tefja fyrir.

Eftir því sem Grafarvogur.net kemst næst munu tafir hafa orðið á afhendingu kantsteins en til stendur að vinna alla helgina við verkið.

Hér má sjá kynningu borgarinnar á framkvæmdunum á öllum gatnamótum við Höfðabakkann, þ.e. við Stórhöfða, Dvergshöfða, Bíldshöfða og við umtalaðan Bæjarháls - JGH

Ný götuljós verða sett þarna fremst á miðeyjuna - að öðru leyti verður flæði umferðarinnar um brúna óbreytt. Það er ekki verið að „taka Bæjarhálsinn“ á þetta.

Miðeyjan var afmörkuð með tálmunum í byrjun vikunnar en síðan hefur ekkert verið að frétta og verkið tafist. Skv. upplýsingum Grafarvogs.net verður unnið hörðum höndum í verkinu um helgina.

Hvað verður gert?

1) Framkvæmdin felur í sér endurnýjun umferðarljósa á 5 gatnamótum á Höfðabakka, við Stórhöfða, Dvergshöfða, Bíldshöfða, Vesturlandsveg og Bæjarháls.
2) Einnig verða gerðar endurbætur m.t.t. umferðaröryggis á gatnamótunum.
3) Við Stórhöfða, Dvergshöfða og Bíldshöfða verða gerðar endurbætur á umferðarljósum og á gönguleiðum, miðeyjur á Höfðabakka breikkaðar og götulýsing bætt. (Hér fær Grafarvogur.net staðfest að um óverulega breikkun á miðeyjum sé að ræða nema rétt við gangbrautirnar.)
4) Á Höfðabakkabrú við Vesturlandsveg verða gerðar endurbætur á gönguleiðum og götulýsing bætt. Gálgastaurar umferðarljósa verða fjarlægðir og umferðarljósastaurar staðsettir á nýjum stöðum.

Austan megin á Höfðabakka eru vinstribeygjureinar aðskildar frá akreinum til norðurs með eyju. (Þetta er komið).

5) Við Bæjarháls verða gerðar endurbætur á umferðarljósum og á gönguleiðum, miðeyjur á Höfðabakka breikkaðar, hægribeygjuframhjáhlaup fjarlægð og götulýsing bætt.

6) Á hægribeygjuframhjáhlaup sem ekki verða með umferðarljósum verða settar malbikaðar upphækkanir.

7) Gert er ráð fyrir að unnið sé við ein gatnamót í einu þó að möguleiki sé á að skörun verði á milli gatnamóta með einhverja verkhluta.

Verið að rífa niður tankana við Sævarhöfða

Thu, 21 Aug 2025 15:21:30 GMT

NIÐURRIF! Verið er að rífa síðasta tankinn af þremur við Sævarhöfðann - gegnt Sorpu. Tankarnir hafa verið hluti af starfsemi Malbikunarstöðvarinnar Höfða.

Þessir tankar hafa ekki beint verið augnayndi en fyrir rúmum fimm árum kviknaði í einum þeirra og hefur klæðningin utan um hann borið þess merki síðan. Sjá frétt í Vísi um það mál þá.

Malbikunarstöðin Höfði er í eigu Reykjavíkurborgar og Aflvaka. Í janúar árið 2022 var gert samkomulag við Höfða um að stöðin flytti starfsemi sína vegna nýrrar framtíðarsýnar borgarinnar á þessu svæði og fékk fyrirtækið lóð við Álhellu í Hafnarfirði og hefur verið á báðum stöðum síðan - en skrifstofurnar eru við Sævarhöfðann.

Niðurrif tankanna núna er liður í að hreinsa svæðið sem sannast sagna er heldur óhrjálegt og er fyrir neðan nýju blokkirnar á Hamrinum á Ártúnshöfða - Eirhöfða - og fóru í sölu í byrjun árs. - JGH

Síðasti tankurinn af þremur rifinn niður.

Eldur kviknaði í einum tankanna í apríl 2020.

Malbikunarstöðin Höfði er núna að mestu með starfsemi sína í Hafnarfirði.

Hluthafaspjallið: Jón Ásgeir hefur búið til nýjan risa á markaðnum; Dranga

Wed, 20 Aug 2025 10:35:34 GMT

DRAGNAR-HINN NÝI RISI. Í nýjasta hlaðvarpsþætti okkar Sigurðuar Más Jónsson, Hluthafaspjalli ritstjóranna, ræðum við meðal annars hinn nýja risann á matvörumarkaðnum sem Jón Ásgeir Jóhannesson, stjórnarformaður Skeljar, hefur búið til. Þetta er fyrirtækið Drangar sem er nákvæmlega eins byggt upp og Festi og Hagar.

Þessi umræða okkar hefur þegar vakið athygli og vísar DV í hana.

Vissulega er það fyrirtækið Skel sem heldur utan um Dranga en í þættinum ræðum við um að þetta sé leið Jóns Ásgeirs Jóhannessonar inn á matvörumarkaðinn aftur.

Hann stofnaði jú Bónus á sínum tíma ásamt föður sínum Jóhannesi Jónssyni.

Drangar eru nákvæmlega eins upp byggðir og Festi og Hagar og velta um 75 milljörðum króna á ári. Innan samstæðunnar eru Samkaup, Orkan og Lyfjaval. Samkaup reka m.a. Nettó, Iceland og Kjörbúðirnar.

Til stendur að skrá Dranga í Kauphöllina eftir um tvö ár. Meginmarkmið Dranga er núna að ná betri innkaupum og stefnir fyrirtækið á að hagræða um allt að 3 milljarða í rekstrinum á næstu tveimur árum.

Inn í spjall okkar félaganna um Dranga fléttast svo óvænt inn 20 ára gömul umræða um fyrirtækið Dagsbrún. - JGH

Hluthafaspjallið: Kaup símafyrirtækjanna á markaðstorgum

Sun, 17 Aug 2025 21:56:35 GMT

HLUTHAFASPJALLIÐ. Það er athyglisvert að símafyrirtækin hafa fest kaup á litlum fyrirtækjum sem hafa hannað bókunarkerfi fyrir ýmis þjónustufyrirtæki. Segja má að þessi fyrirtæki sé svonefnd markaðstorg.

Við Sigurður Már Jónsson, ræðum þessi mál í nýjasta hlaðvarpsþætti okkar, Hluthafaspjalli ritstjóranna, en í nýjasta uppgjöri Nova kemur t.d. fram að Nova hafi greitt 350 milljónir fyrir 20% hlut í fyrirtækinu Dineout sl. vor og jafnframt veitt því 250 milljóna lán sem hægt er að breyta í hlutafé.

Markaðsvirði Dineout í þessum viðskiptum var því um 1,7 milljarðar króna. Dineout er fyrirtæki þar sem fólk getur pantað sér borð á öllum helstu veitingastöðum landsins.

Í fyrra keypi Síminn bókunarþjónustuna Noona en hún var valin smáforrit ársins 2023 og mældist jafnframt vinsælasta vefþjónusta landsins, skv. könnun Maskínu.

Allt gengur þetta jú út á að bóka þjónustu við hin ýmsu fyrirtæki í gegnum síma í stað þess að hringja - og auðvitað fá bókunarfyrirtækin þjónustugjöld.

Hér má sjá stutta klippu af umræðunni. - JGH

Panta borð á veitingastöðum með símtækinu. Margrét Tryggvadóttir, forstjóri Nova, og Inga Tinna Sigurðardóttir, stofnandi og forstjóri Dineout, eru hér fyrir miðju. Myndin var tekin við undirritun samnings um fjárfestingu Nova í vor.

Hlaðvarp okkar Sigurðar Más á Brotkast - af nógu að taka í nýjasta þættinum

Sun, 17 Aug 2025 21:26:22 GMT

Nýjasti hlaðvarpsþáttur okkar félaganna, Hluthafaspjall ritstjóranna á efnisveitunni Brotkast.is, var tekinn upp í hádeginu á föstudag og reyndist líflegur að vanda.

1. Við berum saman þróun Úrvalsvísitölunnar og Dow Jones.

2. Ræðum Dranga, hinn nýja matvörurisa Skeljar, en Drangar eru leið Jóns Ásgeirs inn á matvörumarkaðinn.

3. Hún var mjög svo athyglisverð athugasemd Skeljar við rekstur einstakra deilda Sýnar en Skel er stærsti hluthafinn í Sýn með

10% hlut.

4. Hvaða efnahagsþvinganna mun Trump grípa til ef Pútín haggast ekki?

5. Bréfin í Nova hafa heldur betur mallað upp á við á árinu.

6. Hvers vegna kaupa símafyrirtækin í þekktum bókunarfyrirtækjum?

7. Bankadans Kviku og Arion banka og mikilvægi þess að Samkepnniseftirlitið gefi svar um sameininguna áður en lengra er

haldið.

8. Hagnaður íslensku bankanna, sem mörgum finnst nú nóg um, er minni en hagnaður stærstu bankanna á Norðurlöndunum.

9. Uppgjör Alvotech.

10. Amaroq. Og auðvitað ýmislegt fleira. Spennandi þáttur.

Elín Pálsdóttir, eiginkona Vigfúsar Þórs, er látin

Sat, 16 Aug 2025 19:38:22 GMT

ANDLÁT. Ein styrkasta stoð safnaðarfélagsins í Grafarvogssókn, Elín Pálsdóttir, eiginkona séra Vigfúsar Þórs Árnasonar, er látin. Fjölskylda hennar greinir frá þessu í dag á samfélagsmiðlum og með dánartilkynningu í Morgunblaðinu.

Grafarvogur.net vottar börnum og fjölskyldu Elínar innilegrar samúðar en séra Vigfús lést fyrr á þessu ári, hinn 28. febrúar sl.

Elín vann ómetanlegt starf fyrir sóknina og kirkjuna og var ásamt nokkrum konum fremst í flokki í Safnaðarfélaginu - ritari þess frá byrjun. Grafarvogskirkja á henni mikið að þakka.

Meðfylgjandi mynd er fengin úr bókinni Grafarvogssókn 25 ára sem Sigmundur Ó. Steinarsson skráði en undirritaður naut þess heiðurs að vera í ritnefnd bókarinnar og kynntist Elínu og störfum hennar vel í kirkjunni. Bókin kom út árið 2014 á 25 ára afmæli sóknarinnar.

Á opnunarmyndinni er Elín með dætrum sínum Björgu og Þórunni Huldu , frú Agnesi M. Sigurðardóttur , þáverandi biskupi Íslands, og eiginmanninum Vigfúsi Þór en hún var svo sannarlega stoð hans og stytta alla tíð.

Blessuð sé minning Elínar Pálsdóttur. - JGH

Fjölskylda Elínar greinir frá andláti hennar í Morgunblaðinu í dag.

Stjórn safnaðarfélagsins á 25 ára afmælisárinu, 2014. Elín fyrir miðju. Frá vinstri: Rósa Jónsdóttir, Guðrún Helgadóttir, Bergþóra Valsdóttir formaður, Elín, Stefanía Baldursdóttir, Edda Jónsdóttir og Jónína Jóhannsdóttir.

Hugljúf mynd úr fjölskyldualbúminu af mömmu og pabba sem fjölskyldan birtir í dag en Vigfús Þór lést fyrir rúmum fimm mánuðum, 28. febrúar sl.

Fróðlegt viðtal var við Elínu í 25 ára afmælisriti Grafarvogssóknar. Hún vann ómetanlegt starf fyrir kirkjuna ásamt stórum hópi sjálboðaliða.

Stöplarnir fyrir möstrin: Fyrsta stóriðjan á Íslandi var í Grafarvogi

Sat, 16 Aug 2025 16:45:06 GMT

FYRSTA STÓRIÐJAN. Frétt okkar um stöplana sem eru sitt hvorum megin í Grafarvogi – og sem margir Grafarvogsbúar hafa furðað sig á – hefur vakið athygli en stöplarnir héldu uppi möstrum fyrir rafmagnslínur sem fluttu rafmagn í Áburðarverksmiðjuna í Gufunesi. Verksmiðjan tók til starfa árið 1954 og var hluti af Marshall-aðstoðinni við Íslendinga.

Grafarvogshverfið á sér því sína stóriðjusögu. Áburðarverksmiðjan í Gufunesi var fyrsta stóriðjan á Íslandi. Íslenskar verksmiðjur snerust fram að því bara í kringum sjávarfang - og yljuðu landanum með peningalykt.

Fréttin um stöplana undir möstrin fyrir rafmagnslínurnar sem lágu í Áburðarverksmiðjuna vakti athygli og var mikið lesin. Meira kemur til; Grafarvogshverfið var í raun vettvangur fyrstu alvöru stóriðjunnar á Íslandi. Við segjum hér þá sögu.

AFLIÐ KOM FRÁ ÍRAFOSSI Í SOGINU

En Áburðarverksmiðjan í Gufunesi var langþráð stóriðja sem nýtti orku fallvatnanna. Afl fossanna – það er að segja Írafoss í Soginu – sem knúði vélar og umbreytti efnum í eftirsótta vöru; stóriðja drifin áfram með rafmagni.

„Brauð veitir sonum, móðurmoldin frjóa,“ spáði Hannes Hafstein í aldamótakvæði sínu. En til að svo mætti verða þurfti áburð, tilbúinn áburð. Túnáburð. Fyrsta vörumerkið frá hinni nýju stóriðju í Gufunesi var: Kjarni – Köfnunarefnisáburðurinn Kjarni!

GUL GUFA Á GÓÐVIÐRISDÖGUM

Köfnunarefni, vetni og ammoníak varð til í verksmiðjunni í Gufunesi og stundum steig gul gufa þar upp úr strompum á góðviðrisdögum. En áður varð að flytja allt þetta inn. Núna varð þjóðin sjálfri sér nóg um þessar efnalegu forsendur lífsgæða.

Þannig er Grafarvogshverfið tengt upphafi nýrra tíma á Íslandi. Endalaust nýir tímar.

Íslenskir verkamenn fengu vinnu í alvöru stóriðju. Togarajaxlar, sem voru orðnir lúnir á að stíga ölduna á Halanum, stóðu nú stoltir og hlóðu verðmætri vöru á bretti til að tryggja mjólkurmat og kjöt fyrir landsmenn.

Baltasar Kormákur keypti húsnæði verksmiðjunnar og rekur þar kvikmyndaver - Reykjavik Studios - en kvikmyndaframleiðsla gæti orðið stóriðja framtíðarinnar á Íslandi.

MARSHALL-ÁÆTLUNIN

Og að sjálfsögðu var slík framkvæmd sem þessi stórpólitísk, já heimspólitísk. Ekkert minna. Fé til byggingar á þessu undraverki kom frá Ameríku. Bandaríkjamenn fjármögnuðu Marshall-áætlunina til endurreisnar Evrópu eftir hörmungar stríðsins og yfirvofandi fátækt.

Stríðið gerði að vísu syni Íslands ríka – en landsmenn þurftu engu að síður á stuðningi að halda til að forðast freistingar sovét-kommanna í Köldu stríði eftirstríðsáranna. Framfarir, atvinna og velmegun.

MENGUN OG HEILSUVÁ – FRAMLEIÐSLU HÆTT 2002

En svo fór íbúðabyggð í nýju Grafarvogshverfi að þrengja að verksmiðjunni. Sprengingar urðu við framleiðslu á ammoníaki. Mengun og heilsuvá varð til þess að samið var um að hætta framleiðslu árið 2002 og loka í áföngum. Borgin tók við landinu og skipulagði uppá nýtt.

Þá var liðin um hálf öld frá stofnun verksmiðjunnar, önnur stóriðja tekin við og Áburðarverksmiðjan í Gufunesi bara eins og smáiðja í samanburði við hinar stóru málmbræðslur - og eftir því gamaldags.

Nafli alheimsins?

Nei, en Grafarvogshverfið á sína stóriðjusögu sem á rætur í heimspólitík Kalda stríðsins. – GK/JGH

Verksmiðjan var vígð og tók til starfa árið 1954.

Bryggja Áburðarverksmiðjunnar í Gufunesi gegndi miklu hlutverki á sínum tíma. Núna er hún helst notuð af dorgveiðimönnum. Raunar er bannað að fara út á hana.

Skýfall og svo rökkvaði skyndilega kl. þrjú um hábjartan daginn. Hlustaðu á regnið!

Fri, 15 Aug 2025 16:56:47 GMT

ÚRHELLI. Það brast skyndilega á með þrumum og eldingum þegar Grafarvogur.net var á ferð um hverfið í dag klukkan þrjú - og í ofanálag rökkvaði all hressilega.

Dagurinn; 15. ágúst 2025.

Hásumar.

Sumarklæddur og án regnhlífar þurfti ég svo að koma mér út úr bílnum - heim kominn.

Regnið buldi á bílnum.

Datt í hug að bíða regnið af mér.

Það þarf ekki að vökva blómin úti í dag - hugsaði ég með mér.

- Það var búið að spá þessu, sagði frúin.

Alltaf gott að heyra af spánni eftir á.

Ég hef alltaf verið vitur eftir á.

Tilvalið að taka regnið upp - þ.e. með símanum; á vídeó.

Það má hlusta,

- og líka á lagið Hlustaðu á regnið . - JGH

Spöngin kl. þrjú í dag. Það rökkvaði all hressilega um hábjartan dag.

Hlustaðu á regnið með Trúbrot þar sem Shady Owens fer á kostum.

Borgin ætlar að hreinsa til í bílakirkjugarðinum við N1: „Þetta er ekki geymslusvæði“

Thu, 14 Aug 2025 22:55:59 GMT

BÍLAKIRKJUGARÐURINN FYRIR NEÐAN N1. Hjalti J. Guðmundsson, skrifstofustjóri borgarlands , segir að borgin muni fara í átak við að hreinsa svæðið fyrir neðan N1 bensínstöðina við Veghús á næstunni. Borgin muni líma miða á þá ónúmeruðu bíla sem þarna eru og gefa eigendum þeirra færi á að koma bílunum eða hjólhýsunum í burtu inna tiltekins tíma.

„Við höfum hreinsað og tekið bíla af þessu svæði áður en það fyllist jafnóðum aftur. Það þarf sjálfsagt að kynna það betur fyrir íbúum að þetta er alls ekki geymslusvæði,“ segir Hjalti í samtali við Grafarvog.net.

ÞÖRF Á VIÐHORFSBREYTINGU SUMRA ÍBÚA

Grafarvogur.net hefur flutt fréttir af þessum bílakirkjugarði að undanförnu og að stórhætta stafi af því fyrir börn að leik, og borgin eigi ekki að láta það líðast að þar séu bílhræ og annað drasl.

Að sögn Hjalta þarf viðhorfsbreytingu hjá þeim íbúum sem líta á þetta svæði sem geymslusvæði eða einhvern ruslahaug fyrir ónotaða bíla og annað drasl.

„ÞETTA ER EKKI GEYMSLUSVÆÐI“

Hjalti segir ennfremur að borgin hafi verið með þetta svæði undir smásjánni í eitt ár og dregið nokkurn fjölda bíla í burtu en jafnóðum bætist nýir við. Hann segist ennfremur hafa fullan skilning á því að íbúar séu óánægðir en á móti komi að þeir íbúar sem líti á þetta svæði til að losa sig við bíla - eða sem einhvers konar geymslusvæði - verði að virða það að þetta sé hvorki geymslusvæði né bílastæði - og hvað þá ruslahaugur fyrir ónýta bíla.

Grafarvogur.net sagði í frétt í gær að það væri í raun Heilbrigðiseftirlit Reykjavíkur sem annist þessi mál af hálfu borgarinnar og límir viðvörunarmiða á bíla þar sem eigendum þeirra er gefinn ákveðinn tímafrestur til að draga þá í burtu.

Spurður um hvort ekki sé hægt að afmarka þetta svæði með hindrunum eða girða það af, svarar Hjalti því til að það komi vel til greina að setja þarna upp áberandi skilti um að þetta sé alls ekki geymslusvæði þótt öllum eigi að vera það ljóst. - JGH

Grafarvogur.net hefur flutt fréttir af bílakirkjugarðinum og ruslahauginum fyrir neðan N1 við Víkurveg-Veghús. Skrifstofustjóri borgarlands segir við Grafarvog.net að borgin muni fara í átak á næstu dögum við að hreinsa svæðið.

Hér er brotin rúða í einu hjólhýsanna - og er það auðvitað stórhættulegt fyrir börn að leik.

Hjalti segir ennfremur að borgin hafi verið með þetta svæði undir smásjánni í eitt ár og dregið nokkurn fjölda bíla í burtu en jafnóðum bætist nýir við. Það þurfi viðhorfsbreytingu hjá þeim íbúum sem telji þetta svæði geymslusvæði, bílastæði - og hvað þá ruslahaug fyrir ónóta bíla.

Hjalti segir að borgin muni á næstu dögum grípa til aðgerða og fara í átak við að hreinsa þetta svæði fyrir neðan N1 bensínstöðina við Veghús. Hann segist hafa skilning á óánægju íbúa en því miður líti allir íbúar svæðið ekki sömu augum. „Þetta er ekki geymslusvæði,“ áréttar Hjalti.

Þetta er ekki heldur bílastæði.

Hönnun ekki lokið á hringtorgunum en borgin ætlar að snyrta þau til á næstunni

Thu, 14 Aug 2025 16:42:40 GMT

HRINGTORGIN VIÐ EGILSHÖLL! Hjalti J. Guðmundsson, skrifstofustjóri borgarlands , segir í viðtali við Grafarvog.net að meginástæðan fyrir því að ekki sé búið að setja niður gróður og ganga frá á tveimur umdeildum hringtorgum við Víkurveg, skammt frá Egilshöll, sé sú að endanlegri hönnun þeirra sé ekki lokið.

Spurður um hvort ekki sé hægt að snyrta torgin eitthvað til fljótlega, segir hann að hann muni koma því áleiðis að eitthvað verði gert á næstunni til að betrumbæta ásýnd þeirra.

Óræktin á þessum tveimur hringtorgum með njóla og illgresi hefur vakið furðu flestra Grafarvogsbúa enda dágóður tími frá því verktaki lauk við gerð hringtorganna. Óhætt er að segja að flestir íbúar bjuggust við að ráðist yrði í framkvæmdir ekki seinna en

síðastliðið vor og að þetta hafi allt saman tekið óþarflega langan tíma.

Að sögn Hjalta verður væntanlega hafist handa við að standsetja hringtorgin næsta vor þegar hönnun þeirra verður lokið - og jafnvel farið fyrr í verkið ef hönnunin verður tilbúin fyrr en áætlað er. - JGH

Mynd af hringtorginu við Víkurveg og Borgaveg fyrr í vikunni. Íbúi í Grafarvogi réðst á njólann í sumar og stakk hann upp en grastoppar og órækt blasir engu að síður við. Grafarvogsbúar hafa furðað sig á óræktinni miðað við að dágóður tími er liðinn frá því verktaki gekk frá torgunum.

Þetta hringtorg er til hreinnar fyrirmyndar og er við Borgaveg og Sóleyjarima.

Þessi mynd var tekin af hringtorginu við Borgaveg og Víkurveg í byrjun júní og njólinn þá orðinn allsráðandi. Ekki gott! Enda tók óþreyjufullur íbúi Grafarvogs sig til og stakk njólann upp í sumar.

Þetta segir Heilbrigðiseftirlitið um númerslaus bílflök í borgarlandinu

Wed, 13 Aug 2025 10:37:41 GMT

REGLURNAR! Heilbrigðiseftirlit Reykjavíkur hefur svarað fyrirspurn Grafarvogs.net um þær reglur sem gila um númerslaus bílflök í borgarlandinu - en ábendingar um númerslausa bíla , hvort heldur á bílastæðum í íbúðahverfum eða á spildum borgarinnar, skal senda á Heilbrigðiseftirlitið sem tekur þá málið í sínar hendur.

Ívar Örn Árnason heilbrigðisfulltrúi svaraði eftirfarandi spurningum Grafarvogs.net:

1. Hvaða reglur gilda almennt um númerslaus bílhræ sem í leyfisleysi hefur verið komið fyrir á reitum sem tilheyra borgarlandinu?
„Heilbrigðiseftirlitið (HER) hefur heimildir fyrir því að láta fjarlægja númerslausar bifreiðar (og sambærilega hluti) á lóð borgarinnar að undangenginni viðvörun, sbr. grein 18 í hollustuháttareglugerðinni (903/2024) og grein 14 í reglugerð um meðhöndlun úrgangs.“

2. Hvaða reglur gilda um númerslausa bíla sem lögreglan hefur merkt að séu úr umferð og eru í bílastæðum í íbúðahverfum?

„Þegar það kemur að bifreiðum sem eru skráðar „Úr umferð“ í ökutækjaskrá þá er litið á þær sem númerslausar bifreiðar því skráningarnúmerin eru úr umferð. Þegar ábending berst til Heilbrigðiseftirlitsins um að bifreið sé númerslaus eða skráð „Úr umferð“ á borgarlóð þá er límdur viðvörunarlímmiði á rúður hennar með frest um að láta fjarlægja bifreiðina (eða setja á hana gild skráningarnúmer).“ - JGH

„Heilbrigðiseftirlitið (HER) hefur heimildir fyrir því að láta fjarlægja númerslausar bifreiðar (og sambærilega hluti),“ segir heilbrigðisfulltrúi.

Ábendingar um bílhræin þurfa að berast til Heilbrigðiseftirlitgs Reykjavíkur.

Frétt Grafarvogs.net um bílakirkjugarðinn hefur haft áhrif - það er byrjað að grisja

Tue, 12 Aug 2025 22:59:43 GMT

GRISJUN HAFIN! Frétt Grafarvogs.net um bílakirkjugarðinn fyrir neðan bensínstöð N1 við Veghús hefur haft áhrif. Eigendur bílhræjanna eru byrjaðir að grisja.

En betur má ef duga skal - enn standa þarna nokkur bílflök og það sem meira er; tjaldvagnar og fellihýsi hafa bæst við.

Þá hefur eigandi mikils dreka með stóra hestakerru í eftirdragi séð sér færi á að leggja þarna þegar rými hafði myndast við grisjun skrjóðanna sem hafa verið fjarlægðir. Og líkt og síðast er stórum flutningabíl lagt á svæðinu - þó ekki sá sami og um daginn.

Grafarvogur.net hefur verið í samskiptum við Heilbrigðiseftirlit Reykjavíkur að undanförnu út af frétt okkar og hyggst fylgja þessu máli eftir.

Við sýnum hér nokkrar myndir frá því í kvöld þegar við renndum þarna við og tókum stöðuna - og berum hana saman við fyrri frétt okkar um málið. - JGH

Þessir vinir eru þarna ennþá og sýna ekki á sér neitt fararsnið.

FARINN. Þessi eðalvagn er farinn en lúxuskerran ennþá þarna - en búið að fjarlæga draslið á kerrunni sem leyndist undir teppinu. Það var þeirrar gerðar að því var ekki sópað undir teppið.

DEKKIN FARIN. Þessi dekk hafa verið fjarlæð.

FARNAR. Þessar tvær eðaldrossíur er farnar. En þá myndaðist rými til að lauma fellihýsi inn á svæðið...

...þessu fellihýsi hérna.

ENNÞÁ. Þessi tvenna er þarna ennþá!

VIÐBÓT. Kerran í miðjunni og tjaldvagninn til hægri hafa bæst við á svæðinu.

NÝTTI SÉR RÝMIÐ . Eigandi þessa dreka (á númerum) með hestakerruna í eftirdragi nýtti sér í kvöld rýmið á svæðinu sem myndaðist við grisjun skrjóðanna.

TRUKKUR . Þarna er líka nýr, stór og stæðilegur trukkur - en hann er á númerum. Raunar er þetta ekki sami trukkurinn og var þarna síðast.

Hvaða stöplar eru þetta sitt hvorum megin við voginn okkar?

Mon, 11 Aug 2025 20:14:21 GMT

STÖPLARNIR? Þessir stöplar sitt hvorum megin í Grafarvogi vekja forvitni margra sem ganga daglega á hinum frábæru göngustígum við voginn. Hvaða stöplar eru þetta annars? Virðast svo sannarlega hafa sögu að geyma.

Þegar ég ræddi við Magnús Ásgeirsson , félaga minn og fyrrum sóknarnefndarformann í Grafarvogskirkju, á dögunum bárust þessar undirstöður og staurar í tal. Á þeim hvíldu á sínum tíma öflug möstur með rafmagnslínum.

Sagan er þessi: Þegar Áburðarverksmiðjan í Gufunesi var byggð var lögð lína úr Grafningi, norðan hrauna og Sandskeiðs að tengivirki því sem kallað var tengivirki Sogsstöðva sem var við Elliðaárstöð , á því svæði er nú leikvöllur og útivistarsvæði eftir að tengivirkið var fjarlægt.

Þaðan lá loftlína með tæpum 35 þúsund voltum frá tengivirkinu yfir Grafarvoginn og að Áburðarverksmiðjunni í Gufunesi.

Möstrin fyrir rafmagnslínurnar hvíldu á þessum undirstöðun en voru líklegast fjarlægð á áttunda áratugnum. - JGH

Hér var heildmikið vírvirki fyrir mörgum árum. Möstur með rafmagnslínum í Áburðarverskmiðjuna í Gufunesi hvíldu á þessum stöplum.

Stóraukinn hagnaður viðskiptabankanna þriggja á fyrri hluta þessa árs

Mon, 11 Aug 2025 19:08:48 GMT

HLUTHAFASPJALLIÐ! Hagnaður viðskiptabankanna þriggja var verulega hærri fyrstu sex mánuði þessa árs en á sama tímabili í fyrra - og jókst úr 36,6 milljörðum króna í 48,8 milljarða núna. Þetta er um 33% aukning.

Í nýjasta hlaðvarpsþætti okkar Sigurðar Más Jónssonar á Brotkast.is, Hluthafaspjalli ritstjóranna , rýnum við í þessar tölur og skoðum sérstaklega Arion banka en þar fór hagnaðurinn úr 9,9 milljörðum í fyrra í 18,1 milljarð núna.

Aukning hagnaðar Landsbankans og Íslandsbanka var svipaður eða um 2 milljarðar hjá hvorum bankanum fyrir sig.

Hér er hægt að skoða stutta klippu af þessu samtali okkar félaganna. https://www.youtube.com/watch?v=J_xl08kBr8I

Stóraukinn hagnaður viðskiptabankanna þriggja er á meðal þess sem við Sigurður Már

Jónsson ræðum um í hlaðvarpi okkar, Hluthafaspjalli ritstjóranna.

Er sóknarfæri Sýnar með enska boltanum að renna út í sandinn?

Mon, 11 Aug 2025 15:44:02 GMT

HLUTHAFASPJALLIÐ. Er sóknarfæri Sýnar að renna út í sandinn? Um það ræðum við Sigurður Már Jónsson í nýjasta hlaðvarpsþætti okkar, Hluthafaspjalli ritstjóranna , á efnisveitunni Brotkast.is.

Þegar Sýn náði enska boltanum af Símanum hafði Herdís Dröfn Fjeldsted , forstjóri Sýnar, orð á því að enski boltinn væri sóknarfæri fyrir Sýn.

En eftir að Fjarskiptastofa féllst óvænt á kröfu Símans um að sýna dagskrá Sýnar, eins og fréttir, íþróttir almennt og enska boltann, í opinni dagskrá, gegn ákveðnu gjaldi, má spyrja sig hvort umrætt sóknarfæri Sýnar sé að renna út í sandinn.

Ákvörðun Fjarskiptastofu er að vísu til bráðabirgða. En hlutabréfaverð Sýnar féll í kjölfarið.

Herfræði Sýnar hefur eflaust verið sú að ná þúsundum viðskiptavina Símans yfir til sín með þeim enska.

Hér er stutt klippa um spjall okkar Sigurðar Más um þetta efni. - JGH

Stutt klippa af umræðum okkar um enska boltann hjá Sýn en hlutabréfaverð Sýnar féll

eftir ákvörðun Fjarskiptastofu - ákvörðun sem er að vísu til bráðabirgða.

Hluthafaspjall ritstjóranna. Hér má sjá nýjasta þáttinn í heild sinni

Mon, 11 Aug 2025 15:31:53 GMT

HLUTHAFASPJALLIÐ. Það er óhætt að segja að boltinn rúlli víða í nýjasta hlaðvarpsþætti okkar Sigurðar Más Jónssonar, Hluthafaspjalli ritstjóranna , á efnisveitunni Brotkast.is, þar sem við ræðum málin að venju af miklu hispursleysi.

Við fjöllum um stóraukinn hagnað bankanna; enska boltann hjá Sýn; dans og tilhugalíf Arion og Kviku á bankaballinu; Alvotech og tolla Trumps; væntingar með JP Marel; horfurnar hjá Play, áhrif lítils hagvaxtar á ríkisfjármálin; Ísland og norræna vinnumarkaðsmódelið og sitthvað fleira. Líflegur þáttur - eins og vera ber - og takið eftir: h ér má sjá þáttinn í heild sinni, líkt og síðast. - JGH

Hér má sjá þáttinn í heild sinni á Brotkast.is

Helgi Árnason, skákfrömuður og fyrrum skólastjóri Rimaskóla, 70 ára í dag

Sat, 09 Aug 2025 21:32:47 GMT

TIL HAMINGJU HELGI. Helgi Árnason, skákfrömuður í Grafarvogi og fyrrum skólastjóri Rimaskóla, fagnar 70 ára afmæli sínu í dag og er skemmtileg afmælisgrein um hann í Morgunblaði dagsins.

Helgi hefur lyft grettistaki fyrir skáklistina í Grafarvogi og er formaður skákdeildar Fjölnis.

Skákin hefur blómstrað í Rimaskóla og áhugi ungmenna í Grafarvogi á skák vakið verðskuldaða athygli. Enginn hefur komið þar meira við sögu en einmitt Helgi Árnason.

Meðfylgjandi mynd af Helga var tekin þegar Styrktarsjóður Hringfarans úthlutaði fimm milljónum króna til barna- og unglingastarfs Skáksambands Íslands með því að stofna Skáksjóð Helga Árnasonar.

Mikill heiður það og verðskuldaður.

Grafarvogur.net óskar Helga til hamingju með daginn. - JGH

Helgi á skákæfingu með ungmennum í Grafarvogi. Hann er maðurinn á bak við hinn mikla skákáhuga í Grafarvogi.

Hún er fróðleg og skemmtileg afmælisgreinin um Helga í Morgunblaði dagsins.

Snjóskaflinn í Gunnlaugsskarði bráðnaður

Sat, 09 Aug 2025 21:05:44 GMT

BRÁÐNAÐUR! Snjóskaflinn í Gunnlaugsskarði í Esju þykir vera ábending um tíðarfar og loftslagsbreytingar. Páll Bergþórsson fyrrum veðurstofustjóri fylgdist með fönninni um langt skeið.

Garfarvogur.net sagði frá því föstudaginn 25. júlí að fannirnar í skarðinu væru að hverfa en þá voru þrír litlir skaflar eftir. Tíðarfarið í sumar hefur verið gott.

Fylgst hefur verið með fönnunum í Gunnlaugsskarði frá árinu 1847 - eða í bráðum 180 ár. Þau ár sem fannirnar hafa horfið hefur það gerst í ágúst.

Á 35 ára tímabili, frá 1929 til 1965, hurfu skaflarnir nítján sinnum. Frá 1966 til 1997 (33 ára tímabili) hurfu fannirnar ekki.

Eins og sjá má skartaði Esjan sínu fegursta þegar ljósmyndari átti leið um Strandveginn í kvöld. - JGH

Föstudagurinn 25. júlí. Fannirnar við það að hverfa.

Laugardagurinn 12. ágúst. Fannirnar í Gunnlaugsskarði horfnar.

Tíðarfarið í Reykjavík út frá skaflinum í Gunnlaugsskarði.

Hörkuleikdagur. Karlarnir mæta toppliði ÍR - og konurnar Selfyssingum

Fri, 08 Aug 2025 16:46:48 GMT

FÓTBOLTI. Þetta er hörkuleikdagur hjá Fjölni í knattspyrnunni og keppt á tvennum vígstöðvum. Karlarnir mæta toppliði ÍR í Breiðholtinu og konurnar halda austur á Selfoss og etja kappi þar.

Leikurinn við ÍR í Breiðholtinu byrjar kl. 19:15 en flautað verður til leiks á Selfossi kl. 19:00.

Karlarnir eru í mjög harðri keppni fimm liða í neðri hlutanum í Lengjudeildinni en konurnar eru í fjórða sæti í 2. deildinni.

Þetta eru leikirnir sem eftir eru hjá karlaliði Fjölnis fyrir leikinn í dag:

ÍR - Fjölnir.

Fjölnir - Njarðvík.

Selfoss - Fjölnir.

Fjölnir - HK

Fjölnir - Þróttur Reykjavík

Þór - Fjölnir

Fjölnir - Leiknir Rvík.

Áfram Fjölnir. - JGH

Leikurinn hjá konunum byrjar kl. 19:00 á Selfossi.

Staðan í Lengjudeildinni.

Staðan í 2. deild kvenna.

Regnbogavörur setja svip sinn á Hagkaup í Spönginni

Fri, 08 Aug 2025 09:17:12 GMT

HAGKAUP. Regnbogavörur setja núna sterkan svip á Hagkaup í Spönginni. Þegar inn er komið blasa við blöðrur í tugatali um alla verslunina - auk þess sem boðið er upp á fjölda smávara tengdum Hinsegin dögum.

Ekki fer á milli mála að vægi Hinsegin daga hefur vaxið jafnt og þétt og karnival-stemningin í kringum Gleðigönguna orðin að föstum lið í ágúst.

Gangan á morgun fer af stað frá Hallgrímskirkju kl. 14:00. Gengið verður niður Skólavörðustíg og Bankastræti - og síðan eftir Lækjargötu og Fríkirkjuvegi. Gangan endar í Hljómskálagarðinn þar sem útitónleikar taka við. - JGH

Litadýrð í Hagkaup og fjölmargar regnbogavörur.

Blöðrur um alla verslun.

Hringtorgið við Víkurveg - hvers vegna í ósköpunum? Enginn metnaður?

Wed, 06 Aug 2025 12:22:22 GMT

HVERFIÐ OKKAR! Það hefur valdið mörgum Grafarvogsbúanum heilabrotum og hugarangri hvers vegna í ósköpunum hringtorgið við Víkurveg og Borgaveg sé haft svona afspyrnu ljótt og óhirt ár eftir ár - ekki síst í ljósi þess að önnur hringtorg í Grafarvogi eru borginni til sóma og líta mjög vel út. Ber að hrósa fyrir umhirðu þeirra.

Sannast sagna er metnaðarleysi borgarinnar með hringtorgið við Víkurveg-Borgaveg allt að því óskiljanlegt.

Í byrjun júní birti Grafarvogur.net myndir af þessu hringtorgi þar sem njólinn réð ríkjum og þá var líka spurt hvers vegna.

Einhver öflugur Grafarvogsbúi missti svo þolinmæðina í sumar og réðst á njólann og stakk hann upp. Það var þjóðþrifaverk. (Væri gaman að vita hver þar hafi verið að verki).

Grastoppar blasa núna við á víð og dreif á torginu - ofvaxnir auðvitað í takt við stefnu borgarinnar að slá ekki nema hér og þar - sums staðar og hvergi.

Hvernig væri nú að borgin tæki sig tak og hefði þetta hringtorg í ætt við önnur hringtorg í Grafarvogi - þ.e. til fyrirmyndar og vel snyrt? - JGH

Vel gert! Hringtorgið við Borgaveg og Sóleyjarima í átt að Spönginni.

Vel gert! Hringtorgið fyrir ofan Spöngina.

Hringtorgið við Víkurveg-Borgaveg. Njólinn farinn en ofvaxnir grastoppar blasa við á víð og dreif. (Mynd tekin í gærkvöldi 5. ágúst.)

Njólinn allsráðandi á hringtorginu við Víkurveg-Borgaveg. (Mynd tekin að kvöldi 4. júní. sl.)

Skammarlegt! Bílakirkjugarður og ruslahaugur við Veghús fyrir neðan N1 stöðina

Tue, 05 Aug 2025 22:11:02 GMT

HVERFIÐ OKKAR! Það er með öllu ólíðandi og skammarlegt fyrir borgina að láta það líðast á lóð sinni við Veghús gegnt Víkurvegi, fyrir neðan N1 stöðina, að þar sé bílakirkjugarður og ruslahaugur.

Borgin ber algerlega ábyrgð á þessu en þessi reitur er einn af þeim sem borgin áformar að byggja á í tengslum við þéttingu byggðar hér í hverfinu okkar.

Ef til vill er það rétt sem fram kom í sumar, þegar íbúar við Sóleyjarima tóku sig til og slóu útivistarsvæðið fyrir neðan Fjarskiptastöð Isavia, að þeir töldu að svæðin sem borgin hyggst úthluta í tengslum við þéttingu byggðar í Grafarvogi séu viljandi látin drabbast niður.

Skömm að þessu svæði við Veghúsin og borgin ætti að sjá sóma sinn í því að hreinsa þetta svæði hið fyrsta og koma bílflökunum í burtu.

Þetta er fyrir neðan allar hellur. - JGH

Ja hérna.

Ekki boðlegt.

Skammarlegt.

Þessi var ekki notaður um nýliðna ferðahelgi.

Þessi var á leiðinni á haugana þegar síminn hringdi og tafðist aðeins - nú fara bæði bíll og kerra í förgun.

Þrjú hjól - ekki undir bílnum.

Brotin rúða - stórhættulegt.

Gleymst að fara með þetta skrauthýsi í skoðun.

Lúxuskerra og eðalhjólhýsi.

Þessi með krana en verður sjálfur hífður burtu.

Hrein borg, fögur borg. Hér þarf borgin að bretta upp ermarnar - og það hið snarasta. Þessi haugur er til háborinnar skammar.

Bílakirkjugarðurinn er fyrir neðan bensínstöð N1 við Veghús. Víkurvegur til hægri. Grasivaxna brekkan að haugnum snyrtilega slegin.

Hluthafaspjallið - kaup alþjóðlegs bílafyrirtækis á Öskju vekja athygli

Mon, 04 Aug 2025 14:49:04 GMT

HLUTHAFASPJALLIÐ. Í nýjasta þætti Hluthafaspjalls ritstjóranna ræðum við Sigurður Már Jónsson meðal annars um athyglisverð kaup alþjóðlega bifreiðasölufyrirtækisins Inchape á góðum granna hér við Grafarvoginn, bílaumbðinu Öskju. Sjá umræður okkar félaganna hér.

Við veltum því meðal annars fyrir okkur hvort því fylgi ákveðin áhætta að kaupa bílaumboð í ljósi þess að bílaframleiðendur erlendis sameinuðust eða að umboð fyrir ákveðnar bílategundir færðust til af einhverjum utanaðkomandi ástæðum.

Þess má geta að Inchape kaupir fyrirtækið Vekra sem er eigandi Öskju og dótturfélaganna Landfara, Dekkjahöllinni og bílabumboðinu Unu .

TALSVERÐ TÍÐINDI

Þetta eru því umtalsverð tíðindi á íslenskum bílamarkaði og sýnir í raun hversu mikið traust Inchape - sem er skráð í Kauphöllinni í London - ber til íslensks bílamarkaðar og viðskiptalífs.

Reiknað er með að rafbílavæðingin muni stóraukast ennfrekar hér á landi á næstu árum og ekki ólíklegt að Inchape horfi til þess sem mögulegs tækifæri til að vaxa frekar en hlutdeild Öskju á íslenskum bílamarkaði hefur margfaldast á undanförnu árum og nemur núna rúmum fjórðungi í sölu á nýjum bílum.

Askja er með umboð fyrir Benz, Kia og HondA.

Forstjóri Öskju, Jón Trausti Ólafsson, verður áfram forstjóri félagsins. - JGH

Askja er með umboð fyrir Mersedes Benz...

...sem og Kia og Honda.

Hér kemur lítið brot af umræðum okkar um söluna á Öskju.

Bryggjubrölt í heillandi Hólminum

Sun, 03 Aug 2025 14:16:48 GMT

BRYGGJUBRÖLT. Hólmurinn hefur alltaf eitthvað við sig og þangað lá leið Grafarvogs.net um þessa miklu ferðahelgi.

Bryggjan og bátarnir toga í ferðalanga í Hólminum og margir leggja leið sína upp að vitanum í Súgandisey - sem er vissulega ekki eyja lengur - frekar en Örfirisey í borginni.

Það setur óneitanlega svip sinn á bryggjulífið að Sæferðir annast ekki lengur áætlunarferðir Baldurs og hafa hætt Eyjasiglingum á Særúnu - og sett þetta vinsæla skip á söluskrá.

Smá bryggjubrölt í morgunsárið á þessum ágæta sunnudegi um verslunarmannahelgi. - JGH

Særún kyrfilega bundin við bryggju og er til sölu. Skarð fyrir skildi að hætt sé að sigla með ferðamenn á þessu þekkta skipi og bjóða þeim upp á nýveitt sjávarfang.

Hafnarvogin. Ekki alveg komin þangað á morgunvigtinni þótt staðan sé slæm.

Rólegt svo snemma í morgunsárið og mótorar hljóðlátir.

Vinsælt að vitja vitans uppi á Súgandisey.

Hér seldu Sæferðir miða í Baldur um árabil. Núna er þetta rými tómt og komið í eigu flutningafyrirtækisins BB og sona.

Sjávarpakkhúsið nýtur mikilla vinsælda. Regnbogafána flaggað.

Sjávarborg - hostel. Skarphéðinn Berg Steinarsson, fyrrum ferðamálastjóri, rekur þetta vinalega gistihús við höfnina.

Bryggjubiti. Auðvitað fiskur og franskar svo og Agnið.

Þau eru mörg falleg húsin í Hólminum.

Tilbúnir að flengjast um með ferðamenn í slöngudansi á fögrum firði; Breiðafirði.

Baldur - risinn í höfninni.

Regnbogi meistarans!

Thu, 31 Jul 2025 09:33:57 GMT

REGNBOGI MEISTARANS. Hann var svolítið sérstakur regnboginn sem blasti við mér þegar ég ók Strandveginn í Grafarvogi í austurátt í gærkvöldi.

Regnbogi sem var frekar eins og punktur, eins konar marglita kastljós.

Minnti á fallega litaprufu meistarans - málarameistarans. - JGH

Regnbogi meistarans - málarameistarans.

Sitt sýnist hverjum - hvað sjáið þið út úr þessu?

Wed, 30 Jul 2025 21:10:51 GMT

SKRIFAÐ Í SKÝIN! Það er stundum sagt að sitt sýnist hverjum og að fólk líti hlutina ekki sömu augum. Þetta getur átt við myndir, skýjafar og auðvitað dægurmálin.

Þessa mynd tók ég fyrr í kvöld þegar ég ók eftir Strandveginum.

Þarna blasir við óvenjulegt skýjafar - hvað sjáið þið út úr þessu? - JGH

Skýin taka á sig ýmsar myndir - hvað sjáið þið út úr þessu?

Færeyska fánanum flaggað í Hamrahverfi - þjóðhátíðardagur Færeyinga í dag

Tue, 29 Jul 2025 20:16:12 GMT

FLAGGAÐ FYRIR FÆREYINGUM. Frændur vorir í Færeyum halda upp á þjóðhátíðardag sinn í dag, 29. júlí, er hann er dánardagur Ólafs konungs Haraldssonar og er þjóðhátíðardagurinn kenndur við hann sem og hátíðarhöldin á þessum degi ár hvert, Ólafsvaka.

Margvísleg skemmtun fer fram yfir Ólafsvökuna og þann 29. júlí er færeyska lögþingið jafnan sett á ári hverju.

Það fór vel á því að á sjálfri Ólafsvökunni hafi fánasafnarinn, Ólafur Sverrisson, Grafarvogsbúi og íbúi í Hamrahverfinu, flaggð færeyska fánanum í tilefni dagsins og sómdi fáninn sér vel í Hamrahverfinu í dag.

Ólafur hefur í nokkur ár vakið athygli fyrir að flagga hinum fjölbreyttustu fánum og komst í fréttir RÚV og Grafarvogs.net í vor fyrir þetta áhugamál sitt.

Þjóðfáni Færeyja nefnist Merkið og var hannaður af færeyskum námsmönnum í Kaupmannahöfn. Hann var dreginn að húni í fyrsta sinn í Færeyjum árið 1919. Hvítur grunnurinn táknar heiðan himinn og hvítfyssandi öldur sem mæta ströndinni. Rauða og bláa litinn er að finna á hefðbundnum færeyskum hálsklút og litirnir tákna einnig tengslin við Ísland og Noreg , en í fánum þeirra eru sömu litir í sama mynstri.

Til hamingju Færeyingar! - JGH

Hvíti grunnurinn í færeyska fánanum táknar heiðan himinn og hvítfyssandi öldur sem mæta ströndinni. Rauði og blái liturinn í fánanum tákna tengslin við Ísland og Noreg, en í fánum þeirra eru sömu litir í sama mynstri.

Ný bók um Bínu bálreiðu er komin út. Segja má að Bína sé ættuð úr Grafarvoginum

Tue, 29 Jul 2025 15:23:24 GMT

BÍNA FER Í SVEIT. Bækurnar um Bínu bálreiðu hafa allar selst upp og notið mikilla vinsælda. Þær eru í senn þroskandi og skemmtilegar og skrifaðar af einum þekktasta talmeinafræðingi landsins, Grafarvogsbúanum Ásthildi Bj. Snorradóttur . Bækurnar eru fyrir börn á aldrinum 2ja til 6 ára.

Nýjasta bókin um Bínu er núna komin út; Bína fer í sveit , og er fjórða bókin í ritröðinni um þessa vinsælu dúkku sem lendir í ævintýrum og býr við málþroskafrávik og er fyrir vikið oft misskilin og jafnvel talin eitthvað eftir á. Hún er aldurslaus, þannig að hún hentar öllum börnum – og líka eldri börnum sem eiga í vandræðum, vantar færni í boðskiptum ásamt því að vera með slakan orðaforða.

„Með bókunum leitast ég við að skemmta börnum því bækurnar um Bínu eru barnabækur – og þær eiga fyrst og fremst að vera skemmtilegar,“ segir Ásthildur. „En við skrifin byggi ég á reynslu minni sem talmeinafræðingur.“

Ásthildur býr í Grafarvoginum, Hamrahverfinu, og því má segja að dúkkan Bína eigi rætur hér í Grafarvoginum. Hinar fjölmörgu og frábæru myndir í bókunum eru hins vegar ættaðar af Akranesi og eru málaðar af snillingnum Bjarna Þór Bjarnasyni, fyrrum bæjarlistamanni á Skaganum. Myndirnar eru sannkölluð listaverk.

FYRST OG FREMST AÐ SKEMMTA BÖRNUM

„Með bókunum leitast ég við að skemmta börnum því bækurnar um Bínu eru barnabækur – og þær eiga fyrst og fremst að vera skemmtilegar,“ segir Ásthildur.

„En við skrifin byggi ég á reynslu minni sem talmeinafræðingur. Þess vegna getum við sagt að Bína eigi sér fyrirmynd í öllum þeim skjólstæðingum sem komu til mín á stofuna í áratugi og fengu þjálfun þegar ég starfaði sem sjálfstætt starfandi talmeinafræðingur á eigin stofu.“

Bækurnar eru skemmtilesning en öllu gamni fylgir alvara og með bókunum vill Ásthildur – í gegnum Bínu – hjálpa börnum við ná betri færni í sjálfstjórn og boðskiptum, sem og að auka orðaforða sinn og málskilning svo þau eigi auðveldara með að fóta sig í lífinu.

BÍNA ER ALGERLEGA MISSKILIN

En Bína er bálreið – eða hvað?

„Eigum við ekki að segja að hegðun hennar endurspegli að hún eigi erfitt með málþroska. Hún er algerlega misskilin eins og börn með málþroskafrávik. Þau hegða sér oft eins og þau séu með hegðunarerfiðleika eða einhverfu en málið er að þau skilja ekki og vita ekki betur. Þess vegna hefur það engan tilgang að bregðast við á móti með reiði séu þau reið.“

Og Ásthildur bætir við: „Ef þú vissir ekki að Bína væri með málþroskafrávik, þá myndir þú skamma hana fyrir að vera óþekk en bækurnar eru þannig uppbyggðar að fólk skilur í hvaða stöðu hún er og að hún þurfi að læra boðskiptafærni.“

Bækurnar um Bínu eru orðnar fjórar talsins í ritröðinni. Þrjár fyrstu eru uppseldar. Bína bálreiða, fyrsta bókin, hefur nýlega verið endurprentuð í þriðja skipti.

BÍNA OG BOÐSKIPTIN

En hvað er boðskiptafærni?

„Það er m.a. að geta hlustað, beðið, gert til skiptis, (þ.e. talað til skiptis eða leikið sér með leikföng til skiptis; fyrst ég og svo lána ég þér) og muna hvað er sagt. Í samskiptum fólks er mjög mikilvægt að kunna að bíða og hlusta þar til hinn klárar. Þetta er grunnfærni sem færustu sérfræðingar í heimi tala um og á jafnt við um börn sem fullorðna.“

GRAFARVOGSBÚI MEÐ MÖRG JÁRN Í ELDINUM

Ásthildur er 72 ára, ólst upp á Akranesi, er lærður kennari, sérkennari, talmeinafræðingur frá Noregi og með mastersgráðu í faginu frá Bandaríkjunum.

Hún fluttist í Grafarvoginn 1999 og er enn með mörg járn í eldinum. Hún hefur selt talmeinastofuna en leiðbeinir í endurmenntun við Háskóla Íslands ásamt því að vera ráðgjafi fyrir mismunandi stofnanir og sveitarfélög – og svo eru það auðvitað ritstörfin, að skrifa um Bínu bálreiðu.

„Ég fór í sveit á sínum tíma og auðvitað speglast dvölin í sveitinni í bókinni. Bína er ekki utangátta þegar hún í kemur sveitina en hún þarf að læra gamla sveitaorðaforðann; eins og um hrífu, orf, ljá, rokk, hey, hesthús, fjós og um öll dýrin. Þetta er meðvituð orðaforðavinna. En í þriðju bókinni fékk hún tækifæri að læra um orð, hljóð og stafi sem skiptir höfuðmáli varðandi lestrarfærni.“

Eiginmaður Ásthildar, Þorsteinn Scheving Sigurjónsson, er eftirlaunaþegi og stendur þétt við hlið konu sinnar í útgáfunni á ritröðinni um Bínu bálreiðu.

SAMHENT Í ÚTGÁFUNNI

Eiginmaður Ásthildar, Þorsteinn Scheving Sigurjónsson, er sömuleiðis eftirlaunaþegi en kemur drjúgt að útgáfunni. „Steini stendur þétt með mér í þessu, hann er ráðagóður og les yfir alla texta með mér og kemur með athugasemdir. Svo kemur hann auðvitað mikið að dreifingunni.“

Hægt er að forpanta bækur hjá Ásthildi á netfanginu asthildurbj@gmail.com áður en þær fara í almenna dreifingu.

Vel gert og öflugt framtak hjá þessum Grafarvogsbúum.

Til hamingju kæru hjón! – JGH

Hægt er að forpanta bækur hjá Ásthildi á netfanginu asthildurbj@gmail.com áður en þær fara í almenna dreifingu.

Bækurnar eru listilega myndskreyttar af snillingnum Bjarna Þór Bjarnasyni, fyrrum bæjarlistamanni á Skaganum. Myndir hans í bókinni eru sannkölluð listaverk og ríma sérlega vel við textann.

Dansinn dunar á bankaballinu - fjárfestar Kviku eru tvímælalaust fjárfestar ársins

Tue, 29 Jul 2025 00:21:58 GMT

DANSINN DUNAR Á BANKABALLINU. Fjárfestar Kviku hlægja alla leið í næsta banka en þeir eru tvímælalaust fjárfestar ársins. Í nýjasta þætti Hluthafaspjalls ritstjóranna , hlaðvarps okkar Sigurðar Más Jónssonar á efnisveitunni Brotkast.is, ræðum við um dansinn á bankaballinu. Sjá lítið brot hér.

Kvika er það félag sem hefur hækkað mest í Kauphöllinni á síðustu tólf mánuðum og bæði Íslandsbanki og Arion banki boðið bankanum upp í dans; þ.e. sameiningarviðræður. Stjórn Kviku tók boði Arion banka.

Bréfin í bankanum hafa hækkað um 57% á innan við einu ári - og takið eftir; og það þrátt fyrir 23 milljarða króna arðgreiðslu til eigenda vegna sölunnar á TM – og 2ja milljarða arðgreiðslu vegna hagnaðar síðasta árs.

Í ljósi þessa hefur Kvika verið sögð „sætasta stelpan á ballinu“. Svo er bara að sjá hvernig dansinn hjá Arion og Kviku endar.

Verður það hnapphelda eða ei? - JGH

Þrátt fyrir að hluthafar Kviku hafi greitt út 23 milljarða í arð vegna sölunnar á TM og 2 milljarða til viðbótar vegna hagnaðar síðasta árs þá hefur gengi bréfa í bankanum hækkað mest allra í Kauphöllinni á síðustu tólf mánuðum.

Arion banki og Kvika dansa núna saman á gólfinu. Hvernig endar þær samningaviðræður? Verður það hnapphelda eður ei?

Gyllta ströndin í Gufunesi er falin perla

Mon, 28 Jul 2025 16:53:35 GMT

FALIN PERLA! Gyllta sandströndin í Gufunesi er svo sannarlega falin perla þar sem allt iðar yfirleitt af lífi seinni partinn á daginn - svo ekki sé talað um á góðviðrisdögum.

Sæþotur; Brynja Dögg með gufubaðið sitt Kríu sem slegið hefur í gegn; fjöldi dorgveiðimanna á gömlu Gufunesbryggjunni, (sem vel að merkja bannað er að fara út á); dyttað að skútum á þurru landi; fleiri gufur og síðast en ekki síst sjóað fólk í sjóbaði.

Við höfum flutt fréttir að undanförnu af hinu iðandi mannlífi þarna. Sjá hér og hér .

Það mætti svo sannarlega laga vegaslóðann meðfram kvikmyndaverinu Reykjavík Studios, gömlu áburðarverksmiðjunni, niður að hinni földu perlu; hann er aðeins of holóttur - það er aðeins of mörg göt á þessum osti , eins og sagði í auglýsingunni. En enginn lætur það svo sem á sig fá.

Þær eru margar perlurnar í Grafarvoginum - en þessi er svolítið falin á bak við gömlu Marshall-aðstoðina; gömlu ábyrðarverksmiðjuna. - JGH

Skútur á þurru landi í Gufunesi í kvöldsólinni.

Brynja Dögg Friðriksdóttir við Kríuna sína - hið vinsæla gufubað sem hefur slegið í gegn.

Reykjavík Jet Skies bjóða upp á sæþotuferðir fjórum sinnum á dag um sundin blá.

Gamla bryggjan í Gufunesi má muna sinn fífil fegurri.

Dorgveiði á gömlu Gufunesbryggjunni er vinsælt sport og þar getur verið stutt á milli stanga á kvöldin.

Systkinin Sara Rós og Garðar Halldórsbörn í dorgveiðinni með stórkostlegt sjávarútsýni á bak við sig. Sara Rós að koma með bróður sínum í fyrsta sinn á kæjann.

Útsýnið maður minn í logninu og kvöldkyrrðinni í Gufunesi.

Gyllta sandströndin í Gufunesi. Sjóbað og sæþotur.

Hluthafaspjallið - bréfin í Íslandsbanka núna langt yfir genginu í útboðinu

Mon, 28 Jul 2025 00:55:14 GMT

TAP RÍKISINS? Hversu marga milljarða tapaði ríkissjóður á sölu „gullgæsarinnar“? Við Sigurður Már Jónsson veltum sölunni á Íslandsbanka fyrir okkur í nýjasta HLUTHAFASPJALLI ritstjóranna á efnisveitunni Brotkast.is. Gengi bréfa í Íslandsbanka eru núna langt yfir því sem ríkisstjórnin seldi hlutinn á.

Ríkisstjórnin hefur hælt sér af því að hafa selt hlut ríkisins í Íslandsbanka á rúma 90 milljarða króna í vor eða á genginu 107 kr. En er ástæða fyrir ríkisstjórnina að fagna þessu verði fyrir hlutinn?

Í útboðinu voru bréfin seld verulega undir markaðsgenginu, sem var þá á bilinu 112 til 114, og hvað þá núna þegar gengi bréfa í bakanum er í 126 eða 18% yfir útboðsgenginu.

HINN SELDI HLUTUR HÆKKAÐ 16 MILLJARÐA

Virði hlutarins sem ríkið seldi á 90 milljarða hefur því hækkað um 16 milljarða á skömmum tíma og er núna um 106 milljarðar. Það getur svo sem lækkað á næstu mánuðum.

Til upprifjunar þá varð allt vitlaust þegar Bankasýslan sáluga seldi bréf í bankanum á genginu 117 og umboðsmaður Alþingis og ríkisendurskoðandi gerðu athugasemdir við aðferðafræðina á þeirri sölu - og ríkisendurskoðandi fjallaði líka um gengið í útboðinu.

Inga Sæland, formaður Flokks flokksins, kallaði Íslandsbanka lengi vel „gullgæsina“ og vildi ekki selja hlutinn.

Þess má geta að ríkissjóður hefur bókfært 10 milljarða tap vegna sölunnar. Um 40% (36 milljarðar) þeirra sem keyptu í útboði ríkisins eru búnir að selja hlut sinn og innleysa a.m.k. 3,6 milljarða hagnað á viðskiptunum. - JGH

Nokkur sátt var um að selja hlut ríkisins í Íslansbanka - en verðlagði ríkisstjórnin hlutinn allt of lágt?

Við Sigurður Már ræðum hina miklu hækkun á bréfum í Íslandsbanka eftir að ríkið seldi hlut sinn.

Markaðsverð Brims, Síldarvinnslunnar og Ísfélagsins lækkað um 105 milljarða

Sun, 27 Jul 2025 01:10:26 GMT

105 MILLJARÐA RÝRNUN. Markaðsvirði sjávarútvegsfyrirtækjanna þriggja í Kauphöllinni hefur lækkað um 105 milljarða frá áramótum.

Þetta förum við Sigurður Már Jónsson yfir í nýjasta þætti HLUTHAFASPJALLS ritstjóranna og sýndur er á fjölmiðlaveitunni Brotkast.is. Sjá umræður okkar hér . Þetta eru einfaldlega viðbrögð markaðarins við hækkun ríkisstjórnarinnar á hækkun veiðigjalda úr 10 í 20 milljarða.

Áhrifin á alla haghafa í sjávarútvegi, alla þá sem hafa hag, beinan og óbeinan af greininni, eru auðvitað meiri.

Þúsundir einstaklinga, sem eiga hlut í þessum þremur skráðu sjávarútvegsfélögum hafa tapað stórfé; sömuleiðis lífeyrissjóðirnir - og þá fjölskyldur landsmanna í gegnum þá. Sveitarfélögin missa útsvarstekjur. Nýsköpun í iðnaði tengdum sjávarútvegi tekur skref aftur á bak. Fyrirtæki almennt sem tengjast sjávarútvegi horfa fram á verri verkefnastöðu með haustinu. Lífeyrissjóðirnir ræða núna um pólitíska áhættu við fjárfestingar.

Þá virðist búið að reka fleyg í sjávarútveginn í Kauphöllinni og verður ekki annað séð en að nýskráningum sjávarútvegsfyrirtækja á markaði sé lokið.

Loks virðist gleymast að formúlan á bak við hagvöxt og verðmætasköpun okkar Íslendinga byggist mest á fjárfestingum og sterkum útflutningsatvinnugreinum og gefi þær eftir í samkeppni erlendis dragast bæði landsframleiðsla og þjóðatekjur saman. -JGH

Við Sigurður Már ræðum viðbrögð markaðarins í Kauphöllinni við hækkun veiðigjalda.

Snjóskaflinn í Gunnlaugsskarði - hverfur hann á næsta hálfa mánuði?

Fri, 25 Jul 2025 18:06:45 GMT

GUNNLAUGSSKARÐ. Snjóskaflinn í Gunnlaugsskarði í Esju þykir vera ábending um tíðarfar og loftslagsbreytingar. Páll Bergþórsson, fyrrum veðurstofustjóri, fylgdist með fönninni í skarðinu um langt skeið og skráði niður.

Frekar hlýtt hefur verið í sumar og má gera ráð fyrir að snjórinn - punktarnir þrír efst í skarðinu á myndinni - hverfi á næsta hálfa mánuði ef fram fer sem horfir.

Fannirnar hefur margoft leyst og Esjan snjólaus í lok sumars - oftast á árunum 1929 til 1964, eða 19 sinnum á þessu 35 ára tímabili.

Sjá hér töflu um snjó og snjóleysi í Gunnlaugsskarði frá 1852 til dagsins í dag eða í um 175 ár.

Það var kalt í veðri frá 1852 til 1929 og þá hurfu fannirnar í skarðinu aldrei á því tímabili. - JGH

Mynd af Esjunni tekin seinni partinn í dag. Punktarnir þrír efst í Gunnlaugsskarði - fannirnar, skaflarnir - eru við það að hverfa. Ekki er ólíklegt að þeir verði horfnir snemma í ágúst. Það er yfirleitt í ágúst sem Esjan verður snjólaus, hverfi snjórinn þar á annað borð. Sjá veðurrannsóknir á skarðinu í 175 ár.

Rannsóknirnar ná allt aftur til ársins 1852.

Pálína er það heillin. Jón Óskar segist ekki með neitt trix við að grilla borgarana

Fri, 25 Jul 2025 08:58:51 GMT

BORGARALEG SKYLDA! Það kannast flestir Grafarvogsbúar við hana Pálínu þegar knattspyrnudeild Fjölnis auglýsir heimaleiki sína í Grafarvogi undir formerkjunum Pálína verður á staðnum. Pálína er jú þekkt sjoppa sem Fjölnir rekur og þar er hægt að fá sér hamborgara, pylsur, sælgæti og annað góðgæti fyrir leikina og í hálfleik.

Þegar okkur bar að garði í hálfleik á leik Fjölnis og KÞ í annarri deild kvenna á dögunum fórum við auðvitað að Pálínu þar sem grillað var af eldmóði. Sá sem hélt um spaðann í þetta skiptið var Jón Óskar Guðlaugsson en hann er í foreldraráði 4. flokks Fjölnis.

Hann virtist fimur með spaðann og spurður um hvaða trikk hann notaði sagðist hann ekki hafa fundið það ennþá - en borgarnir væru hins vegar góðir og nytu vinsælda; það væri fyrir öllu.

Sjoppan Pálína er rekin af foreldraráði fjórða flokks karla og kvenna. Ávinningurinn af sölunni fer í foreldrafélagið sem og til þeirra sem taka þátt í að standa vaktirnar. Þetta hefur gefist mjög vel sem fjáröflun fyrir íþróttaferðir fjórða flokks.

Það er borgaraleg skylda að líta við hjá Pálínu á leikjum Fjölnis. - JGH

Allt að verða klárt í hálfleik en mikil sala var hjá Pálínu fyrir leikinn.

Engin sérstök trix - brellan er að borgararnir séu góðir. Það dugir!

56% landsmanna neikvæð gagnvart þéttingu byggðar á höfuðborgarsvæðinu

Thu, 24 Jul 2025 22:06:45 GMT

GEGN ÞÉTTINGU. Hún er fróðleg könnunin sem Prósent gerði dagana 1. til 21. júlí um þéttingu byggðar á höfuðborgarsvæðinu og Vísir greinir frá .

Alls segjast 56% landsmanna vera neikvæð gagnvart þéttingunni.

Spurt var: Hversu jákvætt eða neikvætt er viðhorf þitt gagnvart þéttingu byggðar á höfuðborgarsvæðinu?

Út frá búsetu sögðust 64% íbúa nágrannasveitarfélaga Reykjavíkur neikvæð gagnvart þéttingunni, 56% íbúa Reykjavíkur og 52% íbúa landsbyggðarinnar .

Sem kunnugt er hafa íbúar í Grafarvogi mótmælt harðlega áformum meirihlutans í borginni um að þétta byggð með miklu raski í grónum hverfum Grafarvogs og vega bæði að útivistarsvæðum og vegakerfinu.

Nokkrir fjölmennir og kröftugir mótmælafundir hafa verið haldnir gegn þéttingarstefnunni en núna styttist í að borgaryfirvöld gangi frá deiliskipulaginu en hátt í tvö þúsund athugasemdir bárust frá Grafarvogsbúum í Skipulagsgáttina í vor. - JGH

Nýjustu fréttir eru þær að íbúðir á þéttingarreitum seljast illa enda helsti kaupendahópurinn yfirleitt í ágætum efnum og aðhyllist ekki bíllausan lífsstíl. Fólk vill eiga bíla og vill bílastæði.

Nokkrir fjölmennir fundir hafa verið haldnir í Grafarvogi þar sem þéttingunni hefur verið harðlega mótmælt. En mun meirihlutinn í Reykjavík hlusta og taka tillit til nýrra kannana og mótmæli okkar Grafaravogsbúa?

Mótmælafundirnir í Grafarvogi hafa verið afar vel sóttir og viljinn skýr.

Frá hitafundinum mikla snemma í vor þegar allt fór í háaloft vegna fyrirkomulags fundarins. Arkitekt á vegum borgarinnar fer hér yfir ferlið svonefnda undir yfirskriftinni Við erum hér. Tímaplanið gerði ráð fyrir að borgaryfirvöld staðfestu skipulagið í júní en töfin á því stafar vonandi af því að verið sé að koma til móts við vilja mikils meirihluta íbúa í Grafarvogi.

Ögrun í Gufunesi

Thu, 24 Jul 2025 20:27:53 GMT

ÖGRUN. Mörgum Grafarvogsbúum finnst sem meirihlutinn í Reykjavík ögri þeim með hinni gallhörðu þéttingarstefnu sem áformuð er í Grafarvogi þrátt fyrir ítrekuð mómæli þeirra. Núna styttist í niðurstöður borgarinnar varðandi nýtt deiliskipulag en borgin er þegar farin að úthluta lóðum á nokkrum reitanna í Grafarvogi - og það í miðju skipulagsferlinu.

Hvað um það, Ögrun blasir við í Gufunesi innan um nokkrar skútur sem þar eru geymdar. Það er skútan Ögrun sem þar situr háreist og tignarleg uppi á landi. Glæsilegt fley í alla staði.

Víst er Ögrun í Grafarvogi þótt allir séu ekki alveg jafnvissir um það hvort okkur Grafarvogsbúum sé viljandi ögrað með þéttingarstefnunni eða ekki. - JGH

Skútan Ögrun situr háreist og tignarleg uppi á landi innan um nokkrar aðrar skútur rétt við gömlu bryggjuna í Gufunesi. Glæsilegt fley í alla staði.

Þotuliðið sem er við hlið þotuliðsins í kvikmyndaverinu í Gufunesi

Thu, 24 Jul 2025 20:09:37 GMT

ÞOTULIÐ! Það er tvenns konar þotulið í Gufunesi; þau hjá Reykjavík Jet Skis og stjörnunar í kvikmyndaverinu. Nokkur munur er jú á þessum liðum. Þegar okkur bar að garði stóð parið Gauti Guðmundsson og Agla Jóna Sigurðardóttir vaktina hjá Reykjavík Jet Skis í Gufunesi.

„Við bjóðum upp á sæþotuferðir undir leiðsögn út á Faxaflóa,“ segir Gauti. Foreldrar hans eru eigendur að Reykjavík Jet Skis, hjónin Guðmundur Guðjónsson og Íris Long.

„Við siglum út í Viðey, Lundey og að höfninni í miðbænum og leikum okkur í leiðinni. Þetta er vinsælt sport. Það eru mest Íslendingar sem nýta sér þetta en erlendir ferðamenn eru hérna í auknum mæli.“

Það var sumarið 2023 sem foreldrar hans byrjuðu með ferðirnar. „Við erum eingöngu að á sumrin, frá maí og út september.“

FJÓRIR BROTTFARATÍMAR Á DAG

Hann segir að fjórar brottfarir sé á dag, kl. níu á morgnanna, eitt, fimm og átta á kvöldin. „Kvöldin eru mjög vinsæl, sérstaklega hjá Íslendingum. Það er oft logn hérna á kvöldin, sjórinn spegilsléttur og stórkostlegt sólsetur.“

Loks segir Gauti að minni fyrirtæki nýti sér þetta í kringum starfsmannaferðir og nokkuð sé um gæsun og steggjun. „Dagurinn byrjar þá oft hjá okkur því ekki er leyfilegt að hafa áfengi um hönd á þotunum. Við erum með sex þotur og getum því tekið allt að tólf manns í hverri ferð ef það eru tveir á hverri þotu.“ - JGH

Agla Jóna Sigurðardóttir: Allir fá þurrgalla, flísgalla, björgunarvesti, skó og hanska.

Aðstaða Reykjavík Jet Skis er með miklum ágætum við gylltu ströndinni við Gufunesið.

Reykjavík Jet Skis. Hið eina sanna þotulið í Gufunesi.

Gosið á endaspretti - talsverður munur á svifryki í Laugarnesi eða Grafarvogi

Thu, 24 Jul 2025 18:39:24 GMT

ELDGOSIÐ. Margt bendir til þess að eldgosið á Reykjanesskaga - það tólfta í röðinni í þessari hrinu - sé nú komið á endasprett. Einn gígur er enn virkur en verulega hefur dregið úr virkni hans.Þótt gosinu ljúki á næstu dögum gæti gosmóðan hangið yfir eitthvað lengur.

MUNUR Á LAUGARNESI EÐA GRAFARVOGI

Til þessa hefur Grafarvogur.net miðað við mælinn í Laugarnesi sem mælir bæði svifryk og brennisteinsdíóxíð (eldfjallagas). í Húsaskóla (Dalshúsum) er mælir sem mælir einvörðungu svifryk. Það vekur athygli að það er talsverður munur á svifryki í Grafarvogi en í Laugarnesinu. ( Sjá meðfylgjandi töflur ).

Á vef Veðurstofunnar - uppfært kl. 14:30 í dag - segir að gosvirkni hafi hægt á sér frá því í gærmorgun. Enn gýs úr einum gíg og mjatlast hraunið áfram til austurs og suðausturs. Lítil hreyfing er á ystu jöðrum hraunsins.

„Gosórói fór niður á við á milli klukkan 6 og 7 í morgun, í takt við virkni gígsins, og hefur haldist nokkuð lágur síðan þá,“ segir á vef Veðurstofunnar.

„Mælingar á brennisteinsdíoxíði (SO₂) í morgun sýna útstreymi á bilinu 25 - 44 kílógrömm á sekúndu, sem er veruleg lækkun frá deginum áður.“ - JGH

Kl. 03:40 í nótt. Gýs aðeins úr einum gíg og allt hefur hægt mjög á sér.

Í hádeginu í dag; kl.12:20. Gosóróinn hefur gengið verulega niður og útlit fyrir að gosið sé að fjara út.

LAUGARNES SÍÐDEGIS - KL. 18:00

Grænar og ágætar tölur varðandi svifryk og gasmengun í Laugarnesi kl. 18:00 síðdegis.

GRAFARVOGUR - HÚSASKÓLI - KL. 18:00

Talsvert minna svifryk í Grafarvogi en Laugarnesi kl. 18:00.

Steinunn er afrekskona í golfi og á skíðum - og enn að safna medalíum

Wed, 23 Jul 2025 09:59:25 GMT

AFREKSKONA! Við sögðum frá því á dögunum að Steinunn Sæmundsdóttir hefði sigrað í flokki 65 ára og eldri í nýliðnu meistaramóti Golfklúbbs Reykjavíkur.

Ef til vill sakleysisleg frétt fyrir ýmsa en það er hins vegar fyllsta ástæða til að staldra við - hér fer þekkt og mikil afrekskona í golfi og á skíðum sem hefur keppt fyrir hönd Íslands í báðum greinum. Til að mynda keppt á skíðum á tvennum Vetrarólympíuleikum. Þá er hún drjúg í hestamennskunni líka.

Á upphafsmyndinni, sem hinn kunni ljósmyndari, Einar Falur Ingólfsson tók, er hún að slá inn á flötina á 18. brautinni í Grafarholti árið 1988 þegar hún varð Íslandsmeistari í golfi eftir harða keppni við Karenu Sævarsdóttur, Golfklúbbi Suðurnesja. Steinunn varð einnig Íslandsmeistari tveimur árum áður, 1986.

Steinunn Sæmundsdóttir, hér fyrir miðju, tekur við verðlaunum sínum sem klúbbmeistari GR í flokki 65 ára og eldri. Hún er margfaldur sigurvegari í íþróttum og hefur m.a. keppt á skíðum á tvennum Ólympíuleikum fyrir hönd Íslands.

Steinunn lék sigurhringinn í nýafstöðnu meistaramóti á Korpunni en byrjaði mótið í Grafarholtinu. Morgunblaðið rifjaði það upp í skemmtilegri frétt í fyrra að Steinunn væri ekki óvön því að leika vel í Grafarholtinu en hún hefði verið mjög sigursæl á meistaramótum GR. Varð klúbbmeistari GR 1980, 81, 85, 86, 88, 89, 90.

„Þrátt fyrir þessi afrek er Steinunn samt sem áður þekktari fyrir afrek sín í skíðaíþróttinni og er tvöfaldur ólympíufari. Keppti hún bæði í Innsbruck 1976 og í Lake Placid 1980.

Hafnaði Steinunn í 16. sæti í svigi á Vetrarólympíuleikunum 1976 og var þá aðeins 15 ára gömul sem er magnað afrek. Enn þann dag í dag er það besti árangur íslenskrar konu í alpagreinum á Vetrarólympíuleikum,“ segir í upprifjun Moggans.

Afrekskona og sigurvegari í íþróttum. Til hamingju Steinunn með nýjustu medalíuna. - JGH

Steinunn vippar inn á flötina við 18. braut í Grafarholtinu til sigurs í Íslandsmótinu í golfi 1988. Klæðaburðurinn í golfinu hefur breyst talsvert frá þessum tíma - ekki satt? Tískan aðeins hástemmdari. En klúbbhúsið í Grafarholtinu heldur sínum stíl og hefur ekkert breyst.

Mikil gosmóða seinnipartinn - en lítið svifryk og lítil gasmengun. Hver er munurinn?

Tue, 22 Jul 2025 18:33:00 GMT

LOFTGÆÐI. Mikil gosmóða hefur verið yfir höfuðborgarsvæðinu seinnipartinn í dag en á sama tíma mælist lítil gasmengun frá gosinu á Reykjanesskaga og gildin fyrir svifrykið í góðu lagi á mælinum í Laugarnesi en enginn mælir er í Grafarvogi.

Á meðfylgjandi mynd er horft frá Hamrahverfinu yfir til Vogahverfisins fyrir skömmu, eða um klukkan átján.

En hver er munurinn á gosmóðu eða gasmengun og svifryki?

Á vef Veðurstofunnar segir að gosmóða sé samsett úr brennisteinsögnum (SO4) sem hafa orðið til vegna efnahvarfa gosmakkarins við súrefni andrúmsloftsins.

Þessar brennisteinsagnir mælast ekki á SO2 gasmælum en sjást hins vegar sem gráblá móða þegar ákveðnum styrk er náð.

Hækkun á örfínu svifryki (PM1) getur verið vísbending um að SO4 sé til staðar.

Við látum svo síðustu mælingar - um sexleytið áðan - úr Laugarnesinu fylgja með. - JGH

LAUGARNESIÐ KLUKKAN 17:50, ÞRIÐJUDAG

Mikil gosmóða yfir höfuðborgarsvæðinu núna seinni partinn en á sama tíma mælist lítil gasmengun og lítið svifryk á mælinum í Laugarnesi.

Vindáttin hagstæð í dag og gasmengunin á haf út

Tue, 22 Jul 2025 10:05:53 GMT

LOFTGÆÐI. Vindáttinn í dag er hagstæð og gasmengunin miklu minni en í gærmorgun enda stefnir eldfjallagasið núna á haf út. Gasmengunin mun hins vegar læðast yfir Suðurlandið á morgun, skv. spá Veðurstofunnar.

Gasmengunin á morgun, miðvikudag, skv. spá Veðurstofunnar.

Loftgæði. Svifryk og gasmengun - veruleg breyting til batnaðar milli daga

Tue, 22 Jul 2025 09:58:00 GMT

LOFTGÆÐI. Veruleg breyting hefur orðið til batnaðar á milli daga á loftgæðum í Grafarvogi. Svifryk og gasmengun mælist talsvert lægra en í gærmorgun og á sunnudag. Komnar grænar tölur.

Þannig hafði gasmengunin lækkað niður í gildið 24 klukkan hálfníu í morgun úr gildinu 1.724 á svipuðum tíma í gærmorgun.

Sem fyrr miðast mælingarnar við mælinn í Laugarnesi en enginn loftgæðamælir er í Grafarvogi.

LAUGARNES Í MORGUN

Veruleg lækkun á svifryki og eldfjallagasi (Brennisteinsdíoxíði) frá því í gærmorgun.

LAUGARNES Í GÆRMORGUN

Svifrykið og eldfjallagasmengunin í gær. Allt aðrar og skæðari tölu en í morgun. Heimur batnandi fer.

GASMENGUNIN OG VINDÁTTIN Í DAG

Vindáttin hjálpar höfuðborgarsvæðinu í dag, þriðjudag. Mengunin stefnir í suður og á haf út, skv. þessu korti Veðurstofunnar.

GASMENGUN OG VINDÁTTIN Á MORGUN, MIÐVIKUDAG.

Gasmengunin frá gosinu mun læðast yfir Suðurlandið á morgun, miðvikudag.

Sunnudagsmorgun, 20. júlí. Horft úr Hamrahverfi til Bryggjuhverfis.

Þriðjudagsmorgun, 22. júlí. Horft úr Hamrahverfi yfir til Bryggjuhverfis.

Svifrykið heldur að minnka - en gasmengun enn veruleg

Mon, 21 Jul 2025 12:52:15 GMT

LOFTGÆÐI. Svifrykið í Grafarvogi er heldur að minnka frá því í gær en enginn mælir er í Grafarvogi og styðst Grafarvogur.net við mælinn í Laugarnesi. Gasmengun er samt veruleg og var hún sérstaklega mikil í morgun og raunar með mesta móti.

Gildin við mælingar á svifryki voru á þessa leið í gærmorgun: Gróft 83 ; fínt 75 og örfínt 61.

Gildin við mælingar á svifryki í Laugarnesi í morgun voru svona: Gróft 33 ; fínt 28 og örfínt 26 .

Eldfjallagas, brennisteinsdíóxíð, var hins vegar mun meira í Laugarnesi í morgun en í gær. Það var raunar með allra mesta móti snemma í morgun - og sagt með því mesta frá því goshrinan við Grindavík hófst fyrir um tveimur árum.

Þá vekur það athygli að svifryk í Reykholti í Biskupstungum vegna eldgossins mældist meira en í Laugarnesi í Reykjavík.

Búist er við að loftgæði batni smám saman með norðlægri golu í dag. - JGH

LAUGARNES Í MORGUN

Svifrykið í Laugarnesi í rmorgun. Eldfjallagasmengunin (brennisteinsdíoxíð) talsvert meiri en í gær.

LAUGARNESIÐ Í GÆRMORGUN

Svifrykið í Laugarnesi var meira í gærmorgun en gasmengun (brennisteinsdíoxíð) var talsvert minni.

AKUREYRI Í MORGUN

Við birtum svo til fróðleiks stöðuna á Akureyri, Ísafirði og Reykholti í Biskupstungum í morgun.

ÍSAFJÖRÐUR Í MORGUN

REYKHOLT Í BISKUPSTUNGUM Í MORGUN

Það var meira svifryk í Reykholti í Biskupstungum í morgun en Reykjavík.

Gosamóða í bland við þoku - rétt glittir í Bryggjuhverfið

Sun, 20 Jul 2025 11:14:55 GMT

GOSMÓÐA! Sterk gosmóða í bland við þoku setur nú svip sinn á Grafarvoginn og höfuðborgarsvæðið. Meðfylgjandi mynd var tekin klukkan hálfellefu í morgun í Hamrahverfinu og er horft í átt til Bryggjuhverfisins. Líkt og sjá má rétt glittir í Bryggjuhverfið.

Fyrr í morgun var staðan enn verri og þá rétt sást í nærliggjandi hús og byggðin í Bryggjuhverfi sást engan veginn.

Bilun er í nokkrum svifryksmælum í Reykjavík en þó ekki í Laugarnesi og notast ég við þann mæli. Þar sést að staðan á styrk svifryksins er þar mun minni en til dæmis í Hafnarfirði þar sem staðan er býsna slæm enda nálægðin við gosstöðvarnar meiri.

Hér er hægt að fylgjast með loftgæðunum.

Rautt á meðfylgjandi korti merkir að óhollt sé að vera úti og hvað þá fyrir fólk sem er viðkvæmt fyrir svifryki og gosmóðu.

Ef horft er á meðfylgjandi kort sést að svifryk mælist mikið í Reykholti í Biskupstungum en annars sýnist staðan ágæt fyrir austan fjall, skv. þessu korti. Sjá má að svifryks frá gosinu gætir á Akureyri. - JGH

Rautt merkir óhollt. Nokkrir svifryksmælar í Reykjavík eru bilaðir en þó ekki í LAUGARNESI. Áberandi rautt er í Hafnarfirði.

LAUGARNESIÐ Í REYKJAVÍK Í MORGUN. Verulegt svifryk í lofti en þó mun minna en í Hafnarfirði.

STYRKUR svifryksins í LAUGARNESI hefur farið vaxandi í morgun.

HAFNARFJÖRÐUR. Staðan þar er slæm og sagt óhollt að vera úti við - og hvað þá fyrir þá sem eru viðkvæmir fyrir menguninni.

HAFNARFJÖRÐUR. Línuritið sýnir hvernig styrkur svifryksins jókst snemma í morgun og rauði liturinn hefur síðan haldist.

Gunnar Már, þjálfari Fjölnis. Erfiður leikur gegn Keflavík í kvöld en mikill hugur í liðinu

Fri, 18 Jul 2025 08:34:38 GMT

Gunnar Már Guðmundsson , þjálfari karlaliðs Fjölnis í Lengjudeildinni, segir að þrátt fyrir erfitt gengi liðsins í sumar sé mikill hugur í liðinu. Leikmenn séu jákvæðir og staðráðnir í að fikra sig upp stigatöfluna í þeim tíu leikjum sem eftir eru af mótinu. Liðið á erfiðan útileik fyrir höndum gegn Keflavík í kvöld.

„Það er mikill hugur í liðinu og við höfum styrkt okkur núna í glugganum með því að fá danska leikmanninn Laurits Nørby til okkar frá danska liðinu Hobro IK. Laurits er varnarmaður að upplagi og við bindum miklar vonir við hann,“ s egir Gunnar Már.

Gengi liðsins hefur sannast sagna verið fremur erfitt í sumar en augljós batamerki sjást á liðinu í síðustu leikjum og það fengið sex stig af síðustu tólf mögulegum.

„Við höfum styrkt okkur núna í glugganum með því að fá danska leikmanninn Laurits Nørby til okkar frá danska liðinu Hobro IK.“

En hvað hefur farið úrskeiðis í sumar?

„Það spilar ýmislegt inn í eins og gengur. Vissulega hafa verið talsverð meiðsli meðal leikmanna og eins hafa mjög jafnir leikir fallið hinum megin fyrir algera óheppni. Nú, margir leikmenn eru í nýjum hlutverkum, þ.e. þeir eru í stærri hlutverkum en áður. Ég hef hins vegar mikla trú á framhaldinu. Það eru tíu leikir eftir og við erum staðráðnir í að standa okkur.“

Þá má geta þess að lið Fjölnis er frekar ungt að árum og meðalaldur leikmanna í lægri kantinum miðað við aðra meistaraflokka á landinu.

Tólf lið eru í Lengjudeild karla og falla tvö þau neðstu niður um deild. Sem stendur er lið Fjölnis í 11. sæti sem er fallsæti en það er stutt í næstu lið.

SANNUR GRAFARVOGSBÚI

Gunnar Már er alinn upp í Grafarvogi og spilaði með Fjölni alla tíð. Hann hefur þjálfað liðið til margra ára fyrir utan síðasta ár þegar hann þjálfaði Þrótt í Vogum á Vatnsleysuströnd.

Það er óhætt að segja að Gunnar sé sannur Grafarvogsbúi. „Ég flutti með foreldrum mínum í hverfið 1985 – nánar tiltekið í janúar ´85 sem við fluttum í Funafoldina,“ segir hann og brosir.

Áfram Fjölnir í kvöld sem aðra daga. - JGH

Sannur Grafarvogsbúi. Gunnar Már flutti í Grafarvoginn með foreldrum sínum í janúar 1985 - eða fyrir fjörutíu árum.

Fjölnir er í 11. sæti sem stendur en það er stutt í næstu lið og með nokkrum sigrum á næstunni vænkast hagur liðsins verulega.

Glugginn opnaðist í gær og danski leikmaðurinn Laurits Nørby hefur skrifað undir samning við félagið. Hann kemur frá danska liðinu Hobro IK og er varnarmaður að upplagi.

Gufa í Gufunesi. Kría er ljúf fargufa við fallega strönd í Gufunesi

Thu, 17 Jul 2025 21:27:59 GMT

Fargufan Kría hefur hreiðrað um sig við gullfallega strönd í Gufunesi. Gufa í Gufunesi, það fer vel á því. Enda valdi Brynja Dögg Friðriksdóttir , eigandi Kríunnar, að koma gufunni sinni þar fyrir. Þetta er ljúf, sex manna fargufa – með útsýni yfir sundin blá og aðgengi að sjónum við gyllta sandströndina. Og auðvitað er Krían hvít.

BESTU FARGUFURNAR Í BRETLANDI

„Ég fékk þessa hugmynd snemma í fyrra þegar ég rakst á grein í breska fjölmiðlinum The Times um bestu fargufurnar í Bretlandi. Á þeim lista voru tvær fargufur frá sama framleiðandanum og ég féll fyrir hönnun þeirra og þessum stóra glugga á fargufunni – og hingað er Krían komin,“ segir Brynja Dögg brosandi.

Segja má að Brynja hafi breytt um starfsvettvang með því að fara í gufuna – hún hefur unnið við fjölmiðla og kvikmyndagerð. Það var einmitt þegar hún vann að kvikmyndaverkefnum í Reykjavík Studios í Gufunesi að hún kom auga á þessa földu perlu – ströndina í Gufunesi.

Krían í Gufunesi er sex manna og með stórkostlegt útsýni. Þessi hönnun komst á lista The Times yfir bestu fargufur í Bretlandi.

KRÍAN KOM Í BYRJUN SUMARS

„Ég fékk Kríuna mína til landsins í byrjun sumars og viðtökurnar hafa verið mjög góðar,“ segir Brynja. „Þetta er skemmtilegt umhverfi og talsvert um að vera hérna á ströndinni þar sem fólk nýtur þess að fara í sjóinn og svo er Reykjavík Jet S kis með aðstöðu hérna á svæðinu. Hér lægir oft á kvöldin og þau eru í raun engu lík; mikil kyrrð með fallegu sólsetri við sundin blá.“

En hvers vegna nafnið Kría?

„Krían er svo skemmtilegur fugl, einn þekktasti farfuglinn okkar og flýgur langar leiðir til að komast hingað á sumrin. Hún er lítil og nett, fer víða, hugsar vel um sína og er sniðug og útsjónarsöm. Hún er í miklu uppáhaldi hjá mér.“

MEÐ AÐRA NÁLGUN EN FLESTAR FARGUFUR

Margar fargufur eru svartar en ekki Krían í Gufunesi. „Nei, hún varð að vera hvít. Annað koma ekki til greina! Krían er jú hvít að miklu le y ti . “

Að sögn Brynju er hún með aðra nálgun en flestar fargufur. „Fólk pantar tíma og er í sínu rými í friði og ró í gufunni en ég er fyrir utan gufuna, sé um að kynda gufuna og er til taks fyrir gesti á meðan á gufustundinni stendur.“

Krían er farfugl en fargufan Kría hefur fundið sér sinn stað og hreiðrað um sig í Gufunesi. - JGH

Gyllta sandströndin í Gufunesi. Einstök náttúruperla.

Margar fargufur eru svartar en auðvitað er Krían hennar Brynju hvít. Annað kom að sjálfsögðu ekki til greina.

Brynja Dögg Friðriksdóttir, eigandi Kríunnar, er ánægð með viðtökurnar. Hér speglast hún skemmtilega í hurð fargufunnar.

„Krían er svo skemmtilegur fugl. Hún er lítil og nett, fer víða, hugsar vel um sína og er sniðug og útsjónarsöm. Hún er í miklu uppáhaldi hjá mér.“

Krían komin til landsins í byrjun sumars. Hér í Þrengslunum á leið í Gufunesið.

Þeir eru í eldlínunni hjá Fjölni - Birgir Örn og Gunnar Már

Thu, 17 Jul 2025 13:21:21 GMT

Það eru auðvitað margir sem koma við sögu og leggja lóð á lóðarskálarnar þegar kemur að starfinu í knattspyrudeild Fjölnis. Margir í eldlínunni; leikmenn sem aðstandendur. En það mæðir óneitanlega talsvert á þessum tveimur sem Grafarvogur.net hitti á sigurleik kvennaliðs Fjölnis gegn KÞ á Grafarvogsvellinum á dögunum; þeim Birgi Örn Birgissyni, rekstrarstjóra knattspyrnudeildar Fjölnis, og Gunnari Má Guðmundssyni, þjálfara Fjölnis.

Birgir Örn Birgisson, rekstrarstjóri knattspyrnudeildar Fjölnis.

Að sögn Birgis Arnar hefur starfið gengið mjög vel í sumar og mikið um að vera í öllum flokkum, bæði hjá karla- og kvennaliðunum, og í kringum 900 manns sem iðka knattspyrnu með Fjölni.

RISASTÓR HÓPUR FRÁ FJÖLNI AÐ KEPPA Í BANDARÍKJUNUM

Og segja má að Fjölnir keppi á mörgum vígstöðvum. „Fjöldi stúlkna úr Fjölni tók þátt í Símamótinu í Kópavogi á dögunum og þá var hópur frá okkur á móti í Finnlandi í síðustu viku og þessa dagana er risastór hópur að keppa úti í Bandaríkjunum. Þetta er bara lítið en nærtækt dæmi um hvað mikið eru um að vera núna um hásumarið hjá okkur.“

Óhætt er að segja að Grafarvogsvöllurinn sé með besta móti, iðagrænn og fallegur. „Ég hef oft haft á orði að völlurinn sé ein af perlum Grafarvogs,“ segir Birgir Örn.

Meistaraflokkur karla í Fjölni er þessa stundina í 11. sæti í Lengjudeildinni og á í harðri fallbaráttu. Kvennaliðið er í 3ja sæti í 2. deild kvenna og á góða möguleika á að færast upp í Lengjudeild kvenna. - JGH

Fjör hjá Fjölnisstúlkum á Símamótinu. Það er gróskumikið starfið hjá Fjölni í öllum aldursflokkum.

Einbeittar á Símamóti.

Hart tekist á þó ungar séu að árum.

Fjölniskonur í miklu stuði - skoruðu 6 mörk og héldu hreinu

Wed, 16 Jul 2025 11:07:54 GMT

MARKASÚPA Í GRAFARVOGI. Fjölniskonur fóru mikinn gegn KÞ á Fjölnisvellinum við Dalhús í gærkvöldi og unnu leikinn 6-0. Vel gert.

Grafarvogur.net var á leiknum og taldi sig ágætlega inni í heimi íþróttanna en vissi samt lítið um þetta KÞ-lið. Með eftirgrennslan kom í ljós að KÞ er venslaslið Þróttar í Reykjavík. Það er með sama lögheimili og Þróttur og er undir Þróttarahattinum. KÞ stendur samt ekki fyrir Knattspyrnufélagið Þróttur og er með annars konar merki.

Hvað um það - í fallegu veðri léku Fjölniskonur við hvurn sinn fingur og létu netmöskvana finna fyrir því.

Vel gert í alla staði. Alvöru súpa, markasúpa. - JGH

Fjölniskonur voru í ham á iðagrænum Grafarvogsvellinum í gærkvöldi.

Fagnað að hætti hússins.

Fagur er hann - kvöldkyrrð við Grafarvog

Wed, 16 Jul 2025 10:37:05 GMT

Fagur er hann Grafarvogurinn, spegilsléttur og stílhreinn. Engum líkur þegar hann er upp á sitt besta, líkt og í gærkvöldi. Fallegum degi tekið að halla og kyrrð kvöldsins breiðir út faðm sinn og umvefur hann af hógværð sinni.

Gulli líkast við Gullinbrú. - JGH

Spegilsléttur og stílhreinn.

Þær eru langar og fallegar sumarnæturnar í Grafarvogi

Tue, 15 Jul 2025 15:21:16 GMT

SUMARNÆTUR. Grafarvogsbúinn Magnús Ásgeirsson birti á dögunum þessar stórgóðu myndir af íslensku sumarnóttinni á FB-síðu sinni með orðunum „ Það er ljúft að eiga góðar minningar í huganum um bjartar og fallegar sumarnætur “.

Magnús er viðskiptafræðingur og vann um árabil hjá N1 og var sóknarnefndarformaður Grafarvogssóknar um árabil þegar kirkjan okkar var byggð.

Það jafnast fátt á við fallegar sumarnætur á Íslandi.

Góðar myndir! - JGH

Sólin perlar hér himinninn á fallegri sumarnótt yfir Grafarvogi.

„Það er ljúft að eiga góðar minningar í huganum um bjartar og fallegar sumarnætur.“

Ó, blessuð vertu sumarsól lokalagið í messu í Guðríðarkirkju

Tue, 15 Jul 2025 14:41:35 GMT

SAMEIGINLEG MESSA. Það fór vel á því að kór Guðríðarkirkju undir stjórn Arnhildar Valgarðsdóttur organista veldi sálminn Sumarkveðju , ( Ó, blessuð vertu sumarsól ), sem lokasálm í sameiginlegri messu Grafarvogs-, Grafarholts- og Ábæjarsafnaða sl sunnudag.

Það er hásumar, sólin leikur við landsmenn og hitamet falla þessa dagana.

Messan var í Guðríðarkirkju þetta árið og var vel sótt.

Sr. Leifur Ragnar Jónsson og sr. María Rut Baldursdóttir úr Guðríðarkirkju þjónuðu ásamt Degi Fannari Magnússyni frá Árbæjarkirkju og sr. Sigurði Grétari Helgasyni, Grafarvogskirkju.

Kór Guðríðarkirkju söng undir stjórn Arnhildar Valgarðsdóttur organista.

Við birtum hér fyrsta erindið af Sumarkveðju.

Ó, blessuð vertu sumarsól,

er sveipar gulli dal og hól

og gyllir fjöllin himinhá

og heiðarvötnin blá.

Nú fossar, lækir, unnir, ár

sér una við þitt gyllta hár.

Nú fellur heitur haddur þinn

um hvíta jökulkinn.

Sameiginleg messa safnaðanna á svæðinu og vel heppnuð. - JGH

Brosmildir prestar í hinni sameiginlegu messu. Frá vinstri: Sr. Sigurður Grétar Helgason, Grafarvogskirkju (ekki í skrúða), sr. Leifur Ragnar Jónsson og sr. María Rut Baldursdóttir úr Guðríðarkirkju og Dagur Fannar Magnússon. Ekki verður sagt um Sigurð Grétar að hann hafi mætt í fullum skrúða.

Lokasálmurinn í messunni. Kór Guðríðarkirkju undir stjórn Arnhildar Valgarðsdóttur organista syngur lagið Ó, blessuð vertu sumarsól. Lag eftir Inga T. Lárusson, ljóð eftir Pál Ólafsson.

Hin sameiginlega sumarmessa var vel sótt.

Sumargleði í sumarmessu.

Hér koma svo seinni tvö erindin.

Þú klæðir allt í gull og glans,
þú glæðir allar vonir manns,
og hvar sem tárin kvika' á kinn
þau kyssir geislinn þinn.
Þú fyllir dalinn fuglasöng,
nú finnast ekki dægrin löng,
og heim í sveitir sendirðu' æ
úr suðri hlýjan blæ.

Þú fróvgar, gleður, fæðir allt
um fjöll og dali' og klæðir allt,
og gangirðu' undir gerist kalt,
þá grætur þig líka allt.
Ó, blessuð vertu sumarsól,
er sveipar gulli dal og hól
og gyllir fjöllin himinhá
og heiðarvötnin blá.

Ingi T. Lárusson / Páll Ólafsson

Sigurður Bjarki lék lokahringinn á Korpunni á 8 höggum undir pari

Mon, 14 Jul 2025 07:40:54 GMT

VEL GERT! Sigurður Bjarki Blumenstein, kylfingur í GR, gerði sér lítið fyrir og lék lokahringinn á Korpunni á 8 höggum undir pari og jafnaði við Harald Franklín Magnús í æsispennandi leik. Sigurður tapaði síðan fyrir Haraldi í bráðabana en það þurfti þrjár holur til að knýja fram úrslit.

Þrátt fyrir tapið í bráðabananum verður að segjast eins og er að það er ótrúlega glæsileg spilamennska hjá Sigurði Bjarka að spila Korpuna (Sjóinn/Ána) á 8 höggum undir pari.

Hann fékk 8 fugla, 10 pör og þar af leiðandi engan skolla.

Ekki er okkur kunnugt um hvort þetta sé vallarmet en altént hlýtur það að vera nálægt því.

(Takk GR fyrir myndina.)

Hér kemur svo skortaflan hjá Sigurði Bjarka í meistaramótinu en fyrstu tvo dagana var leikið í Grafarholti og seinni tvo á Korpunni. - JGH

Skortaflan hjá Sigurði Bjarka Blumenstein í meistaramótinu. Hann lék á 64 höggum lokadaginn eða 8 höggum undir pari. Fékk 8 fugla og 10 pör. Vel gert!

Sigurður Bjarki Blumenstein.

Til hamingju: Haraldur Franklín og Ásdís Rafnar klúbbmeistarar hjá GR

Sun, 13 Jul 2025 21:58:14 GMT

TIL HAMINGU. Haraldur Franklín Magnús og Ásdís Rafnar Steingrímsdóttir urðu klúbbmeistarar í karla- og kvennaflokki í GR í gær eftir æsispennandi lokaumferð en bráðabana þurfti til að knýja fram úrslit í báðum flokkunum.

Haraldur Franklín hafði nokkuð örugga forystu fyrir lokadaginn eða 6 högg á Sigurð Bjarka Blumenstein. En Sigurður Bjarki gerði sér lítið fyrir og vann þennan mun upp á lokahringnum sem spilaður var á Korpu (Sjónum/Ánni) og lék lokahringinn á 64 höggum eða á 8 höggum undir pari sem er með hreinum ólíkindum. Haraldur lékk lokahringinn á 1 höggi undir pari.

Það þurfti síðan 3 holur í bráðabana til að skera úr um úrslitin og þar hafði Haraldur betur.

Hin stórefnilega Ásdís Rafnar Steingrímsdóttir var 3 höggum á eftir Þóru Sigríði Sveinsdóttur fyrir lokaumferðina. En Ásdís vann þetta forskot upp og enduðu þær jafnar og efstar. Bráðabana þurfti því til og í honum vann Ásdís Rafnar.

Grafarvogur.net óskar sigurvegurunum í öllum flokkum í meistararamóti GR síðustu daga innilega til hamingju með árangurinn.

Vel gert og til hamingju GR-ingar með vel heppnað meistaramót. - JGH

(Bestu þakkir fyrir myndirnar GR-ingar).

Klúbbmeistarar GR í meistaraflokki karla og kvenna. Ásdís Rafnar Steingrímsdóttir og Haraldur Franklín Magnús.

Drottningin í þriðja sæti. Hin gamalreynda Ragnhildur Sigurðardóttir varð í þriðja sæti og hér má sjá hvar hún óskar Ásdísi Rafnar til hamingu með sigurinn. Þóra Sigríður Sveinsdóttir er lengst til hægri.

Sigurður Bjarki Blumenstein gerði sér lítið fyrir og lék lokahringinn á Korpunni á 8 höggum undir pari og jafnaði við Harald Franklín. Hann tapaði síðan í bráðabana en til þess þurfti þrjár holur.

Fjölmenni var á lokahófinu á Korpunni í gær - og ekki skemmdi veðrið fyrir gleðinni.

Metalíuhafar í öllum keppnisflokkum stilltu sér að sjálfsögðu upp á lokahófinu.

Gísli Guðni Hall, formaður GR, og Elín Sveinsdóttir, varaformaður GR, afhentu verðlaunin.

Gamla kempan Steinunn Sæmundsdóttir, margfaldur Íslandsmeistari í golfi og á skíðum, sigraði í flokki kvenna 65 ára og eldri (forgjöf 0 til 20,5). Laufey Valgerður Oddsdóttir varð í öðru sæti og Olga Lísa Garðarsdóttir í því þriðja. Frá vinstri: Elín Sveinsdóttir, Olga Lísa, Steinunn, Laufey Valgerður og Gísli Guðni Hall.

Það er fyllsta ástæða til að hrósa Trausta Tómassyni og borginni fyrir snör viðbrögð

Tue, 08 Jul 2025 15:51:45 GMT

VEL GERT! Það er fyllsta ástæða til að hrósa bæði Trausta Tómassyni fyrir að vekja athygli á því þegar óprúttið lið henti fallegum bekk út í sjó fyrir neðan göngustíginn í Hamrahverfinu í Grafarvogi og borginni sömuleiðis fyrir að bregðast fljótt og vel við og koma með nýjan bekk daginn eftir.

Þessi gönguleið er einhver magnaðasta gönguleiðin á höfuðborgarsvæðinu og dásamlegt fyrir okkur Grafarvogsbúa að ganga þarna um og njóta útsýnisins yfir sundin blá.

Trausti birti færslu á Facebook þar sem hann sagði að skemmdarverk hefðu verið unnið við göngustíginn.

„Einn bekkurinn kominn út í sjó. Viðkomandi sem gerðu þetta hafa þurft að drekka í sig kjark, en tómur ölkassi er þar sem bekkurinn var áður. Nú ættu þeir sem þetta gerðu að sjá sóma sinn í því að ná í bekkinn og koma honum á sinn stað.“

Ekki svo að skilja að borgin hafi átt þarna hlut að máli en hún brást fljótt og vel við og setti þarna nýjan bekk daginn eftir - sem Trausti vakti athygli á og hrósaði borginni fyrir.

Hrós á Trausta og borgina.

Við Grafarvogsbúar viljum hafa hverfið okkar fallegt og vel snyrt í umhirðu - sem og að umgengni sé til fyrirmyndar. - JGH

Sorglegt uppátæki.

Trausti birti þessa færslu á Facebook.

Nýr bekkur kominn á sinn stað daginn eftir og sem Trausti vakti athygli á með hrósfærslu á FB.

Verum stolt - mikill heiður að hafa þær á EM í knattspyrnu

Tue, 08 Jul 2025 14:48:46 GMT

VERUM STOLT AF ÞEIM! Auðvitað hefur gengi íslenska liðsins á EM í knattspyrnu í Sviss verið undir þeim miklum væntingum sem þjóðin hefur gert til liðsins en stúlkurnar mega ekki láta hugfallast heldur bera höfuðið hátt þrátt fyrir tvo töp.

Þær eiga leik gegn Noregi nk. fimmtudag og þá skiptir öllu að þær mæti með sjálfstraust og leikgleðina að vopni.

Í þessari stöðu eigum við Íslendingar ekki heldur að detta ofan í þá gryfju að ræða um að liðið sé ómögulegt og tala það niður. Það er heiður fyrir okkur Íslendinga að eiga lið í knattspyrnu á hæsta getustigi á Evrópumóti kvenna í knattspyrnu. Þannig eigum við að líta á málið.

Það er eðlilegt að hafa væntingar um gott gengi. Þær væntingar eru raunhæfar í ljósi þess að í liðinu eru leikmenn sem spila með nokkrum af bestu liðum í Þýskalandi og Ítalíu. En það er samt sem áður engin katastrófa að tapa gegn Finnum 0-1 og gegn Sviss á heimavelli þeirra 0-2. Þetta eru ekki fjögurra, fimm eða sex marka töp þar sem valtað er yfir liðið.

Núna er bara að spila um heiðurinn gegn Noregi á fimmtudaginn.

Í íþróttum veit aldrei á gott að vera of sigurviss fyrir leiki; það er kannski það eina sem ég vil og get sett út á liðið. Mér finnst þær hafa verið of sigurvissar í viðtölum fyrir leikina. Leikir eru aldrei unnir fyrirfram. Það er gömul lexía og ný!

Áfram Ísland á fimmtudaginn!

Það er heiður fyrir Ísland að eiga lið á þessu móti sem etur keppi við þær bestu! - JGH

Það er heiður fyrir okkur Íslendinga að eiga lið í knattspyrnu á hæsta getustigi á Evrópumóti kvenna í knattspyrnu.

Um 1.500 Íslendingar eru úti í Sviss og hvetja liðið til dáða - og eru landi og þjóð til sóma.

Frábær sigur Fjölnismanna á erfiðum útivelli í Breiðholtinu

Sat, 05 Jul 2025 18:05:51 GMT

VEL GERT! Það er fyllsta ástæða til að óska Fjölnisliðinu til hamingju með frábæran útisigur í gær gegn Leikni á erfiðum útivelli í Breiðholtinu. Þetta var mikilvægur sigur og með honum lyftu Fjölnismenn sér upp í 10. sætið.

Þessi leikur hefur sömuleiðis mikla þýðingu við að ná upp sjálfstrausti í liðinu aftur eftir erfiðan skell á dögunum gegn Þór frá Akureyri hér á heimavelli Fjölnis í Grafarvogi.

Gott mál. Stígandi í liðinu að undanförnu.

Góður sigur á Þrótti, erfitt tap gegn Þór og nú öflugur sigur á Leikni í Breiðholtinu. Sex stig af níu.

Stöndum með okkar mönnum. Áfram Fjölnir. - JGH

Haninn að hverfa í grasinu!

Fri, 04 Jul 2025 17:42:34 GMT

HANA NÚ! Listaljósmyndarinn og Grafarvogsbúinn Grímur Kolbeinsson sendi þessa mynd til mín með þessum orðum: „ Ekki slegið i Grafarvogi fyrr en hann hverfur...við göngustíginn hjá Stuðlum.“

Frábær mynd og segir allt sem segja þarf! - JGH

Pattstaðan á Alþingi. Vantar Kristrúnu viljann til að stíga inn og leysa vandann?

Fri, 04 Jul 2025 17:11:51 GMT

HLUTHAFASPJALLIÐ. VIÐSKIPTI. Pattstaðan á Alþingi vegna frumvarps ríkisstjórnarinnar um tvöföldun veiðigjalda hefur ekki farið fram hjá neinum og ræddum við Sigurður Már Jónsson þau mál lítillega í nýjasta hlaðvarpsþætti okkar, Hluthafaspjallinu , sem við tókum upp í gær og er að finna á Brotkast.is.

Mikil kergja er hlaupin í þingmenn um þinglok og í dag birtust fréttir um að eitthvað sé að þokast í samkomulagsátt í þeim efnum. Það er vel. Sigurður Már Jónsson segir í spjalli okkar að vissulega komi það á óvart að forsætisráðherra hafi ekki stígið fram til þessa og reynt að höggvi á hnútinn fyrst hann telji að í óefni sé komið.

„Forsætisráðherra þarf að koma með lausn, hafa myndugleikann og tala beint við leiðtoga stjórnarandstöðunnar, sérstaklega þegar samtöl á milli þingflokksfomanna ganga ekki upp,“ segir Sigurður Már.

STJÓRNARFORMAÐUR Í FYRIRTÆKI

Ég benti á að forsætisráðherra - og aðrir ráðherrar - væru ekki bara ráðherrar sinna flokka heldur þyrftu að virða skoðanir allra alþingismanna og tók dæmi af stjórnarformanni - og stjórnarmönnum - í fyrirtæki.

Stjórnarformaður er formaður allra hluthafa í fyrirtækinu og þarf að hafa hag þeirra allra í hug við ákvarðanir.

Góður stjórnarformaður reynir sömuleiðis ávallt að hlusta á og virða sjónarmið annarra stjórnarmanna og farsælast er auðvitað ef honum tekst að ná samkomulagi á milli funda til að leiða viðkvæm mál í höfn svo ekki komi til orðaskaks og harðra átaka um þau á stjórnarfundum. - JGH

Við stöndum að hlaðvarpsþættinum Hluthafaspjallinu á Brotkast.is; Jón G. Hauksson og Sigurður Már Jónsson.

Nú er bara að ýta þessum leik frá sér og byggja upp energí og trú fyrir næsta leik

Wed, 02 Jul 2025 23:28:42 GMT

ÁFRAM GAKK. Þrátt fyrir að hafa tapað gegn Finnum í fyrsta leiknum á EM getur íslenska liðið gengið stolt af velli. Nú er bara að ýta þessum leik frá sér og byggja upp energí og trú fyrir næsta leik.

Vissulega var fyrri hálfleikurinn verulega undir væntingum og Finnar mun betri. En eftir að fyrirliðinn, Glódís Perla, þurfti að fara af velli í hálffleik vegna veikinda og missa síðan einn leikmann, Hildi Antonsdóttur, út af með rautt á 58 míníutu verður að hrósa liðinu fyrir að sækja óhræddar til jöfnunar og sigurs á lokakaflanum manni færri. Finnar skoruðu sitt mark á 70. mínútu. manni yfir.

Það vakti á vissan hátt athygli að íslenska liðið var eiginlega betra eftir að það fékk á sig markið. Þá var eins og það losnaði um spennuna í liðinu og þær sýndu góðan leik og sköpuðu góð færi.

Sigur í næsta leik - við verðum að hafa trú á því.

Sjálfstraust í íþróttum skiptir öllu máli!

Áfram Ísland. - JGH

Segir borgina ekki refsa Grafarvogsbúum - átti að slá Sóleyjarima síðsumars

Wed, 02 Jul 2025 22:14:26 GMT

ENGIN REFSING! Hjalti Jóhannes Guðmundsson, skrifstofustjóri borgarlandsins, segir í samtali við Vísi út af frétt Grafarvogs.net í gærkvöldi að borgin hafi ekki verið að refsa Grafarvogsbúum með því að slá ekki túnið við Sóleyjarima. Til hafi staðið að slá túnið síðsumars. Sjá frétt Vísis hér.

Hjalti segir við Vísi að þetta sé liður í að draga úr slætti í borginni en undanfarin ár hafi borgin skoðað svæði til að draga úr slætti og að túnið við Sóleyjarima hafi orðið fyrir valinu ásamt öðrum svæðum.

„Þetta hefur alltaf verið í slætti hjá okkur undanfarin ár. En þetta tengist verkefni sem heiti Grassláttur í Reykjavík, þar sem við skoðum svæði þar sem draga má úr slætti og önnur sem jafnvel mega bara fá að vaxa villt,“ segir Hjalti við Vísi.

ÁTTI AÐ SLÁ SÍÐSUMARS

„Það stóð til að slá Sóleyjarima bara einu sinni í sumar, og það átti að vera svona síðsumar,“ segir Hjalti.

Hann segir að komi ábendingar um að fólk vilji láta slá þessi tún, þá geti borgin tekið mark á þeim. Það stangast raunar á við frásögn íbúa við Sóleyjarima sem segja að borgin hafi neitað að slá þrátt fyrir beiðni og óskir þar um.

Þá segir Hjalti að engin tengsl séu milli fyrirhugaðrar íbúðauppbyggingar á svæðinu og ákvörðunar um að draga úr slætti á túninu.

„Nei, nei. Sjónarmiðið á bak við þetta verkefni er að reyna að auka aftur líffræðilegan fjölbreytileika og fá svona fjölbreyttara útlit á svæðið. Hjálpa þessum náttúrulega gróðri í borgarlandinu að vaxa og dafna .“

Athyglisvert! Liður í að h jálpa náttúrulegum gróðri að vaxa og dafna en samt stóð til að slá síðsumars. - JGH

Ólafur Haraldsson var öflugur á vélinni í gærkvöldi. Borgin segir túnið tengjast verkefni um að leyfa náttúrulegum gróðri að vaxa en engu að síður átti að slá túnið síðsumars.

Fánadagur í dag - Áfram Ísland á EM í Sviss

Wed, 02 Jul 2025 13:51:25 GMT

FÁNADAGUR. Í dag gerum við daginn að fánadegi enda fyllsta ástæða til að draga íslenska fánann að húni því íslenska kvennalandsliðið í knattspyrnu hefur leik gegn Finnum kl. 16 í dag á EM í Sviss.

Leikurinn fer fram á Stockhorn Arena í bænum Thun í Sviss sem er suður af borginni Bern þar sem þingið situr - en engin skildgreind höfuðborg er í Sviss.

Búist er við um 1.500 íslenskum stuðningsmönnum á leikinn.

ÁFRAM ÍSLAND. - JGH

Drögum íslenska fánann að húni og hvetjum okkar konur í Sviss.

Þær koma vel stemmdar og undirbúnar til leiks.

Búist er við 1.500 Íslendingum á leikinn í Sviss í dag.

Borgin neitaði að slá - íbúar í Rimahverfi risu þá upp og tóku til sinna ráða

Tue, 01 Jul 2025 22:07:44 GMT

TÓKU SLÁTTINN Í SÍNAR HENDUR. Það var heldur betur líflegt á túninu við Sóleyarima í Grafarvogi fyrir neðan flugfjarskiptastöð Isavia í kvöld.

Íbúarnir höfðu margoft beðið borgina um að slá túnið líkt og hún hefur gert undanfarin ár - en þó ekki þetta sumarið. Þeir sýndu samstöðu í verki og sló túnið sjálfir; ungir sem aldnir mættu og tóku þátt.

Þetta er þekkt útivistarsvæði og túnið hefur iðað af börnum að leik á sumrin. Til stendur að reisa þarna fjölda íbúða nái áform borgarinnar um þéttingu byggðar í Grafarvogi fram að ganga.

Nágrannasamstaða í verki.

Sigrún Ásta Einarsdóttir , sem hefur verið áberandi í baráttunni gegn þéttingu byggðar, sagði á samfélagsmiðlunum: „Þegar borgin neitar að slá túnið þurfa íbúar að taka sig saman og sjá um verkið. �� Við erum að slá og tína rusl á útivistarsvæðinu í hjarta Rimahverfis.“

Íbúarnir leigðu sér litla traktors-sláttuvél og Ólafur Haraldsson , íbúi við Sóleyjarima, sá um að slá á vélinni. „Ég vann hjá borginni í gamla daga við að slá á sumrin þannig að þetta er svolítil nostalgía hjá mér,“ sagði hann við Grafarvog.net.

„Okkur leiddist að hafa þetta í svona órækt, það hefur ekki verið það áður. Borgin hefur sett þetta tún í einhvern ruslflokk og lætur þetta vaxa villt - sem þýðir bara að hún nennir ekki að slá. Núna geta börnin leikið sér hér að vild á þessu fína útivistarsvæði í hjarta Rimahverfisins.“

Sigurður Einarsson gekk um með sláttuorf á svæðinu og lét til sín taka. „Það vita það allir hvers vegna borgin slær ekki þetta útivistarsvæði. Hún vill hafa þetta svæði í órækt og leyfa illgresinu að vaxa. Þá getur hún sagt að hér þurfi að byggja því þetta er óhirt.“

Hann bætti við að fróðlegt væri að vita hvaða svæði eigi eiginlega að vera villt og hver ekki í Grafarvogi. „Það hefur verið slegið mjög fallega víða - þó seint hafi verið, en svo eru þekkt útivistarsvæði, eins og þetta, sem eru í algerri órækt. Maður spyr sig hvort það sé tilviljun því við íbúarnir hérna höfum verið mjög duglegir við að mótmæla þéttingu byggðarinnar.“

Fallegt sumarkvöld í Grafarvogi og fín nágrannasamstaða í verki. - JGH

Sigurður Einarsson öflugur með sláttuorfið.

Njólinn kominn í pokana. Margir eru farnir að trúa því að Reykjavíkurborg sé helsti vinur þessarar fjölæru jurtar.

Íbúarnir leigðu sér litla traktorssláttuvél og slógu og hirtu þetta vinsæla útivistarsvæði.

Líf og fjör á þessu þekkta útivistarsvæði - sem borgin áformar að leggja undir fjölda íbúða.

Ólafur Haraldsson öflugur á vélinni og rifjaði upp gamla takta.

Hvílík 126 ára saga eldspýtna - merkið sagt Móna Lísa vörumerkjanna

Mon, 30 Jun 2025 22:27:39 GMT

EINSTAKT ELDSPÝTNASAFN! Sænska eldspýtnavörumerkið þrjár stjörnur er ekki aðeins það þekktasta í heimi á sviði eldspýtna heldur er það talið svo þekkt um allan heim að því hefur verið líkt við vörumerkið Mónu Lísu.

Það er vel þess virði að líta inn á eldspýtnasafnið í Jönköping sem er 126 ára saga (1845 -1971) framleiðslu í Jönköping sem um árabil var miðpunktur allrar eldspýtnaframleiðslu í Svíþjóð og heiminum - því Svíar hófu vélknúna fjöldaframleiðsla á eldspýtum, einmitt í Jönköping.

Þrjár stjörnur - safety matches. Þekktasta vörumerki í heimi á sviði eldspýtna og svo þekkt að það hefur verið nefnt Móna Lísa merkimiða.

Ævintýrið byrjaði árið 1845 og þá með fosfórseldspýtum sem síðar urðu bannaðar þar sem fjöldi fólks sýktist við framleiðsluna en einkenni veikindanna komu yfirleitt fyrst fram í skemmdum tönnum starfsmanna.

Um tíma voru börn notuð við að framleiða eldspýturnar og saga safnsins er á vissan hátt helguð þeim eins og sjá má á upphafsmyndinni hér að ofan sem er kynningarplakat safnsins. Safnið er í húsinu þar sem framleiðslan fór lengst af fram en það var reist árið 1848.

Það voru bræðurnir Johan og Carl Lundström sem hófu eldspýtnaframleiðsluna í Jönköping árið 1845. Það var svo árið 1853 að öryggiseldspýtur (safty matches) voru framleiddar eftir uppfinningu efnafræðingsins og Svíans Gustaf Erik Pasch.

Hjólin í framleiðslu eldspýtna fóru hins vegar að snúast fyrst fyrir alvöru þegar Alexander Lagerman fann upp vél til að fjöldaframleiða eldspýtur.

Eldspýtnaframleiðsla í Jönköping lagðist af árið 1971 og færðist til tveggja bæja í Svíþjóð - en hvílík 126 ára sænsk velgengnissaga í Jönköping.

Grafarvogsbúar - það er vel þess virði að líta inn á þetta öflug safn ef þið eigið leið um Jönköping. - JGH

Talan þrír hefur sérstaka töframerkingu í mörgum löndum. Það er ástæðan fyrir því að þrjú tákn sáust oft í vörumerkjum hér á árum áður.

Það er meira en að segja það að finna upp vél sem býr til svona litla pinna.

Viðurinn í eldspýturnar var eingöngu ösp - hún hentaði langbest. Kúnstin var að fletja hana svona niður og svo þurfti að saxa í eldspýtnapinna.

Alexander Lagerman sem fann upp vélina til að fjöldaframleiða eldspýtur.

Börn komu mjög við sögu við framleiðslu á eldspýtunum í fyrstu. Það breyttist svo þegar tæknin ruddi sér til rúms.

Eldspýtnasafnið er í þessari byggingu í Jönköping sem reist var árið 1848 og var um árabil miðpunktur eldspýtnaframleiðslu í heiminum.

Þetta er vélin sem Alexander Lagerman smíðaði og við það urðu þáttaskil - fjöldaframleiðsla hófst á fullu.

Logafold er í einum þekktasta rósagarði heims í Jönköping í Svíþjóð

Sat, 28 Jun 2025 18:39:45 GMT

LOGAFOLD Í RÓSAGARÐI. Það kom skemmtilega á óvart þegar Grafarvogur.net var á ferð í einum þekktasta rósagarði heims, Rosenlunds herragarðinum í bænum Jönköping í Svíþjóð, að innan um 550 mismunandi tegundir af rósum væri að finna fjórar gerðir rósa frá Íslandi, þeirra á meðal rósina LOGAFOLD.

Þetta er ekki aðeins einn frægasti rósagarður í Svíþjóð heldur í heiminum og fékk nýlega eftirsótt verðlaun Alþjóðasambands rósafélaga (WFRS).

Verðlaunin eru veitt á þriggja ára fresti og Rosenlunds herragarðurinn er fyrsti og eini rósagarðurinn í Svíþjóð sem hefur verið tilnefndur til verðlaunanna.

Garðurinn er nú á lista með görðum eins og Rudolf W. van der Goot-rósagarðinum í Bandaríkjunum, Roseraie Princesse Grace de Monaco í Mónakó og Roseto Botanico Carla Fineschi á Ítalíu og Rosarium Sangerhausen í Þýskalandi. - JGH

Herragarðurinn var byggður 1780 af Mauritz Posse, sem var dómari í Göta-dómstólnum í Jönköping og konu hans, Gertrud Ehrenpreus, en hún var dóttir eiganda Huskvarna.

Í garðinum eru 550 mismunandi gerðir rósa.

Þetta er ekki aðeins einn frægasti rósagarður í Svíþjóð heldur í heiminum og fékk nýlega verðlaun Alþjóðasambands rósafélaga (WFRS).

Logafolds-rósin í þessum eina frægasta rósagarði heims í Jönköping.

Verðlaun Alþjóðasambands rósafélaga koma ekki á óvart.

Fjórar rósategundir frá Íslandi eru í garðinum. Drífa, Logafold, Katrín Viðar og Yndisrós.

Logafoldin blasir við.

Yndisrósin frá Íslandi.

Fallegar eru þær - hvílík litadýrð.

Horft niður garðinn í átt að Rosenlund-höfðingjasetrinu sem er byggt í gústavískum stíl og er ein frægasta eldri bygging sveitarfélagsins.

Öflugt veitingahús er í garðinum og er það vinsælt fyrir alls kyns veislur - eins og brúðkaupveislur.

Grafarvogur.net á ferð í Svíþjóð - sólarlagið við vatnið Vättern í Svíþjóð

Fri, 27 Jun 2025 16:58:44 GMT

AF FIMMTÁNDU HÆÐ! Grafarvogur.net hefur verið á ferð um Ítalíu og Svíþjóð að undanförnu og mun á næstunni birta nokkrar fréttir úr ferðinni.

Hér má sólarlagið við vatnið Vättern í Svíþjóð í fyrrakvöld en það er annað stærsta stöðuvatnið þar í landi.

Myndin er tekin út um glugga á fimmtándu hæð hótelsins Quality Match Hotel í Jönköping sem er yfir 100 þúsund manna bær við syðsta enda vatnsins. - JGH

Hæsta hótelið í Jönköping og tekið í notkun fyrir nokkrum árum.

Þessir steinar fyrir utan hótelið minntu óneitanlega á útilistaverkið hans Sigurðar Guðmundssonar á Djúpavogi - Eggin í Gleðivík.

Skopmynd Moggans í dag - „hann er nú heillandi karlinn“

Fri, 27 Jun 2025 16:35:46 GMT

TRUMP OG ÞORGERÐUR KATRÍN. Skopmyndateiknari Morgunblaðsins nýtir sér ummæli Þorgerðar Katrínar Gunnarsdóttur utanríkisráðherra um Donald Trump Bandaríkjaforseta í mynd dagsins.

Býsna skemmtileg mynd - þetta er jú skopmynd!

Þær Kristrún Frostadóttir forsætisráðherra og Þorgerður Katrín hittu Trump á fundi Atlantshafsbandalagsins í Haag í Hollandi um síðustu helgi og áttu við hann stutt spjall. Hafði Þorgerður á orði við Vísi að karlinn væri nú heillandi.

En þar sagði: „Þú hittir Marco Rubio utanríkisráðherra Bandaríkjanna?“

„Já, ég náði reyndar líka að taka í spaðann á honum Trump, hann er nú heillandi karlinn. Hann má eiga það.“

Þess má geta að Svandís Svavarsdóttir , formaður Vinstri grænna, hjólaði í kjölfarið í Þorgerði Katrínu fyrir að kalla Donald Trump „heillandi“. - JGH

Andúð stjórnmálamanna á atvinnulífinu er séríslenskt fyrirbæri

Fri, 27 Jun 2025 15:53:21 GMT

HLUTHAFASPJALLIÐ. VIÐSKIPTI. Er svo komið að stjórnmálamenn á Íslandi hafi horn í síðu atvinnulífsins? Um þetta er fjallað í nýjasta þætti hlaðvarps okkar Sigurðar Más Jónssonar, HLUTHAFASPJALLINU, á Brotkast.is

Þórður Pálsson , forstöðumaður fjárfestinga hjá Sjóvá, er gestur þáttarins að þessu sinni og í spjalli hans við Sigurð Má Jónsson , er þessari spurningu varpað fram og farið yfir málinu.

Þórður segir að Ísland skeri sig algerlega frá hinum Norðurlöndunum vegna augljósrar andúðar og jafnvel neikvæðni margra stjórnmálamanna í garð atvinnulífsins.

Hann segir að þetta komi rækilega í ljós í umræðunni um veiðigjaldafrumvarpið.

Þá kemur fram hjá honum að stjórnkerfi og utanríkisþjónustur hinna Norðurlandanna séu eindregnustu talsmenn atvinnulífsins og þjóðhöfðingjar viðkomandi landa setji sig aldrei úr færi við að aðstoða og kynna fyrirtæki viðkomandi lands.

En hvers vegna þessi andúð? Að mati Þórðar er þetta hugsanlega vegna þess að menn séu ekki enn búnir að vinna sig út úr atburðum bankahrunsins. - JGH

Þórður telur að neikvæðni í garð atvinnulífsins komi rækilega í ljós í umræðunni um veiðigjaldafrumvarpið.

Nú fylgjum við sigrinum á Þrótti eftir og tökum Þórsara í kvöld

Fri, 27 Jun 2025 13:50:28 GMT

ÁFRAM FJÖLNIR! Það verður hörkuspennandi leikur í Grafarvoginum í kvöld kl. 18:00. Þá spila Fjölnismenn við Þórsara frá Akureyri.

Það hefur verið á brattann að sækja hjá okkar mönnum í Lengjudeildinni í sumar en þeir unnu hins vegar frábæran sigur á Þrótturum í síðasta leik, 4-1, og nú er bara að fylgja þeim sigri eftir.

Þetta verður svo sannarlega baráttuleikur.

Þór er í fjórða sæti deildarinnar en Fjölnir í því ellefta.

Tveir sigurleikir í röð væri auðvitað frábært - og blési mönnum í brjóst mikið sjálfstraust. - JGH

Fjölnismenn á æfingu í gær og gíra sig upp fyrir leikinn.

Æfingin skapar meistarann. Vonandi verður fagnað í kvöld.

Auðvitað skiptir leikgleðin máli.

Líf og fjör á námskeiðum ævintýra hjá Grafarvogskirkju - sjáið hressilegt myndband

Fri, 27 Jun 2025 13:25:18 GMT

ÆVINTÝRANÁMSKEIÐ! Það er svo sannarlega líf og fjör á hinum vinsælu ævintýranámskeiðum Grafarvogskirkju. Dagskráin er fjölbreytt og krakkarnir láta ekki sitt eftir liggja að taka þátt og og skemmta sér. Gott framtak hjá Grafarvogskirkju.

Við látum hér skemmtilegt og hressilegt myndband frá kirkjunni fljóta með. Sjá hér. Sem og nokkrar myndir.

Enn eru víst nokkur pláss laus á námskeiðunum í ágúst. Hægt er að ská sig hér.

Svo sannarlega gott framtak hjá kirkjunni okkar í Grafarvogi. - JGH

Allir í stuði eins og vera ber.

Rennibrautin er vinsæl.

Hver brosir ekki breitt á líflegu ævintýranámskeiði.

Gleðin liggur í loftinu.

Auðvitað er veifað.

Maður þarf nú að láta í sér heyra.

Skýin baða sig yfir byggðinni - „við erum bara að kíkja á leiki mannanna“

Fri, 27 Jun 2025 12:35:26 GMT

Í SKÝJUNUM. Yfirleitt heyrum við af því að baða sig í sólskini en á þessari mögnuðu mynd sem Grafarvogur.net fékk senda til sín í gærkvöldi virðist byggðin og borgarfjallið baða sig í skýjunum.

Heldur betur lágskýjað.

Myndina tók Pétur Óskar Sigurðsson í gærkvöldi þar sem hann horfir yfir Grafarvoginn og skýin eru nánast eins og þykkur grár mökkur yfir hluta byggðarinnar í Grafarvogi, Kjalarnesi og Esjunni.

„ Við skýin erum bara að kíkja á leiki mannanna ,“ sungu þau í Spilverki þjóðanna og bættu við: „ Við skýin erum bara grá, bara grá. “

Þessi eru bara ljósgrá, bara ljósgrá.

Skemmtilegt! - JGH

Ríkið hækkar skattana um 10 milljarða - markaðsvirðið fellur um 50 milljarða

Sat, 21 Jun 2025 18:10:17 GMT

HLUTHAFASPJALLIÐ. VIÐSKIPTI. Veiðigjöldin lækka markaðsvirðið. Áform ríkisstjórnarinnar um að hækka veiðigjöldin á útgerðir landsins hafa þegar haft mikil áhrif á virðí hinna þriggja skráðu sjávarútvegsfyrirtækja í Kauphöllinni; Brim, Síldarvinnslunar og Ísfélagsins.

Frá því að áformin voru kynnt hefur virði þessara þriggja félaga minnkað um 50 milljarða króna í Kauphöllinni.

Núna vaknar spurningin hvort ríkisstjórnin hækki enn þær miklu álögur sem ríkið leggur þegar á bankana eftir söluna á Íslandsbanka þar sem hlutur ríkisins á fjármálamarkaði hefur minnkað. Landsbankinn er núna stærsta eign ríkisins á fjármálamarkaðnum.

Um þetta er fjallað í nýjasta hlaðvarpsþætti okkar Sigurðar Más Jónssonar, HLUTHAFASPJALLINU, á Brotkast.is.

Gestur þáttarins að þessu sinni er Alexander Jensen Hjálmarsson, stofnandi greiningarfyrirtækisins Akkurs og fara þeir Sigurður Már Jónsson yfir þessi mál og spyrja sig að því hvort pólitísk óvissa sé að aukast varðandi rekstrarumhverfi bankanna í ljósi þess sem gerst hefur í sjávarútveginum.

Þess má geta að teygnin í skattheimtunni er mikil því ríkið áformar að auka skattheimuna á allar útgerðir landsins um 10 milljarða - en áhrifin á þau þrjú sjávarútvegsfyrirtæki sem skráð eru í Kauphöllinni eru sláandi; eigendur þeirra; einstaklingar, lífeyrissjóðir, verðbréfasjóðir og ýmis félög, hafa tapað 50 milljörðum fyrir vikið. - JGH

Frábært Fjölnismenn. Loksins sigur og það stórglæsilegur gegn Þrótti

Fri, 20 Jun 2025 06:12:56 GMT

LOKSINS! Hann var svo sannarlega kærkominn sigurinn hjá Fjölnismönnum í fyrstu deildinni í gærkvöldi. Þeir unnu Þróttara með fjórum mörkum gegn einu, 4-1. Magnaður sigur þar sem Fjölnismenn léku manni færri síðustu tíu mínúturnar.

Vonandi veit þessi sigur Fjölnismanna á gott því þeir hafa átt í basli í deildinni í sumar og var þetta þeirra fyrsti sigur í níu leikjum; höfðu fyrir leikinn gert þrjú jafntefli en tapað fimm leikjum.

Þrátt fyrir sigurinn er liðið ennþá í 11. sæti deildarinnar sem er fallsæti. En sigurinn í gærkvöldi veitir liðinu örugglega mikið sjálfstraust og vonandi vinnur það sig upp töfluna í næstu leikjum.

Þessi leikur lofaði góðu og til hamingju Fjölnismenn með sigurinn.

Ísinn er brotinn. - JGH

Grafarvogsbúinn Katrín Halldóra fjallkonan að þessu sinni

Wed, 18 Jun 2025 08:05:12 GMT

FJALLKONAN. Grafarvogsbúinn Katrín Halldóra Sigurðardóttir var í hlutverki fjallkonu Reykjavíkur við hátíðarhöldin í höfuðborginni í gær.

Hún flutti ávarp eftir Þórdísi Helgadóttur á Austurvelli og lokaði þar með hátíðarathöfninni - eftir að Halla Tómasdóttir forseti ávarpaði þaðan þjóðina í fyrsta sinn á þjóðhátíðardegi. Sjá hér frétt mbl.is.

Katrín Halldóra er löngu kunn sem leikari og söngkona en hún sló eftirminnilega í gegn í leikritinu Ellý sem sýnt var í Borgarleikhúsinu við metaðsókn. Þá hefur hún leyst Völu Kristínu Eiríksdóttur af í leiksýningunni Laddi og gert það mjög vel eins og hennar er von og vísa.

Svo má ef til vill segja að vel hafi farið á því að Grafarvogsbúar ættu fjallkonu Reykjavíkur í ár - en Fjallkonuvegur er jú í Grafarvogi.

(Meðfylgjandi mynd er fengin úr frétt mbl.is og ljósmyndari er Hákon.) - JGH

Lýðveldisstofnunin 1944 - hér sýnum við einstaka kvikmynd Óskars Gíslasonar

Tue, 17 Jun 2025 07:31:05 GMT

TIL HAMINGJU MEÐ DAGINN. Grafarvogur.net sýnir hér einstaka kvikmynd Óskars Gíslasonar sen hann tók við stofnun lýðveldisins á Þingvöllum 17. júní 1944 á fæðingardegi Jóns Sigurðssonar forseta.

Það var rigning á Þingvöllum þennan dag en þjóðin lét það eðlilega ekki á sig fá enda dagurinn engum líkur - lýðveldi Íslands stofnað og sjálfstæði þjóðarinnar loksins í höfn að fullu.

Hér má sjá mynd Óskars.

Njótið vel. Grafarvogur.net óskar landsmönnum til hamingju með daginn. - JGH

Sýn. Er nafnabreytingin upphafið að einhverju meiru?

Mon, 16 Jun 2025 15:45:43 GMT

HLUTHAFASPJALLIÐ. VIÐSKIPTI. Er nafnabreytingin hjá Sýn upphafið að einhverjum meiri breytingum? Eða er bara verið að breyta til að breyta? Bréf félagsins hafa lækkað um 24% á árinu.

Um þetta er fjallað í nýjasta þætti hlaðarvarps okkar Sigurðar Más Jónssonar , HLUTHAFASPJALLINU, á Brotkast.is en Helgi Vífill Júlíusson, hlutabréfagreinandi hjá IFS/Reitun, er annar tveggja gesta þáttarins.

Þeir Sigurður Már og Helgi r æða nafnabreytinguna og hvað felist í því að nöfnin Stöð 2 og Vodafone séu sett til hliðar. Núna heitir þetta til dæmis Sjónvarp Sýnar.

Er Sýn að segja upp Vodafone-nafninu og hvaða þjónustu mun félagið fá frá Vodafone í framtíðinni? Verða uppsagnir í framhaldinu og hvernig verður rekstrinum breytt?

Verður til dæmis auðveldara að leggja niður fréttastofu Stöðvar 2 eftir að Stöðvar 2-nafnið er horfið? Er Sýn að taka upp Símamódelið en í því er engin fréttastofa? Spurningarnar eru margar?

Stóra málið fyrir hluthafa er hins vegar ekki nafnabreytingin heldur hvort Sýn takist að hagræða og ná fram auknum hagnaði á næstu misserum svo gengi bréfa í félaginu í Kauphöllinni taki að hækka. - JGH

Sigurður Már Jónsson og Helgi Vifill Júlíusson.

Gengi hlutabréfa Sýnar í Kauphöllinni undanfarin fimm ár. Það fór hæst í tæplega 70 í ágúst árið 2022. Núna er það um 24. Áhersla hluthafa er á aukinn hagnað félagsins og að það verði verðmeira.

Alaskalúpínan í öllu sínu veldi - áttatíu ár síðan fyrstu fræin komu til landsins

Mon, 16 Jun 2025 15:07:15 GMT

LÚPÍNAN. Jónas Ragnarsson, ritstjóri og íbúi í Grafarvogi, er með skemmtilegt innlegg á FB um lúpínuna þar sem hann segir að nú sé kominn sá tími þegar lúpínubreiður setji svip sinn á opin svæði í Grafarvogi, til dæmis milli Hallsvegar og Gagnvegar.

Við grípum hér niður í færsluna: „Á þessu ári eru áttatíu ár síðan Hákon Bjarnason skógræktarstjóri kom úr fræsöfnunarferð til Alaska en þar óx lúpína „villt um allt“.

Var talið að plantan gæti orðið góð til landgræðslu hér, sem raunin varð. Sumum finnst hún nokkuð ágeng en sumir segja að hún hopi eftir nokkur ár fyrir öðrum gróðri.

Fyrir áratug var lúpína sögð þekja 0,3% landsins“ - JR/JGH

Nemendur Borgarholtsskóla tóku Jagúar nóbelskáldsins algerlega í gegn

Fri, 13 Jun 2025 23:47:00 GMT

BORGÓ OG BÍLAR! Borgarholtsskóli er með afar öfluga bílaviðgerðadeild og um sextíu nemendur skólans komu að því skemmtilega verkefni að taka hinn þekkta Jagúar nóbelskáldsins í yfirhalningu; laga, sparsla og sprauta. Núna er bíllinn tilbúinn og verður til sýnis á morgun, laugardag, í hlaðinu á heimili skáldsins við Gljúfrastein.

Jagúar skáldsins var lengi vel í hlaðinu fyrir framan safnið við Gljúfrastein en þessi eðalvagn var farinn að láta á sjá og úr varð fyrir um fjórum árum að yfirhalningin yrði verkefni nemenda í bílaviðgerðadeild Borgarholtsskóla.

RÚV birti á þeim tíma mjög skemmtilega frétt um þetta framtak. Sjá má myndbandið hér.

Það er fyllsta ástæða til að óska nemendum og kennurum Bogarholtsskóla sem komu að þessu verkefni til hamingu með árangurinn. Bíllinn er eins og nýr eftir að farið var mjúkum höndum um hann í skólanum.

Velt gert! Og hvers vegna ekki að skoða dýrgripinn um helgina og líta á magnaða sýningu um skáldið í safninu á Gljúfrasteini í leiðinni. - JGH

Um sexíu nemendur Borgarholtsskóla komu að verkefninu.

Takið eftir bílnúmerinu G145.

Fjöldi Íslendinga yfir áttrætt mun tvöfaldast á næstu árum. „Horfum til hjúkrunarheimila“

Fri, 13 Jun 2025 16:35:13 GMT

HLUTHAFASPHJALLIÐ. VIÐSKIPTI. Guðni Aðalsteinsson, forstjóri fasteignafélagsins Reitir, segir að fjöldi einstaklinga yfir áttrætt muni tvöfaldast á næstu tíu árum og í því felist mikil tækifæri fyrir félagið til að láta til sín taka á sviði hjúkrunarheimila. Þess má geta að Reitir eru með risavaxið verkefni í túnfæti Grafarvogs - Korputúninu.

Þetta kemur fram í nýjasta hlaðvarpsþætti okkar Sigurðar Más, Hluthafaspjallinu, á Brotkast.is. Guðni er gestur þáttarins ásamt Helga Vífil Júlíussyni. (Sjá meðfylgjandi klippu.)

Í spjalli þeirra Sigurðar Más og Guðna raðar Guðni arðsemi fjárfestinga Reita í þriggja kosta röð. Minnsta arðsemin felist í að kaupa fasteignir í samkeppni við aðra.

„Næstmesta arðsemin er að taka einhverjar eignir og umbreyta þeim, eins og gömlu Icelandair-skrifstofurnar við Nautholsveginn. Þriðja leiðin og sú arðbærasta er að taka þetta algerlega frá grunni, eins og þróunarreiturinn sem við eigum uppi í Korputúni í Mosfellsbæ. Og þar ertu heldur ekki í vandræðum með Samkeppniseftirlitið sem er orðinn stærri hluti í mörgum kaupum á fasteignum. Ef þú kaupir mjög stóra eign þá vaknar alltaf sú spurning hvort þetta sé orðið samkeppnismál eða ekki.“

Guðni nefnir svo möguleikana sem felast í til dæmis byggingu hjúkrunarheimila á næstu árum í ljósi þess að fjöldi einstaklinga yfir áttrætt muni tvöfaldast á næstu tíu árum. „Þetta er eftirspurn sem er ekkert að fara. Okkur langar til að taka þátt í þessu verkefni.“ - JGH

Þriðjungur sem tók þátt í útboði Íslandsbanka búinn að selja með miklum hagnaði

Fri, 13 Jun 2025 16:08:33 GMT

HLUTHAFASPJALLIÐ. VIÐSKIPTI. Þriðjungur þeirra sem keyptu í útboði Íslandsbanka eru búnir að selja bréf sín. Þetta eru um 10 þúsund einstaklingar.

Þetta kemur fram fram í nýjasta þætti hlaðvarps okkar Sigurðar Más Jónssonar, Hluthafaspjallinu, á Brotkast.is.

Annar tveggja gesta í Hluthafaspjallinu að þessu sinni er Helgi Vífill Júlíusson , hlutabréfagreinandi hjá IFS/Reitun, og í spjalli þeirra Sigurðar Más , vangaveltast þeir með það hvernig markaðurinn raðast upp á næstunni en bæði Íslandsbanki og Arion banki hafa sent formlegt bréf til stjórnar Kviku um sameiningu.

Ljóst er að fjöldi einstaklinga tók eingöngu þátt í útboðinu á hlut ríkisins í Íslandsbanka þar sem ríkisstjórnin með Daða Má Kristófersson, fjármálaráðherra, í fararbroddi veitti mjög góðan afslátt á bréfunum.

Þannig hafa þeir ríflega 10 þúsund einstaklingar, sem þegar hafa selt bréf sín í bankanum, selt bréfin á genginu um 118 til 119, bréf sem þeir keyptu jú á genginu 107 í útboðinu. Sem gerir jú um 11% hagnað. - JGH .

Íslenski fáninn 110 ára!

Thu, 12 Jun 2025 15:32:20 GMT

ÍSLENSKI FÁNINN 110 ÁRA! Það er áhugaverð og skemmtileg aðsend grein eftir Snorra Snorrason í Morgunblaðinu í dag um íslenska fánann.

„Stofndagur íslenska fánans er talinn 19. júní 1915 og á hann því 110 ára afmæli í ár 2025. Konungsúrskurður um sérfána fyrir Ísland er í raun frá 22. nóvember 1913 um gerð fánans, en gefinn út og staðfestur 1915,“ segir Snorri í grein sinni.

Hann spyr síðan hvað það sé sem tengi okkur saman sem þjóð? Og svarar í raun spurningunni sjálfur. „Er það ekki landið, tungan, menningin, sagan og þjóðfáninn?“ bætir hann við.

Við Grafarvogsbúar erum svo heppnir að eiga fremsta fánasafnara landsins, Ólaf Sverrisson íbúa í Hamrahverfinu. Hann á 215 fána og flaggar nánast á hverjum degi. Í umfjöllun um íslenska fánann birtum við að sjálfsögðu mynd af íslenska fánanum blakta við hún hjá Ólafi í Hamrahverfinu. - JGH

Grein Snorra í Morgunblaðinu í dag.

Gott mál - tókst að losa háhyrninginn síðdegis

Wed, 11 Jun 2025 15:05:17 GMT

HÁHYRNINGURINN! Það tókst að losa háhyrninginn síðdegis í dag og er það mikil gleðifrétt hvernig til tókst.

Það vakti auðvitað athygli allra landsmanna þegar sagt var frá því að háhyrningur hefði tekið stímið og synt rakleitt í land við Gorvík fyrir neðan Staðar- og Víkurhverfið í Grafarvogi - skammt frá golfvellinum við Korpu; þeim hluta hans sem kallast Sjórinn.

Það er einstakt að Grafarvogsbúinn Hrafnhildur Björnsdóttir skyldi ná hinu ótrúlega myndbandi þegar háhyrningurinn synti rakleitt í land - svo að segja í beinni útsendingu. Sjá meðfylgjandi vídeó.

Hér má líka sjá frétt Sýnar um að tekist hefði að losta háhyrninginn

Heimsviðburður. Grafarvogur.net sýnir hér myndband þegar háhyrningurinn synti í land

Tue, 10 Jun 2025 23:48:46 GMT

EINSTAKT MYNDBAND! Grafarvogur.net frumsýnir hér fyrstur allra fjölmiðla einstakt myndband af því þegar háhyrningurinn tók stímið og synti beint upp í land í Gorvík skammt frá Geldinganesi í kvöld.

Hrafnhildur Björnsdóttir tók myndbandið og gaf Grafarvogi.net leyfi til að birta myndbandið.

Athugið að öllum fjölmiðlum er óheimilt að nota myndbandið nema með leyfi Hrafnhildar - en líklegt er að þetta myndband verði sýnt í sjónvarpsstöðvum víða um heim svo einstakt er það - enda ekki á hverjum degi sem háhyrningu syndir í land og festir sig í fjörunni nánast í beinni útsendingu. - JGH

Heimsviðburður við Grafarvogshverfið. Hér næst myndband af því þegar háhyrningur tekur stímið og syndir rakleitt upp í fjöruna. Fjölmiðlar mega ekki birta nema með leyfi Hrafnhildar.

Mæðginin Benedikt og Hrafnhildur fyrst á vettvang og sáu háhyrningin synda í land

Tue, 10 Jun 2025 23:25:53 GMT

FYRST Á VETTVANG! „Við mamma vorum að koma úr matarboði og ókum niður eftir Strandveginum og sjáum þá sporðinn á háhyrningnum í víkinni. Hann synti hér í víkinni í svona tíu mínútur en strandaði á grynningum í fjörunni hinum megin í víkinni, nálægt golfvellinum, en losaði sig þar og okkur til mikillar furðu synti hann á fullu upp í fjöruna,“ segir Benedikt Haraldsson sem varð vitni að því ásamt móður sinni, Hrafnhildir Björnsdóttur, þegar háhyrningurinn tók stímið beint upp í fjöru í Gorvíkinni í kvöld.

Hrafnhildur náði einstöku myndbandi af þessum óvenjulega náttúrufyrirbrigði - og hefur Grafarvogur.net fengið leyfi hjá henni til að birta þetta myndband.

Benedikt hringi í neyðarlínuna 112 til að láta vita af strandinu. „Við biðum í um tvær mínútur þar sem við héldum að hann væri að losa sig en svo sáum við að hann var fastur.“

Benedikt segist ekki hafa verið alveg viss um hvernig hann átti að tilkynna þetta. „Ég sagði bara að ég vissi ekki almennilega hvert ég ætti að hringja en vildi láta vita að hvalur hefði strandað hér í fjörunni rétt við Grafarvoginn. Ég hugsaði með mér að þetta væri óvenjuleg tilkynning,“ segir Benedikt Haraldsson. - JGH

Háhyrningurinn í fjörunni í kvöld. (Mynd: JGH).

Hvalrekinn varð fyrir neðan áttundu brautina á Korpunni - þeim hluta vallarins sem nefnist Sjórinn.

Háhyrningur synti upp í fjöru í Gorvík við Geldinganes - fyrir neðan golfvöll Korpu

Tue, 10 Jun 2025 22:56:13 GMT

HVALREKI! Háhyrningur synti rakleitt upp í fjöru í Gorvík skammt frá Geldinganesi upp úr kl. 21:00 í kvöld og urðu nokkrir sjónarvottar að þessum einstæða atburði, meðal annars nokkrir kylfingar en Gorvík er víkin fyrir neðan 8. brautina á Korpúlfsstaðavellinum, Sjónum.

Það voru þó mæðginin Benedikt Harldsson og Hrafnhildur Björnsdóttir sem voru fyrst á vettvang og urðu vitni að því þegar háhyrningurinn tók stímið beint upp í fjöru og festist.

Þegar Grafarvogur.net mætti á vettvang höfðu þónokkrir Grafarvogsbúar gert sér ferð niður að Gorvíkinni til að líta háhyringinn augum í fjörunni og verða vitni að þessum óvenjulega atburði. - JGH

Kostnaðurinn við leikskólann Brákarborg jafngildir byggingu 10 til 12 einbýlishúsa

Tue, 10 Jun 2025 11:11:51 GMT

KOSTNAÐARKLÚÐUR! Nokkrar umræður hafa orðið að undanförnu um kostnaðinn við leikskólann Brákarborg en Snorri Másson alþingismaður hefur birt áhugavert myndband þar sem fram kemur að kostnaður Reykjavíkurborgar vegna þessa ævintýris er kominn í 2,1 milljarð króna - en það jafngildir kostnaði við að byggja 10 til 12 stór og glæsileg einbýlishús.

Í síðustu viku birti mbl.is frétt undir yfirskriftinni Skýrsla um Brákarborg málar dökka mynd af verkinu. Sjá frétt hér. Um er að ræða skýrslu Innri endurskoðunar Reykjavíkurborgar. Skýrsluna í heild sinni má lesa hér.

Leikskólinn hefur verið lokaður í bráum ár, eða frá því síðsumars í fyrra, þar sem fara þurfti í viðbótarviðgerðir í ljósi þess að torfþakið fræga og burðarvirki voru að gefa sig.

Snorri Másson þingmaður hefur gert mjög athyglisvert myndband um kostnaðinn við leikskólann Brákarborg. (Snorri í stjórnarandstöðu á þingi en tölurnar tala engu að síður sínu máli.)

Hér má svo sjá hið áhugaverða myndband Snorra Mássonar af þessu mikla kostnaðarklúðri sem er frekar í ætt við yfirgengilegan fáránleika.

Málefni og fjármál borgarinnar koma okkur Reykvíkingum svo sannarlega við - og er ekki bundið við þau hverfi sem við búum í.

( Meðfylgjandi opnunarmynd er eftir Árna Sæberg ljósmyndara Morgublaðsins ) . - JGH

Fánasafnarinn í Grafarvogi vekur athygli í kvöldfréttum RÚV - á 215 fána

Mon, 09 Jun 2025 23:17:02 GMT

FÁNASAFNARINN. Ólafur Sverrisson Grafarvogsbúi og íbúi í Hamrahverfinu hefur í nokkur ár vakið athygli fyrir að flagga hinum fjölbreyttustu fánum og oft á tíðum hefur fólk spurt sig sem svo hvaða fáni skyldi þetta nú vera. Hann var í skemmtilegu spjalli í fréttum RÚV fyrr í kvöld. Sjá hér.

Lesendur Grafarvogs.net hafa ugglaust tekið eftir að vefurinn birtir annað slagið myndir af fánum enda Ólafur nágranni undirritaðs í hverfinu.

Fram kom í viðtalinu við RÚV að Ólafur á 215 fána og hyggst halda ótrauður áfram við að safna fánum og flagga - og stefnir að því að eignast fána allra ríkja heims. - JGH

Hliðarverkanir af samruna banka - allt í frost í eitt ár. Vill Kvika í dansinn?

Mon, 09 Jun 2025 14:49:36 GMT

HLUTHAFASPJALL. VIÐSKIPTI. Snorri Jakobsson, eigandi Jakobsson Capital, segir í nýjasta þætti Hluthafaspjallsins hjá þeim Jóni G. og Sigurði Má að sameining Kviku við annan hvorn stóru bankanna, Íslandsbanka eða Arion banka, geti tekið allt að eitt ár og það sem meira er; þeir bankar sem ákveða að sameinast gætu verið í „eins konar frysti“ á meðan Samkeppniseftirlitið er með mál þeirra til skoðunar – sem gæti jú tekið eitt ár, að hans mati.

Sigurður Már Jónsson, Jón G. Hauksson og Snorri Jakobsson, eigandi Jakobsson Capital.

Snorri telur að hluthafar Kviku líti frekar til Íslandsbanka til sameiningar þar sem hann býður 10% ofan á markaðsvirði Kviku við útreikning á skiptihlutföllum.

Snorri veltir því hins vegar fyrir sér í hlaðvarpinu hvort hluthafar Kviku séu yfir höfuð til í þennan dans þar sem ljóst sé að „þetta mun setja allt í frystinn hjá báðum fyrirtækjum,“ meðan samruninn er til skoðunar.

Fróðlegt spjall við Snorra sem sjá má brot úr í meðfylgjandi klippu. - JGH

Jón Ásgeir er svo sannarlega mættur til leiks!

Mon, 09 Jun 2025 13:59:47 GMT

HLUTHAFASPJALLIÐ. VIÐSKIPTI. Jón Ásgeir Jóhannesson er svo sannarlega mættur aftur til leiks á matvörumarkaðnum með kaupum Orkunnar, dótturfélags Skeljar, á 96% hlut í Samkaupum.

Þeir Jón G. og Sigurður Már fara yfir nýjustu vendingarnar á matvörumarkaðnum í nýjasta hlaðvarpsþætti sínum, Hluthafaspjallinu, á Brotkast.is. Raunar hafa þeir félaga fylgst náið með þreifingum Skeljar á Samkaupum frá því í haust og spáðu því þá þegar að Samkaup yrðu leið Jóns Ásgeirs inn á matvörumarkaðinn.

Hann hefur núna teiknað upp þriðja aflið á markaðunum sem keppa mun við Haga og Festi af fullri hörku. Núna eru Orkan, Nettó, Prís, Kjörbúðirnar, Krambúðirnar, 10-11, Heimkaup og Extra öll komin undir regnhlíf Orkunnar.

Jón Ásgeir er stjórnarformaður Skeljar og hefur engan áhuga á að stíga inn á matvörumarkaðinn nema láta til sín taka! Fróðlegt verður að sjá hvort Prís eða Nettó sé á leið í Grafarvoginn - og þá ekki síður hvernig.

Núna eru Hagar með sterka stöðu innan Grafarvogs með Bónus og Hagkaup í Spönginni - en þess utan mun Bónus opna mjög stóra verslun í verslunarkjarnanum á Korputúni og reka hana ásamt versluninni í Spönginni.

Jón Ásgeir er auðvitað öllum hnútum kunnungur þegar kemur að matvörumarkaðnum en hann stofnaði Bónus á sínum tíma ásamt föður sínum, Jóhannesi Jónssyni. - JGH

Hvítasunnan misst svolítið af heilagleika sínum - núna ein mesta ferðahelgi ársins

Sun, 08 Jun 2025 14:13:29 GMT

HVÍTASUNNAN! Hvítasunnan er auk páska og jóla ein af sameiginlegum höfuðhátíðum kristinnar kirkju. Hátíðin markaði upphaflega lok páskatímans sem stóð í 50 daga, en varð síðar að sjálfstæðum minningardegi um það sem kallað er úthelling heilags anda.

Á vísindavef Háskóla Íslands segir: „Nú á dögum hefur hvítasunnan misst mikið af heilagleika sínum í huga fólks og er orðin að langri helgi og fyrstu ferðahelgi ársins ef vel viðrar. Sums staðar er hún þó enn notuð til ferminga.

Ástæður þess að hvítasunnan hefur gleymst á þennan hátt eru ugglaust þær að tilefni hennar er huglægara og afstæðara en tilefni jóla og páska. Þá hafa færri trúarlegir og félagslegir siðir og venjur tengst hvítasunnunni en hinum hátíðunum tveimur, en slíkar venjur festa hátíðir gjarnan í sessi langt umfram það sem hið trúfræðilega inntak þeirra megnar að gera.“

Um hvítasunnuna og aðrar hátíðir kirkjunnar má meðal annars lesa í riti Árna Björnssonar þjóðháttafræðings Saga daganna. - JGH

Getraun dagsins - hvaða fáni er þetta sem blasir við í Grafarvogi?

Sat, 07 Jun 2025 19:57:53 GMT

FÁNAGETRAUN. Þessi fáni blaktir við hún í Grafarvogi og stóra spurningin er auðvitað hvaða fáni þetta sé? Hann minnir að sjálfsögðu á þann danska en krossinn er gulur en ekki hvítur.

Svo?

Frá tíma Haraldar blátannar, konungs Danmerkur, (en hann lést 986) var Skánn, syðsti hluti Svíþjóðar, hluti af Danmörku og alveg til ársins 1658 (Hróarskeldusáttmálinn) og reyndist Skánn mikilvægur hluti danska ríkisins á 15. og 16. öld.

Danir misstu yfirráðin 1658 en náðu þeim aftur í stuttan tíma, 1676–1679, (Skánska stríðið) og svo aftur 1711 en Skánn varð svo formlega hluti af Svíþjóð árið 1720.

Þannig að - þetta var f áni Dana á Skáni þegar þeir réðu þar ríkjum á sínum tíma. - JGH

Konungsríki Haraldar blátannar (rautt) og skattlönd hans og bandalagsríki (gult).

Þjóðhátíðardagur Svía í dag - og flaggað í Grafarvogi

Fri, 06 Jun 2025 17:31:33 GMT

FLAGGAÐ FYRIR SVÍUM! Þjóðhátíðardagur Svía er í dag, 6. júní, og að sjálfsögðu var Svíum sýndur sá heiður í Grafarvogi að draga þann sænska að húni og flagga hressilega fyrir þeim í tilefni dagsins.

Hefð Svía fyrir því að halda upp á þennan dag hófst árið 1916 á Ólympíuleikvanginum í Stokkhólmi til heiðurs kjöri Gústafs Vasa konungs 6. júní 1523 og samþykkt stjórnarskránna frá 1809 og 1974.

Me ðal nýrri hefða sem hafa komið fram síðan þjóðhátíðardagurinn varð rauður dagur í Svíþjóð er boð frá konungi til almennings um að heimsækja stóra n hluta Stokkhólmshallarinnar allan daginn án venjulegs aðgangseyris.

En hvað um það - sá danski í gær og sænski í dag. - JGH

Sá sænski blakti hressilega í Grafarvoginum.

Bókasafnið blómstrar! Lesið með mömmu á gólfinu á bókasafninu

Fri, 06 Jun 2025 13:37:41 GMT

BÓKASAFNIÐ BLÓMSTRAR. Þegar Grafarvogur.net átti leið um bókasafnið í Spönginni einn eftirmiðdaginn í vikunni var þar margt um manninn og mikið um að vera í öllum hornum. Bókasafnið blómstar.

Þarna hittum við fyrir mæðgur sem sátu saman á gólfinu og lásu saman skemmtilega bók. Þetta voru þær Hólmfríður Frostadóttir og dóttirin Esja Geirdal Hólmfríðardóttir.

„Já, við komum hingað talsvert og lesum saman, sérstaklega yfir veturinn. Núna erum við að lesa bókina Mamma sandkaka ,“ segir Hólmfríður. „Þetta er spennandi saga sem hún hefur gaman af.“

- En hvers vegna á gólfinu fyrir framan lítinn kofa?

„Hún valdi þennan stað, vildi endilega að við settumst hérna til að lesa saman.“

Bókin er eftir Lóu Hjálmtýsdóttur rithöfund.

Eitthvað mun vera um það að börn hittist eftir leikskólann á bókasafninu til að fræðast og lesa saman. - JGH

Flaggað í Grafarvogi fyrir þjóðhátíðardegi Dana

Fri, 06 Jun 2025 13:12:23 GMT

ÞJÓÐHÁTÍÐARDAGUR DANA! Flaggað var í Grafarvoginum fyrir þjóðhátíðardegi Dana sem er 5. júní. Frændur vorir á Norðurlöndunum eru raunar duglegir að draga fána að húni í júní því þá halda Svíar, Grænlendingar og jú Danir sína þjóðhátíðardegi - og svo auðvitað við Íslendingar.

Á vísindavef Háskóla Íslands segir raunar um þjóðhátíðárdag Dana að þeir séu tveir, þ.e.16. apríl sem er afmælisdagur Margrétar II. (f. 1940), en að yfirleitt sé litið á 5. júní sem þjóðhátíðardaginn en þá var stjórnarskráin Dana staðfest árið 1849.

Það gustaði vel um danska fánann í Hamrahverfinu í norðanáttinni. - JGH

Sá danski vatt aðeins upp á sig í norðangarranum.

„Við skýin erum bara‘ að kíkja‘ á leiki mannanna“

Thu, 05 Jun 2025 22:09:19 GMT

MAGNAÐAR SKÝJAMYNDIR. Þær eru magnaðar skýjamyndirnar sem Grafarvogsbúinn Guðrún Ólafsdóttir hefur birt á FB-síðu sinni undanfarna daga teknar úr Fannafoldinni.

Það er eitthvað dulúðlegt við það þegar ský hrannast upp með mynstri sem kemur og fer á augabragði.

Það er stundum sagt að eitthvað sé skrifað í skýin. En Spilverk þjóðanna samdi lag og söng um skýin á sínum tíma.

Við skýin felum ekki sólina‘ af illgirni,

við skýin erum bara‘ að kíkja‘ á leiki mannanna.

Við skýin sjáum ykkur hlaupa í rokinu,

klædd gulum, rauðum, grænum, bláum regnkápum

eins og regnbogi meistarans, regnbogi meistarans,

við skýin erum bara grá – bara grá.

Á morgun kemur sólin, hvað verður um skýin þá?

Við birtum hér þrjár myndir frá Guðrúnu þar sem skýin leika listir sínar yfir Grafarvogi að kvöldlagi. - JGH

Svona getur enginn teiknað nema móðir náttúra.

Þau mynda mynstur augnabliksins - og eru svo sjálf mynduð.

Þessi er góð - mjög svo!

Njólarækt Reykjavíkurborgar. Þetta er svo náttúrulegt og fallegt - ekki satt?

Thu, 05 Jun 2025 17:05:06 GMT

NJÓLARÆKT REYKJAVÍKURBORGAR! Grafarvogur.net hefur gert umhirðu borgarinnar í Grafarvogi að umtalsefni í bráðum mánuð og gagnrýnt borgina sérstaklega fyrir að slá ekki grasbala við gangstéttir og vegkanta í hverfinu á sama tíma og nágrannasveitarfélögin eru fyrir löngu búin að setja kraft í slátt og umhirðu. Ólíkt hafast þau að!

Eftir smá könnunarferð í gærkvöldi mátti sjá að búið er að ræsa einhverjar sláttuvélar hjá borginni eða taka upp tólið og hringja í einhver þjónustufyrirtæki sem annast slátt og umhirðu - en það er vart meira en svo. Betur má ef duga skal.

Ennþá er ekkert farið að sinna umhirðu og slætti að neinu ráði í hverfinu og víða í óefni komið og óræktin allsráðandi. Sumum finnst þetta raunar fallegt og tala um að fíflar, njólar og óslegið gras við gangstéttir og vegkanta sé eitthvað svo náttúrulegt.

Njólarækt Reykjavíkurborgar á hringtorginu við gatnamót Víkurvegar og Borgavegar hefur auðvitað fangað athygli Grafarvogsbúa. „Þetta er svo náttúrulegt og fallegt - ekki satt?“ - JGH

Njólarækt Reykjavíkurborgar á hringtorginu við Borgaveg og Víkurveg í Grafarvogi.

Njólinn dafnar vel!

Dóru Björt svarað!

Tue, 03 Jun 2025 22:48:15 GMT

SKOÐUN eftir Jón G. Hauksson.

Dóra Björt Guðjónsdóttir , borgarfulltrúi Pírata og formaður í umhverfis- og skipulagsráði Reykjavíkur, er býsna brött í grein sinni í Vísi í dag. Hér verða dregnar fram tilvitnanir úr grein hennar og þeim svarað lið fyrir lið. Hún byrjar grein sína á húsnæðisátaki borgarinnar.

1. DÓRA: „Húsnæðisátak borgarinnar sem hófst í Grafarvogi snýst um að flýta húsnæðisuppbyggingu í Reykjavík vegna þeirrar húsnæðiskrísu sem stendur yfir en það gekk á tímabili hægar að byggja vegna verðbólgu og hárra vaxta.“

Hér er hlutunum snúið á hvolf. Verðbólga og háir vextir eru frekar afleiðing af því að meirihlutinn í borginni hefur árum saman ekki sinnt skyldu sinni við að nema ný lönd og finna ný byggingarhverfi heldur lagt áherslu á að þétta byggð í borginni svo úr hefur orðið húsnæðisskortur!

2. DÓRA: „Svo mætir það vöntun á minni uppbyggingarlóðum í borginni þannig að minni verktakar fái verkefni og fleiri hendur vinnu við húsnæðisuppbyggingu.“

Það var og! Hér virðist þéttingin í Grafarvogi skyndilega vera í þágu verktaka.

3. DÓRA: „Greining á skólum borgarinnar um hvar væri svigrúm til að fjölga nemendum leiddi í ljós að hægt væri að fjölga íbúðum í Grafarvogi án þess að byggja nýja skóla.“

Rangt! Innviðir í Grafarvogi, eins og vegakerfi, skólar og heilsugæsla, eru þegar sprungnir. Þess utan er ástandið í skólamálum Reykjavíkurborgar mjög krítískt vegna stóraukins álags kennara, sérkennara, námsráðgjafa og skólaliða vegna aukins fjölda barna sem hafa flust til landsins og hafið nám í skólum og leikskólum borgarinnar undanfarin ár. Kennarar eru að kikna undan álagi. Skólakerfið og innviðir því tengdu eru sprungnir!

4. DÓRA: „Til að setja þetta aðeins í samhengi eru þetta mun færri íbúðir en eru núna í uppbyggingu í miðborginni þar sem 538 íbúðir eru í uppbyggingu árið 2025.“

Þetta er svolítið sérstakt. Þéttingin í Grafarvogi er réttlætt með því að hún sé minni en yfirstandandi þétting í miðborginni. Hljómar eins og að vitlaus stefna í Grafarvogi sé í lagi því vitleysan í miðboginni sé ennþá meiri. Dóra Björt getur ekki troðið niður íbúðum samhengislaust hér og þar í Grafarvogi við stofnbrautir með þeim rökum að um færri íbúðir sé að ræða en í miðborginni – en þéttingin þar hefur verið harðlega gagnrýnd og þéttingaríbúðirnar dýrari og fyrst og fremst fyrir þá efnameiri.

5. DÓRA: „Eftir að fyrstu uppbyggingarhugmyndir um nýja íbúðabyggð í Grafarvogi voru kynntar fyrir íbúum haustið 2024 voru áform rýnd út frá athugasemdum þar sem gengið var mjög langt í að mæta sjónarmiðum íbúa.“

Rangt! Sjónarmiðum íbúa hefur ekki verið mætt sem neinu nemur. Borgarfulltrúar geta ekki sett fram ýktar tillögur um þéttingu í upphafi til þess eins að geta dregið lítillega í land og sagst í kjölfarið ganga mjög langt í að mæta sjónarmiðum íbúa – og allir eigi þá að vera fegnir og ánægðir.

6. DÓRA: „Allt tal um að ekki sé hlustað á íbúa stenst heldur ekki skoðun því við höfum sjaldan gengið jafn langt í að leita samtals við íbúa eða í að aðlaga tillögur að athugasemdum þeirra.“

Þetta er allt að því móðgun. Samtal við íbúa hefur verið yfirborðskennt og fráleitt að halda því fram að tillögurnar hafi verið lagaðar að athugasemdum íbúa. Vilji íbúa okkar í Grafarvogi er mjög skýr: Við höfnum þessum áformum í einu og öllu – og höfum komið því áleiðis á mjög fjölmennum íbúafundum og sent á annað þúsund kröftug mótmæli inn í Skipulagsgáttina á undanförnum vikum.

7. DÓRA: „Við höfum sannarlega hlustað vel á íbúa og breytt miklu og þó er samráðsferlinu hvergi lokið. Við erum ekki einu sinni farin af stað með lögformlegt samráð og sá ferill er allur eftir en þó hafa áformin þegar tekið gríðarmiklum breytingum nú þegar.“

Þessi fullyrðing er nánast óskiljanleg; „hlustað vel á íbúa og breytt miklu“ . Dóra Björt og meirihlutinn í borgarstjórn eru þegar byrjuð að úthluta íbúðum með fyrirvara á þéttingarreitum. Lágmarks kurteisi hefði verið að bíða með þær úthlutanir þar til breytt aðalskipulag væri auglýst og staðfest í stað þess að ögra íbúum með því að stíga þetta skref í úthlutunum í miðju ferli. Sannast sagna ekki mjög sannfærandi. En Dóra á inni sterkan leik; að hætta við þéttinguna í hinu „lögformlega samráði“ fyrst sá ferill er allur eftir að hennar sögn.

8. DÓRA: „Það er hægt að byggja vel og illa hvort sem þú ert að þétta eða dreifa byggð svo gæðin snúast ekki um skipulagsstefnuna heldur vinnubrögðin.“

Athyglisvert! Hér er sagt að gæðin snúist ekki um skipulagsstefnuna heldur einhver vinnubrögð. Góðir leiðtogar marka stefnuna og varða leiðina sem unnið er eftir. Auðvitað snýst málið því um stefnuna; skipulagsstefnuna – nýtt deili- og aðalskipulag – þar sem verið er að þétta byggðina. Það eru líka tákn um gæði í vinnubrögðum að borgarfulltrúar, sem eru í vinnu fyrir íbúana, vinni fyrir þá en ekki gegn þeim.

9. DÓRA: „Á íbúafundi í Grafarvogi heyrði ég í samtölum mínum að flestum þótti eðlilegt að byggja meira innan Grafarvogs og þótti margar af þessum tillögum prýðilegar þó eitt og annað mætti athuga og fólu þau samtöl í sér allt önnur skilaboð en yfirlýsingagleði einstaka sjálfskipaðra fulltrúa Grafarvogs sem heyrst hefur á opinberum vettvangi um að allt sé þetta hrikalegt.“

Merkilegt – mjög svo. Dóra kýs að skilja skilaboðin frá fjölmennum íbúafundum (en hún hefur ekki mætt á síðustu tvo þeirra, svo ég viti til) á þá leið að íbúum þyki „eðlilegt að byggja meira innan Grafarvogs“ . Þetta heitir að lesa salinn vitlaust. Svo ræðir hún um „sjálfskipaða fulltrúa Grafarvogs“ og geta sjálfsagt hundruð Grafarvogsbúa tekið þá hæðnisglósu til sín. En hvað varð allt í einu um fallega íbúalýðræðið og að raddir íbúa ættu að heyrast?

10. DÓRA: „Í þessu ljósi er erfitt að skilja skynsemina í því að setja verkefnin í Grafarvogi öll undir sama hatt og gefa í skyn að þau séu öll vond hugmynd eins og þessar sömu gagnrýnisraddir hafa gert. Slíkt er í fullri einlægni erfitt að taka alvarlega fyrir þau okkar sem erum sannarlega að hlusta en ber samt að fjölga íbúðum um alla borg meðal annars vegna þeirrar húsnæðiskrísu sem stendur yfir.“

Ofsögum sagt. Það er ofsögum sagt að Dóra og félagar séu „sannarlega að hlusta“ á sjónarmið íbúa í Grafarvogi. Þess utan „ber“ borginni engin skylda til að rústa aðalskipulaginu og fjölga íbúðum í grónum hverfum um alla borg. Nær væri fyrir Dóru að nema ný lönd annars staðar en á litlum þéttingarreitum við fjölfarnar götur í Grafarvogi standi hugur hennar til að leysa úr lóðaskorti og húsnæðiskrísu.

11. DÓRA: „Til þess að mæta húsnæðiskrísunni verðum við öll að leggja hönd á plóg og það getur varla talist eðlileg krafa að Grafarvogur standi utan þeirrar ábyrgðar.“

Mikið sagt! Grafarvogsbúar leggja svo sannarlega sín lóð á vogarskálarnar með fyrirsjáanlegri stóraukinni umferð um hverfið en gífurleg fjölgun íbúða (allt að 20 þúsund manna byggð) er fyrirhuguð í nærumhverfi Grafarvogs sem verður til þess að umferð um Grafarvog mun stóraukast. Spyrja má á móti hvort það felist í því mikil „ábyrgð“ af hálfu Dóru að hunsa þessa framtíðarsýn og leyfa sér að byggja á litlum blettum alveg upp að öflugum umferðaræðum og þrengja þannig að umferðinni í stað þess að gefa henni aukið rými – og eiga inni fyrir fyrirsjáanlegum umbótum á vegakerfinu í Grafarvogi vegna aukinnar umferðar. Dóra er hins vegar á móti bílum og bílaumferð! Og þetta með plóginn; við leggjum ekki hönd á þann stóra plóg sem hún ætlar að nota í stórfelldan uppgröft í grónum hverfum Grafarvogs á næstu árum.

12. DÓRA: „Á sama tíma bætir það hverfin og eflir að byggja innan þeirra, glæðir almannarýmin enn meira lífi, færir fleirum aðgengi að nærþjónustu og verslun í nærumhverfi og einstaklingar og fjölskyldur sem vantar heimili sem hentar fá tækifæri til að búa innan dásamlegra og fjölskylduvænna hverfa.“

Fallegt ef satt væri! Það bætir hins vegar ekki gróin hverfi að grafa þau upp með miklu jarðraski og gröfum með tilheyrandi þungaflutningum - og troða þar niður einbýlishúsum, raðhúsum, parhúsum og fjölbýlishúsum á örlitlum þéttingarreitum nánast ofan í þegar sprungið vegakerfið – og það í óþökk flestra íbúa. Og hvað þá að það sé „dásamlegt og fjölskylduvænt“ að ganga á græn svæði; hjóla- og göngustíga; byrgja útsýni ökumanna; byrgja útsýni núverandi íbúa á mörgum stöðum og síðast en ekki síst að koma í bakið á íbúum sem hafa keypt og byggt íbúðir í trausti þess að deiliskipulagið stæðist. En ég árétta að Dóra og meirihlutinn í borgarstjórn eiga inn sterkan leik; að hætta við þéttinguna í hinu „lögformlega samráði“ fyrst sá ferill er allur eftir að hennar sögn.

Jón G. Hauksson, útgefandi og ritstjóri Grafarvogs.net

Veðurskellur, grámugga yfir Esjunni - 22 metrar á sekúndu í mestu hviðunum

Tue, 03 Jun 2025 15:18:05 GMT

VEÐURSKELLUR! Það hefur heldur betur verið skellur í veðrinu undanfarinn sólarhring og fyrsta vikan í júní byrjar ekki vel eftir ágætis tíð undanfarnar vikur.

Það var enda mikil grámugga yfir Esjunni í hádeginu og hráslagalegt í meira lagi. Ágætt þó miðað við snjókomu og slyddu fyrir norðan.

Samkvæmt Veðurstofunni fóru vindhviður í Reykjavík í hádeginu upp í 22 metra á sekúndu sem þýðir að það tók vel í. Sem betur fer er þetta skellur því það á að lægja þegar líður á vikuna.

Víða mátti sjá fallið lauf af trjám í görðum í Grafarvogi í hádeginu.

Margir minnast kuldahvells á sama tíma í fyrra - í fyrstu vikunni í júní. - JGH

Hráslagalegt víða í görðum eftir að laufblöð höfðu fokið af trjám í veðurhvellinum.

Veðurspáin fyrir suðvesturhornið. Það gustar heldur betur um landsmenn. Vindhviður í Reykjavík fóru í 22 metra á sekúndu í hádeginu.

Stórfín sýning í bókasafninu - Korpúlfum margt til lista lagt!

Mon, 02 Jun 2025 19:26:43 GMT

SÝNING KORPÚLFA! Það er vel til fundið að líta inn á Bókasafnið í Spönginni og skoða sýningu Korpúlfa í myndlistarsal safnsins. Myndirnar og listaverkin eru afrakstur vetrarins og verkin eru til sölu. Opnunarmyndin hér að ofan er eftir Guðnýju Björgu Þorvaldsdóttur.

Hópurinn sem sýnir hefur hist vikulega í Borgum og málað undir handleiðslu Péturs Halldórssonar. Þetta eru ólíkar myndir og gaman að sjá fjölbreytnina.

En sjón er sögu ríkari. Sýningunni lýkur í vikulok, eftir hádegi nk. föstudaginn, 6. júní. Um að gera að setja sig í listagyðjugírinn, skoða sýninguna og fá sér góðan kaffibolla á safninu í leiðinni. - JGH

Þessum verður brátt ýtt úr vör. (Mynd eftir Bergstein Pálsson).

Brimið sverfur. (Mynd eftir Guðrúnu Björgu Ingibjartsdóttur).

Undir fossins nið. (Mynd eftir Jónu Berg Andrésdóttur).

Fallegar vatnslitamyndir og sú neðri til vinstri á forsíðu kynningarspjalds sýningarinnar. (Myndir eftir Sigurjón Gunnarsson).

Stolt sigla fleyin mín. (Myndir eftir Steinar Gunnarsson).

Tískulínur. (Myndir eftir Lucindu Árnadóttur).

Bikarar bíða sinna blóma. (Mynd eftir Gylfa Theódórsson).

Jökultoppar. (Mynd eftir Ingibjörgu Andrésdóttur).

Auðvitað er þetta til háborinnar skammar! Ekkert annað!

Sun, 01 Jun 2025 21:54:07 GMT

SMÁNARBLETTIR. Auðvitað er þessi vanhirða borgarinnar til háborinnar skammar og ekkert annað. Í þessari viku verða liðnar þrjár vikur frá því Grafarvogur.net varpaði fram þeirri spurningu hvort ekki væri kominn til að slá gras, fífla og njóla við gangstéttir og vegkanta hér í Grafarvogi.

Tæpri viku síðar, 19. maí, var þeirri skoðun slegið fram að þessir óslegnu og vanhirtu grasbalar settu svartan blett á borgina - og nefndi ég þá smánarbletti borgarinnar. Grastopparnir voru þá víða komnir í hálfan metra við vegkanta.

Ýmsir brugðust þá að vísu við með því að telja þessa órækt hið besta mál - og aðrir létu að því liggja að gagnrýnin snerist um flokkspólitík. Aðhald og krafa um snyrtimennsku kemur flokkspólitík auðvita ekkert við.

Grafarvogur.net skorar á borgaryfirvöld að setja meiri metnað í snyrtimennsku - og að sláttur og almenn umhirða í úthverfum borgarinnar verði framar í forgangsröðinni. Vilji er allt sem þarf! - JGH

Við Gullinbrú - fjölförnustu götu Grafarvogs.

Í Hamrahverfinu. Hljóð sláttuvéla glymur í görðum en það er ekkert að frétta hjá borginni.

Ólíkt hafast bæjarfélögin að. Löngu byrjað að slá í Kópavogi og snyrtimennskan í fyrirrúmi.

Hlýjasti maí og hlýjasta vor frá upphafi mælinga - rétt upp fyrir vorið 1974

Sun, 01 Jun 2025 16:46:21 GMT

HLÝJASTA VORIÐ. Á Veðurstofunni nær vorið til tveggja mánaða, apríl og maí. Trausti Jónsson veðurfræðingur reiknaði meðalhita í byggðum landsins og bar saman við fyrri ár í nýrri færslu á bloggi sínu . Í ljós kemur að vorið 2025 er það hlýjasta frá upphafi mælinga og sjónarmun (og reikningslega ómarktækt) hlýrra heldur en vorið 1974.

Traustu segur að það sem af er ári hafi verið óvenjuhlýtt (nema janúar).

„ Í Reykjavík er þetta næsthlýjasta ársbyrjun síðustu 75 ára og sú þriðja hlýjasta á Akureyri og á Dalatanga. Nánari upplýsingar um þá stöðu - og niðurstöðu maímánaðar koma frá Veðurstofunni fljótlega eftir helgina, en svo virðist sem maí sé nokkuð öruggur með að taka efsta sætið um allt land, sumstaðar meira að segja með miklum mun - en meir um það síðar.

Þá verður einnig ljóst hvernig vorhitinn raðast í hinum ýmsu landshlutum, ekki er víst að það nái alls staðar toppsætinu af 1974,“ segir Trausti.

Einar Sveinbjörnsson veðurfræðingur segir á FB-síðu sinni að maí sé sá heitasti frá upphafi mælinga. „Á Akureyri (Þórunnarstræti) endaði meðalhti mánaðarins í 10,1°C. Það er langhæsti meðalhiti í maí sem nokkru sinni hefur mælst á veðurstöð hérlendis. Sú tala sem kemur næst er 9,5 eða 9,6.

Í Stykkishólmi liggja fyrir mælingar enn lengur eða frá 1830. Maí-hitinn þar reiknast 8,7°C og fyrra met er frá 1935 (8,2°C). Fyrsta árið (1830) var reyndar ívið hlýrra, en óráðlegt er að treysta því gildi,“ segir Einar. - JGH

KORTIÐ. Nýjasta talan, 2025 sker sig nokkuð úr, ásamt hinni óvenjulegu tölu vorsins 1974. Ekki liðu þá nema fimm ár þar til eitt kaldasta ár 20.aldar reið yfir, hið eftirminnilega 1979. Þá voru liðin 30 ár frá ámóta vori, 1949. Ekki hafa viðlíka köld vor komið síðan.

Viktor Orri og Arndís Ýr sigruðu í 10 km Fjölnishlaupi Olís 2025

Sun, 01 Jun 2025 15:11:56 GMT

FJÖLNISHLAUP OLÍS 2025. Viktor Orri Pétursson og Arndís Ýr Hafþórsdóttir sigruðu í 10 km hlaupi Fjölnishlaups Olís 2025 sem haldið var með pompi og prakt sl. fimmtudag, uppstigningardag. Hlaupið tókst í alla staði mjög vel og var keppt í skemmtiskokki (1,4 km), 5 km og 10 km hlaupi. Þátttaka var góð en alls tóku 365 hlauparar þátt að þessu sinni.

Á meðfylgjandi mynd eru hlaupaleiðirnar sýndar. Fallegar hlaupaleiðir.

Hér má sjá úrslit í 10 km hlaupi karla en þar tóku 45 þátt. Sigurvegari: Viktor Orri Pétursson.

Hér má sjá úrslit í 10 km hlaupi kvenna en þar tóku 40 þátt. Sigurvegari: Arndís Ýr Hafþórsdóttir.

Hér má sjá úrslit í 5 km hlaupi karla en þar tók 51 þátt. Sigurvegari: Jökull Bjarkason.

Hér má sjá úrslit í 5 km hluapi kvenna en þar tóku 46 þátt. Sigurvegari: Iðunn Björg Arnaldsdóttir.

Hér má sjá úrslit í skemmtiskokki karla en þar tók 81 þátt. Sigurvegari: Sveinn Elías Elíasson.

Hér má sjá úrslit í skemmtiskokki kvenna en þar tóku 102 þátt: Sigurvegari: Ósk Norðfjörð Sveinsdóttir.

Þetta var í 37. skipti sem Fjölnishlaup Olís er haldið. - JGH

Hvers vegna hætt var við söluna á Olíudreifingu? Svar Finns vekur athygli

Sun, 01 Jun 2025 13:52:09 GMT

HLUTHAFASPJALLIÐ. VIÐSKIPTI. Það kom mörgum á óvart á dögunum þegar eigendur Olíudreifingar, Festi (60%) og Hagar (40%), hættu við söluna þrátt fyrir nokkur tilboð og áhuga kaupenda.

Finnur Oddsson, forstjóri Haga, segir í Hluthafaspjallinu okkar Sigurðar Más Jónssonar á Brotkast.is, að tilboðin hafi ekki verið nægilega hagstæð en fleira hafi komið til - og það svar vakti athygli okkar félaganna - að orkuskiptin geti krafist meira geymslurýmis fyrir fljótandi eldsneyti því orkuskipti þýði ekki að markaðurinn fari allur yfir í rafmagn.

„Grunnhugmyndin að söluferlinu á Olíudreifingu var einfaldlega sú hvort aðrir væru betur til þess fallnir að stýra fyrirtækinu inn í framtíðina því það eru ákveðnar takmarkanir vegna hins sameiginlega eignarhalds okkar keppinautanna,“ segir Finnur.

Hann bætir því við að í söluferlinu hafi eigendurnir sömuleiðis séð meiri verðmæti í fyrirtækinu og sterkari markaðsstöðu í framtíðinni og þótt fjöldi rafbíla muni aukast í orkuskiptunum þá verði kolefniseldsneyti áfram með nokkuð sterka stöðu á næstu árum, samkvæmt spám.

Og þess utan bendi spár til þess að aðrir fljótandi eldsneytiskostir verði sterkari en gert hafi verið ráð fyrir - og það eldsneyti þurfi meira geymslurými en bensín og dísil og að þar liggi veruleg tækifæri fyrir Olíudreifingu. - JGH

Bónus með 90 milljarða af 170 milljarða veltu Haga - stærsta matvöruverslunin

Sun, 01 Jun 2025 13:08:01 GMT

HLUTHAFASPJALLIÐ. VIÐSKIPTI. Bónus er stærsta matvöruverslun landsins og veltir um 90 milljörðum króna af 170 milljarða veltu Haga. Þetta kemur fram hjá Finni Oddssyni, forstjóra Haga, en hann er nýjasti gestur okkar Sigurðar Más Jónssonar í hlaðvarpi okkar, Hluthafaspjallinu á Brotkast.is. Bónus er stærsta matvöruverslun landsins og með nokkurt forskot í veltu á næstu keppinauta, að sögn Finns.

Verslanir og vöruhús Haga eru með veltu í kringum 120 milljarða og restin, um 50 milljarðar króna, er að mestu velta Olís, að sögn Finns.

Hann segir ennfremur að Bónus sé eitt verðmætasta vörumerki landsins og sé með djúpar rætur meðal þjóðarinnar eftir 36 ár á markaðnum. „Þegar Bónus kom til sögunnar hafði búðin mikil áhrif á íslenskt samfélag og lækkaði matvöruverð verulega.“

MATVÖRUKARFAN ÚR 24% Í 14%

Og bætir við: „Áður en Bónus kom til sögunnar voru heimili landsins að verja um 24% af tekjum í matvörukörfuna en á fáum árum eftir tilkomu fyrirtækisins breyttist þetta og hlutfallið lækkaði niður í um 14% og það munar um minna. Enn þann dag í dag eru heimilin að verja þessu hluthfalli í matvörukörfna,“ segir Finnur.

Að sögn Finns var vörumerki Bónus uppfært fyrir nokkrum árum og við því urðu verulega viðbrögð. „Við breyttum vörumerkinu aðeins, breyttum grísnum og búðunum hjá okkur til samræmis - og það var svo gaman að sjá hvernig viðbrögðinvoru, hvað það voru miklar skoðanir á þessu. Það var alls ekki öllum sama og þannig viljum við hafa það.“ - JGH

Stórglæsilegt blað Húsasmiðjunnar um sérlausnir - hér er hægt að fletta því

Fri, 30 May 2025 22:18:55 GMT

GLÆSILEGT BLAÐ! Húsasmiðjan í Grafarholti er góður granni okkar sem búum í Grafarvogi, Grafarholti, Úlfarsárdal og Mosfellsbæ. Hér er hægt að skoða og fletta nýju og stórglæsilegu blaði fyrirtækisins um sérlausnir.

Um miðjan maí sl. var haldið upp á 20 ára afmæli Húsasmiðjunnar í Grafarholti og tókum við af því tilefni stutt viðtal við Sigurð Svavarsson verslunarstjóra en hann hefur unnið hjá fyrirtækinu í fjörutíu ár. Vel gert! - JGH

Fjölnishlaup Olís verður á morgun kl. 11. Ræst frá íþróttamiðstöðinni við Dalhús

Wed, 28 May 2025 09:56:16 GMT

FJÖLNISHLAUP OLÍS! Það verður fjör og tekið á því þegar Fjölnishlaup OLÍS verður ræst í 37. sinn á morgun, uppstigningardag, klukkan 11:00, frá íþróttamiðstöðinni í Grafarvogi við Dalhús.

Heldur betur komin hefð á þetta hlaup - samfellt frá árinu 1988. Vel gert. - JGH

Hörkuleikur í Úlfarsárdalnum á morgun, Fram-KA. Nýkrýndir Íslandsmeistarar hylltir

Wed, 28 May 2025 09:42:11 GMT

FRAM-KA. Það verður hörkuleikur í Úlfarsárdalnumn á morgun, uppstigningardag, kl. 16:15 þegar Framarar fá KA-menn í heimsókn í Bestu deildinni. Framarar eru um miðja deild en þeir unnu hið skemmtilega lið KR um síðustu helgi.

Íslands- og bikarmeistarar karla í handbolta mæta á leikinn og verða hylltir og heiðraðir fyrir leik Framara á móti KA-mönnum. - JGH

Þeir verða heiðraðir og hylltir á morgun. Bikar og Íslandsmeistarar í handbolta.

Fjölnismenn taka á móti ÍR-ingum á föstudag - allir á völlinn, áfram Fjölnir

Wed, 28 May 2025 09:27:53 GMT

ALLIR Á VÖLLINN. Það verður hörkuleikur á Fjölnisvellinum við Dalhús nk. föstudag kl. 18:30 þegar Fjölnismenn taka á móti ÍR-ingum í Lengjudeildinni.

Við hvetjum Grafarvogsbúa til að mæta og styðja okkar menn. Ekki veitir af að hvetja liðið áfram en það hefur farið fremur rólega af stað í deildinni. ÍR-ingar eru með hörkugott lið og í þriðja sæti deildarinnar. - JGH

Alma Möller með hugvekju í Grafarvogskirkju á morgun kl. 11

Wed, 28 May 2025 09:12:10 GMT

HUGVEKJA HEILBRIGÐISRÁÐHERRA. Alma Möller heilbrigðisráðherra flytur hugvekju í Grafarvogskirkju á morgun, uppstigningardag, kl. 11.

Löng hefð er fyrir því í Grafarvogskirkju að gera svolítið úr þessum degi og svo verður einnig að þessu sinni og verður veglegt hátíðarkaffi að messu lokinni.

Eldri borgarar er sérstaklega boðnir velkomnir í messuna á morgun.

Vígðir þjónar kirkjunnar þjóna fyrir altari, Katrín Eir Óðinsdóttir annast einsöng og hinn kröftugi Karlakór Grafarvogskirkju syngur.

Uppstigningardagur er einn af helgidögum þjóðkirkjunnar og er jafnframt einn af 15 lögbundnum frídögum almanaksársins.

Uppstigningardagur er fimmtudagurinn fjörtíu dögum eftir páska og ber því upp á tímabilinu 30. apríl til 4. júní.

Á uppstigningardag er himnafarar Jesú Krists minnst.

Samkvæmt ritningum Nýja testamentisins reis Jesús upp frá dauðum þremur dögum eftir krossfestinguna. Í fyrsta kafla Postulasögunnar segir frá því að Jesús hafi fjörtíu dögum eftir upprisuna verið uppnuminn til himins fyrir augliti lærisveina sinna. - JGH

Óvæntur stuðningur! Borgin auglýsir grænt svæði sem betra umhverfi og betri borg

Tue, 27 May 2025 09:00:44 GMT

BORGIN AUGLÝSIR RÖK GRAFARVOGSBÚA! Þessi auglýsing Reykjavíkurborgar blasir núna við Grafarvogsbúum á auglýsingaskilti gegnt Olís-stöðinni. Hún vekur svo sannarlega athygli því í henni notar borgin rök Grafarvogsbúa gegn þéttingu. Þarna auglýsir borgin grænt svæði sem betra umhverfi og betri borg; og vísar í Heiðmörk.

Meirihlutinn í borgarstjórn áformar stórfellda þéttingu byggðar í Grafarvogi og fer í þeim efnum gegn eindregnum vilja íbúa í Grafarvogi sem hafa vísað til mikilvægi grænna svæða sem umhverfis sem sé til bóta og geri borgina betri.

Hvað er í gangi? Óvæntur stuðningur? Vonandi.

Meirihlutinn í borgarstjórn hefur til þessa lítið viljað með mótmæli Grafarvogsbúa hafa en gengst svo við rökum þeirra í þessari auglýsingu - og það þótt vísað sé til Heiðmerkur en að því svæði standa þrjú bæjarfélög; Reykjavík, Kópavogur og Garðabær.

Heiðmörkin er ágæt en borgin ætti auðvitað að einblína meira á nærsamfélagið í auglýsingunni og birta mynd af iðandi borgarlífi í Grafarvogi á grænum svæðum með trjágróði og hjóla- og göngstígum - einmitt það sem verður fyrir barðinu á fyrirhugaðri þéttingu.

Á bak við auglýsingaskiltið er svæði sem borgin á að slá og hirða. Sláttur og snyrtimennska væri betra umhverfi - betri borg!

Hún stingur í stúf þessi auglýsing frá borginni; altént miðað við það sem á undan er gengið í Grafarvogi.

Fréttin hefur verið uppfærð. - JGH

Ólíkt hafast bæjarfélögin að - ennþá er ekkert að frétta af slætti í Grafarvogi

Mon, 26 May 2025 17:21:18 GMT

ILLGRESI OG ENGINN SLÁTTUR! Ólíkt hafast þau að bæjarfélögin Kópavogur og Reykjavík. Það er sláandi í orðsins fyllstu að aka Stekkjarbakkann í vestur að hringtorginu á mörkum Kópavogs og Reykjavíkur.

Til vinstri við verslunina Tengi er merki Kópavogsbæjar og þar er bærinn búinn að slá fyrir nokkru en svo er ekki Reykjavíkurmegin.

Grafarvogur.net hefur verið með harða gagnrýni á borgaryfirvöld fyrir algjöran slugshátt í umhirðu í Grafarvogi og hvers vegna í ósköpunum borgin slái ekki grasið við gangstéttir og vegkanta í hverfinu. En það er ekkert að frétta!

Óræktin er oðin æpandi!

Örfáir Grafarvogsbúar hafa sent mér línur um að fegurðin felist í óræktinni. Sú fagurfræði er nú ekki almenn, að mínu mati. - JGH

Við hringtorgið við Smiðjuveginn í Kópavogi á mörkum Kópavogs og Reykjavíkur. Slegið Kópavogsmegin en ekkert að frétta borgarmegin.

Á svæði sem borgin á að slá og hirða í Hamrahverfinu í Grafarvogi - rétt við eina gangstéttina. Óræktin er æpandi.

Hér er slegið - slöku við.

Gerðist Vegagerðin brotleg við lög í Hallsteinsgarði?

Mon, 26 May 2025 16:17:50 GMT

NÁTTÚRUSPJÖLL. Grafarvogsbúar hafa tekið eftir miklum skemmdum í miðjum Hallsteinsgarði af völdum beltavélar sem þar hefur farið um og skilið eftir sig svöðusár.

Grafarvogur.net fékk senda mynd af beltavélinni - sem er eins konar beltabor - og á miðri vélinni blasir við merki Vegagerðarinnar.

Nú er spurningin hvort Vegagerðin hafi brotið lög frá árinu 1998 um akstur utan vega. Vissulega kaldhæðnislegt þótt sjálfsagt komist Vegagerðin - eða verktakar á hennar vegum - ekki hjá því, eðli málsins samkvæmt, að aka utan vegar við vegagerð.

En hvers konar umgengni og virðing er það við Hallsteinsgarð að æða þar inn með beltavél og valda þar náttúrúspjöllum? Hvaða erindi átti Vegagerðin þarna?

Það skiptir í sjálfu sér engu máli; það er lágmarkskrafa að laga til eftir sig - ekki síst í ljósi þess að stofnunin kann að hafa brotið lög um akstur utan vega.

Ég skellti mér í Hallsteinsgarð fyrr í dag og tók meðfylgjandi myndir. - JGH

Merki Vegagerðarinnar er á þessari beltavél sem ætt var með inn í Hallsteinsgarð svo eftir stóðu svöðusár.

Þarna hefur vélinni verið ekið þvers og kruss um listaverkagarðinn.

Braut Vegagerðin lög frá árinu 1998 með því að fara með stórvirka beltavél inn í listaverkagarð í Grafarvogi?

Margt fallegra listaverka er í Hallsteinsgarði - verk sem vekja mikla athygli vegfarenda.

Sextán myndverk eru eftir Hallstein (1945 - 2024) í garðinum.

Verður Landsbankinn skráður í Kauphöllina?

Mon, 26 May 2025 10:39:25 GMT

VIÐSKIPTI. HLUTHAFASPJALLIÐ. Um nokkurt skeið hafa verið umræður á hlutabréfamarkaðnum hvort ríkið ætti ekki að skrá Landsbankann á markað, þ.e. í Kauphöllina, til að fá verðmiða á bankann - og jafnvel fara norsku leiðina sem væri þá að ríkið seldi hluta af bankanum en væri þar áfram kjölfestufjárfestir.

Þessi umræða hefur ef eitthvað er magnast eftir sölu ríkisins á Íslandsbanka sem seldi bankann í þremur áföngum.

Í nýjasta hlaðvarpsþætti okkar Sigurðar Más Jónssonar, HLUTHAFASPJALLINU, spyrjum við gest okkar Magnús Harðarson, forstjóra Kauphallarinnar um þetta mál. Sjá hér.

Hann telur að það myndi gera rekstri Landsbankans gott að fá breiðara eignarhald og fleiri að stjórnarborðinu þegar kemur að stjórn bankans.

Hann segir að þegar ríkið eigi svo stóra eign á samkeppnismarkaði fari betur á því að hún sé skráð á markaði og rökin fyrir því að gera það ekki hafi veikst í seinni tíð, að hans mati. - JGH

Fjölniskonur unnu Álftnesinga 3-1 í Grafarvogi í kvöld

Fri, 23 May 2025 22:49:47 GMT

FJÖLNIR SIGRAÐI. Fjölniskonur unnu sannfærandi sigur á Álftnesingum á Fjölnisvellinum í Grafarvogi í kvöld með þremur mörkum gegn einu: 3-1. Staðan í hálfleik var 2-0.

Þær Eva Karen Sigurdórsdóttir, María Eir Magnúsdóttir og Ester Lilja Harðardóttir skoruðu mörk Fjölnis. En Klara Kristín Kjartansdóttir svaraði fyrir gestina.

Á opnunarmyndinni eru Fjölniskonur í hörkusókn en þær voru eins og markatölurnar segja til um mun betri í leiknum. - JGH

Um 3.300 Svíar gerðust hluthafar í Alvotech í útboðinu í Stokkhólmi

Fri, 23 May 2025 15:58:50 GMT

VIÐSKIPTI. HLUTHAFASPJALLIÐ. Um 3.300 Svíar gerðust nýir hluthafar í líftæknifyrirtækinu Alvotech í útboði félagsins tengdu skráningu þess á Nasdaq-markaðinn í Stokkhólmi fyrr í vikunni.

Þetta kemur fram í skemmtilegu spjalli okkar Sigurðar Más Jónssonar við Magnús Harðarson, forstjóra Nasdaq Iceland , í nýjasta þætti hlaðvarps okkar, HLUTHAFASPJALLINU á Brotkast.is. Sjá hér.

Það var að venju mikið um dýrðir í Kauphöllinni í Stokkhólmi - blöðrur og fljúgandi bréfsefni - þegar slegið var í bjölluna og fyrstu viðskipti með bréfin í Alvotech áttu sér stað. (Meðfylgjandi myndir eru birtar með leyfi Nasdaq).

Alvotech er nú skráð á þremur stöðum; Íslandi, Bandaríkjunum og Svíþjóð. -JGH

Róbert Wessman, forstjóri Alvotech, og Magnús Harðarson, forstjóri Nasdaq Iceland, við hina hátíðlegu athöfn þegar fyrstu viðskipti með bréf í Alvotech áttu sér stað í Nasdaq-kauphöllinni í Svíþjóð.

New York. Skráningu Alvotech á Nasdaq-markaðinn í Svíþjóð var fagnað í höfuðstöðvum Nasdaq í New York.

Magnús Harðarson, forstjóri Nasdaq Iceland, í nýjasta þætti Hluthafaspjallsins hjá okkur Sigurði Má Jónssyni.

Yfir 47 þúsund Íslendingar eiga hlutabréf í Kauphöllinni - um 12% þjóðarinnar

Fri, 23 May 2025 15:04:56 GMT

VIÐSKIPTI. HLUTHAFASPJALLIÐ. Einn af fylgifiskum útboðs ríkisins á hlutnum í Íslandsbanka er að einstaklingum sem eiga hlutabréf í skráðum fyrirtækjum í Kauphöllinni, Nasdaq Iceland, fjölgaði um yfir 60% og eru núna orðnir 47.300 talsins en voru um 29 þúsund fyrir útboðið. 12% þjóðarinnar eiga hlutabréf en í Svíþjóð er þetta hlutfall 25%.

Þetta kemur fram í nýjasta hlaðvarpsþætti okkar Sigurðar Más Jónssonar, Hluthafaspjallinu á Brotkast.is þar sem gestur okkar er Magnús Harðarson , forstjóri Nasdaq Iceland. Sjá hér.

Ljóst er að margir einstaklingar tóku þátt í hlutabréfaviðskiptum í fyrsta sinn við útboð Íslandsbanka en alls tóku 31 þúsund manns þátt í útboðinu og fjölgaði hlutabréfaeigendum úr röðum einstaklinga um 18 þúsund í útboðinu.

Við Íslendingar eigum þó langt í land með því að ná Svíum þar sem um fjórðungur landsmanna eiga hlutabréf.

Fyrir útboð Íslandsbanka var þetta hlutfall hér á landi um 8% en fer upp í að verða 12%, að sögn Magnúsar.

Af þessu má ráða að sala Íslandsbanka hefur haft mikil áhrif á þróun mála í Kauphöll Íslands. - JGH

Einstaklingum á hlutabréfamarkaðnum fjölgaði um 18 þúsund í útboði Íslandsbanka og fóru í 47 þúsund talsins. Núna eiga 12% Íslendinga hlutabréf en í Svíþjóð er þetta hlutfall 25%.

Rafael Máni Þrastarson í Fjölni valinn í U-19 landsliðið

Fri, 23 May 2025 14:19:26 GMT

RAFAEL Í LANDSLIÐIÐ. GLÆSILEGT.

Þórhallur Siggeirsson, landsliðsþjálfari U-19 liðs karla í knattspyrnu, hefur valið Rafael Mána Þrastarson í leikmannahóp landsliðsins fyrir æfingaleik gegn Englandi í byrjun júní.

„Vel gert Rafael. Við erum stolt af þér,“ segir á FB-síðu Fjölnis.

Svo sannarlega hægt að taka undir þessi orð - gangi þér Rafael og öðrum leikmönnum Fjölnis allt í haginn í sumar. - JGH

Til hamingju nágrannar okkar í Úlfarsárdalnum - Framarar vinna tvöfalt

Fri, 23 May 2025 13:20:01 GMT

TIL HAMINGJU nágrannar okkar í Úlfarsárdalnum en Framarar urðu í gærkvöldi Íslandsmeistarar í handbolta eftir háspennuleik á móti Val á Hlíðarenda og sigruðu með eins marks mun; 28-27.

Framarar urðu bikarmeistarar í handbolta fyrr í vetur og vinna því tvöfalt að þessu sinni.

Framarar unnu úrslitaeinvígið við Valsmenn 3-0, þ.e. unnu alla leiki sína í einvíginu. Það er vel gert því Valsmenn eru mjög sterkt lið.

Meðfylgjandi myndir tók hinn flinki ljósmynari Morgunblaðsins, Eggert Jóhannesson , en blaðið er með umfangsmiklar fréttir af úrslitaleiknum.

Sjá hér , hér og hér . - JGH

Framarar unnu þriðja leikinn gegn Valsmönnum á heimavelli Vals á Hlíðarenda í gærkvöld og tryggðu sér þar með Íslandsmeistaratitilinn í handbolta. (Mynd mbl.is Eggert Jóhannesson).

Hrós dagsins fá Grafarvogsbúarnir Benedikt og Margrét Beta í Bílabúð Benna

Thu, 22 May 2025 10:58:42 GMT

Hrós dagsins að þessu sinni fá Grafarvosbúarnir og hjónin Benedikt Eyjólfsson og Margrét Beta Gunnarsdóttir í Bílabúð Benna fyrir mikla athafnasemi í fimmtíu ár en athyglisvert aukablað um fyrirtækið fylgir Mogga dagsins. Mikil afmælishátíð verður hjá fyrirtækinu um helgina.

Þau hjón eru frumbýlingar í Grafarvogi og hafa búið í Foldahverfinu í um fjörutíu ár.

Í aukablaðinu er sagan rakin á mjög skemmtilegan máta í máli og myndum í opnu. Til fyrirmyndar.

Þar segir að upphafið megi rekja til þess að árið 1975 hafi Benedikt Eyjólfsson byrjað að gera við mótorhjól í skúr á Vagnhöfða 23 undir heitinu Vagnhjólið. Fyrirtækið hafi fljótlega orðið brautryðjandi í jeppabreytingum og nafnið breyttist í Bílabúð Benna.

Óhætt er að segja að þau hjón Benedikt og Margrét Beta hafi verið samstíga í rekstrinum. Aðeins 17 ára gömul komu þau sér upp umræddum skúr við Vagnhöfðann - sem oft var kallaður „græni skúrinn“ - og auk þess að gera við mótórhjól sinnti Benni einnig viðgerðum á sláttuvélum.

Opnunarmyndin er af Benedikt í Porsche-bíl sem Bílabúð Benna er með umboð fyrir hér á landi. ( Myndina tók Jóhannes Reykdal í Bílabloggi.is). - JGH

Margrét Beta Gunnarsdóttir er með mikla bíladelllu eins og nærri má geta.

Sagan rakin á skemmtilega máta í aukablaði Moggans í dag.

Ölgerðin með helming allrar bjórsölu í vínbúðunum - Gull light vinsælastur

Wed, 21 May 2025 09:39:30 GMT

HLUTHAFASPJALLIÐ . ÖLGERÐIN er með yfir 50% hlutdeild af allri bjórsölu í ríkinu og með langvinsælasta bjórinn sem er Gull light en hann einn og sér er með 17% hlutdeild.

Þetta kemur fram í nýjasta hlaðvarpsþætti okkar Sigurðar Más Jónssonar á Brotkast.is, Hluthafaspjallinu, þar sem við ræðum við Andra Þór Guðmundsson, forstjóra Ölgerðarinnar. Hér má sjá brot af spjallinu við hann.

Þetta er afar góður árangur hjá Ölgerðinni því hún var með 22% hlutdeild í bjórsölu í vínbúðunum árið 2009 en er núna komin með helming allrar bjórsölu.

Andri Þór Guðmundsson, forstjóri Ölgerðarinnar, segir að grunnurinn að þessu sé góð vara fremur en sterk markaðssetning á bjórnum.

Hann segir að Gull light hafi fengið fljúgandi start á Covid-tímabilinu og hafi haldið forystunni eftir það. - JGH

Enn einn fallegi sólardagurinn - blankalogn og hlýindi

Wed, 21 May 2025 09:21:36 GMT

Veðrið hefur leikið við landsmenn undanfarnar tvæur vikur og það er um að gera að njóta því einhvern vökva mun gróðurinn víst fá á morgun, samkvæmt veðurspám. Dagurinn í dag er hins vegar í takt við tíðina að undanförnu, sólríkur og fallegur.

Þegar Grafarvogur.net var á ferðinni um hálfátta-leytið í morgun þá fór ekkert á milli mála; Olís-fánarnir bærðust ekki; enda blankalogn.

Gult fyrir sólina og rautt fyrir hitann í dag. „Blessuð sólin elskar allt, allt með kossi vekur,“ segir í ljóði Hannesar Hafsteins.. - JGH

Ekki á hverjum degi sem Ísland lítur svona út á korti Veðurstofunnar.

Smánarblettir borgarinnar - grastopparnir víða að nálgast 50 cm. við vegkantana

Mon, 19 May 2025 22:51:28 GMT

SMÁNARBLETTUR Á BORGINNI . Óslegnir grasbalar við gangstéttir og vegkanta í Grafarvogi eru orðnir að smánarblettum borgarinnar. Það sem meira er; grastopparnir við vegkanta eru víða að nálgast 50 cm – hálfan metra.

Grafarvogur.net hefur áður vakið athygli á að það virðist borginni algerlega ofvaxið að þjónusta Grafarvogsbúa með sóma og slá ofvaxna grasbala við gangstéttir og vegkanta.

Ég gerði mér það að leik í kvöld að mæla hæðina á stærstu stráunum og setti niður hálfs metra skóhorn til viðmiðunar. Það var toppað.

ÞAÐ VAR Í ÁGÚST AÐ ÁLIÐNUM SLÆTTI...

Með sama áframhaldi endar þetta á því að lagið um Kötu verður sungið um nýju borgarstýrurnar – þær voru að koma af engjunum heim; það var í ágúst að áliðnum slætti...

En svona án gríns; þetta hirðuleysi og getuleysi borgarinnar í slættinum er til háborinnar skammar og er því miður birtingarmynd þess að margt annað sé ekki í lagi við stjórn borgarinnar! - JGH

Þarna leyndist plastafata í grasinu við vegkantinn en hún mátti sín lítils blessunin.

...það var í ágúst að áliðnum slætti.

Collab á leið í 1.500 verslanir í Þýskalandi - er þegar í 590 verslunum í Danmörku

Mon, 19 May 2025 16:21:51 GMT

HLUTHAFASPJALLIÐ . COLLAB er orðið sterkasta drykkjarvörumerkið á Íslandi og komið upp fyrir Kristal, Pepsí og Coca Cola. Ölgerðin hyggst hasla sér völl erlendis á næstu árum með Collab-drykkinn og verja um 1 milljarða króna í markaðssetningu sem dreifist á þrjú ár. Drykkurinn fæst þegar í 590 verslunum í Danmörku og fer á næstu vikum í um 1.500 verslanir í Þýskalandi.

Ölgerðin notaði um 70 tonn af kollageni á síðasta ári sem unnið var upp úr 7 þúsund tonnum af fiskroði.

Þetta kemur fram í spjalli okkar Sigurðar Más Jónssonar við Andra Þór Guðmundsson, forstjóra Ölgerðarinnar , í nýjasta hlaðvarpsþætti okkar á Brotkast.is, Hluthafaspjallinu . Sjá klippuna hér.

Ölgerðin hefur flutt út vatn um árabil, Iceland Spring , og skilar sá útflutningur hagnaði.

TÆKIFÆRIÐ HRÓPAR Á OKKUR

En það er Collab-drykkurinn sem Ölgerðin veðjar núna á í Danmörku og Þýskalandi og telur Andri Þór að fyrirtækið sé í slíku sóknarfæri í Norður-Þýskalandi að það væri allt að því galið að láta ekki á það reyna. „Tækifærið hrópar á okkur,“ segir Andri.

Þá horfir fyrirtækið sömuleiðis til Austurríkis og þar hafa 1.900 verslanir samþykkt að taka Collab-drykkinn inn.

1 MILLJARÐUR Í MARKAÐSSETNINGU

Til mikils er að vinna og því hefur Ölgerðin ákveðið að verja 1 milljarða króna í markaðssetningu á drykknum. „Við settum 300 milljónir í þetta á síðasta ári og ætlum að fjárfesta fyrir annað eins á þessu ári, eða fyrir um 350 milljónir. Og svo aftur á næsta ári. Þannig að þetta dreifist á þrjú ár,“ segir Andri.

„Collab er verðmætasta vörumerkið á drykkjavörumarkaðnum á Íslandi og komið upp fyrir Kristal, Pepsí og Coca Cola,“ segir Andri Þór.

VINNA OKKAR AÐ BÚA TIL EFTIRSPURNINA

„En þetta er mikil áskorun og björninn er ekki unninn þótt við séum komnir í hillurnar úti - þá tekur í raun vinnan við að búa til eftirspurnina og ná sölunni í gang. Þannig að þessu fylgir auðvitað veruleg áhætta - en við trúum mjög á þetta. Við höfum gert ítarlegar markaðsrannsóknir og vitum að Þjóðverjum líkar bragðið af drykknum og okkar er að fá þá til að kaupa hann,“ segir Andri Þór Guðmundsson. - JGH

Skákbúðir Fjölnis á Snæfellsnesi - Helgi Ólafsson stórmeistari leiðbeindi

Mon, 19 May 2025 11:10:49 GMT

Skákdeild Fjölnis bauð upp á skákbúðir á Snæfellsnesi um helgina þar sem stórmeistarinn Helgi Ólafsson leiðbeindi krökkunum. Afar vel heppnað framtak en um 20 krakkar úr Fjölni tóku þátt og fóru í ferðina vestur.

Ekið var með rútu til Ólafsvíkur á laugardeginum þar sem krakkarnir tóku þátt í Minningarmóti Ottós og Gunnars. Um var að ræða glæsilegasta skákmót ársins þegar vinningar og veitingar eru annars vegar. Á þessu 100 manna móti stóðu krakkarnir sig mjög vel og unnu m.a. til þriggja eignabikara og 75.000 kr í verðlaunafé.

Ferðin hófst á laugardegi í Ólafsvík með þátttöku í Minningarmóti Ottós og Gunnars.

Eftir skákmótið, kökuhlaðborð og glæsilega pítsuveislu í Ólafsvík lá leiðin í Stykkishólm þar sem hópurinn fékk frábæra aðstöðu til gistingar og skákiðkunar í grunnskólanum. Fylgst var með Júróvision og veðurblíðunnar notið á leiksvæðinu við grunnskólann.

Á sunnudegi hófst dagskráin með skákennslu sem Helgi Ólafsson stórmeistari hafði með höndum. Þar nýttist tíminn vel og framlengja þurfti um 30 mínútur vegna áhuga krakkanna á skákþrautum. Þá tók við skákmót með 5 umferðum.

Í skákhléi var þátttakendum boðið upp á hamborgaramáltíð á veitingastaðnum Narfeyrarstofu.

Í lokin var frjáls tími í draumaveðri í fallegum bæ áður en lagt var af stað til baka suður til Reykjavíkur. Ógleymanleg ferð með skemmtilegum hópi skákkrakka. - JGH

Emilía Embla, sigurvegari í unglingaflokki í stigaflokki, með peningaverðlaunin.

Verðlaunahafar stúlkna í U16.

Verðlaunahafar strákar í U16.

Skákbúðirnar á Snæfellsnesi tókust í alla staði mjög vel.

Forstjóri Ölgerðarinnar og bankastjóri Íslandsbanka í Hluthafaspjallinu

Sat, 17 May 2025 10:15:18 GMT

HLUTHAFASPJALLIÐ. Þeir Andri Þór Guðmundsson, forstjóri Ölgerðarinnar, og Jón Guðni Ómarsson, bankastjóri Íslandsbanka, eru gestir Jóns G. og Sigurðar Más í nýjasta hlaðvarpsþætti þeirra á Brotkast.is, Hluthafaspjallinu.

Hér má sjá allar klippur þáttarins.

Íslandsbankaútboðið: https://www.youtube.com/watch?v=pk0vwyWcNM4

Ölgerðin veðjar á Collab í Þýsklandi: https://www.youtube.com/watch?v=2RAZFomQWgs

Vaxtartækifæri Ölgerðarinnar í viðbótar húsnæði: https://youtu.be/6CQmjJOuyR4

Bjórsala Ölgerðarinnar í vínbúðunum: https://youtu.be/CFyyvs5BhXU

Eftirmarkaðurinn í Íslandsbankaútboði: https://youtu.be/QhtuND6U32w

Húsasmiðjan í 20 ár í Grafarholti og Siggi Svavars hjá fyrirtækinu í 40 ár

Fri, 16 May 2025 19:45:09 GMT

HÁTÍÐ Í HÚSASMIÐJUNNI. Það er fjör á Fróni hjá Húsasmiðjunni í Grafarholti þessa helgina. Hátíðin hófst í morgun þegar um 150 iðnaðarmenn fögnuðu í versluninni en veislan verður enn fjörugri á morgun þegar allir geta litið við í hádeginu, frá 12 til 14, og fengið grillaðar pylsur og ís að vild í tilefni afmælisins.

Það sem meira er; verslunarstjórinn Sigurður Svavarsson hefur stýrt versluninni samfellt frá árinu 2012 eða í þrettán ár en þann 17. maí fyrir fjörutíu árum hóf hann störf hjá versluninni. Hann er núna sá starfsmaður Húsasmiðjunnar sem er með lengstan starfsaldur.

„Jón, ég veit þú trúir þessu ekki, 40 ár – og ég lít svona út,“ segir kappinn og að sjálfsögðu er hlegið dátt. Allir í hátíðaskapi. Lundin létt og Húsasmiðjan hefur greinilega farið vel með hann.

Auðvitað pylsur fyrir alla frá kl. 12 til 14 á morgun þar sem heimaliðið ætlar að grilla. „Húsa bestu,“ segir Sigurður verslunarstjóri.

Breytt Húsasmiðja og tuttugu ára afmælishátíð. En hvaða breytingar eru þetta?

„Um áramótin lokaði ég Blómavali í afskornum blómum en sumarblómin eru auðvitað áfram á sínum stað sem og moldin og annað sem til þarf. Og svo er ég er með tilbúna blómvendi í anddyrinu sem eru að gera sig.“

Sigurður segir að við þessa breytingu á Blómavali hafi orðið til meira rými fyrir aðrar deildir og svigrúm til uppfærslu á versluninni.

„Við ákváðum að lækka rekkana í búðinni og opna hana þannig betur og gera hana enn glæsilegri. Mesta breytingin er þó í málningunni og verkfærunum. Málningardeildin er núna mun stærri og flottari – sem og verkfæradeildin. Báðar hafa fengið mun meira vægi hjá okkur og líta ansi vel út.“

Málningardeildin hefur fengið meira vægi sem og verkfæradeildin.

Hann segir að þjónustan við Grafarvogsbúa og aðra nágranna sé mögnuð og vel heppnuð. „Við finnum velvildina hjá öllum hér í hverfinu á hverjum degi og það gefur okkur mikið og hvetur okkur áfram.“

Hátíðin verður í hámarki á morgun. Pylsupartýið frá kl. 12 til 14 þar sem grillað verður ofan í gesti.

Bæjarins bestu? „Já, Húsa bestu þar sem heimaliðið grillar fyrir gesti. Ég gríp kannski eitthvað í tangirnar en verð hér annars á þönum í hátíðarskapi,“ segir Sigurður glettinn á svip.

Öflug tímamót. Helgin notuð til að fagna og fánar dregnir að húni. Til hamingju! - JGH

Húsasmiðjan 20 ára í Grafarholti og alvöru afmælishátíð á morgun. Íspinnarnir þegar á sínum stað.

Tímamótum fagnað og fánar dregnir að húni - eins og alla aðra daga.

Rekkar lækkaðir og verslunin öll bjartari fyrir vikið.

Hér kemur sjóðheitt sjónvarpsviðtal sem ég tók við bankastjóra Íslandsbanka í hádeginu

Fri, 16 May 2025 18:02:34 GMT

HLUTHAFASPJALLIÐ. ALMENNINGUR tók heldur betur við sér í útboði ríkisins á 45,2% hlut þess í Íslandsbanka - og kláraði nánast úboðið fyrir um 90 milljarða króna þannig að það er sáralítið eftir, ef nokkuð, fyrir stóra fagfjárfesta eins og lífeyrissjóðina og erlenda fjárfesta.

Bankastjóri Íslandsbanka, Jón Guðni Ómarsson , hefur staðið í ströngu ásamt öðrum starfsmönnum bankans í tengslum við útboðið.

Hann var að vonum ánægður þegar ég náði honum í sjóðheitt sjónvarpsviðtal í hádeginu í dag, föstudag, í HLUTHAFASPJALLINU okkar Sigurðar Más á Brotkast.is, rétt áður en hann lagði af stað austur í Skaftafellssýslu en hann mun hefja göngu á Vatnajökul klukkan tvö í nótt. Sjá viðtalið hér .

Gífurleg samstaða og hópmálsókn íbúa í Grafarvogi gegn borginni kemur til álita

Thu, 15 May 2025 21:55:55 GMT

SAMSTAÐA GRAFARVOGSBÚA. Ekki vantaði samstöðuna á fjöldafundi Grafarvogsbúa í Rimaskóla núna síðdegis og fundurinn ályktaði samhljóma að senda harðorða yfirlýsingu til meirihlutans í borginni um að falla frá öllum áformum sínum um þéttingu í hverfinu og meginkrafan var einföld: „Látið Grafarvog í friði“.

Niðurstaða fundarins var að hópmálsókn íbúa í Grafarvogi gegn borginni kemur til álita og var reifuð - sem og að krefjast íbúakosningar um þéttingarstefnu borgarinnar í samstarfi við önnur hverfi - en minnst 20% íbúa með kosningarétt þarf til að knýja fram íbúakosningu.

Enginn borgarfulltrúi frá meirihlutanum var á staðnum og létu ekki svo lítið sem að sjá sig. Nokkrir borgarfulltrúar Sjálfstæðisflokksins voru mættir.

Þegar komið var að skólanum rétt fyrir fundinn streymdi fólk að og ekki fór á milli mála að eitthvað mikið lá í loftinu; jú, fundarmenn voru komnir til að sjá og sigra; mótmæla, allir sem einn.

Grafavogsbúar finna fyrir mótlætinu og upplifa mikla sýndarmennsku af hálfu meirihlutans og að hann valti yfir þá með áformum sínum um þéttingu byggðar í grónum og fullbyggðum Grafarvogi.

Salur Rimaskóla var smekkfullur og þurfti að opna fram á gang til að koma fólki fyrir á fundinum.

Sigrún Ásta Einarsdóttir, íbúi í Grafarvogi, setti fundinn sem haldinn var af Íbúasamtökum Grafarvogs og hópnum Okkar Grafarvogur.

Hún kynnti fyrstan til leiks Pál Jakob Líndal umhverfissálfræðing sem hélt mjög fróðlegt erindi um mikilvægi grænna svæða í byggð (svonefnd 3 - 30 - 300 regla) sem og um fjölda kannana um gagnrýni á þéttingu byggða og ofnýtingu á byggingarreitum með þrengslum, háhýsum og skorti á náttúru.

Það var mikið hlegið þegar Páll var spurður hvort borgin hefði ekki leitað til hans sem umhverfissálfræðings. ,,Nei, það hefur hún ekki gert. Það er ekki eftirspurn eftir mér hjá borginni.“

Þá sagði Aðalsteinn Snorrason arkitekt nokkur orð og vísaði til þess að lítil fagmennska væri yfir tillögum meirihlutans og í raun stórmerkilegt að arkitektar og aðrir fagmenn innan borgarinnar kæmu að þessum tillögum.

Mikill hugur var í fundarmönnum og andstaðan við þéttinguna alger.

Sigrún Ásta Einarsdóttir flutti síðan mjög kraftmikla og kjarnyrta ræðu og rakti meðferð fyrrverandi og núverandi meirihlutans í borgarstjórn á Grafarvogsbúum og að fagurgali núverandi borgarstjóra um íbúalýðræði og samtal við Grafarvogsbúa væri hjákátlegur - og það að hún leyfði sér að úthluta nýjum lóðum í deiliskipulagi sem ekki væri búið að auglýsa og samþykkja væri fullkomin lítilsvirðing við íbúa og þann andmælarétt sem þeir hefðu lögum samkvæmt.

Sigrún fékk mikið lófaklapp þegar hún hafði reifað hópmálsóknina og íbúakosninguna á glæru sem bar yfirskriftina HVAÐ NÆST? - þegar hún bætti svo við: SVEITARFÉLAGIÐ GRAFARVOGUR.

Hún bar síðan um tillögu fundarins til Reykjavíkurborgar þar sem þess er krafist að fallið verði frá öllum áformum um þéttingu byggðar í Grafarvogi og var tillagan samþykkt samhljóða með miklu lófaklappi. - JGH

Sigrún Ágústa Einarsdóttir, íbúi í Grafarvogi, setti fundinn og hélt svo þrusuræðu á fundinum.

Borgarfulltrúar Sjálfstæðisflokksins. Friðjón Friðjónsson, Hildur Björnsdóttir og Björn Gíslason - en þær Marta Guðjónsdóttir og Ragnhildur Alda Vilhjálmsdóttir voru einnig á fundinum ásamt Diljá Mist Einarsdóttur alþingismanni en hún er úr Grafarvogi.

Ályktun fundarins sem samþykkt var samhljóma með handaupplyftingu og síðar miklu lófataki.

HVAÐ NÆST? Hópmálsókn og íbúakosning. Og svo...við mikið lófaklapp: „Sveitarfélagið Grafarvogur.“ En Grafarvogur (pósthólf 112) er í 2. sæti yfir útsvarsgreiðendur í Reykjavík.

Stöndum þétt saman og snúum bökum saman. Mikill samhugur og samstaða var á fundinum.

Dr. Páll Jakob Líndal umhverfissálfræðingur. Það er ekki sama hvernig umhverfið er fyrir sálartetrið.

Klukkutími þar til fundurinn byrjar - dr. Páll Líndal mætir á fundinn

Thu, 15 May 2025 16:36:16 GMT

TÍMAGLASIÐ AÐ RENNA ÚT FYRIR FUNDINN. Nú er aðeins klukkutími þangað til baráttu- og samstöðufundur okkar Grafarvogsbúa hefst í Rimaskóla, þ.e. kl. 17:30.

Þrátt fyrir mikið mótlæti Grafarvogsbúa í baráttunni við meirihlutann í borgarstjórn er aldrei eins mikilvægt að standa saman gegn mjög svo óréttlátri þéttingu byggðar hér í GRÓNUM GRAFARVOGI.

Höldum áfram að skila inn athugasemdum á vefinn Okkar Grafarvogur. Sjá hér.

Dr. Páll Líndal umhverfissálfræðingur mætir á fundinn og flytur stutt erindi.

Við birtum hér grein sem hann skrifaði um Græna gímaldið í lok janúar. Hér er hún.

Dr. Páll Líndal fyrir framan Græna gímaldið sl. vetur.

Glæsilegt - yfir eitt þúsund mótmælt og baráttufundur í Rimaskóla í dag kl. 17:30

Thu, 15 May 2025 10:20:57 GMT

Á RAUÐU LJÓSI. Núna hafa yfir eitt þúsund mótmælt þéttingu byggðar í Grafarvogi og vonandi að nýju borgarstýrurnar staldri við og vinni með íbúunum og hætti við þéttingu byggðar í grónum Grafarvogi. Samstöðufundur verður í Rimaskóla í dag kl. 17:30 til að fara yfir stöðuna og klára dæmið.

Nýju borgarstýrurnar geta ennþá hætt við að auglýsa nýtt deiluskipulag í Grafarvogi í sumar. Ákvörðunin er þeirra.

ÞÉTTINGIN KOMIN Á RAUTT LJÓS?

Áætlað er 20 til 25 byggingarkranar verði reistir á hinum fjórtán þéttingarreitum sem áformað er að byggja á. Nýju borgarstýrurnar gætu metið hin kröftugu mótmæli sem svo að þær séu lentar á rauðu ljósi með þéttinguna.

Myndin hér að ofan er tekin við ein erfiðustu gatnamót Grafarvogs á virkum degi, góðvirðisdegi kl. 13:30, og horft til suðurs. Þarna er gífurleg umferð og mikilvægt að eiga gott rými til að laga þessi gatnamót vegna stóraukinnar umferðar næstu árin.

En nei, á vinstri hönd við svarta sendibílinn á opnunarmyndinni er einn af þéttingarreitunum - og þar stendur til að fara í verulegar framkvæmdir og þrengja að gatnamótunum frekar en hitt. - JGH

Þarna stendur til að þrengja að gatnamótunum með nýjum húsum. Á svæðinu fyrir ofan hvíta sendibílinn verður byggt nýtt einbýlishús og til hliðar við það koma ný parhús og raðhús. Alls fjórtán íbúðir.

Einbýli - parhús - og raðhús. Alls 14 íbúðum verður troðið niður við þessi helstu gatnamót Grafarvogs; gegnt bensínstöð Orkunnar og Gullnestis.

Fólk að koma sér fyrir og salurinn senn að fyllast. Frá íbúafundinum margumtalaða 20. mars sl.

Troðfullur salurinn og Grafarvogsbúar létu svo sannarlega í sér heyra.

Fjörugu sumarskákmóti Fjölnis lokið - 101 þátttakandi, þar af 50 úr Grafarvogi

Wed, 14 May 2025 16:24:00 GMT

FJÖR OG FIMI Í SKÁK! Það var bæði fjör og skákfimi á hinu vinsæla Sumarskákmóti Fjölnis sem haldið var í tuttugasta skiptið á dögunum. Þátttakan brást ekki frekar en fyrri daginn því 101 skráði sig til leiks. Rótarý gaf öll verðlaunin og Helgi Áss Grétarsson, Íslandsmeistari í skák, mætti og tefldi fjöltefli í klukkustund á tólf borðum. Krakkarnir hópuðust í kringum Íslandsmeistarann.

Sigurvegrar og handhafar Rótarý-bikarana að þessu sinni voru þau Theodór Helgi Eiríksson, Foldaskóla í eldri flokki, Dagur Sverrisson, Vesturbæjarskóla í yngri flokki, og Sigrún Tara Sigurðardóttir , Rimaskóla í stúlknaflokki.

Sigurvegrar og handhafar Rótarý-bikarana að þessu sinni voru þau Theodór Helgi Eiríksson, Foldaskóla í eldri flokki, Dagur Sverrisson, Vesturbæjarskóla í yngri flokki, og Sigrún Tara Sigurðardóttir, Rimaskóla í stúlknaflokki.

Kjartan Eggertsson, forseti Rótarý í Grafarvogi, var heiðursgestur mótsins að þessu sinni en Rótarýklúbburinn gaf alla verðlaunagripi mótsins.

Kjartan ávarpaði þátttakendur og afhenti æfingameisturum vetrarins verðlaunagripi, þeim Fjölniskrökkum Emilíu Emblu og Tristani Fannari. Kjartan lék loks fyrsta leikinn fyrir Sigrúnu Töru sem er liðsmaður skáksveitar Rimaskóla.

Verðlaunin 50 dreifðust á efstu sætin, þá sem náðu 3 vinningum af 5.

Verðlaunin voru ekki af verri endanum: Sumarleikföng og spil frá Hagkaup, Gjafabréf frá Domino´s og SAM-bíóunum, íþróttahandklæði frá Jóa útherja og gjafabréf frá Bókabúð Grafarvogs.

Skákstjórar voru þeir Helgi Árnason formaður Skákdeildar Fjölnis og Gauti Páll Jónsson.

Æfingameistarar Fjölnis 2024 - 2025; Tristan Fannar og Emilía Embla sem leiða skáksveit Rimaskóla, Íslandsmeistara barnaskólasveita 2025.

Kjartan Eggertsson, forseti Rótarý í Grafarvogi, var heiðursgestur mótsins og lék fyrsta leikinn.

Hvernig væri nú að borgin færi að slá grasið - og líka á gangstéttunum?

Wed, 14 May 2025 15:18:10 GMT

Hvernig væri nú að borgin slakaði á með hina gráðugu þéttingarstefnuna sína og færi að sinna umhverfinu okkar í Grafarvogi betur og slá til dæmis grasið við götur og gangstéttir?

Borgin stendur sig engan veginn nægilega vel þegar kemur að umhirðu og snyrtimennsku í Grafarvogi.

Það er ekki nóg að vera mánuðum saman að helluleggja niðri á Hlemmi fyrir 2 milljarða króna og stæra sig svo af því að torgið sé orðið bíllaust - líkt og Dóra Björt Guðjónsdóttir, borgarfulltrúi Pírata og formaður umhverfis og skipulagsráðs Reykjavíkur , gerði í fréttum um daginn.

Reykjavíkurborg þarf að sinna úthverfunum af miklu meiri þrótti í umhverfismálum. Það er ekki nóg að ganga bara um með teikniblokkir og teikna blokkir þvert gegn vilja íbúa ef þjónustuhlutverkið situr á hakanum.

Íbúar í Grafarvogi eru löngu farnir að huga að vorverkunum og slá blettina. Hvernig væri að borgin sýndi lit og tæki fram sláttuvélarnar og þjónustaði hverfið í stað þess að vinna gegn íbúunum sem greiða sitt útsvar og gjöld?

Það getur ekki verið henni ofvaxið - líkt og grasið! - JGH

Ekki gott og sýnir vanrækslu borgarinnar í hirðusemi. Þétt gras vex víða á milli gangstétta og vegkanta. Það þarf að fara að „slá gangstéttarnar“.

Hvernig væri að borgin sýndi lit og tæki fram sláttuvélarnar og þjónustaði hverfið í stað þess að vinna gegn íbúunum með þéttingu byggðar - íbúum sem greiða sitt útsvar og gjöld?

Hér er rjóður og hér á að troða niður einbýlishúsi með 2 íbúðum. TIL HVERS?

Tue, 13 May 2025 18:02:44 GMT

Kæru Grafarvogsbúar. Munum samstöðufundinn í Rimaskóla kl. 17:30 á fimmtudag og höldum áfram að mótmæla þéttingu byggðar í Grafarvogi.

Sjáið til dæmis þetta svæði hér við ein fjölförnustu gatnamót í Grafarvogi við Gullinbrú og Hallsveg. Fyrir aftan miðljósin og hljóðmönina er lítið rjóður; fyrir ofan einbýlishúsið Vesturfold 54, í botnlanganum.

Nema hvað - þarna áformar borgin að troða 2ja hæða einbýlishúsi með tveimur íbúðum. Sem merkir að þessi ágæta götumynd verður breytist næstu árin.

Krani, byggingarvinna og tilheyrandi jarðrask við mjög fjölfarinn hjóla- og göngustíg í grónu hverfi þar sem núverandi aðalskipulag hefur aldrei gert ráð fyrir einbýlishúsi. Enn og aftur spyrjum við: TIL HVERS? - JGH

Lítið fallegt rjóður í botnlanga fyrir ofan Vesturfold 54. Þarna á byggja einbýlishús með tveimur hæðum.

Horft niður hjóla- og göngustígin að átt að gatnamótunum. Þarna til hægr á að byggja einbýlishúsið.

Hér sést þetta í Skipulagsgáttinni.

Mikið notaðar göngu- og hjólaleiðir allt um kring í mjög grónu hverfi. Nei, hér þarf að breyta aðalskipulagi og troða niður einbýlishúsi með tveimur íbúðum.

Selur Daði Már Íslandsbanka á lægra gengi en Bjarni Ben.?

Mon, 12 May 2025 20:53:47 GMT

HLUTHAFASPJALLIÐ. Í síðustu tveimur þáttum HLUTHAFASPJALLSINS á Brotkast.is hafa þeir Jón G. Hauksson og Sigurður Már Jónsson velt því fyrir sér hvort núverandi stjórnarflokkar, sem töldu söluverðið á Íslandsbanka, 117 kr. á hlut, vera of lágt í mars 2022 þegar þeir voru í stjórnarandsöðu, lendi núna í því að selja bankann á lægra verði. (Sjá hér og hér. )

Það skyldi þó aldrei vera eftir allt sem á undan er gengið að Daði Már Kristófersson fjármálaráðherra samþykki sölu á bankanum á lægra gengi en Bjarni Benediktsson gerði á sínum tíma?

Gengi bréfa í bankanum er núna 114 kr. og markaðsvirði hans 214 milljarðar kr. og virði hlutar ríkisins um 97 milljarðar kr.

Á vef Stjórnarráðsins segir að það sé sameiginlegt mat ríkisstjórnarinnar og ráðgjafa hennar að markaðsaðstæður séu hagfelldar til að ljúka sölunni á eftirstandandi hlutum ríkisins í bankanum. En er það svo?

Miklar sveiflur hafa verið á gengi Íslandsbanka frá sölunni á 22,5% hlut í bankanum í mars 2022. Hæst farið í 135 og lægst í 94. Fróðlegt verður að sjá hvert gengið verður í útboði ríkisins á bankanum á næstunni.

Gengi bréfa í Íslandsbanka hefur sveiflast verulega frá hinni umdeildu sölu 2022. Fór hæst upp í 135 haustið 2022 og niður í 94 kr. í lok maí í fyrra. Það var 108 kr. í byrjun maí sl. og er núna 114.

Ríkið seldi 22,5% hlut til valinna fagfjárfesta í mars 2022 á genginu 117 og gagnrýndi þáverandi stjórnarandstaða að gengið hefði verið of lágt þar sem það hefði verið 122 í lok viðskipta þess dags sem útboðinu var skellt á um kvöldið.

Ríkissjóður seldi 35% hlut í Íslandsbanka árið 2021 á genginu 79 þegar bankinn var fyrst skráður á markað og rauk gengið í 95 kr. strax í fyrstu viðskiptum með bréf félagsins í Kauphöllinni.

Ríkið er stærsti hluthafinn í Íslandsbanka með 45,2% hlut.

Hlutur ríkisins í bankanum er jafnan sagður 42,5% í umræðunni en hann er í raun 45,20% þar sem bankinn hefur keypt talsvert af eigin bréfum og þar með hefur hlutur hvers og eins hluthafa hækkað.

Til stendur núna að bjóða bankann til sölu í þremur útboðum; 1) Til almennings. 2) Til innlendra fagfjárfesta. 3) Til erlendra fagfjárfesta?

Og svo á bara eftir að telja upp úr kössunum – hvað er markaðurinn tilbúinn til að greiða hátt verð fyrir hlut ríkisins í bankanum? - JGH

Klippa úr hlaðvarpi þeirra Jóns G. og Sigurðar Más á Brotkast.is ( 8. maí ).

Klippa úr hlaðvarpi þeirra Jóns G. og Sigurðar Más á Brotkast.is ( 30. apríl ).

Vonast Kári Stefánsson eftir Nóbelnum?

Sat, 10 May 2025 21:49:07 GMT

HLUTHAFASPJALLIÐ. Í nýjasta hlaðvarpsþætti okkar Sigurðar Más Jónssonar á Brotkast.is, Hluthafaspjallinu, barst talið að Kára Stefánssyni og hvað hann tæki sér fyrir hendur eftir brottreksturinn hjá Íslenskri erfðagreiningu.

Sigurður hafði á orði að sagan segði að Kári hefði öðrum fremur áhuga á að ná í eins og ein Nóbels-verðlaun enda án efa einn fremsti mannerfðafræðingur heims. Rætist draumur Kára eða snýr hann sér meira að ritstörfum?

Sjá klippu hér.

Klippan um samtal okkar um Kára Stefánsson og Nóbelinn.

DV fjallar um þéttingarstefnuna í Grafarvogi

Sat, 10 May 2025 21:09:06 GMT

DV hafði samband við mig sem ritstjóra og útgefanda Grafarvogs.net og ræddi við mig um þéttingarstefnuna meirihlutans í borginni og hvaða rök ég hefði gegn þessari stefnu. Hér má sjá viðtalið.

Mér var ljúft að svara því og sýnist á viðbrögðunum sem ég hef fengið við greininni að umræðan um þéttingarstefnu borgarinnar sé að magnast og breiðast út til annarra hverfa.

Mótmælin og þau rök sem við Grafarvogsbúar höfum lagt fram eru farin að heyrast hærra og berast víðar. - JGH

Bogi Nils, forstjóri Icelandair: Öllum steinum velt við í rekstrinum

Sat, 10 May 2025 17:59:39 GMT

HLUTHAFASPJALLIÐ. Nýjasti hlaðvarpsþátturinn okkar Sigurðar Más, Hluthafaspjallið á Brotkast.is, er kominn út.

Ræðum brottrekstur Kára Stefánssonar; forstjóraskipti í þremur stórfyrirtækjum á fimm dögum; stórhækkun bréfa í Alvotech; hvort ríkisstjórnin fái lægra verð fyrir Íslandsbanka en síðasta ríkisstjórn og þáverandi stjórnarandstaða gagnrýndi.

Og þá kom Bogi Nils Bogason, forstjóri Icelandair Group, til okkar í heimsókn og fór yfir reksturinn og hvort markmiðið um hagnað á árinu náist.

AIRBUS EÐA BOEING? EKKI ÁKVEÐIÐ!

Fínt spjall við Boga og í sjálfu sér athyglisvert sem hann segir um að fyrirtækið sé ekki enn búið að ákveða sig hvort það velji Airbus eða Boeing í framtíðinni - eða þá hvort félagið verði með báðar tegundirnar í notkun. Airbus þá til dæmis á lengi leiðum.

Hér má sjá lítið brot úr samtalinu við Boga.

HAGNAÐUR 2023 - TAP 2024

Icelandair Group skilaði hagnaði árið 2023, þá í fyrsta sinn í sjö ár og nokkur erfið covidár. En félagið tapaði hins vegar í fyrra. Bogi hafði orð á því í fjölmiðlum í febrúar sl. eftir uppgjör síðasta árs að aukin áhersla yrði lögð á að félagið skilaði hluthöfum sínum hagnaði á þessu ári.

Félagið tapaði 6,1 milljarði á fyrsta ársfjórðungi þessa árs sem var um 2ja milljarða króna bati frá sama tíma í fyrra.

Fyrsti fjórðungur þessa árs og mikil aukning farþega í nýliðnum mánuði, apríl, gefur ágætis vonir um árið en Bogi segir að ákveðin óvissa sé með síðasta ársfjórðunginn vegna efnahagshorfa í heiminum.

ÖLLUM STEINUM VELT Í REKSTRINUM

Hann segir að fyrir um ári hafi félagið lagt í ákveðna umbreytingavegferð sem gangi út á að öllum steinum í rekstrinum sé velt svo tryggt sé að verið sé að reka félagið eins vel og hægt er.

„Við vorum með lækkun á öllum einingarkostnaði í félaginu á fyrsta ársfjórðungi og það eru ekki mörg flugfélög sem geta státað af því,“ segir Bogi.

Samstöðufundur gegn þéttingarstefnunni í Rimaskóla 15. maí

Sat, 10 May 2025 12:11:51 GMT

SAMSTÖÐUFUNDUR 15. MAÍ. Íbúasamtök Grafarvogs halda samstöðufund v egna þéttingaráforma borgarinnar í Rimaskóla fimmtudaginn 15. maí kl. 17:30.

Í frétt frá Íbúasamtökunum kemur fram að farið verði yfir stöðu málsins og næstu skref í baráttunn - og að nánari dagskrá verði kynnt nær dragi.

Í lok fundar verður íbúum boðið að fá tæknilega aðstoð við að senda inn athugasemdir, en lokafrestur til að skila er til og með 15. maí.

Fjölmennum og sendum skýr skilaboð um afstöðu íbúa gegn þéttingaráformum í Grafarvogi!

Meðfylgjandi mynd var tekin á íbúafundinum í Borgum 20. mars sl. þar sem fundargestir mótmæltu þéttingunni af miklu krafti. - JGH

Fín viðbót á vefnum OKKAR GRAFARVOGUR - núna hægt að sjá stöðuna hverju sinni

Sat, 10 May 2025 11:40:01 GMT

FYLGIST MEÐ TÖLFRÆÐINNI. Grafarvogsbúinn Freyr Ómarsson hefur sett inn skemmtilega nýjung inn á vef Íbúasamtaka Grafarvogs, OKKAR GRAFARVOGUR, og er um að ræða tölfræði yfir fjölda umsagna sem uppfærist hverju sinni.

Þannig er hægt að fylgjast með hvernig gengur að mótmæla, fjölda umsagna, fjölda umsagna um hvern reit og áætlaðar íbúðir á hvern reit.

Sjá þessa fínu viðbót hér .

Endilega skoðið þesa nýjung og fylgist með fjölda athugasemda hverju sinni - og hvetjið alla til að skila inn athugasemdum og mótmæla. (Sjá tengilinn einnig hér: https://okkargrafarvogur.com/#tolfraedi). - JGH

Vilji er allt sem þarf - þær geta ennþá „skrúfað fyrir“ kranana

Thu, 08 May 2025 17:11:48 GMT

VILJI ER ALLT SEM ÞARF! Við sögðum frá því í gær að gera megi ráð fyrir að á bilinu 20 til 25 byggingarkranar verði reistir ef áform um þéttingu byggðar í Grafarvogi ná í gegn og verða samþykkt af meirihluta borgarstjórnar.

Nokkur viðbrögð urðu við þessari frétt þar sem fólk spyr sig hvort barátta okkar Grafarvogsbúa gegn þéttingu byggðarinnar sé töpuð og hvort nýju borgarstýrurnar geri eitthvað með athugasemdirnar og mótmælin.

Við gefumst ekki upp. Dropinn holar steininn. Fresturinn til að skila inn athugasemdum og mómæla hefur verið framlengdur til 15. maí. og því er ennþá vika til stefnu. Mótmæla hér .

Vilji er allt sem þarf. Nýju borgarstýrurnar geta ennþá „skrúfað fyrir “ kranana og komið í veg þá hörmulegu skemmdarstarfsemi sem þétting byggðar í Grafarvogi er.

Þær geta kúvent og sagt JÁ við óskum Grafarvogsbúa og NEI við þéttingunni . - JGH

Skv. lauslegri áætlun má gera ráð fyrir að 20 til 25 kranar verði reistir á hinum fjórtán skilgreindu þéttingareitum. Nýju borgarstýrurnar geta enn komið í veg fyrir það - þær geta ennþá „skrúfað fyrir “ kranana með því að segja JÁ við Grafarvogsbúa og NEI við þéttingunni.

Þéttingarstefnan í Grafarvogi til umræðu við Rauða borðið á Samstöðinni

Wed, 07 May 2025 21:32:24 GMT

SAMSTÖÐIN. Þéttingarstefnan í Grafarvogi var meðal annars til umfjöllunar í þættinum Rauða borðið á Samstöðinni í þeim kafla þáttarins sem nefnist Reynsluboltar. Umsjónarmaður þáttarins, Sigurjón Magnús Egilsson, fékk undirritaðan í þáttinn til sín til að ræða málefni líðandi stundar. (Sjá þáttinn í heild sinni hér. )

Þau Ásmundur Friðriksson, fyrrum þingmaður, og Erna Bjarnadóttir hagfræðingur tóku þátt í umræðunum með mér.

Í ljósi þess hvað Grafarvogur.net hefur fjallað mikið um áform meirihlutans í borginni um þéttingu byggðar í Grafarvogi barst málið eðlilega í tal og þar sem mér gafst kostur á að ræða rök mín gegn þéttingunni. - JGH

Frestur til að mótmæla framlengdur: Stefnir í upprisu 25 krana í Grafarvogi

Wed, 07 May 2025 19:12:44 GMT

FRESTUR FRAMLENGDUR . Frestur til að gera athugasemdir í Skipulagsgáttinni við þéttingu byggðar í Grafarvogi hefur verið framlengdur til 15. maí. Þrátt fyrir að mikillar tortryggni gæti í garð nýju borgarstýranna um að þær kúvendi í málinu og hætti við þá gefst engu að síður enn tími til að bæta við athugasemdum og mótmæla.

Þéttingareitirnir eru skilgreindir sem fjórtán talsins en gera má ráð fyrir að kranarnir sem reistir verða við fyrirhugaðar framkvæmdir séu mun fleiri - eða á bilinu 20 til 25, svona lauslega metið.

Hinn gróni Grafarvogur fær á sig nýbyggingarsvip á næstu árum með öllu því raski sem fylgir troðslu nýrra íbúða í grónum hverfum - gangi ætlun meirihlutans eftir. Kranar, gröfur, vörubílar, steypubílar, nýbyggingar, rykugar götur, og hvað eina sem einkennir hverfi nýbygginga.

Gerum athugasemdir og mótmælum áfram til 15. maí - það er hægt að snúa þessu við. - JGH

Aldurinn er ekki óvinur okkar – heldur viðhorfið til hans

Wed, 07 May 2025 09:35:33 GMT

Hún er frumkvöðull sem tók þátt í því fyrir 35 árum að gera líkamsrækt að lífsvenju hjá fjölda Íslendinga. Stöðvarnar voru bylting. Núna tvinnar hún hreyfingu saman við styrktaræfingar, mataræði, slökun og heilbrigðan lífsstíl undir einu heiti; heilsurækt!

Og – hún er þekktur Grafarvogsbúi; við erum auðvitað að tala um Ágústu Johnson sem hefur búið hér í Grafarvoginum í tuttugu og fjögur ár ásamt fjölskyldu sinni. Eiginmaðurinn er Guðlaugur Þór Þórðarson alþingismaður.

„Það er aldrei of seint að byrja,“ segir Ágústa í samtali við Grafarvog.net en hún er framkvæmdastjóri Hreyfingar.

Ágústa og Guðlaugur Þór hafa búið í nær aldarfjórðung í Grafarvogi. „Hér eru frábærar gönguleiðir.“

HEILSURÆKT OG LANGLÍFI

Nýjasti pistill hennar í Morgunblaðinu ber einmitt heitið Armbeygjur á 100 ára afmælinu? Skemmtileg fyrirsögn á fínum pistli um samspil heilsuræktar og langlífis.

„Gleymum ekki að aldurinn er ekki óvinur okkar – frekar viðhorfið sem við höfum til hans,“ segir Ágústa. „Það besta er að við höfum sjálf fjölmargt um það að segja hvort okkur beri gæfa til að viðhalda orku okkar og lífsþrótti á síðari hluta ævinnar.“

Hún segir að styrktar- og jafnvægisæfingar hafi mikil áhrif, jafnvel hjá einstaklingum yfir 75 ára. „Það er skynsamlegt að leita ráðlegginga hjá fagfólki og fá æfingaáætlun sem er sérsniðin að getu og þörfum hvers og eins.“

LÍKAMINN HANNAÐUR TIL AÐ HREYFA SIG

Að sögn Ágústu er líkaminn hannaður til að hreyfa sig. „En hvað gerum við flest?“ spyr hún, „Jú, sitjum stóran hluta dags við tölvu, í bíl eða í sófanum. Með reglulegri hreyfingu eykst hins vegar liðleiki, jafnvægi og styrkur sem allt stuðlar að því að lifa síðara æviskeiðið hraustari, hressari og síður án meiðsla .“

GRAFARVOGSBÚI Í ALDARFJÓRÐUNG

Ágústa hefur búið í Grafarvogi í nær aldarfjórðung og hvetur alla til að nýta sér hinar fjölmörgu góðu gönguleiðir í hverfinu. „Daglegar gönguferðir eru frábær heilsubót, hressandi og eflandi, svo ekki sé minnst á hve einfalt það er að drífa sig út að ganga. Það er um að gera að láta veðrið ekkert trufla sig, bara klæða sig eftir því hvernig viðrar. Þeir sem nenna ekki að fara út í rok og rigningu eiga alltaf skjól inni á líkamsræktarstöðvunum; þar er hægt að gleyma sér á brettinu eða gleyma sér í afþreyingarkerfinu.“

Fjölskylduhundurinn Máni á kunnum slóðum, fyrir botni Grafarvogs. Ágústa bendir á að fyrir botni Grafarvogs séu minjar sem séu friðaðar. „Það verður að varðveita þessa sögu Grafarvogs.“

FJÖLSKYLDUHUNDURINN MÁNI

Sjálf segist Ágúst fara í gönguferðir á hverjum degi og hún sé sjaldnast ein á ferð, fjölskylduhundurinn Máni sé jafnan með í för; fimm ára gamall Golden Retriever-rakki sem auðvitað þarf sína hreyfingu til að vera í góðu formi. Ekkert síður en við mannfólkið!

„Hann fær góða hreyfingu, nokkrar gönguferðir á dag þar sem fjölskyldan er býsna dugleg að viðra kappann. Þegar ég kem svo heim úr vinnu tek ég hann með mér í góða gönguferð, svona frá 30 mínútum upp í klukkutíma og jafnvel lengur. Fer oftast einhvern hring í hverfinu – til dæmis í kringum voginn en sú leið er mikil náttúruperla. Sömuleiðis er stígurinn meðfram sjónum í Hamrahverfi mjög falleg leið með útsýni yfir sundin blá.“

Ágústa bendir á að fyrir botni Grafarvogs séu minjar sem séu friðaðar. „Það verður að varðveita þessa sögu Grafarvogs.“

STYKRTARÞJÁLFUN TROMPIÐ

Þótt daglegar gönguferðir séu mikilvæg hreyfing og allra meina bót, hressi, kæti og bæti , þá segir Ágústa að þar með sé björninn ekki unninn. Styrktarþjálfun sé öllum nauðsynleg. „Hún er trompið að mínu mati og ég tel nauðsynlegt að lyfta lóðum, helst í hverri viku alla ævi.“

Hún segir að ótal rannsóknir hafi leitt í ljós að styrktarþjálfun sé mikilvægur lykill að heilbrigðari æviárum og langlífi. „Sjálfri finnst mér það stórgóð blanda að ganga og lyfta, hentar afar vel a.m.k. fyrir hundaeigendur. Ég reyni að ganga 10-15.000 skref á dag og lyfta tvisvar til þrisvar í viku.“

- En eru lóðin fyrir fyrir alla og líka á efri árunum?

„Já, ég tel svo vera. Og ég er ekki ein um þá skoðun því heilsusérfræðingar um allan heim hafa sammælst um að styrktarþjálfun sé undirstaða heilbrigðrar öldrunar og auki beinþéttni, bæti efnaskipti og viðhaldi hreyfigetu sem skipti sköpum fyrir lífsgæði á efri árum.“

LÓÐIN VINNA GEGN VÖÐVATAPI

- En hvað með þá skoðun að gott sé að „hlífa“ sér við álagi með aldrinum?

„Ég held að það geti gert illt verra. Talið er að ein helsta ástæðan fyrir meiðslum á efri árum sé hreyfingarleysi og skortur á styrktarþjálfun. Það er nauðsynlegt að virkja líkamann með markvissri hreyfingu og forðast kyrrsetu að mestu.“

Hún segir að vöðvatap sé eitt af því sem gerist með aldrinum. „Það er eitt stærsta vandamálið sem fylgir hækkandi aldri. Þá rýrna vöðvar og fyrir vikið hættir okkur til að bæta á okkur aukinni líkamsfitu en ekki öfugt.“

„Ég hvet fólk eindregið til að taka sér ekki hlé frá ræktinni á sumrin heldur að bæta hjólreiðum, fjallgöngum, golfi og fleiru frekar við æfingarnar og útiveruna á sumrin.“

STÆRRA MITTISMÁL ER EKKERT LÖGMÁL

„Minni vöðvamassi eykur þess utan hættuna á beinbrotum, sykursýki, hjarta- og æðasjúkdómum og jafnvel heilabilun . Stærra mittismál með hækkandi aldri er alls ekkert lögmál ef markvisst er hugað að því að viðhalda vöðvamassa líkamans og vanda valið í mat og drykk. Þess vegna segi ég: Það er til mikils að vinna að taka reglulega – og rækilega – í lóðin.“

- En nú er sumarið að nálgast og þá breytist rútínan hjá mörgum og margir taka sér hlé!?

„Ég hvet fólk eindregið til að taka sér ekki hlé frá ræktinni á sumrin heldur bæta hjólreiðum, fjallgöngum, golfi og fleiru frekar við æfingarnar og útiveruna á sumrin.

Mitt mottó er að hætta aldrei að æfa og missa ekki niður vikur án þess að lyfta lóðum. Þannig heldur maður sér alltaf við efnið og rútínuna. Það kannast flestir við það hve erfitt er að byrja æfingar aftur eftir hlé. Pásurnar geta nefnilega orðið að mánuðum og jafnvel árum.“

STAÐFESTA SKIPTIR MÁLI

Og Ágústa segir með áherslu í lokin: „Viltu geisla af orku og heilbrigði? Þá er bara eitt ráð og það er staðfesta . Að stunda heilsuræktina í hverri viku allt árið, alltaf!“ - JGH/Svava

Vel gert! Fjölnismenn heiðruðu minningu Steinars Ingimundarsonar

Tue, 06 May 2025 14:31:13 GMT

VEL GERT FJÖLNISMENN. Meistaraflokkur karla heiðraði minningu Steinars Ingimundarsonar fyrir fyrsta leik liðsins sl föstudag, 2. maí.

„Steinar, sem lést árið 2013, var mikill Fjölnismaður sem bæði lék með liðinu á sínum tíma og þjálfaði.

Eins lék hann með KR, Leiftri, Þrótti og Víði og í heild skoraði Steinar 23 mörk í 86 leikjum í efstu deild á ferli sínum.

Steinar þjálfaði síðar karlalið Fjölnis frá 2002 til 2004 og Víði Garði frá 2007 til 2009. Árið 2010 tók Steinar við kvennaliði Keflavíkur en hætti með liðið um mitt ár 2011 vegna veikinda sinna.

Minningin um góðan dreng lifir,“ segir á vef Fjölnis.

Vel gert Fjölnismenn. - JGH

TIL HVERS? 6 íbúðum troðið niður á örsvæði fyrir neðan einbýlishúsin í Baughúsum

Mon, 05 May 2025 18:34:48 GMT

ATH. SÍÐUSTU FORVÖÐ! Kæru Grafarvogsbúar, nú eru síðustu forvöð til að mótmæla þéttingu byggðar í Grafarvogi og fer vel á því að senda inn athugasemd hér í gáttina í kvöld .

Sjáið til dæmis þetta örsvæði fyrir neðan þessi fallegu einbýlishús við Baughús í Húsahverfi - það þarf sérstakt hugmyndaflug að láta sér detta í huga að setja þarna niður þrjú parhús með 6 íbúðum.

TIL HVERS EIGINLEGA?

Þetta er fráleitt byggingarsvæði; bletturinn mjög lítill; húsin munu skyggja á útsýni frá nokkrum einbýlishúsum við Baughús sem hafa verið í góðri trú með deiliskipulagið; byrgir útsýni fyrir ökumönnum; þrengir að umferðinni á annasamri götu; kranar, hávaði og óþarfa jarðrask í grónu hverfi.

Nei takk! Stöndum vörð um Grafarvoginn. Mótmælum og gerum athugasemd við þetta!

Gatan er Völdunarhús. Sjónarhornið er frá litlu verslunarmiðstöðinni og horft í átt að bensínstöð N1. Þarna á að troða niður 6 íbúðum á þessu örsvæði. Til hvers?

Þetta er með ólíkindum.

Það þarf sérstakt hugmyndaflug tað láta sér detta í huga að setja þarna niður þrjú parhús með 6 íbúðum.

Nýju borgarstýrurnar geta stöðvað þetta - ef vilji er fyrir hendi. Þetta er í þeirra höndum.

Ja hérna.

Gamla, góða Ártúnsbrekkan árið 1950

Mon, 05 May 2025 17:37:22 GMT

ÁRTÚNSBREKKAN UM 1950. Þessa skemmtilegu mynd af Ártúnsbrekkunni birtir Sverrir Þórólfsson á Facebook. Myndin er tekin í kringum árið 1950 og alvöru drossía á leiðinni upp brekkuna. Auðvitað var vinstri umferð á þessum tíma.

Svei mér þá ef bragginn á vinstri hönd stendur ekki ennþá. Þarna glittir í ósa Elliðaár áður en ákveðið var að fylla upp í þá og búa til landfyllingu sem kölluð er Geirsnef og er notað sem sleppisvæði fyrir hundaeigendur.

Í athugasemdum á FB segir að vegurinn hafi greinst neðar í brekkunni - ca. 150 metrum - og að leiðin upp í Árbæ og austur fyrir fjall hafi legið þar um.

Það merkir að drossían á myndinni er á leiðinni upp í Mosfellsbæ eða þaðan af lengra eftir Vesturlandsvegi. Skemmtileg mynd í alla staði.

Látum svo eina loftmynd af svæði upphafsmyndarinnar fylgja með - en hún er sögð frá árinu 1954 og þar má sjá að byggð hefur breiðst út og íbúðum fjölgað talsvert í millitíðinni.

Ósar Elliðaár sjást enn betur á þeirri mynd. - JGH

Loftmynd af hluta Reykjavík árið 1954 þar sem sjá má þónokkur býli við Bústaðaveginn og eins eru óskar Elliðaár athyglisverðir.

TIL HVERS? 29 íbúðum troðið niður við hringtorgið við Borgaveginn á leið í Spöngina

Sun, 04 May 2025 17:49:28 GMT

HÁALEITISHÖRMUNGIN YFIRFÆRÐ Á BORGAVEG! Á þessum litla grasbletti við eitt fjölfarnasta hringtorg Grafarvogs vilja nýju borgarstýrurnar troða niður 29 íbúðum.

Þetta er hringtorgið við Borgaveg sem er ein algengasta leiðin í verslanirnar við Spöngina og er helsta leiðin inn í fjölmenn hverfi í Borgum og hluta Rimahverfisins. Að hringtorginu liggja Borgavegur, Melavegur, Móavegur og Sóleyjarimi.

TIL HVERS EGINLEGA?

Gangi þessi áform eftir mun þetta byrgja bílstjórum verulega sýn og er stórhættulegt í alla staði. Þarna eru ennfremur vinsælar göngu- og hjólaleiðir. Þetta er galið!

Þess utan munu húsin ná svo til alveg niður að hringtorginu - líkt og í hörmunginni við Háaleitisbraut.

Munum að það eru síðustu forvöð að mótmæla í Skipulagsgáttinni og mótmælum þrátt fyrir að á móti blási og tilfinningin sé að valtað sé yfir okkur Grafarvogsbúa og að nýju borgarstýrurnar muni skella skollaeyrum við mótmælunum.

Við gefumst ekki upp - heldur komum nýrri bylgju mótmæla af stað! Þær geta stöðvað þetta!

Á þessum litla reit handan við hringtorgið stendur til að troða niður 29 íbúðum.

Séð frá þröngum Melaveginum yfir blettinn í átt að hringtorginu. 29 íbúðir og liggja nánast upp að hringtorginu. Nær væri að eiga þessa spildu inni til að betrumbæta umferðarmannvirkin. Nei, skipulega er þrengt að gatnakerfinu í Grafarvogi.

Þessar 29 íbúðir byrgja bílstjórum sýn við eitt fjölfarnasta hringtorg í Grafarvogi og eru stórhættulegar. Svo á líka að troða niður 4 einbýlishúsum í Stararima. Vitleysan verður auðvitað að kallast á!

Háaleitishörmungin yfirfærð á litlan blett við hringtorgið við Borgaveg - eitt fjölfarnasta hringtorgið í Grafarvogi.

Þær brosa en okkur Grafarvogsbúum er ekki hlátur í hug. ÞÆR GETA STÖÐVAÐ ÞESSA VITLEYSU.

Staða flugfélaganna - afkoman batnar en ennþá mikið tap á fyrsta ársfjórðungi

Sun, 04 May 2025 16:53:30 GMT

HLUTHAFASPJALLIÐ . Við Sigurður Már Jónsson ræðum um uppgjör Icelandair Group og Play á fyrsta ársfjórðungi í nýjasta hlaðvarpsþætti okkar, Hluthafaspjallinu á Brotkast.is . Bæði félögin eru með taprekstur en sýna bata í afkomu miða við sama tíma tímabil í fyrra.

Raunar verður fróðlegt að sjá hvernig straumur erlendra ferðamanna til landsins verður á árinu en blikur eru á lofti um að dregið hafi úr ferðahug fólks á heimsvísu.

Styrking krónunnar hefur verið nokkur að undanförnu - enda dollarinn gefið talsvert eftir að undanförnu - og ef þessi þróun heldur áfram með krónuna þá fær ferðaþjónustan færri krónur í vasann á árinu og það mun sjást þegar talið verður upp úr kössunum í lok ársins.

Meðfylgjandi mynd er af Boga Nils Bogasyni, forstjóra Icelandair Group.

Sjá hér brot af spjalli okkar.

Hörmungin við Háaleitisbraut - birtingarmynd af stefnu sem dengt er yfir Grafarvogsbúa

Sun, 04 May 2025 14:29:04 GMT

HÁALEITISHÖRMUNGIN - VÍTI TIL AÐ VARAST! Þessi hörmung við Háaleitisbraut er birtingarmynd af þéttingarstefnu borgarinnar; stefnu sem slengt er núna yfir Grafarvogsbúa.

Stórhýsi troðið niður alveg út að gangstétt við ein helstu gatnamót landsins. Óskiljanlegt. Við Grafarvogsbúar segjum: Nei, takk!

Núna eru síðustu forvöð að fara inn á skipulagsgáttina og mótmæla hinni hrikalegu þéttingu byggðar í Grafarvogi.

Hér er hægt að fara inn á vefinn Okkar Grafarvogur - og mótmæla.

Fresturinn til að mótmæla rennur út á morgun. Stöndum vörð um Grafarvoginn!

Stefnt að því að skrá Bláa lónið á makað á næsta ári

Fri, 02 May 2025 22:08:05 GMT

HLUTHAFASPJALLIÐ. Stefnt er að því að ljúka skráningu Bláa lónsins á markað á næsta ári, ef markaðsaðstæður og ytri aðstæður leyfa. Þetta kemur fram í hlaðvarpsþætti okkar Sigurðar Más Jónssonar, Hluthafaspjallinu á Brotkast.is. (Sjá klippu hér. )

Frábært félag að mörgu leyti en þarf ekki áhættusækna fjárfesta til að koma þarna inn í ljós þeirra jarðhræringa sem hafa verið á svæðinu?

Enn ríkir mikil óvissa um framvindu jarðhræringa þarna. Verða jarðfræðingar sérfræðingar fjárfesta þegar að útboðinu kemur en lífeyrissjóðirnir eru þegar búnir að fjárfesta verulega í Bláa lóninu. - JGH

Bláa lónið er líklegast þekktasta vörumerki Íslands. En verður eftirspurn í boðuðu hlutafjárútboði Bláa lónsins á næsta ári eftir þær jarðhræringar sem gengið hafa á?

Grafarvogsbúar - nú mótmælum við áformum þeirra af fullum krafti um helgina!

Fri, 02 May 2025 13:45:20 GMT

Kæru Grafarvogsbúar , þetta er helgin sem getur ráðið úrslitum í mótmælum okkar gegn áformum núverandi meirihluta um þéttingu byggðar í hverfinu. Vert er að benda á vefinn https://okkargrafarvogur.com/ til að auðvelda sér að senda inn mótmæli en þar eru leiðbeiningar sem hjálpa til við að senda inn umsögn og mótmæli en sannast sagna hefur borgin ekki gert þetta sem auðveldast fyrir íbúana.

Grafarvogur.net tekur afstöðu í þessu máli og hefur lýst því yfir frá því vefurinn fór í loftið að hann er á móti þéttingu byggðar í Grafarvogi.

Ég hef sent inn umsögn og mótmælt. Ég sakna þess raunar að geta ekki séð umsögnina og gengið að henni hvenær sem er ásamt öllum umsögnum og mótmælum sem hafa verið send inn í gáttina.

Þá saknaði ég þess sömuleiðis, eftir að hafa skilað inn umsögninni , að sjá ekki á afgerandi hátt í gáttinni eða með tölvupósti til mín; „Þín umsögn er nú komin til skila! “ Ekkert á að fara á milli mála.

HÉR KEMUR UMSÖGN MÍN GEGN ÞÉTTINGUNNI

„Góðan dag.

Ég, Jón G. Hauksson, íbúi í Grafarvogi, mótmæli harðlega allri þéttingu byggðar í Grafarvogi og að borgin skuli leyfa sér að ganga á græn útivistarsvæði; hjóla- og göngustíga; skerða útsýni íbúa; taka niður tré og gróður á grænum svæðum sem vinna hefur verið lögð í að rækta; auka stórlega álag á alla innviði, eins og skóla og vegi - og síðast en ekki síst að breyta skipulagi sem íbúar hafa gengið að sem vísu að stæðist og hægt væri að treysta á þegar þeir hafa keypt sér húsnæði í Grafarvogi.

MIKIÐ JARÐRASK Í GRÓNUM HVERFUM

Þetta heitir að koma algjörlega í bakið á íbúunum sem hafa unað vel við hag sinn í grónum Grafarvogi en horfa nú fram á algjöran yfirgang borgarinnar við óþarfa þéttingu þar sem byggt verður úti um allt á grænum svæðum og litlum blettum með tilheyrandi jarðvegsraski alveg ofan í íbúðum sem fyrir eru og þar sem treyst hefur verið á að núverandi skipulag með grónum hverfum í Grafarvogi stæði.

ÞRENGT VILJANDI AÐ VEGAKERFINU

Þá er það algerlega óskiljanlegt að þétt sé svo mjög að vegakerfinu og gatnamótum í Grafarvogi með því að troða þar niður húsum og íbúðum algerlega að óþörfu og koma þannig í veg fyrir að hægt verði að lagfæra og betrumbæta umferðarmannvirki á næstu árum - en stórkostleg aukning á umferð blasir við í Grafarvogi, hvað sem hver segir, með stóraukinni byggð í Blikastaðalandi; (sem tilheyrir Mosfellsbæ), Keldnalandi, á Ártúnshöfða, Bryggjuhverfi - og síðast en ekki síst vegna hins stóra verslunarsvæðis, á stærð við Skeifuna, á Korputúni en framkvæmdir eru þar þegar hafnar.

GENGIÐ HARKALEGA GEGN VILJA ÍBÚA

Það er sömuleiðis með öllu ólíðandi að gengið sé svo harkalega gegn vilja Grafarvogsbúa í þessum máli en mikill einhugur hefur verið á meðal þeirra gegn þéttingarstefnunni og þeim hugmyndum sem hafa verið kynntar. Nægir þar að nefna mótmælin á íbúafundinum í Borgum í Spönginni 20. mars sl. þar sem allt fór í háaloft og fundarmenn kyrjuðu allir sem einn: Við mótmælum þessum tillögum ykkar í öllum atriðum!

ALEXANDRA: TEKIÐ VERÐI TILLIT TIL ÓSKA GRAFARVOGSBÚA

Alexandra Briem, borgarfulltrúi og varafulltrúi umhverfis- og skipulagsráðs, sagði á fundinum í Borgum 20. mars sl., að mótmælin væru kröftugri en hún átti von á og lofaði að tekið yrði tillit til óska Grafarvogsbúa í þessu máli.

Mótmæli mín snúa að öllum fyrirhuguðum þéttingarréttum í Grafarvogi; við Borgaveg, Breiðavík, Fróðengi, Gagnveg, Hverafold, Langarima, Mosaveg, Rimaflöt, Sóleyjarima, Stararima, Starengi, Veghús, Vesturfold og Völundarhús.

Virðum vilja Grafarvogsbúa en borgarfulltrúar eru í vinnu fyrir borgarbúa en eiga ekki að vinna gegn þeim.

Virðingarfyllst; Jón G. Hauksson.“

Kröftugir Korpúlfar: „Svona er þetta á öllum félagsfundum Korpúlfa“

Wed, 30 Apr 2025 18:16:09 GMT

LÍF OG FJÖR HJÁ KORPÚLFUM. Hann var þéttsetinn salurinn á félagsfundi Korpúlfa þegar Grafarvog.net bar að garði á félagsfundinn í Borgum eftir hádegi í dag og rífandi stemning. Sannast sagna voru fleiri mættir en ég átti von á.

„Svona er þetta alltaf á öllum félagsfundum,“ sagði Theodór Blöndal, formaður Korpúlfa, sem tók á móti mér ásamt Birnu Róbertsdóttur, verkefnastjóra hjá Reykjavíkurborg sem er allt í öllu í Borgum. „Birna er Borgarstjórinn,“ bætti Theodór við.

Þéttsetinn salurinn á félagsfundi Korpúlfa í dag - þeim síðasta á vorönninni.

Korpúlfar eru félag eldri borgara í Grafarvogi með yfir tólf hundruð félagsmenn. Það er gífurleg vinnusemi í félaginu og mikil sjálfboðavinna; raunar lagt upp úr henni.

Félagið var stofnað árið 1998 – eða fyrir 27 árum – og til að byrja með var það ekki með neina aðstöðu en fékk inni í Miðgarði við Gylfaflöt. Það var svo vorið 2005 sem félagið fékk inni á Korpúlfsstöðum en sprengdi fljótlega það húsnæði af sér en fékk svo núverandi aðstöðu í Borgum við Spöngina árið 2014.

„Upphaflega tókum við fólk alls staðar að en aðsóknin var svo mikil að við urðum að gera einhverjar ráðstafanir og halda okkur við Grafarvogsbúa,“ segir Birna.

REGÍNA ÁSVALDSDÓTTIR HÁLFGERÐ GUÐMÓÐIR FÉLAGSINS

Hún bætir því við að Regína Ásvaldsdóttir, núverandi bæjarstjóri í Mosfellsbæ, sé eins konar guðmóðir Korpúlfa. „Hún var fyrsti framkvæmdastjóri Miðgarðs og hafði kynnst íbúalýðræði í Noregi. Hún stóð að því að senda út bréf til allra íbúa í Grafarvogi 67 ára og eldri og kynna stofnun félagsins.“

Theodór segir að engin félagsgjöld séu í félaginu og allt unnið meira og minna í sjálfboðavinnu. „Við erum með reikning í banka og látum bara vita ef sjóðurinn er tómur og það vantar fé. Viðbrögðin eru ávallt góð.“

Nokkrar öflugar nefndir eru starfandi í félaginu, eins og skemmtinefnd, ferðanefnd, menningarnefnd og fræðslunefnd. Þá er mjög öflugur gönguhópur sem hittist á hverjum degi og fer hann mjög stækkandi – og allt að sextíu manns sem ganga saman í nokkrum mismunandi hópum eftir vegalengdum.

ÍTALÍUFERÐ Á SUNNUDAGINN

„Hér er mjög sterk ferðanefnd sem skipuleggur þrjár til fjórar ferðir til útlanda á ári. Þess er gætt að það fari ekki fleiri en á milli fjörutíu til fimmtíu í hverja ferð. Næsta ferð er til dæmis til Ítalíu nk. sunnudag og í hana fara 47 manns,“ segir Birna.

„Það fyrirkomulag er haft við skráningar í þessar ferðir að fyrstir koma, fyrstir fá,“ bætir hún við.

Dansbandið steig á stokk á félagsfundinum í dag.

„Við erum sjálfstætt félag og ekki í Landssambandi eldri borgara. Margir félagsmenn okkar eru raunar í Landssambandi eldri borgara í gegnum önnur félög,“ segir Theodór.

Birna segir að Borgir iði af lífi í hádeginu þegar allt að 120 manns borði þar reglulega en mjög gott eldhús er á staðnum þótt maturinn sé fenginn annars staðar frá.

„Húsið er opið allan daginn og um að gera fyrir eldri borgara í Grafarvogi að líta hingað inn og njóta þess góða samfélags sem hér er að finna í Borgum á daginn.“

Skemmtilegt!

Kröftugt félag, Korpúlfarnir! - JGH

Korpúlfarnir voru stofnaðir árið 1998 eða fyrir 27 árum.

Dansbandið fór á kostum hjá Korpúlfum

Wed, 30 Apr 2025 16:28:45 GMT

STEMNING HJÁ KORPÚLFUM. Það var heldur betur stuð og stemning á félagsfundi Korpúlfa í Borgum eftir hádegi í dag þegar gamlar kempur í stuðhljómsveitinni Dansbandið stigu á stokk og tóku lagið. Þetta var síðasti almenni félagsfundurinn á vorönninni.

Þéttsetinn salurinn tók að sjálfsögðu vel undir. Þarna stóðu menn í stafni sem kunna sitt fag og eru hoknir af reynslu af hefðbundnu spiliríi á dansleikjum. Ekki laust við að andi Ragga Bjarna og Ingimars Eydals svifi yfir vötnum; Hótels Sögu- og Sjallafjör.

Hljómsveitina skipa Grímur Sigurðsson, Pálmar Ólafsson og Kristján Hermannsson og sannast sagna hafa þeir tengingu við Ragnar og Ingimar. Grímur spilaði bæði með hljómsveit Ragga Bjarna og Ingimars – raunar í þrettán ár fyrir norðan með Ingimar og því alvanur Sjallanum.

Þessir hafa greinilega áður komið fram. Frá vinstri: Grímur Sigurðsson, Pálmar Ólafsson og Kristján Hermannsson.

Hljómborðsleikarinn Pálmar Ólafsson spilaði undir um tíma hjá Ómari Ragnarssyni fyrir margt löngu og Kristján Hermannsson stóð í ströngu í Þórskaffi þegar það var og hét.

Vel til fundið hjá Korpúlfum að fá þá félaga til að létta sér lund en þess má geta að Dansbandið tók ekkert fyrir spilamennskuna heldur kom, sá og sigraði í sjálfboðavinnu. - JGH

Það hefur hreinlega mátt sjá grasið vaxa

Tue, 29 Apr 2025 16:45:37 GMT

Tíðin að undanförnu hefur verið sérlega hagstæð fyrir gróðurinn og í Grafarvogshverfinu hefur hreinlega mátt sjá grasið vaxa síðustu daga. Birkið lætur helst ekki plata sig á vorin en það hefur tekið skrefið og tekið til við að springa út.

Verkalýðsdagurinn handan við hornið og stundum er haft á orði þegar fólk flytur úr landi, t.d. vegna kreppu, að grasið þar sé grænna og þá átt við að tekjur og kjör séu þar betri. - JGH

Það hefur hreinlega mátt sjá grasið vaxa síðustu daga.

Einar Bárðarson: Margar stauratunnur ekki vargheldar og fuglinn rífur upp ruslið

Tue, 29 Apr 2025 16:23:32 GMT

Einar Bárðarson tónlistar- og markaðsmaður – og maðurinn á bak við Stóra plokkdaginn – segir að ruslið sem tínt sé upp á Stóra plokkdeginum megi allt eins rekja til fugla frekar en sóðaskapar fólks. Mörg sorpílát á staurum, svonefndar stauratunnur, séu ekki vargheldar og fuglinn rífi upp ruslið í leit að æti.

„Þá má hvetja reykingafólk og nikótínneytendur til að ganga betur um - þeir eru einu alvöru sóðarnir ennþá en þeim fer sem betur fer fækkandi,“ segir Einar í stuttu spjalli við Grafarvog.net.

Nokkrir Rótarýfélagar í Grafarvogi hófu plokkið við Stórhöfðann og plokkuðu meðfram Gullinbrúnni og niður að brúnni. Heiða Björg Hilmisdóttir borgarstjóri mætti með þeim um morguninn.

Einar var að vonum ánægður með Stóra plokkdaginn sl. sunnudag. „Hann er sá særsti til þessa og það ánægjulega við þetta átak er hvað það hefur góðan meðbyr; dagurinn vex og vex með ári hverju í næringaríkum faðmi Rótarý á Íslandi.“

Forseti Íslands hefur sýnt þessu átaki mikinn áhuga frá upphafi. Að þessu sinni komst Halla Tómasdóttir ekki þar sem hún var á leið heim frá útför páfa í Róm en eiginmaður hennar, Björn Skúlason, hljóp í skarðið.

Þá var Jón Karl Ólafsson umdæmisstjóri Rótarý á Íslandi að sjálfsögðu mættur á svæðið tilbúinn að beita plokktönginni af ákefð. En fjöldinn allur af Rótarý-félögum um land allt tók þátt í verkefninu ásamt áhugasömum plokkurum úr röðum almennings.

Það var árið 2018 sem Einar fékk hugmyndina og hann ákvað að hrinda henni í framkvæmd sama ár. Plokkdagurinn vakti strax athygli og þótt hann væri ekki stór í sniðum í upphafi þá var hann kominn á kortið, kominn til að vera.

Jón Karl Ólafsson, heiðursfélagi í Fjölni og umdæmisstjóri Rótarý á Íslandi, mætti með tínslutöngina. Stóri plokkdagurinn er unninn í samvinnu við Rótarý sem heldur utan um verkefnið ásamt Einari.

„Ég mátti til, ég hafði dáðst lengi að mönnum eins og Tomma Knúts, Tómasi J. Knútssyni, manninnum á bak við Bláa herinn, sem létu umhverfið sig varða og unnið að hreinsun umhverfisins sl. þrjátíu ár; þeir hafa verið mér og öðrum mikill innblástur í umhverfismálum. Ég vildi varpa ljósi á þeirra afrek og hvetja aðra til að koma í þetta með þeim. Margir aðrir hafa líka tekið til hendinni og við hin horft á með furðu og hugsað sem svo; „Þetta er skrítið, þarna er fólk sem tínir upp rusl eftir aðra“.“

Einar segir að rusl í umhverfi okkar komi hvað mest frá ílátum sem ekki ráða við verkefnið sitt; ílátin séu ekki nægilega þung, illa lokuð og opnist í ofsaveðrum – og þá sé margar stauratunnur ekki vargheldar og fuglinn rífi upp úr tunnunum í leit að æti.

Þess má geta að nokkrir Rótarýfélagar í Grafarvogi voru mættir upp á Stórhöfða á sunnudagsmorgun til að tína meðfram Gullinbrú og niður að brúnni. Heiða Björg Hilmisdóttir borgarstjóri mætti og tók til við að tína með þeim. - JGH

Björn Skúlason hljóp í skarðið fyrir eiginkonu sína, Höllu Tómasdóttur, forseta Íslands. Með honum á myndinni eru þau hjón Áslaug Thelma Einarsdóttir og Einar Bárðarson.

Elín Birna Bjarnfinnsdóttir, plokkari frá Eyrarbakka, plokkar á hverjum degi og er einn af öflugustu plokkurum landsins.

Sígild sorptunna - svonefnd stauratunna - sem vargfugl tínir rusl upp úr í leit að æti.

Sá rauði blaktir við hún í Hamrahverfinu - til hamingju Púlarar

Mon, 28 Apr 2025 20:02:55 GMT

Sá rauði blaktir við hún í Hamrahverfinu. Áhugi á enska boltanum hér á landi er vissulega löngu kunnur og þau félög sem eiga flesta aðdáendur eru Liverpool, Manchester United, Arsenal, Manchester City, Chelsea og Tottenham - e n auðvitað eiga öll ensku liðin sér áhangendur hér heima.

Liverpool tryggði sér enska titilinn um helgina með sigri á Tottenham og það urðu mikil læti í Bítlaborginni í kjölfarið. Þessi fáni hefur blaktað við hún í Hamrahverfinu í dag og notið sín í góða veðrinu.

Þetta er tuttugasti Englandsmeistaratitill Liverpool.

Til hamingju Púlarar.

Útför páfa í morgun

Sat, 26 Apr 2025 14:41:18 GMT

Yfir 130 þjóðarleiðtogar voru viðstaddir útför Frans páfa, sem fram fór á Péturstorginu í Róm í morgun. Sky-sjónvarpsstöðin sagði frá því að yfir 250 þúsund manns hefðu verið við útförina þegar sýnt var beint frá henni á stöðinni í morgun en athöfnin hófst klukkan átta að íslenskum tíma, en klukkan tíu í Róm.

Um heimsviðburð var að ræða og sjónvarpað var frá útförinni um allan heim - að vísu ekki á RÚV.

Smellti nokkrum myndum af skjánum þegar sjónvarpað var frá athöfninni í morgun. - JGH

Kistan var mjög látlaus að ósk Frans páfa.

Þessi er af stærri gerðinni.

Litadýrðin var mikil.

Heitt í veðri en það þarf að standa sína plikt.

Sálmaskráin.

Mikið fjölmenni var við útförina og yfir 130 þjóðarleiðtogar.

Æðsti kardínálinn, Giovanni Battista Re, 91 árs, var í aðalhlutverki og flutti minningarorðin.

Kistan komin á áfangastað - til kirkju Santa Maria Maggiorie - þar sem Frans páfi var lagður til hinstu hvílu. (Basilica di Santa Maria Maggiore).

Í skjóli skúlptúrs við Péturstorgið í Páfagarði í morgun.

Áætlað er að á milli 200 til 250 þúsund manns hafi sótt athöfnina.

Krikjuklukkur og bjölluhljómur. „Kirkjur eiga að vera heimili almennings,“ sagði alþýðumaðurinn Frans páfi.

Frans páfa minnst við athöfnina í morgun.

Góð grein í Mogga um þéttinguna í Grafarvogi eftir Kjartan Eggertsson

Sat, 26 Apr 2025 13:34:33 GMT

KJARTAN EGGERTSSON íbúi í Grafarvogi birti góðan grein í Morgunblaðinu á sumardaginn fyrsta um framgöngu borgaryfirvalda gagnvart Grafarvogsbúum. Yfirskrift greinar Kjartans er: Að breyta reglum og markmiðum í miðjum leik.

Þar segir hann að borgaryfirvöld segist gefa borgarbúum tækifæri á að segja álit sitt á gjörningum en í flestum tilfellum sé um sýndarmennsku að ræða - búið sé að ákveða hvað skuli gert og hvernig. Þetta hafi Grafarvogsbúar uppgötvað í kjölfar hugmynda um íbúðabyggingar þar sem áður áttu að vera græn svæði. Leikreglurnar séu togaðar og teygðar, en það sem verst sé er að markmiðin í leiknum séu önnur en fólk ætlaði.

Þá segir hann það skrýtið að nýr meirihluti skuli ætla að reyna að valta yfir borgarbúa með hugmyndum sínum þótt hann hafi varla umboð til þess og einungis eitt ár sé til kosninga.

Túnið fyrir neðan Gufunesstöðina - fjarskiptastöð Isavia - liggur að Rimaskólanum. Þar verða byggð fjölbýlishús með hálft bílastæði á hverja íbúð.

HÁLFT BÍLASTÆÐI Á HVERJA ÍBÚÐ Á TÚNINU

Þá segir Kjartan: „Í miðju Rimahverfi er stórt tún við hliðina á Rimaskóla, einum af fjölmennustu grunnskólum landsins. Borgaryfirvöld hafa lofað ýmsu um þetta tún, m.a. að það yrði útivistarsvæði sem lagað yrði að lýðheilsumarkmiðum og búið í haginn fyrir framtíðina. Nú á að byggja þar í andstöðu við meirihluta íbúa.

Í fyrstu áttu þar að vera háhýsi og engin bílastæði við húsin en bílastæðahús í 300 metra fjarlægð. Eftir mótmæli íbúa voru húsin lækkuð, íbúðum fækkað og bílastæði leyfð við hvert hús, en bara hálft á hverja íbúð.

Þessi hugmynd um hálfu bílastæðin byggist á einkaskoðunum tveggja valdamikilla borgarfulltrúa í skipulagsráði um bifreiðanotkun, en þeir eru á móti einkabifreiðum. Allir Grafarvogsbúar þurfa að eiga bíl og flestar fjölskyldur fleiri en einn bíl.“

BÍLAFLOTINN Í KRINGUM BÍLLAUSU BLOKKINA Í GUFUNESI

Hann segir ennfremur: „Borgin byggði heila blokk í Gufunesi þar sem eingöngu skyldu eiga heima þeir sem ekki þyrftu á bifreiðum að halda og væru tilbúnir að nota almenningssamgöngur. Þar er nú heill bílafloti kringum þessa blokk á svæðum þar sem ekki er gert ráð fyrir að bifreiðum sé lagt. En borgaryfirvöld vilja ekki læra af þeirri reynslu.“

Hann lýkur grein sinni með orðunum: „Áfram skulu borgaryfirvöld reyna að eyðileggja fyrir borgarbúum vitandi að þjóðlíf Íslendinga og velferð byggist á góðum samgöngum með einkabíl sem og nothæfum almenningssamgöngum þar sem þær eru í boði.“

Greinarhöfundur, Kjartan Eggertsson, íbúi í Grafarvogi.

HÉR MÁ LESA GREININA Í HEILD SINNI.

„ Eflaust kannast flestir við það að hafa spilað borðspil þegar upp kemur ágreiningur um reglurnar. Ýmist hafa menn ekki lesið reglurnar eða misskilið. Þá er að ná samkomulagi um túlkun þeirra þó svo erfitt geti verið því sumir eru jú bæði þrætugjarnir og skapmiklir.

Borgarbúar lifa flestir í þeirri trú að reglur samfélagsins séu sanngjarnar og skýrar og að komi upp ágreiningur í miðjum leik þá verði komist að samkomulagi sem allir geta sætt sig við.

Á síðustu tímum hafa borgarbúar mátt upplifa það að borgaryfirvöld reyni ekki einungis að breyta leikreglunum heldur einnig tilgangi leiksins og markmiði. Markmiðið átti að vera það sem talað var um fyrir kosningar en í „miðjum leik“ eru aðalmarkmiðin einhverjar kreddur einstakra borgarfulltrúa sem enginn meirihlutavilji er fyrir.

SÝNDARMENNSKA BORGARYFIRVALDA

Borgaryfirvöld segjast gefa borgarbúum tækifæri á að segja álit sitt á ýmsum gjörningum en í flestum tilfellum er um sýndarmennsku að ræða – búið er að ákveða hvað skuli gert og hvernig. Þetta hafa Grafarvogsbúar uppgötvað í kjölfar hugmynda um íbúðabyggingar þar sem áður áttu að vera græn svæði. Leikreglurnar eru togaðar og teygðar, en það sem er verst er að markmiðin í leiknum eru önnur en fólk ætlaði.

Þeir sem staðsetja sig og fjölskyldu í hverfi borgarinnar gera það með tilliti til þeirra hugmynda sem þeir hafa um fjölskyldulíf og atvinnu. Að undanförnu hafa þeir mátt þola að borgaryfirvöld ráðist inn á friðhelgi þessa fjölskyldulífs án þess að borgin hafi pólitískt umboð til þess og byggi gjörðir sínar, eins og áður sagði, alfarið á kreddum sem aldrei hafa komið til umsagnar kjósenda og enginn meirihlutavilji er fyrir. Þar má nefna breytingar á grænum svæðum, þéttingu byggðar, íbúðarhús án nægilega margra bílastæða, lokun skóla og skólahverfa, sameiningar skóla, lækkun hámarkshraða þar sem engin er þörfin, byggingu strætóstöðva nánast á miðjum umferðaræðum, byggingu húsnæðis sem lokar á allt útsýni og dregur úr birtu og byggingu íbúða við umferðaræðar þar sem hávaðamörk eru yfir leyfilegum reglum og mörkum. Allt þetta hafa borgarbúar mátt upplifa að undanförnu og þá sérstaklega Grafarvogsbúar.

TÚNIÐ VIÐ HLIÐINA Á RIMASKÓLA - HÁLFT STÆÐI Á ÍBÚÐ

Það er skrýtið að nýr meirihluti skuli ætla að reyna að valta yfir borgarbúa með hugmyndum sínum þótt hann hafi varla umboð til þess og einungis eitt ár til kosninga.

Í miðju Rimahverfi er stórt tún við hliðina á Rimaskóla, einum af fjölmennustu grunnskólum landsins. Borgaryfirvöld hafa lofað ýmsu um þetta tún, m.a. að það yrði útivistarsvæði sem lagað yrði að lýðheilsumarkmiðum og búið í haginn fyrir framtíðina. Nú á að byggja þar í andstöðu við meirihluta íbúa. Í fyrstu áttu þar að vera háhýsi og engin bílastæði við húsin en bílastæðahús í 300 metra fjarlægð. Eftir mótmæli íbúa voru húsin lækkuð, íbúðum fækkað og bílastæði leyfð við hvert hús, en bara hálft á hverja íbúð. Þessi hugmynd um hálfu bílastæðin byggist á einkaskoðunum tveggja valdamikilla borgarfulltrúa í skipulagsráði um bifreiðanotkun, en þeir eru á móti einkabifreiðum. Allir Grafarvogsbúar þurfa að eiga bíl og flestar fjölskyldur fleiri en einn bíl.

BORGARYFIRVÖLD GEGN EINKABÍLNUM

Grafarvogur er byggður upp með það fyrir augum að samgöngur séu góðar – að þeir sem ekki nota bíla geti tekið strætó hvert sem er og þær fjölskyldur sem það vilja geti átt bíl og það fleiri en einn og tvo. Borgaryfirvöld hafa hins vegar tekið þá stefnu að skemma og tefja fyrir akstri bifreiða um hverfið, inn og út úr því, og nú á að selja fólki íbúðir án bifreiðastæða. Samt vita borgaryfirvöld að enginn sem bílastæðalausa íbúð kaupir mun spyrja um það hvort hann megi eiga bíl, einn eða fleiri, og mun leggja honum hvar sem það er hægt, jafnvel inni í garði hjá næsta manni.

BÍLLAUSA BLOKKIN Í GUFUNESI

Borgin byggði heila blokk í Gufunesi þar sem eingöngu skyldu eiga heima þeir sem ekki þyrftu á bifreiðum að halda og væru tilbúnir að nota almenningssamgöngur. Þar er nú heill bílafloti kringum þessa blokk á svæðum þar sem ekki er gert ráð fyrir að bifreiðum sé lagt. En borgaryfirvöld vilja ekki læra af þeirri reynslu.

Áfram skulu þau reyna að eyðileggja fyrir borgarbúum vitandi að þjóðlíf Íslendinga og velferð byggist á góðum samgöngum með einkabíl sem og nothæfum almenningssamgöngum þar sem þær eru í boði.“ - Kjartan Eggertsson, íbúi í Grafarvogi.

Gleðilegt sumar kæru Grafarvogsbúar - og takk aftur fyrir frábærar viðtökur

Thu, 24 Apr 2025 17:29:55 GMT

GLEÐILEGT SUMAR kæru Grafarvogsbúar og landsmenn allir. Fallegt veður í dag og vonandi er það forspil að góðu veðri í sumar.

Það er ekki oft sem sumardagurinn fyrsti flaggar hitatölu upp á 15 stig líkt og í dag - oftar en ekki hafa húfur og eyrnabönd sett svip sinn á sumarkomuna á Íslandi.

Og takk enn og aftur Grafarvogsbúar fyrir þær frábæru viðtökur sem vefurinn hefur fengið frá því hann fór í loftið en þrettán þúsund hafa farið inn á hann að jafnaði á viku.

Bestu þakkir!

Það er ekki oft sem sumardagurinn fyrsti býður upp á svona hitakort - 15 stiga hiti í dag.

Skátastarfið í Grafarvogi gróskumikið og sumarnámskeiðin komin í sölu

Thu, 24 Apr 2025 16:57:43 GMT

Róbert Örn Albertsson , skátahöfðingi í skátafélagi okkar Grafarvogsbúa og Grafhyltinga, Vogabúum, sem er með aðsetur í Logafoldinni, segir að skátastarfið í Grafarvogi sé gróskumikið og skemmtilegt.

Vogabúar stóðu að sumarhátíðinni við Rimaskóla í dag og geta heldur betur verið sáttir við daginn því mörg hundruð Grafarvogsbúar lögðu leið sína til þeirra og fögnuðu sumdardeginum fyrsta.

Það er líka fyllsta ástæða hjá okkur Grafarvogsbúum að þakka skátunum fyrir að standa svona vel að þessu. Hoppukastali, leiktæki, varðeldur, pylsur, sykurpúðar, kók og prins, sirkusatriði frá Sirkus Íslands og hljómsveitin Dóra & Döðlurnar.

Róbert Örn hefur verið skátahöfðingi í félaginu í nokkur ár og segir gaman að fylgjast með krökkunum vaxa úr grasi og vera með þeim í skátastarfinu.

FLEIRI HUNDRUÐ KRAKKAR Á SUMARNÁMSKEIÐUM SKÁTANNA

Hann segir að sumarnámskeiðin séu að fara í gang og komin í sölu. „Þessi námskeið okkar eru mjög vinsæl og fleiri hundruð krakkar sem koma á þau og hafa gaman.“

Meðfylgjandi mynd er af Róberti Erni í pylsutjaldinu en löng röð var eftir þessum þjóðarrétti okkar Íslendinga og ófáar pylsurnar sem fóru í pottana. Við hlið Róberts er Ester Kristjánsdóttir. Veruleg vinna auðvitað við að halda pylsunum heitum, svo allir verði sáttir.

Alls stóðu tíu skátar vaktina við Rimaskóla í dag og höfðu svo sannarlega í nógu að snúast. Mjög vel að þessu staðið hjá skátunum. Takk með stóru téi.

Stöngin inn hjá þeim, eins og sagt er í boltanum! - JGH

Dóra & Döðlurnar slógu taktinn og sendu góða tóna inn í sumarið

Thu, 24 Apr 2025 16:09:46 GMT

DÓRA & DÖÐLURNAR. Þær voru heldur betur í sumarskapi stúlkurnar í Grafarvogshljómsveitinni Dóra & Döðlurnar þegar þær slógu taktinn og sendu góða tóna inn í sumarið á sumarhátíð skátanna við Rimaskóla.

Þær stigu á stokk við mikinn fögnuð fjölda Grafarvogsbúa og sögðu að vonandi héldist góða veðrið svona áfram í sumar. Sumarið væri tíminn til að fara í bústaðinn, ferðast og jafnvel væri hægt að fara í sólbað í svona veðri.

Þær sögðust ætla að taka fjögur lög og ef fólk hefði áhuga á að hlusta á lögin aftur þá væri þau að finna á Spotify. Þær sungu um ástina í sínu fyrsta lagi og orðuðu það svo að ástin gæti oft verið erfið en engin gæti samt án hennar verið.

En hvar er Dóra? „Hún er hætt í hljómsveitinni en við ákváðum að breyta ekki nafninu.“

Dóra & Döðlurnar. Þeim var vel fagnað þegar þær stigu á stokk. Frá vinstri: Helga Sigríður Kolbeinsdóttir, hljómborð, Hekla Sif Sævaldsdóttir, trommur, Bára Katrín Jóhannsdóttir, gítar og Guðrún Ýr Guðmundsdóttir, gítar. Engin Dóra - hún er hætt í hljómsveitinni.

Fjöldi Grafarvogsbúa fagnaði sumardeginum fyrsta hjá skátunum við Rimaskóla

Thu, 24 Apr 2025 15:38:16 GMT

SUMARDEGINUM FYRSTA FAGNAÐ . Það var svo sannarlega líf og fjör þegar fjöldi Grafarvogsbúa fagnaði sumardeginum fyrsta á stórglæsilegri hátíð skátanna við Rimaskóla eftir hádegi í dag. Það var skátafélag okkar Grafarvogsbúa og Grafhyltinga, Vogabúar, sem sá um hátíðina. Vel gert hjá þeim.

Þegar Grafarvogur.net leit við var stúlknahljómsveitin Dóra & Döðlurnar á stíga á stokk og taka lagið. Þær sögðu að fyrsta lagið yrði um ástina og hversu erfið hún gæti verið en enginn gæti samt án verið. Frumsamið lag sem hægt er finna á Spotify.

Löng biðröð var í hoppukastalann. 

Skátarnir sögðu í kynningu á hátíðinni að þeir hefðu óskað eftir góðu veðri og þeim varð svo sannarlega að ósk sinni því sól skein í heiði og 15 stiga hiti, hvað verður það betra, svo notað sé orðalag skátanna.

Það er ekki oft sem svona hitatölur sjást á þessum degi þegar sumarkomunni er fagnað.

Löng biðröð var í hoppukastalann á svæðinu og hún var enn lengri í pylsurnar - og auðvitað fylgdi kók og prins póló með. Rammíslenskt fæði á útiskemmtunum, að sjálfsögðu!

Hoppukastali, rennibraut, leiktæki, varðeldur, pylsur, sykurpúðar, kók og prins, sirkusatriði frá Sirkus Íslands og hljómsveitin Dóra og Döðlurnar.

Stöngin inn hjá skátunum!

Róbert Örn Albertsson, skátahöfðingi Vogabúa, hafði í nógu að snúast í pylsunum enda löng biðröð í þennan þjóðarrétt Íslendinga á sumardeginum fyrsta. Við hlið hans stendur Ester Kristjánsdóttir.

Varðeldur og sykurpúðar. Tvenna sem getur ekki klikkað.

Erlendur Kristjánsson stóð vaktina við hoppukastalann - og hafði í nógu að snúast.

Stúlknahljómsveitin Dóra & Döðlurnar. Frá vinstri: Helga Sigríður Kolbeinsdóttir, hljómborð, Hekla Sif Sævaldsdóttir, trommur, Bára Katrín Jóhannsdóttir, gítar og Guðrún Ýr Guðmundsdóttir, gítar. En hvar er Dóra? Hún er hætt í hljómsveitinni, var svarið.

Hér er verið að búa til „candy floss“ - sælgætisþráð. Vélin snýr sykrinum í ljúffengt sælgæti; stóra hnoðra.

Um 50 þúsund heimili með Símann Premium - fréttastofa er ekki í deiglunni

Wed, 23 Apr 2025 16:20:20 GMT

María Björk Einarsdóttir, forstjóri Símans , segir að Síminn hagnist á sjónvarpsrekstri sínum og núna séu um 50 þúsund heimili í landinu með Símann Premium og ekki standi til að fara inn á hinn hefðbundna fjölmiðlamarkað og setja upp fréttastofu. Núna er sjónvarp Símans stærsta efnisveita sjónvarpsefnis á landinu..

María Björk er í nýjasta hlaðvarpsþætti okkar Sigurðar Más Jónssonar, HLUTHAFASPJALLINU , á Brotkast.is en rekstur Símans gengur vel og hefur gengi bréfa í félaginu hækkað um 37% síðustu tólf mánuðina. María Björk var ráðinn forstjóri Símans í júní á síðasta ári en hún var áður fjármálastjóri Eimskips.

Sjónvarpsrekstur Símans gengur vel og yfirbyggingin er mjög lítil, að sögn Maríu Bjarkar Einarsdóttur, forstjóra Símans, sem segir ennfremur að ekki standi til að fara inn á hinn hefðbundna fjölmiðlamarkað með fréttastofu þegar hún er innt eftir því.

„Það hefur ekki komið til tals,“ segir hún og leggur áherslu á að sjónvarpsrekstur Símans hafi verið byggður upp með mjög lítilli yfirbyggingu og kappkostað hafi verið að fjárfesta frekar í góðu efni til að sýna áskrifendum en að binda fé í tólum, tækjum og stúdíóum fremur en að framleiða sjálft sjónvarpsefnið.

„Við látum þá sem eru bestir í að framleiða sjónvarpsefni um þá hlið mála, það hefur gefist okkur vel.“

Síminn hættir með Enska boltann í haust og segir María að þótt um sé að ræða vinsælt og mjög gott sjónvarpsefni þá sé það engu að síður dýrt efni og skaðleg áhrif þessara breytinga á reksturinn verði ekki mikill, að hennar mati.

Hér fylgir klippan þar sem hún er spurð út í það hvort Síminn ætli að færa út kvíarnar í hefðbundnum fjölmiðlum.

Frýs saman vetur og sumar? Vonandi!

Wed, 23 Apr 2025 11:40:12 GMT

Ýmis þjóðtrú fylgir sumarkomunni og ein er sú að ef frýs saman vetur og sumar þá verði sumarið gott. Fyrrum létu búkonur út skel með vatni aðfaranótt sumardagsins fyrsta og ef frosið var í skelinni að morgni þótti það vita á gott sumar.

Samkvæmt veðurspánni sýnist það á mörkunum að það frjósi saman. Hiti um miðnætti í kvöld og næstu nótt verður í kringum frostmarkið. Hins vegar mun örugglega falla á líkt og undanfarna daga í borginni.

Nú er bara að setja djúpan disk með vatni út í kvöld og sjá hvort frosið verði í honum í fyrramálið.

Annars var þetta sannast sagna frekar mildur vetur og frekar snjóléttur. Helst að það kyngdi niður í byrjun þorrans en snjóþyngslin stóðu stutt yfir. - JGH

Skátarnir með hátíð við Rimaskóla á morgun. Sykurpúðar, sirkus og Döðlurnar

Wed, 23 Apr 2025 10:51:47 GMT

SUMARDAGURINN FYRSTI Á MORGUN. Skátarnir veriða með hátíð við Rimaskóla á morgun, sumardaginn fyrsta, og hefst skemmtunin kl. 13:00 og stendur til 16:00. Það er skátafélagið Vogbúar, skátar í Grafarvogi og Grafarholti, sem stendur að skemmtuninni í samstarfi við Reykjavíkurborg og verður margt í boði.

Í frétt frá skátunum segir: „Við hjá Vogabúum erum búin að óska eftir góða veðrinu og verðum með hoppukastala, leiktæki, varðeld, pulsur (já pulsur!) og sykurpúða, sirkusatriði frá Sirkus Íslands og svo stíga Döðlurnar á svið með tónlistaratriði, hvað verður það betra!

Dagskrá:

- Svæðið opnar kl 13.00
- Döðlurnar stíga á svið kl 14.00
- Sirkus Íslands stíga á stokk kl 15.00
- Veitingasala opin milli 13 og 16.00 ásamt leiktækjum og köstulum.“

Öflugt hjá skátunum og nú er bara að mæta við Rimaskólann á morgun. - JGH

Hér kemur síðan frá Íbúasamtökunum - og við mótmælum öll á næstu dögum!

Wed, 23 Apr 2025 10:11:23 GMT

Smellið hér: OKKAR GRAFARVOGUR.COM

Hér kemur hún síðan sem beðið hefur verið eftir í allan dag og er hreint út sagt stórkostlega vel unnin af nokkrum Grafarvogsbúum í frístundum sínum. Það er fyllsta ástæða til að hæla gerð þessarar síðu. Öll sem einn á næstu dögum; við mótmælum!

https://okkargrafarvogur.com Smellið hér:

Áfram Grafarvogur! Áfram Ísland! - JGH

Stefnum á vel yfir þúsund athugasemdir. Tæknilegar leiðbeiningar koma í dag

Wed, 23 Apr 2025 10:02:13 GMT

„ Núna verðum við að standa saman öll sem einn og mótmæla ,“ sagði Elísabet Gísladóttir, formaður Íbúasamtaka Grafarvogs, í samtali við Grafarvog.net í morgun.

GRAFARVOGUR.NET mun birta leiðbeiningarnar um leið og þær berast.

„Þessar tæknilegu leiðbeiningar koma seinni partinn í dag; þær eru hálfgert skapalón til að auðvelda öllum að senda inn athugasemdir i gáttina,“ segir Elísabet.

„Við Grafarvogsbúar þurfum að láta finna vel fyrir okkur í þessu máli og markmiðið er að íbúar í Grafarvogi sendi vel yfir eitt þúsund athugasemdir inn í gáttina að þessu sinni. Það tekst ef við brettum núna upp ermarnar og sýnum hug okkar í verki með því að senda inn athugasemdir.“

SKÝR SKILABOÐ Á FUNDI MEÐ BORGARSTJÓRA

Elísabet og þrír aðrir fulltrúar Íbúasamtakanna fengu eftir ítrekaðar tilraunir fund með borgarstjóra skömmu fyrir dymbilvikuna. Borgarstjóri mætti á fundinn ásamt fríðu föruneyti en þar var einnig Dóra Björt Guðjónsdóttir, oddviti Pírata og formaður skipulagsráðs, ásamt nokkrum starfsmönnum borgarinnar á skipulagssviði.

„Skilaboð Íbúasamtakana til borgarstjóra voru mjög skýr: borginni ber að hætta að fullu við öll áform um þéttingu byggðar í Grafarvogi ,“ segir Elísabet.

„Rökin fyrir því eru sú að borgin er rúin trausti í skipulagsmálum og flestir íbúar í Grafarvogi treysta borginni einfaldlega ekki. Íbúar hafa fært sannfærandi rök gegn þéttingunni og þegar sent inn fjölda athugasemda við áformin.

Við náðum hátt í þúsund athugasemdum síðast og núna stöndum við saman öll sem einn og gerum enn betur. Það ættu allir að geta nýtt sér þær tæknilegur leiðbeiningar sem koma síðar í dag,“ segir Elísabet. - JGH

Grafarvogsfundurinn og þjóðfundurinn 1851: Vér mótmælum allir! Hreinn yfirgangur

Tue, 22 Apr 2025 21:26:31 GMT

VÉR MÓTMÆLUM ALLIR! Gera má ráð fyrir áframhaldandi hrinu mótmæla hjá Grafarvogsbúum næstu þrettán daganna vegna þéttingar byggðar í hverfinu en frestur til að mótmæla og gera athugasemdir við breytt aðalskipulag var framlengdur frá 10. apríl til mánudagsins 5. maí nk.

Borgin er raunar þegar byrjuð að úthluta lóðunum sem Grafarvogsbúar mótmæla að byggt verði á og túlka flestir íbúa það sem hreinan yfirgang og vanvirðingu enda málið enn í ferli. Engu að síður ætla íbúar ekki að láta deigan síga heldur mótmæla áfram þéttingunni formlega.

HREINN YFIRGANGUR

Þegar horft er til hins umtalaða fundar íbúa Grafarvogs með embættismönnum borgarinnar hinn 20. mars sl. í Borgum í Spönginni þar sem allt fór í háaloft og íbúar mótmæltu fyrirhugaðri þéttingu kröftuglega kemur þjóðfundurinn 1851 óneitanlega upp í hugann þótt sá fundur hafi að vísu snúist um sjálfstæðisbaráttu Íslendinga - en líka fyrirkomulag þess fundar þar sem um hreinan yfirgang var að ræða og menn máttu ekki tjá sig.

Trampe greifi gaf sig ekki en það gerði hins vegar fundarstjórinn á Grafarvogsfundinum eftir mikið japl, jaml og fuður.

Á Grafarvogsfundinum 20. mars var það fyrirkomulag sett upp af hálfu embættismanna borgarinnar að Grafarvogsbúar mættu ekki spyrja um og mótmæla tillögunum fyrir fullum sal heldur var uppleggið að embættismenn yrðu með kynningu og fundarmenn fengju aðeins að spyrja og ræða málin við embættismenn og arkitekta eftir aðalkynninguna og þá fyrir framan fjóra skjái sem höfðu verið settir upp í troðfullum salnum.

Grafarvogsfundurinn 2025 - hinn 20. mars sl. og átti það sameiginlegt með þjóðfundinum 1851 að um hreinan yfirgang var að ræða. Enda mótmæltu fundarmenn einum rómi fyrirkomulagi fundarins og þéttingu byggðar.

VIÐ MÓTMÆLUM ÖLL

Grafarvogsfundurinn leystist upp í hörð mótmæli vegna þessa fyrirkomulags og úr varð að allur salurinn (nema þrír) mótmælti fyrirkomulagi fundarins og þeim tillögum sem þar voru kynntar. „Við erum komin hingað til að mótmæla öllum þessum tillögum, við höfnum þeim öllum,“ var haft á orði.

Vegna kröftugra mótmæla á fundinum og mikils þrýstings fengu nokkrir fundarmenn engu að síður orðið - og var mikill samhljómur hjá þeim með fundarmönnum um að mótmæla og að borgin hyrfi frá áformum sínum.

ÞJÓÐFUNDURINN 1851

Þjóðfundurinn 1851 í Lærða skólanum í Reykjavík hófst 5. júlí en lauk 9. ágúst það ár með snörpum hætti. Til umræðu var lagafrumvarp dönsku stjórnarinnar sem fól í sér að Ísland yrði innlimað í Danmörku, landið hefði sömu lög og reglur og Danmörk, Alþingi yrði amtráð, en Íslendingar fengju sex fulltrúa á danska þinginu. ( Fréttin hefur verið uppfærð með dagsetningum þjóðfundarins .)

Trampe greifi, sem var danskur embættismaður og stiftamtmaður á Íslandi frá 1850 til 1860, sá fram á að þjóðkjörnu fulltrúarnir myndu fella stjórnarfrumvarpið og sleit því fundinum strax, áður en til atkvæðagreiðslu kæmi. Mótmælti Jón Sigurðsson þá í nafni konungs og þjóðarinnar því ranglæti sem haft væri í frammi.

Málverk eftir Gunnlaug Blöndal af þjóðfundinum 1851 í Lærða skólanum.

VÉR MÓTMÆLUM ALLIR

Trampe : „Og lýsi ég því yfir, í nafni konungs...“

Jón Sigurðsson greip þá fram í: „Má ég biðja mér hljóðs, til að forsvara aðgerðir nefndarinnar og þingsins?“

Páll Melsteð: „Nei.“

Trampe: „...að fundinum er slitið“.

Jón: „Þá mótmæli ég þessari aðferð...“

Um leið og Trampe og Páll Melsteð þingforseti viku frá sætum sínum, mælti Trampe: „Ég vona, að þingmenn hafi heyrt, að ég hef slitið fundinum í nafni konungs.“

Jón: „Og ég mótmæli í nafni konungs og þjóðarinnar þessari aðferð, og ég áskil þinginu rétt til þess að klaga til konungs vors yfir lögleysu þeirri, sem hér er höfð í frammi.“

Þá risu þingmenn upp og mæltu nálega í einu hljóði: „VÉR MÓTMÆLUM ALLIR.“

Þannig lauk þjóðfundinum.

Meðfylgjandi málverk af þjóðfundinum er eftir Gunnlaug Blöndal og var það fullklárað afhent Alþingi árið 1956 og hengt upp í anddyri Alþingis . - JGH

Síminn gerir sig gildandi í fjártækni með Noona og kreditkorti Símans Pay

Tue, 22 Apr 2025 16:38:58 GMT

Síminn er alltaf að bæta við sig fleiri tekjulínum og hefur gert sig gildandi í fjártækni. Þetta kemur fram í nýjasta hlaðvarpsþætti okkar Sigurðar Más Jónssonar á Brotkast.is, HLUTHAFASPJALLINU , þar sem við ræðum við Maríu Björk Einarsdóttur, forstjóra Símans.

Fjártækni sem tekjusvið hjá Símanum byggist á því að fólk pantar alls kyns þjónustu í gegnum snjallsíma og greiðir fyrir með símanum sínum. Hvers vegna þá ekki að taka skrefið inn á svið fjártækninnar og nýta sér sterkt greiðslukerfi vegna fjölda viðskiptavina fyrirtækisins.

Það er snjalltæknin og væntanlega frekari framþróun í gervigreind sem opnar á alls kyns möguleika á nýjum sviðum.

Þess vegna keypti Síminn hið vinsæla smáforrit Noona á síðasta ári og hugmyndafræðin er sú sama á bak við kreditkort Símans Pay en um tíu þúsund manns eru núna með Léttkort Pay.

Könglar á stangli

Tue, 22 Apr 2025 16:38:21 GMT

Það er krökkt af stönglum á stangli í trjálundinum fyrir neðan leikskólann Funaborg við Funfold; skammt frá brúnni sjálfri; Gullinbrú. Við segjum á stangli - á víð og drefi - en stönglarnir liggja þarna í hrúgum undir barrtrjánum.

Það var iðandi mannlíf á stígnum í kringum voginn í gær og allir að viðra sig á öðrum degi páska. Þessi lundur hefur verið þarna frá því á níunda áratugnum þegar Grafarvogurinn hóf að byggjast upp - eða frá því að elstu Grafarvogsbúar muna eftir - og hefur dafnað vel.

Fallegt er þarna og þessi lundur setur svo sannarlega góðan svip á byggðina þegar ekið er yfir brúna. Vonandi að nýju borgarstýrurnar láti þennan reit í friði - svo herskáar sem þær eru í þéttingunni.

Grafarvogsbúar kunna hins vegar vel að meta hin grænu svæði, sem og göngu- og hjólastígana sem víða liggja, og sem nú er sótt að í nafni þéttingar. - JGH

Vinsæll hjóla- og göngustígur liggur í genum lundinn fyrir neðan Funaborg.

Könglar á stangli - á víð og dreif. Þeir eru þarna úti um allt í hrúgum undir barrtrjánum.

Logi er labrador

Mon, 21 Apr 2025 21:05:15 GMT

Það var gaman að rekast á hana Vilborgu Halldórsdóttur á göngu með hundinn sinn Loga síðdegis í dag, annan í páskum, á hinum fallega stíg fyrir ofan sjóinn í Hamrahverfinu; gegnt Bryggjuhverfinu.

Fyrir þá sem vilja vita meira um ættfræði og ræktun hunda þá er Logi svonefndur lindár labrador.

Sterkur og fallegur hundur - þriggja ára Grafarvogsbúi sem býr í Hamrahverfinu.

En hverjir eru kostirnir við labrador hunda? „Kostirnir eru einstakt geðslag,“ segir Vilborg. „Labradorinn er góður og vænn fjölskylduhundur, hlýðinn og meðfærilegur. Þú finnur ekki rólegra dýr.“

- Ekki svo rólegur að hann sé með nein letiköst?

„Nei, hann er alltaf til í að hreyfa sig. Við förum með hann út að ganga tvisvar á dag. Leggjum áherslu á að hann fái að minnsta kosti alltaf eina langa og góða gönguferð á hverjum degi; stundum förum við hringinn í kringum voginn eða út á Geirsnef sem er sleppisvæði. Það hjálpar líka upp á hreyfiþörfina hjá honum að við erum með stóran garð þar sem hann getur valsað um.“

Logi er sterkur, 46 kíló og með mikinn togkraft. „Hann getur alveg tekið í karlinn,“ segir Vilborg brosandi.

Skemmtilegt rabb á röltinu. - JGH

Vilborg með hundinn Loga sem er af tegundinni labrador. „Kostirnir eru einstaklega gott geðslag,“ segir Vilborg.

Logi var bara svolítið upp með sér að vera myndaður. Búinn að vappa í kringum eigendur sína bróðurpart dagsins þar sem þeir voru í garðvinnu.

Biskup Íslands, Guðrún Karls Helgudóttir, minnist Frans páfa

Mon, 21 Apr 2025 16:59:30 GMT

Margir hafa minnst Frans páfa í dag en hann lést í morgun kl. 7:35, á annan í páskum, degi eftir að hann kom fram á Péturstorginu í Róm með páskablessun sína. Hann var 88 ára að aldri.

Biskup Íslands og fyrrverandi sóknarprestur í Grafarvogi, Guðrún Karls Helgudóttir, minnist hans meðal annars á FB-síðu biskups með þessum orðum:

„Með sorg og þakklæti í hjarta minnist ég Frans páfa á öðrum degi páska og syrgi með okkar kaþólsku systkinum á Íslandi og um heim allan. Frans páfi var einlægur og sannur leiðtogi sem sá heiminn með augum okkar minnstu systkina. Hann var leiðtogi einingar, samtals og þjónustu.

Hann lagði mikið af mörkum þegar kom að samtali Lúthersku og Kaþólsku kirkjunnar sem kristallaðist í fundum kirkjuleiðtoganna í Svíþjóð á 500 ára afmæli siðbótarinnar. Þetta leiddi af sér samstarf um hjálparstarf og þróunaraðstoð.

Hann lyfti, með sýnilegum hætti, upp þeim sem minnst mega sín í samfélagi fólks, lét sig varða sköpunina alla og hamfarahlýnun með áþreifanlegum hætti.

Megi minning þessa einstaka páfa lifa og arfleifð hans hafa áhrif um ókomna tíð.

Bæn: „ Guð, í dag minnumst við Frans páfa með þakklæti. Við þökkum umhyggju hans fyrir fólki, sköpuninni og öllu lífi. Við biðjum fyrir Kaþólskum systkinum okkar um allan heim sem nú syrgja leiðtoga sinn.Lát þitt eilífa ljós lýsa honum. Amen.“

Jorge Mario Bergoglio, Frans páfi, fæddist 17. desember 1936 í Buenos Aires. Hann þótti umbóttasinnaður páfi og fyrsti páfinn frá Suður-Ameríku.

„Kæru bræður og systur, með djúpri sorg verð ég að tilkynna andlát okkar heilaga föður Frans,“ sagði Kevin Farrell kardínáli í Páfagarði í tilkynningu í morgun.

„Klukkan 7:35 í morgun sneri biskupinn í Róm, Frans, aftur til húss föðurins. Allt líf hans var helgað þjónustu Drottins og kirkju hans. Hann kenndi okkur að lifa eftir gildum fagnaðarerindisins af trúmennsku, hugrekki og alhliða kærleika, sérstaklega í þágu hinna fátækustu og mest jaðarsettu.“

ÍTALSKIR FORELDRAR SEM FLÚÐU MUSSOLINI

Frans páfi var skírður Jorge Mario Bergoglio. Hann fæddist 17. desember 1936 í Buenos Aires, höfuðborg Argentínu, elstur af fimm börnum Mario Bergoglio endurskoðanda og Reginu Sivori. Foreldrar hans voru ítalskir innflytjendur sem flúðu fasistastjórn Benito Mussolinis.

Bergoglio var kjörinn páfi 13. mars 2013 eftir að Benedikt páfi sextándi hafði tilkynnt um afsögn sína 11. febrúar það ár vegna veikinda en hann var fyrsti páfinn í sex hundruð ár til að segja af sér í embætti.

Benedikt páfi var kjörinn páfi árið 2005, sautján dögum eftir andlát Jóhannesar Páls II páfa sem var kjörinn páfi árið 1978 þá aðeins 58 ára að aldri. - JGH

Hvaða málshátt fékkst þú? Málshættir létta lund í veislunum

Mon, 21 Apr 2025 15:56:52 GMT

Það er alltaf ákveðin eftirvænting eftir málshættinum þegar páskaegg er brotið og innihaldið kannað. Eftir að litlu páskaeggin komu til sögunnar - og hvert með sínum málshætti - hafa þau orðið vinsæl í veislum.

Í páskaveislu gærdagsins hjá undirrituðum, þar sem stórfjölskyldan kom saman í hið hefðbundna páskalamb páskadagsins, var boðið upp á lítil páskaegg eftir steikina og fyrir ísinn.

Súkkulaðið gott en svo var hringurinn tekinn þar sem hver og einn las sinn málshátt, hver öðrum betri. Fjórir fengu að vísu sama málsháttinn; Eigi fellur tré við hið fyrsta högg.

Ég mátti til og smellti mynd af málsháttunum.

Þeir koma hér:

1) Margur á bágan dag en blítt kvöld.

2) Fénast farandi, sveltur sitjandi.

3) Annars byrði er öðrum létt.

4) Enginn kennir það öðrum, er ei kann sjálfur.

5) Enginn skyldi einn í sorgum sitja.

6) Nær ein aldra rís, þá önnur er vís.

7) Eigi fellur tré við hið fyrsta högg.

8) Snemma beygist krókurinn til þess sem verða vill.

9) Sjaldséðir eru hvítir hrafnar.

10) Ekki er allt gull sem glóir (né flot sem flóir).

11) Gott er góðum að þjóna.

12) Alvara og gaman eiga illa saman.

13) Sá gefur tvisvar sem gefur fljótt.

14) Háð er heimskra gaman.

15) Náið er nef augum.

- JGH

Gleðilega páska!

Sun, 20 Apr 2025 13:15:03 GMT

Grafarvogur.net óskar lesendum sínum gleðilegra páska og áréttar þakklæti sitt fyrir frábærar viðtökur frá því vefurinn fór í loftið.

Á föstudeginum langa minnast kristnir menn krossfestingar Jesú Krists en á páskadegi upprisu hans. Jesús var handtekinn og krossfestur á síðasta föstudegi fyrir páska en Gyðingar héldu páskahátíð löngu fyrir fæðingu frelsarans.

Á vísindavef Háskóla Íslands svarar Hjalti Hugason , fyrrum prófessor við guðfræðideild Háskóla Íslands, spurningu um páskahátíð kristinna manna fyrst páskar voru haldnir hátíðlega fyrir daga Krists.

Lítum hér á brot úr svari Hjalta: „Vissulega var páskahátíðin hátíð Ísraela og Gyðinga löngu fyrir daga Krists. Á henni minntust Ísraelsmenn hinir fornu og síðar Gyðingar frelsunar forfeðra sinna úr ánauðinni í Egyptalandi eins og lesa má um í Annarri Mósebók í Gamla testamentinu.

Það er þó ekki að ástæðulausu að páskarnir urðu frá upphafi helsta hátíð kristinna manna og héldu þeirri stöðu langt fram eftir öldum eða þar til jólin tóku að keppa við þá um vinsældir.

HANDTAKAN, PYNTINGIN, AFTAKAN OG UPPRISAN

Ástæða þessa er sú að mikilvægustu þættina í verki Krists bar einmitt upp á páskahátíð Gyðinga. Er þar átt við handtöku, pyntingar, aftöku og uppstigningu Krists sem lesa má um í lokaköflum allra guðspjalla Nýja testamentsins. Ein ástæðan fyrir því að kristnir menn gerðu páskahátíðina að sinni er því þessi tímasetning.“

Ennfremur: „Páskar Gyðinga eru svokölluð föst hátíð sem alltaf er haldin á sérstökum mánaðardegi samkvæmt tímatali Gyðinga.

Á biblíuslóðum: Myndir frá Getsemane-garðinum þar sem Jesús var handtekinn

Fri, 18 Apr 2025 22:12:48 GMT

GETSEMANE-GARÐURINN. Föstudagurinn langi er síðasti föstudagurinn fyrir páska og þá minnast kristnir menn krossfestingar Jesú Krists. Passíusálmar Hallgríms Péturssonar, sem eru um píslarsöguna, pínu og dauða Jesú Krists, hafa um árabil verið lesnir upp í nokkrum kirkjum landsins á þessum degi sem er mesti sorgardagur kirkjuársins.

Árið 2019 framleiddi ég heimildarmyndina Á biblíuslóðum þar sem ég dvaldi í Ísrael í fimm daga í mars það ár og ferðaðist um landið og sankaði að mér efni. Meðfylgjandi eru nokkrar myndir frá Getsemane-garðinum og Ólífufjallinu. Myndin var síðan sýnd á sjónvarpsstöðinni Hringbraut um jólin það ár.

Eftir síðustu kvöldmáltíðina fóru Jesús og lærisveinar hans yfir Kidron-dalinn í aldingarðinn Getsemane undir vesturhlíð Ólífufjallsins. Þetta er aldingarður af fornum ólífutrjám.

Jesús eyddi síðustu stundum lífs síns með postulunum í Getsemane-garðinum. Þar upplifði hann angist sína og bjó sig undir það sem koma hlaut en hann vissi hvað var í vændum. Og það var í þessum garði þar sem hann var handtekinn.

Heimildir herma að Júdas hafi hengt sig í þessum garði fullur iðrunnar eftir að hafa svikið Jesú.

Nafnið Getsemane þýðir „ólífupressa“. - JGH

Í þessum garði eyddi Jesús síðustu stundum sínum í angist og hér var hann handtekinn.

Til eru frásagnir af því að Jesús og postularnir hafi oft lagt leið sína í Getsemane-garðinn.

Nafnið Getsemane þýðir „ólífupressa“. Í miðjum aldingarðinum var tæki sem notað var til að kreista ólífurnar þar til þær gáfu dýrmætu olíuna. Grunnur ólífupressunnar er risastór steinskál. Gífurlegur myllusteinn passar í þá skál.

Hér er horft af Ólífufjallinu yfir Jerúsalem. Ólífufjallið er einn vinsælasti útsýnisstaðurinn í borginni.

Hér er horft í átt í Ólífufjallsins frá Davíðssafninu.

Við hliðina á Getsemane-garðinum er afar falleg kirkja sem ýmist er nefnd Kirkja allra þjóða eða Kirkja angistarinnar. Hér er altaristaflan í þeirri mögnuðu kirkju.

Lögregluaðgerð við ljósin á Gullinbrú og Fjallkonuvegi

Thu, 17 Apr 2025 18:19:18 GMT

Mikil lögregluaðgerð að því er virtist var við ljósin á gatnamótum Gullinbrúar og Fjallkonuvegar skömmu fyrir klukkan átján áðan. Þarna var einn merktur lögreglubíll og tveir ómerktir en þó með blikkandi ljós og ekki annað að sjá en leitað væri í einkabíl við ljósin. Ekki er vitað hvað þarna var um að vera en eðlilega vakti þetta mikla athygli vegfarenda. - JGH

Bátur mátar sig við kirkjuna - smá myndadans í kringum kirkjuna í Stykkishólmi

Wed, 16 Apr 2025 22:21:05 GMT

Grafarvogur.net var á ferð í Stykkishólmi í dag. Það var kaldara þar og meiri blástur en í borginni. En Stykkishólmur er með fallegustu bæjarstæðum landsins og kirkjan þar tilkomumikið kennileiti líkt og í mörgum bæjarfélögum.

Kirkjan var vígð 1990 og sést víða að. Hér kemur smá myndadans af henni frá nokkrum sjónarhornum og ekki laust við að báturinn í víkinni máti sig við guðshúsið - nema það sé hið gagnstæða.

Hólmurinn er svo sannarlega fallegur - og býður upp í dans. - JGH

Horft yfir víkina - sem ku heita Maðkavík - yfir til hinnar fögru Stykkishólmskirkju.

Bátar í vör og feðgar á spjalli.

Tilkomumikil er hún og turninn tignarlegur.

Hæstiréttur og Alþingi við útgerðirnar: Þið eigið að eignfæra veiðiheimildirnar

Wed, 16 Apr 2025 21:33:52 GMT

VIÐSKIPTI Guðmundur Kristjánsson forstjóri Brims og nýr formaður Samtaka fyrirtækja í sjávarútvegi, SFS, segir í nýjasta HLUTHAFASPJALLINU , hlaðvarpsþætti okkar Sigurðar Más Jónssonar á Brotkast.is, að þjóðin og ríkið séu ekki það sama þótt margir líti svo á; fólk og fyrirtæki séu hluti af þjóðinni en ekki ríkinu og ríkið sinni ákveðnum verkefnum fyrir þjóðina.

Guðmundur segir að samkvæmt dómi Hæstaréttar í Hrannarmálinu frá1993 og lögum frá Alþingi 1997 séu veiðiheimildir ekki eign ríkisins heldur sjávarútvegsfyrirtækjanna sem hafi stækkað og þjappast saman með því að kaupa veiðiheimildir. Veiðiheimildirnar séu helsta eign þeirra og metnar á 500 milljarða króna. „Veiðigjöldin eru ekkert annað en skattur,“ segir Guðmundur og byrjar spjallið á smá sagnfræði.

Núverandi ríkisstjórn talar ekki um hvernig eigi að hagræða og endurskipuleggja eins og gert er hjá einkafyrirtækjum heldur segir við þjóðina sem hún vinnur fyrir: Við ætlum bara að hækka skatta á ykkur.

HIÐ OPINBERA SELDI KVÓTANN

„Árið 1984, þegar kvótinn var settur á, átti ríkið t.d. Þormóð ramma og það voru þónokkrar bæjarútgerðir. Svo var ákveðið að selja þessar útgerðir, út úr ríkinu og út úr sveitarfélögunum. Hverjir kaupa? Það eru einstaklingar og fyrirtæki í þjóðfélaginu, þjóðin.“

ÁRIÐ 1991: FRAMSALIÐ OG VERÐGILDI KOM Á KVÓTANN

„Árið 1991 kom framsalið og um leið kom verðgildi á svokallaðan kvóta.“

HÆSTIRÉTTUR 1993: ÞIÐ ÞURFIÐ AÐ EIGNFÆRA VEIÐIRÉTTINN

„Í upphafi afskrifuðum við kvótakaupin, gjaldfærðum þau. En svo kom ríkisskattstjóri árið 1993 og vann mál gegn okkur í Hæstarétti, svokallað Hrannarmál, þar sem okkur var gert að eignfæra veiðiréttinn, svokallaðan kvóta, en máttum afskrifa hann á fimm árum þar sem talin var svolítil óvissa um kvótakerfið.“

ALÞINGI 1997: EKKI MÁ AFSKRIFA VEIÐIRÉTTINN

„Alþingi setti svo lög árið 1997 lög um að það mætti aldrei afskrifa kvóta; svonefndan veiðirétt sem er núna í bókhaldi allra sjávarútvegsfyrirtækjanna um 500 milljarðar króna.“

ALÞINGI 1997: VEIÐIRÉTTURINN EIGN FYRIRTÆKJANNA

„En þegar Alþingi tók þessa ákvörðun 1997 þá sagði það að ríkið ætti ekki veiðiréttinn heldur væri hann eign fyrirtækjanna. Það er nefnilega gríðarlegur munur á ríkinu eða þjóðinni.“

2010: RÍKIÐ LAGÐI AUÐLEGÐARSKATT Á VEIÐIRÉTTINN SEM EIGN

„Svo kom auðlegðarskattur árið 2010 til 2013 en þá þurftu einstaklingar í þjóðfélaginu að greiða eignarskatt af þessum svonefnda veiðirétti – hvers vegna ef hann var ekki þeirra? Núna er veiðirétturinn langstærsta eign hinna þriggja skráðu sjávarútvegsfyrirtækja í Kauphöllinni. Ef við hefðum ekki þjappað kvótanum saman væri engin arðsemi í sjávarútvegi.“

RÍKIÐ ER HLUTAFÉLAG SEM BIÐUR HLUTHAFANNA BARA UM MEIRI PENINGA

„Á fjögurra ára fresti er kosið og við heyrum þá alltaf hjá stjórnarandstöðunni að ríkið sé illa rekið og allt sé í steik. En ef við ímyndum okkur að ríkið sé hlutafélag í eigu þjóðarinnar; alveg eins og hlutafélag er í eigu hluthafanna, þá hagræðir það ekki heldur biður eigendur sína um meira hlutafé.“

FORSTJÓRI Í HLUTAFÉLAGI: ÉG VIL MEIRA HLUTAFÉ FRÁ YKKUR

„Gefum okkur að ég væri að taka við Brim núna og hluthafarnir væru búnir að vera mjög óánægðir með reksturinn og kosið nýja stjórn og ég ráðinn forstjóri. Í staðinn fyrir að taka til í rekstrinum segði ég bara við hluthafana: Ég ætla að fá meira hlutafé frá ykkur því mig vantar meiri pening inn í reksturinn.“

RÍKIÐ MEÐ 1.550 MILLJARÐA Í TEKJUR – SAMT TAP

„Sama er með ríkið núna, það sefnir á tekjur upp 1.550 milljarða (bara A-hlutinn) og vantar meira fé í kassann því útgjöldin verða um 1.570 milljarðar króna. Núverandi ríkisstjórn talar ekki um hvernig eigi að hagræða og endurskipuleggja eins og gert er hjá einkafyrirtækjum heldur segir við þjóðina sem hún vinnur fyrir: Við ætlum bara að hækka skatta á ykkur. Ríkið hefur komist upp með það síðustu tíu, tuttugu árin að eyða um efni fram.“

„Og það eru bara karlar sem virðast eiga sjávarútvegsfyrirtækin; ekki lífeyrissjóðir, ekki tryggingafélög, sjóðir eða þúsundir einstaklinga í Kauphöllinni; það eru bara gamlir, miðaldra karlar.“

ERUÐ ÞIÐ RÍKIR MIÐALDRA KARLAR SEM VAÐIÐ Í PENINGUM?

Sp. En Guðmundur, það er búið að stilla þessu einhvern veginn þannig upp að fólk lítur svo á útgerðirnar séu ríkir karlar sem vaði í peningum og geti borgað meira? Stjórnmálamennirnir í ríkisstjórninni kynna málið altént með þeim hætti?

„Hluti af þessu er nú að blaðamenn kaupa alltaf allt hrátt. Ég tók mikla rimmu árið 1990 þegar það var sett í lögin um stjórn fiskveiða að fiskimiðin væru sameign þjóðarinnar án þess að skilagreina hvað það þýddi. Fiskimiðin eru ekki veiðirétturinn. Ef þú átt veiðirétt þá áttu ekki fiskinn í sjónum. Ef þú ert með löglegt veiðileyfi til að veiða fiskinn og veiðir hann þá ferðu að búa til verðmæti út úr auðlindinni. Það verða engin verðmæti til fyrr en búið er að veiða fiskinn. “

RÍKIÐ BÓKFÆRIR VEIÐIGJÖLDIN SEM SÉRTEKJUR AF EIGNUM

„Ég fór í ríkisreikninginn og vitið þið hvar veiðigjöld eru bókuð í tekjureikningi ríkisins? Þau eru bókuð sem sem sértekjur af eignum! Eins og að veiðirétturinn sé séreign ríkisins. En ríkið á ekki veiðiréttinn! Ég hef það á tilfinningunni að það sé búið að plata og rugla alllan almenning um að ríkið sé það sama og þjóðin.“

GUÐMUNDUR - ER ÞETTA AUÐLINDARENTA?

Sp. En Guðmundur – það virðist búið að sannfæra almenning um að veiðigjöldin séu auðlindarenta?

„Já, en ef ríkið telur sig eiga veiðiréttinn sem er helsta eign sjávarútvegsfyrirtækjanna hvers vegna borgaði ríkið þá ekki auðlegðarskattinn 2010 til 2013 í stað þess að leggja skattinn á einstaklingana sem eiga í fyrirtækjunum. Hver vegna tók Skatturinn okkur þá fyrir í Hæstarétti árið 1993 og sagði að sjávarútvegsfyrirtækin ættu veiðiréttinn og yrðu að eignfæra hann?“

ENGUM DETTUR Í HUG AÐ ÞJÓÐIN EIGI BLÁA LÓNIÐ

„Sigurður Líndal prófessor sagði: Auðlindin er hugtak yfir stóran hlut. Til að nýta auðlindir þarf að hafa fyrir því. Ef við tökum heita vatnið sem dæmi; það þarf að bora eftir því; það þarf að eyða pening til að ná í vatnið.

Ég segi oft með Bláa Lónið, það frábæra fyrirtæki, að það er annar aðili, Hitaveita Suðurnesja, sem boraði niður og tók áhættuna af því. Bláa Lónið keypti vatn, sem var ekki mikið nýtt og bjó til mikil verðmæti út frá þessari auðlind – en það er enginn að koma og segja að þjóðin eigi Bláa Lónið! Bláa Lónið er hluti af Íslandi. Ísland er byggt upp af fólki og fyrirtækjum og við eigum saman fyrirtæki sem heitir ríkið sem tekur að sér að sinna ákveðnum verkefnum fyrir þjóðina.“

MINNI TEKJUR ÞEGAR UPP VERÐUR STAÐIÐ?

Sp. En hvað um með útreikninga og afleiðingar af frumvarpinu um tvöföldun veiðigalda?

„Það vantar alla útreikninga og áhrif á sjávarútvegsfyrirtækin og samfélagið? Hvaða áhrif hefur þetta á tæknifyrirtækin sem þjónusta sjávarvarútveginn? Hvaða áhrif hefur þetta á sveitarfélögin? Og er vit í því að skattleggja frumatvinnugreinar – sem búa til störf í öðrum atvinnugreinum - svo mikið að það skaði hagsmuni þjóðarinnar í heild þegar upp er staðið því þetta er allt saman ein virðiskeðja.“

„Ef alþingismenn ætla núna að samþykkja gríðarlegar skattahækkanir á eina grein þá geta þeir það alveg, en það hefur miklar afleiðingar. En ráðherrarnir hafa hvorki haft fyrir því að reikna út né skýra út hvað þessi viðtóbarskattlagning þýðir fyrir samfélagið sem heild, þjóðina. Kannski þýðir hún tekjuminnkun eftir eitt til tvö ár?“

BORGIÐ ÞIÐ YKKUR MEIRI ARÐ EN AÐRIR?

Sp. Eruð þið að borga ykkur meiri arð í sjávarútvegsfyrirtækjunum en aðrar atvinnureinar?

„Við virðumst vera einu fyrirtækin á Íslandi sem borgum arð, miðað við umtal. Og það eru bara karlar sem virðast eiga sjávarútvegsfyrirtækin; ekki lífeyrissjóðir, ekki tryggingafélög, sjóðir eða þúsundir einstaklinga í Kauphöllinni; það eru bara gamlir, miðaldra karlar. En til að svara spurninginni þá hefur Jakobsen Capital reiknað þetta út og það kemur í ljós að arðgreiðslur í sjávarútvegi eru sambærilegar við annan iðnað á Íslandi.“ - JGH

Hér má sjá allt viðtalið við Guðmund.

Hér má sjá hvar hann ræðir loðnubrest, aukinn fjölda hvala í sjónum og Hafrannsóknarstofnun.

Hiti í kortunum í páskafríinu

Tue, 15 Apr 2025 11:12:45 GMT

Það er ágætur hiti í kortunum næstu daga á höfuðborgarsvæðinu og útlit fyrir talsverða útiveru hjá landanum í páskafríinu. Sjö til átta stiga hiti í dag og á morgun í Grafarvoginum, dettur aðeins niður á fimmtudag, en hlýnar eftir það og verður aftur um sjö til átta stiga hiti á föstudaginn langa og fram yfir páska - og úrkomulaust.

Vissulega kaldara á hálendingu og þá fá Ausfirðingar ekki alveg sama hitann þessa daga. Talsvert gluggaveður að undanförnu en breyting á og hiti í kortunum í páskafríinu.

Kortið sem við sýnum er spáin fyrir laugardaginn. - JGH

Tollar Trumps og hrikalegur fjárlagahalli vestra

Mon, 14 Apr 2025 17:20:07 GMT

Á meðfylgjandi mynd er Scott Bessent fjármálaráðherra Bandaríkjanna fyrir utan Hvíta húsið fyrir nokkrum dögum að greina frá hrikalegum og krónískum fjárlagahalla Bandaríkjamanna.

Í nýjasta HLUTHAFASPJALLINU , hlaðvarpi okkar Sig urðar Más Jónssonar á Brotkast.is, förum við yfir þá óyfirstíganlegu (að því er virðist) erfiðu fjárhagslegu glímu sem Bandaríkjamenn eiga í og við spyrjum okkur meðal annars hvert sé markmið margumræddra gagnkvæmra tolla Trumps og hvort hann sé sjálfur búinn að gera það upp við sig hvert markmiðið sé.

Eftir fall á hlutabréfmörkuðum „frestaði“ Trump tollum um 3 mánuði á 75 ríki með því að setja 10% tolla á línuna nema á Kína en þar setur hann á um 140% tolla. Síðan hafa verið veittar undaþágur.

En stóra spurningin er auðvitað hvort tollunum sé ætlað að afla tekna eða er markmiðið að ná fram samningum um tolla við önnur ríki - núlla út tolla í alþjóðlegum viðskiptum og auka á frelsið - eða býr það að baki að draga að fleiri fyrirtæki til Bandaríkjanna og styrkja þannig bandaríska framleiðslu.

FJÁRLAGAHALLINN í Bandaríkjunum nam hvorki meira né minna 1,3 trilljónum dollara frá október á síðasta ári til mars á þessu ári. Þetta er annar mesti 6 mánaða-halli í yfir fjörutíu ár vestra en sá mesti var árið 2021 í covid. Ef fram fer sem horfir fer fjárlagahallinn vel yfir 2 trilljónir dollara . Er nema von að Elon Musk og kó reyni að finna pósta til að skera niður.

VIÐSKIPTAHALLINN í Bandaríkjunum – halli á viðskiptunum við útlönd – fór í fyrsta sinn á síðasta ári (2024) yfir 1 trilljón dollara og hefur aldrei verið meiri. Viðskiptahallinn sýnist krónískur og nánast óviðráðanlegur - og ætti auðvitað að fá meiri vigt í tollaumræðunni.

Fram hefur komið að erlend ríki leggja 370 milljarða dollara tolla á innfluttar bandarískar vörur á meðan Bandaríkjamenn leggja um 50 milljarða dollara tolla á innfluttar vörur frá alþjóðasamfélaginu.

SKULDIR Bandaríkjamanna eru komnar upp úr hæstu rjáfrum og náð því skuldaþaki sem Bandaríkjamenn miða sjálfir við, 36 trilljónir dollara. Þannig að svigrúmið til frekari skuldasöfnunar er ekkert.

Að sjálfsögðu ætti dollarinn að vera löngu fallinn í svona svakalegu fjárhagslegu árferði enda hefur hann gefið eftir að undanförnu. Dollarinn var 134 krónur 1. apríl en er núna kominn niður í 127 krónur.

Þetta verður erfið glíma. - JGH

Til hamingju fermingarbörn í Grafarvogi

Mon, 14 Apr 2025 15:53:02 GMT

TIL HAMINGJU. Það var mikið um að vera í Grafarvogskirkju um helgina þegar fjöldinn allur af ungmennum var fermdur og mikill hátíðleiki yfir öllu að venju. Kirkjan skartaði sínu fegursta.

Fermingardagurinn er einn af eftirminnilegustu dögum á æviskeiði hvers og eins og jafnan spenna sem hleðst upp í kringum þá merku athöfn, bæði hjá fermingarbörnunum sem og aðstandendum þeirra.

Það var fermt báða dagana í Grafarvogskirkju um helgina. Laugardagarnir hafa öðlast vinsældir þar sem mörgum þykir auðveldara að halda fermingarveislurnar eftir hádegi á laugardögum en sunnudögum. Á árum áður var aldrei fermt á laugardögum.

Grafarvogur.net óskar öllum fermingarbörnum í Grafarvogi innilega til hamingju með þennan merka áfanga.

Við birtum hér nokkrar myndir af FB-síðu Grafarvogskirkju. - JGH

Fermingin er eftirminnileg og hátíðleg stund í lífi hvers og eins.

Frá annarri tveggja fermingarmessa í Grafarvogskirkju á laugardag þegar bæði var fremt kl. 11:00 og aftur kl. 13:30. Laugardagar hafa öðlast vinsældir sem fermingardagar.

Mikill fjöldi aðstandenda fermingarbarna mætir að venju í kirkjuna.

Auðvitað er spenna í lofti þegar fermingardagurin rennur loksins upp.

Starfið hefur kennt mér að vera þakklát

Sun, 13 Apr 2025 14:06:56 GMT

VIÐTAL: SVAVA JÓNSDÓTTIR

Arna Ýrr Sigurðardóttir , sóknarprestur í Grafarvogskirkju, segir að prestar upplifi bæði gleði og sorg í lífi sóknarbarna sinna og að sú reynsla hafi kennt sér að vera þakklát fyrir sig, sína og lífið.

„Það er þroskandi að ganga með fólki bæði í gleði og sorg og maður kemst ekkert ósnortinn eða óbreyttur frá því. Svo kem ég oft heim úr vinnunni og hugsa að ég skuli muna að þakka fyrir hvern einasta dag sem ég fæ af því að maður getur ekki treyst á það. Það veit enginn hvað morgundagurinn ber í skauti sér. Þannig að starfið hefur kennt mér að vera þakklát fyrir mig, mína og mitt líf.“

STERK SAFNAÐARVITUND Í GRAFARVOGI

Arna Ýrr varð prestur í Grafarvogssókn árið 2014 en hún var ekki alveg ókunnug í sókninni því þær Guðrún Karls Helgudóttir höfðu stjórnað saman skilnaðarhópum í tvo vetur áður. Hún var svo skipuð sóknarprestur sl. vor eftir að Guðrún var kjörin biskup Íslands.

„Það er sterk safnaðarvitund í Grafarvogi og staða Grafarvogskirkju í hverfinu er mjög sterk. Byggður hefur verið upp öflugur söfnuður með þróttmiklu safnaðarstarfi í gegnum tíðina - og svo er það gleðilegt að áhugi ungs fólks á kristinni trú er að aukast og við finnum fyrir því í Grafarvogi eins og annars staðar,“ segir Arna Ýrr.

„Það er þroskandi að ganga með fólki bæði í gleði og sorg og maður kemst ekkert ósnortinn eða óbreyttur frá því.“

FÓLK ÞYRSTIR Í ANDLEG MÁLEFNI

„Ég held að það tengist andlegum þorsta í samfélaginu; fólk er búið að gera sér grein fyrir að það þarf að sinna sínum andlegu og trúarlegu þörfum og við erum farin að skynja það betur að það skiptir máli fyrir lífsgæði okkar allra.“

Hún segir að það hafi alltaf verið góð þátttaka í helgihaldinu í kirkjunni og nefnir sérstaklega fermingarbörn hvers ár sem séu dugleg að mæta og að það sé að aukast að foreldrar þeirra komi með þeim.

BÓKAKLÚBBUR Í KIRKJUNNI

Ýmislegt er í boði í kirkjunni og er þar til dæmis bókaklúbbur og er hist einu sinni í mánuði. „Það eru lesnar skáldsögur og er það í rauninni hópurinn sem velur næstu bók. Þetta er góður og blandaður hópur fólks sem er áhugafólk um að lesa góðar bækur og eru öll velkomin.

GÆÐASTUNDIR Á „ÚLFATÍMA“

Í vetur byrjuðum við líka með gæðastundir fjölskyldunnar einu sinni í mánuði á miðvikudögum, á svokölluðum ,,úlfatíma“, eða frá klukkan fimm til hálfátta, sem enda með því að allir borða saman kvöldmat. Þetta eru mjög vinsælar og vel heppnaðar stundir fyrir fjölskyldufólk. Við höfum verið að endurskoða barnastarfið hjá okkur og bjóða upp á meira í námskeiðaformi; það er svo sem engin nýjung en bara aðeins öðruvísi form.“

„Það er svo gleðilegt að áhugi ungs fólks á kristinni trú er að aukast og við finnum fyrir því í Grafarvogi eins og annars staðar.“

AKUREYRINGUR OG STÚDENT FRÁ MA 1988

Sóknarpresturinn fæddist og ólst upp í höfuðstað Norðurlands og bjó þar fyrstu 22 ár ævinnar. Hún gekk í Oddeyrarskóla og lauk stúdentsprófi frá Menntaskólanum á Akureyri 1988.

„Ég átti afskaplega ljúfa og góða æsku,“ segir Arna Ýrr sem bað bænir á kvöldin; Faðirvorið og Láttu nú ljósið þitt voru á meðal hinna dæmigerðu kvöldbæna. Hún segir að hún hafi átt mjög trúrækna ömmu sem hafi ásamt móður sinni og afa alið sig upp og kennt sér hina dæmigerðu fallegu og góðu íslensku barnatrú.

Hún varð fljótlega lestrarhestur og bókaormur mikill og segist oft hafa farið á hverjum degi á Amtsbókasafnið, byggingu sem henni þyki ákaflega vænt um.

„Ég las náttúrlega Enid Blyton-ævintýrabækurnar og ég var mikið fyrir myndasögur, teiknamyndasögur, eins og Tinna og Lukku-Láka, og ég hef alltaf verið mikið fyrir fantasíur. Skólastjórinn í skólanum mínum, Indriði Úlfsson, skrifaði margar barnabækur sem voru gjarnan í jólapökkunum mínum.“

Hún varð síðan virk í KFUK og KFUM og Æskulýðsfélagi Akureyrarkirkju. „Mig langaði að læra meira um kristna trú og Biblíuna og guðfræðin varð því fyrir valinu þegar ég fór í háskólann.“

HLAUPIÐ SEX MARAÞON ERLENDIS

Á háskólaárunum dvaldi Arna Ýrr fyrir norðan á sumrin og það var á þeim árum sem hlaupaáhuginn kviknaði. Hún hætti að hlaupa um tíma en tók upp þráðinn þegar hún flutti til Raufarhafnar rúmlega þrítug árið 2000. Hún segir að þar hafi ekki verið mikið um líkamsrækt þannig að hún fór upp á þjóðveg að hlaupa.

Hún flutti svo til Reykjavíkur árið 2006 og byrjaði í hlaupahópnum Mosóskokki. „Fyrst var markmiðið Reykjavíkurmaraþonið á haustin en svo tók ég stefnuna á lengri hlaup og hljóp þá líka á veturna. Þetta vatt upp á sig og endaði með hálfmaraþoni og loks maraþoni.“

Núna eru sex maraþon erlendis að baki hjá henni og stefnan er sett á maraþon í Tókýó á næsta ári og eftir það er það Boston.

ÖGRA SJÁLFRI MÉR MEÐ HLAUPUNUM

„Það fylgir þessu ótrúlega góður og skemmtilegur félagsskapur og hef ég eignast góðar vinkonur í gegnum þetta. Svo er það náttúrlega útiveran og hreyfingin. Þetta er líka töluverð áskorun og það hefur verið mjög gefandi að ögra sjálfri mér í þessu. Það er langt frá því að ég sé ofurhlaupari en þetta er ákveðin ögrun. Það er gott að hreinsa hugann á hlaupum og auðvitað mikilvægt að hugsa um heilsuna og hreyfa sig,“ segir Arna Ýrr Sigurðardóttir.

Sex maraþon að baki erlendis og stefnan sett á maraþon í Tókýó á næsta ári.

Kvöldblús á kæjanum

Sat, 12 Apr 2025 15:17:46 GMT

KVÖLDBLÚS Á KÆJANUM. Þeir eru margir góðir veitingastaðirnir í hjarta Reykjavíkurhafnar og gaman að rölta aðeins um á kæjanum eftir góðan kvöldverð.

Egill Skallagrímsson orti um að standa í stafni og stýra dýrum knerri. Þau er mörg glæsifleyin við höfnina þó fágætar séu hinar fögru árar.

Stafalogn í gærkvöldi þar sem ljósgeislar og ljósrákir læddust um sjávarborðið og snekkjurnar spegluðu sig í sævarblámanum.

Vorkvöld í Reykjavík - kvöldblús á kæjanum! - JGH

Þarna má sjá farþega komna um borð áður en lagt er í 'ann og haldið til hafs í skoðunarferð að kvöldi til. Heyrði að Andrea þyrfti ekki að fara langt út á flóann til að farþegar hennar gætu horft á norðurljósin í allri sinni dýrð á hafi úti við þessar kringumstæður.

Þeir eru þónokkrir veitingastaðirnir á þessum litla bletti við kæjann - og hver öðrum betri.

Þetta fagra fley á þurru landi baðaði sig í ljósgeislum kvöldsins - Júpíter frá Vestmannaeyjum.

Til hamingju Helgi Árnason - Hringfararnir stofna sérstakan styrktarsjóð í hans nafni

Sat, 12 Apr 2025 12:46:45 GMT

Til hamingju HELGI ÁRNASON. Styrktarsjóður Hringfarans úthlutaði á miðvikudaginn fimm milljónum króna til barna- og unglingastarfs Skáksambands Íslands með því að stofna Skáksjóð Helga Árnasonar

Styrktarsjóðurinn Hringfari er á forræði hjónanna Ásdísar Rósu Baldursdóttur og Kristjáns Gíslasonar . Hjónin hafa ferðast um allan heim á mótórhjólum og meðal annars gert heimildarmyndir og bækur um ferðalögin. Allur ágóði af sölu á því efni rennur í styrktarsjóðinn.

Við athöfn á heimili þeirra Ásdísar og Kristjáns miðvikudaginn 9. apríl kom fram að þau vildu tileinka styrkinn Helga Árnasyni, fyrrverandi skólastjóra og skákfrömuði, sem hefði á síðustu 30 árum unnið ómetanlegt starf við uppbyggingu skáklistarinnar á Íslandi.

Skáksjóður Helga Árnasonar væri til að heiðra Helga fyrir hans framlag og óeigingjarnt starf í þágu barna og unglinga. Helgi verður formaður 5 manna stjórnar Styrktarsjóðsins.

Það voru fjölmargir gestir sem fögnuðu með Helga og hjónunum Ásdísi Rósu og Kristjáni. Meðal gesta voru borgarstjórahjónin Heiða Björg Hilmisdóttir og Hrannar Björn Arnarson, fulltrúar Skáksambands Íslands, vinir og bekkjarfélagar Helga og Ásdísar Rósu frá Kennaraháskóla Íslands.

Styrktarsjóður Hringfarans hefur úthlutað alls 37 milljónum til góðgerðarmála.

Ljósmyndir: Baldur Kristjánsson

Það voru fjölmargir gestir sem fögnuðu með Helga og hjónunum Ásdísi Rósu Baldursdóttur og Kristjáni Gíslasyni en Helgi og Ásdís Rósa voru skólasystkini í Kennaraháskólanum á sínum tíma.

Meðal gesta voru borgarstjórahjónin Heiða Björg Hilmisdóttir og Hrannar Björn Arnarson. Við hlið Helga á hægri hönd er eiginkona hans Aðalbjörg Jónasdóttir líffræðingur.

Þau Ásdís Rósa og Kristján vildu tileinka styrkinn Helga Árnasyni, fyrrverandi skólastjóra og skákfrömuði sem hefði á síðustu 30 árum unnið ómetanlegt starf við uppbyggingu skáklistarinnar á Íslandi.

Góðir gestir í Hluthafaspjallinu hjá okkur Sigurði Má - sjómennska kemur við sögu

Fri, 11 Apr 2025 10:06:57 GMT

Það var stemning í Hluthafaspjallinu hjá okkur Sigurði Má við tökur í gær þegar við fengum þau Guðmund Kristjánsson, forstjóra Brims, og Maríu Björk Einarsdóttur, forstjóra Símans, til okkar.

Guðmundur var nýbúinn að klára spjallið við okkur þegar María Björk mætti í hús.

Ég var auðvitað með einhvern aulabrandara um að þau hefðu bæði verið á sjónum um tíma en María var fjármálastjóri Eimskips áður en hún tók við sem forstjóri Símans - en það er svo sem líka talsverð sjómennska (showmennska) í Sjónvarpi Símans.

Þátturinn fer svo í spilun seinna í dag eða á morgun. Ég mun svo að venju birta klippur úr þættinum hér í viðskiptahluta Grafarvogs.net en kominn er sérstakur flipi merktur Hluthafaspjallinu.

Blæðingin á mörkuðum stöðvaðist á nokkrum mínútum við tilkynninguna

Thu, 10 Apr 2025 10:35:56 GMT

Í nýjasta þætti HLUTHAFASPJALLSINS , hlaðvarpi okkar Sigurðar Más Jónssonar á Brotkast.is, sýnum við nokkrar athyglisverðar glærur í tengslum við umræðuna um tollamál Trumps - meðal annars glæru um það hvernig Dow Jones rauk upp um 8% á nokkrum mínútum þegar forsetinn ákvað að „fresta“ tollunum; að vísu með því að leggja 10% tolla á 75 ríki nema Kína sem fær á sig um 140% tolla.

Það er líka athyglisvert í allri umræðunni um þessi tollmál að erlend ríki leggja 370 milljarða dollara tolla á innfluttar bandarískar vörur á meðan Bandaríkjamenn leggja um 50 milljarða tolla á innfluttar vörur frá alþjóðasamfélaginu. Hlutfallið er því 7 á móti 1, Bandaríkjunum í óhag.

Viðskiptahalli Bandaríkjamanna fór í fyrsta sinn á síðasta ári yfir 1 trilljón dollara og fjárlagahallinn síðustu sex mánuði er í sögulegu hámarki, eða 1,3 tilljónir dollara og stefnir í að verða vel yfir 2 trilljónir dollara á ári með sama áframhaldi.

Sömuleiðis ætti dollarinn að vera löngu búinn að gefa eftir í svo ósjálfbæru hagkerfi. - JGH

Ekkert eitt mál hefur fengið jafnmikla umræðu sérfræðinga og greinenda á erlendum hlutabréfamörkuðum og tollamál Trumps - og sitt sýnist hverjum.

Hitametið í apríl féll í gær: 10 stiga hiti yfir daginn í höfuðborginni

Thu, 10 Apr 2025 10:28:42 GMT

Við sögðum frá því í gær að útlit væri fyrir að hitametið í apríl frá árinu 1928 myndi líklegast falla. Já, og það gerðist. Hitinn hélst yfir 10°C yfir daginn. Þetta er stórfrétt í heimi veðurmetanna, segir Einar Sveinbjörnsson sem setti inn færslu á FB í gærkvöldi eftir að hafa fylgst með málinu í gærdag.

Hér kemur færsla Einars á FB frá því í gærkvöldi.

HITAMET!

10 stigin náðust í Reykjavík í dag, 9. apríl. Taldi það ekki líklegt í fyrri skrifum. Meðalhiti átta athugana reyndist vera 10,0°C (kl.00, 03, 06, 09, 12, 15, 18 og 21).

Dæguhitinn hefur aldrei náð 10 stigum í Reykjavík svo snemma ársins sem nú. Daglegar mælingar sem ég hef undir höndum eru frá 1901, en vissulega eru til slæðingur eldri mælinga úr Reykjavík.

Munaði reyndar litlu 1928 þegar dægurhitinn reiknaðist 9,8°C hinn 3. apríl það ár.

En það var víðar sem dægurhitinn náði 10 stigum vestanlands, m.a. í Stykkishólmi og eins í Húsafelli þar sem hann reyndist 10,9°C. Það samsvarar nokkurnveginn meðalhita í júlí!

Og auðvitað er þetta stórfrétt og verður enn stærri í augum veðurmetaklúbbsins ef ekki finnst sambærilegur eða hærri hiti í Stykkishólmi, með sína löngu og merkilegu mælaröð, skrifar Einar Sveinbjörnsson veðurfræðingur á FB.

Frétt okkar í gær um að hitametið í apríl í Reykjavík yrði hugsanlega slegið. (Hin skemmtilega frétt af Pétri bóksala við hliðina).

Jón Karl Ólafsson þriðji heiðursforseti Fjölnis - til hamingju Jón

Thu, 10 Apr 2025 10:13:29 GMT

Það er fyllsta ástæða til að óska Jóni Karli Ólafssyni til hamingu með þá miklu viðurkenningu sem Fjölnismenn sæmdu hann í fyrradag þegar hann varð þriðji heiðursforseti Fjölnis. Jón Karl er mjög vel að þessari viðurkenningu kominn.

Hann hefur unnið afar vel fyrir félagið og var formaður Fjölnis í fimmtán ár og sat í stjórn félagsins í yfir tuttugu ár. Þá má geta þess að hann fékk sömuleiðis gullmerki UMFÍ við sama tækifæri. Vel gert og til hamingju Jón Karl.

Þess má geta að Jón Karl er umdæmisstjóri Rótarý á Íslandi.

Jón Karl með Jóhanni Steinari Ingimundarsyni, formanni UMFÍ. Jóhann Steinar kemur frá Stjörnunni í Garðabæ.

Jón Karl Ólafsson varð þrjiði heiðursforseti Fjölnis í fyrradag. Hér er hann með viðurkenninguna ásamt veglegum blómvendi.

Hver hnippti í hvern? Borgin bakkar í Breiðholti en stífelsi í Grafarvogi

Wed, 09 Apr 2025 17:12:01 GMT

HVER HNIPPTI Í HVERN? Það vekur athygli að Reykjavíkurborg bakkar - sem betur fer - með áform um að byggja 100 íbúðir við tjörnina í Seljahverfi, skv. frétt Morgunblaðsins í morgun. Grafarvogsbúum mætir hins vegar ekkert nema stífelsi og þvermóðska af versta tagi hjá meirihlutanum.

En hver hnippti eiginlega í hvern? spyr fólk. Hvers vegna að bakka með þetta svæði frekar en önnur verðmæt svæði, t.d. alla litlu blettina í hinum grónu hverfum Grafarvogs; grónum svæðum þar sem þéttingu hefur verið mótmælt af miklum móði?

MÓTMÆLI 111 ÍBÚA VIÐ STARENGI

Síðast í gær voru mótmæli 111 íbúa við Starengi lögð fram á borgarstjórnarfundinum. Mótmælin snúa að litla, gróna svæðinu fyrir neðan Bláu sjoppuna og nær að hringtorginu - sem og gímaldinu sem verður á Thors-vellinum við Korpu. Með fylgdi bréf sem var mjög vel unnið og einstaklega málefnalegt.

Svo er það auðvitað hneisa að strá salti í sárin með því að úthluta lóðum á fundi borgarráðs í síðustu viku þegar breytt aðalskipulag er enn í ferli, liggur ekki fyrir og hefur þar af leiðandi ekki verið samþykkt. Svo er embættismönnum beitt á íbúana. Á hinum umtalaða íbúafundi 20. mars voru svör embættismanna á einn veg; gerið bara athugasemdir!

Lokafresturinn fyrir athugasemdir í þessu leikriti rennur út 5. maí nk.

Á borgastjórnarfundinum í gær valtaði meirihlutinn svo yfir vilja Grafarvogsbúa þegar vilyrði fyrir úthlutun lóða borgarráðs í síðustu viku voru staðfest og samþykkt.

TIL HVERS ÞESSA GRÆÐGI BORGARINNAR?

Til hvers er borgin að þessu brölti? Til hvers þessa græðgi? Hún breytir skipulagi eftir á sem fólk hefur treyst á og byggt og keypt sínar eignir í góðri trú skv. því skipulagi sem hefur verið í gildi.

Hún hunsar gildi verðmætra útivistarsvæði - og loks skellir borgin skollaeyrum við því að innviðirnir; skólarnir, leikskólarnir og vegakerfið, er löngu sprungið og þolir ekki meira álag.

Til hvers að róta öllu upp og grafa þessar skotgrafir gegn íbúum Grafarvogs?

Til hvers? Algerlega óskiljanlegt. - JGH

Verður slegið hitamet í höfuðborginni í dag?

Wed, 09 Apr 2025 11:54:32 GMT

HITAMET Í APRÍL Í DAG? Einar Sveinbjörnsson veðurfræðingur segir að dagurinn í dag geti orðið dagur tíðinda í veðurmælingum í höfuðborginni og að gamalt hitamet í apríl falli haldist hitinn yfir 10°C út daginn.

Einar heldur úti vefnum Blika.is. Hann fer yfir málið í færslu á FB og er hún svohljóðandi:

HLÝTT Í GÆR - HLÝRRA Í DAG?

„Leit á mælitölur úr Reykjavík. Í gær 8. apríl reyndist meðalhiti dagsins vera 9,2°C. Dægurhitinn hefur sárasjaldan farið yfir 10 stig í Reykajvík og aldrei (frá 1901) fyrir sumardaginn fyrsta.

Sérlega milt var í morgun suðvestan- og vestanlands. Í Reykjavík stendur meðaltal mælinga það sem af er degi í 10,2°C. Ef hann helst á þessu róli út daginn teldist það talsverð tíðindi, því dægurhitinn í Reykjavík hefur aldrei náð 10 stigum svo snemma í apríl (og þar með á árinu).

3. apríl 1928 má finna töluna 9,8°C. Þá voru mælingar í Rvk. gerðar á Skólavörðustíg 3.

Spáð er vætu í Reykjavík seinnipartinn í dag og við það ætti hitinn að lækka og því tel ég fremur ólíklegt þrátt fyrir allt að 10 stiga þröskuldinum verði náð að þessu sinni.

Fyrir norðan og austan er líka efniviður í 20 stiga hámarkshita þar sem hann verður mestur. Líka það væru talsverð tíðindi ef út í það væri farið, þó svo að slíkur augnablikshiti hafi mælst stöku sinnum áður, en einkum þá austanlands í snarpri SV eða V-átt,“ skifar Einar Sveinbjörnsson veðufræðingur.

Brosmildi bóksalinn er funheitur stuðningsmaður Úlfanna í enska boltanum

Wed, 09 Apr 2025 09:46:18 GMT

PÉTUR Í BÓKABÚÐINNI. Það kannast eflaust ekki margir Grafarvogsbúar við nafnið Pétur Viðarson en það þekkja allir hinn brosmilda bóksala í Bókabúðinni við Torgið í Grafarvogi; Pétur Viðarson, sem staðið hefur vaktina og þjónustað Grafarvogsbúa af mikilli eljusemi frá árinu 1994 – eða í rúm þrjátíu ár; sagt og staðið!

Þegar inn í bókabúðina er komið blasa við léttar og fínar ferðatöskur á tilboði hjá kappanum. „Það hefur verið mjög góða sala á þeim undanfarnar vikur. Þær eru léttar og liprar þessar og fyrir vikið mjög vinsælar. Ég verð með þær á tilboði fram að páskum,“ segir Pétur um leið og hann lyftir einni upp til að sýna þennan góða ferðafélaga.

Sem frumbýlingur í Grafarvogi frá árinu 1987 hef ég oftar en ekki rúllað til hans eftir ritföngum, kortum eða gjafvörum. Eitt bregst aldrei þegar inn er komið – við byrjum á að ræða enska boltann. Það sem meira er; hann er harður stuðningsmaður Úlfanna; Wolverhampton Wonderes – ég Púlari.

Pétur hefur selt Grafarvogsbúum bækur, ritföng, leikföng, kort og auðvitað ferðatöskur í 31 ár! Sumir byrja ferðalagið í bókabúðinni.

ALLT Í EINU HÉLT ÉG MEÐ ÚLFUNUM

Þeir eru ekki margir sem halda með Úlfunum hér á landi. „Ég veit ekkert hvernig þetta byrjaði. Maður horfði á enska boltann hjá Bjarna Fel. og það var eitthvað sem gerðist; ég var allt í einu farinn að halda stíft með Úlfunum. Þeir hafa verið mitt lið síðan og ég stutt þá í gegnum súrt og sætt. Það hefur verið svolítið á brattann að sækja í vetur og við erum neðarlega í neðri hluta efstu deilarinnar en ég tel að við séum hólpnir.“

Pétur segir að Úlfarnir hafi verið gullaldarliðið í enska boltanum á árunum 1950 til 1960 og þá verið með eitt besta knattspyrnulið í heimi. „Stórstjarnan þá var Billy Wright sem spilaði um 105 landsleiki fyrir Englendinga og þar af fyrstu 70 landsleikina án þess að missa úr leik. Hann var aðlaður; varð sir Billy Wright.“

KEYPTI LEIKFANGABÚÐ MEÐ NÁMI

Pétur er viðskiptafræðingur frá Háskóla Íslands. Þegar hann var 21 árs og nýbyrjaður í náminu var hann staddur á Eiðistorgi á Seltjarnarnesi og lét slag standa; athafnaþráin kitlaði; hann keypti leikfangabúðina á Eiðistorgi og bætti síðan bókabúðinni í Grafarvoginum við nokkrum árum síðar. Rak þessar tvær verslanir samhliða til ársins 2016 þegar hann seldi verslunina og rýmið á Eiðistorgi – og einbeitti sér að bókabúðinni í Grafarvogi.

FÆDDUR Á EGILSSTÖÐUM - ÓLST UPP Í KÓPAVOGI

Hann á ekki langt að sækja athafnamennskuna. Afi hans var Pétur Jónsson, bóndi á hinu þekkta Egilsstaðabúi við Egilsstaði. „Ég er fæddur á Egilsstöðum en flutti í Kópavoginn þegar ég var 4 ára – bjó fyrst við Lundabrekku og síðan við Hrauntunguna.“

Pétur keypti leikfangaverslun á Eiðistorgi á Seltjarnarnesi þegar hann var 21 árs og nýbyrjaður í viðskiptafræði í HÍ árið 1989. Hann bætti svo versluninni í Grafarvogi við árið 1994. Núna er hann eingöngu með verslunina í Grafarvoginum.

ÆFÐI MEÐ YNGRI FLOKKUM Í ÍK

Hann æfði fótbolta í yngri flokkunum með ÍK sem síðar sameinaðist HK. Spilaði sem miðherji þótt hann sé það hávaxinn að frekar mætti ímynda sér að hann væri gamall körfuboltamaður. „Sem Kópavogsbúi er maður líka Bliki. Það er nú bara þannig.“

Hann á nokkra leiki með meistaraflokki. En það var ekki í Kópavoginum. Hann vann eitt sumar í Neskaupstað og byrjaði að æfa með Þrótti þar í bæ. Datt inn í lið – og þá sem hinn hávaxni hafsent; miðvörður.

ÉG KRISTNAÐI KONUNA

Eiginkona Péturs er Hrefna G. Thorsteinson og er alltaf annað slagið í búðinni. Litla góða bókabúðin er litla góða einkaframtakið; fjölskyldufyrirtæki. „Jú, ég náði að kristna hana, hún hafði engan áhuga á fótbolta en er núna á kafi sem stuðningsmaður Úlfanna. Hún er meira að segja farin að setja út á leikkerfin,“ segir Pétur og brosir í kampinn. - JGH

Ég hvet ykkur til að lesa fyrst fagurgalann um íbúalýðræði sem þið hafið látið hnoða saman

Tue, 08 Apr 2025 17:01:12 GMT

Marta Guðjónsdóttir, borgarfulltrúi Sjálfstæðisflokksins, var harðorð um um vinnubrögð meirihlutans á fundi borgarstjórar í dag varðandi þéttingu byggðar í Grafarvogi og sagði að vinnubrögðin væru blaut tuska í andlit Grafarvogsbúa. Þetta kemur fram í frétt mbl.is um fundinn í dag.

„Ég hvet eindregið þá borgarfulltrúa sem ætla að staðfesta þessa viljayfirlýsingu á þessum fundi til þess að lesa fyrst fagurgalann um íbúalýðræði, sem þau sjálf hafa látið setja saman í fallegan bækling, og spyrja sig síðan hvort þau aðhyllist í raun íbúalýðræði og samvinnu við borgarbúa eða hvort þau láti sér nægja að hnoða saman fagurgala um lýðræði til að blekkja kjósendur svo þau geti síðan staðið í stríði við þá,“ sagði Marta á fundinum.

Marta sagði á fundinum að andstaða við þéttingu í grónum hverfum í Grafarvogi hefðu komið skýrt fram á fjölmennum íbúafundum.

Hún fór síðan yfir þau stórfurðulegu vinnubrögð meirihlutans, sem Grafarvogur.net hefur fjallað um síðustu daga, að gefa íbúum kost á að andmæla þéttingaráformum og breyttu aðalskipulagi til 5. maí nk. en úthluta síðan lóðum sl. fimmtudag áður en andmælafresturinn væri liðinn.

„En svo það færi nú ekkert á milli mála að það væri nú ekki ómaksins vert að andmæla hæstráðanda, meirihlutanum í þessum sal, sáu borgaryfirvöld ástæðu til að samþykkja í borgarráði síðastliðinn fimmtudag viljayfirlýsingu um uppbyggingu á fyrirhuguðum þéttingarreitum Grafarvogs,“ segir Marta.

„Og einmitt nú á þessum borgarstjórnarfundi stendur til að staðfesta þessa viljayfirlýsingu,“ sagði Marta. - JGH

Tæknin að trufla eða skrúfað niður? Ekkert hljóð frá útsendingu fundarins

Tue, 08 Apr 2025 13:17:59 GMT

Ekkert hljóð er frá útsendingu borgarstjórnarfundarins sem hófst í hádeginu. Þar kemur þétting byggðar í Grafarvogi svo sannarlega við sögu.

Búið er að úthluta lóðum þótt á sama tíma sé ekki búið að samþykkja breytt aðalskipulag. Það er hneisa.

Engu að síður eru íbúar hvattir til að gera athugasemdir við þéttinguna og hafa skilafrest til 5. maí til að senda þær inn - hvaða þýðingu sem það annars hefur fyrst ekkert er gert með sjónarmið íbúanna.

Flestir Grafarvogsbúar hafa sömu tilfinninguna - það er valtað yfir vilja okkar Grafarvogsbúa í þessu máli af miklu offorsi. - JGH

Kauphallir rétta úr kútnum eftir dýfur undanfarna daga

Tue, 08 Apr 2025 12:55:45 GMT

Kauphallir hafa rétt örlítið úr kútnum í dag eftir dýfur síðustu daga. Að minnsta kosti virðist mesta taugaveiklunin að baki út af tollum Trumps hvernig svo sem framvindan verður. Blæðingin hefur a.m.k. stöðvast í bili.

Kauphöllin á Íslandi hefur hækkað um 2,33% það sem af er degi. London fer ágætlega af stað og hefur hækkað um 2,39% og er markaðurinn núna á sama stað og 15. apríl í fyrra.

Japan hefur hækkað um rúm 6% og þar tala greinendur um að aukin trú sé á að samningar náist við Bandaríkjamenn um tolla.

London síðustu fimm árin. Fall FTSE 100-vísitölunnar síðustu daga sést hér greinilega á myndinni. Markaðurinn er á sama stað og fyrir einu ári; 15. apríl í fyrra.

Nikkei-vísitalan í Japan er á svipuðum stað og í byrjun árs 2024. Á síðustu fimm árum hefur þessi vísitala hækkað um 70% sem er vel af sér vikið.

Nú taka þær Breiðholtið í nefið líka - 1.700 íbúðir áformaðar í Breiðholti

jonghauksson@gmail.com (Jón G. Hauksson) — Tue, 08 Apr 2025 12:16:30 GMT

NÝJU BORGARSTÝRURNAR láta ekki duga að valta yfir vilja Grafarvogsbúa gegn þéttingu byggðar í grónum hverfum Grafarvogs heldur hafa þær komið auga á nokkra bletti í Breiðholti líka.

Í Morgunblaðinu í morgun er rætt við Helga Áss Grétarsson, fyrsta varaborgarfulltrúa Sjálfstæðisflokksins þar sem fram kemur að til standi að byggja 1.700 nýjar íbúðir á þéttingarreitum í Breiðholti. Þannig er áformað að byggja 100 íbúðir við tjörnina fallegu í Seljahverfi og 50 íbúðir á fótboltavelli við Suðurhóla og 800 íbúðir í Mjódd. - JGH

Þær fá hörð mótmæli 111 íbúa við Starengi inn á fund borgarstjórnar í hádeginu

Tue, 08 Apr 2025 10:34:46 GMT

ÍBÚAR VIÐ STARENGI MEÐ HÖRÐ MÓTMÆLI. Nýju borgarstýrurnar og meirihlutinn í borgarstjórn hefja borgarstjórnarfund í hádeginu í dag, þriðjdaginn 8. apríl í Ráðhúsinu, með hörð mótmæli frá 111 íbúum við Starengi um að byggja á litla blettinum fyrir neðan Bláu sjoppuna - sem og við áformaðar byggingaframkvæmdir inni á golfvelli GR við Korpu; Thorsvellinum.

Íbúarnir sendu mótmælin í tölvupósti til borgarstjórnar í gærkvöldi en mikill asi er á nýja meirihlutanum við að keyra þéttingu byggðar í Grafarvogi í gegn þvert á vilja mikils meirihluta íbúa í hverfinu. Í síðustu viku voru lóðir úthlutaðar þótt ekki sé búið að samþykkja breytt aðalskipulag - og er það ekki bara smekklaust heldur algjör hneisa.

Fram kemur í mótmælaskjali íbúanna við Starengi til borgarstjórnarinnar að skýr andstaða íbúanna sé við fyrirhugaðar byggingar á þessum litla bletti við Starengi en þar stendur til að byggja 18 íbúðir á nokkrum hæðum með of fáum bílastæðum og ófullnægjandi aðlögun að hverfinu.

Alls voru að minnsta kosti 96,1% íbúa á móti framkvæmdunum en ekki náðist í alla þegar gengið var í hús til að safna undirskriftum.

Sjá erindið með mótmælum íbúanna hér.

Á meðal þess sem fram kemur í bréfi íbúanna til borgarstjórnar er að tekið verði tillit til vilja íbúanna. „ Borgarstjórn er lýðræðislega kjörin og ber samkvæmt sveitarstjórnarlögum að stjórna í umboði borgarbúa. Þótt lagaleg skylda sé ekki til staðar til að fara eftir ráðgefandi vilja íbúa, ber borgarstjórn:

- Siðferðilega og pólitíska ábyrgð á því að hlusta á vilja þeirra sem málið varðar.

- Að tryggja að ákvarðanir séu teknar með almenningi, ekki gegn honum.

Þær sem stóðu að þessari undirskriftasöfnun og skrifa undir erindið eru þær Þóra Þórsdóttir , Starengi 106, Kristín S. Konráðsdóttir , Starengi 84, Björg Ólafsdóttir , Starengi 18 og Ásdís Kristinsdóttir , Starengi 8.

Skoðun: Grímunum kastað og valdníðslan og yfirgangurinn birtist grímulaus

Fri, 04 Apr 2025 20:10:49 GMT

GRÍMULAUS VALDNÍÐSLA! Flestir íbúa í Grafarvogi eru agndofa yfir vinnubrögðum meirihlutans í borgarráði sl. fimmtudag um að hunsa algerlega þá kröftugu bylgju mótmæla við þéttingu byggðar í grónum hverfum Grafarvogs.

Það er auðvitað ekkert annað en grímulaus einstefna að úthluta lóðum á reitum í miðju ferli við að breyta aðalskipulagi og íbúar hafa enn rétt til að gera athugasemdir við. Fresturinn til að skila inn athugasemdum var upphaflega 10. apríl en hann hefur verið framlengdur til 5. maí. Hvers konar vinnubrögð eru þetta hjá borgaryfirvöldum sem eru í vinnu fyrir íbúanna?

Á hinum fjölmenna íbúafundi 20. mars sl. í Borgum í Spönginni hvöttu embættismenn fundarmenn til að sýna dugnað við að skila inn athugasemdum við breytt aðalskipulag. Við erum hér - stóð stórum stöfum á glærusýningunni og minntu þau orð óþægilega mikið á hina umdeildu setningu í auglýsingu Jóns Gnarrs hér um árið: Við erum hér - hvar ert þú?

EIN STÓR LEIKSÝNING

Í þessu leikhúsi meirihlutans var það látið líta svo út á fundinum að íbúar hefðu eitthvað um málið að segja. Fyrirkomulag fundarins um að fundarmenn mættu ekki tjá sig og spyrja fyrir opnum tjöldum vakti hins vegar undrun og vissi ekki á gott og fór sannast sagna illa í fundarmenn sem voru mættir til að spyrja, fá skýringar fyrir fullum sal og mótmæla.

Raunar kviknaði smá von um að múrar væru að falla þegar Alexandra Briem borgarfulltrúi sté á stokk og tjáði sig á fundinum um að andstaðan kæmi sér á óvart en tekið yrði tillit til sjónarmiða íbúanna. Það reyndist vera leikur einn fyrir hana að segja þetta og fólk trúði henni!

Og það reyndist sömuleiðis leikur einn fyrir meirihluta borgarráðs sl. fimmtudag að valta yfir vilja mikils meirihluta Grafarvogsbúa í þessu máli og byrja að úthluta lóðum í skipulagsferli sem ekki er enn lokið - og fólk er enn beðið um að gera athugasemdir við. Sumir telja raunar að verið sé að refsa íbúum Grafarvogs fyrir hin kröftugu mótmæli.

LEIKHÚS - OG LENGST AF Á BAK VIÐ TJÖLDIN

En um leikhús og tjöld. Fram til þessa hafa verið fluttar fréttir um leyndarhyggju og laumuspil af hálfu meirihlutans varðandi þéttingu byggðarinnar í Grafarvogi og þess gætt að sem minnst fengi að fréttast.

Þannig hafa sjálfstæðismenn reynt ítrekað að leggja fram formlegar bókanir í fundargerðir gegn þéttingastefnu meirihlutans en ekki haft erindi sem erfiði. Þess hefur verið gætt að þeirra sögn að fella tillögur þeirra um að koma mótmælunum á dagskrá og bóka þau.

TJÖLDIN DREGIN FRÁ

Svo rann fimmtudagurinn í síðustu viku upp og hinum nýju stýrum borgarinnar var mikið í mun að sýna vald sitt og úthluta lóðum í miðju ferli. Teningnum var kastað - grímunum var kastað og tjöldin dregin frá. Valdníðslan og yfirgangurinn blasti þá grímulaus við: Grafarvogsbúar hættið að kvarta og mótmæla, við förum okkar fram hvað sem þið segið - er upplifun Grafarvogsbúa.

„Samtalið og samvinnan“ sem nýr borgarstjóri hafði gumað af nokkrum dögum áður í ræðustól og á fjölum þessa leikhúss varð skyndilega hjóm eitt.

Í þessu eldheita þéttingarmáli virðast borgarfulltrúar meirihlutans ekki í vinnu fyrir Grafarvogsbúa heldur sýnist frekar einbeittur vilji að vinna gegn þeim og óskum þeirra. Áður á bak við tjöldin en núna grímulaust fyrir opnum tjöldum. - JGH

Alls 24 íbúðir settar á þennan litla blett fyrir neðan Torgið

Thu, 03 Apr 2025 18:24:44 GMT

Alls 24 íbúðir takk fyrir . Meirihluti borgarráðs hefur samþykkt að veita Félagsbústöðum vilyrði fyrir byggingarrétti á allt að 8 íbúðum á þessum litla bletti - sem kallast þróunarsvæði - fyrir neðan verslunarmiðstöðina Torgið. Á þessu sama svæði var sömuleiðis samþykkt að veita Bjargi íbúðafélagi vilyrði fyrir byggingarrétti á allt að 16 íbúðum.

Íbúar í fjölbýlishúsunum Hverafold 17, 19 og 21 fá þessar nýju íbúðir alveg ofan í sig. Bíllinn á myndinni stendur á bílastæði fyrir framan fjölbýlishúsið Hverafold 17. Þetta er náttúrulega alveg með ólíkindum.

Valtað yfir vilja Grafarvogsbúa og engu skeytt um mótmælin

Thu, 03 Apr 2025 17:43:45 GMT

Valtað yfir vilja Grafarvogsbúa! Fulltrúar meirihlutans í borgarráði Reykjavíkur samþykktu að veita vilyrði fyrir uppbyggingu félagslegra íbúða á fyrirhuguðum þéttingarreitum í Grafarvogi. Fulltrúar Sjálfstæðisflokksins kusu á móti tillögunum. Sagt er frá þessu í frétt á mbl.is núna síðdegis. Sjá fundargerð borgarráðs frá því í dag.

Þétting byggðar í grónum hverfum í Grafarvogi er mikið hitamál í Grafarvogi og er skemmst að minnast fund embættismanna með íbúum 20. mars sl. þar sem íbúar í Grafarvogi troðfylltu salinn í Borgum og mótmæltu tillögum að breyttu aðalskipulagi sem kynntar voru á fundinum. Svo mikil var andstaðan að allt fór í háaloft á fundinum. Þar mælti Alexandra Briem meðal annars og sagði að svo kröftug mótmæli kæmu henni á óvart og að tekið yrði tillit til sjónarmiða íbúa.

Tími til að leggja fram athugasemdir var upphaflega til 10. apríl en síðan hefur sá frestur verið framlengdur.

Fram kemur í fréttinni á mbl.is að m eirihlutinn í borgarráði hafi samþykkti að veita Félagsbústöðum vilyrði fyrir byggingarrétti á allt að átta íbúðum á nýju þróunarsvæði við Hverafold 7 . Á sama þróunarsvæði var samþykkt að veita Bjargi íbúðafélagi vilyrði fyrir byggingarrétti á allt að 16 íbúðum.

Hverafold 7 er þessi litli blettur fyrir neðan verslunarmiðstöðina Torg. Þarna er íbúðum troðið niður alveg ofan í þau fjölbýlishús sem þarna eru fyrir en billinn stendur á stæði fyrir framan þau.

Þá segir ennfremur í frétt mbl.is. „Meirihlutinn samþykkti einnig að veita Bjargi íbúðafélagi vilyrði fyrir byggingarrétti á allt að 18 íbúðum á nýju þróunarsvæði við Starengi og vilyrði fyrir byggingarrétti á allt að 14 íbúðum á nýju þróunarsvæði við Veghús. Þá samþykkti meirihlutinn að veita Búseta húsnæðissamvinnufélagi vilyrði fyrir byggingarrétti á allt að 52 íbúðum á nýju þróunarsvæði við Sóleyjarima.

Borgarráðsfulltrúar Sjálfstæðisflokksins, Hildur Björnsdóttir og Ragnhildur Alda Vilhjálmsdóttir, höfnuðu öllum tillögum á meðan borgarráðsfulltrúar meirihlutans samþykktu þær allar. Einar Þorsteinsson, borgarráðsfulltrúi Framsóknar, sat hjá við afgreiðslu.

„Hluti af þróun húsnæðisuppbyggingar í Grafarvogi eru reitir þar sem fyrirhugað er að byggja upp óhagnaðardrifið húsnæði í samstarfi við óhagnaðardrifin uppbyggingarfélög og tryggja þannig fjölbreyttum tekjuhópum og tekjulágum þak yfir höfuðið og aðgengi að öruggu íbúðarhúsnæði í langtímaleigu sem og búseturéttarlegu samhengi,“ sagði meðal annars í bókunum meirihlutans við allar tillögur.

Borgarráðsfulltrúar Sjálfstæðisflokksins sögðu að áformin væru gerð þvert á vilja íbúa.

Við Sóleyjarrima fyrir neðan Isavia (gamla Gufunesradíó). Búseti húsnæðissamvinnufélag fær vilyrði fyrir byggingarrétti á allt að 52 íbúðum.

Alexandra Briem borgarfulltrúi sagði á hitafundinum í Borgum að tekið yrði tillit til sjónarmiða íbúa og fundarmanna.

Hermann Björnsson, forstjóri Sjóvár, í Hluthafaspjallinu

Thu, 03 Apr 2025 10:39:58 GMT

HLUTHAFASPJALLIÐ. HERMANN Björnsson, forstjóri Sjóvár, er gestur okkar Sigurðar Más Jónssonar í nýjasta hlaðvarpsþætti okkar, HLUTHAFASPJALLINU, á Brotkast.is.

Hermann segir að sú stefna félagsins að einbeita sér að vátryggingastarfseminni hafi skilað góðum árangri. Félagið hafi aukið hlut sinn á tryggingamarkaðnum og það sé fyrst og fremst innri vöxtur. Samkeppnin við VÍS, TM og Vörð sé mikil en tvö þessara félaga eru í eigu bankanna, þ.e. TM og Vörður.

Hann fer yfir 10 ára sögu Sjóvár í Kauphöllinni og fram kemur að sú saga einkennist af miklu árangri félagsins.

Sjá hér nokkrar klippur úr viðtalinu við Hermann:

Ánægðastur með í rekstrinum: https://www.youtube.com/watch?v=zqvueU9EKBY

Aðhald að vera í Kauphölinni: https://youtu.be/vcm5BaSENo8

Íþróttir og stjórnendur: https://youtu.be/rTIvcn8dqlo

Gos hafið rétt norðan við Grindavík - innan varnargarða - beint á RÚV

Tue, 01 Apr 2025 11:32:00 GMT

Gos er hafið við Grindavík og sprugan opnaðist innan við varnargarðana. Sjá beint á RÚV hér:

Þögn GR-inga - þeir sömdu við borgina um lóðir á Korpu og Grafarholti árið 2017

Tue, 01 Apr 2025 10:56:30 GMT

Á meðan íbúar í Grafarvogi hafa undrast á að fyrirhugaðar 515 íbúðir á landi GR við Korpu hafi hvorki verið kynntar né minnst á þær í glærum embættismanna borgarinnar á íbúafundinum í þarsíðustu viku, 20. mars, þá hafa margir spurt sig hvers vegna ekki hafi heyrst hljóð úr horni GR-inga eftir að Þóra Þórsdóttir, íbúi við Starengi, vakti athygli fyrst á málinu og Grafarvogur.net hefur síðan fylgt því eftir enda ekki annað séð en að mikill meirihluti Grafarvogsbúa sé fyrst núna að frétta af Korpuíbúðunum.

Svarið við þögn GR-inga, Golfklúbbs Reykjavíkur, er komið í ljós; þeir sömdu við borgina 7. nóvember 2017 um að afsala sér þessum reitum á Korpu sem og reit í Grafarholtinu, fyrir ofan hringtorgið við Krókhnálsinn á leiðinni upp að klúbbhúsinu, gegn því að fá í staðinn stuðning borgarinnar við breytingar á Grafaholtsvellinum og endurbætur á Básum.

Þetta kemur fram í ágætri athugasemd Einars Karls Friðrikssonar við frétt Grafarvogur.net í gærkvöldi varðandi litabreytingar á 100 íbúða reitnum á Thorsvellinum við Korpu. Einar birtir samninginn - viljayfirlýsingu - sem Dagur B. Eggertsson gerði við GR-inga.

Tekið skal fram að hugmyndin um að selja þessar lóðir kom fyrst frá GR-ingum sjálfum til að fjármagna framkvæmdir en lóðirnar voru á aðalskipulagi innan marka golfvalla klúbbsins á Korpu og Grafarholti - „á nytjasvæði“ golfklúbsins.

VILJAYFIRLÝSING BORGARINNAR VIÐ GR-INGA 7. NÓV. 2017

„Lagt er til að borgarráð samþykki meðfylgjandi viljayfirlýsingu milli Golfklúbbs Reykjavíkur og Reykjavíkurborgar um mögulega uppbyggingu á aðstöðu klúbbsins í Grafarholti og á Korpúlfsstöðum. Jafnframt að fela Umhverfis- og skipulagssviði að hefja formlega deiliskipulagsvinnu byggða á fyrirliggjandi hugmyndum um að búa til nýjar lóðir í Grafarholti og á Korpúlfsstöðum.

Greinargerð:

Með erindisbréfi dagsettu 6. október 2016 skipaði borgarstjóri starfshóp um svæði golfklúbbs Reykjavíkur. Starfshópurinn var skipaður á grundvelli erindis klúbbsins um samstarf og styrk til að vinna frekar áætlanir varðandi uppbyggingu klúbbsins.

Eins og fram kemur í viljayfirlýsingunni er gert ráð fyrir því að skipuleggja lóðir annars vegar á Grafarholti við æfingasvæði Bása og hins vegar á Korpúlfsstöðum í framhaldi af Egilshöll.

Hefur skipulagið rýnt þessar hugmyndir og kynnt minnisblað í umhverfis- og skipulagsráði þar sem þessar fyrirhuguðu lóðir eru sýndar ásamt umsögn um hverja lóð. Er gert ráð fyrir því að hluti söluandvirðis þessara lóða standi undir þeirri uppbyggingu sem fyrirhugað er að fara í.“ Undir þetta skrifar Dagur B. Eggertsson borgarstjóri.

Hugmyndirnar komu upphaflega frá GR-ingum. Svæði 1: Thorsvöllur, tvær brautir. Svæði 2. Við Barðastaði, 2. holu á Sjónum. Svæði 3: Grafarholtsvöllur við enda Bása við Krókhálsinn. Svæði 4: Við Korpúlfstaðaveg.

Upphaf málsins má rekja til bréfs Golklúbbs Reykjavíkur til Reykjavíkurborgar 2. maí 2016 þar sem óskað var eftir 5 milljóna kr. styrk til að vinna frekari áætlanir um endurbætur á þróttamannvirkjum klúbbsins í Grafarholti.

Um bréf þetta segir: „ GR hefur þegar látið fara fram skoðun á mögulegri endurgerð golfvallarins í Grafarholti. Til að fjármagna mögulegar breytingar á vellinum býður klúbburinn fram fjögur svæði til mögulegrar uppbyggingar fyrir atvinnulóðir eða íbúðarhúsalóðir.

Skoðun skipulagsfulltrúa leiddi í ljós að til greina komi að fara í uppbyggingu á þeim svæðum sem GR leggur til, þó þurfi að skoða alla reitina betur í framhaldinu. Þá hefur skrifstofu eigna og atvinnuþróunar verið falið að kanna mögulega sölu Korpúlfsstaða en forsenda þess er ítarleg skoðun á skipulagsbreytingum kringum húsið. “

Hinn 1. nóvember 2017 var Áfangaskýrsla starfshóps um svæði Golfklúbbs Reykjavíkur lögð fram . Þar segir meðal annars: „Fyrir liggur umsögn fulltrúa skipulagsins í hópnum sem að kynnt hefur verið í skipulagsráði. Byggt á þessari skýrslu hefur skrifstofa eigna og atvinnuþróunar lagt mat á mögulegar tekjur sem gætu fengist af sölu lóðanna og borið það saman við mögulegan kostnað við uppbyggingu vegna aðstöðu til golfiðkunar.

Á þessu stigi er auðvitað talsverð óvissa í þessum tölum en það er alveg ljóst að ef einungis hluti þeirra lóða sem hugmyndir eru um að búa til þá geta tekjur af því staðið undir allri fjárfestingu í tengslum við uppbyggingu GR .“

Erlendar ríkisstyrktar fiskvinnslur innan ESB herja á íslensku fiskmarkaðina

Tue, 01 Apr 2025 08:39:08 GMT

TVÍSÝNIR TÍMAR HJÁ FISKVINNSLUM! Ægir Páll Friðbertsson , forstjóri Iceland Seafood International (ISI), mætti til okkar Sigurðar Más Jónssonar í hlaðvarpið okkar HLUTHAFASPJALLIÐ og það fór ekki á milli mála að hann hefur áhyggjur af stöðu fiskvinnslunnar á Íslandi eftir að ríkisstjórnin boðaði tvöföldun veiðigjalda.

Hann segir að ofan á vandann við tvöföldun veiðigjalda bætist að erlendar ríkisstyrktar fiskvinnslaur innan ESB herji núna á fiskmarkaði á Íslandi og flytja fiskinn óunnin út, t.d. til Póllands. Fyrir vikið fá íslenskar fiskvinnslur, sem reiða sig á fiskmarkaðina hér heima verulega minni afla til að vinna úr, og telur hannl að einhverjar þeirra muni gefast upp og að þeim muni augljóslega fækka. Þetta sé fiskvinnslur víða um landið.

„Ég giska á að það séu um sjö til átta þekktar fiskvinnslur á Íslandi sem eingöngu reiða sig á fiskmarkaðina,“ segir Ægir Páll og þær finna fyrir þessu. „Þetta eru fyrirtæki sem hafa verið að gera mjög góða hluti og skapað fjölda fólks vinnu.“

Fram kemur í spjallinu að útgerðirnar í landinu hafi líklegast keypt yfir 95% aflaheimilda sinna frá því framsaliið var leyft en sjávarútvegurinn var sjálfur látinn taka á sig skellinn þegar vinna þurfti sig úr hinu stórkostlea offramboði á skipum og vinnslustöðvum á áttunda og níunda áratugnum þegar „svartar skýrslur“ um afkomu fyrirtækja voru nánast daglegar fréttir.

Þá var brugðist við með framsali aflaheimilda til að góð fyrirtæki gætu keypt þau verr settu út úr greininni og hagræðingin í greininni hófst fyrir alvöru - og um leið varð samþjöppun í greininni.

Hvað er í gangi? Bleika gímaldið varð grænt í kvöld

Mon, 31 Mar 2025 22:41:58 GMT

Reykjavíkurborg virðist hafa breytt Bleika gímaldinu við Korpuvöllinn (Thorsvöllinn) í grænt í kvöld. Reiturinn hefur verið merktur bleikur, þ.e. svæði í þróun, í nokkra daga eða a.m.k. frá því að borgarstjóri kynnti málið í síðustu viku.

Grafarvogur.net fylgdi eftir frétt sinni um málið eftir hádegi í dag og þá var reiturinn merktur bleikur, þ.e. þróunarsvæði. En eftir að við birtum fréttina verður ekki annað séð en að litnum hafi verið breytt í grænan, sem táknar jú framtíðarsvæði.

Það er talað um að skipta litum þegar menn verða rjóðir eða fölir. En hér hefur umdeilt gímald skipt litum - brugðið sér úr bleikum lit í grænan. Og meira að segja dökkgrænan þegar slegið er í það. Til stendur að þar verði áfram 100 íbúðir í framtíðinni - og 515 nýjar íbúðir við Korpuvöllinn á þremur reitum.

Það verður gaman fyrir kylfinga að leggja bílnum við Korpuna í framtíðinni. En líklega er gert ráð fyrir að þeir mæti með settið í strætó.

Að skipta litum. Svæðið var bleikt kl. 15:00 í dag (þróunarsvæði) þegar Grafarvogur.net flutti fréttir af málinu. En eftir fréttina verður ekki annað séð en að bogarstarfsmenn hafa náð í nýjan tússpenna og litað gímaldið grænt, þ.e. sem framtíðarsvæði. Svo sem bitamunur en ekki fjár. Áfram er gert ráð fyrir 100 íbúðum.

Reiturinn varð skyndilega grænn í gærkvöldi - og tengingin við gímald um leið sterkari.

Heiða Björg Hilmisdóttir á fundinum í síðustu viku. Í kostaðri kynningu á FB segir hún að þar hafi farið fram „mikilvægt samtal á milli íbúa og sérfræðinga“ í byggingargeiranum. Það er spurning hvernig það samtal fór fram? Þá var liturinn bleikur en varð grænn í kvöld á reitnum við Thors-völlinn við Korpuvöllinn.

Horft til Korpu af bílastæðinu við Bláu sjoppunni við Starengi. Brátt verður þetta veröld sem var. Til stendur að reisa fjölbýlishús á þessum litla bletti fyrir framan sjoppuna sem birgja mun ökumönnum sýn í stóraukinni umferð framtíðarinnar.

Afastrákarnir hjálpuðu til - hér er hægt að lesa Fjármálablaðið á pdf-formi

Mon, 31 Mar 2025 16:28:16 GMT

AFASTRÁKAR HJÁLPA TIL. Dreifingin á blaðinu mínu Fjármál og ávöxtun gekk bara vel um helgina. Ég fékk afastrákana mína úr Stykkishólmi, þá Alexander Amlin og Ísak Amlin Guðmundssyni , í heimsókn og gistingu um helgina og þeir voru spenntir fyrir blaðinu enda eiga þeir báðir sparibauka og safna grimmt.

En kæru landsmenn; hér er hægt að skoða blaðið á pdf-formi; aðeins að smella í hlekkinn og rúlla í gegnum blaðið í rólegheitum. Auðvelt líka að stækka letrið við lestur á pdf-forminu.

Það var ánægjulegt að sjá að blaðið var uppselt í Bónus í Spönginni í gærdag og bætti ég við blöðum.

Þegar afastrákarnir héldu heim á leið í gær með dóttur minni þá settu þeir nokkur blöð í Bónus í Borgarnesi og heimabænum Stykkishólmi. Þetta eru grallarar og með á nótunum í að safna. Hér má ekki sjást tóm pepsí-dós á heimilinu án þess að hún fari ekki ofan í pokann til þeirra. - JGH

100 íbúðir á Bleika gímaldinu á Korpuvelli - 515 íbúðir við Korpuvöll komnar á kortið

Mon, 31 Mar 2025 15:51:27 GMT

BLEIKA GÍMALDIÐ við KORPUVÖLLINN , Thorsvöllinn , mun verða með 100 nýjar íbúðir . Vegna fjölda fyrirspurna til Grafarvogur.net um hvort fréttin geti verið rétt að „lauma“ eigi gímaldi inn á Korpuvöllinn - gegnt Starengi - hefur vefurinn farið í málið í dag og skoðað ýmsa anga þess og svarið er: Já, þetta er rétt!

Ekkert var minnst á þetta á íbúafundinum 20. mars og þess vegna ræða Grafarvogsbúar um það sín á milli að „lauma“ hafi átt þessu inn.

Og það sem meira er: Borgin sér fyrir sér að taka tvo aðra reiti við völlinn og byggja á þeim á næstu árum, reitir sem eru komnir inn á kortið.

Græna gímaldið rétt norðan við klúbbhúsið á Korpúlfsstöðum. Gert er ráð fyrir 300 íbúðum.

Merkt er með grænu að fyrirhugað sé að reisa 300 nýjar íbúðir við 9. braut á LANDINU (níu holu braut á Korpuvellinum) og 115 nýjar íbúðir við 2. braut á SJÓNUM (níu holu braut á Korpuvellinum meðfram sjónum).

Alls eru því 515 íbúðir komnar á kortið við Korpuvöllinn (eða innan svæðis hans kynnu einhverjir að segja) og má ljóst vera að kylfingar í GR verða í framtíðinni að gæta þess að skjóta ekki í byggingarkrana þegar hafist verður handa við þessar byggingaframkvæmdir.

Þá er verslunarsvæði á stærð við Skeifuna fyrirhugað á Korputúni (við hliðina á Korputorgi) og mun það svæði ná alveg niður að Korpu-ánni við flötina á 1. braut á SJÓNUM - flöt sem blasir við þegar ekið er yfir brúna við Korpúlfsstaðaveg. - JGH

Bleiki reiturinn er 115 íbúða byggð alveg ofan í 2. braut á SJÓNUM (níu holu braut á vellinum).

New Paragraph

Skáksveit Rimaskóla keppir á Norðurlandamóti í Finnlandi næsta haust

Sun, 30 Mar 2025 15:31:58 GMT

TIL HAMINGJU. Skáksveit Rimaskóla keppir á Norðurlandamóti skáksveita barnaskóla í Finnlandi í september nk. haust eftir að hafa sigrað á Íslandsmóti barnaskólasveita árið 2025.

Þetta var fjölmennasta Íslandsmót barnaskólasveita til þessa og var haldið í Rimaskóla á dögunum. Alls settust 160 krakkar að tafli í íþróttahúsi skólans og áhuginn skein úr andliti allra. Þetta var hörkukeppni.

Myndin hér að ofan er af A-sveit Rimaskóla, Íslandsmeisturunum 2025. Frá vinstri. Sigrún Tara, Emilía Embla, Emilía S. og Tristan Fannar.

Mikið óskaplega getum við Grafarvogsbúar annars verið stoltir af skákáhuganum í hverfinu en þar hefur Helgi Árnason , fyrrum skólastjóri í Rimaskóla, unnið algert þrekvirki við að halda utan um starfið til margra ára. Hann er formaður skákdeildar Fjölnis.

Rimaskólakrakkar fóru á algjörum kostum í mótinu. A-sveit skólans varð Íslandsmeistari 2025 eftir glæsilegan sigur í æsispennandi skákmóti.

Tefldar voru 8 umferðir. Rimaskólakrakkar náðu forystu eftir 6 umferðir, bættu í og fengu 7 vinninga úr 8 síðustu skákunum. Allar Rimaskólasveitirnar komust á verðlaunapall og allir æfa krakkarnir Skákdeild Fjölnis; Íslandsmeisturum félagsliða.

Það verður A-sveit skólans sem teflir á Norðurlandamótinu í Finnlandi í september.

Úrslitin urðu annars þessi:

A-sveit Rimaskóla - Íslandsmeistarar 2025

B-sveit Rimaskóla - 1. sæti B-sveita.

C-sveit Rimaskóla - 1. sæti C-sveita.

D-sveit Rimaskóla - 1. sæti D- sveita.

(Erum því miður ekki með mynd af B-sveitinni).

Besta C sveitin : Rökkvi, Jóhann Jakob, Anh og Óskar Daníel

Besta D sveitin. Alexander F. , Alexander K. , Erlendur, Benedikt og Þóra. Bekkjarsystkini í Rimaskóla.

Íslandsmeistarabikarinn í höfn. Frá vinstri: Jóhanna, varaforseti Skáksambands ÍslandsÍ, Emilía S. , Sigrún Tara, Emilía Embla, Tristan Fannar og Helgi Árnason liðsstjóri.

Hækkun á veiðigjöldum - aukin samþjöppun í kjölfarið

Sun, 30 Mar 2025 13:47:36 GMT

Mál málanna. Einhver mesti reynsluboltinn í íslenskum sjávarútvegi Ægir Páll Friðbertsson , forstjóri Iceland Seafood International (ISI), mætti í nýjasta þátt Hluthafaspjallsins til okkar Sigurðar Más Jónssonar og fór yfir mál málanna, áhrif aukinnar skattheimtu á sjávarútveginn og rifjar upp að hann vann einu sinni sem ráðgjafi fyrir Steingrím J. Sigfússon. Hann segir ljóst að ef auðlindagjöldin hækka að þá verði meiri samþjöppun í sjávarútvegi á Íslandi.

Gímaldi „laumað inn“ á Korpuvöllinn - íbúar við Starengi missa fjallasýnina

Sun, 30 Mar 2025 13:13:38 GMT

Áformað að byggja á Korpuvellinum. Það er fyllsta ástæða til að vekja athygli á færslu Þóru Þórsdóttur á FB-síðu Íbúa í Grafarvog i sl. föstudag. Hún bendir á að í kynningu borgarstjóra í nýliðinni viku hafi stórum byggingareit verið komið fyrir á æfingavellinum á Korpu.

Það var ekki orð um þetta á íbúafundinum um daginn og miðað við tillögurnar sem borgarstjóri kynnti fyrir nokkrum dögum líta margir Grafarvogsbúar svo á að búið sé að „lauma“ gímaldi - stórum íbúðakjarna - inn á golfvöllinn við Korpu miðað við þær teikningar sem Þóra birtir.

EKKI ORÐ Á FUNDINUM

Ekki orð á fundinum - en viku síðar birtist mynd sem sýnir að borgin kroppar land af Korpu-vellinum. Um er að ræða væna sneið af svonefndum Thors-velli sem er níu holur æfingavöllur og vinsæll af þeim sem eru að byrja í íþróttinni - og þeim sem vilja skjótast í golf í klukkutíma án þess að spila á aðalvellinum. Þarna eru sömuleiðis vinsælir hjólastígar og þetta er gott útivistarsvæði. Með þessum nýju byggingum hverfur fjallasýn þeirra sem byggja í Starenginu.

Viðbrögðin við færslu Þóru eru á einn veg - að þetta sé galið og komi verulega á óvart! Raunar er undarlegt að ekki hafi heyrst hljóð úr horni GR-inga vegna málsins því borgin er augljóslega að stíga stórt skref inn á golfvöllinn með byggingar - og óttast núna margir um afdrif Korpuvallar fyrst borgin er búin að taka fyrsta skrefið inn á völlinn. Hvað næst?

Þóra dregur hér hring utan um hið nýja gímald á Korpuvellinum - nýjan íbúðakjarna sem skyndilega birtist í kynningu borgarstjóra í nýliðinni vikunni en sást ekki á umtöluðum hitafundi með Grafarvogsbúum 20. mars. Hvers vegna voru þessi áform ekki kynnt á íbúafundinum? Er verið að laumupúkast með þetta?

Svona var þéttingin kynnt á íbúafundinum 20. mars. Hvorki stafkrókur né mynd af gímaldinu - nýjum, stórum íbúðakjarna á Thors-vellinum á Korpu.

ÉG FÉKK ÁFALL!

En hér kemur færsla Þóru sl. föstudag: „Ég var að horfa á kynningarfund borgarstjóra á netinu áðan og fékk áfall! Búið er að bæta við stórum byggingareit austan megin við Starengið hjá æfingavelli golfklúbbsins! Þetta kemur til með að taka alla fjallasýn af okkur hér í Starenginu og loka þetta annars fallega hverfi inn í múrkössum!

Ég bið ykkur íbúar Grafarvogs um að mótmæla þessu ásamt annarri þéttingu í Grafarvogi og standa vörð um náttúruna okkar.
Hægt er að senda mótmæli inná skipulagsgatt.is “.

Horft til Korpuvallar af bílastæðinu við Bláu sjoppuna. Tveir byggingareitir blasa við. Til stendur að byggja á þessum litla bletti fyrir framan sjoppuna niður að hringtorginu og svo kemur nýja stóra gímaldið - nýi íbúðakjarninn - á golfvelli Korpu handan við Víkurveginn og birgir bæði ökumönnum og íbúum við Starengi sýn. Ekki var minnst á þessi áform á Korpuvellinum á eldheitum íbúafundi 20. mars. Hvers vegna ekki?

Annað sjónarhorn. Íbúar í brúnu húsunum við Starengið missa útsýnið þegar byggt verður á litla blettinum fyrir neðan Bláu sjoppuna - og svo missa þeir íbúar sem búa ofar við Starengið sömuleiðis fjallasýn þegar nýja gímaldið - nýi, stóri íbúðakjarninn inni á golfvellinum verður byggður.

Jóhann Leví í Bónus fékk fyrsta eintakið af tímaritinu Fjármál og ávöxtun

Fri, 28 Mar 2025 19:45:43 GMT

BESTA ÁVÖXTUNIN. Ég hóf að dreifa blaðinu mínu Fjármál og ávöxtun í stórmarkaði og á bensínstöðvar í dag og auðvitað byrjaði ég í mínum kæru heimahögum; Grafarvoginum. Þetta er fríblað og um að gera að grípa eintak. Sá sem fékk fyrsta eintakið afhent var hinn geðþekki Jóhann Leví Jóhannsson starfsmaður Bónus í Spönginni en þar hefur hann unnið samfellt í ellfu ár og löngu þekktur á meðal Grafarvogsbúa fyrir lipurð og liðlegheit. Þegar ég kom með bunkann í Bónus heilsuðumst við að venju og að sjálfsögðu rétti ég honum fyrsta eintakið.

Grafarvogsbúar geta nálgast blaðið „innanbæjar“ í Bónus, Hagkaup, Olís og N1.

Blaðið er sneisafullt af upplýsingum um raunávöxtun allra innlánsreikninga á Íslandi og allra sjóða verðbréfafyrirtækjanna - sem og ávöxtun lífeyrissjóðanna. Þá birti ég eignir og skuldir heimilanna, hversu mikils virði bílafloti landsmanna er sem og hvað heimilin eiga í bankainnstæðum og verðbréfum.

Þá er birt yfirlit yfir ávöxtun hlutabréfa allra skráðra fyrirtækja í Kauphöllinni - þ.e. hve gengi þeirra hækkaði mikið á síðasta ári - og svo eru auðvitað upplýsingar um gull og græna skóga. En gullið hefur hækkað um 55% á síðustu fjórtán mánuðum og er únsan í fyrsta sinn komin yfir þrjú þúsund dollara.

Þetta er áttunda árið sem ég gef þetta blað út og tek saman yfirlit yfir raunávöxtun allra innlánsreikninga og sjóða verðbréfafyrirtækjanna en þar er jú af nokkru að taka. Grípið eintak - gjörið svo vel.

Það tók sig raunar upp gömul nostalgía þegar ég skaust í PrentmetOdda fyrr í vikunni til að ná í blaðið en ég var samfellt í tuttugu og fimm ár ritstjóri Frjálsrar verslunar og í um tólf ár annar tveggja ritstjóra Skýja. Á meðfylgjandi mynd er ég með Guðmundi Óskarssyni, framleiðslustjóra PrentmetsOdda.

Gamla, góða prentlyktin er í bílnum þessa dagana. - JGH

Með Guðmundi Óskarssyni, framleiðslustjóra PrentmetsOdda, þegar ég náði í fyrstu eintökin í prentsmiðjunni fyrr í vikunni.

Blaðið er sneisafullt af upplýsingum um raunávöxtun allra innlánsreikninga á Íslandi og sjóða allra verðbréfafyrirtækjanna - sem og ávöxtun lífeyrissjóðanna, eignir og skuldir heimilanna, hversu mikils virði bílafloti landsmanna er og auðvitað koma gull og grænir skógar við sögu í blaðinu.

Það er nú svolítið síðan að þessi mynd var tekin

Fri, 28 Mar 2025 13:16:55 GMT

VERÖLD SEM VAR. Gamla myndin. Það er nú svolítið síðan að þessi mynd var tekin en mikið er gaman að rýna í hana. Það er Guðbjartur Walter H. Ólafsson sem birtir hana á Facebook. Þarna má sjá Húsgagnahöllina og háhýsi Íslenskra aðalverktaka. Prentsmiðjan Oddi er þar fyrir neðan. Fremst á myndinni til hægri er húnsæði Osta- og smjörsölunnar.

Engin er byggðin í Grafarvogi og að sjálfsögðu engin Gullinbrú en hafist var handa við gerð hennar eftir kosningarnar 1982 þegar Davíð Oddsson vann kosningasigur meðal annars út á að byggja meðfram ströndinni og reisa nýtt 20 þúsund manna hverfi í Reykjavík, Grafarvog. Sjálfur giska ég á að myndin sé tekin í kringum 1973.

Alexandra biðst afsökunar á hegðun sinni á hitafundinum í Grafarvogi

Fri, 28 Mar 2025 12:44:30 GMT

Alexandara Briem borgarfulltrúi biðst í frétt á mbl.is afsökunar á hegðun sinni gagnvart einum fundargesti á hitafundinum í Grafarvogi í síðustu viku. Rætt er við Bergþóru Long, 28 ára Grafarvogsbúa, sem segir að Alexandra hafi verið ógnandi við móður sína á fundinum.

„Mér þykir óskaplega leitt að hún hafi upplifað það þannig, enda fór ég og bað hana innilegrar afsökunar þegar ég áttaði mig á því að henni liði þannig. En það var aldrei tilgangur minn að vera ógnandi,“ segir Alexandra í viðtali við mbl.is í dag.

„Í rauninni upplifði ég mig í þremur tiltölulega heitum samtölum samtímis þegar þetta kom upp. Það voru læti þarna og ég get alveg skilið að fólki líði illa yfir þessu. Mér leið ekkert vel heldur og auðvitað átti ég ekki að hækka róminn svona. Ég biðst afsökunar og mun reyna að passa mig í framtíðinni,“ segir Alexandra.

Bergþóra var á fundinum ásamt móður sinni sem hún segist hafa haft það á orði að borgin væri ljúga varðandi uppbyggingu á samgöngum í kringum byggingarreit í Jöfurbás í Gufunesi þar sem tvær blokkir hafa risið. Í framhaldinu hafi Alexandra brugðist ókvæða við.

Segir hún Alexöndru hafa „öskrað“ á móður sína, sett bringuna fram og baðað út höndum með kreppta hnefa. Hún er sögð hafa hækkað rödd sína og sagt „ertu að segja að ég sé að ljúga.“

Sjálf segist Alexandra ekki kannast við að hafa verið með kreppta hnefa en segir að sér þyki atvikið leitt og sér eftir því að hafa hækkað róminn. - JGH

Höldum vöku okkar - munum 10. apríl! „Við erum hér,“ segir borgin

Wed, 26 Mar 2025 22:34:47 GMT

VIÐ ERUM HÉR! Það er mikilvægt að Grafarvogsbúar haldi vöku sinni og sendi inn athugasemdir til borgarinnar vegna breytinga á aðalskipulaginu. Hitafundurinn í Borgum í síðustu viku var alveg skýr - fundarmenn höfnuðu öllum tillögunum. Á fundinum var þessari glæru brugðið á skjáinn og við blasti: VIÐ ERUM HÉR! Og mikið gert úr HÉR!

Bent var á að Grafarvogsbúar gætu gert formlegar athugasemdir fyrir 10. apríl.

Svo verður farið í að auglýsa skipulagstillögurnar í maí og staðfesting á nýju skipulagi verður svo í júlí nk.

HVAÐ SEM TAUTAR OG RAULAR

Það fór ekki á milli mála að við þessa glæru leit fundurinn svo á - svo ekki sé talað um skipulag fundarins - að verið væri að keyra breytingarnar í gegn hvað sem tautar og raular.

Við erum hér - hvar ert þú? Óneitanlega kemur sú setning úr hinni mjög svo umdeildu Símaauglýsingu frá 2012 með Jóni Gnarr og fleirum í huga við þessa miklu upphrópun: VIÐ ERUM HÉR!

En munum 10. apríl - gera þarf athugasemdir fyrir þann tíma. Höldum vöku okkar.

Höldum vöku okkar; það er verið að keyra málið áfram. Drög voru kynnt á hitafundinum í síðustu viku. Tillögur íbúa þurfa að vera komnar fyrir 10. apríl. Þetta verður auglýst í maí og staðfest í júlí í sumar.

Mikill einhugur var á meðal fundarmanna að fella þær tillögur sem kynntar voru á fundinum. Nú er spurningin - hversu mikið tillit verður tekið til óska fundarins?

Bjuggu til listaverk úr kössum af skákklukkum

Wed, 26 Mar 2025 22:01:26 GMT

LISTAVERK. Það er með eindæmum ánægjulegt hversu mikill skákáhugi er hjá ungu kynslóðinni í Grafarvogi og þar á Helgi Árnason, fyrrum skólastjóri í Rimaskóla, mesta heiðurinn af mörgum sem leggja hönd á plóginn í þessari göfugu íþrótt. Þessa mynd frá helga rákumst við á og sýnir að það er gaman á æfingum - það er líka fyrir mestu.

Þessar tvær stúlkur fengu þá hugmynd að búa til listaverk úr kössunum utan af skákklukkunum. Byrjuðu að raða þeim upp og spennan gekk út á hersu hátt væri hægt að raða án þess að listaverkið gæfi eftir. Stórskemmtileg mynd. Vel gert!

Og auðvitað fáum við að sjá myndina þar sem listaverkið er í fullri stærð með þessum stoltu listamönnum.

Kassaturn. Það er gaman á skákæfingunum hjá Fjölni. Líf og fjör - og listaverk.

Fjölnisstelpan Emilía Sigurðardóttir sigurvegari á Barnaskákmóti KR

Wed, 26 Mar 2025 21:47:06 GMT

TIL HAMINGJU. Emilía Sigurðardóttir í Rimaskóla sigraði með glæsibrag á Barnaskákmóti KR um síðustu helgi. Hún vann allar sínar skákir og lenti ein í efsta sæti. Þetta var glæsilegt skákmót hjá KR-ingum og auðvitað boðið upp á pítsur og síðan var teflt af miklum eldmóð í tveimur flokkum.

Emilía er ein virkasta skákkona landsins á barnaskólaaldri og náði verðlaunasæti á síðustu Bikarsyrpu TR fyrr í mánuðinum.

Emilía er í einstökum hópi Rimaskólastúlkna sem hafa verið nær ósigrandi á öllum grunnskólamótum. Til hamingju Emilía með glæsilegan sigur!

Baráttan er hafin: Sundagöng frekar en Sundabraut

Tue, 25 Mar 2025 13:27:01 GMT

SUNDAGÖNG í stað Sundabrautar. Stofnaður hefur verið baráttuhópur á Facebook fyrir því að byggja frekar jarðgöng - Sundagöng - en Sundabraut. Grafarvogsbúinn og þingmaðurinn Guðlaugur Þór Þórðarson er á meðal þeirra sem standa fremstir í flokki fyrir þessu baráttumáli sem svo sannarlega snertir alla Grafarvogsbúa. Guðlaugur hefur látið gera meðfylgjandi teikningu af hugsanlegri leið jarðgangnanna.

FB-síða hópsins má finna hér með því að smella - annars er hún þessi: https://www.facebook.com/share/1KkSrDnVK3/

FRÁ LAUGARNESI UPP Á KJALARNES

Á síðunni segir: „Þetta eru jarðgöng sem myndu liggja frá Laugarnesi upp á Kjalarnes og kæmu í stað fyrirhugaðra Sundabrautar. Hafa mætti munna við Laugarnes, Viðey, Grafarvog, Geldinganes, Mosfellsbæ, Álfsnes og á Kjalarnesi.

Heildarkostnaður við brúarleiðina var árið 2021 metinn um 69 milljarðar króna, samanborið við 83 milljarða króna fyrir jarðgöng. Tölur hafa hækkað síðan en þetta er hlutfallslega ekki mikill munur þegar gæði og notaðgildi eru borin saman og litið til framtíðar.

Jarðgöng eru mun betri kostur út frá umhverfissjónarmiðum og notagildi. Þau draga úr sjónrænum áhrifum, varðveita byggingarland í Reykjavík og Mosfellsbæ, stuðla að betri hljóðvist og stytta leiðina meira en braut.

Mikilvægt er að Sundagöng verði skoðuð betur sem valkostur við Sundabraut áður en endanleg ákvörðun um framkvæmdir er tekin .“ - JGH

Guðlaugur Þór Þórðarson , þingmaður og Grafarvogsbú. Hér er hann á hinum funheita íbúafundi í Grafarvogi um daginn þar sem tillögum um breytt aðalskipulag og þéttingu byggðar í Grafarvogi var hafnað all hressilega.

Mistur er heilsubúðin við Stórhöfða með dulúðlega nafnið

Mon, 24 Mar 2025 22:02:38 GMT

INNLIT Í FYRIRTÆKI

Mistur við Stórhöfða 33 er heilsubúðin með dulúðlega nafnið. Það er líka einhver seiðandi stemning þegar inn er komið því þetta er heill heimur út af fyrir sig og þarna kennir margra grasa; eðlilega, þetta er heilsubúð. Allt byrjaði þetta sem lítið ævintýri fyrir ellefu árum í bílskúrnum hjá Þórunni Björk Pálmadóttur og hefur heldur betur undið upp á sig. Þetta er bæði heildverslun og smásala.

Það er létt yfir þeim stöllum í Mistri; Þórunni Björk Pálmadóttir, til vinstri, og Lindu Sveinbjörnsdóttur. Þórunn er eigandi Misturs og stofnaði heilsubúðina í bílskúr heima hjá sér í Foldahverfinu fyrir ellefu árum.

„Við seljum í apótek og heilsubúðir en hingað koma líka fastagestir úr Grafarvoginum og hafa á orði að þeir nenni ekki niður í bæ; enda miklu auðveldara að rúlla við hjá okkur,“ segir Þórunn.

En hvernig kom þetta nafn til? Mistur? „Ég lét hugann reika og það voru endalausar uppástungur með nafn en einhvern veginn endaði ég alltaf á þessu nafni. Ég veit ekki hvað það var, ef til vill þetta dulúðlega við nafnið sem greip mig,“ segir Þórunn Björk.

Þetta er þrælskemmtileg verslun og drekkhlaðin af heilsuvörum, lífrænum vörum og ýmsum forvitnilegum smáhlutum, tækjum og tólum - allt tengt heilsunni. „Við erum með lífræna vottun frá vottunarstofunni Tún.“

Margs konar Moya-te.

Með Þórunni í versluninni starfar Linda Sveinbjörnsdóttir. Þær eru báðar utan af landi en Grafarvogurinn - og hið dásamlega útsýni sem þær hafa yfir voginn úr versluninni heillar þær. Linda er frá Bolungarvík en Þórunn er alinn upp í Vestmannaeyjum.

„Ég vann lengi hjá Kolbrúnu grasalækni, Jurtaapótekinu, sem og í Heilsuhúsinu, áður en ég kom hingað til Þórunnar,“ segir Linda.

Vörumerkin eru margs konar. Moya-teð er vinsælt sem og engiferte sem hægt er að kaupa samkvæmt vigt. Svo eru þarna fjöldinn allur af vítamínum. En þarna er líka hægt að næla sér í inniskó ef manni er kalt á tánum, teppi, klakabox, eplaskera, kústa og áfram mætti telja af frumlegum vörum.

Ég vissi svo sem ekki á hverju ég ætti von þegar ég leit þarna inn. En Mistur kom mér á óvart - svo mikil er fjölbreytnin. - JGH

Vítamín.

Klakabox og eplaskeri.

Gamaldags vendir sópa best.

15 ára strákur í marki meistaraflokks Fjölnis

Mon, 24 Mar 2025 14:35:27 GMT

15 ára markvörður meistaraflokks. Hún var athyglisverð fréttin sem Fjölnismenn settu inn um Frosta Hjaltason, 15 ára markvörð 3ja flokks Fjölnis, um að hann hefði leikið sinn fyrsta leik með meistaraflokki karla nú á dögunum.

Frosti, sem er fæddur árið 2010, kom þá inn á í æfingaleik gegn HK og átti flotta innkomu.

Þess má geta að Frosti er á yngra árinu í 3. flokki.

Arna Ýrr sóknarprestur ræddi þáttaröðina Adolescence í prédikun

Mon, 24 Mar 2025 11:19:24 GMT

Arna Ýrr Sigurðardóttir, sóknarprestur í Grafarvogi, ræddi um börn ljóssins í prédikun sinni í gær og kom meðal annars inn á þáttaröðina Adolescence á Netflix sem þykir taka mjög vel á hnífsstungum meðal unglinga sem er orðið stórt vandamál víða um heim. Arna Ýrr gagnrýndi sömuleiðis þau orð Elon Musk að samkennd væri einn helsti veikleiki Vesturlanda. Sagði hún að

mannfræðingar hefðu bent á að sterk tengsl væru milli samkenndar og þess að siðmenning mótaðist.

ÞÁTTARÖÐIN ADOLESCENCE

En grípum niður í prédikun Örnu Ýrr um stóraukna glæpi í formi hnífstungna: „Ef þið hafið horft á þáttaröðina Adolescence á Netflix, sem er ein umtalaðasta þáttaröðin í dag, um 13 ára dreng sem myrðir skólasystur sína, þá sjáum við birtingarmynd þess sem getur gerst þegar sundrungin vex í okkar nærumhverfi.

Þegar sundrungin birtist í skólastarfinu, í unglingahópunum okkar, og ákveðnir hópar fara að dýrka einhverja skakka mynd af því sem kallast karlmennska, en er ekkert annað en andi ofríkis og sundrungar. Þessi þáttaröð lýsir því hvernig þetta hefur áhrif á einstaklinga, hvernig sumir verða fórnarlömb, og aðrir gerendur, og hvaða ábyrgð við berum öll; foreldrar, fjölskylda, nærsamfélagið og skólinn.“

RIDDARAR KÆRLEIKANS - BÖRN LJÓSSINS

„Og þarna getum við öll gert eitthvað og haft áhrif. Við þurfum að tala saman um hvað það er að vera manneskja. Hvernig okkur gengur öllum betur ef við vinnum saman, sýnum samkennd og leyfum okkur að sýna okkar veiku hliðar og hjálpa hvert öðru.

Halla Tómasdóttir forseti hefur talað um riddara kærleikans. Páll postuli talar um börn ljóssins . Hann segir í texta dagsins: Eitt sinn voruð þið myrkur en nú eruð þið ljós í Drottni. Hegðið ykkur því eins og börn ljóssins – því að ávöxtur ljóssins er einskær góðvild, réttlæti og sannleikur.

Það eru þessir ávextir sem við viljum sjá, í samfélaginu okkar, og líka í okkar lífi. Góðvild, réttlæti og sannleikur. Þetta er ekki hugarfar þess sem beitir ofríki og sundrar og tvístrar. Þetta er ekki hugarfar þess sem telur að samkennd sé veikleiki. Þetta er hugarfar Krists. Verðið því eftirbreytendur Guðs svo sem elskuð börn hans, segir Páll postuli.

Lifið í kærleika eins og Kristur elskaði okkur og lagði sjálfan sig í sölurnar fyrir okkur . Þetta er verkefnið okkar, og þetta eru verkfærin okkar: Samkennd, kærleikur, góðvild og réttlæti. Þá lifum við sem riddarar kærleikans, þá erum við sannarlega börn ljóssins.“

Alexandra við RÚV: „Verðum að ná lendingu sem íbúar Grafarvogs geta verið sáttir við“

Mon, 24 Mar 2025 10:43:49 GMT

RÚV fjallar um hitafundinn sl. fimmtudag um skipulagsmál í Grafarvogi og ræðir við Alexöndru Briem borgarfulltrúa þar sem hún segir að andstaðan við tillögurnar á fundinum hafi komið sér á óvart. Hún segir við RÚV að til standi að ná lendingu sem íbúar Grafarvogs geti verið sáttir við. En fólk verði að senda inn athugasemdir.

Á fundinum sjálfum sagði hún raunar í hita leiksins: „Það verður tekið fullt tillit til þess sem þið eruð að segja og biðja um ,“ líkt og Grafarvogur.net nefndi í frásögninni af fundinum.

„Já, þetta var það, því miður,“ segir Alexandra við RÚV. Auðvitað var mjög gott að heyra að íbúar í Grafarvogi hafa miklar skoðanir og mikla ástríðu fyrir sínu hverfi. Það var náttúrlega töluvert verið að draga saman áformin miðað við fyrri ábendingar, en við fundum það samt alveg að fólkið sem var þarna, allavega þeir sem töluðu við okkur, þeim fannst ekki nógu mkið gert í að draga úr þessu og vildu ganga enn lengra. Við náttúrlega verðum að reyna að taka tillit til þess og skoða þetta, en á sama tíma erum við líka að meta almennt húsnæðisþörf í Reykjavík þannig að við þurfum að reyna einhvern veginn að reyna að ná einhverri lendingu í þessu sem fólk getur verið sátt við,“ segir Alexandra Briem borgarfulltrúi Pírata.

DÝPRA Á ÓSÆTTINU EN VIRTIST

Hún segir það hafa komið sér aðeins á óvart hversu mikil andstaðan væri enn miðað við hversu mikið hafi verið búið að draga úr þeim hugmyndum sem mættu mestri andspyrnu og mikil vinna hafi verið lögð í að bæta útsýni, útivistarsvæði og fleira.

„Það er kannski dýpra á þessu ósætti en maður hafiði kannski ímyndað sér.“

FÓLK VERÐI AÐ SENDA INN ATHUGASEMDIR

Alexandra segir ennfremur við RÚV að fólk verði að senda inn sínar athugasemdir og skoða þurfi hvort hægt sé að eiga meira og dýpra samtal við íbúa hverfisins. Á fundinum var nefnt að verið væri að koma miðbæjarskipulagi á í úthverfinu, en Alexandra segist algjörlega ósammála því, þarna sé lagðir til reitir sem séu ekki mjög þéttir, há byggð eða hverfiskjarnar.

„Ég myndi ekki segja að þetta sé einhvers konar miðbæjarskipulag, alls ekki, þetta er bara í töluverðu samræmi við þá þéttni sem er í Grafarvogi nú þegar,“ segir Alexandra við RÚV.

Biskup predikaði í faðmi magnaðrar altaristöflu

Mon, 24 Mar 2025 10:19:34 GMT

Biskup Íslands, sr. Guðrún Karls Helgudóttir, prédikaði í þéttsetinni Skálholtskirkju í sunnudagsmessu í gær. „Ég tók þátt í dásamlegri messu og fékk það hlutverk að prédika og blessa söfnuðinn - og þjónaði ásamt sr. Kristínu Þórunni sóknarpresti, Bergþóru Ragnarsdóttur djákna og sr. Kristjáni Björnssyni vígslubiskupi. Þá má ekki gleyma organistanum Jóni Bjarnasyni og Kór Skálholtskirkju sem buðu upp á fagra tónlist og leiddu okkur í söng. Að messu lokinni var boðið upp á súpu og heimabakað brauð á veitingastanum Hvönn,“ segir biskup um heimsókn sína í Skálholtskirkju í gær.

Dr. Gunnlaugur A. Jónsson , fyrrum prófessor við guðfræðideild Háskóla Íslands í áratugi, sótti messuna og segir í færslu á FB að í áheyrilegri prédikun hafi biskup ekki síst fjallað um hamingjuna. Þá hefur hann orð á því hve altaristaflan í Skálholtskirkju sé stórkostlegt listaverk og honum hugleikin.

SYSTURNAR TRÚ OG LIST

„Í guðsþjónustunni að þessu sinni naut ég auk helgihaldsins sjálfs þess að horfa á hina mögnuðu altaristöflu Nínu Tryggvadóttur og lifa mig inn í verkið, þar sem Kristur opinberar sig, nánast eins og hann komi í gegnum vegginn. Stórkostlegt listaverk þar sem systurnar trú og list haldast í hendur með áhrifamiklum hætti.“

Við birtum hér myndir sem Gunnlaugur tók af biskupi í prédikunarstólnum í Skálholtskirkju í messunni sem og af hinni tignarlegu Skálhotskirkju í blíðviðrinu í gærmorgun.

Skálholtskirkja skartaði sínu fegursta í blíðviðrinu í gær. (Ljósmynd: Gunnlaugur A. Jónsson).

Talið frá vinstri: Herdís Friðriksdóttir, framkvæmdarstjóri Skálholts, Þorsteinn Pálsson, formaður stjórnar Skálholts, sr. Kristján björnsson, vígslubiskup í Skálholti, og sr. Eva Björk Valdimarsdóttir biskupsritari. (Ljósmynd: Biskupsstofa).

Kanill er svolítið kulvís

Sun, 23 Mar 2025 16:49:07 GMT

Mikið var gaman að rekast á þau hjón og Grafarvogsbúa, Hugrúnu Sif Símonardóttur og Kristján Guðjónsson, þar sem þau röltu um á göngustígnum nálægt Gullinbrú í góðviðrinu í hádeginu og viðruðu í leiðinni hundinn sinn, hann Kanil. Kanill er sex ára blendingur, Púddle og Bichon frise.

Það vakti auðvitað athygli mína að Kanill var í þessari fínu yfirhöfn sem kemur til af því að hann er víst svolítið kulvís karlinn. Í mestu vetrarkuldunum þarf eiginlega að neyða hann út en þegar hlýnar í lofti færist hann allur í aukana og þá fær hann jafnvel þrjár góðar gönguferðir á dag.

Hann var hinn rólegasti þegar Kristján tók hann í fangið fyrir myndatökuna. Gaman að spjalla við þau hjón.

Poodle er sagður eftirtektarsamur hundur, hugsuður og auðveldur í þjálfun. Þeir eru frábærir fjölskylduhundar og eitt einkenni þeirra er feldurinn.

Bichon frise er sagður glaðlyndur, fjörugur og blíður smáhundur sem nýtur síaukinna vinsælda hér á landi. Hann er duglegur og hefur einstaklega gaman af að vera í námunda við fólk.

Kvika banki borgar 23 milljarða út vegna sölunnar á TM - sjá töflu um arðgreiðslur

Sun, 23 Mar 2025 14:45:22 GMT

Hluthafar Kviku fá mesta glaðninginn í formi arðgreiðslna hjá félgum í Kauphöllinni þetta árið. Þetta kemur fram í nýjasta þætti hlaðvarps okkar Sigurðar Más Jónssonar , HLUTHAFASPJALLINU , á Brotkast.is En Kvika banki greiðir 23 milljarða út í arð og er sú fjárhæð að mestu til kominn vegna sölunnar á TM til Landsbankans á síðasta ári. Bankarnir eiga stærsta hluta arðgreiðslanna að að venju eða um 50 milljarða króna af þessum 80 milljörðum. Þá vekur há arðgreiðsla fasteignafélagsins Eikar nokkra athygli, en félagið greiðir um 3,6 milljarða króna út en Mata-fjölskyldan svonefnda er stærsti hluthafinn í Eik.

Á meðfylgjandi mynd má sjá skiptinguna á arðgreiðslunum eftir einstaka félögum í Kauphöllinni.

Við Sigurður Már birtum þessa töflu af arðgreiðslum félaga í Kauphöllinni í nýjasta HLUTHAFASPJALLINU okkar á Brotkast.is í spjalli okkar við Helga Vífil Júlíusson hlutabréfagreinanda.